ཁྲིམས་བཤེར་འབྲས་མེད་དུ་གྱུར།

ཁོར་ཡུག་སྲུང་སྐྱོབ་པ་ཀརྨ་བསམ་འགྲུབ་ཀྱི་ཁྲིམས་གཏུགས་ལ་བསྐྱར་དུ་ཁྲིམས་བཤེར་ཐག་གཅོད་གྲུབ་སྟེ་ཟླ་གཅིག་ཙམ་འགོར་ཟིན་པའི་རྗེས་སུ། ད་གཟོད་ཁོའི་ནང་མི་དང་ཁྲིམས་རྩོད་པར་གནས་ཚུལ་དེ་ཕྱིར་བསྒྲགས་བྱས་ཡོད་འདུག

ཕྱི་ཟླ་ ༨ པའི་ཚེས་ ༢ ཉིན། ཀརྨ་བསམ་འགྲུབ་ཀྱི་བཟའ་ཟླ་སྒྲོལ་དཀར་དང་ཁོང་གི་ཁྲིམས་རྩོད་པ་ཕུའུ་ཀྲི་མེན་གཉིས་ཀྱིས་སྒེར་གྱི་ཟིན་བྲིས་སུ་གནས་ཚུལ་སྤེལ་བ་ལྟར་ན། ཕྱི་ཟླ་ ༧ པའི་ཚེས་ ༧  ཉིན་ཁོར་ཡུག་སྲུང་སྐྱོབ་པ་ཀརྨ་མ་བསམ་འགྲུབ་ལགས་ཀྱི་ཁྲིམས་གཏུགས་ལ་ཁྲིམས་ཁང་གིས་སྔར་མུས་ཁྲིམས་བཅད་ལྟར་ལོ་ ༡༥ ཁྲིམས་ཐག་གཞིར་བཟུང་བྱ་རྒྱུ་ཐག་གཅོད་བྱས་ཟིན་ཡོད་ནའང་། དོ་བདག་གི་ནང་མི་དང་ཁྲིམས་རྩོད་པར་གནས་ཚུལ་དེ་གསང་རྒྱ་བྱས་ཏེ་ཟླ་གཅིག་ཙམ་འགོར་བའི་རྗེས་སུ་མ་གཏོགས་ཕྱིར་བསྒྲགས་བྱས་མི་འདུག 

ཁྲིམས་རྩོད་པ་ཕུའུ་ཀྲི་མེན་གྱིས་རང་གི་ཟིན་བྲིས་སུ་དེའི་སྐོར་གྱི་གནས་ཚུལ་བཀོད་དོན། ཡན་ཆི་ཁྲིམས་ཁང་གིས་ཕྱི་ཟླ་ ༦ པའི་ཚེས་ ༢༤ ཉིན། གྱོད་དོན་གྱི་ཐོག་མའི་ཁྲིམས་བཅད་ཁྱབ་བསྒྲགས་(༡)བྱས་ཡོད་པ་དང་། སྐབས་དེར་ཞལ་ལྕེ་པ་ཆེན་མོ་(༢)ཀའོ་ཐེན་ཀྲི་ཡིས “ཁྲིམས་ར་གྲོལ་རྗེས་བཅད་ཁྲ་(༣)བོད་བསྒྱུར་གྱིས་ཁྲིམས་གཏུགས་པར་འབུལ་རྒྱུ་ཡིན” ཞེས་བརྗོད་སོང་། ང་ཚོས་སྐབས་ཐོག་དེ་ཉིད་དུ་བསྐྱར་དུ་ཁྲིམས་གཏུགས་བྱ་རྒྱུ་ཡིན་པ་གསལ་བོར་བརྗོད་ཡོད། ཁྲིམས་གཏུགས་དུས་བཀག་ནི་ཉིན་ ༡༠ ཡིན་ལ། ཕྱི་ཟླ་ ༧ ཚེས་ ༤ ཉིན་ནི་མཐའ་མའི་དུས་བཀག་གི་ཉིན་ལ་ཁེལ་ཡོད།  ང་དང་ལིས་ཧའེ་ཆིན་གཉིས་ཀྱིས་ཚེས་ ༤ ཉིན་བར་ཁྲིམས་གཏུགས་ཡིག་ཆ་ཁག་དང་ཁྲིམས་རྩོད་པའི་འགྲོ་ལུགས་ཡོང་རྫོགས་སྒྲུབ་ཟིན་པ་ཡིན། ཚེས་ ༧ ཉིན་ཡན་ཆི་ཁྲིམས་ཁང་གི་ལས་དྲུང་གིས་ཡིག་ཆ་ཁག་མཆན་འགོད་དང་ལེན་བྱས་བྱུང་། ལིས་ཧའེ་ཆིན་གྱིས་དེ་མ་ཐག་ཁྲིམས་དཔོན་མཱ་ཙིན་ཧྭ་ལ་ཁ་པར་བཏང་སྐབས། ཁོས་འགྲོ་ལུགས་དག་གྲུབ་རྗེས་གྱོད་དོན་ཡིག་ཆ་ཁག་པཱ་ཀྲིག་འབྲིང་རིམ་མི་དམངས་ཁྲིམས་ཁང་ལ་བརྒྱུད་སྤྲོད་བྱས་ཏེ་དོ་བདག་ཀྱང་ཁུལ་ཐོག་ཏུ་གནས་སྤོར་གྱིས་བཀག་བསྐྱིལ་བྱ་རྒྱུ་ཡིན་པ་དང་། ཁྲིམས་གཏུགས་ཡིག་ཆ་དང་ཁྲིམས་རྩོད་པའི་འགྲོ་ལུགས་སོགས་ཀྱང་འབྲིང་རིམ་མི་དམངས་ཁྲིམས་ཁང་ལ་སྤྲོད་རྒྱུ་ཡིན་པས།  ཁྱེད་ཚོས་ཐད་ཀར་འབྲིང་རིམ་མི་དམངས་ཁྲིམས་ཁང་གི་ཁྲིམས་དཔོན་ལུའུ་ལ་འབྲེལ་བ་བྱེད་དགོས་ཞེས་འབྲེལ་བ་བྱ་ཡུལ་གྱི་ཁ་པར་ཨང་གྲངས་ཤིག་ཀྱང་སྤྲད་བྱུང་། ཁོ་ཚོས་བརྗོད་པ་ནང་བཞིན་ང་ཚོའི་ངོས་ནས་སྒྲུབ་དགོས་པ་མཐའ་དག་བསྒྲུབ་ཟིན་པ་ཡིན། ཡིན་ནའང་། ཁ་པར་ཨང་གྲངས་དེ་ནི་ཁྱིམ་སྤྱོད་ཁ་པར་ཨང་གྲངས་ཤིག་རེད་ལ། ཅི་བྱས་ཀྱང་ཁ་པར་དེ་བརྒྱུད་ནས་ཁྲིམས་དཔོན་ལ་འབྲེལ་བ་བྱ་ཐབས་མི་འདུག  དེ་ལྟར་དུས་ཡུན་ཡང་གང་འཚམ་འདས་སོང་།   ལིས་ཧའེ་ཆིན་གྱིས་དུས་བཀག་ལས་ཡོལ་བར་བློ་འཚབ་ཀྱིས་ཉིན་རྒྱུན་ཐབས་ཤེས་གང་ཡོང་བྱས་ནའང་། འབྲེལ་ཡོད་མི་སྣའི་གཟིགས་དང་གྲུབ་མ་ཙམ་ཡང་མཐོང་རྒྱུ་མ་བྱུང་། དེ་རིང་ཕྱི་ཟླ་ ༨ པའི་ཚེས་ ༢ ཉིན་གཞི་ནས་ཁྲིམས་དཔོན་གྱིས་ཚུར་ང་ཚོ་ལ་ཁ་པར་བཏང་ཡོང་ནས། ཕྱི་ཟླ་ ༧ པའི་ཚེས་ ༧ ཉིན་ཁྲིམས་གཏུགས་རྩིས་མེད་ཕྱིར་སློག་གིས་སྔར་མུས་ཁྲིམས་བཅད་རང་འཇགས་ཐག་གཅོད་བྱས་ཟིན་པའི་སྐོར་བརྗོད་བྱུང་། ཁྲིམས་བཤེར་ཐག་གཅོད་བྱས་ནས་ཧ་ལམ་ཟླ་གཅིག་ཙམ་འགོར་ལ་ཉེ་བའི་སྐབས་སུ་ད་གཟོད་ང་ཚོར་ཕྱིར་བསྒྲགས་བྱས་པ་རེད། ཁྲིམས་དཔོན་གྱིས་ད་དུང་ “ ཁྲིམས་གཏུགས་གནས་ཚུལ་དང་འགྲོ་ལུགས་ཡོད་ཚད་ངོས་ལེན་བྱས་པ་ཡིན། ཡིན་ནའང་། བསྐྱར་ཞིབ་ཀྱི་དགོས་པ་ཅང་མི་འདུག ” ཟེར། ཅི་འདྲའི་དོན་དག་གློ་བུར་བ་ཞིག་རེད་ཨང་། ཞེས་ཁོའི་ཟིན་བྲིས་སུ་བཀོད་འདུག 

ཀརྨ་བསམ་འགྲུབ་ལགས་ཀྱི་བཟའ་ཟླ་སྒྲོལ་དཀར་ལགས་ཀྱིས་ཀྱང་ཟིན་བྲིས་སུ་དེའི་སྐོར་གྱི་གནས་ཚུལ་བཀོད་དོན།   ཕྱི་ཟླ་ ༧ པའི་ཟླ་མགོར་ང་རང་ཕྱིར་ཁྲིན་ཏུའུ་རུ་ལོག་རྗེས། ཡན་ཆི་ཁྲིམས་ཁང་གི་ཁྲིམས་དཔོན་མཱ་ལ་ཁ་པར་བཏང་བ་ཡིན། ཁྲིམས་དཔོན་གྱིས་ཕྱི་ཟླ་ ༧ པའི་ཚེས་ ༦ ཉིན་གྱི་ཕྱི་དྲོ་ཕྱིར་ང་ལ་འཕྲིན་ཐུང་(༤)ཞིག་བཏང་ཡོང་སྟེ “གྱོད་དོན་ཁྲིམས་གཏུགས་བྱས་ཟིན། ཡིན་ནའང་། དོ་བདག་ལ་ཐུག་འཕྲད་བྱས་མི་ཆོག” ཟེར། ངས་ཁྲིམས་རྩོད་པར་དེའི་སྐོར་འདྲི་རྨེད་(༥)བྱས་པར། ཁྲིམས་ཀྱི་སྒྲིག་གཞི་ལྟར་སྐབས་ཐོག་དེར་ཐུག་མི་ཆོག་པ་དངོས་བདེན་ཡིན་འདུག  དེར་བརྟེན་ངས་མུ་མཐུད་ཁྲིམས་གཏུགས་སྐོར་གྱི་གནས་ཚུལ་ལ་བསྒུག་ནས་སྡོད་པ་ལས་ཐབས་གཞན་མི་འདུག 

སྐབས་དེ་དག་ཏུ་ངས་ཁྲིམས་བཤེར་ཐེངས་གཉིས་པ་དེ་ཅི་འདྲ་ཞིག་འབྱུང་མིན་དང་། སྤྱི་བསྒྲགས་ཡོང་མིན། བསྐྱར་དུ་བཟའ་ཟླར་ཐུག་འཕྲད་བྱེད་ཐུབ་མིན་སོགས་སེམས་ཁྲལ་ཁྲོད་ཉི་མ་བསྐྱེལ་དགོས་བྱུང་། ཡིན་ནའང་། ངའི་སེམས་སུ་འཇིག་རྟེན་འདིར་བདེན་པར་རྒྱལ་ཁ་ཐོབ་པའི་ཉི་མ་ཞིག་འཆར་སྲིད་པའི་རེ་བ་དེ་ཡལ་མ་མྱོང་།

དེ་རིང་ཉིན་གུང་ཁྲིམས་རྩོད་པར་ཕྱི་ཟླ་ ༧ པའི་ཚེས་ ༧ ཡིན་ཁྲིམས་བཤེར་གྲུབ་སྟེ་ཁྲིམས་བཅད་སྔར་མུས་ལྟར་ཐག་གཅོད་བྱས་ཟིན་པའི་གནས་ཚུལ་འབྱོར་འདུག ངས་ཟླ་ངོ་གཅིག་གི་རིང་ལ་སེམས་ཁྲལ་དང་དཀའ་སྡུག་ཁྲོད་གནས་ཚུལ་ལ་སྒུག་ནས་བསྡད་པ་ཡིན། འོན་ཀྱང་། བསྐྱར་ཞིབ་ཁྲིམས་བཅད་ཟིན་ནས་ཟླ་གཅིག་ཙམ་འགོར་བའི་རྗེས་སུ། ད་གཟོད་ཁྲིམས་རྩོད་པ་དང་ང་ཚོས་ཁྲིམས་ཁང་གིས་སྔར་མུས་ཁྲིམས་བཅད་ལྟར་བསྐྱར་དུ་ཐག་གཅོད་བྱས་ཟིན་པ་ཤེས་རྟོགས་བྱུང་བ་རེད།  དེར་མ་ཟད། དེ་སྔོན་ཁོ་ཚོས་གསང་བའི་ཁྲིམས་བཅད་བྱེད་བཞིན་པའི་ཉིན་དེ་ག་རང་ལ། ང་ལ་ “ཁྱོད་ཚོའི་ཁྲིམས་གཏུགས་ཀྱི་དུས་བཅད་ཏག་ཏག་ལ་ཁྲིམས་གཏུག་བྱས་ཟིན”  ཞེས་ ཁྲིམས་གཏུགས་ངོས་ལེན་གྱི་བརྡ་ལན་བཏང་ཡོད།   

ད་ལྟ་གློ་བུར་བའི་གནས་ཚུལ་འདི་འདྲ་ཞིག་བརྗོད་སྐབས་ངས་དངོས་གནས་ངོས་ལེན་བྱ་ཐབས་མི་འདུག  ངས་སྐབས་ཐོག་དེར་བྲེལ་འཚབ་ངང་ཁྲིམས་དཔོན་ཁུའུ་ཨར་ལིས་ལ་ཁ་པར་བཏང་ནས་སྐད་ཆ་འདྲི་སྐབས། ཁོས་ “ཁོ་རང་ཉིད་ཀྱིས་ཀྱང་དོ་བདག་གང་ན་ཡོད་མེད་མི་ཤེས། གཅིག་བྱས་ན་ཡན་ཆི་ལྟ་སྲུང་ཁང་ན་ཡོད་རྒྱུ་རེད། ༡༤༤ ལ་ཁ་པར་བཏང་ནས་བརྩད་གཅོད་བྱོས” ཟེར། ངས་བསྐྱར་དུ “འོ་ན། ཁྱོད་ཚོས་ཁོ་ལ་ཁྲིམས་བཤེར་བྱས་མེད་དམ” ཞེས་དྲིས་བར། ཁོས “ཕྱི་ཟླ་ ༧ པའི་ཚེས་ ༦ ཉིན་ཁྲིམས་བཤེར་བྱས་ཟིན། སྐབས་དེར་ཡན་ཆི་ལྟ་སྲུང་ཁང་ན་འདུག” ཅེས་བརྗོད་བྱུང་།   ང་དངོས་གནས་བློ་ཕམ་བྱུང་། ཕྱི་ཟླ་ ༧ པའི་ཚེས་ ༦ ཉིན་ནི་ཕྱོགས་གཅིག་གི་སྐད་ཆ་ལྟར་ན་ཁྲིམས་གཏུགས་ཀྱི་དུས་བཀག་ཡིན་པས་དོ་བདག་ལ་ཐུག་མི་ཆོག་ཟེར། ཡང་ཕྱོགས་གཅིག་གི་སྐད་ཆ་ལྟར་ན་དངོས་སུ་ཁྲིམས་བཤེར་བྱེད་བཞིན་པའི་སྒང་ཡིན་ཟེར། ཕྱི་ཟླ་ ༧ པའི་ཚེས་ ༧ ཉིན་ཕྱོགས་གཅིག་གི་སྐད་ཆ་ལྟར་ན་ཁྲིམས་རྩོད་པའི་ཁྲིམས་གཏུགས་ལ་མཆན་འགོད་དང་ལེན་བྱས་པ་ཡིན་ཟེར། ཡང་ཕྱོགས་གཅིག་གི་སྐད་ཆ་ལྟར་ན་ཁྲིམས་བཅད་ཐག་གཅོད་བྱས་ཟིན་པ་ཡིན་ཟེར།  ཅི་འདྲའི་གློ་བུར་བ་ཞིག་རེད་ཨང་། ངས་ད་ལྟ་ད་དུང་ཡང་གོ་བ་གསལ་བོ་ཞིག་ལེན་ཐུབ་ཀྱི་མི་འདུག  ༠༩༩༦-༡༡༤ ལ་ཁ་པར་བཏང་སྟེ་འདྲི་སྐབས། ཡན་ཆི་ལྟ་སྲུང་ཁང་གིས་ཀྱང་དོ་བདག་གང་དུ་ཡོད་མེད་མི་ཤེས་ཞེས་བརྗོད་བྱུང་།

ད་ལྟའི་ཅི་བྱ་གཏོལ་བྲལ་གྱི་གནས་སྐབས་འདིར་འབྲེལ་ཡོད་མི་སྣ་སུ་གང་གིས་ཀྱང་ཁ་པར་ལེན་གྱི་མི་འདུག  ང་གང་ཞིག་ལ་སོང་ནས་རང་ཉིད་ཀྱི་བཟའ་ཟླ་གར་ཡོད་བརྩད་གཅོད་བྱས་ན་ལེགས་སམ། སུ་ཞིག་གིས་ང་ལ་བརྗོད་སྲིད་དམ། ཞེས་རང་ཉིད་ཀྱི་ཟིན་བྲིས་སྟེང་བཀོད་འདུག

༡ ཁྲིམས་བཅད་ཁྱབ་བསྒྲགས།( pronounce sentence 宣判)ཁྲིམས་ཁང་གིས་གྱོད་དོན་ཞིབ་དཔྱད་བྱས་ཚར་རྗེས་ཉེས་ཅན་ལ་ཁྲིམས་ཐག་བཅད་པའི་མཇུག་དོན་ཁྱབ་བསྒྲགས་བྱེད་པའི་ཁྲིམས་ལུགས་ཀྱི་བྱ་སྤྱོད་ཅིག་གོ།
ཞལ་ལྕེ་པ་ཆེན་མོ། (审判长 Presiding judge) ཁྲིམས་ལྟར་ལྷན་གྲོས་བྱེད་པ་དང་ཁྲིམས་སའི་བྱ་བ་ལ་གཙོ་འགན་འཁུར་བའི་ཁྲིམས་གཅོད་མི་སྣའོ།
བཅད་ཁྲ། (判决书Court verdict; written judgment) ཁྲིམས་ཁང་གིས་གྱོད་གཞི་ཐག་བཅད་པའི་མཇུག་འབྲས་ཀྱི་ཡི་གེ་སྤེལ་བའོ།
འཕྲིན་ཐུང་། (短信Short Message Service(SMS))ལག་འཕྲིན་གཅིག་ནས་ལག་འཕྲིན་གཞན་ཞིག་ཏུ་གཏོང་བའི་འཕྲིན་ཐུང་ངུའོ།
འདྲི་རྨེད།(咨询Consult) དོན་ནམ་བསམ་འཆར་འདྲི་ལེན་བྱེད་པའོ།
<<བོད་རྒྱ་དབྱིན་གསུམ་གསར་བྱུང་རྒྱུན་བཀོལ་མིང་མཛོད>> ཀྱི་བརྡ་ཆད་ལྟར་བཀོད་པ་ཡིན།

ཚེ་རིང་རྒྱལ་གྱིས།