ངས་དེ་རིང་འདི་ནས་དུས་རབས་ཉེར་གཅིག་པའི་བོད་མི་ཟེར་ནས་གླེང་གཞི་འཛིན་དོན་ནི། དེང་སང་དྲ་ཐོག་དང་ཡིག་ཐོག ངག་ཐོག་སོགས་ནས། བོད་མི་འདུས་བསྡོད་ཀྱི་ས་གནས་བོད་ཕྱི་ནང་གཉིས་ཀྱི་གཙོ་བའི་བོད་རིགས་འདུས་བསྡོད་ཀྱི་ཡུལ་གྲུ་གང་ས་ནས་ང་བོད་ཡིན་ཟེར་བ་ཞིག་གླེང་འགོ་བཙུགས་དེ་ལོ་ངོ་འགའ་སོང་ཡོད་ལ། དེ་ཡང་ངག་ཐོག་ནས་བརྙན་འཕྲིན་ཐུང་ཐུང་བཟོས་པ། ཡིག་ཐོག་ནས་བསམ་ཚུལ་སྤེལ་བ། འདུས་འཛོམ་གྱི་སྒོ་ནས་བགྲོ་གླེང་སྤེལ་བ་བཅས་བྱུང་ཡོད་ལ། དེ་ཡང་བོད་ནས་མཆེད་པའི་མེ་ལྕེ་ཞིག་དང་འགྲོགས་ནས་དེང་གི་བོད་མི་འདུས་བསྡོད་ཀྱི་འཛམ་གླིང་གང་སར་མཆེད་པ་རེད།
དེ་ཡིན་དུས་དེ་རིང་འདི་ནས་བདག་གི་རང་ཅག་བོད་མི་ཡིན་པ་གང་ཞིག་ལ་དུས་རབས་ཉེར་གཅིག་པའི་བོད་མི་ཞིག་བྱེད་པ་ལ་ཆ་རྐྱེན་གང་ཞིག་་ཚང་དགོས་མིན་གྱི་ཐད་དུ་བདག་གི་བསམ་ཚུལ་ཞིག་འབྲི་བཞིན་ཡོད། མི་རིགས་སུ་ཞིག་ལ་མཚོན་ན་ཡང་ཐོག་མ་མི་རིགས་ཤིག་ལ་ངེས་འཛིན་བྱེད་ལུགས་དེ་ནི་སྐད་དང་ཡི་གེ་གཉིས་ཆགས་ཡོད་པར་ཀུན་མཐུན་ལྟ་བ་ཞིག་ཆགས་ཡོད་པ་རེད། དེ་ཡིན་དུས་དེང་གི་འཆར་འུ་ཅག་ནི་དུས་རབས་ཉེར་གཅིག་ནང་གི་བོད་མི་ཞིག་བྱེད་པ་ལ་ཐོག་མར་རང་རིགས་ཀྱི་སྐད་དང་ཡི་གེ་ཤེས་དགོས་པ་དེ་ནི་དུས་རབས་ཉེར་གཅིག་པའི་བོད་མི་ཞིག་བྱེད་པའི་ཆ་རྐྱེན་དང་པོ་ཡིན་དགོས་པར་བདག་གི་དུས་དང་རྣམ་པ་ཀུན་དུ་འདོད་ཀྱིན་ཡོད་ལ། དེ་ལྟར་ཡིན་ཡང་དགོས། ད་དུང་། ལོ་མང་རིང་བོད་མི་ཞིག་བྱེད་པའི་མ་མཐའི་ཆ་རྐྱེན་ནི་བོད་ཀྱི་སྐད་དང་ཡི་གེ་ཤེས་དགོས་པར་ཐེངས་དུ་མར་གླེང་མྱོང་ཡོད།
དེ་རིང་ཡང་བསྐྱར་གླེང་ལྟ་བུ་ཞིག་ཆགས་ཡོད་ཀྱང་། ངས་དུས་རབས་ཉེར་གཅིག་པའི་བོད་མི་ཞིག་བྱེད་པ་ལ་ཐོག་མར་རང་གི་སྐད་ཡི་གེ་གཉིས་ཤེས་དགོས་པ་མ་ཟད། ཞོར་དུ་འཛམ་གླིང་གཞན་དག་ནང་རང་ཉིད་གང་དུ་འདུས་བསྡོད་བྱེད་ས་དེ་ཡི་སྐད་རིགས་ལ་སྤྱངས་པ་དང་དགའ་ཞེན་དང་གུས་བརྩི་བྱེད་རུང་བ་ཡིན་ལ། བྱེད་ཀྱང་དགོས་ཀྱི་ཡོད། དེ་མིན་ད་ལྟའི་འཆར་ང་ཚོ་ནི་རྒྱལ་ཁབ་མེད་པའི་མི་སྤྲང་ཤ་སྟག་ཡིན་ལ། ནམ་ཞིག་གི་བར་དུ་རང་ཡུལ་དུ་ལོག་རེག་བར་དུ་དེ་ལ་བསྟུན་ནས་གནས་ཁུལ་དེ་ནས་འཚོ་བ་བསྐྱེལ་དགོས་ཀྱི་ཡོད། འོ་རེད། དེང་སང་ཁ་ཤས་ལ་མི་རིགས་ཀྱི་བསམ་བློ་མེད་པ་དང་མི་རིགས་ཀྱི་འདུ་ཤེས་མེད་པ། རང་ཉིད་ཀྱི་ལྟོ་གོས་གཏམ་གསུམ་མ་གཏོགས། མེས་པོ་དང་རང་གི་ཡབ་མེས་དག་གི་ཤུལ་རྗེས་ལ་འགན་ལེན་བྱེད་འདོད་མེད་པ་ཆེས་མང་བོ་ཞིག་བྱུང་དེ་འོང་གི་འདུག དེ་དག་གི་རིགས་ལ་མི་འདོད་ཀྱང་བཙན་པོ་བྱེད་པའི་བདག་དབང་དང་ཐོབ་ཐང་དེ་ནི་ང་རང་ལ་གཏན་ནས་མེད་པ་ངས་ཤེས་ཀྱི་ཡོད་སྟབས། མི་དེ་ཡི་རིགས་ཀྱི་ངས་སྐད་ཆ་འདི་སྣང་མེད་ངང་གད་སྙིགས་ཁྲོད་དུ་གཡུགས་རྐྱང་བྱེད་ངེས་ཡིན་ལ། བྱས་ཀྱང་དེ་དག་ལ་ངས་ལེ་བདའ་ཇི་ལྟར་བྱེད། གལ་སྲིད། ལེ་བདའ་བྱེད་མཁན་ཞིག་ཡོད་པས་དབང་དུ་བཏང་ན། དེ་ནི་ཁོང་ཚོའི་ཡབ་མེས་དང་ཤུལ་འཛིན་པ་དག་ཡིན་སྲིད་པ་ཡིན།
ང་ཚོས་དུས་རབས་ཉེར་གཅིག་པའི་ཁྲོད་དུ་མི་རིགས་རང་ལུགས་ཀྱི་ལྟ་བ་བཟུང་དེ་ཁེར་རྐྱང་དུ་འབུད་མི་རུང་བ་ཟེར་མཁན་ཡང་ཏན་ཏན་ཡོད་ངེས་ཡིན། དེ་ཡི་སྐོར་ལ་ཁྱེད་ཅག་གི་བསམ་བློ་ཞིབ་དུ་གཏོང་རོགས་ཞུ། འུ་ཅག་གིས་རང་གི་མེས་པོ་དག་གི་ཞབས་རྗེས་ནག་གསུབ་མི་གཏོང་ཆེད་དུ་བདེན་པའི་ཆེད་དུ་མི་རིགས་ཤིག་གི་འཆི་གསོན་ལ་འགན་ལེན་བྱེད་ཀྱི་ཡོད་པ་ལས། རང་རྒྱལ་གཞན་ཕམ་གྱི་བསམ་བློའི་གཏིང་རིམ་ནས་མི་རིགས་རང་ལུགས་ཟེར་བ་དེ་ནི་དུས་ནམ་ཡང་རྩོད་ཀྱི་མེད་ལ། མི་རིགས་གཞན་གྱིས་དེ་ལྟར་བྱེད་པ་དེར་རྗེས་སུ་ཡི་རུང་ཡང་གཏན་ནས་བྱེད་དགོས་དོན་མེད། འུ་ཅག་གིས་རང་གི་རིགས་ཀྱི་ཞེན་པ་འདི་ལ་བདེན་པ་ཡོད་པ་དང་། མི་རིགས་འདི་འཛམ་གླིང་འདིར་གནས་པ་ལ་དོན་སྙིང་ལྡན་པ། མི་རིགས་འདིའི་སྐད་ཡིག་ལ་རིན་ཐང་ཡོད་པ་བཅས་ཀྱི་བདེན་པ་ལ་རྒྱབ་བརྟེན་བྱོས་དེ། དུས་རབས་ཉེར་གཅིག་པའི་བོད་མི་ཞིག་ཆགས་པར་འབད་བརྩོན་བྱེད་ཀྱི་ཡོད་པ་དེ་ཡིན་ལ། དུས་རབས་ཉེར་གཅིག་པའི་ནང་དུ་ཡང་བོད་ཟེར་བའི་མི་རིགས་འདིའི་ད་དུང་ཡང་དུས་རབས་བཅུ་དགུ་ཉི་ཤུའི་ནང་གི་གཉའ་གནོན་རང་ལུགས་ཀྱི་སྲིད་གཞུང་དེ་འདྲ་ལ་འགོ་སྒུར་ནས་འདུག་དགོས་དོན་མེད་པ་དེ་འཛམ་གླིང་མི་དམངས་ལ་བདེན་དབུང་བྱེད་ཀྱི་ཡོད་པ་དེ་ཡིན་པ་ལས། ཕྱོགས་རུས་རང་ལུགས་ཀྱི་མི་རིགས་རང་ལུགས་ཤིག་གཏན་ནས་རྩོད་ཀྱི་མེད་ལ། རྩོད་དགོས་དོན་ཡང་མེད། ད་དུང་། དུས་རབས་ཉེར་གཅིག་པའི་བོད་མི་ཞིག་གི་དངོས་ནས་བཤད་པ་ཡིན་ན། གཏན་ནས་ཡིག་རྨོངས་ཡིན་མི་རུང་བ་དང་། དེ་ཡང་རང་གི་སྐད་ཡིག་ལས་ལྷག་དུ་རྨོངས་པ་ཆགས་མི་རུང་བ་དེ་ནི། དུས་རབས་ཉེར་གཅིག་པའི་བོད་མི་ཞིག་བྱེད་རྒྱུའི་འོས་འགན་དང་བོ་དེ་ཡིན།
ལྷག་པར་དུ། དེང་སང་ཁ་ཤས་ཀྱི་རང་གི་བློ་ངོར་ཇི་ཤར་བདེན་དུ་སྣང་དེ། སྐད་ཡིག་གི་རིན་ཐང་མི་གླེང་བར་ཆབ་སྲིད་ཀྱི་རྩོད་རྙོག་ཁྲོད་དུ། རང་རྒྱལ་གཞན་ཕམ་གྱི་རྩ་དོན་ཁོ་ན་ཞིག་གླེང་དེ་འོང་མཁན་ལོ་རེ་ནས་ཇེ་མང་དུ་འགྲོ་བཞིན་ཡོད་པ་འདི་ནི། དུས་རབས་ཉེར་གཅིག་པའི་བོད་མི་ཞིག་སྐྱོབས་པའི་ཐབས་ལམ་ལས་དུས་རབས་ཉེར་གཅིག་པའི་བོད་མི་དག་འཆི་ལམ་དུ་འདེད་བྱེད་ཡིན་མིན་དེ་ཡི་ཐད་དུ། དུས་རབས་ཉེར་གཅིག་པའི་བོད་མི་བྱེད་འདོད་ཡོད་མཁན་གྱི་བོད་མི་གང་ན་སུ་ཡོད་པ་དག་གི་བགློ་གླེང་བྱེད་པ་ནས་རང་ཐོག་ནས་འགོ་བརྩམས་ཟིན་པ་དག་ལ་རྗེས་སུ་ཡི་རུང་། མ་བརྩམས་པ་དག་གིས་བརྩམས་རྒྱུ་དང་། བརྩམས་མྱོང་མེད་པ་དང་བརྩམས་འདོད་མེད་པ་དག་ལ་རེ་སྐུལ་བཅས། དེ་རིང་འདི་ཙམ་གྱི་བསམ་ཚུལ་ཐུང་ཐུང་འདི་ཕུལ་བ་ཡིན།
ཉི་ཟླའི་མགྲོན་བདག་ཞིག་ཕེབས་ནས། ཉི་མའི་གླིང་གི་བོད་ཡུལ་ཁ་བ་ཅན་གྱི་དོན་དུ་སེམས་འཁྲལ་ཞིག་གནང་བཞིན་ཕེབས་འདུག རྗེས་སོར་ཕེབས་ནས་སེམས་འཁྲལ་བྱེད་དགོས་པའི་རྒྱུ་རྐྱེན་རེ་གསུང་ཐུབ་པ་ཡིན་ན་དངོས་ནས་ཡག་པོ་འདུག་ལགས།
བསམ་ཚུལ་ཡག་པོ་རེད་།དུས་རབས་ཉེར་གཅིག་གིས་འབྱུང་བཞིའི་ཚང་ལྷག་འགྲོ་བའི་ཉེན་ཁ་ཆེན་པོ་འདུག།དེ་བས།ང་ཞེན་གི་ང་སྐྲག་གི་ཡ།
རྐང་གསུམ་ཅན་ཞིག་འཁོར་བ་བརྒྱབས་ནས་ཕྱིན།།
ཅོ་རི་ཉི་མ་ཁྲོ་ཞིག་བླངས་དེ་ཕྱིན།།
འབྲོང་བུ་ཟླ་བས་སླར་ཕེབས་གསུང་དེ་ཐལ།།
རིགས་ཀྱི་རུས་ཞེན་ཡོད་པའི་སྤུན་གྲོགས་ལས།།
ཁྱེད་ཅག་རྣམ་གསུམ་མ་གཏོགས་སླེབས་མི་འདུག།
ཡུན་གྱིས་གླེང་འདོད་ཡོད་ན་ཞིབ་དུ་དཔྱོད།།
རིགས་ཀྱི་ན་ཟུག་ཡོད་ན་ག་ལེར་གླེང་།།
མི་རིགས་བདེན་པ་བརྩོད་པར་སྙིང་སྟོབས་དགོས།།
ཁ་དང་ལག་པའི་བར་ཐག་རིང་མི་ཉན།།
སེམས་དང་ཁ་ཡི་གླེང་ཕྱོགས་ནོར་མི་རུང་།།
བོད་ཀྱི་འདས་གསོན་བྱ་བཞག་བརྗེད་མི་འོས།།
གང་ལྟར་འུ་ཅག་དུས་རབས་ཉེར་གཅིག་པའི།།
བོད་མི་ཉན་མིན་ཕྱོགས་ལ་བསམ་བློ་ཐོངས།།
ཆད་ལྷག་མང་པོ་ཤོར་འདུག་དགོངས་འགལ་མེད་པ་ཞིག
ཁྱེད་ཀྱིས་བོད་ཀྱི་སྐད་ཡིག་འདིར་བོད་མིའི་བླ་སྲོག་རྩིས་པ་འདི་ཡང་མཐའ་གཏུག་ན་བོད་རང་བཙན་སྒྲུབ་བྱེད་ཡིན་ལས་རྒྱ་ནག་གཞུང་དང་བོད་མིའི་འཚོ་བ་ཡར་རྒྱས་ལ་ཕན་པའི་བྱ་བ་ཅི་ཡང་མིན།
བོད་མི་རིགས་འདི་ལ་བོད་རང་བཙན་མ་དགོས་ན་རྒྱ་སྐད་རྒྱབ་ནས་འཚོ་བ་སྐྱིད་པོ་བྱུང་ན་འདྲ་ཨིན་སྐད་རྒྱབ་ནས་འཚོ་བ་སྐྱིད་པོ་བྱུང་ན་གཅིག་པ་རེད།
བོད་མིའི་བདེ་སྐྱིད་སྒྲུབ་ཆེད་དུ་བོད་ཡིག་ལས་ཀྱང་ལྷག་པ་ཨིན་ཡིག་དང་རྒྱ་ཡིག་ཡོད། ཅི་ཞིག་དོན་དུ་བོད་ཡིག་འདི་བོད་མི་རིགས་ཀྱི་ཆེད་དུ་དགོས་སོང་ངམ།
རང་རྒྱལ་གཞན་ཕམ་མ་དགོས་ན་་་་་ཅི་ཞིག་ཆེད་དུ་བོད་ཀྱི་སྐད་ཡིག་འདི་དགོས་སམ། ཟམ་གདོང་བླ་མ་བཞིན་ཆོས་བྱེད་པའི་ཆེད་དུ་དགོས་པ་ཡིན་གྱི་མ་རེད།
བཀྲ་ཤིས་བདེ་ལེགས། བསམ་ཚུལ་འདིའི་ཆེད་དུ་ཡོང་ནས་ཡོད། བདེན་པ་རང་རེད། ང་ཚོས་ད་དུང་ཡང་ཤུགས་ཀྱིས་འདི་ཡོང་བར་འབད་ཡ།
འཛམ་གླིང་འདིའི་སྟེང་དུ་རང་རྒྱལ་གཞན་ཕམ་གྱི་བསམ་བློ་མེད་པའི་མི་བུ་ཞིག་ཡིན་ན་ཁོང་ལ་ལྟ་ཚུལ་གཉིས་ཡོད།
དང་པོ་དམ་པའི་ལྷ་ཆོས་ཀྱི་ཕྱོགས་ནས་ལྟས་ན་རང་རྒྱལ་གཞན་གྱི་བསམ་བློ་མེད་པའི་མི་བུ་རྣམས་ནི་བྱང་ཆུབ་སེམས་དཔའ་ཡིན་པ་འདོད།
གཉིས་པ་འཇིག་རྟེན་ཕ་ཆོས་ཀྱི་ཕྱོགས་ནས་ལྟས་ན་རང་རྒྱལ་གཞན་ཕམ་གྱི་ལྟ་བ་མེད་ན་མི་བུ་དེར་ཕྱི་ནང་མེད་པའི་ཁྱི་ཞིག་ལ་བརྩི།
ཁྱེད་བདེ་མོ་ཡིན་ནམ། ཁྱེད་རྡ་ས་རི་བོའིོ་སྟེང་དུ་སྤྲོ་འཁྱམ་ཕེབས་ནས་བཟུང་ལྟ་བ་གསར་པ་ཞིག་དང་འདོད་ཚུལ་གསར་པ་འདྲ་མིན་བཤད་ཡོང་གི་འདུག་ད།
བོད་མི་རིགས་ཀྱི་ཕྱོགས་རུས་ཤིག་རྩོད་ཀྱི་མེད་ན་བོད་ཀྱི་སྐད་ཡིག་ལ་ཕྱོགས་རུས་བྱས་དགོས་པ་མེད།
བོད་མི་རིགས་ལ་རང་ཉིད་རྒྱལ་ཐུབ་པའི་འདུ་ཤེས་ཤིག་མེད་ན་་་་བོད་ཀྱི་སྐད་དགོས་དོན་མེད།
བོད་མི་རིགས་ལ་བོད་རྒྱལ་ཁབ་མ་མཁོ་ན་་་་བོད་ཀྱི་སྐད་ཡིག་མཁོ་དོན་མེད།
བོད་མི་རིགས་ལ་རང་རྒྱལ་གཞན་ཕམ་གྱི་བསམ་བློ་མེད་ན་་་་རང་གི་སྐད་ཡིག་དགོས་དོན་མེད།
བོད་མི་རིགས་ལ་རང་བཙན་མ་དགོས་ན་་་་བོད་ཀྱི་སྐད་ཡིག་དགོས་དོན་མེད།
བོད་མི་རིགས་ཀྱི་ལ་རྒྱ་མེད་ན་་་་་བོད་ཀྱི་སྐད་ཡིག་དང་བོད་སྐད་ཤེས་མཁན་ཞིག་དགོས་དོན་མེད།
རང་གི་སྐད་ཡིག་་་་་རང་གི་རིག་གཞུང་་་་་རང་གི་ལུགས་སྲོལ་་་་་རང་གི་ཆོས་ལུགས་་་་རང་གི་ལོ་རྒྱུས་་་་་་རང་གི་མི་རིགས་་་འདི་ཚོ་ཐམས་ཅད་བོད་རྒྱལ་ཁབ་ཀྱི་ངོ་བོ་མཚོན་བྱེད་ཡིན་པ་ལས་དེང་རབས་ཉེར་གཅིག་ནང་དུ་བོད་མིའི་འཚོ་བ་ལ་ཕན་ཐོག་མེད།
ཁྱེད་ཀྱིས་རང་བཙན་མི་མཁོ་སྐད་ཡིག་མཁོ་ཟེར་བ་དང།
བོད་རྒྱལ་ཁབ་མི་དགོས་སྐད་ཡིག་དགོས་ཟེར་བ་འདི་ཚོ་ནི་ནང་འགལ་ཁོ་ན་ཡིན་པ་སྣང།
དྲ་གྲོགས་ཁྱོད་ཀྱི་བསམ་ཚུལ་འདི་ལ་གཏིང་རུམ་ནས་ལྟ་རྒྱུ་ཞིག་དང་གོ་རྒྱུ་ཞིག་འདུག་ཐུགས་རྗེ་ཆེ།