བདུན་ཕྲག་གཅིག་རིང་གི་རྒྱལ་སྤྱིའི་བོད་རིགས་པའི་ཞིབ་འཇུག་ཚོགས་པའི་ཚོགས་ཆེན་ཐེངས་བཅུ་གཉིས་པ་དེ། ཁེ་ན་ཌའི་གྲོང་ཁྱེར་བྷོན་ཁོ་ཝོ་ནང་རྟེན་གཞི་བྱས་པའི་ཁི་ལིན་བྷི་ཡ་སློབ་གྲྭ་ཆེན་མོའི་ནང་ཚོགས་བཞིན་ཡོད་འདུག
རྒྱལ་སྤྱིའི་བོད་རིགས་པའི་ཞིབ་འཇུག་ཚོགས་པའི་ཚོགས་ཆེན་ཐེངས་བཅུ་གཉིས་པ་དེ་ཁི་ལིན་བྷི་ཡ་སློབ་གྲྭ་ཆེན་མོའི་ཨེ་ཤེ་ཡའི་ཞིབ་འཇུག་སྡེ་ཚན་གྱི་གོ་སྒྲིག་འོག་ཟླ་འདིའི་ཕྱི་ཚེས་༡༥ནས་༢༡བར་གྱི་ཉིན་གྲངས་ལྔ་ལྷག་གི་རིང་ཁེ་ན་ཌའི་གྲོང་ཁྱེར་བྷོན་ཁོ་ཝོ་ནང་ཡོད་པའི་ཁི་ལིན་བྷི་ཡ་སློབ་གྲྭ་ཆེན་མོ་རུ་སྐོང་འཚོགས་བཞིན་ཡོད་ལ།ཕྱི་ཚེས་༡༦ཉིན་ཚོགས་མི་རྣམས་ལྷན་འཛོམས་ཐོག་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་སྤྱི་ཁྱབ་འགན་འཛིན་སྐུ་ཞབས་ཆོའོ་རྫི་ར་བྷོ་ལགས་ཀྱི་ཚོགས་འདུ་དངོས་སུ་མགོ་འཛུགས་གནང་ཡོད་འདུག
ཐེངས་འདིའི་ཚོགས་ཆེན་སྟེང་འཛམ་གླིང་རྒྱལ་༢༡ལྷག་ནས་ཕེབས་པའི་བོད་རིག་པའི་ཆེད་མཁས་ཞིབ་འཇུག་པ་དང་སློབ་ཆེན་གྱི་དགེ་རྒན་ཆེན་མོ་བཅས་མི་གྲངས་༣༠༠ལྷག་འདུ་འཛོམས་ཀྱིས།བོད་ཀྱི་རིག་གནས་ཆེ་བ་ལྔ་གཙོས་བརྗོད་བྱ་སྣ་ཚོགས་སྟེང་ཆེད་རྩོམ་སྒྲོག་སྦྱོང་གནང་གི་ཡོད་པར་མ་ཟད།ཕྱི་གླིང་བ་བོད་རིག་པའི་ཞིབ་འཇུག་མི་སྣ་ཁག་ཅིག་གིས་བོད་ཀྱི་ཨར་ལས་མཉམ་བཟོ་དང་དཔལ་འབྱོར།མིའི་རིགས་རིག་པའི་སྐོར།བོད་ཀྱི་ཤེས་ཡོན་ཡར་རྒྱས་གཏོང་སྟངས།རི་མོ་དང་མཆོད་ཆས་འདྲ་མིན།བོད་ཀྱི་གྱོན་ཆས་འདྲ་མིན་ཀྱི་རིགས་སོགས་ཀྱི་སྟེང་ཚོགས་ཆུང་བཅུ་རུ་བགོས་ཏེ།ཚོགས་ཞུགས་པ་རྣམས་ཀྱིས་ཞིབ་འཇུག་བྱས་པའི་ཆེད་རྩོམ་སྒྲོག་སྦྱོང་དང་བགྲོ་གླེང་གནང་གིན་ཡོད་འདུག
ཐེངས་འདིའི་ཚོགས་ཆེན་སྟེང་བོད་ནས་མི་སྣ་༤༠ལྷག་ཕེབས་ཐུབ་ཡོད་ཀྱང་།གཞན་ཁག་ཅིག་ལ་རྒྱ་ནག་གཞུང་གིས་ཕྱི་སྐྱོད་ལག་འཁྱེར་མ་སྤྲད་པའི་དབང་གིས་ཚོགས་འདུར་བཅར་ཐུབ་མེད་སྟབས།རྒྱལ་སྤྱིའི་བོད་རིག་པའི་སྤྱི་ཁྱབ་འགན་འཛིན་མཆོག་གིས།རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་འདི་ཉིད་ཆབ་སྲིད་ཀྱི་ངོ་བོ་མ་འདྲེས་པའི་ཚོགས་ཆེན་ཞིག་དང་། བོད་རིག་པའི་ཞིབ་འཇུག་གི་ཐད་བགྲོ་གླེང་གནང་བཞིན་པའི་ཚོགས་ཆེན་ཞིག་ཡིན་ནའང་།རྒྱ་ནག་གཞུང་གིས་བོད་ནས་ཕེབས་འདོད་ཡོད་པའི་མི་སྣ་གང་མང་ཞིག་ལ་ཕྱི་སྐྱོད་ལག་འཁྱེར་དང་མཐོང་ཆེན་མ་སྤྲད་པར་བློ་ཕམ་ཆེན་པོ་ཡོད་སྐོར་དང་།མ་འོངས་པ་བོད་རིག་པའི་ཞིབ་འཇུག་གི་ཁྱབ་ཁོངས་ཆེ་རུ་གཏོང་ཆེད་བོད་ཀྱི་ཆོས་དང་རིག་གཞུང་ལ་དོ་སྣང་དང་སྲུང་སྐྱོབ་བྱ་རྒྱུ་གལ་ཆེན་ཡིན་པའི་སྐོར་འགྲེལ་བརྗོད་གནང་ཡོད་པ་རེད།
རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་ཆེན་དེ་ནི་ཕྱི་ལོ་ ༡༩༧༩ལོར་སུད་སིའི་གྲོང་ཁྱེར་ཛི་རིལ་ནང་མགོ་འཛུགས་བྱས་ཡོད་པ་དང་།དུས་དེ་ནས་བཟུང་ལོ་གསུམ་རེའི་ནང་འཛམ་གླིང་རྒྱལ་ཁབ་འདྲ་མིན་ནང་ཐེངས་རེར་སྐོང་འཚོགས་གནང་གི་ཡོད་པ་རེད།
གསར་འགོད་པ་དོན་གོ།
ཐེངས་འདིའི་བོད་རིག་པའི་ཚོགས་ཆེན་སྟེང་། བོད་ནས་མཚོ་སྔོན་མི་རིགས་དགེ་འོས་སློབ་ཆེན་གྱི་དགེ་རྒན་ཆེན་མོ་རྒྱ་ཡེ་བཀྲ་བྷོ་ལགས་དང་། གེ་སར་ཞིབ་འཇུག་ཚོགས་པའི་ཚོགས་གཙོ་གཅོད་པ་དོན་འགྲུབ་ལགས། ལྷ་སའི་རྩོམ་པ་པོ་ནོར་བྲང་ཨོ་རྒྱན་ལགས། རྩོམ་པ་པོ་ཨ་ཁུ་རྒྱ་གྲོལ་ལགས་བཅས་མི་སྣ་ ༤༠ ལྷག་ཕེབས་ཡོད་འདུག
རྒྱལ་སྤྱིའི་བོད་རིག་པའི་ཞིབ་འཇུག་གི་གནས་ཚུལ་སྐུ་ཞབས་ལུང་རིགས་རྒྱལ་གྱིས་འདྲ་པར་དང་བཅས་གསལ་བོ་ཞིག་གཏོང་རྒྱུའི་རེ་བ་ཆེ། ལྷག་དོན་ཕེབས་མཁན་རྣམས་ཀྱི་མཚན་གཞུང་དང་། རབ་ཡིན་ན་ལོ་རྒྱུས་སམ་ངོ་སྤྲོད་ཐུང་ངུ་རེ་འབྲི་རོགས། འདི་ནི་གནད་འགག་ཅན་གྱི་ཚོགས་འདུ་ཞིག་རེད།
དྲ་གྲོགས་ཚོས་ཤེས་རྒྱུ་ཞིག་ལ་འདི་ནི་བོད་རིག་པ་ཞིབ་འཇུག་བགྲོ་གླེང་ཚོགས་འདུ་ཞིག་ཡིན་པ་ལས་བོད་ཀྱི་ཆབ་སྲིད་གནད་དོན་བགྲོ་གླེང་གི་ཚོགས་འདུ་ཞིག་མ་རེད། ཡིན་ཡང་བོད་ཀྱི་ཆབ་སྲིད་ལ་ཞིབ་འཇུག་བྱེད་མཁན་ཡང་གྲོགས་འདུ་ཐོག་ཞུགས་ཡོད་པ་ངོ་མ་རེད། དེ་མིན་མཚོ་སྔོན་ནས་རྒྱ་ཡེ་བཀྲ་བྷོ་དང་སྟོབས་ལྡན།
སོགས་བོད་རིགས་དགེ་རྒན་དང་ཆེད་མཁས་པ་མང་པོ་ཞིག་ཚོགས་འདུར་བཅར་ཡོད། ལམ་གླ་ཡོད་ཚད་ཀུན་ཕན་ཐེབས་རྩ་ཚོགས་པའི་རྒྱབ་སྐྱོར་བྱས་ཡོད་པ་རེད།
དེ་མིན། བོད་ཕྱི་ནང་གཉིས་ཀྱི་མཁས་པ་ཚོ་གཞི་གཅིག་ཏུ་འདུས་ནས་བོད་རིག་པར་བགྲོ་གླེང་བྱེད་པའི་གོ་སྐབས་ཞིག་བྱུང་བ་འདི་གལ་ཆེན་པོ་རེད་ལ།དོན་སྙིང་ཡང་ཆེན་པོ་འདུག ངས་བསམ་ན་བོད་ནང་ནས་ཕེབས་པའི་མཁས་པ་ཚོས་ཆབ་སྲིད་ཀྱི་ཐད་ནས་ཅི་ཡང་བརྗོད་དགོས་དོན་མེད། ཀྲུང་གོའི་ཁོ་ཚོར་བཙན་ཚུགས་སྐད་ཆ་འགའ་བཤད་དུ་འདུག་ན་ཐང་མོད། དེ་མིད་ཐལ་ཡན་ཆད་ཀྱི་སྐད་ཆ་ཡིན་པ་བོད་མི་ཞིག་ཡིན་ཚེ་ཤེས་ངེས་རེད། ཁོ་ཚོས་རིག་གཞུང་ཞིབ་འཇུག་པའི་མི་ཐོག་ནས་བོད་ཕྱི་ནང་གི་བསམ་བློ་བྱེད་པའི་གོ་སྐབས་འདི་བརྒྱུད་བསྐྱངས་རྒྱུ་དེ་ཧ་ཅང་གཙོ་བོ་རེད།
བོད་ནས་ཕེབས་པའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་བཅར་བ་རྣམས་དང་ཚོགས་ཞུགས་པ་ཡོངས་ལ་འཚམས་འདྲི་ཡོད། ཕྱོགས་གཅིག་ནས་རྒྱ་ནག་གིས་ཕྱིར་སྐྱོད་མཐོང་ཆེན་མ་སྤྲད་པ་དེར་བློ་ཕམ་བྱས་ནས་སྡོད་མི་དགོས་པར་བོད་ནས་ཕེབས་མཁན་ཁྱེད་ཚོས་བོད་ཀྱི་དངོས་ཡོད་གནས་ཚུལ་གང་ཡིན་པ་དེ་འཛེམས་འདོག་མེད་པར་གསུང་ཐུབ་ན་བོད་ཕྱི་ནང་གི་ཕྱོགས་ནས་ཕེབས་མཁན་ཉུང་བར་སྐྱོད་དེ་ཙམ་མེད། གཞི་རྩའི་ཆ་ནས་ལག་ཁྱེར་སྤྲད་པ་དང་མ་སྤྲད་པའི་བར་གྱི་ཁྱད་པར་དེའང་གསལ་པོ་ཤེས་ཀྱི་ཡོད། གང་ལྟར་ད་ཐེངས་ཁྱེད་ཅག་གིས་ཕྱི་ཕྱོགས་ནས་དྲ་རྒྱ་འདིར་གཟིགས་ཐུབ་སྲིད་པས། འདི་ནས་ཁྱེད་རྣམས་ཀྱི་ནུས་ཤུགས་ལ་རེ་བ་བརྒྱབ་ནས་ཡོད་པའང་ཁྱེད་ཚོས་ངེས་པར་ཤེས་དགོས་ཀྱི་ཡོད།
འུ་ཅག་གི་ལས་དབང་རྡུགས་དྲགས་པའི་དབང་གིས་བོད་དོན་ལ་བོད་པ་ཞུགས་མི་ཆོག་པའམ་ཞུགས་མི་ཐུབ་པའི་གནས་ཚུལ་འདི་བྱུང་བ་རེད། བོད་ནང་དུ་ཡོད་པའི་ངོ་ཤེས་རྩོམ་པ་པོ་ཁ་ཤས་ལ་ཡང་མཐོངས་ཆེན་སྤྲད་མི་འདུག དེ་ཙམ་དུ་མ་ཟད་འབྲུག་ཆུའི་ཆུ་ལོག་གི་གནོད་སྐྱོན་ཐེབས་པའི་ས་ཁུལ་གྱི་ཆེད་དུ་ཞལ་འདེབས་ཀྱང་བསྡུས་མི་ཆོག་པ་བཟོས་འདུག
རྒྱལ་སྤྱིའི་བོད་རིགས་པའི་ཞིབ་འཇུག་ཚོགས་པའི་ཚོགས་ཆེན་ཐེངས་བཅུ་གཉིས་བའི་སྟེང་འཛམ་གླིང་རྒྱལ་༢༡ལྷག་ནས་ཕེབས་པའི་བོད་རིག་པའི་ཆེད་མཁས་ཞིབ་འཇུག་པ་དང་སློབ་ཆེན་གྱི་དགེ་རྒན་ཆེན་མོ་བཅས་མི་གྲངས་༣༠༠ལྷག་དང་བོད་ནས་མི་སྣ་༤༠ལྷག་ཕེབས་ཐུབ་ཡོད་པ་དེ་ང་ཚོ་ཚང་མ་དགའ་འོས་བའི་དོན་ཆེན་ཞིག་རེད།
ཚོགས་ཞུགས་པ་ཚང་མ་ལ་མཚམས་འདྲི་ཞུ་བ་ཆབ་ཅིག་ལྷག་པར་གཞིས་ནས་ཕེབས་པའི་ཚོགས་མི་རྣམ་པར་དམིགས་གསལ་དགའ་གསུ་ཡོད། དེར་མ་ཟད་ཁྱེད་ཅག་བརྒྱུད་གཞིས་ལུས་སྤུན་ཟླ་ཡོངས་ལ་བཀྲ་ཤིས་བདེ་ལེགས་ཞུ་རྒྱུ་ཡིན། ཐེངས་འདིའི་ཚོགས་འདུ་ལ་ཕེབས་པར་རྒྱ་གཞུང་གིས་འཐོང་འཆན་མ་སྤྲད་པ་ཚོར་གདུང་སེམས་མཉམ་སྐྱེད་ཡོད་ལ་ཁྱེད་རྣམ་པ་ནི་བོད་དང་བོད་ཀྱི་རིགས་གཞུང་ལ་ཤ་ཞེན་དང་རྒྱུས་མངའ་ཆེན་པོ་ཡོད་པ་འཐོང་ཆེན་མ་སྤྲད་དེ་ཀས་ཤེས་ནུས་པས་དུས་དང་རྣམ་པ་ཀུན་དུ་སྙིང་ཁོང་ནས་བརྗེད་ཐབས་མེད། འུ་ཅག་བོད་མི་རྣམས་འདི་ལྟར་གཙན་གནོན་དང་གནར་གཅོར་གཏོང་བཞིན་པ་འཛམ་གླིང་མི་མང་ལ་གསལ་པོ་བཟོ་དགོས། ད་ལམ་ཚོགས་ཆེན་སྟེང་བགྲོ་གླེང་ལྷུག་པོ་འོང་བའི་སྨོན་འདུན་རྒྱ་ཕྲག་བཅས་སེ་ར་ནས་ཤིས་རི་ཡིས་ཕུལ།།
འཛམ་གླིང་ཕྱོགས་བཞི་གང་ས་ནས་རྒྱལ་སྤྱིའི་བོད་རིགས་པའི་ཚོགས་ཆེན་སྟེང་ཕེབས་མཁན་ཡོངས་ལ་དམིགས་བསལ་གྱིས་འཚམས་འདྲི་ཡོད་ལ། ལྷག་དུ་བོད་ནས་ཕེབས་མཁན་སྤུན་ཟླ་དེ་དག་སྙིང་དབུས་ནས་བཀྲ་ཤིས་བདེ་ལེགས་ཞུ། ཁྱེད་ཅག་གིས་བོད་ནང་གི་བོད་མི་དག་གི་ད་ལྟའི་བོད་ཀྱི་སྤྱི་ཚོགས་འཚོ་བ་དངོས་ཀྱི་བརྗོད་གཞིར་གྱུར་བའི་རྩོམ་ཡིག་མི་ཉུང་བ་ཞིག་ཀྱང་སྒྲོག་སྤྱངས་བྱེད་ཐུབ་པའི་ཡིད་ཆེས་ཀྱང་ཡོད་ལགས།
རང་ཉིད་བོད་མི་ཞིག་གི་དངོས་ནས་ཁྱེད་ཅག་དེར་འདུས་ཀྱི་སྤུན་ཟླ་ཡོངས་ཀྱིས་བོད་ཀྱི་རྩོམ་རིག་གི་འཆི་གསོན་དང་འབྱུང་འགྱུར་སླར་གསོའི་ནུས་པ་བསྐྱེད་སྟངས་བཅས་ཀྱི་ཐད་དུ་བགྲོ་གླེང་ལྷུག་པོ་གནང་ཐུབ་པར་ཡིད་ཆེས་དང་བཅས་རེ་སྐུལ་ཞུ།
དགའ་བསུ་ཡོད་ལ།བོད་ནང་གི་མཁས་དབང་སུ་དང་སུ་ཕེབས་ཡོད་ཁུ།
རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་ཆེན་དུ་ཆེད་བཅར་གནང་མཁན་འཛམ་གླིང་ས་ཕྱོགས་གང་ས་ནས་ཕེབས་པའི་བགྲོ་གླེང་བ་རྣམ་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། ལྷག་པར་བོད་ནས་ཕེབས་པའི་རང་རིགས་སྤུན་ཟླ་རྣམས་ལ་ས་མཐའ་འདི་ནས་དམིགས་བསལ་འཚམས་འདྲི་ཞུ་རྒྱུ་ཡིན།
བགྲོ་གླེང་ལྷུག་པོ་དང་། མཛའ་མཐུན་ཡུན་གནས། རིག་པའི་སྒོ་མོ་རྒྱ་ཆེར་ཕྱེ་བའི་རེ་སྨོན་ཤུགས་དྲག་དང་བཅས། །
བསེ་རུ།