མདུན་ངོས།
About Us
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
No Result
ཆ་ཚང་གཟིགས།

ར་བསད་དེ་ལུག་འདར་དུ་འཇུག་འདོད་པ་རེད།

བོད་ཀྱི་དུས་བབ།
༢༠༡༠/༠༨/༢༡
Share on FacebookShare on TwitterShare on EmailShare on Whatsapp

 

བོད་མི་མང་སྤྱི་འཐུས་ཆབ་བྲག་ལྷ་མོ་སྐྱབས་ལགས་སུ་བཅར་འདྲི།

དྲི་བ། ལོ་སྔ་ཕྱིར་བོད་ནང་གི་རྩོམ་པ་པོ་སྐོར་ཞིག་གིས་རྒྱ་གཞུང་གི་སྲིད་ཁྲིམས་ལ་ཐད་ཀར་གདོང་གཏད་པའི་དབང་གིས་བཙོན་དུ་ཚུད་པ་དང་ཉེས་རྡུང་རེག་པ། གོ་གནས་ཕབས་པ་སོགས་ཀྱི་ཛ་དྲག་གི་གནས་ཚུལ་ཞིག་འབྱུང་བཞིན་ཡོད་པ་འདིར་ཕུགས་ཀྱི་ཕན་གནོད་གང་འདྲར་མཐོང་གི་ཡོད་དམ།   

ལན། གནད་དོན་འདི་ལ་རིགས་གཉིས་ཡོད་པ་རེད་དྲན་ཡོད། རིགས་གཅིག་གིས་བློ་ཐག་རྦད་ཆོད་གནང་ཡོད་པ་རེད་ལ།རིགས་གཅིག་གིས་ཐབས་མཁས་པོའི་ཐོག་ནས་བསྒྲུབ་སྙམ་ཡོད་པ་རེད། མི་སྒེར་གྱི་འདུན་པར་མ་ལྟོས་པར་བདེན་དོན་འཐབ་རྩོད་ཀྱི་ལས་དོན་ཧྲིལ་བོའི་ཐོག་ནས་བལྟས་ན། འཛིན་བཟུང་བཙོན་འཇུག་དང་། ཉེས་རྡུང་ཁྲིམས་ཆད། ཚེ་སྲོག་ཤོར་བ་སོགས་ངེས་པར་དུ་ཡོང་དགོས་པ་ཞིག་རེད། ང་ཚོས་རྒྱ་དམར་ལ་མི་ཤུགས་དང་རྒྱུ་ཤུགས། དབང་ཤུགས་གང་ཐད་ནས་དོ་ཟླ་ཡོང་ཐབས་ཡོད་པ་མ་རེད། ང་ཚོར་སྟོབས་ཤུགས་གཅིག་རང་ཡོད་པ་ནི་བདེན་པའི་སྟོབས་རེད།བདེན་དོན་འཐབ་རྩོད་བྱ་རྒྱུར་ཐབས་ལམ་འཚེ་མེད་ཞི་བར་བརྟེན་དགོས་ཀྱང་། མི་མ་ཤི་ཁྲག་མ་བཞུར། དཀའ་ལས་མ་བརྒྱབ་པར་འགྲུབ་ཐུབ་པ་ཞིག་མ་རེད། ལྷག་པར་དུ་ང་ཚོའི་ཁ་གཏད་རྒྱ་གཞུང་གི་གཏུམ་སྤྱོད་དེས་ཀྱང་། ང་ཚོར་སྲོག་གི་འགྲོ་གྲོན་མི་གཏོང་རང་གཏོང་བཟོ་གི་རེད། འདི་ལྟར་མུ་མཐུད་དུ་སོང་ན། བོད་མི་ཡོངས་སྡོད་མ་ཚུགས་པ་ཞིག་དང་། བཟོད་སྲན་བྱ་མི་ཐུབ་པའི་གནས་སྟངས་ཤིག་ཡོང་གི་རེད། འདི་ང་ཚོར་ངེས་པར་དུ་དགོས་པ་ཞིག་ཀྱང་རེད། རྒྱ་ནག་གིས “ར་བསད་ན་ལུག་འདར” དུ་འཇུག་རྒྱུའི་དམིགས་ཡུལ་བཟུང་ཡོད་ཀྱང་། བོད་མི་རིགས་འདི་ར་བསད་ན་ལུག་འདར་བའི་མི་རིགས་ཤིག་མ་རེད་བསམ་ཡོད། ཡང་རེ་ཟུང་གིས་བོད་ནང་གི་རྩོམ་ཡིག་དེ་འདྲ་ཕྱི་ལོགས་ནས་ཤུགས་ཆེན་པོས་ཁྱབ་བསྒྲགས་བྱེད་པ་འདི། རྩོམ་པ་པོར་འགན་མ་འཁུར་བ་རེད་ཟེར་མཁན་འདུག་ཀྱང་། ངས་བལྟས་ན་དེ་འདྲ་མ་རེད།རྩོམ་པ་པོའི་བསམ་བློ་སྔོན་དུ་སོང་ཡོད་པ་ཞིག་ལ། ང་ཚོས་རྗེས་ནས་དེ་ལ་སློབ་སྦྱོང་དང་བགྲོ་གླེང་།གསེད་བཀྲོལ་དང་གདེང་འཇོག་བྱ་མ་ཐུབ་པ་ཡིན་ན། རྩོམ་པ་པོའི་དམིགས་ཡུལ་མ་འགྲུབ་པ་རེད།

དྲི་བ། བོད་ནང་གི་རྩོམ་པ་པོ་དག་གིས་བྲིས་པའི་བོད་དོན་སྐོར་གྱི་རྩོམ་ཡིག་དེ་དག་གིས་བདེན་དོན་འཐབ་རྩོད་ཐད། ནུས་པ་གང་འདྲ་ཞིག་འཐོན་གྱིན་ཡོད་པར་ངོས་འཛིན་གནང་གིན་ཡོད་དམ།

ལན། ང་རང་གི་ངོས་ནས་རྩ་དོན་འཐབ་རྩོད་ཀྱི་ལས་འགུལ་དག་ལས་རྩ་ཆེ་ཤོས་སུ་མཐོང་གི་ཡོད། སྐད་འབོད་རྒྱག་པ་དང་སྦྱར་ཡིག་བཀྲམས་པ་སོགས་གལ་ཆེན་རེད་དེ། ས་ཁུལ་ཆུང་ཆུང་ཞིག་དང་དུས་ཡུན་ཐུང་ཐུང་ཞིག་རེད། སྙན་ངག་དང་གཞས་ཚིག རྩོམ་ཡིག་སོགས་ཀྱི་ལམ་ནས་བོད་ནང་གི་གནས་སྟངས་ངོ་མ་དང་། ལྷག་པར་དུ་མི་དམངས་དཀྱུས་མའི་རེ་བ་དང་སེམས་འདུན་ཡིག་ཐོག་ཏུ་ཕབ་སྟེ་བདེན་དོན་རྩོད་ཀྱི་ཡོད་པ་རེད། ལས་དོན་འདིས་སྤྱི་ཚོགས་ཧྲིལ་བོའི་བསམ་བློར་གཡོ་འགུལ་ཐེབས་གི་རེད། ཁྱབ་ཚད་ཀྱི་ཐད་ནས་བོད་ཕྱི་ནང་གཉིས་དང་། དུས་ཚོད་ཀྱི་ཆ་ནས་རྙིང་འགྲོ་རྒྱུ་དང་ཡལ་འགྲོ་རྒྱུ་ཡོད་པ་མ་རེད། ལྷག་པར་དུ་བོད་ནང་གི་གཞོན་སྐྱེས་ཚོས་རྩོམ་ཡིག་གི་ལམ་ནས་མི་རིགས་ཀྱི་བདེན་དོན་གླེང་ན། ཕྱི་ལོགས་ཀྱི་བོད་མི་ཚོའི་སེམས་ཤུགས་ཀྱི་འབྱུང་ཁུངས་ཆགས་ཀྱི་ཡོད། དེ་བཞིན། བོད་ནང་ནས་ཀྱང་མི་རིགས་ཀྱི་ལ་རྒྱའི་ཐད་འགྲན་རྩོད་ལྟ་བུ་ཞིག་ཆགས་ཀྱི་ཡོད་པ་རེད། 

དྲི་བ། བཙན་བྱོལ་ནང་གི་དུས་དེབ་དང་ཚགས་པར། དྲ་རྒྱ་སོགས་ཀྱི་སྟེང་གི་རྩོམ་ཡིག་མང་ཆེ་བ་ཆབ་སྲིད་སྐོར་ཡིན་ཡང་། རྩོམ་རིག་གིས་སྤྱི་ཚོགས་ལ་ནུས་པ་དེ་ཙམ་ཐོན་གྱི་མེད་པ་དང་། སྤྱི་ཚོགས་ཀྱིས་རྩོམ་རིག་ལ་རིན་ཐང་དེ་ཙམ་འཇོག་གི་མེད་པའི་རྒྱུ་མཚན་གང་ལ་གཟིགས་ཀྱི་ཡོད་དམ། 

ལན། བརྡ་འཕྲིན་བརྒྱུད་ལམ་ཁག་ཏུ་བོད་ཡིག་དར་སྤེལ་དང་། ཕན་ཚུན་བསམ་ཚུལ་སྤེལ་རེས་བྱེད་ཀྱི་ཡོད་པ་དེ་ཁ་རོག་གེར་བསྡད་པ་ལས་ཡག་གི་རེད། འོན་ཀྱང་བཙན་བྱོལ་ནང་གི་ཆབ་སྲིད་རྩོམ་ཡིག་དེ་ཚོའི་སྤུས་ཚད་ཅུང་སྐྱོ་བོ་རེད་དྲན་ཡོད། གང་ཡིན་ཟེར་ན། བཙན་བྱོལ་ནང་གི་རྩོམ་འབྲི་བ་མང་ཆེ་བ་ན་གཞོན་རེད། རྩོམ་འབྲིའི་བྱང་ཚད་དང་། སྤྱི་ཚོགས་ཀྱི་ཉམས་མྱོང་། བརྗོད་བྱེད་ཚིག་གི་ནུས་པ་གང་ཐད་ནས་འདང་གི་ཡོད་པ་མ་རེད་ལ། ལྷག་པར་དུ་རྩོམ་འབྲི་མཁན་མང་པོ་ཞིག་གྲྭ་བ་དང་སློབ་མ། ཡང་ན་ཕྱི་རྒྱལ་ཁག་ཏུ་ལས་ཞོར་རྩོམ་པ་པོ་རེད། ཆེད་ལས་རྩོམ་པ་པོ་དང་སྤྱི་ཚོགས་དཔྱད་བརྗོད་པ་དཀོན་སྟབས། ལུང་དང་རིག་པ་སྤྱད་དེ་གཏིང་ཟབ་ས་ནས་གླེང་ཐུབ་ཀྱི་ཡོད་པ་མ་རེད། བོད་ནང་གི་རྩོམ་པ་པོ་ཚོའི་ཤེས་ཚད་ཧ་ཅང་མཐོ་ལ། རྒྱུ་ཆ་འཚོལ་སྒྲུབ་ཀྱི་མཐུན་རྐྱེན་དང་། སྤྱི་ཚོགས་ནང་ཟབ་ཞུགས་ཀྱི་གོ་སྐབས་མང་པོ་རེག་གིན་ཡོད། ཡང་བཙན་བྱོལ་ནང་གི་རྩོམ་པ་པོ་འགའ་ཞིག་གིས་རང་ཉིད་ཀྱི་མཐོང་ཐོས་ཙམ་དེ་བདེན་པ་མཐར་ཐུག་ཏུ་རློམ་སྟེ། རང་གཤིས་ཚ་དྲགས་པའི་ཞན་ཆ་ཞིག་ཀྱང་ཡོང་གི་འདུག དེ་བཞིན། བཙན་བྱོལ་སྤྱི་ཚོགས་ཁྱོན་ཡོངས་ནས་བོད་ཡིག་གི་གནས་ཚུལ་སྐྱོ་བ་དང་། བོད་ཡིག་ལ་རིན་ཐང་གི་ལྟ་ཚུལ་ཆུང་བ་སོགས་ཀྱི་དབང་གིས་རྩོམ་པ་པོ་སོ་སོ་དང་ཀློག་པ་པོ་ཡང་སོ་སོ་ཆགས་ཀྱི་ཡོད་པ་རེད།

དྲི་བ། སྐུ་ཉིད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཡིན་པ་དང་། བཙན་བྱོལ་སྤྱི་ཚོགས་ཁྲོད་ཀྱི་རྩོམ་པ་པོ་རྒན་རབས་པ་ཞིག་ཡིན་པའི་ངོས་ནས། བོད་ནང་གི་གསར་སྐྱེས་རྩོམ་པ་པོ་ཚོར་རེ་བ་དང་ལམ་སྟོན་འདྲ་གནང་རྒྱུ་ཡོད་དམ།

ལན། བཙན་བྱོལ་ནང་གི་རྩོམ་པ་པོ་དག་གིས་བོད་ནང་གི་རྩོམ་པ་པོ་ཚོའི་འཐུས་ཚབ་མཚོན་པའི་ཆེད་དུ་རྩོམ་པ་པོའི་མཐུན་ཚོགས་འདི་བཙུགས་པ་རེད། ཚོགས་པ་འདི་རྒྱལ་སྤྱིའི་སྨྱུག་ཚོགས་ནང་ཞུགས་ཏེ། བོད་ནང་གི་རྩོམ་པ་པོ་དག་གི་སྨྲ་བརྗོད་རང་དབང་དང་བདེ་སྡུག་ལ་ལྟ་རྟོགས་བྱ་རྒྱུའི་དམིགས་ཡུལ་བཟུང་ཡོད། རྒྱལ་སྤྱིའི་སྨྱུག་ཚོགས་ནང་བཙོན་ནང་གི་རྩོམ་པ་པོ་ཟེར་བའི་སྡེ་ཚན་ཞིག་ཟུར་དུ་ཡོད་སྟབས། བོད་ནང་གི་རྩོམ་པ་པོ་དག་གི་གནས་ཚུལ་དུས་ནས་དུས་སུ་རྒྱལ་སྤྱིའི་ཐོག་བསྐྱལ་རྒྱུར་འབད་བརྩོན་བྱེད་ཀྱི་ཡོད། གཞན། ང་རང་ལ་རེ་བ་ཞིག་ཡོད་པ་ནི། བོད་ནང་གི་རྩོམ་པ་པོ་དང་ཤེས་ལྡན་མི་སྣ། ལྷག་པར་དུ་གཞོན་སྐྱེས་ཤེས་ཡོན་པ་ཚོས་བོད་མི་རིགས་ཀྱི་བདེ་སྡུག་གླེང་རྒྱུ་ཡིན་ན། པཎ་ཆེན་རིན་པོ་ཆེ་དང་འབའ་པ་ཕུན་ཚོགས་དབང་རྒྱལ། ཝང་ལི་ཞོན་བཅས་ཀྱི་གླེང་སྟངས་དང་། རྩོམ་ཡིག་འབྲི་ཐབས་དེ་ལ་སློབ་སྦྱོང་བྱ་དགོས་པ་རེད་དྲན་ཡོད། ཁོང་ཅག་གིས་ཐད་ཀར་རྒྱ་གཞུང་དང་གུང་ཁྲིན་ཏང་ལ་མཛུབ་མོ་བཙུགས་ཏེ་སྐྱོན་བརྗོད་བྱས་ཡོད་པ་མ་རེད། རྩ་ཁྲིམས་དང་བཅའ་ཁྲིམས། ལམ་ལུགས་དང་སྲོལ་རྒྱུན་ཞིག་འདེད་ཀྱིན་ཡོད་པ་རེད། མི་རིགས་ཀྱི་ཐོབ་ཐང་དང་རིག་གནས་ཀྱི་འཛིན་སྐྱོང་ཞིག་གི་སྒང་ནས་གནད་དོན་གླེང་གི་ཡོད་པ་རེད། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་ཨང་དང་པོར་བཞག་སྟེ། དེ་ལ་གཞུང་གི་བྱེད་སྟངས་སྤྱོད་སྟངས་ཤིག་འགྲིག་གི་མེད་སྐོར་དང་། ཡང་ན་ས་གནས་རིམ་པའི་སྒྲིག་གཞི་དང་ལག་ལེན་བསྟར་ཕྱོགས་ལ་ནོར་འཁྲུལ་ཡོད་སྐོར་བཤད་དེ་རྩ་དོན་གླེང་གི་ཡོད། ཐབས་ལམ་འདི་སྤྱད་པ་ཡིན་ན། གལ་སྲིད་དོན་དག་ཅིག་བྱུང་ཡང་། ཁྲིམས་ཐོག་ནས་རང་ཉིད་སྲུང་སྐྱོབ་ཐུབ་ལ། མི་རིགས་ཀྱི་རྩ་དོན་ལ་ཡང་ཕན་ཐོགས་ཆེན་པོ་ཡོད་པ་རེད་དྲན་ཡོད།

དྲི་བ། རྒྱ་གཞུང་གིས་བོད་ནང་གི་ཤེས་ལྡན་མི་སྣ་དང་རྩོམ་པ་པོ་དག་ལ་དམ་དྲག་སྟངས་འཛིན་ཤུགས་ཆེ་རུ་གཏོང་གི་ཡོད་པ་དེ། རྩོམ་པ་པོ་དེ་དག་གི་བརྩམས་ཆོས་ཀྱི་ཁ་ཕྱོགས་ལ་འགྱུར་བ་ཐེབས་པ་རེད་དམ། ཡང་ན་རྒྱ་གཞུང་གིས་བོད་པའི་ཤེས་ལྡན་མི་སྣར་འཛིན་པའི་སྲིད་བྱུས་ལ་འགྱུར་བ་ཕྱིན་པ་རེད།

ལན། བོད་ནང་གི་གསར་སྐྱེས་རྩོམ་པ་པོ་མང་པོ་ཞིག་གིས་དུས་ཡུན་གང་འཚམ་རིང་། སྙན་ངག་དང་བསྡུས་བརྗོད་ཀྱི་ཐོག་ནས་སེམས་ཀྱི་དགའ་སྐྱོ་ཆགས་སྡང་གླེང་བ་མ་གཏོགས་དཔྱད་བརྗོད། བགྲོ་གླེང་སོགས་ཀྱི་ལམ་ནས་བོད་པའི་གནད་དོན་ཐད་ཀར་གླེང་མཁན་ཉུང་ཉུང་རེད། རྒྱ་རིགས་རྩོམ་པ་པོ་ཝང་ལི་ཞོན་གྱིས་ཀྱང་བོད་ནང་དུ་ཤེས་ཡོན་པ་དང་རྩོམ་པ་པོའི་སྣེ་ཁྲིད་ཀྱི་ནུས་པ་ཞན་པའི་ལྟ་ཚུལ་བཏོན་པ་རེད། ཁོང་གི་དགོངས་ཚུལ་དེ་ཧ་ཅང་དོན་ལ་གནས་པ་ཞིག་རེད། ལོ་རབས་དགུ་བཅུ་ཙམ་ནས་བརྡ་འཕྲིན་བརྒྱུད་ལམ་སྟབས་ཇེ་བདེར་སོང་བ་དང་བསྟུན་ཏེ། བོད་ཕྱི་ནང་བར་བསམ་ཚུལ་བརྗེ་རེས་ཐུབ་པ་བྱུང་སྟེ། བོད་ནང་གི་ཤེས་ཡོན་ཅན་མང་པོ་ཞིག་གི་ཡུན་སེམས་ནད་དེ་འབར་ཆོག་ཆོག་གི་མེ་རི་ལྟ་བུ་ཞིག་ཆགས་པ་རེད། ཕྱི་ལོ་ ༢༠༠༨ ལོའི་ཞི་རྒོལ་སྐབས་མི་དམངས་དཀྱུས་མའི་སེམས་ཤུགས་དང་མངོན་འདོད་གསལ་བོ་ཆགས་ཡོང་སྐབས། རྩོམ་པ་པོ་སྐོར་ཞིག་མདུན་དུ་ཐོན་ཏེ་སྔར་གྱི་བསྡུས་བརྗོད་དང་སྒྱུ་རྩལ་མཚོན་ཐབས་ཀྱི་གླུ་ཚིགསྙན་ངག་སོགས་དངོས་ཡོད་འཚོ་བ་རིང་ལུགས་དང་ཇི་བཞིན་བརྗོད་པ། ཐེར་འདོན་རང་བཞིན་ཅན་དུ་ཁ་བསྒྱུར་ཏེ་རྩོམ་ཡིག་རྣོ་ངར་ཅན་མང་པོ་ཞིག་ཐོན་པ་རེད། རྒྱ་གཞུང་གིས་ཀྱང་སྨྱུ་གུའི་འཐབ་རྩོད་འདི་ཧ་ཅང་ཉེན་ཁ་ཆེན་པོ་ཞིག་ཏུ་མཐོང་སྟེ། ར་བསད་དེ་ལུག་འདར་དུ་འཇུག་འདོད་པ་རེད།

དྲི་བ། བོད་ཕྱི་ནང་གཉིས་ཀའི་ཤེས་ལྡན་མི་སྣ་དང་རྩོམ་པ་པོ་རྣམས་ཀྱིས་ཕན་ཚུན་ལ་རོགས་འདེགས་དང་། གཅིག་ལ་གཅིག་རྟེན།གཅིག་རྒྱབ་གཅིག་ལངས་ཀྱིས་རྩ་དོན་ལ་ནུས་པ་འདོན་ཐུབ་པའི་ཐབས་ལམ་འདྲ་མཐོང་གི་ཡོད་དམ།

ལན། ཁྱེད་ཀྱི་དྲི་བ་འདི་གལ་གནད་ཆེན་པོ་ཞིག་རེད། བོད་ནང་གི་རྩོམ་ཡིག་དང་རྩོམ་པ་པོ་དག་གི་བསམ་ཚུལ་འདི་ནས་སློབ་སྦྱོང་བྱ་རྒྱུ་དང་། བཙན་བྱོལ་གྱི་རྩོམ་ཡིག་གལ་ཆེན་ཁག་དང་༧གོང་ས་མཆོག་གི་བཀའ་སློབ་ལམ་སྟོན་རིགས་བོད་ནང་ལ་བཏང་སྟེ་བསམ་བློ་བརྗེ་རེས་བྱ་རྒྱུལ་གལ་ཆེན་རེད། དེ་བཞིན། བོད་ནང་གི་རྩོམ་པ་པོ་ཚོས་བྲིས་བཞག་པའི་རྩ་དོན་དང་འབྲེལ་ཡོད་ཁག་དང་། རྒྱ་ནག་གི་ཆབ་སྲིད་འོག་ནས་འགྲེམས་སྤེལ་མ་ཐུབ་པའི་རིགས་བཙན་བྱོལ་ནས་བསྐྱར་དཔར་འགྲེམས་སྤེལ་དང་། སྐད་ཡིག་གཞན་པའི་ནང་བསྒྱུར་རྒྱུ་སོགས་གལ་ཆེན་པོ་རེད། བོད་ནང་གི་རྩོམ་པ་པོ་དང་ཤེས་ཡོན་ཅན་མང་པོ་ཞིག་ལ་དཔལ་འབྱོར་གྱི་དཀའ་ངལ་ཡོད་པ་རེད།འགའ་རེ་ཡིས་རྩ་དོན་ལ་ཕན་པའི་དེབ་རིན་ཐང་ཅན་བྲིས་ཡོད་ཀྱང་དཔར་ས་མ་རེག་པ་དང་དཔལ་འབྱོར་གྱིས་མ་འདང་བ་སོགས་ཡོང་གི་ཡོད། དེ་བཞིན། རྒྱ་གཞུང་གིས་ཆབ་སྲིད་ཀྱི་ཉེས་མིང་གཡོགས་ཏེ།ལས་གནས་ནས་ཕྱིར་ཕུད་བཏང་ཡོད་པ་དང་། ལས་ཀ་རེག་གིན་མེད་པ་དག་གི་འཚོ་བའི་ཐད་རོགས་རམ་རེ་བྱ་ཐུབ་ན་ཡག་པོ་འདུགའདིའི་ཐད་ངས་སྔོན་མ་རྩོམ་ཡིག་ཅིག་ཀྱང་བྲིས་ཡོད། གཞུང་དང་གཞུང་འབྲེལ་མིན་པའི་ཚོགས་པ་ཁག་དང་། ཕྱི་རྒྱལ་གྱི་རོགས་ཚོགས།དེ་བཞིན་ཚོང་པ་སྒེར་བ་སོགས་མཉམ་འབྲེལ་བྱས་ཏེ། ཆེད་དུ་རྩོམ་པ་པོ་རྣམས་གཙོ་བོ་བྱས་ཏེ་བོད་དོན་ཐད་ལས་ཀ་བྱེད་མཁན་དག་གི་འཚོ་བར་དཀའ་ངལ་འཕྲད་ཀྱིན་ཡོད་རིགས་ལ་རོགས་རམ་ཕྲན་བུ་རེ་བྱ་ཐུབ་ན་ཧ་ཅང་ཡག་པོ་རེད་སྙམ། ལས་དོན་འདི་འཚོ་བའི་མཐུན་རྐྱེན་ཁོ་ན་ཙམ་མ་རེད། ཁོང་ཅག་གི་བསམ་བློར་རྒྱབ་སྐྱོར་ཞིག་ཀྱང་ཆགས་ཀྱི་ཡོད་པ་རེད།

དྲི་བ། ད་ལྟ་བཙོན་འོག་ཏུ་ཡོད་པའི་རྩོམ་པ་པོ་ཞོགས་དུང་དང་། ཁོང་གིས་བོད་དོན་ཐོག་བྲིས་པའི་དཔེ་དེབ་ ༼གནམ་ས་གོ་འབྱེད༽ ཀྱི་ཐད་སྐུ་ཉིད་ལྟ་སྟངས་གང་འདྲ་ཡོད་དམ།

ལན། ཞོགས་དུང་གིས་སོ་སོའི་ནོར་འཁྲུལ་དང་ཞན་ཆ་ངོས་ལེན་བྱས་ཤིང་། སྤོབས་པ་དང་ཆོད་སེམས་བརྟན་པོའི་ཐོག་ནས་རང་གི་བསམ་ཚུལ་བསྒྲགས་པ་དེ་རྩོམ་པ་པོ་གཞན་ལ་མེད་པའི་ཁྱད་ཆོས་ཤིག་རེད། གཉིས་པ་ཞོགས་དུང་ཀྱི་སྙིང་སྟོབས་རེད། ཞོགས་དུང་གིས་རྒྱ་གཞུང་ལ་ངོ་རྒོལ་བྱེད་ཐུབ་པ་ཙམ་གྱིས་གཞན་ལས་ལྷག་པ་ཅིག་རེད་བསམ་གི་མེད། བོད་ནང་སྐད་འབོད་བྱེད་མཁན་དང་། སྦྱར་ཡིག་བཀྲམས་མཁན།རྩོམ་ཡིག་སྤེལ་མཁན་གཞན་དག་ཚོས་ཀྱང་རང་སྲོག་བློས་གཏོང་བྱས་པ་གཅིག་མཚུངས་རེད། འོན་ཀྱང་མཇུག་འབྲས་ལ་ཚོད་དཔག་གསལ་བོ་བྱས་ཏེ། ཡིག་ཐོག་ནས་མི་གཞན་ལ་མིག་དཔེ་དང་སེམས་ཤུགས་སློང་བྱེད་བཞག་ཡོད་པ་འདི་ཐབས་དང་ལྡན་པའི་སྙིང་སྟོབས་ཤིག་རེད། ཁོང་གི་དཔེ་དེབ་ ༼གནམ་ས་གོ་འབྱེད༽ ལ་མཚོན་ན། མིང་འདོག་འདི་ལ་དགོངས་ཚུལ་སྣ་ཚོགས་ཡོང་གི་ཡོད་ཀྱང་། དེབ་ནང་རྒྱ་ནག་གི་སྲིད་དབང་སྒེར་སྤྱོད་འགྲིག་གི་མེད་པ་དང་། དེ་ལ་གསར་བརྗེ་བྱ་དགོས་པ་ཞིག་བཤད་ཀྱི་ཡོད། གསར་བརྗེ་གཞན་དག་གི་གཞུང་ལུགས་ཀྱང་མདོར་བསྡུས་ན། རྙིང་པ་ཞིག་ཕར་ཕུད་དེ་གསར་པ་ཞིག་ཚུར་བསུ་རྒྱུ་དེ་རེད།ལྷག་པར་དུ་ང་རང་གི་ངོས་ནས་ཞི་བའི་གསར་བརྗེ་ཟེར་བ་འདིར་ཆབ་སྲིད་ཀྱི་གོ་བ་གཏིང་ཟབ་མོ་མཐོང་གི་ཡོད། བོད་རང་བཙན་རྩོད་མཁན་ཚོས་རྒྱ་ནག་གི་སྲིད་དབང་གང་འདྲ་ཞིག་ལ་འགྱུར་དགོས་པ་བཤད་ཀྱི་མེད། བོད་པར་རང་བཙན་གཙང་མ་ལོགས་སུ་དགོས་ཟེར་གྱི་ཡོད། དབུ་མའི་ལམ་རྩོད་མཁན་ཚོས་ཀྱང་རྒྱ་གཞུང་གི་སྲིད་ལུགས་ལ་འཕོ་འགྱུར་འགྲོ་དགོས་ཟེར་གྱི་མེད། སྲིད་ལུགས་གང་ཡིན་པ་དེའི་སྒྲོམ་གཞིའི་འོག་ནས་རང་སྐྱོང་གི་དབང་ཚད་དགོས་ཟེར་གྱི་ཡོད་པ་རེད།

 

 

གསར་འགོད་པ། དོན་འགྲུབ་བཀྲ་ཤིས།

མཆན། 6

  1. སྤྲོ་ཚིགས་དགེ་འདུན says:
    ལོ་ 12 སྔོན།

    རྒན་ལྷ་མོ་སྐྱབས་ལགས་ཀྱི་བོད་ལྭ་གྱོན་ཏེ་འདྲ་ཆགས་པོ་བྱས་འདུག་མོད་
    འོན་ཀྱང་འཁོར་ཡུག་དེ་གར་ཡག་པོ་ཞིག་མེད་ཐག་ཆོད་རེད

    Reply
  2. ཅོ་རི་ཉི་མ། says:
    ལོ་ 12 སྔོན།

    དྲ་གྲོགས་སྟག་སྨྱོན་ལགས་ཁྱེད་ཀྱིས་རྩ་ཆུ་བཟང་སར་ཕྱིན་པ་རེད་གསུངས་ཡོང་དུས་མཆོག་ཏུ་གྱུར་པའི་མི་བུ་མངའ་རི་ཀརྨ་ཆོས་འཕེལ་གྱི་གཏམ་དཔེར་དྲན་གསོལ་ཞིག་བྱུང་བས་བཀོད་པ་ཡིན།

    དབུས་གཙང་སྤྱི་འཐུས་ཀརྨ་ཆོས་འཕེལ་མཆོག་གིས།
    ཨ་མ་དང་མནའ་མ་ནོར། རྒྱལ་བ་ལྔ་པ་དང་ཟླ་བ་ལྔ་པར་ནོར།
    སོ་སོར་རྩ་བཟང་ས་ཞིག་དང་ལྗང་ས་ཞིག་ལ་ཕྱིན་པ་ཡིན་པ་ཞེས་སྤྱི་འཐུས་གྲོས་འཚོགས་ར་བ་ནང་དུ་དཔའ་ངར་ཆེ་པའི་ཐོག་ནས་གསུངས་ཡོང་དུས་རང་དབང་མེད་མི་བུ་དེར་ཡིད་སྨོན་ཞིག་ཤོར་འགྲོ་གི་འདུག

    Reply
  3. སྟག་སྨྱོན། says:
    ལོ་ 12 སྔོན།

    སྤྱི་འཐུས་འདིའི་སྐད་ཆ་བདེན་ན་ར་བསད་ནས་ལུག་ངར་ཡོད་ས་རེད། ཧཧཧཧཧཧ སྤྱི་འཐུས་ཀླད་མེད་ར་བརྫི་འདྲ་བོ་ཚོ་སྙིང་རྗེ།

    Reply
  4. སྟག་སྨྱོན། says:
    ལོ་ 12 སྔོན།

    བཙལ་བྱོལ་བོད་གཞུང་གིས་ད་ནས་བོད་ཀྱི་དབུ་ཁྲིད་གོ་གནས་ནས་དགོངས་པ་ཞ་ཚད་རེད་འདུག བོད་རྒྱའི་བར་གྱི་དཀའ་རྙོག་སེལ་ཐབས་ཀྱི་ཐག་གཅོད་བྱེད་རྒྱུའི་དབང་ཚད་དེ་ཕྱིར་བོད་ནང་གི་བོད་མི་ཚོར་ཕུལ་ན་རན་འདུག དཔེར་ན་རྒྱ་ནག་གི་འོག་རྩ་ཁྲིམས་ཀྱི་འོག་ནས་རང་སྐྱོང་དགོས་ཟེར་བ་ལྟ་བུའི་མཐའ་མའི་ཐག་གཅོད་རང་བཞིན་གྱི་དབང་ཚད་དེ་ཕྱིར་བསྡུ་རན་མེད་འགྲོ་དཔྱོད་དགོས། དེ་ལས་བོད་ནང་གི་བོད་མི་ཚོར་རྒྱ་ནག་གིས་མནར་གཅོད་ག་རེ་གཏོང་གི་ཡོད་མེད་དང་བོད་ནང་འཁོར་ཡུག་གཏོར་བཤིག་དང་འགྲོ་བ་མའི་ཐོབ་ཐང་མེད་པ་སོགས་རྒྱ་ནག་གི་བྱ་སྤྱོད་རྣམས་རྒྱལ་སྤྱིའི་ཕྱིར་སྒྲོག་བྱེད་མཁན་གྱི་མགྲིན་ཚབ་པ་གོ་ཆོད་ཅིག་བྱེ་དཐུབ་རྒྱུའི་རེ་བ་ཡོད། སོ་སོ་རྒྱ་གར་སྐྱབས་བཅོལ་ཡོང་། དེ་ནས་ཀྱང་མ་སྐྱིད་པར་ཕྱི་རྒྱལ་རྩ་ཆུ་གང་བཟང་བཟང་སར་མཐོ་འཛེག་བྱས་ནས་འགྲོ་བཞིན་དུ། ༼མི་མ་ཤི་ཁྲག་མ་བཞུར། དཀའ་ལས་མ་བརྒྱབ་པར་འགྲུབ་ཐུབ་པ་ཞིག་མ་༽ཟེར་རྒྱུར་ངོ་ཚ་སྐྱེས་ས་རེད། དེ་འདྲ་ཡིན་ན་རང་ཉིད་ནས་འགོ་རྩོམ་ཐུབ་དགོས་པ་རེད། དེ་མིན་མི་གཞན་གྱི་ཚེ་སྲོག་ལ་འདི་ལྟར་སྣང་ཆུང་དང་རྩེད་ཆས་ལྟ་བུར་བརྩི་མི་རུང་མཐོང་། ནོར་ན་དགོས་སེལ་ཡོད་།

    Reply
  5. ཅོ་རི་ཉི་མ། says:
    ལོ་ 12 སྔོན།

    ར་བསད་དེ་ལུག་འདར་དུ་འཇུག་འདོད་པ་རེད་ཞེས་གསུངས་པ་དེར་དངོས་གནས་ཉམས་མྱོང་ཡོད་པའི་བཀའ་མོས་རང་རེད།
    དཔེར་ན། བོད་ནང་གི་རྩོམ་པ་པོ་ཚོ་དགྲ་བོ་དམར་གཞུང་གིས་བཙོན་དུ་བཅུག་ཡོང་དུས་བཙན་བྱོལ་ནང་གི་རྩོམ་པ་པོ་འགའ་ཞིག་གིས་ཏང་ཀྲུང་དབྱང་ལ་ཕུལ་བའི་སེམས་གཏམ་ཕུལ་བཤད་ཞོར་བོད་རང་བཙན་པ་ཚོའི་ཐོག་ཏུ་དགག་པ་རྒྱག་གི་རེད།

    ཏང་ཀྲུང་དབྱང་གིས་བོད་ནང་དུ་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་ཡོང་དུས་བཙན་བྱོལ་ནང་དུ་ཆོས་རྒྱུད་ཁག་གི་སྤྱི་འཐུས་རྣམས་ལ་དགག་པ་རྒྱག་གི་རེད། སྤྱིའི་ཆ་ནས་དགྲ་བོ་དམར་གཞུང་གིས་འཛམ་གླིང་ཐོག་ཏུ་བོད་མི་རྒྱལ་གཅེས་པ་ཚོ་འགྲོ་ས་སྡོད་ས་མེད་པ་ཞིག་བཟོ་གི་ཞེས་ལབ་ཀྱི་ཡོད་ཀྱང་དེ་ཙམ་ལུག་འདར་དགོས་པ་ཨེ་ཡོད་ན།
    རང་སྲོག་དོར་མ་ཐུབ་པས་བཙན་བྱོལ་དུ་ཕེབས་པ་རེད། ཡིན་ནའང་དེ་ཙམ་སྐྲག་དགོས་དོན་གང་ཡིན་ནམ། བོད་མི་ནང་ཁུལ་ཐུག་དུས་རྒྱ་སྟག་ངར་མ་འདྲ་བ་རྐྱང་རྐྱང་རེད། ཧཧཧཧཧཧཧཧཧཧཧ

    མ་འདར་མ་འདར་ཕ་བཟང་བུ།
    ར་བསད་ཀྱང་ལུག་རྒན་མ་འདར་རོགས།
    གྲི་སྨྱུག་གུའི་མཚོན་ཁ་དགྲ་ལ་གཏད།
    དཔའ་དཔང་རོགས་རང་གི་རིགས་དང་བརྟེན།

    ལུག་གཡང་དཀའི་བདེན་ཟས་ཟ་ཉིན་མོར།
    དགྲ་སྤྱང་ཀི་ཤ་ལ་ངོམས་པ་འདི།
    ལས་བྱས་པ་མ་རེད་བསྐོས་པ་རེད།
    ལུག་གཡང་དཀར་ཤ་འདར་མ་རྒྱག་རོགས།

    Reply
  6. གཟུ་གནས་བློ་ལྡན། says:
    ལོ་ 12 སྔོན།

    འདྲ་པར་འདི་ནང་རྒན་ལྷ་མོ་སྐྱབས་ལགས་གང་དུ་བཞུགས་ཡོད་པ་རེད། ཆང་ཁང་ནི་ཡིན་རྒྱུ་མ་རེད་རྒན་ལགས་ཀྱི་བོད་ལྭ་དང་མདུན་ལྕོག་སྟེང་གི་ཁ་པར་གྱིས་གསལ་བཤད་བྱས་འདུག གྲོས་ཚོགས་སམ་ལས་ཁུངས་ནི་ཡིན་སོ་མི་འདུག་གཡས་ཕྱོགས་ཀྱི་དཔུང་པ་རི་མོ་ཅན་རྫོབ་པོ་དེས་ཧ་གོ་སོང༌། ད་འོ་ན་གང་དུ་ཡིན་ནམ། ???
    གང་ལྟར་གཞུང་ལས་ཁང་ཞིག་ཏུ་མིན་པར་སྨོན། གལ་སྲིད་གཞུང་ལས་ཁང་ཞིག་གི་ནང་ཡིན་ན་དཔུང་པ་རི་མོ་ཅན་འདིས་ཞབས་འདྲེན་ཞུས་ཚར་འདུག་གོ།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist