ཕྱི་ཚེས་ ༢༡ ཉིན་ཏེ་དེ་རིང་སྔ་དྲོར་ཐེག་ཆེན་ཆོས་གླིང་གཙུག་ལག་ཁང་དུ། ཉེ་ཆར་མདོ་སྨད་འབྲུག་ཆུ་རྫོང་དུ་ཆུ་ལོག་གི་གནོད་འཚེ་འོག་རྐྱེན་འདས་སུ་སོང་བ་རྣམས་ཀྱི་ཆེད་བསྔོ་སྨོན་གཟབ་རྒྱས་ཤིག་གནང་ཡོད།
ངྷ་སའི་མདོ་སྨད་ཐེ་བོ་སྟོད་སྨད་བར་གསུམ་གྱི་མི་མང་གིས་གོ་སྒྲིག་འོགདེ་རིང་ཞོགས་པའི་ཆུ་ཚོད་ ༨ གྱི་སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མདོ་སྨད་འབྲུག་ཆུ་རྫོང་དུ་ཉེ་ཆར་ཆུ་ལོག་གི་གནོད་འཚེ་འོག་རྐྱེན་འདས་སུ་སོང་བ་རྣམས་ཀྱི་ཆེད་བསྔོ་བ་སྨོན་ལམ་གཟབ་རྒྱས་ཤིག་གནང་ཡོད་ཅིང་། སྨོན་ལམ་ཚོགས་ཆེན་དེའི་ཚོགས་མགོན་དུ་དཔལ་རྒྱལ་བ་ཀརྨ་པ་མཆོག་དབུ་བཞུགས་ཀྱིས་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་དང་། བཀའ་བློན་ལས་རོགས་རྣམ་པ། གཞན་སྤྱི་འཐུས་ཁག་ཅིག་དང་། རྒྱུད་སྟོད་མཁན་པོ། རྣམ་གྲྭ་མཁན་པོ། ཀིརྟི་གྲྭ་ཚང་གི་མཁན་པོ་བཅས་དང་། དེ་བཞིན་བཞུགས་སྒར་ཁུལ་གྱི་དགོན་སྡེ་ཁག་གི་གྲྭ་བཙུན་དང་། ངྷ་སྟེང་བོད་ཁྱིམ་གྱི་སློབ་ཕྲུག བོད་གཞུང་ཟློས་གར། ངྷ་སའི་ཉེ་འདབས་ཀྱི་མི་མང་བཅས་མཉམ་ཞུགས་བྱས་ཡོད།ཐེངས་འདིའི་སྨོན་ལམ་སྐབས་སུ་མདོ་སྨད་དབུས་རྒྱུན་ལས་ཁང་གིས་ཞལ་འདེབས་བསྡུ་རུབ་ཀྱི་ལས་འགུལ་ཞིག་སྤེལ་བཞིན་ཡོད་སྟབས། འདི་གའི་གསར་འགོད་པས་མདོ་སྨད་དབུས་རྒྱུན་གྱི་རྒྱུན་ལས་རྨ་ཆུའི་མགོན་པོ་དོན་གྲུབ་ལགས་སུ་བཀའ་འདྲི་ཞུས་སྐབས་ཁོང་གིས་བརྗོད་དོན། ལས་འགུལ་འདི་གཙོ་བོ་མདོ་སྨད་ཐེ་བོ་སྟོད་སྨད་བར་གསུམ་གྱི་མི་མང་གིས་གོ་སྒྲིག་ཞུས་པ་ཞིག་རེད། ཡིན་ནའང་། མདོ་སྨད་དབུས་རྒྱུན་གྱི་ངོས་ནས་ཞལ་འདེབས་བསྡུ་རུབ་ཀྱིས་མཚོན་པའི་ལས་འགུལ་གང་འདྲ་ཞིག་ཡིན་རུང་འབད་བརྩོན་རོགས་རམ་ཞུ་བཞིན་ཡོད་ཅེས་དང་།
ཡང་ཁོང་ལ་ཐེངས་འདིའི་ཞལ་འདེབས་བསྡུ་རུབ་ཁྲོད་ནུས་པ་ཅི་ཙམ་ཐོན་ཐུབ་པའི་རེ་བ་ཡོད་ཅེས་དྲིས་པར། ཁོང་གིས་སྨོན་ལམ་འཚོགས་རྒྱུ་དང་ཞལ་འདེབས་བསྡུ་རུབ་བྱ་རྒྱུའི་ལས་འགུལ་དེ་རྒྱ་གར་དང་བལ་ཡུལ་གྱིས་མཚོན་པའི་ཕྱི་རྒྱལ་ཡུལ་གྲུ་ཁག་ཏུ་འབད་བརྩོན་ཞུ་བཞིན་ཡོད། དེ་རིང་སྨོན་ལམ་དུས་ཚིགས་གཉིས་པ་ཡིན་ལ།ང་ཚོས་རིམ་བཞིན་སྨོན་ལམ་རྗེས་མ་རྣམས་དུས་ཐོག་གོ་སྒྲིག་ཞུ་འཆར་ཡོད་པར་མ་ཟད། ལྷག་པར་དུ་དུས་ཚིགས་མཐའ་མའི་ཐོག་གལ་སྲིད་༧གོང་ས་མཆོག་ངྷ་སར་བཞུགས་མུས་ཡིན་ཚེ་གདན་འདྲེན་ཞུ་འཆར་ཡོད། དེ་མ་བྱུང་ནའང་བླ་ཆེན་ཁག་གང་ཐུབ་ཀྱིས་གདན་འདྲེན་ཞུ་རྒྱུའི་ལས་འཆར་ཡོད་ཅེས་འགྲེལ་བརྗོད་གནང་སོང་།ཕ་ཡུལ་འབྲུག་ཆུ་ནས་ཡིན་པའི་སྐུ་ཞབས་ཉི་མ་ལགས་སུ་བཀའ་འདྲི་ཞུས་པར། ཁོང་གིས་འབྲུག་ཆུ་ཟེར་བ་དེ་ཕྱིས་སུ་བོད་ལ་དར་བའི་ཐ་སྙད་ཅིག་རེད། ང་ཚོས་ས་ཁུལ་དེར་ཐེ་བོ་སྟོད་སྨད་བར་གསུམ་ཟེར་གྱི་ཡོད། ས་ཆ་དེ་བོད་རྒྱའི་ས་མཚམས་ཆགས་ཡོད། དེ་ཡིན་དུས་གནས་སྟངས་ཀྱི་ཆ་ནས་བོད་ལ་ཤིན་ཏུ་གལ་ཆེན་པོ་ཞིག་ཆགས་ཡོད། ང་ཚོས་ཕྱི་ལོགས་ནས་སྨོན་ལམ་འཚོགས་པ་འདིས་བོད་ནང་གི་གནོད་འཚེ་ཐེབས་མཁན་ཚོའི་སེམས་ཀྱི་སྡུག་བསྔལ་སེལ་ཐུབ་རྒྱུར་ཕན་ཐོགས་ཆེན་པོ་ཡོད་ཅེས་བརྗོད་སོང་།
ཁོང་ལ་ཕྱི་ལོགས་སུ་འབྲུག་ཆུའི་མི་མང་ཅི་ཙམ་ཡོད་མེད་དང་ཁྱེད་རང་ཚོས་ཚོགས་པའི་ངོ་བོ་ཞིག་གི་ཐོག་ནས་ལས་འགུལ་སྤེལ་གྱི་ཡོད་མེད་དྲིས་སྐབས། ཁོང་གིས་བརྗོད་དོན། ཕྱི་རྒྱལ་ཁག་གི་གནས་སྟངས་གསལ་པོ་ཞིག་ཤེས་ཀྱི་མི་འདུག ངྷ་རམ་ས་ལར་ཆ་བཞག་ན་ཐེ་བོའི་མི་ ༤༠ ཙམ་འདུག་ཅེས་དང་། ང་ཚོས་མཉམ་རུབ་ཐོག་གང་ཐུབ་ཅི་ཐུབ་བྱེད་ཀྱི་ཡོད་པ་ལས་ཚོགས་པ་དེ་འདྲ་ད་ལྟ་བཙུགས་མེད་ཅེས་བརྗོད་སོང་།
མཐར་ཁོང་གིས་ཐེ་བོ་ས་ཁུལ་ནི་རྒྱ་དམར་གྱིས་བཙན་བཟུང་བྱས་ཡོད་པའི་བོད་ཀྱི་མཐའ་མཚམས་ས་ཁུལ་ཞིག་ཆགས་ཡོད་སྟབས། བོད་མི་མང་གིས་ངེས་པར་དུ་དོ་སྣང་བྱ་དགོས་རྒྱུ་དེ་ཧ་ཅང་གལ་ཆེན་པོ་རེད་ཅེས་དང་། རྒྱ་ཆེའི་བོད་རིགས་མང་ཚོགས་ནས་གནོད་འཚེ་ཐེབས་པའི་མང་ཚོགས་རྣམས་ཀྱི་ཆེད་དུ་ཞལ་འདེབས་གང་མང་གནང་རོགས་ཞེས་འབོད་སྐུལ་ཡང་ཞུས་སོང་།
གསར་འགོད་པ།དཔལ་ལྡན་རྒྱ་མཚོ།
རྐིརྟི་རིན་པོ་ཆེ་མཆོད་འབུལ་གྱི་ཚོགས་མགོ་ལ་ཕེབས་མི་འདུག། མི་གཞན་གྱི་ཟེར་ན་ཀིརྟི་རིན་པོ་ཆེ་ཡང་ཐེ་བོ་ནས་འཁྲུངས་བ་རེད་ཟེར། རྒྱུ་མཚན་གང་ཡིན་ནམ།
དུས་མིན་རྐྱེན་འདས་སུ་ཕྱིན་པའི་རང་རིགས་སྤུན་ཟླ་རྣམས་སླར་ཡང་༸འཕགས་མཆོག་ཕྱག་ན་པདྨོའི་རྗེས་སུ་བསྙེགས་ཏེ། ཆོས་དང་ཟང་ཟིང་གི་བྱ་བར་མཉམ་འགྲོགས་མཉམ་སྤྱོད་ཆོག་པའི་བསྐལ་ལྡན་དུ་གྱུར་ཅིག།