རྒྱ་ནག་གིས་སྤྱི་ཚོགས་བརྟན་ལྷིང་མེད་པའི་རྒྱུ་རྐྱེན་གཙང་བཤེར་བཟོ་རྒྱུའི་གཙོ་དོན་ལག་བསྟར་བྱ་ཆེད། བོད་མིའི་ཐོག་དམ་དྲག་བྱེད་ཤུགས་ཆེ་རུ་གཏོང་བ་དང་། ཆབ་སྲིད་ཀྱི་དོགས་གཞི་ཡོད་པའི་བོད་མི་ཚོར་རྡུང་རྡེག་ཚ་ནན་གཏོང་བའི་ལས་འགུལ་གཞི་རྒྱ་ཆེ་རུ་གཏོང་བཞིན་འདུག་ཟེར།
དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་འདི་གར་གནས་ཚུལ་མཁོ་སྤྲོ་གནང་བ་ལྟར་ན། ཟླ་འདིའི་ཕྱི་ཚེས་ ༡༨ དང་ ༡༩ བཅས་ཉིན་གཉིས་རིང་རྒྱ་ནག་སྤྱི་བདེ་ཚན་པས། བོད་རང་སྐྱོང་ལྗོངས་དང་བོད་ཁུལ་གྱི་ཞིང་ཆེན་བཞིའི་སྤྱི་བདེ་ལས་དོན་ཚོགས་འདུ་ཞིག་ལྷ་སར་སྐོང་འཚོགས་གནང་སྟེ། ཚོགས་ཐོག་ཏུ་འདས་ཟིན་པའི་བོད་ལྗོངས་དང༌ཞིང་ཆེན་བཞིའི་བོད་ཁུལ་གྱི་སྤྱི་བདེའི་ལས་དོན་ཐད་ཐོབ་པའི་གྲུབ་འབྲས་དང་ཉམས་མྱོང་ཕྱོགས་བསྡོམས་བྱས་ཏེ། མ་འོངས་པར་ཁ་བྲལ་ལ་ངོ་རྒོལ་དང་བོད་ཁུལ་གྱི་བརྟན་ལྷིང་སྲུང་སྐྱོབ་ལ་འཕྲད་བཞིན་པའི་དུས་བབ་ལ་ངོས་འཛིན་གཏིང་ཟབ་བྱ་དགོས་སྐོར་བརྗོད་ཡོད་པར་མ་ཟད། འབྱུང་འགྱུར་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ལས་དོན་ལ་ཤུགས་སྣོན་དང་སྤྱི་ཚོགས་བདེ་འཇགས་འགོག་སྲུང་མ་ལག་འཛུགས་སྐྲུན་ལ་ཤུགས་སྣོན། སྤྱི་ཚོགས་དོ་དམ་དང་ཞབས་འདེགས་ལ་ཤུགས་སྣོན། མཐའ་མཚམས་ཚོད་འཛིན་དང་འགྲོ་འོང་གི་དོ་དམ་ལ་ཤུགས་སྣོན་རྒྱག་དགོས་པའི་སྐོར་དང་། དེ་བཞིན་ལག་རྩལ་དང་སྒྲིག་ཆས། སྤྱི་བདེའི་ཆ་འཕྲིན་སོགས་འཛུགས་སྐྲུན་བྱ་རྒྱུར་ཤུགས་སྣོན་རྒྱག་དགོས་སྐོར་བརྗོད་འདུག
འདི་ནི་རྒྱ་གཞུང་གིས་གསར་དུ་ལག་བསྟར་བྱེད་ཀྱིན་པའི་སྒྲིག་སྲོལ་ཞིག་མ་ཡིན་པར། ༢༠༠༨ ལོར་བོད་ས་ཡོངས་སུ་གཞི་རྒྱ་ཆེ་བའི་ཞི་རྒོལ་བྱུང་རྗེས། རྒྱ་གཞུང་གིས་བོད་མིའི་ཐོག་དམ་དྲག་དོ་དམ་བྱེད་ཤུགས་ཆེ་རུ་བཏང་སྟེ། བོད་མི་ཚོས་འགྲོ་འོང་ལ་བཀག་སྡོམ་དང་ཕྱི་ནས་འོང་བའི་བོད་མི་གནས་མཇལ་བ་དང༌ཚོང་པ། གཉེན་འཕྲད་སོགས་ལྷ་སར་གནས་སྡོད་མཁན་གྱིས་ས་གནས་སྤྱི་བདེ་ལས་ཁུངས་སུ་གནས་ཚུལ་མི་འབྱུང་བའི་འགན་ལེན་དང་དཔང་མི་བཞག་སྟེ། གནས་སྐབས་སྡོད་ཆོག་པའི་ལག་འཁྱེར་ལེན་དགོས་ཀྱི་ཡོད་ལ། ལག་འཁྱེར་མེད་ཚེ་འཇུ་བཟུང་བྱེད་ཀྱིན་པར་མ་ཟད། ཆབ་སྲིད་ཀྱི་དོགས་པ་ཡོད་པའི་བོད་མི་ཚོར་གཅིག་འགྱུར་གྱི་དམ་དྲག་དང༌ཆ་འཕྲིན་སྤེལ་རེས། ཞིབ་བཤེར། ས་ཁོངས་རྩིས་སྤྲོད། འཇུ་བཟུང་དང་རྡུང་རྡེག་ཚ་ནན་གྱི་ལས་དོན་སྤེལ་གྱིན་ཡོད་འདུག དེ་བཞིན་ཆབ་སྲིད་ཀྱི་དོགས་གཞི་ཡོད་པའི་མི་དེ་དག་གང་དུ་ཕེབས་ཀྱང་། སྤྱི་བདེ་ཚན་པའི་དམ་དྲག་ལྟ་ཞིབ་དང་འདྲི་རྩད་བྱེད་པ་སོགས་སྤྱི་བདེ་མི་སྣའི་དོ་དམ་ལྟ་ཞིབ་འོག་གནས་ཡོད།
ཡང་ཟླ་འདིའི་ཕྱི་ཚེས་ ༡༤ དང་ ༡༥ བཅས་ཉིན་གཉིས་རིང་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གིས་བོད་བརྒྱུད་ནང་བསྟན་དགོན་སྡེའི་དམངས་བདག་ལས་དོན་ཉམས་མྱོང་སྤེལ་རེས་ཞེས་པའི་ཚོགས་འདུ་གཞིས་ཀ་རྩེར་སྐོང་ཚོགས་བྱས་པ་དང་། དེའི་སྟེང་བོད་ལྗོངས་དང་ཞིང་ཆེན་བཞིའི་བོད་ཁུལ་གྱི་དགོན་སྡེའི་མགོ་ཁྲིད་དང༌ས་གནས་འཐབ་ཕྱོགས་གཅིག་གྱུར་གྱི་འབྲེལ་ཡོད་མགོ་ཁྲིད་བཅས་འདུ་འཛོམས་བྱས་ཏེ། མ་འོངས་དགོན་སྡེའི་དོ་དམ་ལ་རྒྱལ་ཁབ་ཀྱི་ཁྲིམས་ལུགས་ལྟར་ཤུགས་སྣོན་རྒྱག་རྒྱུའི་ལས་དོན་བཀོད་སྒྲིག་བྱས་ཡོད་ལ། འདི་ལོའི་ལོ་འགོར་ཚོགས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་བོད་དེ་འཕུར་མཆོངས་ལྟ་བུའི་འཕེལ་རྒྱས་དང༌། ཡུན་རིང་བདེ་འགོད་ཡོང་བ་བྱ་རྒྱུ་དེ། བོད་ཀྱི་ལས་དོན་གྱི་གཙོ་གནད་ཐོག་བཞག་ཡོད་པ་དང་ཡུན་རིང་བརྟན་ལྷིང་ཡོང་ཆེད། བརྟན་ལྷིང་མེད་པའི་རྒྱུ་རྐྱེན་མཐའ་དག་གཙང་བཤེར་དང་མེད་པ་བཟོ་རྒྱུའི་གཙོ་དོན་དེ་དག་དོན་འཁྱོལ་ལག་བསྟར་བྱ་ཆེད། བོད་མིའི་ཐོག་དམ་དྲག་བྱེད་ཤུགས་ཆེ་རུ་འགྲོ་བཞིན་འདུག་ལ། ཆབ་སྲིད་ཀྱི་དོགས་གཞི་ཡོད་པའི་བོད་མི་ཚོར་རྡུང་རྡེག་ཚ་ནན་གཏོང་བའི་ལས་འགུལ་གཞི་རྒྱ་ཆེ་རུ་གཏོང་བཞིན་ཡོད་འདུག
བསྐྱར་འགོད་པ་དོན་གོ།
ད་ནི་བཅོམ་འཕྲོག་རྡུང་གསུམ་གྱི་ངང་ནས་བོད་མི་ལྷག་བསམ་ཅན་དག་རིམ་བཞིན་རྒྱ་དམར་གྱི་ལག་འོག་ནས་ཚེའི་ཕན་པ་རྫོགས་བཞིན་འདུག
བོད་དུ་དམ་དྲག་དང་བཙན་གནོན་ཞེས་པའི་མིང་ཚིག་གི་འཇིགས་སྣང་རང་བཞིན་དེ་ད་ནི་བག་ཕེབས་ཀྱི་མིང་ཚིག་ཞིག་ལ་འགྱུར་བཞིན་སྣང་།
གངས་ཅན་པའི་ལས་དབང་།
མི་རབས་འདི་སྟོང་བར་ཉེ།
སྙིང་ཉེ་བའི་གཞི་ལུས་ཚོའི་གནས་སྟངས་ཐོས་སྐབས།
ཡིད་སྐྱོ་དུངས་ངེ་།
ལུས་འདར་ཞུམ་མེ།
རྒྱ་ནག་དམར་པོའི་སྲིད་ཇུས་ནི་དབྱར་ཁའི་གནམ་ངོ་ལྟ་བུ་ཡིན་ཕྱིན་དེའི་ཐད་ཚང་མའི་མཁྱེན་གསལ་མ་ཡིན་ནམ།
བརྟན་ལྷིང་ཡོང་དགོས་ན་བོད་མི་རིགས་དེ་མི་ཡི་འདུ་ཤེས་བཞག་ནས་རང་དབང་དང་ཐོབ་ཐང་སྤྲད་དགོས་པ་ལས་རྡུང་རྡེག་ཚ་ནོན་བྱེད་ན་རྙོག་གྲ་ཆེན་རེ་འགྲོ་བ་ལས་ཞི་བདེ་དང་ལྷིང་འཇགས་ག་ལ་ཡོང་ཐུབ།
སྤྱིར་རྒྱ་གཞུང་གིས་རྡུང་རྡེག་ཚ་ནན་ཟེར་བ་དེ་ནི་བསམ་བཞིན་དུ་བོད་མི་ལ་སྡུག་པོ་གཏང་བ་རེད་ལ་བོད་མི་རིགས་ཀྱིས་སྡུག་མི་ཆོག་ནས་སྐད་བརྒྱབ་ཡོང་དུས་ཁོ་ཚོས་དེ་ལ་ཁ་བྲལ་བ་སོགས་ཀྱི་མིང་འདྲ་མིན་བརྟགས་སྟེ་བོད་མི་མེད་པ་བཟོ་ཆོག་ཙང་རེད།
མདོར་ན་བོད་མི་རིགས་མེད་པ་བཟོ་ཡག་གི་ཐབས་ཤེས་ཤིག་རང་རེད།
ཞི་བདེ་དང་བརྟན་ལྷིང་ཡོང་དགོས་ན་བོད་མི་རིགས་དེ་མི་ཡི་འདུ་ཤེས་བཞག་ནས་རང་དབང་དང་ཐོབ་ཐང་སྤྲད་དགོས་པ་ལས་རྡུང་རྡེག་ཚ་ནོན་བྱེད་ན་རྙོག་གྲ་ཆེན་རེ་འགྲོ་བ་ལས་ཞི་བདེ་དང་ལྷིང་འཇགས་ག་ལ་ཡོང་ཐུབ།
སྤྱིར་རྒྱ་གཞུང་གིས་རྡུང་རྡེག་ཚ་ནན་ཟེར་བ་དེ་ནི་བསམ་བཞིན་དུ་བོད་མི་ལ་སྡུག་པོ་གཏང་བ་རེད་ལ་བོད་མི་རིགས་ཀྱིས་སྡུག་མི་ཆོག་ནས་སྐད་བརྒྱབ་ཡོང་དུས་ཁོ་ཚོས་དེ་ལ་ཁ་བྲལ་བ་སོགས་ཀྱི་མིང་འདྲ་མིན་བརྟགས་སྟེ་བོད་མི་མེད་པ་བཟོ་ཆོག་ཙང་རེད།
མདོར་ན་བོད་མི་རིགས་མེད་པ་བཟོ་ཡག་གི་ཐབས་ཤེས་ཤིག་རང་རེད།
སྤུན་ཟླ་ཚོ། སེམས་ཤུགས་མ་ཆག བློ་རྒྱ་བསྐྱེད། ད་ལྟའི་ཆར་རྒྱ་དམར་གྱིས་བཙན་གནོན་དང་སྡིགས་མཛུབ་འོག་སྡུག་བསྔལ་མྱང་དང་མྱོང་བཞིན་ཡིན་ན་ཡང་། འདུས་བྱས་སོ་ན་མི་གནས་པ་ཡིན་པས་ནམ་ཞིག་སྡུག་བསྔལ་རྒྱ་མཚོ་ལས་བསྒྲལ་ཏེ་མི་མོས་རང་སྐྱིད་ཀྱི་འཚོ་བར་སྤྱོད་ཐུབ་པའི་དུས་ཤིག་ལོས་ཡོང་།
ཆབ་སྲིད་དང་ཆོས་ལུགས་ལ་དམ་དྲག་བྱས་དང་བྱེད་བཞིན་པ་ནི་རྒྱ་ནག་གི་ཆབ་སྲིད་རྙིང་པ་ཞིག་དང་། ཆོས་ལུགས་པས་ཆབ་སྲིད་ཀྱི་རྙོག་ཟིང་ཡོང་དྭོགས་ཀྱི་ཞེད་སྣང་ནི་རྒྱ་ནག་སྲིད་གཞུང་གི་སེམས་ན་དུས་ནམ་ཡང་བྱུང་མ་ཐག་པའི་དངངས་སྐྲག་བཞིན་གནས་ཡོད། ཡིན་ན་ཡང་གང་དུ་དམ་དྲག་ཡོད་ན་དེ་རུ་གས་ཁ་ཡོད་པ་བདེན་མོད། གནས་སྟངས་ཀྱི་ཆ་ནས་བཤད་ན་ཕྱི་ཚུལ་ཙམ་མ་གཏོགས་དོན་ངོ་མར་རིག་གནས་གསར་བརྗེའི་སྲིད་བྱུས་ལག་བསྟར་བྱེད་བཞིན་པ་ནི་ལོ་རྒྱུས་ཀྱིས་མི་འཁྱོགས་པའི་བོད་མི་རིགས་ཀྱི་ཆག་འཇིག་ཅིག་རེད།