ང་སྤྱི་འཐུས་ལ་ལངས་པ་ཡིན།

སྤྱི་ཚོགས་ཀྱི་ལྷག་པ་རྒྱག་སྟངས་ལ་བལྟས་ན། སྤྱི་འཐུས་ཀྱང་གསར་པ་མང་པོ་ཞིག་སླེབས་གི་རེད་བསམ་ཡོད། སྤྱི་འཐུས་མང་ཆེ་བ་གསར་པ་ཆགས་པ་ཡིན་ན་ཕྱོགས་ཞེན་འཐེན་འཁྱེར་ཉུང་དུ་འགྲོ་གི་རེད། ལས་དོན་ཚགས་ཚུད་ཡོང་གི་རེད། དེ་ལྟ་བུའི་གྲོས་ཚོགས་ཤིག་གི་ནང་དུ་ང་རང་གིས་ནུས་པ་འཐོན་ཐུབ་པའི་ཡིད་ཆེས་ཡོད་ཟེར།

དེ་རིང་སྔ་དྲོ་རྒྱ་གར་ལྷོ་ཕྱོགས་སྦེལ་ཀོབ་གཞིས་གྲོང་དང་པོའི་གསོལ་ཚིགས་ཁང་ཞིག་ཏུ། ཁྲིམས་རྩོད་པ་ཤོ་ཟུར་པ་སངས་ཚེ་དབང་ལགས་ཀྱིས་གསར་འགོད་གསལ་བསྒྲགས་བསྐྱངས་ཏེ། ཁོ་རང་སྐབས་བཅོ་ལྔ་བའི་དབུས་གཙང་སྤྱི་འཐུས་ཀྱི་འོས་གཞིར་ལངས་རྒྱུ་ཡིན་སྐོར་གསུངས་སོང་། སྐབས་དེར་ཁོང་གིས་གསར་འགོད་པ་རྣམས་ལ་ཞུ་རྒྱུར། ངས་དེ་རིང་གསར་འགོད་གསལ་བསྒྲགས་བྱེད་དགོས་པའི་ནང་དོན་གང་ཡིན་ཟེར་ན། བོད་རྒྱལ་ཡོངས་དམངས་གཙོ་ཚོགས་པས་སྤྱི་འཐུས་ཀྱི་འོས་མི་འདོན་སྐབས། ང་ལ་སྐབས་བཅོ་ལྔ་བའི་དབུས་གཙང་སྤྱི་འཐུས་ཀྱི་འོས་གཞིར་འདུག་འདོད་ཡོད་མེད་སྐད་ཆ་དྲིས་སོང་། སྐབས་དེར་ངས། ང་འདུག་རྒྱུ་ཡིན། འོན་ཀྱང་ང་དགའ་དྲགས་ཏེ་འདུག་གི་མེད། འུ་ཐུག་སྟེ་བསྡད་པ་ཡིན། གང་ཡིན་ཟེར་ན་ད་ལྟ་ཛ་དྲག་གི་དུས་ཚོད་ཅིག་ཏུ་སླེབས་ཡོད། ༧གོང་ས་མཆོག་དགུང་གྲངས་དོན་ལྔར་ཕེབས་ཡོད། སྐབས་བཅོ་ལྔ་བའི་སྤྱི་འཐུས་ཀྱི་ལས་རྒྱུན་ཆུད་ཟོས་སུ་བཏང་ན་དཀའ་ལས་ཁག་པོ་ཆགས་ཚར་པ་རེད་ཅེས་ཞུས་པ་ཡིན། སེམས་འཚབ་འདིའི་དབང་གིས་ང་སྤྱི་འཐུས་ཀྱི་འོས་གཞིར་ལངས་པ་ཡིན། ཞེས་གསུངས་སོང་།

 ཁོས་མུ་མཐུད་དུ་ཁོ་རང་གི་དགོངས་གཞི་ཁག་ཅིག་ངོ་སྤྲོད་གནང་དོན། གཞིས་ཆགས་སྲ་བརྟན་དང་ཤེས་རིག་སོགས་གང་ཐད་དུ་གཞུང་གིས་ལས་ཀ་མ་བྱས་པ་མ་རེད་དེ། ཕྱོགས་མང་པོ་ཞིག་ལ་འཐུས་ཤོར་ཆེན་པོ་ཕྱིན་ཡོད་པ་གསལ་བོ་རེད། ཐེངས་འདིར་ང་རང་སྤྱི་འཐུས་ལ་ལངས་ཏེ་སྐབས་བཅུ་བཞི་བའི་བཀའ་བློན་ཁྲི་པའི་གཙོས་པའི་བཀའ་ཤག་ལྷན་རྒྱས་ལ་འབོད་སྐུལ་ཞུས་འདུག་རྒྱུ་ཙམ་མ་ཡིན་པར་སོ་སོའི་ངོས་ནས་གང་ཡོང་ཅི་ཡོང་གིས་ནུས་པ་འདོན་བསམ་ཡོད། ཆབ་སྲིད་ལངས་ཕྱོགས་ཀྱི་ཐད་ནས་ང་རང་བཙན་གྱི་ལྟ་བ་འཁྱེར་མཁན་ཞིག་ཡིན་ཡང་། དབུ་མའི་ལམ་ལ་ཡང་རྒྱབ་སྐྱོར་བྱེད་ཀྱི་ཡོད། གང་ཡིན་ཟེར་ན་སྔར་དམིགས་བསལ་ཚོགས་ཆེན་སྐབས་དབུ་མའི་ལམ་ལ་མང་མོས་དང་། ༧གོང་ས་མཆོག་གི་ཐག་གཅོད་གང་གནང་བ་དེར་སྤྱི་མོས་བྱུང་ཡོད། ངས་སྔོན་མ་བོད་ཡིག་ཐོག་རྒྱ་ནག་ལ་ཡི་གེ་ཞིག་བཏང་བ་ཡིན། ཞི་བདེ་དང་བརྟན་ལྷིང་འདོད་ན་༧རྒྱལ་བ་རིན་པོ་ཆེ་དང་བཀའ་མོལ་གནང་དགོས་པ་རེད་ཅེས་ལྡི་ལི་གཞུང་ཚབ་བརྒྱུད་དེ་བཏང་ཡོད། ད་ལོའི་འཁྲུངས་སྐར་ཉིན་སླར་ཡང་རྒྱ་ཡིག་ཐོག་ཡི་གེ་ཞིག་བཏང་ཡོད། ཐེངས་འདིར་སྤྱི་འཐུས་ཀྱི་ཁོངས་སུ་འཛུལ་ཏེ། ༧གོང་ས་མཆོག་སྐུ་འཚོ་བཞུགས་རིང་གང་ཐུབ་ཀྱིས་འབད་བརྩོན་བྱ་དགོས་བསམ་ཡོད། ཅེས་གསུངས་སོང་།

 སྐབས་དེར་གསར་འགོད་པས་ཁོང་ལ། སྐུ་ཉིད་ཀྱི་ལོ་རྒྱུས་ལ་བལྟས་ན། ཕྱི་ལོ་ ༢༠༡༡ ལོར་དགུང་ལོ་ ༧༠ ལ་ཕེབས་ཀྱི་འདུག་སྟབས། ལོ་བབ་ཀྱི་ཐད་ནས་བོད་མི་དམངས་སྤྱི་འཐུས་ཤིག་གི་ལས་འགན་ལྕོགས་མིན་ཐད་དགོངས་ཚུལ་གང་ཡོད་དྲིས་པར་ཁོང་གིས། དེ་ལ་ངས་བསམ་བློ་བཏང་ཡོད། ད་ལྟའི་ཆར་ང་རང་གིས་ཁ་ནས་བཤད་ཐུབ་ཀྱི་ཡོད་ལ། ལག་ནས་ཀྱང་ལས་ཐུབ་ཀྱི་ཡོད། མི་མང་པོ་ཞིག་གིས་ང་རང་ལོ་བདུན་ཅུ་དང་འདྲ་བོ་མི་འདུག་ཟེར་གྱི་ཡོད། ད་ཆར་ང་རང་ལོ་གཞོན་པའི་རྒན་འཁོགས་དང་། རྒན་འཁོགས་ཀྱི་ལོ་གཞོན་པའི་ནུས་པ་ཡོད། ལུས་སེམས་གཉིས་དང་སྐད་ཆ་བཤད་སྟངས་གང་ཐད་ནས་ང་རང་གིས་མི་འཇོན་པ་མེད་སྙམ་སྟེ་སྤྱི་འཐུས་ནང་ལངས་པ་ཡིན་ཟེར།

ཡང་ཁོང་ལ། སྐུ་ཉིད་ཀྱིས་སོ་སོ་སྤྱི་འཐུས་ནང་ལངས་རྒྱུར་གསར་འགོད་གསལ་བསྒྲགས་སྤེལ་གྱིན་ཡོད་སྟབས། འོས་བསྡུ་དངོས་གཞིའི་སྐབས་རྒྱལ་ཁ་ཐོབ་རྒྱུར་གདེང་ཚོད་ཅི་ཙམ་ཡོད་མེད་དྲིས་པར་ཁོང་གིས་ལན་སྐྱོན་དོན། བཙན་བྱོལ་བོད་མི་ཕལ་ཆེ་བས་ང་ངོ་ཤེས་ཀྱི་ཡོད། ཡང་མང་པོ་ཞིག་གིས་ཤེས་མདོག་ཁ་བོ་མ་རེད། པ་སངས་ཚེ་དབང་ཟེར་བའི་ངའི་མིང་དེ་རྒྱ་ཆེན་པོ་ཞིག་ཁྱབ་མེད་ཀྱང་། ཡབ་ཆེན་ཟེར་བའི་ངའི་མིང་འདི་རྒྱ་ཆེན་པོ་ཁྱབ་ཡོད། གང་ཡིན་ཟེར་ན་ངས་བདེན་དོན་གྱི་ཐོག་ནས་ཁ་མཆུ་མང་པོ་བརྒྱབ་པ་རེད། ང་སྒེར་དང་སྒོར་རྡོག་གཅིག་གི་འབྲེལ་བ་མེད་པའི་ཐོག་ནས་བོད་གཞུང་དང་བོད་སྤྱི་བའི་ཐོག་ལ་བདེན་དོན་བརྩད་པ་རེད། དེར་བརྟེན་མི་མང་པོ་ཞིག་གིས་ང་ངོ་ཤེས་ཀྱི་ཡོད། ཅེས་གསུངས་སོང་།

ཡང་ཁོང་ལ། གལ་སྲིད་སྐུ་ཉིད་བོད་མི་དམངས་སྤྱི་འཐུས་ནང་སླེབས་པ་ཡིན་ན། ལས་དོན་གང་དག་ཐོག་ནུས་པ་འཐོན་ཐུབ་པར་དགོངས་ཀྱི་ཡོད་དམ་ཞེས་དྲིས་པར། བཀའ་ཤག་རྙིང་པ་རྫོགས་འགྲོ་བཞིན་ཡོད། ད་ཆར་བཀའ་ཤག་གསར་པ་སླེབས་གི་རེད། སྤྱི་ཚོགས་ཀྱི་ལྷག་པ་རྒྱག་སྟངས་ལ་བལྟས་ན། སྤྱི་འཐུས་ཀྱང་གསར་པ་མང་པོ་ཞིག་སླེབས་གི་རེད་བསམ་ཡོད། སྤྱི་འཐུས་མང་ཆེ་བ་གསར་པ་ཆགས་པ་ཡིན་ན་ཕྱོགས་ཞེན་འཐེན་འཁྱེར་ཉུང་དུ་འགྲོ་གི་རེད། ལས་དོན་ཚགས་ཚུད་ཡོང་གི་རེད། དེ་ལྟ་བུའི་གྲོས་ཚོགས་ཤིག་གི་ནང་དུ་ང་རང་གིས་ནུས་པ་འཐོན་ཐུབ་པའི་ཡིད་ཆེས་ཡོད། ཅེས་གསུངས་སོང་།

(གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་ལྷོ་ཕྱོགས་སྦེལ་ཀོབ་ནས་སྤེལ)