བྱ་གཞག་རླབས་ཆེན་སྒྲུབ་མཁན་མང་པོ་ཡོང་བའི་རེ་བ་ཡོད།

གདན་ས་ཆེན་པོ་ཞིག་གི་ནང་ལ་གཞི་རིམ་སློབ་གྲྭ་བཙུགས་ཏེ་དེང་རབས་ཀྱི་ཤེས་ཡོན་སྤྲད་པ་འདི། མ་འོངས་པར་གཞུང་ཆེན་སྦྱོང་སྐབས་མཐུན་རྐྱེན་དུ་འགྲོ་བའི་ཆེད་རེད་མ་གཏོགས། འགལ་རྐྱེན་དུ་ཕྱིན་པ་ཡིན་ན་ཐོག་མའི་དམིགས་ཡུལ་དང་འགལ་སོང་བ་རེད། ལྷ་བདུད་དུ་བབ་སྨན་དུག་ཏུ་སོང་ཟེར་བ་དེ་ཆགས་འགྲོ་བ་རེད། འཛིན་གྲྭ་དང་པོ་ནས་བཟུང་སློབ་ཚན་གང་ཞིག་ཡིན་རུང་མ་འོངས་པར་གཞུང་ཆེན་མོར་སློབ་སྦྱོང་བྱེད་པའི་མཐུན་རྐྱེན་ཡིན་སྙམ་པའི་ཀུན་སློང་བཟུང་སྟེ་སློབ་སྦྱོང་བྱ་དགོས་པ་རེད་ཟེར།

དེ་རིང་སྔ་དྲོའི་ཆུ་ཚོད་ ༩ ཕྱེད་ཀའི་སྟེང་། བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་སེར་བྱེས་འབྲིང་རིམ་སློབ་གྲྭར་ཆིབས་སྒྱུར་བསྐྱངས་ཏེ། སློབ་གྲྭ་དེ་གའི་མཆོད་ཁང་སྟེང་ཤོད་གཉིས་སྒོ་འབྱེད་རབ་གནས་མཛད་ཅིང་། སློབ་གྲྭའི་མདུན་ཐང་ནས་དགེ་ལས་སློབ་ཕྲུག་ཡོངས་དང་ལྷན་དུ་བོད་རྒྱལ་ཁབ་ཆེན་མོའི་རྒྱལ་གླུ་བཏོན་ཞིང་། སློབ་ཕྲུག་ཁག་ཅིག་གིས་བོད་སྐད་དང་དབྱིན་སྐད། ཧིན་སྐད། རྒྱ་སྐད་བཅས་ཀྱི་ཐོག་ནས་གཏམ་བཤད་གནང་སོང་། དེའི་རྗེས་སློབ་གྲྭའི་ཚོགས་ཁང་དུ་ཕེབས་ཏེ་སེར་ར་བྱེས་སྨད་གཉིས་ཀྱི་མཁན་རིན་པོ་ཆེ་རྣམ་གཉིས་དང་སློབ་གྲྭའི་དགེ་ལས་སློབ་ཕྲུག་ཡོངས་ལྷན་འཛོམས་ཐོག་སློབ་སྤྱི་མཆོག་གིས་སློབ་གྲྭའི་ངོ་སྤྲོད་གནང་དོན། སེར་བྱེས་སློབ་གྲྭ་འདི་ཉིད་ལོ་རབས་བདུན་ཅུ་བའི་ནང་དགེ་འདུན་པ་ཚོར་ཆོས་ཁོ་ན་མིན་པར། བོད་པའི་རིག་གནས་དང་དབྱིན་སྐད་སོགས་བསླབ་ཆེད་དུ་བཙུགས་པ་རེད། ལོ་རབས་བརྒྱད་ཅུ་བའི་ནང་རང་སྐྱོང་སྡེ་ཚན་ཞིག་གི་ངོ་བོའི་ཐོག་ནས་རྒྱ་སྐྱེད་བཏང་སྟེ་ཚད་ལྡན་གཞི་རིམ་སློབ་གྲྭའི་ངོ་བོར་བསྒྱུར་ཐུབ་པ་བྱུང་ཡོད། ལོ་རབས་དགུ་བཅུའི་ནང་འཛིན་གྲྭ་བཅུ་བའི་པར་སྤར་ཏེ། ༡༩༩༧ ལོར་རྒྱ་གར་དབུས་གཞུང་ཤེས་རིག་ལྷན་ཚོགས་ཀྱིས་ངོས་འཛིན་ཐོབ་རྗེས་ལོ་ལྟར་འཛིན་གྲྭ་བཅུ་བའི་སློབ་ཕྲུག་རྣམས་ཕྱི་ཟླ་གསུམ་པར་རྒྱ་གར་རྒྱལ་ཡོངས་འཛིན་གྲྭ་བཅུ་བའི་ཡིག་ཚད་ནང་མཉམ་ཞུགས་བྱེད་ཀྱི་ཡོད། འདི་ནི་བོད་ཀྱི་ལོ་རྒྱུས་ནང་སེར་མོ་བའི་སློབ་གྲྭ་ཞིག་རྒྱ་གར་རྒྱལ་ཡོངས་ཀྱི་སློབ་གྲྭའི་ནང་འཛུལ་ཞུགས་གོ་སྐབས་ཐོབ་པ་ཐོག་མ་དེ་ཆགས་ཡོད། ཅེས་དང་།

ཁོས་མུ་མཐུད་དུ་གསུངས་དོན། ད་ཆར་སློབ་ཕྲུག་ ༦༣༠ དང་དགེ་ལས་ ༧༠ ཙམ་ཡོད། ལོ་ལྟར་སློབ་ཕྲུག་ ༧༠ ཡས་མས་གསར་བསྡུ་བྱེད་ཀྱི་ཡོད་ལ། སློབ་མ་དེ་དག་བོད་ནས་གསར་དུ་ཕེབས་མཁན་དང་། ཧི་མ་ལ་ཡའི་རི་རྒྱུད་ཀྱི་མི་རིགས་ཁག་དང་། སོག་པོ་དང་ཐེ་ཝན་བཅས་ནས་ཀྱང་ཡོད། སློབ་མ་འདི་དག་ཡོངས་ལ་སྡོད་ས་དང་ཞལ་ལག སློབ་ཡོན་སོགས་མཐུན་འགྱུར་ཆ་ཚང་སློབ་གྲྭ་རང་གིས་གཏོང་གི་ཡོད། སློབ་ཚན་གྱི་ཐད་ནས་རྒྱ་གར་དབུས་གཞུང་གི་འབྲིང་རིམ་སློབ་གྲྭའི་སློབ་ཚན་དང་སློབ་དེབ་གཞིར་བཟུང་སྐད་ཡིག་ཙམ་མ་གཏོགས་སློབ་ཚན་གཞན་དག་ཚང་མ་བོད་ཡིག་ཐོག་འཁྲིད་ཀྱིན་ཡོད་ཅིང་། འཛིན་གྲྭ་དྲུག་པ་ནས་མཚན་ཉིད་སློབ་ཁྲིད་དང་། སྔ་དགོང་གཉིས་ལ་དགོན་པའི་འགྲོ་སྟངས་ལྟར་ནང་ཆོས་བློ་འཛིན། དེ་བཞིན་ཆོས་རར་ཕེབས་ཏེ་མཚན་ཉིད་རྩོད་པ་སྦྱོང་བརྡར་སོགས་གནང་གི་ཡོད། ༢༠༠༦ ལོ་ནས་རྒྱ་ཡིག་གི་སློབ་ཚན་ཆེད་འཛུགས་བྱས་ཏེ། ད་ཆར་འཛིན་གྲྭ་གསུམ་པ་ནས་དྲུག་པའི་བར་འཁྲིད་བཞིན་ཡོད་ལ། མ་འོངས་པར་འཛིན་གྲྭ་བརྒྱད་པའི་བར་གཏན་འབེབས་བྱ་འཆར་ཡོད། སློབ་གྲྭ་འདི་ནས་འཛིན་གྲྭ་བཅུ་བ་ཐོན་སྐབས། སློབ་ཕྲུག་ཕལ་མོ་ཆེ་གྲྭ་ཚང་གི་དམིགས་ཡུལ་བཞིན་ཆོས་རར་ཞུགས་ཏེ་གཞུང་ཆེན་ལ་ཐོས་བསམ་གནང་གི་ཡོད་ལ། ཡང་མང་པོ་ཞིག་ཝ་རཱ་ན་སི་གཙོས་པའི་བོད་པའི་མཐོ་སློབ་ཁག་དང་། རྒྱ་གར་མཐོ་སློབ་ཁག་ཏུ་འཛུལ་ཞུགས་བྱེད་ཀྱི་ཡོད། ཅེས་ངོ་སྤྲོད་གནང་སོང་།

དེའི་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུངས་བཤད་གནང་དོན། སྤྱིར་སློབ་གྲྭ་འདིའི་སྐོར་གྱི་གནས་ཚུལ་མང་ཆེ་བ་ཤེས་ཀྱི་ཡོད། རྗེས་སུ་ཡི་རངས་དང་བསྔགས་བརྗོད་བྱེད་ཀྱི་ཡོད། གཞུང་ཆེན་སློབ་གཉེར་གནང་སའི་ཆོས་སྡེ་སེར་བྱེས་གྲྭ་ཚང་ནང་། སྤྱིར་བཏང་གི་སྐད་ཡིག་དང་གཞི་རིམ་སློབ་གྲྭའི་སློབ་ཚན། དེང་རབས་དང་མཐུན་པའི་སློབ་གྲྭ་ཞིག་བཙུགས་པ་འདི་ང་ཚོ་སྐྱབས་བཅོལ་དུ་འབྱོར་བའི་ཚུན་ལ་གསར་གཏོད་བྱས་པའི་ལས་གཞིའི་གྲས་ཤིག་རེད། ཐོག་མར་གདན་སར་སློབ་གྲྭ་འཛུགས་རྒྱུའི་ཐོག་ལ་བགྲོ་གླེང་མང་པོ་བྱུང་བ་རེད། ཁག་ཅིག་གིས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཞིག་ལ་དེང་རབས་ཀྱི་ཤེས་ཡོན་དང་སྐད་ཡིག་འདྲ་མིན་དགོས་པ་མ་རེད། གལ་སྲིད་བསླབས་ཀྱང་གཞིར་རྩའི་ཐོས་བསམ་ལ་གནོད་གི་རེད་ཟེར་མཁན་དང་། ཁག་ཅིག་གིས་སངས་རྒྱས་ཀྱི་བསྟན་པ་དེང་གི་དུས་རབས་ནང་གནས་དགོས་ན། བསྟན་པ་འཛིན་པའི་དགེ་འདུན་གྱི་སྡེ་ཡང་དེང་གི་དུས་དང་མཐུན་པ་ཞིག་དགོས་པ་རེད་ཟེར་ཁག ཁ་ཚ་དགོས་གཏུགས་ཀྱི་རྒྱུ་མཚན་ཞིག་ལ། དགོན་པའི་ནང་གཞི་རིམ་སློབ་གྲྭའི་ཤེས་ཡོན་སྤྲོད་ས་ཞིག་མེད་སོང་ན། བྱིས་པ་ཆུང་ཆུང་ཚོ་དགོན་པར་ཞུགས་གི་མ་རེད་ཟེར་བ་སོགས་བྱུང་བ་རེད། བདུན་ཅུ་དོན་གྲངས་ནང་བོད་ནས་ཕེབས་མཁན་མེད་པར་གདན་སར་གྲྭ་རྒྱུན་ཉུང་ཉུང་ཡིན་སྟབས། ལོ་གཞོན་ཚོ་གྲྭ་བ་བྱ་རྒྱུར་རེ་བ་བརྒྱབ་སྟེ་གྲྭ་སར་དེང་རབས་ཀྱི་ཤེས་ཡོན་སློབ་སྦྱོང་བྱེད་ས་བཙུགས་པ་རེད། ད་ལྟ་འདས་པའི་ལོ་རྒྱུས་ལ་ཕྱིར་མིག་བལྟས་ན་སློབ་གྲྭ་བཙུགས་པ་དེ་ཡག་པོ་བྱུང་འདུག ཅེས་གསུངས་སོང་།

ཁོང་གིས་མུ་མཐུད་དུ་སློབ་ཕྲུག་ཚོར་གོ་སྐབས་ཡག་པོ་དམ་འཛིན་བྱ་དགོས་སྐོར་གསུངས་དོན། ཁྱེད་ཅག་གི་སློབ་གྲྭར་སློབ་ཕྲུག་དྲུག་བརྒྱ་ལྷག་ཡོད་རབས་གསུངས་སོང་། བརྒྱ་ཆར་བགོས་ན་སློབ་མ་བརྒྱ་ཡི་ནང་ནས་ཡག་པོ་བཅུ་ཐོན་པ་ཡིན་ན། དྲུག་བརྒྱའི་ནང་ནས་དྲུག་ཅུ་འཐོན་གི་རེད། དེར་བརྟེན། སློབ་གྲྭ་འདིར་མ་འོངས་པར་བསྟན་པ་འཛིན་སྐྱོང་གི་བྱ་བ་རླབས་ཆེན་བསྒྲུབ་ཐུབ་མཁན་མང་པོ་ཡོང་ཐུབ་པའི་རེ་བ་བྱེད་ཀྱི་ཡོད། ཁྱེད་ཅག་ལ་མཚོན་ན་སྐལ་བ་བཟང་པོ་རེད། བོད་ནང་ལ་མཚོན་ན་ཁྱེད་ཅག་དང་མཉམ་པའི་ན་གཞོན་མང་པོ་ཞིག་སློབ་གྲྭའི་གོ་སྐབས་རག་གི་ཡོད་པ་མ་རེད་དེ། རྒྱ་གཞུང་གི་ཡིག་ཆར་བལྟས་ན། བོད་རང་སྐྱོང་ལྗོངས་ལ་མཚོན་ན། སློབ་ལོ་རན་པའི་བྱིས་པ་བརྒྱ་ཆ་ ༢༧ ཙམ་མ་གཏོགས་སློབ་གྲྭའི་གོ་སྐབས་རག་མི་འདུག དེ་དག་ལའང་རྒྱ་ཡིག་རྒྱ་སྐད་ཐོག་ནས་དེང་གི་ཤེས་ཡོན་ཙམ་ལས་བོད་པའི་ནང་ཆོས་ཕར་ཞོག བོད་པའི་སྐད་ཡིག་རིག་གནས་ཙམ་ཡང་རག་གི་ཡོད་པ་མ་རེད། རྒྱ་གར་ལ་མཚོན་ན། ཤེས་ཡོན་སློབ་སྦྱོང་དེ་ཁེ་ཕན་གྱི་གྲས་ནས་བཏོན་ཏེ། ཁྲིམས་ཐོག་ནས་འགྲོ་བ་མིའི་གཞི་རིམ་གྱི་ཐོབ་ཐང་གི་གྲས་སུ་བཞག་ཡོད་ཀྱང་། ད་དུང་མང་པོ་ཞིག་ལ་སློབ་སྦྱོང་གི་གོ་སྐབས་རག་གི་ཡོད་པ་མ་རེད། ཅེས་གསུངས་སོང་།

བཀའ་ཁྲི་མཆོག་གིས་སེར་བྱེས་འབྲིང་རིམ་སློབ་གྲྭའི་རྒྱ་ཡིག་སློབ་ཚན་ལ་བསྟོད་བསྔགས་གནང་དོན། གདན་ས་ཆེན་པོ་ཞིག་གི་ནང་ལ་གཞི་རིམ་སློབ་གྲྭ་བཙུགས་ཏེ་དེང་རབས་ཀྱི་ཤེས་ཡོན་སྤྲད་པ་འདི་མ་འོངས་པར་གཞུང་ཆེན་སྦྱོང་སྐབས་མཐུན་རྐྱེན་དུ་འགྲོ་བའི་ཆེད་དུ་རེད་མ་གཏོགས། འགལ་རྐྱེན་དུ་ཕྱིན་པ་ཡིན་ན་ཐོག་མའི་དམིགས་ཡུལ་དང་འགལ་སོང་བ་རེད། ལྷ་བདུད་དུ་བབ་སྨན་དུག་ཏུ་སོང་ཟེར་བ་དེ་ཆགས་འགྲོ་བ་རེད། དེར་བརྟེན། འཛིན་གྲྭ་དང་པོ་ནས་བཟུང་སློབ་ཚན་གང་ཞིག་ཡིན་རུང་མ་འོངས་པར་གཞུང་ཆེན་མོར་སློབ་སྦྱོང་བྱེད་པའི་མཐུན་རྐྱེན་ཡིན་སྙམ་པའི་ཀུན་སློང་བཟུང་སྟེ་སློབ་སྦྱོང་བྱ་དགོས་པ་རེད། དམིགས་ཡུལ་དེ་བཟུང་བ་ཡིན་ན་སློབ་སྦྱོང་བྱས་པའི་དགོས་པ་རླབས་ཆེན་འགྲུབ་ཡོང་གི་རེད། འདི་སེམས་ལ་ཉར་རྒྱུ་གལ་ཆེན་པོ་ཡིན། གཞན། སློབ་གྲྭ་འདིར་རྒྱ་ཡིག་རྒྱ་སྐད་སློབ་ཁྲིད་གནང་གི་ཡོད་གསུངས་སོང་། དེ་ཞེ་དྲག་ཡག་པོ་རེད། རྒྱ་མི་ལ་སྐད་ཆ་བཤད་དུ་འགྲོ་རྒྱུའི་གོ་སྐབས་ཁག་པོ་ཡིན་ཡང་། བོད་ཡིག་ནང་འགྱུར་མེད་པའི་བཀའ་དང་བསྟན་ཆོས་མང་པོ་རྒྱ་ཡིག་ནང་ཡོད་པ་རེད། དེ་བཞིན་རྒྱ་སྐད་ནང་མེད་པར་བོད་སྐད་ནང་ཡོད་པ་ཡང་མང་དག་ཅིག་ཡོད། མ་འོངས་པར་བོད་སྐད་ནང་མེད་པར་རྒྱ་སྐད་ནང་ཡོད་པ་བོད་ཡིག་ཐོག་བསྒྱུར་རྒྱུ་དང་། རྒྱ་སྐད་ནང་མེད་པར་བོད་སྐད་ནང་ཡོད་པ་ཕར་རྒྱ་སྐད་ནང་བསྒྱུར་རྒྱུ་སོགས་ཀྱི་ལས་དོན་རླབས་ཆེན་འགྲུབ་གི་རེད། ཅེས་གསུངས་སོང་།

༼ གསར་འགོད་པ་དོན་འགྲུབ་བཀྲ་ཤིས་ཀྱིས་ལྷོ་ཕྱོགས་སེ་ར་དགོན་ནས་སྤེལ། ༽