འབྲུག་ཆུའི་གནོད་ཐེབས་ས་ཁུལ་དུ་རོགས་སྐྱོར་བཀག་སྡོམ།

ཉེ་ཆར་མདོ་སྨད་འབྲུག་ཆུ་ས་ཁུལ་དུ་ས་ཉིལ་དང་ཆུ་ལོག་གིས་ཚབས་ཆེའི་གནོད་འཚེ་ཐེབས་ཏེ། མི་མང་པོ་འདས་གྲོངས་དང་རྨས་སྐྱོན། སྡོད་གནས་མེད་པ་སོགས་ཀྱི་གནས་སུ་གྱར་ཡོད་ནའང་། རྒྱ་གཞུང་གིས་གནོད་ཐེབས་ས་ཁུལ་དུ་བོད་ཡུལ་གྱི་ས་གནས་གཞན་ནས་རོགས་སྐྱོར་བྱེད་དུ་ཡོང་མཁན་སོགས་ལ་བཀག་སྡོམ་བྱེད་ཀྱིན་ཡོད་འདུག

འདི་ག་གསར་ཁང་ལ་རྩོམ་པ་པོ་ལྷ་ཆབ་སྦྱིན་པ་ལགས་ཀྱིས་གནས་ཚུལ་མཁོ་སྤྲོད་གནང་དོན། ཁུངས་ལྡན་གནས་ཚུལ་ལྟར་ན། ཉེ་ཆར་ས་རུད་དང་ཆུ་ལོག་གི་གནོད་ཐེབས་ས་ཁུལ་གྱི་ཉེ་ཁུལ་ཏེ་རྨ་ཆུ་དང་ཀླུ་ཆུ། བསང་ཆུ། ཐེ་བོ། ཅོ་ནེ་སོགས་གཙོས་རྔ་བ་ཕྱོགས་དང་མཚོ་སྔོན་ཕྱོགས་ཀྱི་བོད་རིགས་རྣམས་ཀྱིས་ཞལ་འདེབས་བསྡུས་ནས་འབྲུག་ཆུའི་ཕྱོགས་སུ་ཆས་ནའང་། རྒྱ་ནག་གིས་སྒོ་ཐམས་ཅད་བསྡམས་ཡོད་སྟབས་རོགས་སྐྱོར་དངོས་རྫས་བསྐྱལ་རྒྱུ་ཕར་ཟད། གནོད་འཚེ་ཐེབས་ཡུལ་གྱི་གནས་སྟངས་གསལ་བོ་ཤེས་མི་ཐུབ་པར་གྱུར་ཡོད།

དེ་བཞིན་བླ་བྲང་དགོན་པའི་གྲྭ་པ་མང་བོས་དང་བླངས་ཀྱིས་རོགས་སྐྱོར་ལ་འགྲོ་རྒྱུར་གྲ་སྒྲིག་བྱས་ཀྱང་བཀག་སྡོམ་བྱས་འདུག ད་དུང་གཙོས་དགོན་པ་དང་སྟག་ཚང་ལྷ་མོ་ཉིན་སྲིབ་གཉིས་ཀྱི་དགོན་པའི་གྲྭ་པ་དག་གིས་ཀྱང་རོགས་སྐྱོར་གྱི་དངུལ་དངོས་བསྡུས་པ་དང་དངོས་སུ་གནོད་ཐེབས་ས་ཁུལ་ལ་འགྲོ་རྒྱུ་གྲ་སྒྲིག་བྱས་ཀྱང་བཀག་འདུག ཐ་ན་སྨན་ཁང་དུ་སླེབས་པའི་ནད་པར་ཡང་རོགས་དངུལ་སྤྲོད་ཆོག་ཀྱང་། དངོས་སུ་ནད་པ་དང་ཐུག་གི་མི་འཇུག་པ་དེ་རེད། མདོར་བསྡུས་ན་ཐེངས་འདིའི་རྒྱ་ནག་གི་བཀག་སྡོམ་འདི་ནི་འཆར་གཞི་ལྡན་པ་ཞིག་དང་ཇུས་བཀོད་ལྡན་པ་ཞིག་ཡིན་འདུག་ཅེས་བརྗོད།

འདི་གའི་གསར་འགོད་པས་བཞུགས་སྒར་ངྷ་ས་ཀིརྟི་བྱེས་པ་གྲྭ་ཚང་གི་གྲྭ་ཐེ་བོ་བསེ་རོང་འོད་ཟེར་ལགས་སུ་བཀའ་འདྲི་ཞུས་པར་ཁོང་གིས། ཉེ་ཆར་འབྲུག་ཆུར་གནོད་སྐྱོན་བྱུང་མ་ཐག ཉེ་འཁོར་གྱི་ཐེ་བོ་བར་མིའི་བོད་མི་རྣམས་ཉེན་སྐྱོབ་བྱེད་དུ་སོང་འདུག་ཀྱང་། སྐབས་དེར་རྫོང་མཁར་དུ་འདམ་ཉིལ་དང་ཆུ་ལོག་གིས་ཁེངས་ཏེ། ཉེན་སྐྱོབ་ཀྱི་བྱ་བ་གང་ཡང་བྱེད་ཐུབ་ཀྱི་མེད་སྟབས་ཕྱིར་ལོག་དགོས་བྱུང་འདུག་མོད། དཀའ་ངལ་བྱུང་མིན་ལ་མ་ལྟོས་པར་ཉེ་འཁོར་གྱི་བོད་མི་རྣམས་ཐེངས་དང་པོར་གནོད་ཐེབས་ས་ཁུལ་དུ་སོང་ནས་རང་ནུས་གང་ཡོད་ཀྱིས་རོགས་སྐྱོར་ཕྲན་ཙམ་རེ་བྱས་འདུག་ཀྱང་། དེའི་རྗེས་རྒྱ་གཞུང་གིས་འགྲིམ་འགྲུལ་སྟབས་བདེ་མེད་པར་ཁ་གཡར་ཏེ་ས་གནས་གཞན་གྱི་བོད་མི་དང་། ལྷག་པར་དུ་ཉེ་འཁོར་གྱི་བོད་མི་རྣམས་ས་གནས་ས་ཐོག་རང་དུ་རོགས་བྱེད་པར་འགྲོ་རྒྱུར་བཀག་འགོག་བྱས་འདུག

དེར་བརྟེན་རོགས་སྐྱོར་མང་བོ་ཞིག་གནོད་ཐེབས་ས་ཁུལ་རང་དུ་འབྱོར་ཐུབ་ཀྱི་མེད་ཐོག རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ལས་གནས་ཚུལ་ངོ་མ་བཀབ་སྦས་ཀྱིས་བསྒྲགས་པ་མ་གཏོགས། ཕྱི་ཕྱོགས་ནས་ས་གནས་དེ་གའི་གནས་སྟངས་ད་ལྟའི་ཆར་གང་འདྲ་ཡིན་མིན་ཤེས་རྟོགས་ཐུབ་ཀྱི་མི་འདུག དཔེར་ན། སྐབས་དེར་བརྙན་འཕྲིན་ལས་ཚབས་ཆེའི་གནོད་སྐྱོན་ཐེབས་མེད་པའི་ཁང་བརྩེགས་དང་སྲང་ལམ་སོགས་སྟོན་གྱིན་པ་ལས། ཚབས་ཆེའི་གནོད་སྐྱོན་ཐེབས་ཡུལ་དེ་ཙམ་ཞིག་གསལ་སྟོན་བྱེད་ཀྱི་མི་འདུག་ཅེས་ཟེར།

ཡང་ཁོང་ལ་ཐེངས་འདིར་གནོད་ཐེབས་ས་ཁུལ་དུ་རོབ་རྩིས་བྱས་ན། བོད་མི་ཅི་ཙམ་གྱི་ཚེ་སྲོག་ཤོར་ཡོད་མེད་སྐོར་དྲིས་པར་ཁོང་གིས་བརྗོད་དོན། ད་ལྟའི་ཆར་གནོད་ཐེབས་ས་ཁུལ་དེ་བཀག་སྡོམ་བྱས་ཡོད་སྟབས། མི་ཅི་ཙམ་གྱིས་ཚེ་སྲོག་ཤོར་བའི་གྲངས་འབོར་ཤེས་རྟོགས་ཐུབ་ཀྱི་མི་འདུག་མོད། འབྲུག་ཆུ་རྫོང་གི་རྫོང་དཔོན་ ༼ བོད་མི་ ༽ གྱིས་ཐེངས་འདིར་གནོད་སྐྱོན་བྱུང་ཡུལ་ནི་བོད་ཀྱི་ས་ཐོག་ཡིན་པ་དང་། གནོད་ཐེབས་མི་མང་མང་ཤོས་ཀྱང་བོད་མི་ཡིན་སྟབས་མི་རིང་བར་རྗེས་དྲན་རྡོ་རིང་དང་མ་ཎི་རྡོ་བརྐོས་སོགས་བཞེངས་འཆར་ཡོད་སྐོར་བརྗོད་འདུག་པས། སྐབས་དེར་སླེབས་ན་མི་ཅི་ཙམ་འདས་པའི་གྲངས་འབོར་ཤེས་མི་ཡོང་ངམ་སྙམ་གྱི་འདུག་ཅེས་བརྗོད།

ཡིན་ནའང་། ཁོང་གིས་ཐེངས་འདིའི་གནོད་སྐྱོན་ཁྲོད་སློབ་གྲྭ་ཁག་གི་སློབ་མར་ཚབས་ཆེའི་གནོད་སྐྱོན་བྱུང་མི་འདུག དེ་ནི་སྐབས་དེར་སློབ་གྲྭའི་དབྱར་གནང་དང་སྟབས་ཁེལ་ཏེ། སློབ་མ་ཚོ་ཕྱིར་གཞི་རིམ་དུ་ཡོད་པའི་རང་གི་ཁྱིམ་ཚང་དུ་ལོག་ཡོད་སྟབས་རེད་ཅེས་བརྗོད།

མདོ་སྨད་དབུས་རྒྱུན་ལས་ཁང་གི་དྲུང་ཆེ་རྒྱ་རིགས་ཐར་ལགས་སུ་འདི་གའི་གསར་འགོད་པས་བཅར་འདྲི་ཞིག་གི་སྐབས་སུ། ཁོང་གིས་གོང་མཚུངས་ལྟར་ཐེངས་འདིར་རྒྱ་ནག་གིས་གནོད་ཐེབས་ས་ཁུལ་དུ་བཀག་སྡོམ་བྱས་སྟབས། ཉེ་ཁུལ་གྱི་ཡུལ་མི་གཙོས་རྒྱ་ཆེའི་བོད་རིགས་མང་ཚོགས་ཀྱིས་རོགས་སྐྱོར་དང་། ཞལ་འདེབས་འབུལ་རྒྱུར་དཀའ་ཁག་འཕྲད་བཞིན་པ་དང་། རྒྱ་ནག་གི་གསར་འགྱུར་བརྒྱུད་ལམ་ཁག་ལའང་སྟངས་འཛིན་བྱས་འདུག་སྟབས། འབྲུག་ཆུ་རྫོང་གི་གནོད་ཐེབས་ཀྱི་གནས་ཚུལ་ངོ་མ་དང་ད་ལྟའི་གནས་སྟངས་ངོ་མ་ཤེས་རྟོགས་ཐུབ་ཀྱི་མི་འདུག་ཟེར།

ཁོང་གིས་ད་དུང་། ཐེངས་འདིའི་གནོད་ཐེབས་ས་ཁུལ་དེ་ནི་ལོ་རྒྱུས་རང་བཞིན་གྱི་བོད་ཀྱི་མཐའ་མཚམས་ས་ཁུལ་ཞིག་ཡིན། བརྒྱུད་ལམ་ཁག་ནས་ཤེས་རྟོགས་བྱུང་བ་ལྟར་ན། འདམ་རུད་ཀྱི་ཞེང་ཚད་ལ་མི་ཊར་ ༥༠༠ ལྷག་དང་། རིང་ཚད་ལ་སྤྱི་ལེ་ ༥ ཙམ་ཡོད་འདུག རྫོང་འདིར་སྤྱིའི་མི་གྲངས་ ༡༣༤༡༨༨ ཡོད། དེའི་ནང་རྒྱ་རིགས་ ༨༩༨༤༢ དང་། སྤྱིའི་མི་གྲངས་ཀྱི་བརྒྱ་ཆ་ ༦༦།༩༥ ཟིན་ལ། བོད་རིགས་ ༤༤༡༧༥ ཡོད། སྤྱིའི་མི་གྲངས་ཀྱི་བརྒྱ་ཆ་ ༣༢།༩༢ ཟིན། དེ་བཞིན་ཁ་ཆེ་ ༡༥༤ ཡོད། སྤྱིའི་མི་གྲངས་ཀྱི་བརྒྱ་ཆ་ ༠།༡༡ ཟིན། མན་ཇུའི་རིགས་དང་སོག་རིགས། ཟ་ལར་རིགས་འགའ་ཡོད། རྫོང་ཡོངས་ཀྱི་སྤྱིའི་རྒྱ་ཁྱོན་ལ་སྤྱི་ལེ་གྲུ་གཞི་མ་ ༣༠༡༠ ཡོད་པ་དང་། མངའ་ཁོངས་སུ་ཡུལ་ཚོ་ ༢༠ དང་གྲོང་བརྡལ་ ༢ ཡོད་པ་དང་། སྲིད་འཛིན་སྡེ་བ་ ༢༡༠ ཡོད།

ཐེངས་འདིའི་ཆུ་ལོག་གི་གནོད་འཚེ་ལས་བསྡོམས་པས་ཁྱིམ་ཚང་ ༣༠༧ གྱི་སྡོད་ཁང་དང་ཁང་མིག་ ༥༥༠༨ གཏོར་བརླགས་ཐེབས། དེའི་ནང་ཞིང་སྡེ་ཁྱིམ་ཚང་ ༢༣༥ ཡི་སྡོད་ཁང་ཡོད་པ་དང་། གྲོང་རྡལ་གྱི་ལས་བཟོ་བའི་སྡོད་དམངས་ཁྱིམ་ཚང་ ༧༢ ཀྱི་འདུག་ཁང་ཡོད་། ཁྱིམ་ཚང་ ༤༡༨༩ དང་ཁང་མིག ༢༠༩༤༥ ནང་དུ་ཆུ་བླུགས། དེའི་ནང་ཞིང་སྡེ་མང་ཚོགས་ཁྱིམ་ཚང་ ༡༥༠༣ ཀྱི་སྡོད་ཁང་ཡོད་པ་དང་། གྲོང་རྡལ་ཁྱིམ་ཚང་ ༢༦༨༦ གི་སྡོད་ཁང་ཡོད། ལས་ཁུངས་ཀྱི་གཞུང་ལས་ཐོག་ཁང་ ༢༡ ལ་གནོད་པ་ཐེབས་པ་དང་རླངས་འཁོར་ ༣༨ ལ་སྐྱོན་བྱུང་འདུག

དེ་ལྟར་རེ་རེ་བཞིན་གཤིབ་བསྡུར་བྱས་ཡོང་དུས་ཐེངས་འདིའི་གནོད་པ་ཐེབས་ཡུལ་དུ་གཞུང་གི་ལས་ཁུངས་ཀྱི་གཞུང་ལས་ཐོག་ཁང་ ༢༡ དང་རླངས་འཁོར་ ༣༨ ཕན་ནས། མང་ཚོགས་ཀྱི་ཁང་པ་རྡིབ་པའི་གྲངས་མང་བ་དང་། མི་ཤི་རྨས་བྱུང་བའི་གྲངས་འབོར་ཡང་དེ་མཚུངས་སུ་མང་ཚོགས་ལ་ཚབས་ཆེ་བ་འདུག དེ་དག་ལས་ཀྱང་གོང་གསལ་གྱི་གནས་ཚུལ་དག་གི་སྟེང་ནས་ཐེངས་འདིར་བོད་རིགས་མང་ཚོགས་ལ་ཕོག་པའི་གནོད་འཚེ་ཤུགས་ཆེ་བ་འདུག་ཅེས་གསུངས།

ཡང་ཁོང་གིས་བརྒྱུད་ལམ་ཁག་གི་གནས་ཚུལ་ལ་གཞིགས་ན་འདི་ལྟ་བུའི་ཆུ་ལོག་གི་གནོད་འཚེ་ཆེན་པོ་ཞིག་ཡོང་དགོས་པའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་ཁོར་ཡུག་སྲུང་སྐྱོབ་ལ་དོ་སྣང་ཆུང་བའམ། ཡང་ན་རང་བྱུང་ཁམས་ལ་གཏོར་སྐྱོན་ཚད་ལས་བརྒལ་བ་བཏང་བས་ཡིན་འདུག་ཅེས་གསུངས།

དེ་བཞིན་ཐེ་བོ་བསེ་རོང་འོད་ཟེར་ལགས་ཀྱིས་ཀྱང་། ས་རུད་དང་ཆུ་ལོག་གི་གནོད་སྐྱོན་ཐེབས་དོན། ཕྱི་ལོ་ ༡༩༥༡ ནས་ ༡༩༩༤ བར་རྒྱ་གཞུང་གིས་ས་གནས་དེའི་ཤིང་ནགས་གཅོད་གཏུབ་བྱས་པ་དང་། གློག་རྡུལ་ས་ཚིགས་བཙུགས་པ། གཏེར་ཁ་བསྔོག་འདོན་བྱས་ཏེ་མཐོ་སར་གནས་པའི་སྡེ་བར་བསམ་གཞིག་མ་བྱས་པར་རི་ཁོག་སྟོང་དུ་བཟོས་པ་སོགས་ཀྱིས་ས་བཅུད་ཤོར་ཏེ་ས་རུད་ཀྱི་གནས་ཚུལ་བྱུང་བ་རེད་ཅེས་ཟེར།

གསར་འགོད་པ། ཨ་རིག་འགྱུར་མེད།