ད་ལྟའི་དུས་འདིར་དད་པ་གཅིག་པུས་ཡོང་གི་མེད།

ཚན་རིག་ལ་ཡིད་ཆེས་བྱས་པའི་དབང་གིས་ལོ་ངོ་སྟོང་ཕྲག་ལྷག་གི་རིང་། དད་པ་བྱས་པ་དེ་གལ་ཆེན་མིན་པའི་བཟོ་འདྲ་བྱས་ཏེ་ཕྱིན་པ་རེད། ད་ལྟའི་དུས་འདིར་ཡང་ཚན་རིག་ཡར་རྒྱས་སུ་འགྲོ་བཞིན་ཡོད་སྟབས་དད་པ་གཅིག་པུས་ཡོང་གི་མེད་ལ། མ་འོངས་པར་ཐབས་ཤེས་དང་བསམ་བློ་གཏོང་དགོས་པའི་དུས་ལ་སླེབས་ཡོད། ཅེས་༸གོང་ས་མཆོག་གིས་ལྷོ་ཀོ་རི་ཡའི་ཆོས་ཞུ་བ་དང་བཞུགས་སྒར་གྱི་སེར་སྐྱ་མི་མང་ལ་གསུངས་ཡོད།

དེ་རིང་ཕྱི་ཚེས་ ༢༨ ཉིན་གྱི་ཞོགས་པར་ལྷོ་ཀོ་རི་ཡའི་ཆོས་ཞུ་བ་རྣམས་ཀྱིས་ཇི་ལྟར་གསོལ་འདེབས་གནང་བ་ལྟར། ༸གོང་ས་མཆོག་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གནང་སྟེ།  ཐོག་མར་ཐེངས་འདིའི་ལྷོ་ཀོ་རི་ཡ་ནས་ཆེད་དུ་ཕེབས་པའི་ཆོས་ཞུ་བ་གཙོས་དེར་ཡོད་ཀྱི་མི་མང་ལ་འཚམས་འདྲི་དང་། ཆོས་ཞུ་བ་རྣམས་ཀྱིས་ཀོ་རི་ཡའི་སྐད་ཀྱི་ཐོག་ནས་སྨོན་ལམ་གསུངས་རྗེས། ༸གོང་ས་མཆོག་གིས་ནང་ཆོས་ངོ་སྤྲོད་དང་འབྲེལ་བཀའ་སློབ་གསུང་བཤད་གནང་ཡོད།

སྐབས་དེར་ཁོང་གིས། དེ་རིང་ང་རང་ཀོ་རི་ཡའི་ཆོས་ཞུ་བ་དང་མཉམ་དུ་འཛོམས་ཏེ་ཡང་བསྐྱར་ཆོས་བཤད་པའི་གོ་སྐབས་བྱུང་བར་ཧ་ཅང་དགའ་བོ་བྱུང་། མཁན་པོས་དབུ་ཁྲིད་པའི་ཆོས་གྲོགས་རྙིང་པ་ཚོར་ལོ་འདི་གའི་རིང་ཡར་རྒྱས་གང་འདྲ་ཞིག་འགྲོ་གི་ཡོད་མེད་ཧ་གོ་གི་མི་འདུག ངོས་ནས་ཁྱེད་རང་ཚོ་ཡར་རྒྱས་ཕྲན་བུ་ཙམ་ཞིག་འགྲོ་བཞིན་པར་མཐོང་གི་ཡོད། སློབ་གྲྭར་སློབ་སྦྱོང་བྱེད་བཞིན་པའི་སྐབས་སུ་ལོ་རེ་ནས་ལོ་རེར་ཤེས་བྱ་མཐོ་རུ་འགྲོ་བཞིན་པ་ལྟར། ང་རང་ཚོས་ཆོས་ཕྱོགས་ཀྱི་སེམས་ཡར་རྒྱས་གཏོང་རྒྱུ་དེ་ཡང་མཐོ་ནས་མཐོ་རུ་གཏོང་དགོས་པ་ཞིག་ཆགས་ཡོད། དེ་ལྟར་མ་ཡིན་པར་སྔར་གྱི་གནས་སུ་ལྷག་བསྡད་ན་ཡོང་གི་མ་རེད་ཅེས་གསུངས་པ་དང་འབྲེལ། ༸གོང་ས་མཆོག་གིས་ཐེངས་འདིའི་གསུང་ཆོས་ཀྱི་བརྗོད་གཞི་གཙོ་བོ་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་གཅོད་པ་ཞེས་བྱ་བ་ཐེག་པ་ཆེན་པོའི་མདོ་འདི་བོད་པ་ཙམ་དུ་མ་ཟད། ཀོ་རི་ཡ་དང་ཉི་ཧོང་ནང་དུའང་དར་ཁྱབ་འགྲོ་བཞིན་ཡོད་སྟབས། རྒྱ་ཆེ་ཞིང་གཏིང་ཟབ་པའི་ཤེར་ཕྱིན་གྱི་མདོར་སློབ་གཉེར་བྱ་བ་ལ་འཕགས་པ་ཐོགས་མེད་ཀྱིས་མཛད་པའི་ཤེར་ཕྱིན་གཞུང་གི་འགྲེལ་བ་དང་རེ་བ་དོན་གསལ། དེ་བཞིན་སློབ་དཔོན་ཀླུ་སྒྲུབ་ཀྱིས་མཛད་པའི་རྩ་བ་ཤེས་རབ་ཀྱི་འགྲེལ་བ་དང་དཔལ་ལྡན་ཟླ་བ་གྲགས་པའི་ཚིག་གསལ། སྨོན་ལམ་ལེགས་ལྡན་གྱི་ཤེས་རབ་སྒྲོན་མེ་སོགས་ལ་ལྟ་ཐུབ་ན་ཡག་པོ་ཡོད་ལ། ད་ལྟའི་ཆར་ཤེར་ཕྱིན་གྱི་གཞུང་ཁག་ཅིག་རྒྱ་ཡིག་སྟེང་ཡོད་པ་དང་མ་འོངས་པར་ཡང་རྒྱའི་ཡིག་རིགས་སྟེང་སྒྱུར་འཆར་ཡོད་ཅེས་གསུངས།  

ཡང་ཁོང་གིས། ང་རང་ཚོས་ཉམས་མྱོང་གི་ཐོག་ནས་ཤེས་བསྡད་པ་ཞིག་ནི། ཚང་མར་བདེ་བ་འདོད་པ་ལས་སྡུག་བསྔལ་མི་འདོད་པ་དེ་ཡིན། དེ་ནི་མི་ཙམ་དུ་མ་ཟད་སྲོག་ཆགས་ཚུན་ཆད་ལའང་ཡོད་བསྡད་པ་ཞིག་རེད།ན་ཚ་ལྟ་བུར་ཆ་བཞག་ན་གཙོ་བོ་ལུས་ལ་བརྟེན་པའི་ལུས་ཚོར་གྱི་སྡུག་བསྔལ་ཞིག་ཡིན་སྟབས། དེ་ཡང་བཟའ་བཏུང་ཚིམས་པའི་སྐབས་སུ་ལུས་ཚོར་བདེ་བ་དང་མིའི་གཟུགས་ཡིད་དུ་འོང་བ་ཞིག་མཐོང་བ། རོལ་མོ་སོགས་སྒྲ་སྙན་པ་ཞིག་ཐོས་པ་སོགས་ཀྱིས་བདེ་བ་ཞིག་ཡོང་གི་ཡོད། ཡང་ལུས་ཁོ་ན་དང་བསམ་བློ་གཏོང་ཕྱོགས་སོགས་ཀྱི་ཐོག་ནས་མིའི་སེམས་ཀྱི་རྒྱུ་མཚན་ཡོད་མེད་གང་ཡིན་ཡང་། སེམས་ལ་དངངས་སྐྲག་ཆེན་པོ་སྐྱེས་པ་དང་བསྟུན་ནས་ལུས་ལ་ཕྲག་དོག་དང་འགྲན་སེམས། ང་རྒྱལ། ཡིད་དུ་འོང་བར་ཆགས་པའི་ཆགས་པ་ཤུགས་ཆེན་པོ་སྐྱེས་པ་སོགས་ལུས་ཚོར་གྱི་སྐད་ཆ་མིན་པར། ཡིད་ལུས་གཉིས་ཀྱི་ཐོག་མི་བདེ་བ་ཡོང་བསྡད་ཡོད་སྟབས། ལུས་ལ་བརྟེན་པའི་བདེ་སྡུག་ཅིག་དང་ལུས་ཚོར་ལ་བརྟེན་པའི་བདེ་སྡུག་བཅས་གཉིས་ཡོད་པ་གསལ་བོ་རེད་ལ།ཡིད་ལུས་གཉིས་ཀྱི་བདེ་སྡུག་བསྡུར་ན་ཡིད་ཀྱི་བདེ་སྡུག་ཚབས་ཆེ་བ་དང་ཤུགས་ཆེ་བ་ཡོད། མི་མང་པོ་ཞིག་སེམས་མ་སྐྱིད་པའི་སྐབས་སུ་ས་ཆ་གཞན་དུ་སོང་སྟེ་སེམས་གཡེང་གི་ཡོད་པ་རེད། དེས་བདེ་སྡུག་གི་རྩ་བ་སེལ་ཐུབ་ཀྱི་མེད་ཀྱང་། སེམས་འཁྲུག་བསྡད་པ་དེ་ཅུང་ཙམ་ཞི་འཇམ་དུ་འགྲོ་གི་ཡོད་ཅེས་བཀའ་སློབ་གནང་བར་མ་ཟད།

ཁོང་གིས། འདས་པའི་མི་ལོ་ ༣༠༠༠ ལྷག་གི་རིང་མི་རྣམས་ཀྱིས་རེ་བ་བཅོལ་སར་དད་པ་བྱས་ཏེ།  དེས་ང་རང་སྐྱོབས་གི་རེད། རོགས་པ་གནང་གི་རེད་ཅེས་བསྡད་པ་རེད། ལོ་ ༢༠༠ ལྷག་གི་རིང་ལ་གཞི་ནས་བརྟག་དཔྱད་བརྒྱུད་ཚན་རིག་གི་རིག་པ་རྙེད་པ་དང་རྫས་ཀྱི་ནུས་པ་བཤད་ཡོང་སྟེ། མི་ལོ་དུ་མའི་རིང་ཚན་རིག་དང་འཕྲུལ་ཆས་ཀྱི་ཡར་རྒྱས་ཧ་ཅང་དར་ཁྱབ་བྱུང་ཡོད།ལོ་སྟོང་ཕྲག་ལྷག་ལ་སྨོན་ལམ་བརྒྱབ་སྟེ་ཡོང་བར་ཤོག ཡོང་བར་ཤོག་ཟེར་བ་དེ།ད་ལྟ་འཕྲུལ་ཆས་ཀྱི་ལམ་ནས་ལམ་སེང་བཟོ་ཐུབ་ཀྱི་ཡོད་པ་རེད།ཚན་རིག་གི་ཐོག་ནས་སྨན་ཟ་རྒྱུ་ཡོད་པ་དང་གཤག་བཅོས་བྱ་རྒྱུ་ཡོད་པ་དེ་ཚན་རིག་གི་གྲུབ་འབྲས་རེད། ལོ་ ༢༠༠ ལྷག་གི་རིང་ཚན་རིག་དང་འཕྲུལ་ཆས་ཡར་རྒྱས་ཕྱིན་པའི་དབང་གིས་མིའི་ཡིད་ཆེས་དང་རེ་བ་བཅོལ་ས་ཚན་རིག་ཆགས་ཏེ། ཚན་རིག་ལ་རེ་བ་བརྒྱབ་པའི་དབང་གིས་ལོ་ངོ་སྟོང་ཕྲག་ལྷག་གི་རིང་ལ་དད་པ་བྱས་པ་དེ་གལ་ཆེན་མིན་པའི་བཟོ་འདྲ་བྱས་ནས་ཕྱིན་པ་རེད།ད་ལྟའི་དུས་འདིར་ཡང་ཚན་རིག་ཡར་རྒྱས་སུ་འགྲོ་བཞིན་ཡོད་སྟབས་དད་པ་གཅིག་པུས་ཡོང་གི་མེད་ལ། མ་འོངས་པར་ཐབས་ཤེས་དང་བསམ་བློ་གཏོང་དགོས་པའི་དུས་ལ་སླེབས་ཡོད་པ་རེད་ཅེས་བཀའ་སློབ་གསུང་བཤད་གནང་ཡོད།