རི་མོའི་ལམ་ནས་བྲིས་པའི་༧གོང་ས་མཆོག་གི་མཛད་རྣམ་ཞིག་ཉེ་ཆར་ཨུ་རུ་སུའི་སྐད་ཡིག་གཙོས་པའི་སྐད་ཡིག་མི་འདྲ་བ་ཁག་ ༡༠ ཙམ་གྱི་ནང་གསར་དུ་འགྲེམས་སྤེལ་ཞུས་ཡོད་འདུག
ཟླ་འདིའི་ཚེས་ ༢༩ ཉིན་ཨུ་རུ་སུའི་སྐུ་ཚབ་དོན་གཅོད་ཁང་གིས་གནས་ཚུལ་མཁོ་སྤྲོད་བྱས་པ་ལྟར་ན། ཉི་ཧོང་གི་སྙན་གྲགས་ཅན་གྱི་རི་མོ་བ་ཐེ་སོ་སི་ཝེ་ལགས་ Taisu Saivai ཀྱིས་རི་མོའི་ལམ་ནས་བྲིས་པའི་༧གོང་ས་སྐུ་ཕྲེང་བཅུ་བཞི་པ་ཆེན་པོའི་མཛད་རྣམ་སྙིང་བསྡུས་ཤིག་དེབ་གཟུགས་སུ་བཟོས་ཏེ་ཡོངས་ཁྱབ་འགྲེམས་སྤེལ་ཞུས་ཡོད་ལ། ཁོང་གི་མཛད་རྣམ་དེ་ནི་ཨུ་རུ་སུའི་སྐད་ཡིག་གཙོས་པའི་འཛམ་གླིང་གི་སྐད་ཡིག་མི་འདྲ་བ་ཁག་ ༡༠ ཙམ་གྱི་ནང་པར་སྐྲུན་འགྲེམས་སྤེལ་ཞུས་ཡོད། མོ་སི་ཀོར་རྟེན་གཞི་བྱས་པའི་བོད་སྐྱོབ་ཐེབས་རྩ་ཁང་དང་། ཁལ་མུག་ཉི་ཧོང་མཐུན་འབྲེལ་ཚོགས་པ་གཉིས་ཀྱིས་ཐུན་མོང་ཐོག་ཉེ་ཆར་ཨུ་རུ་སུའི་སྐད་ཡིག་ནང་ཡོད་པའི་དེབ་གྲངས་ ༡༥༠༠ ཆིག་སྟོང་ལྔ་བརྒྱ་ཐམ་པ་ཙམ་ཁལ་མུག་ཁུལ་གྱི་བྱིས་པ་ཚོར་ནར་གཏོང་བྱས་ཡོད་འདུག ཉི་ཧོང་གི་རི་མོ་བ་སི་ཝེ་ལགས་ཀྱིས་འདས་པའི་མི་ལོ་ངོ་ ༢༠ རིང་རི་མོའི་ལམ་ནས་ཁོར་ཡུག་སྲུང་སྐྱོབ་དང་། འགྲོ་བ་མིའི་ཐོབ་ཐང་། དེ་བཞིན་འགྲོ་བ་མིའི་བདེ་རྩའི་ཕྱོགས་ལ་དམིགས་ཏེ་དཔེ་དེབ་གང་མང་ཞིག་འགྲེམས་སྤེལ་ཞུས་ཡོད་པར་མ་ཟད། ཁོང་གིས་ད་དུང་མུ་མཐུད་ནས་སྟོན་པ་ཡེ་ཤུ་དང་། མེས་པོ་དམ་པ་གྷན་ངྷི། མཱ་ཏིན་ལོ་ཐིར་ཀིན། ཡེ་ཤུའི་བཙུན་མ་མཱ་རྡིར་ཁྲེ་རི་ས་སོགས་འཛམ་གླིང་ཐོག་སྙན་གྲགས་ཅན་གྱི་མི་སྣའི་ལོ་རྒྱུས་རི་མོའི་ལམ་ནས་འབྲི་རྒྱུ་ཡིན་པ་རེད། གསར་འགོད་པ། དཔལ་ལྡན་རྒྱ་མཚོ།
མཛད་རྣམ་འདི་ཧ་ཅང་ཡག་པོ་འདུག་པས། ན་ཆུང་སློབ་མ་ཙམ་མ་ཟད་རྒན་རབས་པ་ཚོས་ཀྱང་ངེས་པར་བཀླགས་དགོས་པའི་དཔེ་དེབ་གལ་ཆེན་ཞིག་རེད།
མཛད་རྣམ་འདི་བོད་ཡིག་ཏུའང་ཤེས་རིག་ལས་ཁུངས་ཀྱི་རྩོམ་སྒྲིག་ཚན་པས་བོད་སྒྱུར་ཞུས་ནས་སློབ་གྲྭ་ཁག་ཏུ་འགྲེམས་སྤེལ་བྱས་ཟིན་འདུག
མཛད་རྣམ་རི་མོར་བཀོད་པ་འདི་ཡང་། བོད་རིགས་སྤྱི་སྐད་དུ་བཏོན་ནས། གང་མྱུར་ལག་ཏུ་སོན་པའི་སྨོན་འདུན་བཅས།