མི་རིང་བར་བོད་རང་སྐྱོང་ལྗོངས་འཕྲིན་གཏོང་ཁ་པར་བེད་སྤྱོད་བྱེད་མཁན་གྱི་དངོས་མིང་བཀོལ་ནས་ཐོ་འགོད་བྱ་རྒྱུ་ཡིན་ཟེར།
ཉེ་བའི་ལོ་འགའི་ནང་བོད་ནང་གི་གནས་སྟངས་མང་བོ་ཞིག་ཁ་པར་དང་དྲ་རྒྱ་བརྒྱུད་ནས་ཕྱི་ལོགས་སུ་འབྱོར་གྱིན་ཡོད་ལ། ཁ་པར་དང་དྲ་རྒྱ་གཉིས་ནི་རི་བོ་ཧི་མ་ལ་ཡའི་ཕར་རྒྱབ་ཚུར་ངོས་ཀྱི་བོད་མི་ཚོའི་འབྲེལ་ཐག་ལྟ་བུ་ཆགས་ཡོད་མོད། ཕྱི་ཚེས་ ༡ ཉིན་བོད་ལྗོངས་ཉིན་རེའི་ཚགས་པར་ཁང་གིས་གསར་འགྱུར་སྤེལ་བ་ལྟར་ན། མི་རིང་བར་བོད་རང་སྐྱོང་ལྗོངས་འཕྲིན་གཏོང་ཁ་པར་བེད་སྤྱོད་བྱེད་མཁན་གྱི་དངོས་མིང་བཀོལ་ནས་ཐོ་འགོད་བྱ་རྒྱུ་ཡིན་སྐོར་བསྒྲགས་འདུག
གསར་འགྱུར་དེའི་ནང་བཀོད་དོན། གསར་འགོད་པས་རང་སྐྱོང་ལྗོངས་འཕྲིན་གཏོང་དོ་དམ་སྡེ་ཁག་ནས་རྒྱུས་ལོན་བྱས་པ་ལྟར་ན། ཟླ་ ༩ པའི་ཚེས་ ༡ ཉིན་ནས་བཟུང་། གསར་དུ་བྱུང་བའི་ཁྱིམ་སྤྱོད་ཁ་པར་དང་ལག་འཁྱེར་ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་རྒྱུ་རེད་ཅེས་དང་། ཡང་བཟོ་ལས་ཅན་དང་ཆ་འཕྲིན་ཅན་སྡེ་ཁག་གིས་བརྡ་ཡིག་བཏང་བར་གཞིགས་ན། ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་པའི་ལས་དོན་ལེགས་འགྲུབ་ཡོང་བ་དང་། རྒྱ་ཆེ་བའི་ཁ་པར་བེད་སྤྱོད་མཁན་གྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་པའི་ཆེད་དུ། བོད་རང་སྐྱོང་ལྗོངས་ཀྱིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གློག་འཕྲིན་ཁྲིམས་སྲོལ》དང་《ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་པའི་ལས་དོན་གྱི་ཐབས་ཇུས》གཉིས་སུ་བཏོན་པའི་འབྲེལ་ཡོད་རེ་བ་ལྟར། ༢༠༡༠ ལོའི་ཟླ་ ༩ པའི་ཚེས་ ༡ ཉིན་ནས་བཟུང་། གསར་དུ་བྱུང་བའི་ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་པ་དང་། དུས་མཚུངས་སུ་ཆ་འཕྲིན་ཆ་མི་ཚང་བ་དང་ཡང་མི་དག་པའི་བེད་སྤྱོད་མཁན་རྙིང་བ་དག་ལ་ཐོ་འགོད་ཁ་གསབ་བྱེད་རྒྱུ་རེད་ཅེས་ཟེར།
དེ་བཞིན་རང་སྐྱོང་ལྗོངས་འཕྲིན་གཏོང་དོ་དམ་སྡེ་ཁག་གི་འབྲེལ་ཡོད་འགན་འཁུར་མི་སྣས། བོད་རང་སྐྱོང་ལྗོངས་ཀྱིས་ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་པའི་ལས་དོན་ལ་འབྲེལ་ཡོད་བཀོད་སྒྲིག་བྱས་ཚར་འདུག ལག་བསྟར་བྱེད་པའི་ཞིབ་ཕྲའི་འཆར་གཞི་གཏན་ཁེལ་བྱས་ཚར་བ་དང་། ཁ་པར་བེད་སྤྱོད་མཁན་གྱིས་དངོས་མིང་བཀོལ་ནས་ཐོ་འགོད་བྱེད་པའི་ལས་དོན་ལེགས་འགྲུབ་ཡོང་བར་ཁག་ཐེག་བྱེད་རྒྱུ་རེད་ཅེས་གནས་ཚུལ་སྤེལ་ཡོད།
གསར་འགོད་པ། ཨ་རིག་འགྱུར་མེད།
སྐུད་ལམ་ལས་སྐད་ཆ་རྐུ་འདོད་པའི་ཧམ་སེམས་དེ་མི་འགྲུབ་པར་ཤོགཤོགཤོགཤོག
ད་ནི་ཙི་ཙི་འཛུལ་སའི་ཨུ་ཁུང་ཡང་ཉིན་ཞིག་འགོག་ངེས་རེད
གསར་འགྱུར་འདི་ལས་མཐོང་ཐུབ་པ་ནི་བོད་རང་སྐྱོང་ལྗོངས་སུ་སྔར་བས་ཀྱང་སྨྲ་བརྗོད་རང་དབང་ལ་སྟངས་འཛིན་བྱེད་རྒྱུ་ཡིན་པ་དེ་རེད། འདི་ནི་རྒྱ་ནག་སྲིད་གཞུང་གིས་བོད་མིའི་སྨྲ་བརྗོད་རང་དབང་ཇི་ལྟར་འཕྲོག་གི་ཡོད་པའི་དཔང་པོ་ཞིག་ཀྱང་ཡིན་ཕྱིར། འཛམ་གླིང་ལ་སྐད་རྒྱག་དགོས་པ་དང་རང་ཅག་ཚོས་དེ་བས་ཀྱང་གཟབ་དགོས་པ་རེད།