ཟླ་སྔོན་མའི་ཕྱི་ཚེས་ ༢༥ ཉིན་ནས་བཟུང་རྒྱ་གར་གཞུང་གི་གྲོས་ཚོགས་གོང་མའི་ནང་བོད་ཀྱི་གསོ་བ་རིག་པའི་སྨན་བཅོས་ལམ་ལུགས་སྐོར་ལ་གྲོས་ཆོད་ཅིག་བཞག་སྟེ། ད་ནས་བཟུང་བོད་ཀྱི་གསོ་བ་རིག་པ་རྒྱ་གར་གཞུང་གི་ངོས་ལེན་ཡོད་པའི་ཁྲིམས་མཐུན་གྱི་སྨན་གཞུང་གི་གྲས་སུ་ཚུད་ཡོད་ཟེར།
ཕྱི་ཚེས་ ༤ ཉིན་འདི་གའི་གསར་འགོད་པས་ངྷ་ས་བོད་གཞུང་དབུས་སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས་ལགས་སུ། རྒྱ་གར་གཞུང་གིས་བོད་ཀྱི་གསོ་བ་རིག་པའི་སྨན་གཞུང་ངོས་ལེན་གནང་བའི་སྐོར་ལ་བཀའ་འདྲི་ཞུས་པར་ཁོང་གིས་གསུངས་དོན། སྤྱིར་བཏང་བོད་ཀྱི་གསོ་བ་རིག་པ་ཟེར་བ་དེ་རྒྱ་གར་གཞུང་གིས་ངོས་ལེན་བྱེད་ཀྱིན་ཡོད་ལ། ཐེངས་འདིར་ལ་དྭགས་སོགས་ཧི་མ་ལ་ཡའི་རི་རྒྱུད་ཀྱི་བོད་སྐད་ཡིག་བེད་སྤྱོད་གཏོང་མཁན་ཁག་ཅིག་གིས་གསོ་བ་རིག་པའི་མིང་ཐོག་ནས་རྒྱ་གར་གཞུང་ལ་སྙན་ཞུ་ཕུལ་སྟབས། གཞུང་གིས་ངོས་ལེན་གནང་ཡོད།
དེ་སྔོན་རྒྱ་གར་གཞུང་གིས་ཡིག་ཐོག་ནས་སྨན་རྩིས་ཁང་དང་བོད་ཀྱི་གསོ་བ་རིག་པའི་ཐོག་ཕྱག་ལས་གནང་མཁན་རྣམས་ལ། ད་ནས་བཟུང་བོད་ཀྱི་གསོ་བ་རིག་པ་ཁྲིམས་མཐུན་དུ་བེད་སྤྱོད་གཏོང་ཆོག་གི་རེད་ཅེས་གསུངས་མེད་ནའང་། ད་ལྟའི་ཆར་དེའི་ཐད་ཕྱག་ལས་གནང་རྒྱུར་བཀག་འགོག་གང་ཡང་བྱས་མེད། དེ་ནི་བོད་ཀྱི་གསོ་བ་རིག་པའི་སྨན་ལུགས་ཀྱིས་ད་ལྟའི་བར་གཞན་ལ་ཕན་ལས་གནོད་བསྐྱལ་མེད་པར་མ་ཟད། སྨན་རྩིས་ཁང་གིས་ད་བར་བོད་ཀྱི་གསོ་བ་རིག་པའི་ལག་ལེན་ཐོག་ནད་པ་མང་བོར་ཕན་ཐོགས་ཡོང་གི་ཡོད་པ་དང་། རྒྱ་གར་མང་ཚོགས་ཀྱིས་ཀྱང་འདི་ལ་དགའ་མོས་བྱེད་ཀྱིན་འདུག
ཡིན་ནའང་། ད་ནས་བཟུང་ཁྲིམས་ཐོག་ནས་བོད་ཀྱི་གསོ་བ་རིག་པར་ངོས་ལེན་ཐོབ་རྗེས། རྒྱ་གར་གཞུང་གིས་མ་འོངས་པར་བོད་ཀྱི་གསོ་བ་རིག་པ་ལག་ལེན་བྱེད་ཕྱོགས་སྐོར་ལ་སྲིད་བྱུས་གསར་བ་ཞིག་གཏན་འབེབ་གནང་གི་རེད། དེ་དག་ལེགས་འགྲུབ་བྱུང་རྗེས་ཚོང་འགྲེམ་བྱེད་པ་དང་ཁྱབ་རྒྱ་ཆེ་རུ་འགྲོ་གི་རེད། དེ་བཞིན་རྒྱ་གར་གཞུང་ལ་ང་ཚོར་འདི་ལྟ་བུའི་འཆར་གཞི་ཞིག་ཡོད་པས་ཁང་པ་དང་འགྲོ་གྲོན་སོགས་ཀྱི་ཐད་ནས་རོགས་རམ་བྱེད་རོགས་ཞེས་ཞུས་ན། རྒྱབ་སྐྱོར་གནང་གི་རེད་ལ། ད་ནི་དཀའ་ངལ་ཆེན་པོ་ཞིག་སེལ་ཐུབ་གི་རེད།
དཔེར་ན། དེ་སྔོན་ལྡི་ལི་སོགས་སུ་སྨན་རྩིས་ཁང་གི་ཡན་ལག་སྨན་ཁང་འཛུགས་དུས་མི་སྒེར་བའི་ས་ནས་ཁང་པ་ཉོ་བ་མ་གཏོགས། གཞུང་གིས་དེ་ལ་མཐུན་རྐྱེན་རོགས་རམ་གང་ཡང་གནང་གི་མེད། ཡིན་ནའང་། ཁྲིམས་ཐོག་ནས་བོད་ཀྱི་གསོ་བ་རིག་པར་ངོས་ལེན་ཐོབ་རྗེས། གཞུང་ལ་ཡན་ལག་སྨན་ཁང་ཆེད་དུ་ཁང་པ་དང་དེ་མིན་གྱི་མཐུན་རྐྱེན་གང་འདྲ་ཞིག་དགོས་རུང་། སྐྱབས་འཇུག་ཞུ་ས་ཡོད་པ་དང་གཞུང་ནས་ཀྱང་གང་འཚམ་མཐུན་རྐྱེན་སྦྱོར་གི་རེད་ཅེས་གསུངས།
བོད་གཞུང་སྨན་རྩིས་ཁང་འདི་བཞིན་ཕྱི་ལོ་ ༡༩༦༡ ལོའི་ཟླ་ ༣ ཚེས་ ༢༣ ཉིན་ངྷ་སར་བཙུགས་ཏེ། ད་ལྟའི་བར་རྒྱ་གར་དང་བལ་ཡུལ་གྱི་ས་གནས་ཁག་ཏུ་ཁྱོན་ཡན་ལག་སྨན་ཁང་ ༥༥ སྒོ་འབྱེད་བྱས་ཡོད་པ་དང་། ད་ཡོད་ཀྱི་ལས་བྱེད་མི་སྣ་ མི་བཞི་བརྒྱ་ལྷག་གིས་ཉིན་ལྟར་ཕྱག་ལས་གནང་བཞིན་ཡོད་འདུག དེ་བཞིན་སྨན་རྩིས་ཁང་ནི་ད་ལྟའི་བར་ལས་བྱེད་མི་སྣ་དང་ཡན་ལག་ལས་ཁུངས་གསར་རྒྱག་སོགས་ཀྱི་འགྲོ་གྲོན་དང་འཚོ་གནས་རང་སྐྱ་འཕེར་བའི་ལས་ཁུངས་ཆེ་ཁག་ཅིག་ཡིན།
ཐེངས་འདིར་རྒྱ་གར་གཞུང་ལ་བོད་ཀྱི་གསོ་བ་རིག་པ་ཁྲིམས་མཐུན་ཐོབ་ཆེད་སྙན་ཞུ་རྒྱག་མཁན་ནི། ལ་དྭགས་གཙོས་ཧི་མ་ལ་ཡའི་རི་རྒྱུད་ཀྱི་ཡུལ་མི་ཁག་ཅིག་ཡིན་ལ། ཁོང་ཚོས་རྒྱ་གར་གཞུང་ལ་གསོ་བ་རིག་པའི་གཞུང་ལུགས་དང་དེའི་ཁྱད་ཆོས། ཕན་ནུས་སོགས་འབུལ་སྐབས་བོད་གཞུང་སྨན་རྩིས་ཁང་གི་སྨན་ལུགས་བེད་སྤྱོད་བྱས་པ་དང་། བོད་གཞུང་སྨན་རྩིས་ཁང་གིས་གནའ་ནས་ད་བར་བོད་ཀྱི་གསོ་བ་རིག་པ་མི་ཉམས་རྒྱུད་འཛིན་བྱས་ཏེ་ཉར་བའི་སྨན་གཞུང་གི་ཁྱད་ཆོས་དང་ཕན་ནུས་སོགས་མཁོ་འདོན་གནང་སྟེ། གསོ་བ་རིག་པ་གཞུང་གི་ངོས་ལེན་ཐོབ་ཡོད་པར་མ་ཟད། རྒྱ་གར་གཞུང་གིས་བོད་ཀྱི་གསོ་བ་རིག་པ་དངོས་གནས་ཁྱད་དུ་འཕགས་པའི་རིག་གནས་ཤིག་ཡིན་པར་ངོས་འཛིན་གནང་ཡོད་ཟེར།
བོད་གཞུང་སྨན་རྩིས་ཁང་གིས་བོད་ཀྱི་གསོ་བ་རིག་པའི་སྐོར་ལ་འགྲེལ་བཤད་རྒྱག་སྐབས། བོད་ཀྱི་གསོ་བ་རིག་པ་ནི་ལོ་རྒྱུས་ཡུན་རིང་ལྡན་ལ་ནང་དོན་ཕུན་སུམ་ཚོགས་པའི་འཛམ་གླིང་སྟེང་གི་གསོ་དཔྱད་གཞུང་ལུགས་ཆེས་རྙིང་ཁུངས་ཤིག་ཡིན། ལས་ལ་བརྩོན་ཞིང་བློ་རིག་ལྡན་པའི་བོད་རིགས་མི་མང་གིས་འཛམ་གླིང་ཡང་རྩེའི་ས་ཁུལ་དུ་རྒྱུན་རིང་འཚོ་གནས་བྱས་པའི་དུས་རིམ་ནང་མར་ཁུ་བཞུས་ནས་རྨ་ཁྲག་གཅོད་པ་དང་། ཆང་ཁུས་སྐྲངས་འབུར་གཞོམ་ཞིང་ཁྲག་རླུང་གི་རྒྱུ་བར་ཕན་པ། ཆུ་ཁོལ་གྱིས་མ་ཞུ་བར་ཕན་པ་བཅས་ལུས་ནད་གང་ལ་གསོ་བྱེད་གཉེན་པོ་ཡོད་པའི་ཐབས་སམ་རིག་པ་རྙེད་པ་ནས། ས་གནས་རང་བཞིན་ལྡན་པའི་ནད་རིགས་སྣ་ཚོགས་གཞོམ་པར་བཅོས་ཐབས་རིམ་སྤེལ་དང་ཉམས་མྱོང་རིམ་གསོག་བྱས་པ་བརྒྱུད་མི་རིགས་རང་གི་ཁྱད་ཆོས་ལྡན་པའི་བོད་ཀྱི་གསོ་བ་རིག་པ་གསར་གཏོད་བྱས་པ་རེད། དེ་ཡང་ནང་ཆོས་བོད་ལ་མ་དར་སྔོན་རོལ་དུ། བོན་ཆོས་ཀྱིས་བོད་ཀྱི་ནང་ཆོས་དང་རིག་གཞུང་གི་རྨང་གཞི་གྲུབ་པར་ཤུགས་རྐྱེན་ཐེབས་ཡོད་ཟེར།
ཐེངས་འདིར་བོད་ཀྱི་གསོ་བ་རིག་རྒྱ་གར་གཞུང་གིས་ངོས་ལེན་གནང་བའི་ཐད་ལ། རྒྱ་གར་གཞུང་གི་འཕྲོད་བསྟེན་བློན་ཆེན་སྐུ་ཞབས་གྷུ་ལམ་ན་བྷི་ཨཱ་ཛ་དི་(Gulam Nabi Azad) མཆོག་གིས།གསོ་རིག་སྨན་བཅོས་ལག་བསྟར་བྱེད་བཞིན་པའི་ས་གནས་ཁག་གི་ནང་རྒྱུན་འཁྱོངས་ཐུབ་ཆེད། གསོ་རིག་སྨན་བཅོས་ལམ་ལུགས་དེ་རྒྱ་གར་དབུས་གཞུང་གིས་ངོས་ལེན་ཡོད་པའི་སྨན་བཅོས་ལམ་ལུགས་ཀྱི་གྲས་སུ་འཛུགས་རྒྱུར་གཞུང་གིས་རྒྱབ་སྐྱོར་གནང་དགོས་པ་ཞིག་ཆགས་ཡོད་ལ།གསོ་རིག་སྨན་བཅོས་ལམ་ལུགས་དེ་བོད་དང་སོག་པོ།ཉི་ཧོང་བཅས་ཀྱི་ནང་ལག་བསྟར་བྱེད་བཞིན་པ་མ་ཟད།རྒྱ་གར་གཙོས་ཧི་མཱ་ལའི་ས་ཁུལ་ཁག་གཅིག་གི་ནང་དུའང་ལག་བསྟར་བྱེད་མུས་ཡིན།གྲོས་ཆོད་དེས་གནའ་རབས་ཀྱི་སྨན་བཅོས་ལམ་ལུགས་འདི་བདག་གཅེས་དང་ཡར་རྒྱས་གཏོང་རྒྱུར་ཕན་ཐོགས་ཆེན་པོ་བྱུང་ཡོད་ཅེས་གསུངས་འདུག
གསར་འགོད་པ། ཨ་རིག་འགྱུར་མེད།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
སྨན་རྩིས་ཁང་གི་དྲུང་ཆེའི་སྐད་ཆར་བལྟས་ན་ སྡུག་པོ་མཛོ་ཡིས་མྱང་ ཞིམ་པོ་རྟ་ཡིས་བཟས་ ཞེས་པའི་དཔེ་རང་རེད་ དེ་མིན་ཚོགས་པའི་ལས་བྱེད་ཅིག་ཡིན་ཚེ་མཐོང་རྒྱ་ཆེ་བའི་ཁར་བློ་གཟུ་བོར་གནས་པ་ཞིག་དགོས་གལ་ཆེ།
ལེགས་སོ། གཏམ་བཟང་དེ་འདྲ་ཐོས་པས་ཤིན་ཏུ་ལེགས་སོ། རྒྱ་གར་གཞུང་གིས་དེ་འདྲའི་བོད་ཀྱི་གསོ་རིག་གལ་ཆེ་དོན་ཆེར་བརྩི་བཞིན་པར་བཙན་བྱོལ་གཞུང་ནས་དེ་ཙམ་དོ་སྣང་མེད་ཁར་ལས་བྱེད་གླ་ཕོག་ཐད་ཀྱང་དེ་ཙམ་བསམ་བཞེས་མེད་ངོ་མ་ཐབས་སྐྱོ་སོང་ཡ།
རྒྱ་གར་དབུས་གཞུང་གིས་བོད་ཀྱི་གསོ་བ་རིག་པ་ངོས་ལེན་བྱས་པ།
སྤྱིར་རྒྱ་གར་དབུས་གཞུང་གི་བཀའ་ཤག་གམ་བློན་ཆེན་ལྷན་ཚོགས་ནས་གསོ་རིག་འདིར་ཁྲིམས་མཐུན་ངོས་འཛིན་དགོས་པའི་དེ་སྔའི་ཁྲིམས་ཡིག་ལ་བསྐྱར་བཅོས་དགོས་པའི་རྒྱབ་གཉེར་དེ་ཕྱི་ལོ་ ༢༠༠༩ ཟླ་བ་ ༩ ཚེས་ ༡༣ ལ་གནང་ཡོད།
ཕྱི་ལོ་ ༢༠༡༠ ཟླ་ ༧ ཚེས་ ༢༡ ཕྱི་དྲོ་ཆུ་ཚོད་ ༣ པའི་ཐོག་རྒྱ་གར་དབུས་གཞུང་གི་གྲོས་ཚོགས་ནས་ཚོགས་འདུ་ཞིག་བསྐོངས་ཚོགས་གནང་ཡོད།
ཚོགས་འདུ་དེར་དབུས་གཞུང་གི་གྲོས་ཚོགས་གོང་འོག་གི་འཕྲོད་བསྟེན་དང་ཁྱིམ་ཚང་བདེ་དོན་ལྷན་ཚོགས་ཀྱི་འཐུས་མི་ཉི་ཤུ་རྩ་དགུ་དང་དེ་འབྲེལ་ཝ་ར་ཎ་སི་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིག་བདག་སློབ་དཔོན་དགེ་བཤེས་ངག་དབང་བསམ་གཏན་ལགས་དང་། བཙན་བྱོལ་བོད་མིའི་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་ཚེ་རིང་ཐག་གཅོད་དྲུང་འཚོ་ལགས་དང་། རང་གཞུང་དབུས་སྨན་རྩིས་ཁང་གི་ངེས་སྟོན་པ་བླ་ཞབས་སྨན་རམས་པ་ཚེ་དབང་རྟ་མགྲིན་ལགས་དང་། དེ་བཞིན་ཧི་མ་ལ་ཡའི་རིག་གཞུང་གཅེས་སྐྱོང་ཁང་གི་ཚོགས་གཙོ་བླ་མ་ཆོས་འཕེལ་བཟོད་པ་ལགས་བཅས་འདུ་འཛོམས་གནང་ཡོད།
གསོ་བ་རིག་པ་འདི་བཞིན་རྒྱ་གར་གཞུང་ནས་ངོས་ལེན་ཐོབ་སླད་ ༡༩༧༠ ལོར་བཞག་པའི་རྒྱ་གར་གྱི་སྨན་གྱི་དབུས་སྨན་པའི་ལྷན་ཚོགས་ཀྱི་ཁྲིམས་ཡིག་ལ་བསྐྱར་བཅོས་འགྲོ་དགོས་པ་ཡིན། (Recognition of Sowa-Rigpa – Amendment of the Indian Medicine Central Council Act,1970).
གསོ་བ་རིག་པ་རྒྱ་གར་གཞུང་ནས་ངོས་ལེན་འགྲོ་བཞིན་ཡོད་སྟབས། འགྲོ་ལུགས་བཞིན་ ༡༩༧༠ ལོར་བཞག་པའི་རྒྱ་གར་གྱི་སྨན་གྱི་དབུས་སྨན་པའི་ལྷན་ཚོགས་ཀྱི་ཁྲིམས་ཡིག་དོན་ཚན་ ༢ བ་དང་ ༣ པ་དང་ ༨ པ་དང་ ༩ བ་དང་ ༡༧ བཅས་ནང་ལ་གསོ་བ་རིག་པ་བཅུག་སྒྲིག་ཐོག་ནས་བསྐྱར་བཅོས་འགྲོ་དགོས་པ་ཡིན། (To confer legal status to “Sowa-Rigpa” amendments to section 2,3,8,9, and 17 of the Indian Medicine Central Council Act, 1970), need to be carried out).
ད་ལན་གྲོས་ཚོགས་ཀྱི་བསྐོངས་འཚོགས་གནང་བའི་རང་རིགས་ཚོགས་བཅར་བ་རྣམས་པས་ཚོགས་བཅར་མ་ཞུས་གོང་རང་གཞུང་འཕྲོད་བསྟེན་བཀའ་བློན་མཆོག་དང་དཔལ་ལྡན་བཀའ་བློན་ཁྲི་པར་ལམ་སྟོན་བཀའ་སློབ་ཞུས་པ་དང་། ལྡི་ལིར་སྔོན་དུ་ནང་མོལ་གནང་རྗེས་ཚོགས་བཅར་ཞུས་ནས་གྲོས་ཚོགས་ནང་ཁྲིམས་ཡིག་བསྐྱར་བཅོས་འབྲུ་དོན་དང་འབྲེལ་བའི་གནད་དོན་ཁག་ལ་ལན་འདེབས་མཐིལ་ཕྱིན་པ་བྱུང་ཡོད་པས་གྲོས་ཚོགས་འཐུས་མི་རྣམས་པ་བློ་ཡིད་ཚིམ་པའི་ཚོར་སྣང་བྱུང་།
སྐབས་དེར་གྲོས་ཚོགས་གོང་འོག་གི་ཚོགས་བཅར་བ་གཅིག་གིས་ཀྱང་དགག་བྱ་བྱུང་མེད་ལ་ཚོགས་འདུའི་གཙོ་སྐྱོང་བ་ཨ་མར་སིང་(Shri Amar Singh)མཆོག་གིས་ཀྱང་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་སོང་།
ཚོགས་འདུ་དེའི་སྐབས་གྲོས་ཚོགས་གོང་འོག་གི་འཐུས་མི་རྣམས་ནས་གསོ་རིག་དང་འབྲེལ་བའི་དྲི་བ་བྱུང་བ་ཁག་ལ་ལན་འདེབས་འཐུས་ཚང་བྱུང་ཡོད། གཞན་ཡང་གནད་དོན་འགར་ལན་འདེབས་ཡིག་ཐོག་ཏུ་དགོས་རིགས་ལ་ལན་འདེབས་ཁ་གསལ་དང་འཐུས་ཚང་ཕུལ་ཟིན་ཡོད།
ཕྱི་ལོ་ ༢༠༡༠ ཟླ་བ་ ༨ ཚེས་ ༢༥ ཉིན་རྒྱ་གར་གྱི་གྲོས་ཚོགས་གོང་མའི་ནང་གསོ་བ་རིག་པར་ངོས་བཞེས་རྒྱབ་སྐྱོར་གནང་ཡོད་པ་དང་ཡང་ ཕྱི་ལོ་༢༠༡༠ ཟླ་བ་ ༨ ཚེས་ ༣༡ ཉིན་རྒྱ་གར་གྱི་གྲོས་ཚོགས་འོག་མའི་རྒྱབ་སྐྱོར་གཙང་མ་ཐོབ་ཡོད།
གསོ་བ་རིག་པ་ཁྲིམས་མཐུན་རྒྱ་གར་གཞུང་ནས་ངོས་བཞེས་གནང་ཐུབ་པ་འདིའི་ཐད་གཙོ་བོ་༧གོང་ས་མཆོག་དང་རང་གཞུང་བཀའ་ཤག་དེ་བཞིན་བཙན་བྱོལ་བོད་མའི་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་དང་རང་གཞུང་དབུས་སྨན་རྩིས་ཁང་དང་ལྦ་ར་ཎ་སི་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིག་བདག་དགེ་བཤེས་ངག་དབང་བསམ་གཏན་ལགས་ཀྱི་གཙོས་ཧི་མ་ལ་ཡི་རི་རྒྱུད་དུ་ཡོད་པའི་སྨན་པ་ཁག་དང་བླ་མ་ཆོས་འཕེལ་བཟོད་པ་སོགས་འབྲེལ་ཡོད་དཔོན་རིགས་མང་དག་ཞིག་གི་རྒྱབ་སྐྱོར་གནང་བའི་འབྲས་བུ་ཡིན།
གོང་གསལ་གནས་ཚུལ་འདི་བཞིན་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་གཙོ་ཚེ་རིང་ཐག་གཅོད་དྲུང་འཚོ་ལགས་ཀྱིས་འདི་གར་མཁོ་སྤྲོད་གནང་བ་དང་། མི་རིང་བར་འདོན་འཆར་གྱི་ཚགས་པར་ནང་བཟོ་བཅོས་རྒྱག་རྒྱུ་ཡིན།
འོ་ཡ། གནས་ལུགས་འདི་འདྲ་བ་ལ་ང་ཚོ་བོད་ཀྱི་གཏམ་དཔེར།
གཏམ་ཨ་ཕས་བཤད་རྒྱུད་དེ་ཨ་མས་བཤད། ཁྱི་བདག་པོས་འགོག་རྒྱུ་དེ་མགྲོན་བཀག ཅེས་ཟེར།
ལར་ནས་དྲ་གྲོགས་ཚོ་སོམ་ཉིའི་དྲ་བར་ཚུད་དགོས་དོན་མེད། འདིའི་ཐད་ཡིག་ཆ་གསལ་བར་བཀོད་པའི་དེབ་ཅིག་གང་མྱུར་འཐོན་གྱི་ཡོད་ལུགས་ཀྱི་གཏམ་སྤྱི་ཚོགས་ནང་གྲགས་བཞིན་འདུག
འདི་ཙམ་ལས་འབྲེལ་མེད་ཀྱི་གཏམ་སྨྲ་བའི་ངལ་བ་ནི་སྙིང་པོས་སྟོངས་པར་མཐོང་བས་ཅང་མི་སྨྲ་བའི་བརྟུལ་ཞུགས་འཆང་ངོ༎
ཕྱོགས་ཞེན་གྱི་སྐད་ཆ་བཤད་འདོད་མེད་ལ་བཤད་ཀྱང་མི་སྲིད། དེ་ནི་བཤད་འདོད་ཀྱང་མེད།
འདོད་པ་གཅིག་རང་་ཡོད་པ་ནི་དངོས་ཡོད་གནས་ཚུལ་དེ་ཤེས་སུ་འཇུག་འདོད་པ་ཡིན།
གསར་འགྱུར་བདེན་པ་ཡིན་རྒྱུ་གཙོ་བས་དེ་དོན་དགོངས་འཇགས་གནང་རོགས།
བཤད་སྒྲུབ་ཚེ་རིང་ཟེར་བར།
ཝཱཎའི་སློབ་ཕྲུག་དག་ལ་དགོས་པའི་ཡོན་ཏན་ཡོད་མེད་གླེང་འདོད་པ་དེ་ཁྱོད་ཀྱིས་འུག་པའི་མིག་འཁྱེར་ནས་ཉིན་མོར་རྒུམ་བུ་འཚོལ་འདོད་རང་རེད།
ཁྱོད་ཀྱིས་སྨྱོན་པའི་ལབ་རྡོལ་ག་ཙམ་ཕྱུངས་ཀྱང་། ཉི་ཤར་སྤར་མོས་ཁེབས་མི་སྲིད་པའི་དངོས་པོའི་ཆོས་ཉིད་དེ་ཤེས་པར་མཛོད།
ཝཱ་ཎ་མཐོ་སློབ་ནས་ཐོན་པའི་སློབ་བུ་འདི་དག་ལ་དགོས་པའི་ཡོན་ཏན་ཁུངས་འཁྱོལ་བ་སྣེ་གཅིག་མེད་ཁར། མི་དགོས་པའི་ཕྱོགས་ཞེན་དང་འཐེན་འཁྱེར་གྱི་དྲི་མས་སྦགས་པ་འདི་གང་གིས་ལན་པ་ཡིན་ནམ། བོད་ཀྱི་གསོ་རིག་པ་རྒྱ་གར་གཞུང་གིས་ངོས་ལེན་གནང་བ་ནི་༧གོང་ས་༧སྐྱབས་མགོན་ཆེན་པོའི་ཐུགས་རྗེ་བཀའ་དྲིན་དང་ཡང་སྒོར་བོད་ཀྱི་གསོ་བ་རིག་པ་རང་གི་གཟི་བྱིན་ནུས་པའི་ཡོན་ཏན་དང་། བོད་གཞུང་སྨན་རྩིས་ཁང་གི་བྱས་པའི་རྗེས་འབྲས་ལས་བྱུང་བ་ནི་སྨོས་མ་དགོས་པ་རེད། རྒྱ་གར་ནང་བོད་སྨན་གྱི་རྐང་འཛུགས་དུ་འཇུག་མཁན་དེ་སྨན་རྩིས་ཁང་ཡིན་ལ། ཝཱ་ཎ་མཐོ་སློབ་གསོ་རིག་སྡེ་ཚན་གྱི་སྨན་དགེ་དང་རྩིས་དགེ་ཡང་སྨན་རྩིས་ཁང་ནས་སྐྱོབ་གསོ་ལྟ་བུར་བློ་བཟང་བསྟན་འཛིན་དང་བཀྲིས་གཉིས་མངགས་གཏོང་གནང་ཡོད། ཐེངས་འདིར་རྒྱ་གར་གཞུང་གིས་བཙུགས་པའི་རྟོགས་ཞིབ་ཚོགས་ཆུང་གི་རྟོགས་ཞིབ་བྱ་ཡུལ་གཙོ་བོ་ཡང་བོད་གཞུང་སྨན་རྩིས་ཁང་ཆགས་ཡོད། རྟོགས་ཞིབ་ཚོགས་ཆུང་ནི་དགེ་བཤེས་ངག་དབང་བསམ་གཏན་དང་རྒྱ་གར་གཞུང་གི་ཆེད་ལས་མཁས་དབང་ཁག་ཅིག་ལས་གྲུབ་པ་དང་དགེ་བཤེས་ལགས་ཚོགས་གཙོ་ཡིན་པ་དེ་བདེན་པ་རེད། ཡིན་ནའང་རག་རྡོ་ལ་དེའི་ནང་ཐེ་ཇུས་གང་ཡང་མེད་པ་དེ་ཡང་དངོས་ཡོད་གནས་སྟངས་ཆགས་ཡོད། བོད་གཞུང་སྨན་རྩིས་ཁང་ནས་བསྐྱེད་བསྲིངས་གནང་བའི་གར་ཞཱ་དང་། ལ་དྭགས། སྦི་ཏི། འབྲས་ལྗོངས་སོགས་ཧི་མ་ལ་ཡ་རི་རྒྱུད་ཀྱི་སྨན་པ་རྣམས་དང་ཧི་མ་ལ་ཡའི་རིག་གཞུང་སྲུང་སྐྱོབ་ཚོགས་པའི་ཚོགས་གཙོ་བླ་མ་ཆོས་འཕེལ་བཟོད་པ་ནུས་ཤུགས་ཡོད་ཚད་ཕུལ་ཡོད། ལྷག་པ་ཚེ་རིང་ནས་དངོས་ཡོད་གནས་སྟངས་བསྙོན་འདིང་གི་མཆན་བུ་ལ་གསལ་བཤད་དུ་ལ་དྭགས་རྒྱལ་ཕྲན་གླེ་ནས་སྤེལ་བ་དགེའོ།
རྒྱ་ཆེའི་ཀློག་པ་པོ་ཚོར་ཞུ་རྒྱུར། ཟླ་བ་སྔོན་མའི་ཚེས་25་ཉིན་རྒྱ་གར་དབུས་གཞུང་གིས་གསོ་བ་རིག་པ་ངོས་ལེན་གནང་ལུགས་སྐོར་ལ་ཚིག་རྐང་གཉིས་ནང་རྒྱ་མཚོའི་ནང་གི་ཐིགས་པ་ཙམ་ཞུ་ན། སྤྱི་ལོ་1996་ཙམ་ནས་ཝཱཎ་དབུས་བོད་ཀྱི་ཆེས་མཐོའི་གཙུག་ལག་སློབ་ཁང་ནས་རྒྱ་གར་དབུས་གཞུང་སྤྱི་དང་སྒོས་སུ་འཕྲོད་བསྟེན་ལྷན་ཁང་གི་དབུ་འཛིན་ཚོ་དང་འབྲེལ་བ་གནང་རྒྱུ་འགོ་བཙུགས་པ་དང༌།
དམིགས་བསལ་སྤྱི་ལོ་2008་2009་ཙམ་ནས་ལས་འགུལ་འདིའི་ཆེད་དམིགས་བསལ་གྱི་ཞིབ་འཇུག་ཚོགས་ཆུང་བཙུགས་པ་དང༌། ཚོགས་ཆུང་ནང་གི་ཚོགས་གཙོ་ཝཱ་ཎ་མཐོ་སློབ་ཀྱི་ངེས་སྟོན་པ་དགེ་བཤེས་ངག་བསམ་གཏན་ལགས་ཡིན་པ་ལ། ཚོགས་མིའི་ནང་རྒྱ་གར་ཚེ་ཡི་རིག་བྱེད་མཁས་པ་རྣམས་དང་གསོ་རིག་མཁས་པ་རྣམས་འདུག། ཁོང་རྣམས་ཀྱིས་རྒྱ་གར་ནང་ལ་ཡོད་པའི་གསོ་བ་རིག་པའི་སློབ་གཉེར་ལྟེ་གནས་ལ་དྭགས་དང༌། སྒང་ཏོག རྡོ་རྗེ་གླིང་། དྷ་ས་སྨན་རྩིས་ཁང༌། ཝཱ་ཎ་བཅས་ལ་ཆེད་འཕེབས་ཀྱིས་ཚོགས་འདུ་ལན་བཅུ་གྲངས་ལྷག་ཞིག་ཚོགས་ཡོད་པ་དང༌། ཝཱ་ཎའི་གསོ་བ་རིག་པའི་སྡེ་ཚན་གྱི་དགེ་སློབ་རྣམས་ཀྱིས་བོད་སྨན་གྱི་ཕྱག་དཔེ་ཐོབ་ཚད་ཀུན་གྱི་བརྗོད་སྙིང་དང་། ཞལ་བྱང་སོགས་ཧིན་སྐད་དང་ཨིན་སྐད་ནང་དུ་བསྒྱུར་ཅིང༌། རྒྱ་གར་མཁས་དབང་རྣམ་པའི་སྤྱན་སྔར་བསྟར་བ་སོགས་ངལ་བ་བརྒྱ་ཕྲག་བསྟེན་ནས་མཐར་ཉེ་བའི་ཆར་རྒྱ་གར་གྲོས་ཚོགས་ཀྱི་ཚོགས་མི་སུམ་ཅུ་སོ་གྲངས་ཀྱི་སྐུ་མདུན་དུ་མཐའ་མའི་ངག་རྒྱུགས་གནང་
མཁན་གྱི་གཙོ་བོ་དེ་ཡང་ཝཱ་ཎ་མཐོ་སློབ་ཀྱི་ངེས་སྟོན་པ་མཆོག་ཡིན་འདུག མདོར་ན་ལས་འགུལ་དེ་དག་འགོ་ནས་མཇུག་བར་གྱི་འགྲོ་གྲོན་ཆ་ཚང་ཝཱ་ཎ་མཐོ་སློབ་ནས་བཏང་དང་མི་ཡི་ནུས་པ་ཡང་གཙོ་བོ་ངེས་སྟོན་པ་དང་སྨན་དགེ་གཉིས་ཀྱིས་གཙོས་ལས་བྱེད་སློབ་ཕྲུག་དང་བཅས་པའི་སྡུག་དཀའ་ལས་རྒྱབ་
འབྲས་བུར་སྨིན་པ་ཞིག་ཡིན་པ་ཀུན་གྱིས་མཁྱེན་ན་བཟང་ངོ༎
དྲ་གྲོགས་ཚོ་སྒོ་བ་དང་མི་ཞུན་རྣམ་གཉིས་ལགས་ཀྱིས་གསུངས་པ་དངོས་གནས་བདེན་པ་རེད། ངས་འདིའི་སྐོར་གྱི་གནས་ཚུལ་གོ་ཐོས་བྱུང་སྐབས་ལམ་སེང་བོད་གཞུང་སྨན་རྩིས་ཁང་གི་ངེས་སྟོན་པ་འཚོལ་དུ་ཕྱིན་པ་ཡིན། ཉིན་དེར་ངེས་སྟོན་པ་ལྡི་ལིར་ཕེབས་ནས་བཞུགས་མེད་ཟེར། ངས་སེམས་སུ་ངེས་སྟོན་པའི་ཕན་ནས་དྲུང་ཆེས་ཏན་ཏན་གནས་ཚུལ་འདིའི་སྐོར་ལ་ཡག་པོ་མཁྱེན་གི་ཡོད་པ་རེད་བསམ་བྱུང་། དེ་ལྟར་ཁོང་ལ་འདིའི་སྐོར་དྲིས་པ་ཡིན་ལ་ཁོང་གིས་གསུངས་པ་ལྟར་བཀོད་པ་ལས་ང་སྒེར་ལ་ནི་འདིའི་ནང་དུ་ཚིག་གཅིག་ཀྱང་མེད།
ཡིན་ནའང་། དེ་རིང་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་གཙོ་མཆོག་འདི་ག་ལས་ཁུངས་སུ་ཕེབས་ནས་དེའི་སྐོར་གསལ་འགྲེལ་གནང་བྱུང་བས། ངས་ཁོང་གི་སར་ནས་དངོས་ཡོད་གནས་ཚུལ་གང་ཡིན་པ་དྲིས་ཏེ་མི་རིང་བར་བཟོ་བཅོས་རྒྱག་འཆར་ཡོད། ཁོང་གིས་ད་དུང་ཁོང་ཕར་སྨན་རྩིས་ཁང་གི་དྲུང་ཆེའི་སར་བཅར་ནས་འདིའི་སྐོར་འགྲེལ་གི་ཡིན་གསུང་གི་འདུག
ཡིན་ནའང་། ཁ་སང་དེ་རིང་རྩོམ་སྒྲིག་པ་དང་རྩོམ་སྒྲིག་ལས་རོགས་གཉིས་ཀ་མེད་པར་ལས་བྲེལ་ཧ་ཅང་ཆེ་སྒང་ཡིན་སྟབས། ད་ལྟ་རང་བཟོ་བཅོས་རྒྱག་ཐུབ་པ་མི་འདུག་ཀྱང་། འགྲེལ་བཤད་ཐུང་ངུ་འདིས་རྣམ་པ་གཉིས་ཀྱི་ཐུགས་དོགས་སེལ་ཐུབ་པར་སྨོན།
གུས་བཅས། ཨ་རིག་འགྱུར་མེད་ཀྱིས།
ཨ་རིག་འགྱུར་མེད་ལགས། ཐེངས་འདིའི་ཁྱེད་ཀྱི་གསར་འགྱུར་འདིའི་ནང་ན་བདེན་ཤེད་ཀྱི་གནས་ཚུལ་ཧ་ཅང་ཉུང་ཉུང་རེད། རབ་ཡིན་ན་རྒྱ་གར་གཞུང་གིས་བོད་ཀྱི་གསོ་བ་རིག་པ་ངོས་ལེན་ཞུས་པའི་ཐད་ཀྱི་གནས་ཚུལ་ཚང་མ་ལ་མགོ་ནས་མཇུག་བར་དུ་རྒྱུས་ལོན་ཡག་པོ་ཞིག་བྱེད་རོགས་གནངས། གོ་གོ་ཐོས་ཐོས་ཚང་མ་གསར་འགྱུར་ཡིན་ཟེར་ནས་འབྲི་རྐྱང་མ་བྱེད་རོགས། དངོས་གནས་ཡིན། འདིའི་ནང་ལ་གཙོ་ཆེ་ཤོས་ཝཱར་ཎ་མཐོ་སློབ་ཀྱི་ངེས་སྟོན་པ་དགེ་བཤེས་ངག་དབང་བསམ་གཏན་དང་སྨན་དགེ་རག་རྡོ་བློ་བཟང་བསྟན་འཛིན་སོགས་ཀྱི་ངལ་བའི་བྱས་རྗེས་ནི་དང་པའི་ནང་གི་དང་པོ་རེད། ཁྱེད་ཀྱིས་འདིའི་སྐོར་གྱི་གནས་ཚུལ་ཟུར་ཙམ་ཡང་བྲིས་མེད་པ་མ་ཟད་དྲུང་ཆེ་དེས་ཀྱང་གང་ཡང་གསུངས་མི་འདུག འདི་དངོས་གནས་ཡག་རྟགས་ཤིག་རེད་དམ།
གྲོགས་པོ་སེར་སྨད་བློ་དགའ་ལ་ཞུ་རྒྱུ། ཁྱེད་ཀྱིས་འདིར་འཆན་འགོད་པར་ངེད་ནས་རྗེས་སུ་ཡི་རངས་ཡོད་ནའང་། སོ་སོ་ད་ཆར་བོད་མི་དམངས་ཀྱི་སྤྱི་འཐུས་འོས་གཞི་ཁ་ཤས་ནང་སླེབས་ཡོད་པ་དང་། ཁྱེད་ཉིད་ལ་ཤེས་འཇོན་གང་རུང་ལྟ་ས་ཡོད་པ་ནི་བོད་ཡིག་འབྲི་ཀློག་ཐད་ཅུང་ཡོད་པ་དེ་ཁོ་ན་ཡིན་པར་གོ་ཐོས་བྱུང་བས། བོད་ཡིག་ཁ་ཤས་བྲིས་པ་དེ་ཡང་ཡིག་ནོར་དང་བརྗོད་བདེ་མེད་པ་དེ་འདྲ་ལས་འབྲི་མ་ཐུབ་ན། སྤྱི་འཐུས་ཀྱི་འོས་གཞིའི་ནང་རང་ངོས་ཕྱིར་འཐེན་བྱེད་ན་དགའ་སྙམ། འདི་ལྟ་བུའི་ཤེས་ཚད་ཞིག་གིས་ད་དེང་བོད་ཀྱི་ཆབ་སྲིད་ཀྱི་འགན་དབང་བཞེས་ཁག་པོ་རེད། ཐུགས་ཕོག་བྱུང་ན་དགོངས་འགལ་མེད་པར་ཞུ།
འདི་སླད་དུ་དགེ་བཤེས་ངག་དབང་བསམ་གཏན་དངབཀུར་འོས་རག་རྡོ་བློ་བཟང་བསྟན་འཛིན་སོགས་ནས་སྐུ་ངལ་གང་མང་བསྐྱོན་ཡོད་པ་རེད།
རབ་ཡིན་ན་གསར་འགོད་པས་འདིའི་སྐོར་ནས་དྲི་བ་རེ་བསྐྱར་དུ་འདྲི་རོགས།
མི་གཞན་གྱི་བྱས་རྗེས་འཁྱེར་བར་གོམས་པ་འདིའང་ཡག་རྟགས་ཤིག་མ་རེད།
ཚོ་སྒོ་ལགས།
ཡིད་མི་ཆེས་ན་མི་གཞན་ལ་སྐད་ཆ་དྲིས་དང་ཧ་གོ་ངེས་ཡིན།
འདི་ཆེད་དུ་ཚོགས་འདུ་ག་ཚོད་ཅིག་བསྐོངས་ཚོགས་བྱས་པ་དང་ཞུ་སྙན་ག་ཚོད་ཅིག་བརྒྱབས་ཡོད་པ་མཁྱེན་ལྡན་དག་ལ་ཤིན་ཏུ་གསལ་བོར་ངེས་ཡོད།
གཏམ་བཟང་རེད། ཡིན་ནའང་དུས་བབ་ཀྱི་གསར་འགོད་པས་རྒྱ་གར་གྱི་གསར་ལམ་ཁག་ཏུ་གང་ཐོན་པ་ཇི་བཞིན་བཀོད་པ་ལས་གནས་ཚུལ་ཞིབ་ཆ་མེད་པ་དང་། བཅར་འདྲི་ཞུ་ཡུལ་ཡང་བོད་ཀྱི་གསོ་བ་རིག་པའི་ཆེས་མཐོའི་སྨན་ལྷན་གྱི་དྲུང་ཆེའམ་ཚོགས་གཙོ། རང་བསྟེན་ལྷན་ཁག་གི་མགྲིན་ཚབ་པ་གང་རུང་ལ་བཅར་འདྲི་མ་བྱས་པར་ཆེད་ལས་མ་ཡིན་ཞིང་ལས་དོན་འདིའི་བརྒྱུད་རིམ་ལ་རྒྱུས་མངའ་གང་ཡང་མེད་པའི་སྨན་རྩིས་ཁང་གི་དྲུང་ཆེར་བཅར་འདྲི་བྱས་འདུག་པ། མཆན་འགོད་པ་ཟླ་བ་གཞོན་ནུའི་མིང་ཅན་སོགས་ནས་རག་རྡོ་བློ་བསྟན་ལྟ་བུ་ལ་འབྲེལ་བ་ཡོད་ཚུལ་མཆན་གནས་ཚུལ་གོ་ལྡོག་སྤེལ་འདུག
རྒྱ་གར་གཞུང་གིས་གསོ་བ་རིག་པ་ཞེས་པའི་མིང་ཐོག་ནས་བོད་སྨན་ངོས་འཛིན་དང་། ཁྲིམས་ཐོག་ནས་ངོས་ལེན། ཁྲིམས་ཐོག་ནས་ལག་ལེན་བྱེད་ཆོག་པའི་ངོས་ལེན་སོགས་ཐ་སྙད་ཇི་ལྟར་སྤྱད་ཀྱང་། ནང་དོན་བོད་ཀྱི་གསོ་བ་རིག་པ་དེ་རྒྱ་གར་གཞུང་གི་ཁྲིམས་ལུགས་ཀྱི་ཁྱབ་ཚད་འོག་ནས་ལག་ལེན་བྱས་ཆོག་པའི་ཆོག་མཆན་རག་པ་དེ་རེད།
རིགས་ཅིག་ནས་དེ་ལྟར་བྱས་ན་བོད་སྨན་གྱི་བདག་དབང་དེ་སུ་ལ་ཡོད་མེད་སོགས་རི་བོང་གནམ་སྡིབ་ཀྱི་སེམས་ཁྲལ་བྱེད་བཞིན་པའང་ཡོད་ཚུལ་འདུག
་བོད་གཞུང་སྨན་རྩིས་ཁང་གིས་དབུས་པའི་བོད་ཀྱིས་གསོ་བ་རིག་པ་ཡོང་ལ་
འཚམས་དྲིན་བཀྲ་ཤིས་བདེ་ལེགས་ཞུ།།ཕྱོགས་ཚུང་ ད་ལན་རྒྱ་གར་དབུས་སའི་གཞུང་གིས་བོད་ཀྱིས་གསོ་བ་རིག་པ་འདི་བཞིན་ཁྲིམས་མཐུན་ལྡན་པའི་སྨན་རིག་
ཞིག་ཏུ་གྱུར་པར་དགའ་སྤྲོ་དང་ཐུགས་རྗེ་ཆེ་ཞུ་་་དེ་ནི་མི་དམངས་ཀྱིས་བདེ་སྡུག་
ལ་བཟང་ཕྱོགས་ཀྱིས་རྒྱབས་སྐྱོར་ཆེན་པོ་ཞིག་རེད་།།
དངོས་གནས་དབུས་སྨན་རྩིས་ཁང་གི་དྲུང་ཆེ་དེས་བྱུང་བ་དངོས་མཁྱེན་གྱི་མེད་པ་ནི་ཨེ་ཡིན་ནམ།
བོད་ཀྱི་གཏམ་དཔེར། དཀའ་ལས་སྐྱ་ཡིས་རྒྱབ། ངོ་སོ་གཟར་བུས་ཁྱེར། ཟེར་བ་དེ་ཏག་ཏག་ཆགས་འདུག
ཨོ། ད་དེ་ངོ་མ་གཏམ་བཟང་རེད།
འདིའི་ཆེད་དུ་རག་རྡོ་བློ་བཟང་བསྟན་འཛིན་སོགས་ནས་སྐུ་ངལ་གང་མང་བསྐྱོན་ཡོད་པ་རེད།
དུག་གསུམ་ནད་སེལ་སངས་རྒྱས་སྨན་ལྷར་ཕྱག་འཚལ་ལོ། །
རེད་་་་་་་་ད་ནས་བཟུང་རང་བཙན་ཡོད་པའི་གཞུང་གིས་ངོས་ལེན་བྱས་ཚར་ན། ངཚོ་བོད་ཀྱི་སྨན་པ་ཚོས་མེ་བཙའ་མེ་བཙའ་ཞེས་བརྗོད་ཆོག་ཆོག་རེད་མོ
ཡ ད་གྲོགས་པོ་ལྷ་རྗེ་ངག་དབང་སྦྱིན་པ་ལགས་ལ་རྟེན་འབྲེལ་ཞུ།
བོད་ཀྱི་སྲོལ་རྒྱུན་རིག་གནས་ཀྱི་ཉིང་བཅུད་ཅིག་ད་ཐེངས་རྒྱ་གར་རྒྱལ་ཁབ་ཆེན་པོའི་ཁྲིམས་མཐུན་ལྡན་པའི་སྨན་རིག་ཤིག་ཏུ་གྱུར་པར་སྙིང་ནས་དགའ་སྤྲོད་དང་འཚམས་འདྲི། ལྷག་པར་དུ་རིན་ཐང་གཞལ་དུ་མེད་པའི་རིག་གཞུང་དེའི་ཁྱད་ནོར་རྣམས་འཛམ་གླིང་གི་ས་ཆ་གང་སར་འགྲེམས་སྤེལ་དང་ཉམས་གསོ་གནང་བའི་བོད་ཕྱི་ནང་གི་རིགས་གཅིག་སྤུན་ཟླ་ཡོངས་ལ་ཐུགས་རྗེ་རྗེས་དྲན་བྱེད་ཀྱིན་ཡོད། ཁྱེད་རྣམས་ཀྱིས་དཀའ་སྤྱད་ཁུར་དུ་བཞེས་ནས་ནུས་པ་འདི་འདྲ་ཞིག་ཐོན་པ་ནི། ངེད་ཅག་གི་མི་རབས་ཕྱི་མའི་ཁ་མིག་ཡར་ལྟ་བྱེད་ས་གལ་ཆེན་ཞིག་ཏུ་གྱུར་ཅིང་འདིའི་སྙན་ཞུ་འབུལ་བ་པོའི་ཧི་མ་ལ་ཡའི་གྲོགས་པོ་རྣམས་ལ་ཡང་བཀྲིན་དྲ་གསོ་བྱེད་ཀྱི་ཡིན་་་་་