ཆོས་ཁྲིམས་འཛིན་སྐྱོང་ལྷན་ཚོཊ་ཀྱི་ཚོགས་འདུ་དང་པོ།

བོད་གཞུང་དམངས་རྒྱལ་ཡོངས་ཚོགས་ཆེན་དང་དམངས་གཙོའི་དུས་དྲན་ཐེངས་ ༥༠ བ་དང་བསྟུན་ཏེ། དགེ་ལྡན་བསྟན་བདག་ལྷན་ཚོགས་དང་ཆོས་ཁྲིམས་འཛིན་སྐྱོང་ལྷན་ཚོགས་ཀྱི་ཚོགས་འདུ་དང་པོ་སེ་ར་ཐེག་ཆེན་གླིང་དུ་སྐོང་ཚོགས་གནང་སྟེ། དགེ་ལུགས་པའི་དགོན་སྡེ་སྤྱི་ལ་ཁྱབ་པའི་བཅའ་ཡིག་ཆེན་མོར་སྣོན་འབྲུ་སྤོར་འཇོག་གནང་སྟེ། ཡོངས་ཁྱབ་ཐོག་ལག་ལེན་བསྟར་ཕྱོགས་ཐད་གྲོས་ཆོད་དང་གོ་བསྡུར་གནང་ཡོད།

རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་བླ་སྤྱིའི་ཐོག་ཁང་དུ་ཕྱི་ཚེས་ ༣ དང་ ༤ ཉིན་བར་གཉིས་རིང་། ༼ དགེ་ལྡན་བསྟན་བདག་ལྷན་ཚོགས་དང་། ཆོས་ཁྲིམས་འཛིན་སྐྱོང་ལྷན་ཚོགས་ཀྱི་ཚོགས་འདུ་དང་པོ། ༽ ཞུ་བ་དེ་སྐོང་ཚོགས་གནང་ཡོད་པ་དང་། ཚོགས་ཆེན་དེའི་སྟེང་དགེ་ལྡན་བསྟན་བདག་ལྷན་ཚོགས་ཀྱི་ཚོགས་མི་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས། དེ་བཞིན། ཆོས་ཁྲིམས་འཛིན་སྐྱོང་ལྷན་ཚོགས་ཀྱི་ཚོགས་གཙོ་སེར་བྱེས་མཁན་རིན་པོ་ཆེ་བློ་བཟང་དཔལ་ལྡན་མཆོག་གིས་དབུས་པའི་གདན་གསུམ་གྲྭ་ཚང་དྲུག་དང་གདན་ས་བཀྲ་ཤིས་ལྷུན་པོ། རྭ་བ་སྟོད། རྣམ་རྒྱལ་གྲྭ་ཚང་བཅས་ཀྱི་མཁན་པོ་རྣམ་པ་དང་། རྒྱུད་སྟོད་སྨད་གཉིས་ཀྱི་མཁན་ཚབ་བཅས་ལྷན་ཞུགས་ཐོག རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཡིག་ཆེན་མོ་དང་འབྲེལ་བའི་གྲོས་གཞི་ཁག་དགུ་ཡི་ཐོག་བགྲོ་གླེང་གོ་བསྡུར་གནང་མཐར། དེ་རིང་ཉིན་གུང་ཆུ་ཚོད་ ༢ སྟེང་ཚོགས་འདུ་ཡོངས་སུ་མཇུག་སྒྲིལ་ཏེ། གྲོས་ཆོད་ཁག་བརྒྱད་ཀྱི་ཐོག་དགའ་ལྡན་ཁྲི་རིན་པོ་ཆེ་ཡིས་མཆོག་མཆན་བཀོད་སོང་།

ཚོགས་འདུ་གྲོལ་མ་ཐག་འདི་གའི་གསར་འགོད་པས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་དྲུང་ཆེ་ཤྲཱི་ཆུ་བཟང་སྤྲུལ་སྐུ་མཆོག་ལ། ཐེངས་འདིར་དགེ་ལུགས་པའི་ཚོགས་ཆེན་འདི་སྐོང་དགོས་པའི་རྒྱུ་མཚན་གང་ཡིན་སྐོར་བཀའ་འདྲི་ཞུས་པར་ཁོང་གིས། ཕྱི་ལོ་ ༢༠༠༦ ལོར་རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཡིག་ཅིག་བཟོས་ཡོད་ཀྱང་། དེ་ཙམ་ཁྱབ་མེད་པ་དང་ལག་ལེན་འཁེལ་ཐུབ་ཡོད་པ་མ་རེད། ཐེངས་འདིར་བཅའ་ཡིག་གི་དོན་ཚན་ཁག་ཅིག་ལ་སྣོན་འབྲུ་སྤོར་འཇོག་དང་། གདན་ས་ཁག་ཚང་མར་བཀྲམས་ཏེ་ལག་ལེན་བསྟར་ཕྱོགས་ཐད་གྲོས་བསྡུར་བྱས་པ་རེད། ལག་བསྟར་བྱེད་ཕྱོགས་ཐད་གདན་ས་ཁག་གི་མཁན་པོ་རྣམས་ལས་གྲུབ་པའི་ཆོས་ཁྲིམས་འཛིན་སྐྱོང་ལྷན་ཚོགས་ཀྱིས་འགན་བཞེས་དགོས། དེ་བཞིན་གྲྭ་དམངས་ལ་རྒྱུན་དུ་ལྷན་བཅར་གནང་མཁན་དགེ་བསྐོས་ཚོ་དང་ཁང་ཚན་དགེ་བསྐོས་སོགས་ཡིན་སྟབས་ཁོང་ཚོས་ལག་ལེན་བསྟར་དགོས་པ་ཆགས་ཡོད་ཟེར།

ཡང་ཁོང་ལ་བཅའ་ཡིག་ཆེན་མོ་དེའི་ནང་བོད་པའི་རྩ་དོན་དང་ཆབ་སྲིད་ཐོག་དགེ་འདུན་པ་ཚོས་ལས་དོན་བྱེད་ཕྱོགས་བཀོད་ཡོད་མེད་དང་། ༧གོང་ས་མཆོག་གིས་དུས་རྒྱུན་དགོན་པ་གྲྭ་ཚང་ཁག་ཏུ་བོད་པའི་རྩ་དོན་ཐོག་འགན་ཡོད་སྐོར་ནན་གྱིས་གསུངས་གི་ཡོད་སྟབས། ཐེངས་འདིའི་ཚོགས་ཐོག་ཏུ་གླེང་སློང་དང་གྲོས་ཆོད་འདྲ་བཞག་ཡོད་དྲིས་པར་ཁོང་གིས། བཅའ་ཡིག་ནང་དམིགས་བསལ་དེ་འདྲ་ཡོད་པ་མ་རེད་དེ། ཐེངས་འདིའི་གྲོས་ཆོད་བདུན་པའི་ནང་། “༧གོང་ས་མཆོག་གི་བཀའ་དགོངས་རྣམས་ཕྱག་ལེན་ཡོང་ཐབས་ལ་ལྷན་ཚོགས་འདིས་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན” ཞེས་ཁ་གསལ་བོ་བྱས་ཏེ་བཀོད་ཡོད། ཅེས་གསུངས་སོང་།

གྲོས་གཞི་ཁག་བརྒྱད་ནི། དང་པོ།  རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཁྲིམས་ནང་གི་དོན་ཚན་དགུ་པའི་ཚན་པ་རེ་རེའི་ཐོག་བགྲོ་གླེང་ཞིབ་ལྷུག་གནང་མཐར་དོན་ཚན་དེ་དག་ཕྱག་ལེན་དུ་འཁེལ་རྒྱུ་བྱས་ཡོད་པ་དང་། གཉིས་པ། ཐོག་མར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་དབུས་རྒྱུན་ནས་རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཡིག་ཆེན་མོ་དགོན་སྡེ་གྲྭ་ཚང་ཁག་ལ་འགྲེམས་སྤེལ་ཞུ་རྒྱུ་དང་། གདན་ས་གྲྭ་ཚང་ཁག་གི་དགེ་བསྐོས་བརྗེ་ལེན་སྐབས་བཅའ་ཡིག་ཆེན་མོ་འདི་བཞིན་རྩིས་སྤྲོད་རྩིས་ལེན་དང་འབྲེལ། ཁུངས་སོ་སོའི་མཁན་རིན་པོ་ཆེ་དང་དགེ་བསྐོས་བཅས་ནས་དུས་ནས་དུས་སུ་ཕྱག་ལེན་ལ་འཁེལ་ཐབས་མཛད་རྒྱུ་བྱས་ཡོད། གསུམ་པ། ད་ཡོད་ཆོས་སྡེ་གྲྭ་ཚང་སོ་སོའི་རྒྱུགས་གཞི་སློབ་ཚན་རྣམས་རིང་མིན་དབྱིན་ཡིག་ཐོག་འབུལ་རྒྱུ་དང་། དེ་རྗེས་རིམ་པས་བཀའ་བསྡུར་གནང་རྒྱུ།  བཞི་བ། འཇང་དགུན་ཆོས་ཀྱི་ལས་དོན་བསྒྲུབ་ཆེད་ཚོགས་ཆུང་ཟུར་འཛུགས་བྱ་རྒྱུ་དང་། གནས་སྐབས་ཚོགས་ཆུང་དེའི་ཚོགས་གཙོ་དགའ་ཤར་མཁན་པོ་བྱང་ཆུབ་ཆོས་ལྡན་ལ་ད་ལམ་ཆོས་ཁྲིམས་འཛིན་སྐྱོང་ལྷན་ཚོགས་ཀྱིས་སྤྱི་མོས་ཐོག་བསྐོ་བཞག་བྱས་ཤིང་། གདན་ས་གསུམ་ནས་ཚོགས་མི་རེ་དང་། དེ་དག་གྲྭ་ཚང་སོ་སོ་རེ་མོས་ཀྱི་གཏོང་གནང་མཛད་རྒྱུ། བཀྲ་ཤིས་ལྷུན་པོ་དང་རྭ་སྟོད་གཉིས་ནས་ཚོགས་མི་གཅིག་རེ་རེས་མོས་ཀྱིས་བཏང་སྟེ། ཚོགས་ཆུང་དེར་ཚོགས་མི་ལྔ་ལས་གྲུབ་ཅིང་། ཚོགས་ཆུང་གི་ལས་དུས་ལོ་ ༥ གཏན་འབེབས་བྱས་ཤིང་། ཚོགས་མི་དེ་དག་ཧི་མ་ལ་ཡའི་རི་རྒྱུད་ནས་ཡིན་མཁན་གཏོང་ཐབས་ལ་འབད་བརྩོན་བྱ་རྒྱུ། དགའ་ལྡན་གྱི་གདན་གསུམ་སྨོན་ལམ་ཚོགས་ཆུང་གི་ལས་ཁུངས་དེ་ཚོགས་ཆུང་འདིའི་ལས་ཁུངས་བྱ་རྒྱུ། འཇང་དགུན་ཆོས་ཀྱི་སྒྲིག་གཞི་དང་ཡིག་ཆ་ཡང་ཁྲིམས་མཐུན་དེབ་བསྐྱེལ་བྱ་རྒྱུ་ཚོགས་ཆུང་ནས་འགན་ལེན་ཐོག ཕྱི་ལོ་ ༢༠༠༩  ལོར་འཇང་དགུན་ཆོས་ཚོགས་ཆུང་ནས་སྙན་ཞུ་ཕུལ་བ་ལྟར། རྒྱུད་གྲྭ་སྟོད་སྨད་གཉིས་དང་རྣམ་རྒྱལ་གྲྭ་ཚང་བཅས་ལའང་སློབ་གཉེར་བའི་ས་མིག་གནང་རྒྱུ་དང་། སྔར་ཡོད་གདན་སའི་གྲྭ་ཚང་ཁག་གི་སློབ་གཉེར་བ་མང་དུ་གཏོང་རྒྱུའི་ཐད་བསམ་ཞིབ་གནང་རྒྱུ། 

གྲོས་གཞི་ལྔ་པ།  གཞུང་ཆེན་བཀའ་པོད་ལྔ་དང་། རྒྱུད་སྡེ་ཆེན་པོ་བཞི། རིག་གནས་ཆེ་བ་ལྔ་བཅས་ཀྱི་ཐོག་ལ་རིགས་གཅིག་རྐང་འཛིན་དགོས་གལ་ཡོད་མེད་སྐོར་ལ་གྲོས་བསྡུར་བྱས་མཐར།  རིགས་གཅིག་རྐང་འཛིན་དགོས་གལ་ཤིན་ཏུ་ཆེ་ཞིང་། ལྷ་རམས་སློབ་ཐོན་ཟིན་པ་རྣམས་ལ་དེ་ལྟར་གནང་དགོས་པའི་བསྐུལ་མ་གནང་རྒྱུ། དྲུག་པ། བལ་ཡུལ་དགེ་ལྡན་ཤེས་ཡོན་ལྷན་ཚོགས་ཁོངས་ནས་སློབ་གཉེར་བ་དགེ་ལུགས་རྒྱུགས་སྤྲོད་ཆེན་མོར་འཛུལ་ཞུགས་སྐོར་ལ་གྲོས་བསྡུར་གནང་མཐར།   དེ་སྔ་བཀའ་མོལ་བྱུང་དོན་ལྟར་དེ་དང་ཕྱོགས་མཚུངས་མང་བས་གནས་སྐབས་ངོས་ལེན་ཞུ་ཐབས་དཀའ་ཡང་། མ་འོངས་པར་དགོངས་བཞེས་བཀའ་བསྡུར་གནང་རྒྱུ།  བདུན་པ། ༧གོང་ས་མཆོག་གི་བཀའ་དགོངས་རྣམས་ཕྱག་ལེན་ཡོང་ཐབས་དང་། རིས་མེད་ཆོས་ལུགས་མཐུན་ལམ། བོད་དོན་བདེན་གསལ་ཐབས། འཛམ་གླིང་ཞི་བདེ་སྐོར་སོགས་ལ་བཀའ་བསྡུར་གནང་མཐར། ༧གོང་ས་མཆོག་གི་བཀའ་དགོངས་རྣམས་ཕྱག་ལེན་ཡོང་ཐབས་སོགས་ལ་ལྷན་ཚོགས་འདིས་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན་པ། བརྒྱད་པ། ད་ལམ་༧གོང་ས་མཆོག་ནས་བཀའ་སློབ་ཆེད་ཕེབས་དགོངས་དོན་ལྟར། གདན་ས་གྲྭ་ཚང་སོ་སོའི་མཁན་རིན་པོ་རྣམ་པས་བྱང་ཆུབ་ལམ་རིམ་ཆེན་མོའི་འཆད་ཉན་ཆ་ཚང་གྲུབ་པ་མཛད་རྒྱུ་དང་། དགེ་བཤེས་ཐོན་ཟིན་པ་རྣམས་ནས་ལེགས་སྦྱར་གྱི་སྐད་སོགས་སྦྱང་ཐབས་བྱ་རྒྱུ། དགེ་ལུགས་པའི་སློབ་སྟོན་པའི་ཚོགས་ཆུང་ཞིག་བསྐོ་འཛུགས་གནང་རྒྱུ། རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཡིག་ཆེན་མོའི་དོན་ཚན་བཅུ་དགུའི་ནང་ཚན་བདུན་པ། གློ་བུར་དགག་དབྱེ་བྱ་དགོས་ཀྱི་རྐྱེན་ཚད་ལྡན་མ་བྱུང་ན་ཡུལ་དུས་དང་བསྟུན་ཏེ། དབྱར་ཟླ་བ་གསུམ་ཆ་ཚང་བཞུགས་ཐུབ་ན་བཞུགས་དགོས་པ་དང་། བཅའ་ཡིག་ཆེན་མོའི་དོན་ཚན་ ༡༩ ནང་གསེས་ ༡༦ པ་གདན་གསུམ་གྲྭ་ཚང་ཁག་གིས་མཚོན་དགེ་ལྡན་པའི་འདུས་སྡེ་ཀུན་གྱི་གསོ་སྦྱོང་ཚོགས་པའི་དུས་ཚིགས་གཅིག་གྱུར་ངེས་པར་དགོས་པ་བཅས་བཞག་འདུག

༼ གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་ནས་སྤེལ།༽