ཟླ་འདིའི་ཚེས་ ༡ ཉིན་གྱི་ཞོགས་པའི་ཆུ་ཚོད་ ༨ སྟེང་སེར་སྨད་ཐོས་བསམ་ནོར་གླིང་གཙུག་ལག་ཁང་མདུན་ཐང་དུ་སེ་ར་བྱེས་སྨད་གཉིས་གཙོས་པའི་སྦེལ་ཀོབ་བོད་མིའི་གཞིས་སྒར་ཁུལ་གྱི་སེར་སྐྱ་མི་དམངས་ཉིས་ཁྲིར་ཉེ་བ་ལྷན་འཛོམས་ཐོག སྤྱིར་ནོར་༧གོང་ས་མཆོག་གིས་མི་དམངས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བསྐུར་ཏེ་ཟབ་རྒྱས་གསུང་གི་བདུད་རྩི་བསྩལ་ཡོད་ལ། དེའི་རྗེས་༧གོང་ས་མཆོག་གཙུག་ལག་ཁང་ནང་གི་བཞུགས་ཁྲིར་ཞབས་སོར་བཀོད་དེ་བོད་གཞུང་དམངས་ཡོངས་ཀྱིས་བརྟན་བཞུགས་བསྟར་འབུལ་ཞུས་ཡོད། དེ་དང་མཉམ་དུ་སེར་སྨད་གྲྭ་ཚང་གིས་དད་ལྡན་ཆོས་ཞུ་བ་ཡོངས་ལ་ཉིན་གུང་གསོལ་ཚིགས་འདེགས་འབུལ་ཞུས་སོང་།
ཉིན་གུང་ཆུ་ཚོད་༡༢ སྟེང་མཛད་སྒོ་ཡོངས་སུ་གྲུབ་སྟེ་༸གོང་ས་མཆོག་གཟིམ་ཤག་ཏུ་ཕེབས་མ་ཐག སེར་སྐྱ་མི་དམངས་ཡོངས་རང་རང་སར་ལོག་ཤུལ་དུ་སེར་སྨད་གཙུག་ལག་ཁང་གི་ཕྱི་ནང་བར་གསུམ་དུ་གད་སྙིགས་ཀྱིས་ཁེངས་ཤིང་། རླུང་བུའི་རྒྱུ་ཕྱོགས་དང་བསྟུན་ཏེ་ཤོག་བུའི་སྡེར་མ་དང་འགྱིག་གི་ཕོར་བ། སིལ་ཟས་རིགས་ཀྱི་ཤོག་ཐུམ་སོགས་རྒྱ་མཚོའི་རྦ་རླབས་ལྟར་འཕྱོ་བཞིན་འདུག མང་ཚོགས་ཚོས་དེ་ལ་དོ་སྣང་ཙམ་ཡང་མེད་པར་གད་སྙིགས་ཀྱི་ཁྲོད་ན། ཕར་འགྲོ་ཚུར་འོང་བྱེད་བཞིན་འདུག་ལ། ད་དུང་མུ་མཐུད་དུ་ཟས་ལྷག་འཐུང་ལྷག་དང་། ཟས་སྣོད་འཐུང་སྣོད་ཀྱི་གད་སྙིགས་གཡས་གཏོར་གཡོན་གཏོར་བྱེད་ཀྱི་འདུག ཕྱི་རྒྱལ་བ་དང་རྒྱ་གར་གྱི་སྤྲོ་འཆམ་པ་འགའ་རེས་ཧང་སང་སྟེ་ཅེར་ནས་བལྟས་འདུག་ལ། འགའ་རེ་ཡིས་པར་རྒྱག་པ་དང་འགའ་རེ་ཡིས་གད་སྙིགས་འཐུ་བཞིན་འདུག
སྒྱུ་འཕྲུལ་ལྷ་ཡི་ཕོ་བྲང་ལྟ་བུའི་གཙུག་ལག་ཁང་གི་ཕྱི་ནང་བར་གསུམ་དང་། ལྷ་བཟོ་བི་ཤྭ་ཀརྨའི་པུར་རྩེ་ལས་ཐོན་འདྲའི་ཁོ་ར་ཁོར་ཡུག་གི་གད་སྙིགས་དེར་ང་རང་ཧང་སང་བ་དང་། མི་རིགས་གཞན་པ་ཚོར་ངོ་གནོང་བ། གྲྭ་ཚང་གི་དགེ་འདུན་པ་ཚོར་ཡ་ང་བ་ཞིག་བྱུང་། ཡང་སྙིང་གྲྭ་ཚང་ལ་གད་སྙིགས་ཉར་ཚགས་དང་གཙང་བཟོའི་སྒྲིག་གཞི་མེད་སོང་བ་རེད་དམ། ཡང་ན་ས་འདིའི་མི་དམངས་ལ་ཁོར་ཡུག་བདག་གཅེས་ཀྱི་གོ་རྟོགས་ཞན་སོང་བ་རེད། གང་ལྟར། མིག་མདུན་གྱི་གད་སྙིགས་དེ་དག་དེ་རིང་གི་གནས་སྐབས་ཙམ་ཡིན་ཞིང་། ནམ་རྒྱུན་དགོན་པའི་ཁོར་ཡུག་གཙང་མ་ཡིན་ཞིང་། ཉིན་འགའི་སྔོན་དགོན་པར་ཁོར་ཡུག་ཚོགས་པ་ཞིག་གསར་དུ་བཙུགས་ཡོད་པ་སོགས་ཤེས་ཀྱི་ཡོད། འོན་ཀྱང་། གཙུག་ལག་ཁང་གི་ཁོར་ཡུག་དང་མེ་ཏོག་ལྡུམ་ར། འདུ་ཁང་ནང་གི་གྲལ་གདན་སྟེང་སོགས་སུ་ཅི་མི་སྙམ་པར་གད་སྙིགས་གཡུག་མཁན་དེ་དག་གི་བསམ་བློར་རྒྱུས་ལོན་ཞིག་བྱ་རྒྱུ་དེ་ཡིན། ཉིན་གུང་ཆུ་ཚོད་ ༢ སྟེང་གཙུག་ལག་ཁང་དུ་༸གོང་ས་མཆོག་སྤྱན་འདྲེན་གྱིས་གཞུང་ཆེན་རྩོད་རྒྱུགས་ཀྱི་ལས་རིམ་ཡོད་སྟབས། དགེ་འདུན་པ་འགའ་འདུ་ཁང་གི་རྡོ་གཅལ་ཐང་དུ་ཕེབས་བཞིན་ཡོད་པ་དང་ཐུག་སྟེ། མཚན་ལ་བསྟན་འཛིན་ནམ་མཁའ་ཟེར་བ་ཞིག་ལ་བཅར་འདྲི་ཞུ་རྒྱུའ་གོ་སྐབས་བྱུང་།
གྲྭ་ནམ་མཁའ་བསྟན་འཛིན་ལགས་ཅུང་མ་བདེ་བའི་ངང་བརྗོད་རྒྱུར། དེ་རིང་མི་དམངས་ཕོན་ཆེན་པོ་ཡོང་ཡོད་པ་དང་། ལྷག་པར་དུ་གྲྭ་ཚང་གིས་ཞལ་ལག་གོ་སྒྲིག་ཞུས་ཡོད་སྟབས། གཙུག་ལག་ཁང་གི་ཁོར་ཡུག་བཙོག་པ་བཟོས་འདུག སྤྱིར་ཁ་སང་ནས་མང་ཚོགས་ལ་ཞལ་ལག་ཡོད་པ་གསལ་བསྒྲགས་བྱས་ཡོད། དངོས་གནས་བྱས་ན་ཕོར་བ་སོགས་བསྣམས་ནས་ཡོང་དགོས་པ་རེད་ལ། གལ་སྲིད་དེ་མ་བྱུང་ཡང་གཙུག་ལག་ཁང་མདུན་ནས་གད་སྙིགས་གང་བྱུང་དུ་མི་གཡུག་རྒྱུ་མཁྱེན་དགོས་པ་རེད། དགོན་པའི་ངོས་ནས་ག་ས་གང་དུ་གད་སྙིགས་ལྡུག་སྣོད་བཞག་ཡོད་པ་མ་ཟད། གད་སྙིགས་སྐམ་རློན་དབྱེ་བ་ཕྱེས་ཏེ་བཞག་ཡོད། ཅེས་དང་། ནམ་རྒྱུན་སེ་ར་དགོན་པའི་གཡས་གཡོན་གཙང་མ་ཡོད་པ་རེད། སེ་ར་དགོན་པའི་ངོས་ནས་འཕྲོད་བསྟེན་སྨན་ཁང་དང་མཉམ་འབྲེལ་ཐོག ཁོར་ཡུག་གཙང་བཟོའི་ལས་འགུལ་གསར་པ་ཞིག་སྤེལ་གྱི་ཡོད་པ་རེད། དགོན་པའི་གྲྭ་དམངས་ལ་མཚོན་ན་སྔོན་དང་བསྡུར་ན་གད་སྙིགས་ལ་བདག་པོ་རྒྱག་རྒྱུ་དང་། ཁོར་ཡུག་ལ་བདག་གཅེས་བྱ་རྒྱུར་དོ་སྣང་ཆེ་རུ་འགྲོ་བཞིན་ཡོད་པའི་ཁུལ་རེད་དེ། དེ་རིང་གི་གད་སྙིགས་ལ་བལྟས་ཡོང་ན་ད་དུང་ཧ་ཅང་ཐབས་སྐྱོ་བོ་རེད། གང་ཡིན་ཟེར་ན་གཙུག་ལག་ཁང་ཕྱི་ལོགས་ཀྱི་མང་ཚོགས་ཙམ་མ་རེད། གཙུག་ལག་ཁང་ནང་གི་བཞུགས་གདན་དག་གི་སྟེང་དུའང་གད་སྙིགས་ཕོན་ཆེན་པོ་གཡུགས་འདུག ཅེས་བརྗོད་བྱུང་།
དེའི་རྗེས་ཆེད་དུ་གད་སྙིགས་གཡུག་བཞིན་པ་ཞིག་བཙལ་ཏེ་གཙུག་ལག་ཁང་མདུན་དུ་གད་སྙིགས་གང་བྱུང་དུ་གཡུགས་དོན་དང་། ནམ་རྒྱུན་རང་གི་ས་གནས་དང་ལམ་ཁ་སོགས་སུ་འདི་ལྟར་གད་སྙིགས་གཡུག་གི་ཡོད་མེད་འདྲི་འདོད་བྱུང་། སྐབས་དེར་ངའི་ཁ་གཏད་ཀྱི་ཕར་ཕྱོགས་སུ་ཕོ་མོ་རྒན་གཞོན་འགའ་ཡིས་ཞལ་ལག་མཆོད་ཀྱི་འདུག་ལ། ཁོང་ཅག་གི་ལག་ཏུ་ཁུག་མ་སེར་པོ་འགའ་བཟུང་ཡོད་པའི་སྟེང་དབྱིན་ཡིག་གིས་ Save the environment “ཁོར་ཡུག་སྲུང་སྐྱོབ་བྱོས”ཞེས་བཀོད་འདུག ང་ཁོང་ཅག་གི་སར་ཕྱིན་ཏེ་བཅར་འདྲི་ཞུས་སྐབས། ལོ་ན་ཅུང་བགྲེས་པའི་སྐྱེས་པ་ཞིག་གིས་ཁོ་རང་ངོ་སྤྲོད་དང་འབྲེལ་བརྗོད་དོན། ངའི་མིང་ལ་བསོད་ནམས་ཟེར་གྱི་ཡོད། ཧོན་སུར་གཞིས་ཆགས་གྲོང་སྡེ་ L ནས་ཡིན། མཉམ་འབྲེལ་འགན་འཛིན་ལྷན་ཚོགས་ཀྱི་ལྟ་རྟོག་ཚོགས་མི་ཡིན། ཁྱེད་རང་གིས་བཤད་པ་ཧ་ཅང་བདེན་པ་རེད། དེ་རིང་གཙུག་ལག་ཁང་གི་ཕྱི་ནང་ཚང་མ་གད་སྙིགས་རེད། འོན་ཀྱང་འདི་དགོན་པའི་སྐྱོན་ཆ་མ་རེད། མང་ཚོགས་ཀྱི་བསམ་བློ་སྐྱོ་དྲགས་སོང་བ་རེད། སྤྱིར་བཏང་གཞིས་མགོས་གོ་སྒྲིག་འོག་གད་སྙིགས་ལ་བདག་པོ་རྒྱག་དགོས་པ་བཤད་ཀྱི་ཡོད། ས་གནས་གཞོན་ནུ་དང་བུད་མེད་ཀྱི་ངོས་ནས་ཀྱང་། མང་ཚོགས་ལ་འགྱིག་ཤོག་བེད་སྤྱོད་གཏོང་འཇུག་གི་ཡོད་པ་མ་རེད། བོད་པའི་ཚོང་ཁང་ཞིག་གིས་འགྱིག་ཤོག་བེད་སྤྱོད་བྱས་ན་སྒོར་ ༢༠༠ དང་མི་དམངས་ཀྱིས་བེད་སྤྱོད་བཏང་ན་སྒོར་ ༡༠༠ བཅས་ཀྱི་ཆད་པ་གཅོད་ཀྱི་ཡོད་པ་རེད། འོན་ཀྱང་གཅིག་ནས་ཁོར་ཡུག་གཙང་བཟོའི་ལས་འགུལ་གསར་པ་ཡིན་པ་དང་། མང་ཚོགས་ཀྱི་རྩ་བའི་ཁོར་ཡུག་གཙང་ཉར་གྱི་འདུ་ཤེས་ཧ་ཅང་སྐྱོ་བོ་རེད། ཅེས་ངོ་སྤྲོད་གནང་བྱུང་།
༼གསར་འགོད་པ་དོན་འགྲུབ་བཀྲ་ཤིསས་ཀྱིས་ལྷོ་ཕྱོགས་སེ་ར་དགོན་ནས་སྤེལ༽
གད་སྙིགས་ཐད་ང་ཚོས་ཕྱི་རྒྱལ་བ་ཚོར་མིག་དཔེ་བལྟ་རྒྱུ་གལ་ཆེ། ང་ཁ་ས་ཨ་རིའི་ནིའུ་ཡོརྐ་མངའ་སྡེའི་ལེག་ཇོརྗི་ཟེར་བར་ཉིན་གསུམ་སྤྲོ་སྐྱིད་དུ་ཕྱིན་ནས་བསྡད་པ་ཡིན། དེར་མི་མང་སྟོང་ཕྲག་མང་པོ་སླེབས་འདུག ད་རང་ཕྱིར་ལོག་ཡོང་སྐབས་མི་ཚང་སོ་སོས་རང་རང་གི་སྡོད་སར་གད་སྙིགས་ཡོད་པ་ཚང་མ་བསྒྲུགས་ནས་གད་སྙིགས་བླུག་སྣོད་དུ་བསྐྱལ་ནས་གཙང་མ་བཟོ་གི་འདུག ང་ཚོ་བོད་རིགས་མི་ཚང་བཞི་ཡོད་པ་རྣམས་ནས་ཀྱང་སོ་སོའི་སྡོད་སའི་གད་སྙིགས་མ་ལུས་པ་གཙང་མ་བཟོས་ནས་ལོག་ཡོང་བ་ཡིན། དེ་ནི། གང་ཞིག་གསེར་གྱི་རི་ལ་སྔས་བཅོལ་ན། དེ་ཡི་འདབས་ཆགས་ཐམས་ཅད་གསེར་དུ་འགྱུར། ཟེར་བའི་དཔེ་ལྟར་ལོས་ཡིན། དེས་ན་ང་ཚོ་བོད་རིགས་རྣམས་ནས་ཀྱང་གསུང་ཆོས་སོགས་མི་མང་འདུ་འཛོམས་སམ་སྤྱི་གླིང་སོགས་སུ་སྐྱོད་སྐབས་སོ་སོའི་གད་སྙིགས་བདག་པོ་བརྒྱབ་ན་འདི་ལྟར་མི་ལ་ངོ་ཚ་མི་དགོས་པ་ཞིག་ཡོང་རྒྱུ་མ་ཟད་རང་ཉིད་ལ་གོམ་འགྲིས་དང་གཞོན་སྐྱེས་ཚོར་མིག་ལྟོས་བཟང་པོ་ཡོང་ངེས་ལ་དེ་དོན་ཚང་མས་གནང་གལ་ཞུ།
ལྷོ་ཕྱོགས་སུ་འགྲོ་མ་མྱོང་མོད། ལྷོ་ཕྱོགས་ནི་བཙན་བྱོལ་གཞིས་གྲོང་ཆེ་ཁུལ་ཞིག་ཡིན་པ་ཐོས་མྱོང་། དེར་བརྟེན། བཙན་བྱོལ་གཞིས་གྲོང་ཆེ་ཁག་དག་གིས་ད་གཟོད་འུ་ཚོ་བཙན་བྱོལ་བའི་ངོ་བོ་མཚོན་དགོས་པ་རེད། ད་ཐེངས་ཀྱི་གནས་སྟངས་ཆུང་ཚེགས་འདིས་ཀྱང་གནད་དོན་ཆེན་པོ་ཞིག་བརྗོད་ཀྱིན་ཡོད་པ་རེད། འདིས་འུ་ཚོ་ས་ད་དུང་སྔར་བཞིན་རྗེས་ལུས་ཡིན་པ་བསྟན་ཡོད་ལ། དེ་བཞིན་དུ་རྡ་སའི་ཉེ་འཁོར་ན་ཁོར་ཡུག་སྲུང་སྐྱོབ་ཀྱི་གོ་རྟོག་སྤེལ་མཁན་ཡིན་ཞེས་མིང་རྫིག་པོ་རེ་བཏགས་སྟེ་རྒྱལ་སྤྱིའི་རོགས་དངུལ་ཕངས་མེད་དུ་ཟ་བཞིན་པའི་གཞུང་འབྲེལ་ཡིན་མིན་གཉིས་ཀྱི་ལས་ཁུངས་སྡེ་ཁག་དག་གིས་དངོས་ཡོད་ལག་ལེན་ཐོག་ལས་དོན་ག་ཙམ་ཞིག་སྒྲུབ་ཡོད་མེད་ཀྱང་ཐེངས་གཅིག་བསྟན་པ་རེད། དུས་རྒྱུན་གནད་དོན་ཅི་ཞིག་ཡིན་རུང་མཛུབ་མོ་གཉིས་འཛུགས་དགོས་ཀྱིན་འདུག རང་གཞན་དང་འབྲེལ་བའི་དོན་དག་ཅིག་ཡིན་ན་མཛུབ་མོ་གཅིག་རང་དང་གཅིག་གཞན་ལ་འཛུགས་རྒྱུ་དང་། གཞུང་དམངས་གཉིས་དང་འབྲེལ་བའི་དོན་དག་ཅིག་ཡིན་ན་མཛུབ་མོ་གཅིག་དམངས་དང་གཅིག་འབྲེལ་ཡོད་སྡེ་ཁག་ལ་འཛུགས་དགོས་ཀྱིན་འདུག ནམ་རྒྱུན་འབྲེལ་ཡོད་ཚོགས་སྡེ་དེ་དག་གིས་རྡ་རམ་ས་ལ་ནས་རྣམ་པ་རིང་ལུགས་དང་ཁྱབ་བསྒྲགས་རིང་ལུགས་ཀྱི་ལས་འགུལ་ལམ་གསར་འགོད་གསལ་བསྒྲགས་རེ་སྤེལ་རྗེས་དེ་དག་རྒྱལ་སྤྱིའི་རོགས་ཚོགས་ཁག་ལ་སྤྲད་དེ་རོགས་དངུལ་ཕོན་ཆེ་རེ་བླངས་རྗེས་སྐྱིད་ཟ་སྐྱིད་ཉལ་བྱས་ནས་བསྡད་འདུག་གཱ། མ་གཞི་གསར་འགྱུར་འདི་མཐོང་རྗེས་ཤ་འདར་དང་སེམས་འཚབ་སྐྱེས་དགོས་ས་དེ་ཁོར་ཡུག་སྐོར་ལ་ལས་དོན་སྒྲུབ་མཁན་ཡིན་ཟེར་མཁན་གྱི་ཚོགས་པ་ཁག་དགོས་ངེས་རེད།
གསར་འགོད་པས་གསར་འགྱུར་བཀོད་པ་ཡག་པོ་འདུག ཡིན་ཡང་འདི་ཏོག་ཙམ་བདེ་བོ་མི་འདུག༼ལྷ་བཟོ་བི་ཤྭ་ཀརྨའི་པུར་རྩེ་ལས་ཐོན་འདྲའི་ཁོ་ར་ཁོར་ཡུག་གི་གད་སྙིགས་དེར་ང་རང་ཧང་སང་བ་དང་། ༽ཨ་ཙི་ཀུ་རེ་ཡིན་ད།
གསར་འགོད་པའི་མིག་འདི་ཧ་ཅང་རྣོ་ལ། གསར་འགོད་པའི་དཔྱོད་ཤེས་ཀྱང་དེ་ལས་རྣོ་ངར་ལྡན། འདི་ནི་གསར་འགོད་པ་ཚོའི་ཁྱད་ཆོས་དང་མེད་དུ་མིང་རུང་བའི་ཆ་རྐྱེན་དང་པོ་དེ་རེད། གསར་འགོད་པ་ལགས། ཁྱོད་ཞེ་གི་ཧྲ་གི་་་་ཁྱོད་ཀྱིས་གནས་བབ་དང་དུས་སྐབས་ཀྱི་གནད་འགག་ཟིན་ཡོད་པའི་གནས་ཚུལ་མང་པོ་སྤེལ་སོང་།
གད་སྙིགས་ཀྱི་དཀའ་ངལ་ཉིན་རེ་བཞིན་ཇེ་མང་དུ་འགྲོ་བཞིན་ཡོད་པས་རང་གཞན་ཚང་མས་གོམས་གཤིས་ངན་པ་འདི་ཅིས་ཀྱང་དོར་དགོས་པ་དངོས་ཡོད་ཡིན། གསར་འགོད་པས་དེ་རིང་འདིའི་སྐོར་དངོས་ཡོད་ཀྱི་འདྲ་པར་དང་གནས་ཚུལ་མང་དག་ཞིག་བྲིས་པ་བཞིན། སྐབས་དེར་སེར་སྨད་ཐོས་བསམ་ནོར་གླིང་གྲྭ་ཚང་དུ་༸གོང་ས་མཆོག་གིས་སེར་སྐྱ་ཡོངས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་བ་དང་། བོད་གཞུང་དམངས་གཉིས་ནས་བརྟན་བཞུགས་འབུལ་བ་སོགས་ཀྱི་སྐོར་སྐུ་པར་དང་གནས་ཚུལ་ཅུང་ཡོད་ན་ཡང་དགེ་མཚོན་ཆེན་པོ་ཡོད་སྲིད། ལྷག་པར་དུ་༸གོང་ས་མཆོག་གི་བླང་དོར་གྱི་བཀའ་སློབ་རྣམས་འགོད་ཐུབ་པ་གནང་གལ་ཆེ།
ངོ་མ་བཤད་ན་བདེན་པ་རེད་ཡིད་སྐྱོ་བའི་རྫོབ་པོ་དེ་འདྲའི་གནས་སུ་གྱུར་བ་ངོན་གསལ་རེད་ཡིན་ན་ཡང་འཁོར་ཡུག་བསྲུང་སྐྱོབ་ཟེར་བ་དེ་མི་རེ་རེ་ངས་འགན་འཁུར་དགོས་བ་ལས་དགོན་པའི་གྲྭ་བ་གཅིག་པོ་དང་ཡུལ་དེ་དང་དེ་གཅིག་པོ་ལ་རག་ལས་བ་ཞིག་མ་རེད་སྙམས་
དགེ་འདུན་པ་རྣམས་པས་་་གད་སྙིགས་ཙང་བཟོ་གནང་ངེས་རེད་།
ད་ལན་གིས་གད་སྙིགས་དོན་མེད་བཟོ་བ་ཞིག་མ་རེད་།
དེ་ལུགས་དགོངས་འཇགས་ཞུ།།
ཐུགས་རྗེ་ཆེ།།
སྤྲོ་ཚིགས་དགེ་འདུན་ལགས་།
གསར་འགོད་པས་གནས་ཚུལ་སྤེལ་བར་སྐྱོན་མཐོང་གི་མི་འདུག
སྐྱོན་ཆ་ན་ི་མང་ཚོགས་ཀྱི་ཐོག་ན་ཡོད།་་་་་་་་་ནམ་་རྒུན་དགོན་པའི་མཐའ་འཁོར་གྱི་གཙང་སྦྲ་ག་འདྲ་ཡོད་མེད་གནས་དེར་འགྲོ་མོང་མཁན་ཞིག་ཡིན་ན་ཚང་མས་གསལ་པོ་མཁྱེན་པས་ཁྱེད་ཚོ་གྲྭ་བ་ཚོ་ལ་ཕོག་དགོས་དོན་མེད།
ང་ཚོ་བོད་པ་ཚོར་རྒྱ་གར་གྱི་རུལ་སུངས་སུ་གྱུར་གོམས་གཤིས་དག་འགོས་ཀྱིན་པ་དེས་ངའི་སེམས་ལ་ན་ཚ་བཟོ་གིན་འདུག
བོད་པ་དང་རྒྱ་གར་བ་གཉིས་ཕན་ཚུན་གཅིག་ལ་གཅིག་གི་གོམས་གཤིས་འཇགས་ཡོད་པ་རེད། རྒྱ་གར་བ་དེ་ཚོ་ཡུལ་སྐོར་སྤྲོ་མཆམ་ལ་སོང་ས་བསྡད་ས་ཚང་མ་འདི་ལྟར་གད་སྙིགས་བཟོ་གི་རེད། བོད་པ་ཚོ་ཡང་དེ་མཚུངས་འདུག ཁ སྔོན་གསུང་ཆོས་སྐབས་སུ་གཙུག་ལག་ཁང་ནས་ཉིན་གུང་འབྲས་ལྡལ་དང་ཚོད་མ་ཕུལ་སོང་། རྒན་གཞོན་ཁྱད་མེད་དུ་འཚང་ཁ་ཤིག་ཤིག་གིས་འཕྲོག་རེས་འདྲ་ཞིག་བྱས་སོང་། ཟོས་ཚར་བའི་ཤུལ་གང་སར་འབྲས་དང་ལྡ་ལི་གང་བྱོ་བ་དང་སྟོར་ནས་བཞག་འདུག ཅུང་ཙམ་ནས་༸གོང་ས་མཆོག་ཕེབས་ཀི་རེད། གད་པ་དེས་ཁང་ལམ་དོད་པ་ལྟ་བུའི་གཙང་མ་བཟོས་ཀྱང་། གཙུག་ལག་ཁང་གི་སྟེང་འོག་ཐམས་ཅད་དེ་ལྟར་རེད་འདུག འོ་རེད། འདི་མོ་འདིའི་སྐོར་ང་ཚོས་དྲ་ཐོག་ནས་གླེང་ཡང་ཕན་ཐོག་གི་མ་རེད་སྙམ།
གོམ་གཤིས་ངན་པ་ཡིན་ནའང་འདྲ། སློབ་གསོའི་མ་འདང་བ་ཡིན་ནའང་འདྲ། ལག་ལེན་འགེལ་མི་ཐུབ་པས་ཡིན་ནའང་འདྲ། གང་ལྟར་དེ་ང་
ཚོ་བོད་པའི་རྗེས་ལུས་རྣམ་པ་རེད།
དེ་ལ་ལྟོས་ན་རྡ་སར་འདུ་འཛོམས་ག་ཚོད་ཆེ་ན་ཡང་གཙང་ཐག་ཆོད་རེད་འདུག
ཆོས་གྲྭར་གད་སྙིགས་ཁེངས་ཀྱང་སེམས་ཁྲལ་མེད༎
དེ་ནི་གཙང་དག་བཟོ་བར་ཧ་ཅང་སླ༎
སེམས་པ་གད་སྙིགས་ཆགས་ན་ཤིན་ཏུ་སྐྱོ༎
དེ་ལ་བཟོ་བཅོས་རྒྱགས་རྒྱུ་ཆེས་ཆེར་དཀའ༎
སྤྱིར་གད་སྙིགས་ཀྱི་ཆོས་རྭ་དང་གད་སྙིགས་ཀྱིས་ཁང་བའི་ཆོས་ར་གཉིས་ལ་ཁྱད་པར་ཡོད་རུང་། དེ་རིང་གསར་འགོད་པ་དོན་འགྲུབ་བཀྲ་ཤིས་ཀྱིས་སྤེལ་བའི་གསར་འགྱུར་གྱི་ཁ་བྱང་འདི་གསར་འགྱུར་དེའི་དོན་ངོ་མ་སྟོན་ཐུབ་པའི་ཁ་བྱང་ཞིག་ཏུ་གྱུར་འདུག་ཡོད།
་གསར་འགོད་པ་ལགས་
སེར་སྨད་གྲྭ་ཚང་སྐོར་ཧ་ལམ་དུས་བབ་ཐོག་བཀོད་པ་ཐོག་མ་ཡིན་ཟེར་ན་ཧམ་བཤད་མིན་ཚོད་ཡིན།འོན་ཀྱང་ཡིད་སྐྱོ་བ་ཞིག་ལ་ཁྱེད་ཀྱི་སེར་སྨད་གྲྭ་ཚང་གི་གནས་ཚུལ་རྒྱུས་ལོན་བྱས་པ་འདི་ལས་མེད་ན།་ངོ་མ་གྲྭ་ཚང་སྨད་ཀྱི་བློ་ཕམ་དགོས་པ་ཞིག་ལས་མི་འདུག།
ནམ་མཁའི་མཐོང་ན་མེད་པས་སྐར་ཚོགས་མིན༎
བོད་ཡུལ་སྤང་ཐང་མིན་པས་དཀར་ཤ་མིན༎
བོད་རིགས་དབང་ལ་འདུས་པའི་གནས་ཡིན་པས༎
གད་སྙིགས་སྣ་དགུ་ཡིན་པར་ངང་གིས་འགྲུབ༎
ང་ཚོའི་མང་ཚོགས་ཚོར་སློ་གསོ་ཉུང་དྲགས་སྐོར་ཤོད་མཁན་ཡོད་ཀྱང་། འཛམ་གླིང་གང་དུ་ཡང་མེད་པའི་སློབ་གསོ་བ་༸གོང་ས་ཡིད་བཞིན་ནོར་བུ་འདི་ལས་ལྷག་པའི་སློབ་གསོ་བ་ཞིག་སུ་ལ་དགོས། སྐད་ཆ་མདོར་བསྡུས་ནས་བཤད་ན། ཆབ་སྲིད། དཔལ་འབྱོར། རིག་གནས་སོགས་གང་ལ་ཅི་དགོས་ཐམས་ཅད་མི་གཅིག་རང་གིས་འགན་ཁྱེར་ནས་བྱེད་བསྡད་པ་ཡིན་ཙང༌། ང་ཚོ་བོད་རིགས་འདི་དག་སྐྱིད་ལང་དུ་ཤོར་དྲགས་པ་ལས་གཞན་རྒྱུན་མཚན་གང་ཡང་མེད།
གསར་འགྱུར་འགོད་པོ་རྣམས་ཀྱིས་ཀྱང་འགོ་བརྗོད་དང་རྩོམ་བྱང་འབྲི་སྐབས་གཟབ་ཙམ་གནང་ན་ཡག་པོ་འདུག
ང་ཚོ་ལ་སློབ་གསོས་མ་འདང་བའི་དཀའ་ངལ་མེད་ལ་སློབ་གསོ་ལ་འགན་ལེན་མ་
ཐུབ་པས་ལན་པ་རེད་བསམ་སྙམ།
ཨ་ཨ་ཨ་ཨ་་་་་་ང་སྐྲག་སོང་། ལམ་སེང་ཀློག་དུས་གད་སྙིགས་ཀྱི་ཆོས་རྭ་རེད་མི་འདུག་གཱ གད་སྙིགས་ཀྱིས་ཁེངས་པའི་ཁོར་ཡུག་དང་ཆོས་གྲྭའི་ཁོར་ཡུག་རེད་འདུག
ཨ་རོ་་་་རྗེས་མ་ནས་ཏོག་ཙམ་གཟབ་གཟབ་བྱོས་དང་། གད་སྙིགས་ཀྱི་ཆོས་རྭ་དང་གད་སྙིགས་ཀྱིས་ཁེངས་པའི་ཆོས་རྭ་གཉིས་ལ་ཁྱད་པར་ཆེན་པོ་འདུག་ཡཱ།
ང་ཚོ་ལ་སློབ་གསོས་མ་འདང་བའི་དཀའ་ངལ་མེད་ལ་སློབ་གསོ་ལ་འགན་ལེན་མ་
ཐུབ་པས་ལན་པ་རེད་བསམ་སྙམ།
(གད་སྙིགས་ཀྱི་ཆོས་རྭ་ཞིག ) གོ་དོན་གང་ཡིན་ནམ། གད་སྙིགས་ཀྱི་ཆོས་རྭ་ཟེར་བ་དེ་འདྲ་ཞིག་ཇི་ལྟར་བྱས་ཏེ་གྲུབ་པ་རེད། ངོ་མ་བསམ་དྲན་མེད་པའི་སྐད་ཆ་རང་རེད།
ཁོར་ཡུག་ལ་དོ་སྣང་མེད་པའི་རྒྱུ་རྐྱེན་གྱིས་དེ་རིང་གི་ཆོས་རྭའི་གད་སྙིགས་དག་མིག་མདུན་དུ་སླེབས་ཡོང་བ་རེད། འདི་དག་བོད་མི་ཚོའི་སེམས་ནང་ལ་རྒྱུན་འབྱམས་སུ་སོང་བའི་འདུ་ཤེས་ཤིག་རེད། མ་འོངས་པར་བཅོས་བསྒྱུར་ལ་འབད་ལ་འོས་པར་མཐོང་ངོ།
གསར་འགོད་པ་ལགས་ཀྱིས་སེར་སྨད་གྲྭ་ཚང་ཉིན་གཅིག་གི་ཕྱིའི་མཐོང་ཚུལ་ལ་མཐོང་སྣང་མ་མཛེས་པ་མཐོང་བ་ལས་ནང་གི་ཡོན་ཏན་གྱི་ཆ་ཙམ་ཡང་མེད་པ་ཁྱེད་ནས་ངོ་མ་སེར་སྨད་གྲྭ་ཚང་གྱ་བསྔོ་ལོ་འཕྱར་བ་རང་རེད། སྤྱིར་སྟངས་བོད་མི་གང་ཞིག་ཏུ་འདུ་འཛོམས་བྱས་རྗེས་དེ་ན་གད་སྙིགས་མེད་པ་ཞིག་མཐོང་མ་བྱུང་ལ་གང་ན་མི་འདུས་པ་དེར་གད་སྙིགས་ཡོད་པ་ཆོས་ཉིད་མ་རེད་པས། ད་རེས་ཁྱེད་ཀྱིས་སེར་སྨད་གྲྭ་ཚང་གི་ནང་གི་ཡོན་ཏན་གྱི་ཆ་གང་གླེང་སློང་མེད་པར་གད་སྙིགས་ཡོད་ཚུལ་བཤད་པ་ཁྱད་མཚར་རེད། ངོ་མ་ཁྱེད་གསར་འགོད་བྱ་རྒྱུ་རྫོགས་པ་རེད།
ཁོར་ཡུག་སྲུང་སྐྱོབ་ཟེར་བ་ནི་མཐར་ཐུག་ན་མི་རེ་རེའི་ནམ་རྒྱུན་འཚོ་བའི་ཁྲོད་རང་ཉིད་ཀྱི་གད་སྙིགས་རང་ཉིད་གཙང་སྦྲ་བྱེད་པ་དེ་ལ་ཟེར།
བོད་མི་ཚོར་གཙང་སྦྲ་འདུ་ཤེས་མེད་པ་འདི་ནི་དངོས་སྐྱོ་དགོས་པ་ཞིག་རེད།
ཡང་གོང་ས་མཆོག་གི་གཅིག་གཅིག་གཉིས་གཉིས་བྱས་ནས་བཀའ་སློབ་ཅིག་མ་གསུང་ན་རང་འགུལ་ཟེར་བ་ཞིག་དུས་ནམ་ཞིག་ལ་སྐྱེས་སྲིད་ཨང་།
གད་སྙིགས་གད་སྙིགས་ཆགས་པར་ཡ་མཚན་མེད། །
མི་སེམས་གད་སྙིགས་ཆགས་པར་ཡིད་རེ་སྐྱོ། །
གད་སྙིགས་འགའ་རེ་རླུང་གིས་གནམ་ལ་ཁྱེར། །
གད་སྙིགས་མང་པོས་ས་ནས་གོམ་བགྲོད་བྱེད། །