འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུར་ཆོས་ལུགས་ཚང་མར་ནུས་པ་གཅིག་མཚུངས་ཡོད་པ་རེད།
བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། རྒྱལ་སྤྱིའི་ཆོས་ལུགས་རང་དབང་ཚོགས་པའི་ཚོགས་ཆེན་ཐེངས་ ༣༣ པ་དེ་བཞིན་ཟླ་འདིའི་ཕྱི་ཚེས་ ༤ ཉིན་རྒྱ་གར་ལྷོ་ཕྱོགས་མངའ་སྡེ་ཀེ་ར་ལའི་གྲོང་ཁྱེར་ཀོ་ཆི་ནང་འཚོགས་ཡོད་པ་དང་། དབུ་འབྱེད་མཛད་སྒོའི་ཐོག་༧གོང་ས་མཆོག་གིས་ཆོས་ལུགས་ཕན་ཚུན་བར་འཆམ་མཐུན་དགོས་པའི་སྐོར་ལ་གསུངས་དོན། ཆོས་ལུགས་མི་འདྲ་བའི་བར་ལ་ལྟ་གྲུབ་མི་འདྲ་བའི་ཁྱད་པར་ཡོད་ལ། དཔེར་ན་ཧིན་རྡུ་དང་ཁ་ཆེ། ཡེ་ཤུ། ཇེན། ནང་པ། སིག་ཆོས་ལུགས་སོགས་ཀྱི་ཉམས་ལེན་བྱེད་ཕྱོགས་མི་འདྲ་ནའང་། ཆོས་ལུགས་དེ་དག་གི་དམིགས་ཡུལ་ནི་འགྲོ་བ་མིའི་སེམས་རྒྱུད་ལ་བྱམས་དང་སྙིང་རྗེ་སྐྱེ་ཐབས་དང༌། འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུ་དེ་ཡིན་པས་ཆོས་ལུགས་ཚང་མར་བརྩི་བཀུར་དགོས་རྒྱུ་དང༌། ཆོས་ལུགས་ཅི་ཡིན་སོ་སོའི་ཕ་མེས་ཀྱི་ཆོས་ལུགས་གཅིག་ཁོ་ན་ཉམས་ལེན་བྱ་དགོས་པར་མ་ཟད། གཞན་གྱི་ཆོས་ལུགས་ལའང་བརྩི་བཀུར་ཞུ་དགོས་ཀྱི་རེད་ཅེས་དང༌། ཡང་ཁོང་གིས་དུས་རབས་ ༢༡ པ་ནི་འགལ་ཟླ་ཚང་མ་གྲོས་མོལ་གྱི་ལམ་ནས་སེལ་དགོས་པའི་དུས་རབས་ཞིག་ཡིན་སྟབས་ཆོས་ལུགས་འཆམ་མཐུན་ཡར་རྒྱས་གཏོང་བར་གྲོས་མོལ་བྱ་རྒྱུུ་གལ་ཆེན་ཡིན། དེང་སྐབས་ནུབ་ཕྱོགས་པའི་རྒྱལ་ཁབ་ཁག་དང་ཚན་རིག་པའི་ནང་དུའང་ནང་པའི་ཆོས་ལུགས་ཀྱི་ཐོག་ལ་དོ་སྣང་བྱེད་མཁན་མང་དུ་འགྲོ་གིན་ཡོད་ཅེས་དང་། ཡང་འཛམ་གླིང་གང་སར་རང་བྱུང་ཐོན་ཁུངས་བསྔོགས་འདོན་ཚད་མེད་བྱས་པའི་རྐྱེན་གྱིས་འབྱུང་བའི་གནོད་འཚེ་ཚབས་ཆེན་བྱུང་ཡོད་ལ། པ་ཀི་སི་ཐན་དང་ཨ་ཧྥི་རི་ཁ། བོད། ལ་དྭགས། རྒྱ་ནག་སོགས་སུ་ཆུ་ལོག་དང་ཐན་པའི་དཀའ་ངལ་རིམ་པར་འཕྲད་ཡོད་སྟབས་གོ་ལ་སྲུང་སྐྱོབ་ཆེད་རྒྱལ་སྤྱིའི་འགན་འཁྲིའི་ལས་དོན་གོང་འཕེལ་གཏོང་དགོས་པའི་བཀའ་སློབ་གནང་ཡང་ཡོད་འདུག ལྷོ་ཕྱོགས་ཀྱི་མཛད་འཆར་ལེགས་པར་གྲུབ་རྗེས་ཕྱི་ཚེས་༥ཉིན་༧གོང་ས་མཆོག་ཕྱིར་བཞུགས་སྒར་དུ་ཕེབས་ཡོད་པ་རེད།
ཁ་ཡར་གྲག་༧་གོང་ས་མཆོག་དང་ཁ་མར་གྲག་༧གོང་ས་མཆོག་ལས་མི་ཕན་པས། འདི་ནི་ནང་པ་ཡིན་ཚུན་ཆུད་ཀྱི་འོས་འགན་ཡིན་པས་སྤྱོད་པ་འཚེ་བ་མེད་པ་དང། ལྟ་བ་རྟེན་འབྱུང་གི་ཉམས་ལེན་མཐར་འཁྱོལ་བྱེད་དགོས་པ་དེ་རེད། དེ་ལྟར་མ་བྱུང་ནའང་གཞན་ལ་གནོད་པ་མི་བྱེད་པ་དེ་རྒྱུན་འཇགས་ཐུབ་དགོས་པ་དེ་འདོད།
སྐྱབས་མགོན་ཡེ་ཤེས་ནོར་བུའི་སྐུ་ཚེ་བརྟན་པར་སྨོན ཁོང་གི་མཛད་འཕྲིན་ཕྱོགས་བཅུར་རྒྱས་པར་ཤོག
ཆོས་ལུགས་དང་རྒྱལ་ཁབ་ཚོགས་པ་མི་སྒེར་བཅས་ནས་སོ་སོ་རང་ཉིད་ཀྱི་ཁེ་ཕན་ལ་མི་བསམ་པར་སྤྱི་པའི་ལས་དོན་ལ་ཐུགས་སེམས་བསྐྱེད་ན་རང་བཞིན་གྱི་གོ་ལ་འདི་འཚེ་བ་མེད་པའི་གནས་མལ་བཟང་པོ་ཞིག་ཡོང་བར་ངེས།
འདི་ནི་༧གོང་ས་མཆོག་གིས་དབུས་འཛམ་གླིང་དབུ་འཁྲིད་ཚང་མའི་འོས་འགན་དང་ཐུགས་སྨོན་ཞིག་ཀྱང་རེད།
མི་སྒེར་གྱི་གུས་བསྐུར་དང་བརྩི་ཐོང་བྱེད་དགོས་པའི་བཀའ་སློབ་ཞིག་ཀྱང་རེད།
འཛམ་གླིང་ཞི་བདེའི་དོན་ཆེན་འདིར་སྙིང་དབུས་ནས་དགའ་བསུ་དང་ཡིད་རང་བཀའ་དྲིན་ལ་རྗེས་དྲན་ཡོད།