སྐད་ཡིག་བགྲོ་གླེང་ཞིག་གི་གཏམ་བཤད་ཡི་གེར་ཕབ་པ།
ཅི་ཞིག་གི་སེམས་ཚོར་མ་ནོན་པར། ན་ཟུག་མ་སྲོན་པར་ང་ཚོས་ཚོད་ཚོད་ལ་བོད་སྐད་གཙང་མ་འཆད་དགོས་ཞེས་ཡང་དང་བསྐྱར་དུ་གླེང་བ་ན། ཁ་ཤས་ཤིག་གི་སེམས་ལ་དེ་ནི་དགོས་མཁོ་མེད་པའི་ལས་ཀ་ལྷག་མ་ཞིག་དང་། སེམས་ཁྲལ་ཐོལ་བ་ཞིག་ཡིན་པར་བསམ་སྲིད་ལ། ཡང་བོད་སྐད་གཙང་མ་བཤད་ན་ཅི་ཞིག་ལ་ཕན་པ་དང་། མ་བཤད་ན་གང་ཞིག་ལ་གནོད་དམ་སྙམ་པའི་དྲི་བ་ཞིག་ཀྱང་སེམས་ཀྱི་གཏིང་ཞབས་སུ་ངང་ངམ་ཤུགས་ཀྱིས་འཁོར་སྲིད། ཡིན་ནའང་། བསམ་ཚུལ་དེ་རིགས་ནི་སྣང་མེད་དུ་གཏན་ནས་འཇོག་མི་ཉན་པའི་ནོར་འཁྲུལ་ཞིག་ཡིན་པར་མ་ཟད། ནོར་འཁྲུལ་ནང་ནས་ཀྱང་ནོར་འཁྲུལ་ཚབས་ཆེན་ཞིག་ཡིན་པ་ཤེས་དགོས་ངེས་ཡིན། ནོར་འཁྲུལ་ཚབས་ཆེན་ཡིན་པའི་རྒྱུ་མཚན་ཡང་མིག་སྔའི་གནས་ལུགས་ལ་ཡིད་འཇོག་བྱ་བའི་མི་མཚན་ཉིད་པ་ཞིག་ཡིན་ཚེ། ལུང་དང་རིགས་པ་བརྩེགས་ནས་སྒྲུབ་མི་དགོས་ལ། དཔེ་དང་དཔེ་འཇོག་སྤུངས་ནས་སྟོན་མི་དགོས་པར་སྐད་ཆ་འཆད་ཐེངས་གཅིག་གིས་ངེས་ཤེས་འདྲོངས་ཐུབ་ངེས་ཡིན། ང་ཚོ་འཚོ་སྡོད་ཀྱི་གོ་ལ་རིལ་བོའི་སྟེང་དུ་གནས་བཅོས་པའི་ཤར་ནུབ་ཀྱི་མི་རིགས་གང་དང་གང་ཡིན་རུང་། ཁོ་ཚོའི་ཕན་ཚུན་ཁྱད་པར་འབྱེད་བྱེད་གཙོ་བོ་དེ་རང་རང་གི་སྐད་དང་ཡི་གེའི་སྟེང་ནས་དབྱེ་དགོས་པ་ལས། ས་ཁྲའི་ཐིག་རིས་ཀྱི་ལྷོ་ནུབ་གང་ཡིན་དང་། ཡང་ན། མིའི་གདོང་བ་དཀར་ནག་དང་། གཟུགས་པོའི་རིང་ཐུང་གི་ཆ་ནས་འཇོག་གིན་མེད་པ་འདིར་གསལ་གསལ་ཐིང་ཐིང་དང་གཅིག་གཅིག་གཉིས་གཉིས་འཆད་དགོས་པ་ཞིག་ག་ལ་ཡིན།
ང་ཚོས་ང་ཚོ་བོད་ཟེར་བའི་མི་རིགས་ཤིག་འཛམ་བུ་གླིང་འདིའི་སྒང་ལ་ཡོད་པ་རེད་ཅེས་མི་གཞན་ལ་འགྲེལ་བཤད་རྒྱག་དུས། ང་ཚོར་བོད་མི་རིགས་ཀྱི་ངོ་བོ་མཚོན་པའི་ཁྱད་པར་མ་འདྲ་བ་ཞིག་སྟོན་རྒྱུ་ཡོད་དགོས་པ་རེད། དེ་འདྲའི་ཁྱད་པར་དེ་ངས་གོང་དུ་བཤད་པ་བཞིན་གདོང་བ་གོར་གོར་དང་། ཤ་མདོག་དཀར་ནག གཟུགས་པོ་རིང་ཐུང་ལྟ་བུས་ནམ་ཡང་སྒྲུབ་བྱེད་མི་ཐོངས་ལ། བོད་མི་རིགས་ནི་མཐོ་སྒང་ན་ཡོད་པའི་མི་རིགས་ཤིག་རེད་ཅེས་པ་ཙམ་གྱིས་ཀྱང་བོད་གང་དུ་གནས་པའི་ཕྱོགས་ཙམ་ལས། དེས་བོད་མི་རིགས་ཀྱི་ངོ་བོ་ཚབ་མཚོན་ཐུབ་པའི་འགྲེལ་བཤད་ཡིད་ངོར་འབབ་པ་ཞིག་སྐྱོན་ཐུབ་མེད། དེའི་ཕྱིར། བོད་མི་རིགས་ཀྱི་གཞི་རྩའི་ངོ་བོ་འཚོལ་བའི་དྲི་ལན་གང་ཞིག་དགོས་རུང་ལོ་ངོ་སྟོང་ཕྲག་མང་བོའི་ལོ་རྒྱུས་ཀྱི་རང་བཞིན་མངའ་བའི་སྐད་དང་ཡི་གེ་འདིའི་སྟེང་ནས་འཆད་དགོས་པ་རེད། དེར་བརྟེན། མི་རིགས་དེ་དང་དེའི་སྐད་ཡིག་དང་སྐད་ཡིག་དེའི་བདག་པོ་མི་རིགས་གཉིས་ནམ་ཡང་ཕན་ཚུན་ངོ་བོ་གཅིག་ཏུ་གནས་དགོ་ས་པ་ལས། བོད་མི་རིགས་མེད་ན་བོད་ཀྱི་སྐད་ཡིག་གནས་ཐབས་མེད་ལ། བོད་ཀྱི་སྐད་ཡིག་མེད་ན་བོད་མི་རིགས་དེ་བས་ཀྱང་གནས་ཐབས་མེད།
ངས་འདིར་《འཛམ་གླིང་སྐད་ཡིག་གི་སྐྱེ་འཆིའི་ལོ་རྒྱུས་》ཁྲོད་ནས་དཔེ་མཚོན་ཞིག་བཀོད་དེ་བཤད་ན། ཁ་ས་པེའི་(Kasabe)ཟེར་བའི་སྐད་རིགས་དེ་ཕྱི་ལོ་༡༩༩༥ལོའི་ཟླ་བ་༡༡པའི་ཚེས་༤ཉིན་ད་དུང་གསོན་པོ་ཡིན་ལ། ཚེས་༥ཉིན་ཤི་བར་གྱུར་པ་རེད་ཟེར། དེ་ཇི་ལྟར་ཤི་བར་གྱུར་པ་རེད་ཅེ་ན། དེའི་ལན་ཡང་སྟབས་བདེ་བོར་སྨྲ་ཐུབ་པ་ཞིག་སྟེ། ཁ་ས་པེའི་སྐད་སྨྲ་བའི་མི་རྣམས་ཀྱི་ནང་ནས་ཆེས་རྗེས་མ་དེ་པོ་གོམ་(Bogon)ཞེས་པ་དེ་རེད། འཛམ་བུ་གླིང་ན་སྐད་དེ་སྨྲ་མཁན་མི་གཅིག་པོ་དེ་ལས་མེད། མི་དེ་༡༩༩༥ལོའི་ཟླ་བ༡༡པའི་ཚེས་༥་ཉིན་ཤི་བར་གྱུར་པས། ད་གཟོད་ཁ་ས་པེའི་སྐད་ཀྱང་ཁོ་དང་མཉམ་དུ་ཕྱི་མའི་ཡུལ་དུ་བུད་སོང་བར་སྐད། དཔེ་མཚོན་འདིའི་སྟེང་ནས་ང་ཚོར་ངོས་ཟིན་ཐོབ་སླ་བ་ཞིག་ནི། ང་ཚོས་བོད་ཀྱི་སྐད་ཡིག་ལ་བདག་པོ་ཡག་པོ་ཞིག་རྒྱག་མ་ཐུབ་པར། ནམ་རྒྱུན་སྐད་ཆའི་ནང་དུ་(དབྱིན་ཇི་དང་ཧིན་དྷུ། རྒྱ་སྐད་གསུམ་ནི་ད་ལྟའི་འུ་ཚོའི་བོད་སྐད་ལ་དཔུང་འཇུག་ཐེབས་པའི་སྐད་ཡིག་གསུམ་ཡིན་ལ། དེ་ཡང་ཕྱི་སྡོད་བོད་མི་ཚོས་གཙོ་བོ་དབྱིན་ཇི་དང་ཧིན་དྷུའི་སྐད་ཡིག་བསྲེས་སྦྱོར་བྱེད་ཀྱིན་ཡོད་ལ། གཞིས་སྡོད་བོད་མི་ཚོས་གཙོ་ཆེར་རྒྱའི་སྐད་ཡིག་བསྲེས་སྦྱོར་བྱེད་ཀྱིན་ཡོད། )གཞན་གྱི་ཐ་སྙད་མང་བོ་ཞིག་བསྲེས་ཏེ་སྦྲགས་སྐད་རྐྱང་བར་གོམས་པ་ཡིན་ན། མཚམས་ཤིག་ནས་བོད་སྐད་ནི་གཞི་འཛིན་ས་གང་ཡང་མེད་པའི་སྐད་ཡིག་ཅིག་མི་ཆགས་པའི་ཁ་ཚོན་གཅོད་དཀའ་བར་ངེས་པ་དེ་ཡིན། དེ་དུས་བོད་སྐད་འཆད་མི་ཤེས་པའི་བོད་པ་ག་ཚོད་ཡོད་ནའང་། བོད་ཀྱི་སྐད་དེ་གཏན་ནས་མེད་པར་ཆགས་འགྲོ་ངེས་ཡིན་ལ། དེ་དང་མཉམ་དུ་བོད་མི་རིགས་ཟེར་བའང་མིང་ཙམ་ལས་འདི་རེད་ཅེས་མཛུབ་མོ་འཛུགས་ས་ཞིག་གཏན་ནས་རྙེད་རེ་མེད། དཔེར་ན། ངས་གོང་དུ་བཤད་པའི་ཁ་ས་པེའི་(Kasabe)སྐད་དེ་བཤད་མཁན་གྱི་མི་(Bogon)ཟེར་བ་དེ་ཤི་བ་དང་། དེའི་ཤུལ་ན་སྲིང་མོ་ཞིག་ཡོད་ཀྱང་དེས་ཁ་ས་པེའི་སྐད་ཉན་པ་ཙམ་ལས་སྨྲ་མ་ཤེས་པ་དང་། བུ་དང་ཚ་བོ་རྣམས་ཀྱི་ནང་ན་ནི་སྐད་དེ་ཤེས་མཁན་གཅིག་ཀྱང་མེད་པས་ཁ་ས་པེའི་(Kasabe)སྐད་དེ་སའི་གོ་ལའི་སྟེང་ནས་གཏན་ནས་མེད་པར་གྱུར་པ་ལྟ་བུ་རེད།
གོང་དུ་བརྗོད་པའི་དཔེ་མཚོན་ཅན་གྱི་སྐད་ཆ་དེས། སའི་གོ་ལའི་ཁྱིམ་ཚང་ཆེན་པོ་འདིའི་ནང་ནས་ང་ཚོའི་བོད་མི་རིགས་འདི་ཡུན་རིང་བོ་ཞིག་ལ་གནས་དགོས་པར་འདོད་ན། རྩ་བའི་ཆ་རྐྱེན་བོད་ཀྱི་སྐད་ཡིག་ལ་བདག་པོ་སྔ་ན་མེད་པ་ཞིག་རྒྱག་དགོས་པ་ལས། དེ་ལས་ལྡོག་ཚེ་བོད་མི་རིགས་ལ་འཆི་ལམ་ཁོ་ན་ལས་སྙེག་ས་གཞན་མེད་པའི་བརྡ་ལན་སྐྱེལ་གྱིན་ཡོད། རྒྱུ་མཚན་དེ་དག་ལ་བརྟེན་ནས། ང་ཚོ་སུ་ཡིན་རུང་། དེང་སང་བོད་མི་རིགས་འདི་ཧ་ཅང་ཉེན་ཁ་ཅན་གྱི་ས་མཚམས་ཤིག་ན་ཡོད་པ་ཚོར་བས་ཟིན་པའི་སྒོ་ནས། བོད་མི་རིགས་ལ་ཤ་ཞེན་དང་། བརྩེ་བ་ཡོད་དགོས་པ་ཧ་ཅང་གི་གལ་ཆེན་པོ་རེད། ཤ་ཞེན་དང་བརྩེ་བ་དེའང་ང་རང་བོད་མི་རིགས་ལ་དགའ་བོ་ཡོད་ཅེས་ཁ་ནས་ལབ་པ་ཙམ་གྱིས་ག་ལ་འཐུས། གོམ་པ་སྤོ་ཤེས་ཤིང་། བསམ་བློ་གཏོང་ཤེས་པའི་ང་ཚོ་བོད་མི་རྒན་དར་གཞོན་གསུམ་ཚང་མའི་རང་སྟེང་ན་རང་བཞིན་གྱིས་སྒོར་མོ་ཕོན་ཆེན་པོ་སྤྲད་ནས་ཉོ་མི་དགོས་ལ། དཀའ་ལས་ཤུགས་ཆེན་པོ་བརྒྱབ་ནས་འཚོལ་མི་དགོས་པར་བོད་མི་རིགས་ཀྱི་ངོ་བོ་སྲུང་སྐྱོབ་ཐུབ་པའི་བྱེད་ཐབས་ནུས་པ་ཅན་ཞིག་ཡོད་པ་རེད། དེ་ཡང་རང་སྟེང་དུ་ཤིག་བཙལ་བཙལ་བྱེད་མི་དགོས་པར། རང་རང་གིས་བོད་སྐད་གཙང་མ་ཞིག་ཁ་ནས་འཆད་རྒྱུ་དེ་རེེད། སྐད་ཆ་ཞིག་ཁ་ནས་འཆད་པ་ལ་དོ་སྣང་བྱས་མ་བྱས་ཙམ་ལས་དེ་ལ་འགྲོ་སོང་དང་དཀའ་ལས་ཐོལ་བ་ཞིག་མེད་པ་སུས་ཀྱང་ཁས་ལེན་ཐུབ། དེར་བརྟེན། ང་ཚོ་སུ་ཡིན་རུང་། བོད་སྐད་གཙང་མ་འཆད་པར་འབད་བརྩོན་དང་དོ་སྣང་བྱེད་དགོས་པ་ལས་སྣང་ཆུང་དང་ལྷོད་གཡེང་གཏན་ནས་གཏོང་མི་རུང་།
སི་ཏ་ལེན་གྱིས། མི་རིགས་ཤིག་རྩ་མེད་དུ་གཏོང་ན་ཐོག་མར་མི་རིགས་དེའི་སྐད་དང་ཡི་གེ་རྩ་མེད་དུ་གཏོང་དགོས་པ་རེད་ཅེས་སྨྲ་བའི་གནད་ལ་འཁེལ་བའི་སྡོམ་ཚིག་དེའི་དངོས་ཤུགས་ཀྱི་བསྟན་དོན་ལ་བསམ་ནས། ད་ལྟའི་བོད་ཀྱི་སྐད་ཡིག་ལ་ཕྲད་དང་འཕྲད་ཀྱིན་པའི་ཕྱིའི་འགལ་རྐྱེན་ཆེ་ཕྲ་ཆུང་རིགས་ལ་གདོང་ལེན་བྱ་བའི་ཆོད་སེམས་དང་སྙིང་སྟོབས་བགོས་ཏེ། བོད་མི་སྤྱི་བོ་གནམ་བསྟན་ཚང་མ་བོད་སྐད་གཙང་མའི་རྒྱུན་ལ་ཐུན་མོང་དུ་ལོངས་སྤྱོད་པར་ཤོག་ཅེས་གནམ་ས་འགས་པའི་ཀི་སྒྲ་ཡང་ཡང་སྒྲོག་གིན་ཡོད།
ཕྱི་ལོ་༢༠༡༠ ཟླ་ ༨ ཚེས་ ༡༦ ཉིན་རང་ཤག་ཏུ།
བོད་ཀྱི་དུས་བབ་ཟིན་བྲིས་ལས་བཤུས།
![This satellite image shows Hurricane Melissa southeast of Jamaica at 12:10 GMT on October 27, 2025 [AFP]](https://tibettimes.net/wp-content/uploads/2025/10/Screenshot-2025-10-28-at-5.13.58-PM-360x180.png)
མིད་པ་འགག་རག་ཏུ་བཤད་ཀྱང་ཉན་ནི་ཞིག་མི་རྙེད་ཡ།
གྲོགས་པོ་མེ་ལགས་ཀྱི་རང་མི་རིགས་ཀྱི་ལས་དབང་ལ་དྲན་སྐུལ་གྱི་རྩོམ་ཡིག་སྤེལ་བར་ཐུགས་རྗེ་ཆེ་ཞུ་བ་དང་ཆབས་ཅིག་སྐུ་ཉིད་ཡང་བོད་དུང་བ་ཞིག་ཡིན་པའི་ཡིད་ཆས་ཡོད།
བསྲེས་མའི་སྐད་བཤད་མི་ཤེས་ན་གཞི་ཆག་འདི་ཚོའི་མྱི་གྲལ་ལ་མི་འཇོག་
ཚུལ་དེ་མ་དོར་བར་དུ་བསྲེས་མའི་སྐད་མི་བཤད་ག་མེད་ཡིན
་་་་ དེ་ཡང་ཕྱི་སྡོད་བོད་མི་ཚོས་གཙོ་བོ་དབྱིན་ཇི་དང་ཧིན་དྷུའི་སྐད་ཡིག་བསྲེས་སྦྱོར་བྱེད་ཀྱིན་ཡོད་ལ། གཞིས་སྡོད་བོད་མི་ཚོས་གཙོ་ཆེར་རྒྱའི་སྐད་ཡིག་བསྲེས་སྦྱོར་བྱེད་ཀྱིན་ཡོད། ་་་
གསུངས་པ་བཞིན་ད་ལྟ་ནས་ཡོ་སྲོང་གང་ཐུབ་བྱེད་ན་མི་ལེགས་སམ།