རྒྱ་ནག་གཞུང་གིས་རྔ་པ་བོད་རིགས་རང་སྐྱོང་ཁུལ་གྱི་རྩོམ་པ་པོ་དང་དགེ་རྒན། སློབ་མ། དགེ་འདུན་པ་བཅས་ཁྱོན་བསྡོམས་བོད་མི་ ༡༤ ཙམ་འཛིན་བཟུང་བྱས་ཤིང་། མི་གཉིས་ལ་ཁྲིམས་ཐག་བཅད་ཡོད་པ་དང་། གཞན་དག་ཚང་མ་མུ་མཐུད་བཀག་ཉར་བྱས་ཡོད་འདུག
ལོ་སྔ་ཕྱིར་བོད་ཆོལ་གསུམ་གྱི་ཤེས་ཡོན་པ་དང་རྩོམ་པ་པོ། དགེ་རྒན་དང་སློབ་མ། དགེ་འདུན་པ་དང་ཚོང་པ། གཞས་པ་དང་ཁོར་ཡུག་སྲུང་སྐྱོབ་པ་སོགས་བོད་མིའི་སྤྱི་ཚོགས་ཁྲོད་མི་ནུས་པ་ཅན་མང་པོ་ཞིག་རྒྱ་གཞུང་གིས་ཆབ་སྲིད་ཀྱི་ཉེས་མིང་སྣ་ཚོགས་བཏགས་ཏེ། འཛིན་བཟུང་བཙོན་འཇུག་དང་ཁྲིམས་ཆད། གར་སོང་ཆ་མེད་ཀྱི་གནས་སྟངས་ཆགས་པ་སོགས་ཡ་ང་བའི་གནས་ཚུལ་མང་དག་ཅིག་ཡོང་གི་ཡོད་པ་ལྟར། རྔ་པ་ས་ཁུལ་ནས་འཛིན་བཟུང་བྱས་པའི་བོད་མི་མང་དག་ཅིག་ཀྱང་ད་ཆར་གར་ཡོད་ཅི་བྱུང་གི་གནས་ཚུལ་ཤེས་རྟོགས་ཐུབ་མི་འདུག
ཀིརྟི་བྱེས་བ་གྲྭ་ཚང་གི་གྲྭ་ཚེ་རིང་ལགས་ཀྱིས་རྔ་པ་ས་ཁུལ་ནས་འཛིན་བཟུང་བྱས་པ་དག་གི་སྐོར་ངོ་སྤྲོད་གནང་དོན། འདི་ལོ་ཕྱི་ཟླ་ ༣ པ་ནས་བཟུང་རྒྱ་ནག་གཞུང་གིས་རྔ་པ་བོད་རིགས་རང་སྐྱོང་ཁུལ་གྱི་འབར་ཁམས་མི་རིགས་མཐོ་འབྲིང་སློབ་གྲྭའི་བསོད་ནམས་དང་ཀིརྟི་སྐྱབས། རྡོ་ལོ། བསྟན་པེ། ཆོས་འཕེལ་བཅས་དགེ་རྒན་ལྔ་དང་། ༼ གནམ་ལྕགས་ཚགས་པར ༽ གྱི་རྩོམ་སྒྲིག་པ་བསོད་ནམས་རིན་ཆེན་དང་བསོད་ནམས་དོན་འགྲུབ། ཡར་རྒྱས། དྲག་ལྡན་བཅས་སློབ་མ་བཞི་བཅས་དགེ་སློབ་ ༩ འཛིན་བཟུང་བྱས་ཡོད་ལ། ཉེ་བའི་ཆར་སློབ་མ་བསོད་ནམས་རིན་ཆེན་དང་ཡར་རྒྱས་གཉིས་ལ་ལོ་གཉིས་རེ་ཡི་ཁྲིམས་ཐག་བཅད་ཟིན་སྐོར་ཕྱིར་བསྒྲགས་བྱས་ཡོད་ཀྱང་། སློབ་མ་བསོད་ནམས་དོན་འགྲུབ་མུ་མཐུད་བཀག་ཉར་དང་། དྲག་ལྡན་གྱི་གནས་ཚུལ་ཅི་ཡང་ཤེས་རྟོགས་མི་འདུག དགེ་རྒན་རྣམས་ལ་རྒྱ་ནག་གཞུང་ཕྱོགས་ཀྱིས་གོ་སྒྲིག་འོག་ཁྲིམས་བཤེར་བྱེད་ཀྱིན་ཡོད་ནའང་བཟང་ཕྱོགས་ཀྱི་གྲུབ་འབྲས་ཤིག་ཐོན་དཀའ་བའི་གནས་སུ་གྱར་འདུག་ཅེས་བརྗོད་བྱུང་།
ཡང་ཁོང་གིས། དེ་བཞིན་༼ དུས་རབས་ཀྱི་ང་ ༽ ཞེས་པའི་རྩོམ་སྒྲིག་པ་འཇང་རྩེ་དོན་གོ་དང་བུ་ངྷ། སྐལ་བཟང་སྦྱིན་པ། ནུབ་བྱང་མི་རིགས་སློབ་ཆེན་གྱི་ཞིབ་འཇུག་སློབ་མ་ཐེའུ་རང་། སྒོ་མང་གྲྭ་ཚང་གི་གྲྭ་འབྲོག་རུ་ཚུལ་ཁྲིམས་བཅས་བསྡོམས་མི་ ༡༤ ལྷག་འཛིན་བཟུང་བྱས་ཡོད་པ་རེད། དེའི་ཁྲོད་ཀྱི་འབྲོག་རུ་ཚུལ་ཁྲིམས་དང་དགེ་རྒན་རྡོ་ལོ་གཉིས་ལས་གཞན་ཚང་མ་རྔ་པ་རང་གི་མི་ཡིན་འདུག ཉེ་བའི་ཆར་གོང་གསལ་འཛིན་བཟུང་བྱས་པའི་ཁྲོད་ཀྱི་མི་སྣ་ཁག་ཅིག་གིས་ཁྲིམས་རྩོད་པ་གླས་ཏེ་ཁྲིམས་བཤེར་བྱ་འཆར་ཡོད་ཀྱང་། རྒྱ་གཞུང་གིས་ས་གནས་རང་གི་ཁྲིམས་རྩོད་པ་ལས་གཞན་གདན་ཞུ་བྱེད་མི་ཆོག་བཀའ་རྒྱ་བཏང་འདུག་ལ། ཉེ་ཆར་ཁོང་ཚོ་སུ་ལའང་ཐུག་འཕྲད་ཀྱི་གོ་སྐབས་སྤྲོད་ཀྱི་མི་འདུག ཞེས་བརྗོད་བྱུང་།
གསར་འགོད་པ། དོན་གོ
གསལ་བཤད་བྱེད་རྒྱུ་ཞིག་ལ། འཇང་རྩེ་དོན་ཁོ་《དུས་རབས་ཀྱི་ང་》དུས་དེབ་ཀྱི་རྩོམ་སྒྲིག་པ་མ་རེད། དེ་མིན་འདིར་བཀོད་པ་རྣམས་རྔ་པ་རང་སྐྱོང་ཁུལ་ཁོངས་ནས་ཤེས་ཡོན་ཅན་མང་པོ་ཞིག་འཛིན་བཟུང་བཀག་ཉར་བྱས་པ་ལས་ཁོ་བོས་འདི་ནས་ཤེས་རྟོགས་བྱུང་བ་ཁག་ཅིག་ཡིན་པ་ཀློག་པ་པོས་དགོངས་འཇགས་འཚལ།
སྐབས་ཤིག་བོད་ལ་རང་དབང་རང་བཙན་ཆ་ཚང་ཐོབ་ན་ཡང་བོད་མི་རིགས་ཀྱི་རིག་གཞུང་སྲུང་སྐྱོབ་ཐུབ་པའི་མི་ཚང་མ་མེད་པ་ཆགས་འགྲོ་བ་འདུག
དེ་དུས་བོད་རང་དབང་རང་བཙན་ཡིན་ཀྱང་དགའ་རྒྱུ་གང་ཡང་ཡོད་པ་མ་རེད།
འདི་རྒྱ་ནག་པོ་ལྟས་ངན་དེས་བོད་མི་རིགས་ཀྱི་ངོ་བོ་མེད་པར་བཟོ་བའི་ཐབས་ལམ་ཞིག
རིགས་གཞུང་སྲུང་སྐྱོབས་མི་ཐུབ་ན་མི་རིགས་ཀྱི་ངོ་བོ་རྦད་དེ་བརླགས་ཚར་བ་རེད།
ཟླ་ཤས་སྔོན་ནས་གནས་ཚུལ་འདི་ཨེ་་རླུང་ཚང་ནས་གོ་མྱོང་།
བོད་ནང་དུ་བུ་རེ་བ་ཅན་དང་རྟ་གོམ་པ་ཅན་ཚང་མར་འཇུ་བཟུང་བྱས་ཚར་ན་འུ་ཚང་གི་ནང་སྙིང་རུལ་བ་རེད། དགྱ་འདི་བ་ཚང་གིས་དམིགས་དོན་ལགཟས་ནས་མི་ལས་དགུ་ལས་ཀྱི་སྲིད་ཇུས་བྱེད་ཐབས་འདི་བཀོལ་ཀྱི་ཡོད་པ་རེད། ཕྱི་ཕྱོགས་སུ་ཡོད་པའི་ཤེས་ཡོན་པ་ཚང་མའི་ནུས་པ་གཅིག་སྒྲིལ་གྱི་དུས་ལ་བབ་འདུག རང་ཉིད་ཀྱི་ཁེ་ཕན་ཁོ་ན་ཙམ་མ་ཡིན་པར་བོད་སྤྱི་ལའང་ཐུགས་སེམས་རྒྱ་ཆེར་བཞེས་རོགས།