ང་ཆུང་དུས་ནས་རྒྱལ་ཁབ་འདི་དང་སེམས་ཐག་ཉེ་པོ་ཡོད།

༸གོང་ས་མཆོག་གིས་ཧང་གྷ་རིའི་མཛད་འཕྲིན་ཡོངས་སུ་གྲུབ་སྟེ། ཕྱི་ཚེས་  ༢༡ ཉིན་འཇར་མན་གྱི་གྲོང་ཁྱེར་ཕཱ་སུའུ་རུ་ཞབས་སོར་བཀོད་ཡོད་པ་དང་། ཉིན་དེར་འཇར་མན་གྱི་གྲོང་ཁྱེར་ཧེ་སེལ་གྱི་མངའ་སྡེ་བློན་ཆེན་ཟུར་པ་ལྕམ་རོལ་ལན་ཌི་ཁོལ་ཆི་མཆོག་ནས་༸གོང་ས་མཆོག་ལ། 2010 Menschen in Europe Award  ཞེས་པའི་གཟེངས་རྟགས་འབུལ་བཞེས་གནང་ཡོད་པ་མ་ཟད། ཁོང་གིས་རྒྱ་ནག་གཞུང་གིས་བོད་ཀྱི་གནད་དོན་སེལ་ཆེད་༸གོང་ས་ཏཱ་ལའི་བླ་མ་མཆོག་དང་ལྷན་དུ་གྲོས་མོལ་བྱ་རྒྱུའི་གོ་སྐབས་བརླག་མི་རུང་སྐོར་དང་། ༧གོང་ས་ཏཱ་ལའི་བླ་མ་དང་ལྷན་དུ་གྲོས་མོལ་བྱས་ཚེ་ཕྱོགས་གཉིས་ལ་ཁེ་ཕན་ཡོད་པར་ཡིད་ཆེས་བྱེད་ཀྱི་ཡོད་པ། འཛམ་གླིང་སྟེང་རང་དབང་ཐོབ་ཟིན་པའི་མི་མང་ཡོངས་ཀྱིས་བོད་མི་རིགས་ལ་རྒྱབ་སྐྱོར་བྱ་དགོས་པའི་འབོད་སྐུལ་སོགས་ཞུས་ཡོད།  

སྐབས་དེར་༸གོང་ས་མཆོག་གིས་ཐེངས་འདིའི་གཟེངས་རྟགས་ཕུལ་མཁན་གྱི་གཞུང་དང་མི་མང་ལ་ཐུགས་རྗེ་ལེགས་གསོལ་དང་འབྲེལ་གསུང་བཤད་གནང་དོན། ང་རང་ཆུང་དུས་ནས་རྒྱལ་ཁབ་འདི་དང་སེམས་ཐག་ཉེ་པོ་ཡོད། ཁྱེད་རང་ཚོས་ཐལ་བའི་དཀྱིལ་ནས་རྒྱལ་ཁབ་གསར་པ་འཛུགས་བྱས་ཐུབ་ཡོད་པ་དང་། རང་ཉིད་ཀྱི་རྒྱལ་ཁབ་ལ་གཏོར་བཤིག་ཚབས་ཆེན་ཕོག་ཟིན་ནའང་དཔལ་འབྱོར་ཐོག་སྟོབས་ཆེན་དང་། མང་གཙོའི་ལམ་ལུགས་བཟང་པོ་ཞིག་སྨིན་ཐུབ་ཡོད་པ་རེད། ཡིན་ནའང་། མ་འོངས་པར་ཁྱེད་རྣམ་པས་ཤེས་ཡོན་གྱི་ལམ་ལུགས་དེ་འགྲོ་བ་མིའི་རིན་ཐང་དང་ཁྱད་ཆོས་ལྡན་པའི་ཐད་ལ་ནུས་པ་མང་ཙམ་འདོན་དགོས་པ་རེད། བཟང་སྤྱོད་ཅེས་པ་འདི་ཆོས་ལུགས་བྱེ་བྲག་པ་ཞིག་ལ་གཞི་བཅོལ་བ་ཞིག་མ་ཡིན་པར། ཆོས་ལུགས་རིས་མེད་ལ་གཞི་རྟེན་བྱས་ཡོད། ཅེས་དང་། བོད་མི་རྣམས་ཀྱི་ངོས་ལ་ཡིད་ཆེས་དང་ཉན་འཇོག་བྱེད་ཀྱི་ཡོད་པ་རེད། ང་རང་ལ་མཚོན་ན་མི་དཀྱུས་མ་ཞིག་ཡིན། བོད་ཀྱི་གནད་དོན་དེ་བོད་མི་ས་ཡ་དྲུག་གི་གནད་དོན་ཞིག་ཆགས་ཡོད། ཡིན་ནའང་། རྒྱ་ནག་གཞུང་གིས་བོད་ཀྱི་གནད་དོན་དེ་ང་རང་མི་སྒེར་གྱི་གནད་དོན་ཞིག་ལ་བཟོ་ཐབས་བྱེད་ཀྱི་ཡོད་པ་རེད། ཅེས་གསུངས་ཡོད།

ཐེངས་འདིའི་འཇར་མན་ནིའི་རྒྱལ་ཁབ་ཀྱི་༸གོང་ས་མཆོག་ལ་ཕུལ་བའི་གཟེངས་རྟགས་འདི་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཟུར་པ་ཀོ་ཧྤེ་ཨན་ནན་དང་འཇར་མན་སྲིད་བློན་ལྕམ་ཨེན་ཇི་ལ་མར་ཁེལ། ཨི་སིརལ་གྱི་སྲིད་འཛིན་ཟུར་པ་ཤི་མོན་ཕེ་རི་སུ་བཅས་ལ་ཕུལ་ཡོད་འདུག་ལ། ཐེངས་འདིར་༸གོང་ས་མཆོག་ལ་འབུལ་བཞེས་གནང་ཡོད་པ་རེད།  

དེ་རིང་༸གོང་ས་མཆོག་པོ་ལན་ཌིའི་ལཱོ་ཝར་སེལ་ལར་ཤི་ཡཱ་འི་རྒྱལ་ས་ཝོར་ཁེལ་ལེ་ཝོ Wroclaw གྲོང་ཁྱེར་གྱི་སྤྱི་ཁྱབ་སྐུ་ཞབས་རཱ་ཧྤལ་ཏྲོ་ཁེལ་རྫལ་ལགས་ཀྱིས་གདན་ཞུ་གནང་བ་ལྟར། པོ་ལན་ཌིའི་སྤྱི་ཚོགས་ལས་འགུལ་ཚོགས་པ་ Polish Social Movement  དབུ་བརྙེས་ཏེ་ལོ་ ༣༠ འཁོར་བའི་དུས་སྟེང་ཆིབས་བསྒྱུར་གྱིས་གདུང་སེམས་མཉམ་སྐྱེད་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་ཡོད། དེ་བཞིན། པོ་ལན་ཌིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་མཇལ་འཕྲད་གནང་ཡོད་ཅིང་། དེ་གའི་ཚོགས་པ་ཁག་གི་སྐུ་ཚབ་དང་ཝོར་ཁེལ་ལེ་ཝོ་སློབ་གྲྭའི་སློབ་ཕྲུག་རྣམས་ལ་གསུང་བཤད་དང་དྲི་བ་དྲིས་ལན་བཅས་གནང་འཆར་ཡོད་འདུག

༢༠༠༨ ལོའི་ཟླ་ ༡༢ པའི་ཚེས་ ༡༠ ཉིན་༸གོང་ས་མཆོག་ལ་པོ་ལན་ཌིའི་གྲོང་ཁྱེར་ཝོར་ཁེལ་ལེ་ཝོ་ཡི་ཆེས་བསྟོད་མི་སེར་གྱི་ཕྱག་འཁྱེར་འབུལ་བཞེས་གནང་ཡོད་ལ། དེ་ནི་འདས་པའི་ལོ་རྒྱུས་ཁྲོད་པོ་ལན་ཌི་མི་མང་གི་དཀའ་སྡུག་ཚད་མེད་མྱངས་པའི་ཉམས་མྱོང་དང་། ༸གོང་ས་མཆོག་གིས་འཛམ་གླིང་ཞི་བདེ་དང་རང་དབང་། མི་རིགས་ཕན་ཚུན་བར་ལ་གུས་བཀུར་དང་མཉམ་གནས་ཀྱི་རླབས་ཆེན་དགོངས་གཞི་དེ་དག་ལ་ངོས་འཛིན་བྱས་ཏེ་འབུལ་བཞེས་གནང་བ་ཞིག་ཡིན་འདུག་ལ། ཐེངས་འདི་ནི་༸གོང་ས་མཆོག་པོ་ལན་ཌི་རྒྱལ་ཁབ་དུ་ཕེབས་ཐེངས་ལྔ་བ་དེ་ཆགས་ཡོད་པ་རེད།

གསར་འགོད་པ། དོན་གོ།