ཟླ་འདིའི་ཕྱི་ཚེས་ ༡༤ ཉིན་ལྷོ་ཨ་ཧྥི་རི་ཀའི་གྲོས་ཚོགས་འཐུས་མི་རྒྱལ་སྲས་མན་གྷོ་སུ་ཐུ་བྷུ་ཐུ་ལེ་ཛི་ Mangosuthu Buthelezi དང༌། སྐུ་ཞབས་མཱ་རའོ་ཨམ་བྷོ་རའོ་སི་ནི་ Dr.Mario Ambriosini སྐུ་ཞབས་སན་ཊོ་ཞི་བི་ཏཱ་ཀཱལ་ཡན་ Ms.santosh Vinita Kalyan གསུམ་གྱིས་ལྷོ་ཨ་ཧྥི་རི་ཀའི་གྲོས་ཚོགས་ནང་བོད་དོན་གླེང་སློང་བྱས་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་ཀྱི་ཚབ་ཞུས་ཏེ། ལྷོ་ཨ་ཧྥི་རི་ཀའི་གྲོས་ཚོགས་འཐུས་མི་དེ་དག་ལ་ཐུགས་རྗེ་ཆེ་ཞུའི་གསུང་འཕྲིན་ཞིག་ཕུལ་ཡོད་པའི་ནང་བཀོད་དོན། ལྷོ་ཨ་ཧྥི་རི་ཀའི་གྲོས་ཚོགས་ནང་སྐུ་ཉིད་ཀྱི་དབུ་ཁྲིད་འོག གྲོས་ཚོགས་འཐུས་མི་ ༨༠ ཙམ་གྱིས་དཔེ་གསར་ཐབས་ལམ་སྤྱད་དེ་བོད་ཀྱི་གནད་དོན་ལ་རྒྱབ་སྐྱོར་གྱི་རྣམ་པ་བསྟན་པའི་ཐོག བོད་དོན་གླེང་བར་གུས་པ་གྲོས་ཚོགས་ཀྱི་ཚོགས་གཙོ་སྤེན་པ་ཚེ་རིང་ནས་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་དང་།
སྐུ་ཉིད་ཉེ་ལམ་རྒྱ་གར་ལྷོ་ཕྱོགས་སྦེལ་ཀོབ་ཏུ་བཙན་བྱོལ་ནང་བོད་མིའི་མང་གཙོ་དབུ་བརྙེས་ཏེ། མི་ལོ་ ༥༠ འཁོར་བའི་དུས་དྲན་སྲུང་བརྩི་ཞུ་བའི་མཛད་སྒོར་ལྷན་ཞུགས་གནང་རྗེས་བོད་དོན་རྒྱབ་སྐྱོར་གྱི་ཆོད་སེམས་ཆེར་བསྐྱེད་ཐོག སྐུ་ཉིད་ནས་གྲོས་ཚོགས་ནང་བོད་ཀྱི་གནད་དོན་གླེང་སློང་གནང་ཕྱོགས་དང་ནང་དོན་བརྗོད་བྱ་གང་ཅིའི་ཐད་ང་ཚོས་རྗེས་སུ་ཡི་རངས་ཞུ་རྒྱུ་མ་ཟད། ང་ཚོར་བློ་སྤོབས་སྐྱེ་གཞི་ཞིག་ཏུའང་གྱུར་ཡོད། མ་འོངས་པར་བོད་ཀྱི་གནད་དོན་སེལ་རྒྱུར་སྲ་བརྟན་དང༌། དོན་ཕན་ལྡན་པའི་ཐབས་ལམ་ཞིག་འཚོལ་སྒྲུབ་གནང་རྒྱུར་སྐུ་ཉིད་ནས་འབད་བརྩོན་མུ་མཐུད་གནང་རྒྱུར་ང་ཚོས་རེ་བ་ཞུ་བཞིན་ཡོད། ཅེས་བོད་གཞུང་དྲ་རྒྱར་བཀོད་འདུག
བསྡུག་སྒྲིག་པ། དཔལ་ལྡན།
