ཆུར་མཆོངས་ཏེ་རང་ཤི་རྒྱག་རྒྱུར་གྲ་སྒྲིག་གཙང་མ་ཡོད།

བདུན་ཕྲག་འགའི་སྔོན་ལ་ངྷ་རམ་ས་ལའི་དབུས་སྣེ་ལེན་ཁང་དེ། ཤེས་རབ་དགའ་ཚལ་སློབ་གླིང་གི་ཉེ་འཁྲིས་ཀྱི་ལས་ཁུངས་གསར་པའི་ནང་སྤོར་ཡོད་སྟབས། འདི་གའི་གསར་འགོད་པས་སྣེ་ལེན་ཁང་གསར་པར་རྒྱུས་ལོན་བྱེད་པའི་ཞོར་དུ་བོད་ནས་གསར་དུ་ཕེབས་མཁན་ཚོར་བཅར་འདྲི་ཞུ་བར་བསྐྱོད། སྣེ་ལེན་ཁང་གསར་པའི་འཛུགས་སྐྲུན་ཧ་ཅང་གཞི་རྒྱ་ཆེ་ཞིང་། ལས་ཁུངས་དང་ལས་ཤག ཉལ་ཁང་དང་ཚོགས་ཁང་སོགས་དྲ་རྒྱས་པོ་བཟོས་ཡོད་ཀྱང་། ད་ཆར་བོད་ནས་གསར་དུ་ཕེབས་ཡོད་པ་ཁ་ཤས་ལས་མི་འདུག་ལ། མ་གཞི་ ༢༠༠༨ ལོའི་ཚུན་ལ་བོད་ནས་ཕེབས་མཁན་ཧ་ཅང་ཉུང་ཉུང་ཆགས་ཏེ། གདན་ས་ཁག་གྲྭ་རྒྱུན་གྱིས་སྟོང་ལ་ཉེ་ཞིང་། སློབ་གྲྭ་ཁག་སློབ་མས་སྟོང་བཞིན་ཡོད་པའི་སྐད་ཆ་ཞིག་གང་སར་ཁྱབ་བཞིན་འདུག  

 གསར་འགོད་པ་ཉེ་ཆར་བོད་ནས་གསར་དུ་ཕེབས་པའི་ཆབ་སྲིད་བཙོན་པ་ཟུར་པ་བཙུན་མ་དཔལ་ལྡན་ཆོས་སྒྲོན་ལགས་སུ་ཐུག་འཕྲད་བྱས་ཏེ། ཁོང་མོ་རྒྱའི་བཙོན་འོག་ཏུ་ཚུད་པའི་སྐོར་ལ་བཅར་འདྲི་ཞུས་སྐབས། སོ་སོ་ངོ་སྤྲོད་དང་བཅས་བརྗོད་དོན། ངའི་ཕ་ཡུལ་ལྷ་ས་སྙེ་མོ་ནས་ཡིན་ཞིང་། ང་ལོ་ ༡༤ ཐོག་ཤུག་གསེབ་བཙུན་དགོན་དུ་ཞུགས་པ་ཡིན། ཕྱི་ལོ་ ༡༩༨༧ དང་ ༡༩༨༨ ནང་ལྷ་སར་མང་ཚོགས་ཀྱིས་ཞི་རྒོལ་བྱས་སྐབས། རྒྱ་གཞུང་གིས་ང་ཚོའི་དགོན་པའི་བཙུན་མ་ ༨༠ ཙམ་ཕྱིར་ཕུད་བཏང་སོང་ལ། ༡༩༩༠ ལོར་ང་ཚོ་བཙུན་མ་ ༦ གིས་ཡང་བསྐྱར་ལྷ་སའི་བར་སྐོར་ནས་ངོ་རྒོལ་སྐད་འབོད་བྱས་སྟབས་འཇུ་བཟུང་བྱས་ཏེ་ལོ་ ༣ རེའི་ཁྲིམས་ཐག་བཅད་པ་དང་། ༡༩༩༣ ལོར་གྲྭ་བཞི་བཙོན་ཁང་ནས་ང་ཚོ་བཙུན་མ་ ༡༣ ཙམ་གྱིས་༧གོང་ས་མཆོག་ལ་བསྟོད་གླུ་དང་བོད་རང་བཙན་གྱི་གླུ་གཞས་བཏང་སྟབས། བསྐྱར་དུ་ལོ་ ༥ ཁ་སྣོན་བྱས་ཏེ་ལོ་ ༨ ཙམ་ལ་བཙོན་འོག་ནས་འདུག་དགོས་བྱུང་སོང་ཟེར།

ཁོང་མོས་བྱེ་བྲག་གིས་ངོ་སྤྲོད་གནང་དོན། ༡༩༩༠ ལོའི་བོད་ལུགས་ཀྱི་ཟླ་ ༧ པའི་ཚེས་ ༨  ཉིན་གྱི་ཞོགས་པར་ང་ཚོ་བཙུན་མ་ ༦ ཙམ་ལྷ་སའི་བར་སྐོར་དུ་སོང་སྟེ། བོད་རང་བཙན་ཡིན། རྒྱ་མི་བོད་ནས་ཕྱིར་སྤོ་གཏོང་དགོས། བོད་ཀྱི་བདག་པོ་བོད་མི་ཡིན། ༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག ཅེས་སྐད་འབོད་བརྒྱབ་པ་ཡིན། བར་སྐོར་ལ་སྐོར་བ་གཅིག་ཙམ་བརྒྱབ་རྗེས་གློ་བུར་དུ་ཉེན་རྟོག་པ་མང་པོ་ཞིག་ཡོང་སྟེ་ང་ཚོར་རུབ་རྡུང་བྱས་ཏེ་དགུ་ཚ་བཙོན་ཁང་དུ་བསྐྱལ་སོང་། དེ་ནས་ཟླ་ ༤ ཙམ་རིང་ཐབས་ལམ་སྣ་ཚོགས་ཐོག་འདྲི་བརྩད་བྱས་ཤིང་། གཙོ་བོ་སྐད་འབོད་ལ་ཡོང་དོན་ཅི་ཡིན་དང་། སུས་སྐུལ་སློང་བྱས་ཡོད་མེད། སྐད་འབོད་ཀྱི་མགོ་ཁྲིད་མཁན་སུ་ཡིན་སོགས་དྲིས་བྱུང་། ལྷག་པར་དུ་སྐད་འབོད་སྐབས་ང་ཚོས་བོད་ཀྱི་རྒྱལ་དར་ཞིག་འཁྱེར་ཡོད་པ་དེའི་ཡོང་ཁུངས་བརྩད་གཅོད་བྱས་སོང་། ང་ཚོས་ཤུག་གསེབ་དགོན་པའི་བཙུན་མ་བགྲེས་སོང་ཞིག་གིས་སྤྲད་སོང་། ད་ལྟ་ཁོང་གྲོངས་ཚར་བ་རེད་ཅེས་ལབ་པ་ཡིན། སྐབས་དེར་ཉེན་རྟོག་པ་ཞིག་གིས་ཁྱོད་ཚོ་སྐྱིད་རྒྱུ་མང་དྲགས་པ་རེད་ཟེར་ནས་ཚོད་མེད་དུ་ཉེས་རྡུང་བཏང་ཞིང་། བཙན་དབང་གིས་ང་ཚོའི་གྱོན་པ་བཤུས་ཏེ་དམར་རྗེན་ཐོག་གློག་རྒྱུག་བཙུགས་སོང་། ཁྲིམས་ཐག་མ་བཅད་གོང་དུ་ང་ཚོར་ཉི་མ་རེ་རེ་བཞིན་འདྲི་གཅོད་དང་ཉེས་རྡུང་གཏོང་གི་འདུག ཅེས་བརྗོད་བྱུང་།

ཡང་ཁོང་མོས་བཙོན་འཇུག་ཁྲིམས་ཐག་བཅད་པའི་སྐོར་བརྗོད་དོན། ལོ་དེའི་ཟླ་ ༡༠ པའི་ཚེས་ ༢༡ ཉིན་ལྷ་ས་དགུ་ཚ་བཙོན་ཁང་དུ་ང་ཚོར་ཁྲིམས་ཐག་བཅད་པ་རེད། སྐབས་དེར་ལོ་ ༡༦ ལ་སོན་མ་ཐག་པའི་བཙུན་མ་སྤེན་པ་སྒྲོལ་དཀར་དང་། འཇིགས་མེད་བདེ་སྐྱིད། ང་རང་བཅས་ལ་ལོ་ ༣ རེའི་ཁྲིམས་ཐག་དང་། རང་ལོ་ ༢༡ ཡིན་པའི་བཙུན་མ་གཡང་འཛོམས་དང་། འོད་ཟེར་ཆོས་སྐྱིད། འཇིགས་མེད་དབྱངས་ཅན་བཅས་ལ་ལོ་ ༧ རེའི་ཁྲིམས་ཐག་བཅད་སོང་། ཁྲིམས་ཐག་བཅད་རྗེས་ང་ཚོ་གྲ་བཞི་བཙོན་ཁང་དུ་སྤར་སོང་ལ། བཙོན་ཁང་དེར་སྒྲིག་གཞི་དོན་ཚན་  ༡༧༣  ཙམ་འདུག ངལ་རྩོལ་བསྒྱུར་བཀོད་ནང་བསྡད་པའི་རིང་དུས་ཚོད་མང་ཤོས་དེ་གཞན་གྱི་གསང་སྤྱོད་གཙང་མ་བཟོ་རུ་འགྲོ་དགོས་ཀྱི་འདུག མ་གཞི་ནས་ང་རང་གཟུགས་པོ་ཆུང་ཆུང་ཡིན་སྟབས། གསང་སྤྱོད་ནང་འཛུལ་ཏེ་སྐྱག་གཅིན་ཕྱི་ལོགས་སུ་འདོན་པ་དང་། རླངས་འཁོར་ནང་ལྡུག་པ་སོགས་ཀྱི་ལས་ཀ་བྱ་དགོས་སྟབས། ཉིན་རྒྱུན་ལུས་པོ་དང་ངོ་གདོང་ཡོངས་སྐྱག་གཅིན་གྱིས་གཡོག་ཡོད་པ་རེད། ཅེས་བརྗོད་བྱུང་།

ཁོང་མོས་མུ་མཐུད་དུ་བརྗོད་རྒྱུར། གྲྭ་བཞི་བཙོན་ཁང་དུ་བཙུན་མ་ ༡༠༧ ཙམ་ཡོད། ང་ཚོས་བཙོན་ཁང་ནང་ལོགས་ནས་ངོ་རྒོལ་ཡང་ཡང་བྱས་ཀྱང་གྲུབ་འབྲས་མི་འདུག དེ་ནས་ངོ་རྒོལ་གྱི་གླུ་གཞས་འཁོར་ཐག་ཏུ་བཅུག་སྟེ་ཕྱི་ལོགས་སུ་གཏོང་ཐབས་བྱས་པ་ཡིན། དགོང་མོ་ཞིག་ལ་གློ་བུར་དུ་དམག་མི་ཡོང་སྟེ་འཁོར་ཐག་ཚང་མ་བཙན་འཕྲོག་བྱས་སོང་། ༡༩༩༣  ལོའི་ཕྱི་ཟླ་ ༨ པའི་ཚེས་ ༢༧ ཉིན་ནི་ང་རང་བཙོན་གྲོལ་འཐོབ་རྒྱུའི་ཉིན་མོར་འཁེལ་ཡོད་སྟབས། ཞོགས་པ་སྔ་བོ་ནས་བཙོན་གྲོགས་ཁ་ཤས་ཀྱིས་ལྐོག་ནས་ང་ལ་ཁ་བཏགས་རེ་སྤྲད་སོང་། འོན་ཀྱང་ང་རང་གི་ཚོར་སྣང་ལ་ང་ད་དུང་ཕྱི་ལོགས་སུ་འགྲོ་ཐུབ་རྒྱུ་མ་རེད་སྙམ་པ་ཞིག་འདུག ཅུང་ཙམ་གྱི་རྗེས་དམག་མི་ཞིག་ཡོང་སྟེ་ཁྱོད་རང་ལོག་ཆོག་གི་མ་རེད་ཟེར། ང་ཚོའི་ངོ་རྒོལ་གླུ་གཞས་འཁོར་ཐག་ཏུ་བཅུག་ཡོད་པའི་ནང་ངའི་སྐད་གདངས་གསལ་པོ་རེད། གླུ་གཞས་དེའི་དབང་གིས་ང་ལ་བསྐྱར་དུ་ལོ་ ༥ འཕར་སྣོན་བྱས་ཤིང་མཐར་ ༡༩༩༨ ལོར་ཀློད་གྲོལ་ཐོབ་སོང་། ཞེས་དང་།  

སྤྱིར་ང་རང་བཙོན་ཁང་ནས་ཀློད་གྲོལ་ཐོབ་རྗེས་རྒྱ་གར་དུ་ཡོང་འདོད་མ་བྱུང་། གང་ཡིན་ཟེར་ན། ངས་སྐྱབས་བཅོལ་བའི་གནས་སྟངས་དེ་ཐབས་སྐྱོ་བོ་ཞིག་ཏུ་མཐོང་གི་ཡོད། རང་གི་ལུང་པ་ནས་ཆོས་ཉམས་ལེན་བྱས་བསྡད་ན་འགྲིག་གི་རེད་དྲན་ཡོད། འོན་ཀྱང་རྒྱ་གཞུང་གིས་ཉིན་དང་ཟླ་བ་བསྟུད་དེ་སུན་གཙེར་བཟོས་ཡོང་གི་འདུག ༢༠༠༨ ལོར་ལྷ་སར་ངོ་རྒོལ་བྱུང་སྐབས་ཀྱང་ཉེན་རྟོག་པས་བཙན་ཁྲིད་ཀྱིས་འདྲི་བརྩད་ཡང་ཡང་བྱས་སོང་། མཐར་འུ་ཐུག་སྟེ་སྐྱབས་བཅོལ་དུ་ཡོང་དགོས་བྱུང་སོང་། ང་རང་ཡོང་ཁར་གྲ་སྒྲིག་སྡུག་པོ་ཞིག་བྱས་ཏེ་ཡོང་བ་ཡིན། རྒྱ་གར་དུ་སླེབས་ཐུབ་རྒྱུར་གདེང་ཚོད་གང་ཡང་མེད། གལ་སྲིད་རྒྱ་མིས་འཇུས་པ་ཡིན་ན། ཆུར་མཆོངས་ཏེ་རང་ཤི་རྒྱག་རྒྱུའི་གྲ་སྒྲིག་གཙང་མ་ཡོད། བལ་ཡུལ་དུ་སླེབས་ཏེ་ཚོང་ཁང་ཁག་ཏུ་༧གོང་ས་མཆོག་གི་སྐུ་པར་བཤམས་ཡོད་པ་མཐོང་སྐབས་རྨི་ལམ་ཡིན་ན་སྙམ་པ་ཞིག་བྱུང་སོང་ལ། བོད་ནང་༧གོང་ས་མཆོག་གི་སྐུ་པར་བཤམ་མི་ཆོག་སྟབས་ཞེད་སྣང་ཞིག་ཀྱང་སྐྱེས་ཡོང་གི་འདུག ཞོགས་པ་ཞིག་ལ་བལ་ཡུལ་སྣེ་ལན་ཁང་གི་ཉེ་འཁྲིས་ཀྱི་སློབ་གྲྭའི་ནང་བོད་ཀྱི་རྒྱལ་གླུ་གཏོང་བཞིན་པ་ཐོས་སྐབས་མིག་ཆུ་ཤོར་སོང་། ཞེས་བརྗོད་སོང་།

མཇུག་མཐར་ཁོང་མོར་ངྷ་རམ་ས་ལར་འབྱོར་སྐབས་སེམས་ཚོར་གང་འདྲ་བྱུང་ཡོད་པ་དང་། མ་འོངས་པར་དམིགས་ཡུལ་གང་འདྲ་ཡོད་མེད་དྲིས་སྐབས། ངྷ་རམ་ས་ལའི་སྣེ་ལེན་ཁང་གསར་པ་འདིར་འབྱོར་ཏེ་འཛུགས་སྐྲུན་འདི་དག་མཐོང་སྐབས། བཙན་བྱོལ་བོད་མི་འདི་དག་ཕྱིར་བོད་དུ་ལོག་རྒྱུའི་བསམ་བློ་མི་འདུག་སྙམ་པའི་བློ་ཕམ་ཞིག་བྱུང་སོང་། དེ་ང་གཅིག་པུ་མ་རེད་འདི་ལྟ་བུའི་བསམ་ཚུལ་ཡོད་མཁན་མང་པོ་འདུག ང་ལ་དམིགས་ཡུལ་གང་ཡོད་ཟེར་ན། ང་བཙོན་ཁང་དུ་རྒྱུན་རིང་ལྷག་ཡོད་སྟབས་དུས་ཚོད་མང་པོ་ཞིག་འཕྲོ་བརླག་ཏུ་ཕྱིན་ཚར་བ་རེད། ལྷག་པར་དུ་བཙོན་འོག་ནས་འདུག་རྒྱུ་མང་དྲགས་སྟབས། ངའི་གཟུགས་པོ་ནད་གཅོང་ཆགས་འདུག་ལ། ང་རང་གི་ཀླད་པ་ཡང་ཕལ་ཆེར་ན་ཚ་ཞིག་ཡོད་པ་འདྲ། བསམ་བློ་མང་པོ་གཏོང་ཐུབ་ཀྱི་མི་འདུག ཁུ་སིམ་པོར་བསྡད་ན་ཏོག་ཙམ་ཕན་གྱི་འདུག དམིགས་ཡུལ་ཆེན་པོ་ཡོད་ཀྱང་དེ་བསྒྲུབ་རྒྱུའི་ནུས་པས་འདང་གི་མི་འདུག འོན་ཀྱང་ད་བར་ཉམས་ལེན་གྱི་ཕྱོགས་ནས་འཐུས་ཤོར་དུ་ཕྱིན་ཡོད་པ། དགོན་པ་ཞིག་ལ་ཕྱིན་ཏེ་ནང་ཆོས་ཐོག་སློབ་སྦྱོང་བྱ་རྒྱུ་བྱུང་ན་ཁ་གསབ་བྱ་ཐུབ་རྒྱུ་རེད་དྲན་ཡོད། ཅེས་བརྗོད་སོང་།

གསར་འགོད་པ། དཔལ་ལྡན།