འབྲས་ལྗོངས་མི་མང་གིས་ཀརྨ་པ་མཆོག་རུམ་བཏེགས་དགོན་དུ་ཕེབས་རྒྱུར་རྒྱ་གར་གཞུང་ལ་རེ་སྐུལ་ཞུས་འདུག
རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་གསལ་ལྟར་ན།ཀརྨ་པ་ཕེབས་བསུ་ཚོགས་པ་དང་མཉམ་འབྲེལ་ཚོགས་པ་གཉིས་ཀྱིས་གོ་སྒྲིག་འོག ཟླ་འདིའི་ཚེས་༢༦ཉིན་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་ཡུལ་དེའི་དགོན་སྡེ་ཁག་༦༥ ནས་ཕེབས་པའི་དགེ་འདུན་པ་༣༠༠༠དང་ས་གནས་མི་མང་བཅས་ཁྱོན་མི་ཁྲི་༤ ཙམ་འདུ་འཛོམས་ཐོག་རྒྱ་གར་གཞུང་ལ་གཞི་རྒྱ་ཆེ་བའི་ཞི་བའི་ངོ་རྒོལ་ཞིག་བྱས་ཡོད་ཅིང་།ཐེངས་འདིར་ངོ་རྒོལ་བྱེད་དོན་ནི་དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་བཙན་བྱོལ་དུ་ཕེབས་ཏེ་མི་ལོ་ཧྲིལ་པོ་༡༠ ལྷག་ཕྱིན་ཀྱང་ད་དུང་ཡང་རང་གི་གདན་སར་ཕེབས་ཐུབ་ཀྱི་མེད་སྟབས། མང་ཚོགས་ཀྱིས་དང་བླངས་ཐོག་ཀརྨ་མཆོག་འབྲས་ལྗོངས་རུམ་བཏེགས་དགོན་དུ་གདན་ཞུས་ཀྱིས་ཁྲི་འདོན་དགོས་པའི་འབོད་སྐུལ་ཞུས་པ་ཞིག་རེད།ཉིན་དེར་གོ་སྒྲིག་ཚོགས་ཆུང་གིས་འབྲས་ལྗོངས་མངའ་སྡེ་བློན་ཆེན་གྱི་མཚན་ཐོག་ལ་ཞུ་ཡིག་ཅིག་ཕུལ་པའི་ནང་དུ།མངའ་སྡེ་གཞུང་གི་སྐུ་ཚབ་ཚོགས་པ་ཞིག་སྲིད་བློན་དང་མཇལ་འཕྲད་ཀྱིས་ཕྱི་ལོ་༢༠༡༡ལོར་ཀརྨ་མཆོག་རུམ་བཏེགས་དགོན་དུ་གདན་འདྲེན་ཞུ་དགོས་ཞེས་བཀོད་ཡོད།ད་ཆར་ཀརྨ་པ་མཆོག་ངྷ་ས་བཞུགས་སྒར་ཉེ་འགྲམ་ཁུལ་གྱི་རྒྱུད་སྟོད་གྲྭ་ཚང་དུ་བཞུགས་ཡོད་ལ།སྐུ་ཕྲེང་སྔོན་མའི་གདུལ་བྱ་གཙོ་བོ་ནི་ཨ་རི་དང་འབྲས་ལྗོངས།ཧི་མ་ལ་ཡའི་རི་རྒྱུད་ཁུལ་དུ་ཡོད་འདུག
གསར་འགོད་པ།དཔལ་ལྡན།
བཀའ་བརྒྱུད་བསྟན་པ་རྒྱ་མཚོའི་རྩ་བའི་རྩེ་མོ་གཙུག་གི་ནོར་བུ་༧རྒྱལ་དབང་བཅུ་བདུན་པ་ཆེན་པོ་ཨོ་རྒྱན་འགྲོ་འདུལ་འཕྲིན་ལས་རྡོ་རྗེ་གང་ཉིད། རྗེ་གོང་མའི་བཞུགསགནས་འོག་མིན་ས་ལ་སྤྱོད་པའི་གདན་ས་ཆེན་མོ་༧ཀརྨའི་སྒར་ཆེན་རུམ་བཏེགས་བཤད་སྒྲུབ་ཆོས་འཁོར་གླིང་དུ་ ཞབས་སོར་འཁོད་ནས་ཟབ་རྒྱས་ཆོས་ཀྱི་དབྱར་རྔ་གོ་ལ་ཧྲིལ་པོའི་ཁྱོན་ཀུན་དུ་རྒྱས་པའི་སྨོན་འདུན་རྕེ་གཅིག་ཏུ་ཞུ་ཞུ།
དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་དགོངས་བཞེད་མྱུར་དུ་འགྲུབ་པར་ཤོག
དད་ལྡན་མི་མང་གི་རེ་འདུན་བཞིན་དཔལ་རྒྱལ་བ་ཀརྨ་པ་མཆོག་ཆིབས་བསྒྱུར་བཀའ་དྲིན་ཐུབ་པར་ང་ཚོས་ཀྱང་གསོལ་བ་སྨོན་ལམ་འདེབས་དགོས་པ་རེད།
གདན་ས་རིམ་བཏེགས་ལ་ཆིབས་བསྒྱུར་གནང་ཐུབ་རྒྱུ་ནི་ཁོང་གི་གནས་སྐབས་ཀྱི་མཛད་འཕྲིན་གལ་ཆེ་ཤོས་དེ་རེད།
ཁོང་དང་དད་ལྡན་མི་མང་གི་ཐུགས་རེ་འགྲུབ་པར་ང་ཚོས་ཀྱང་སྨོན་ལམ་ཞུ་དགོས་པ་རེད།
ང་ཚོ་བཙན་བྱོལ་བོད་གཞུང་གིས་བོད་ནང་དུ་ཡོད་པའི་པཎ་ཆེན་རིན་པོ་ཆེན་དང་སྤྲུལ་སྐུ་བསྟན་འཛིན་བདེ་ལེགས་སོགས་བཙན་ལས་གྲོལ་ཐབས་ལྟ་ཅི། ཐ་ན་རང་དབང་ལུང་པ་ནང་ཡོད་པའི་རྐ་མ་པ་མཆོག་ལ་ཡང་རང་དབང་ཡོད་པ་ཞིག་བྱེད་ཐུབ་མེད། རྐ་མ་པ་མཆོག་ནི་རྒྱ་གར་དང་བོད་གཞུང་གཉིས་ཀྱི་བཟང་བཙོན་དང་ཁྱད་ཅི་ཡོད།
འདི་ཨང་དཔུང་བ་མཉམ་གཤིབ་ཀྱི་རྣམ་པ་ཞིག་ཡིན་ལོས་ཆེ། འདོད་པའི་དོན་བཞིན་སྨིན་པའི་རེ་བ་ཡོད། འུ་ཚོར་དགོས་པ་ནི་ཆིག་སྒྲིལ་རེད། ཆོས་ལུགས་ཀྱི་ཆིག་སྒྲིལ། སྐད་ཡིག་གི་ཆིག་སྒྲིལ། འཐའ་འབྲེལ་གྱི་ཆིག་སྒྲིལ། ལོ་རྒྱུས་ཀྱི་ཆིག་སྒྲིལ། གང་དང་གང་ཡིན་ཡང་དགོས་ངེས་རེད།
གསལ་བཤད། ས་གནས་ཉེན་རྟོག་པས་རོབ་རྩིས་བརྒྱབ་ན་ཉིན་དེར་མི་ཁྲི་ ༢༌༥ ལྷག་འཛོམས་ཡོད་ཚུལ་བརྗོད་ཀྱང་། ཁུལ་དེར་གནས་སྡོད་ཡུལ་མི་ཞིག་གིས་བཤད་ན་འདུ་འཛོམས་བྱུང་བའི་གྲངས་འབོར་ནི་ཁྲི་ ༤ ལས་བརྒལ་ཡོད།
གཞིས་བྱས་གཉིས་སུ་ཡོད་པའི་བོད་མི་ཡོད་ཚད་པོའི་༧དཔལ་རྒྱལ་བ་ཀརྨ་པ་མཆོག་ལ་རེ་བ་དང་ཡིད་ཆེས་མང་པོ་ཞིག་བྱེད་བཞིན་ཡོད་དུས་ཁོང་ལ་རང་དབང་གི་ཁོར་ཡུག་ལེགས་པོ་ཞིག་བསྐྲུན་དགོས་པ་དེ་ང་ཚོ་རྗེས་འཇུག་པ་ཚོའི་ཐུན་མོང་གི་ལས་འགན་ཞིག་ཡིན། རང་དབང་གི་ལུང་པ་འདི་ནས་ཁོང་ལ་འདི་འདྲའི་བཙན་བཀག་བྱས་པ་འདི་ནི་མ་འོངས་བོད་མི་རིགས་འདིས་གྱང་གུད་ཞིག་རེད་དེ་བས་ང་ཚོ་ཁོང་ལ་རང་དབང་དགོས་པའི་ལས་འགུལ་ག་འདྲ་ཞིག་སྤེལ་དགོས་ན་དུས་ཐོག་ཏུ་ངེས་པ་ཅན་སྤེལ་དགོས།
གསལ་བསྒྲགས་འདི་ནས་ཁྱོན་མི་གྲང་ཁྲི་༤འདུ་འཛམ་བྱས་ཞེས་པ་དེ་ཅུང་ཟད་ནོར་འདུག་ཁྱོན་མི་གྲང་༢༠༠༠༠༠ལས་ལྷག་འདུག་ཟེར།
སྒྲུབ་རྒྱུད་བསྟན་པའི་མངའ་བདག་དཔལ་༧རྒྱལ་བ་ཀརྨ་པ་མཆོག་གི་སྐུ་ཕྲེང་སྔོན་མའི་འདུལ་བྱ་ཨ་རི་དང་། འབྲས་ལྗོངས། ཧི་མ་ལའི་ས་ཁུལ་ཁག་ཡིན་པའི་དབང་དུ་བཏང་ཡང་། སྐུ་ཕྲེང་འདིའི་འདུལ་བྱ་གཙོ་བོ་ང་ཚོ་བོད་གཞིས་གཉིས་ངེས་པར་ཆག་དགོས་པ་བོད་མི་ཡོངས་ནས་འབད་འབུངས་བྱ་དགོས།
ཁོང་ནི་ང་ཚོའི་བོད་མིའི་མ་འོངས་པའི་རེ་བའི་མིག་ལྟོས་གྱེར་ས་གཙོ་བོ་ཞིག་ཡིན།