ངས་ཁ་སང་ཁེ་ཕན་ཞིག་ཡོང་སྲིད་དམ་ཞེས་པའི་རྩོམ་ཐུང་ཞིག་སྤེལ་བ་ཡིན། རྩོམ་འདིའི་རྒྱབ་ཏུ་གོ་བ་གཏིང་ཟབ་ཅིག་ཡོད་སྙམ། ལ་ལས་ང་༧གོང་ས་མཆོག་ལ་དད་པ་མེད་པ་དང་། བོད་ཀྱི་རྩ་དོན་ལ་གནོད་པ་བྱེད་མཁན་གྱི་ཉིན་སྒྲིབ་ལྟ་བུ་ཞིག་ཏུ་ངོས་འཛིན་བྱས་འདུག དེ་ནི་གནས་ཚུལ་ཡོངས་རྫོགས་མ་ཤེས་པའི་རྟགས་མཚན་ཞིག་རེད།
བསམ་བློ་ཞིབ་མོ་གཏོང་ན་ངའི་སྐད་ཆ་རྒྱུ་མཚན་མེད་པ་ཞིག་མིན། ཡག་པོ་ཉོན་ཨ།
དུས་བབ་ཀྱི་ཀློག་པ་པོ་ཞིག་གིས་ང་ལ་བྱུང་སོང་གི་རྩིས་རྒྱག་སྟངས་ཤེས་ཀྱི་མེད་པ་རེད་ཅེས་བརྗོད་འདུག ཁོས་བརྗོད་གསལ་ལྟར་ན་ང་ཚོས་ཨ་རིར་ཨ་སྒོར་ཁྲི་ལྔ་སྤྲོད་ཀྱི་ཡོད་ནའང་ཚུར་ལ་ལོ་ ལྟར་ཨ་སྒོར་ས་ཡ་འགའ་ཤས་རེག་གི་ཡོད་རེད་ཅེས་བརྗོད་འདུག སྐད་ཆ་འདི་གློ་བུར་དུ་གོ་ཚེ་བདེན་པ་ཞིག་ཏུ་སྣང་སྲིད། ཡིན་ནའང་དངོས་ཡོད་གནས་ཚུལ་དེ་ལས་མགོ་རྙོག་པོ་ཞིག་རེད།
གང་ལྟར་ངས་བྱུང་སོང་གི་རྩིས་གཏིང་ཟབ་ཅིག་བརྒྱབ་སྟེ་རྩོམ་ཐུང་འདི་བྲིས་པ་ཡིན། ད་བར་༧གོང་ས་མཆོག་དང་བོད་མི་རིགས་ཀྱིས་ཨ་རི་དང་ནུབ་ཕྱོགས་རྒྱལ་ཁབ་ཚོར་ཕར་ཆོས་དང་འཇིག་རྟེན་གཉིས་ཀའི་ཐོག་ནས་ཞབས་འདེགས་ཚད་མེད་སྒྲུབ་ཡོད།
དཔེར་ན་བོད་ནང་དུ་ཡོད་པའི་རིན་ཆེན་གཏེར་ཁ་བསྔོག་འདོན་བྱེད་མཁན་གྱི་གཏེར་ཁའི་ཚོང་བདག་ཕལ་མོ་ཆེ་ནུབ་ཕྱོགས་རྒྱལ་ཁབ་ནས་ཡིན་ཅིང་། ཁོང་ཚོས་རྒྱ་ནག་གཞུང་དང་ལག་འབྲེལ་གྱིས་བོད་ཀྱི་གཏེར་དངོས་ཡོངས་རྫོགས་བཏོན་ཏེ་དངུལ་ཨ་སྒོར་ཐེར་འབུམ་མང་པོ་བཟོ་གི་ཡོད་པ་རེད། དེ་བཞིན་ཕྱིའི་སྣོད་ཙམ་དུ་མ་ཟད་ནང་སེམས་ཀྱི་བཅུད་ཀྱང་དེ་འདྲ་རེད།
དཔེར་ ན་བོད་ཀྱི་ཆོས་དང་རིག་གཞུང་བེད་སྤྱོད་གཏོང་སྟེ་དངུལ་བཟོ་མཁན་གྱི་ཚོགས་པ་མང་དག་ཅིག་ནུབ་ཕྱོགས་རྒྱལ་ཁབ་ནང་ཡོད་པ་ང་ཚོ་ཚང་མས་ཤེས་གསལ་རེད། ཐ་ན་མི་སྒེར་ཞིག་ལ་མཚོན་ནའང་བོད་ཀྱི་རིག་གཞུང་བེད་སྤྱོད་གཏོང་སྟེ་དངུལ་བཟོ་ གི་ཡོད་པ་རེད། ཡིད་མི་ཆེས་ན་འབྲེལ་ཐག་འདིར་གཟིགས།
མདོར་ན་བོད་ཀྱི་སྣོད་དང་བཅུད་ བེད་སྤྱོད་གཏོང་སྟེ་ནུབ་ཕྱོགས་རྒྱལ་ཁབ་ཀྱི་གཞུང་སྒེར་ཚོས་དངུལ་ཕོན་ཆེ་བཟོ་བཞིན་པ་ནས་རྒྱ་མཚོའི་ཐིགས་པ་བཞིན་ང་ཚོར་ཆེས་ཉུང་ཤས་ཤིག་སྐྱོབས་གསོའི་མིང་བཏགས་ཏེ་སྤྲོད་ཀྱི་ཡོད་པ་རེད།
དེ་ལ་ང་ཚོས་ད་དུང་ངོམ་སོ་ཞེ་དྲག་བྱེད་ཀྱི་ཡོད་པ་རེད།
ནུབ་ ཕྱོགས་རྒྱལ་ཁབ་ཚོ་ནི་བཙན་རྒྱལ་རིང་ལུགས་དང་མ་རྩ་རིང་ལུགས་ཀྱི་གཤིས་ཀ་གཏིང་ཟབ་ཡོད་སྟབས་བཤུ་གཞོག་གཏོང་རྐྱང་བྱེད་ཀྱི་ཡོད། ཧ་ལས་དགོས་པ་ཞིག་ལ་དེང་སང་ནེ་པ་ལི་ཚོས་ཀྱང་བོད་ཀྱི་ཆོས་དང་རིག་གཞུང་ནས་ དངུལ་བཟོ་གི་ཡོད་པ་རེད།
དཔེར་ན་ཨ་རིའི་ནེའུ་ཡོག་གྲོང་ཁྱེར་གྱི་ཇེཀ་ སེན་ཧེཏ་ས་ཁུལ་དུ་ཟ་ཁང་ཞིག་ཡོད་ཅིང་། ཟ་ཁང་འདི་ནི་ས་ཁུལ་འདིའི་ནང་ནས་ཚོང་ཡག་ཤོས་ཕོག་མཁན་གྱི་ས་ཁང་ཞིག་རེད། ཟ་ཁང་གི་བདག་པོ་ནི་ཤར་པ་ཞིག་རེད། ཟ་ཁང་གི་མིང་ལ་ཧི་མ་ལ་ཡའི་ཟ་ཁང་ཞེས་འབོད་ཀྱི་ཡོད་མོད། ཟ་ཁང་ནང་གི་ཟ་མ་མང་ཆེ་བ་བོད་ཟས་རེད། དེ་བཞིན་ཟ་ཁང་ནང་༧གོང་ས་མཆོག་གི་སྐུ་དཔར་དང་། བོད་ཀྱི་སེམས་ཅན་གཡག་དང་། དེ་བཞིན་བོད་ཀྱི་དགོན་པ་སོགས་ཀྱི་འདྲ་དཔར་མང་པོ་སྦྱར་ཡོད་པ་རེད། ཡིན་ནའང་བོད་ཅེས་པའི་མིང་ཙམ་ཟ་ཁང་ནང་མཐོང་རྒྱུ་མེད་པ་རེད།
དཔེ་ གཞན་དག་ཅིག་འཇོག་ན། ང་ཚོའི་མཐོ་སློབ་ཏུ་ནེ་པ་ལིའམ་བལ་པོའི་སློབ་ཕྲུག་མཐུན་ཚོགས་ཤིག་ཡོད་པ་རེད། སློབ་ཕྲུག་དེ་ཚོའི་གདོང་རིས་ནི་རྒྱ་གར་བ་འདྲ་བོ་མ་གཏོགས་ཤར་པའམ་བོད་པ་འདྲ་ པོ་ཁྱོན་ནས་མེད། མིང་ཡང་ཧིན་དུའི་མིང་དང་ཆོས་ཀྱང་ཧིན་དུའི་ཆོས་རེད། ཁོང་ཚོ་ནི་བོད་པར་ཞེན་ཁོག་སོགས་དམིགས་བསལ་མེད། ཡིན་ནའང་མཐོ་སློབ་ཏུ་ལོ་རེར་ཁོང་ཚོས་ནེ་པ་ལིའི་དུས་སྟོན་ཞིག་སྲུང་བརྩི་ཞུ་གི་ཡོད་ལ། དུས་སྟོན་འདིའི་ཁྱབ་བསྒྲགས་ཆེད་བེད་སྤྱོད་གཏོང་བའི་སྦྱར་ཡིག་གི་འདྲ་དཔར་ནི་མཆོད་རྟེན་བྱ་རུང་ཁ་ཤོར་དང་བོད་ཀྱི་རླུང་རྟ་ཡིན་པར་མ་ཟད། དུས་སྟོན་སྐབས་མོག་མོག་བཟོས་ཏེ་འཚོང་གི་ཡོད་པ་རེད།
གང་ལྟར་བོད་མི་ རིགས་ཀྱིས་ལོ་ངོ་སྟོང་ཕྲག་མོང་པོ་ནས་དཀའ་ལས་བརྒྱབ་སྟེ་བཟོ་སྐྲུན་བྱས་པའི་ ཆོས་དང་རིག་གཞུང་བེད་སྤྱོད་གཏོང་སྟེ་ཕྱི་རྒྱལ་བ་ཚོས་དངུལ་གྲངས་མེད་བཟོ་གི་ཡོད་པ་དེ་ཤེས་དགོས། དེ་དག་ཤེས་པའི་ཐོག་ནས་ང་ཚོས་ད་དུང་སྟོབས་ཆེན་རྒྱལ་ཁབ་ཨ་རི་ལྟ་བུར་ཞལ་འདེབས་སོགས་རྒྱག་གི་ཡོད་ན་ནི་དངོས་གནས་ཧང་སངས་དགོས་པ་ཞིག་རེད།
ཕལ་ཆེར་རང་ལས་གཞན་གཅེས་ཞེས་པའི་ལྟ་བ་དེ་དངོས་སུ་ལག་ལེན་བསྟར་གྱི་ཡོད་སྲིད།
ཆོས་ཕྱོགས་ནས་འཆད་ན་ལྟ་བ་དེ་འདྲ་ཞིག་ལག་བསྟར་བྱེད་པ་ནི་དངོས་གནས་བྱང་ཆུབ་སེམས་པའི་ལས་ཤིག་ཡིན་སྲིད་མོད། འཇིག་རྟེན་ཆབ་སྲིད་བྱ་བཞག་གི་ཐོག་ནས་བརྗོད་ན་ནི་འདྲ་མཉམ་དང་དྲང་བདེན་ཞིག་ཨེ་ཡིན་སྙམ། རང་དང་གཞན་མཉམ་པ་དགོས་པ་མ་གཏོགས་རང་ལས་གཞན་གཅེས་པ་བྱེད་ན་ཡ་མཚན་ཞིག་མི་འདུག་གམ།།
༧གོང་ས་མཆོག་ནས་རང་གི་དད་ལྡན་རྣམ་པས་ཕུལ་བའི་དངུལ་ནས་རྒྱ་ཆ་ ༧༠ ལྷག་བོད་གཞུང་དང་མི་མ་ང་ཆེད་གནང་བ་དེ་ལས་བརྒྱ་ཆ་ ༣༠ འཛམ་གླིང་ཡུལ་གྲུ་དང་ཡུལ་མི་སུལ་གནང་ཀྱང་ཁོང་གི་ཐུགས་འདོད་རེད།
མ་གཞི་ནས་ང་ཚོས་རྟག་པ་རོགས་རམ་ལ་བརྟེན་ན་ག་ལ་འགྲིག ཉིན་བྱེད་ལྟ་བུ་བཙན་བྱོལ་ནང་འཚར་ལོངས་བྱེད་པ་དང་བོད་ནས་སྔ་ས་ནས་རྒྱ་གར་དུ་ཕེབས་མཁན་ཚོ་འི་ལུས་པོའི་ཆ་ཆེན་པོ་ཞིག་ནི་ཕྱི་རྒྱལ་བས་བོད་གཞུང་ལ་རོགས་རམ་གནང་བའི་ཉེར་ལེན་ལས་བྱུང་ཞེས་བརྗོད་ཀྱང་ཆོག
ད་ལན་༧གོང་ས་མཆོག་ནས་ཕྱི་རྒྱལ་བ་ཚོར་ཁྱེད་ཚོས་ང་ཚོ་བོད་མི་ཚོར་དཀའ་ངལ་ཆེ་བའི་དུས་སྐབས་སུ་རོགས་རམ་རླབས་ཆེན་བྱེད་པའི་དྲིན་བསམ་བཞིན་དྲིན་འཇལ་བའི་ཚུལ་མཚོན་པ་ཞིག་ཡིན་པ་བློ་དམན་ང་ལྟ་བུས་ཀྱང་དཔག་ཐུབ།
ངོ་ཚ་པོ་ཞེ་དྲག་རེད།
དང་པོ་བསམ་བློ་མ་བཏང་བའི་སྨྱོ་གཏམ་ལུང་པ་གང་བཤད། དེ་ནས་དུས་བབ་དྲ་ཚིགས་ཀློག་པ་པོས་རྒྱ་ཆེན་པོས་སྐྱོན་བརྗོད་བྱེད་སྐབས་མཇུག་མ་རྐུབ་ནང་བསྡུ་རྒྱུ་དེ་ངོ་ཚ་པོ་རེད།
མ་གཞི་ནས་དེང་སང་ན་གཞོན་མང་པོར་ཉིན་ལྔའི་རིང་མཁས་པའི་གོ་འཕང་འཐོབ་རྒྱུའི་མགྱོགས་ལམ་གཅིག་པོ་དེ་མུ་མཐུད་འཚོལ་བཞིན་ཡོད་འདུག དེ་ནི་རང་ཉིད་ནས་པེ་ཅིན་གཞུང་གི་༧གོང་ས་མཆོག་དང་བོད་མི་མང་ལ་སྐྱོན་བརྗོད་ཀྱི་དཔེ་དེབ་ནས་རིག་པ་རེ་གཉིས་བླངས་ཏེ། ༧གོང་ས་མཆོག་དང་བཀའ་ཁྲི་ཟམ་གདོང་བླ་མ་སོགས་ཀྱི་བྱེད་སྟངས་མི་འགྲིག་པ་དང་མི་རན་པའི་སྨྱོ་གཏམ་མང་དག་ཅིག་བཤད་དེ། ཧ་ལམ་ནུབ་ཕྱོགས་པའི་སྲིད་དོན་ཚན་རིག་པ་ཀཱནཊ་དང་རོ་ཤུ་སོགས་ལས་མི་དམན་པའི་རྣམ་པ་ཞིག་བཏོན།
གལ་ཏེ་བློ་གསར་ནུབ་ཕྱོགས་པའི་ལྟ་བ་བཟང་ཕྱོགས་མི་ཤེས་ཤིང་ཕྱི་རྒྱལ་གྱི་ཆེས་ཉེས་པའི་སྤྱོད་ལ་མོས་གུས་ཡི་རངས་མཁན་རྣམས་མགོ་བོ་འཁོར་ན་བསམ་དོན་གྲུབ་པ་དང་། ཤེས་ལྡན་རྣམས་ཀྱི་དྲ་ལམ་སོགས་བརྒྱུད་རང་གི་སྨྱོ་བཤད་རྣམས་ཐད་འདོན་ཞིབ་དཔྱོད་བརྒྱུད་ཕམ་པར་བྱེད་པའི་སྐབས་ཀློག་པ་པོའི་གོ་བ་ལོངས་མིན་བཤད་པ་ནི་སྐབས་འཚོལ་བ་ཚོས་བྱ་སྤྱོད་ཅིག་ལས་ཅང་མ་འདས།
སླན་ཆད་ཉིན་བྱེད་ལྟ་བུས་འབྲི་བྱེད་དབྱིན་ཡིག་དང་བོད་ཡིག་ཤེས་ཀྱང་འབྲི་རྒྱུའི་འབྲུ་དོན་ལ་དོ་ནན་པོས་མནོ་བསམ་དང་བཅས་དྲ་སྟེང་དུ་འགོད་རྒྱུ་ཅི་ནས་ཀྱང་གལ་ཆེ་ཞེས་ནན་བསྐུལ་མ་རུ།
བསྟན་འཛིན་ཉིན་འབྱེད་ཁྱེད་རང་བོད་མི་རིགས་ཀྱི་རིག་གཞུང་ཁྱད་ཆོས་ལ་ཐུགས་འཚབ་གནང་བ་དངོས་གནས་བསྔགས་བརྗོད་ཡོད།
འཇམ་དབྱངས་ནོར་བུ་དང་ཁྱེད་ཚོས་༸གོང་ས་མཆོག་གི་མཛད་འཕྲིན་འདི་རིགས་ཀྱི་ཁེ་ཕན་ནམ་ཡང་མཐོང་གི་མ་རེད། ཁྱེད་རང་ད་ལྟ་ཨ་རིར་སློབ་སྦྱོང་གི་གོ་སྐབས་རག་པ་འདི་ཡང་༸གོང་ས་མཆོག་གི་མཛད་འཕྲིན་ལས་བྱུང་བའི་ཁེ་ཕན་རེད། བོད་མིའི་ཁེ་ཕན་རེད་ལ་ལྷག་པར་ཁྱེད་ཀྱི་ཁེ་ཕན་རེད། འོན་ཀྱང་ཁྱེད་ཀྱི་བསམ་སྤྱོད་ལ་བལྟས་ན་ཁྱེད་ཀྱི་སློབ་སྦྱོང་དེ་བོད་མིའི་ཁེ་ཕན་དུ་འགྱུར་དཀའ་སེ་བ་འདུག ཁྱེད་ཀྱིས་༸གོང་ས་མཆོག་གི་སྐུ་དྲིན་དང་ཕྱག་དངུལ་དེ་དག་ཆུད་ཟོས་སུ་མ་གཏོང་རོགས། སོ་སོས་ཁེ་ཕན་ཐོབ་ཡོད་ཀྱིན་ཡོད་ཀྱིན་ལ་ད་དུང་ཁེ་ཕན་མེད་ཟེར། དངོས་གནས་བསམ་བློ་གཏོང་ཤེས་ཀྱི་ཡོད་ས་མ་རེད།
བསྟན་འཛིན་ཉིན་བྱེད་ཀྱི་དོགས་སློང་འདི་ལ་ལྡོག་ཕྱོགས་ཁོ་ན་ནས་བལྟ་མི་རུང་།
ང་ཚོ་གཞན་ནས་སློང་མོ་བྱེད་མཁན་གྱི་སྐྱབས་བཅོལ་བ་ཞིག་གིས་སྟོབས་ཆེན་ཨ་རིའི་སྡེ་ཚན་ཞིག་ལ་ཞལ་འདེབས་རྒྱབ་པ་རེད་ཟེར་ན། འཚམས་པོ་འདྲ་ཞིག་འདུག་གམ།
ཞལ་འདེབས་འདི། བཙན་བྱོལ་བོད་མི་གཞན་ཞིག་གིས་བརྒྱབ་པ་ཡིན་ན། ག་རེ་དྲན་ས་རེད། གནད་དོན་མེད་པ་མ་རེད།
ཧི་མ་ལ་ཡ་བས་མོ་མོ་བཙོང་བར་བདག་ཏུ་འཛིན་ག་ལ་རུང། མོ་མོ་ཞེས་པ་བོད་སྐད་ནམ། བོད་པ་ཁོ་ནའི་ཟས་རིགས་ཤིག་གམ། ཁྱེད་མི་རིགས་གཞན་ཞིག་གི་རིག་གནས་བྱང་ཆུབ་ཅིང་དེ་ཧི་ཅང་རྒྱུགས་པོ་བྱུང་ཡང་མི་བཙོང་ཁོ་ཐག་ཡིན་ནམ།
སྤོབས་པ་མཐའ་ཡས་སོགས་ཀྱིས་གནས་ལུགས་ལྡན་པའི་རྡོ་ལོག་ཁ་ཤས་ཀྱིས་བསྟན་འཛིན་ཉིན་བྱེད་ཀྱི་ཁ་ནང་ལ་བཞུས་འདུག་པས་དགའ་སོང་། ངས་ཡང་གནས་ལུགས་ཡོད་མེད་ཅི་ལྟར་ཡང་བསྟན་འཛིན་ཉིན་བྱེད་ཀྱི་རྐུབ་ཤའི་ཐོག་ལ་ཐལ་ལྕག་ཁ་ཤས་མི་བཞུ་ཐབས་མེད་ཆགས་སོང་།
བསྟན་འཛིན་ཉིན་བྱེད་ཀྱིས་འཇམ་ནོར་གྱི་རྗེས་སུ་རྒྱུགས་ནས་མང་གྲགས་ཤིག་ལེན་འདོད་པ་ཡིན་ནམ། ཡང་ན་བསྟན་འཛིན་ཉིན་བྱེད་སྐུ་སྒེར་གྱི་རྒྱུ་ནོར་ལ་ཧམ་པ་སྐྱེས་པ་ཡིན།
༧གོང་ས་མཆོག་གིས་རང་ལས་གཞན་སྐྱེས་ཀྱི་ལྟ་བ་ལག་ལེན་ལ་ལྟར་ནས་དགུང་ལོ་༧༥བཞེས་པ་རེད། དེ་ལ་ཡོད་སྲིད་པ་རེད་ཟེར་ནས་མ་དགའ་བའི་རྣམ་འགྱུར་སྟོན་དགོས་ཅི་ཡིན་ནམ། ཞལ་འདེབས་ཕུལ་ནས་བྱང་ཆུབ་སེམས་དཔའི་མཛད་པ་བསྐྱང་བ་ཡིན་ན་དེ་ཆབ་སྲིད་ཀྱི་ཐོག་ནས་མ་འགྲིག་པ་དང་འདྲ་མཉམ་མིན་པ་ག་རེ་འདུག་གམ། བསྟན་འཛིན་ཉིན་བྱེད་ཀྱི་ཆབ་སྲིད་དང་འདྲ་མཉམ་ཡིན་ན་སྐུ་སྒེར་གྱི་རྒྱུ་ནོར་ཚང་མ་ཁྱེད་ཚང་ལ་སྟེར་དགོས་པ་རེད་དམ།
༧གོང་ས་མཆོག་དང་བོད་གཞུང་གི་སྒང་ལ་བསམ་ཚུལ་བཏོན་ན་འགྲིག་པ་རེད་བསམ། ཡིན་ན་ཡང་༧གོང་ས་མཆོག་གིས་སྐུ་སྒེར་གྱི་རྒྱུ་ནོར་གཞན་ལ་ཕན་ཕྱིར་ཞལ་འདེབས་ཕུལ་པར་སྐྱོན་བརྗོད་བྱེད་པ་འདི་ཚད་ལས་བརྒལ་བ་རེད་བསམ། འདི་ལ་གཏམ་དཔེ་ཞིག་བཀོད་ན་འཛུབ་མོ་མི་ན་རྡོ་བར་དང་མགོ་མི་བཤོངས་སར་ལུས་ཞེས་པ་དང་མཚུངས།
འདི་འདྲ་བྲིས་པའི་རྗེས་ལ་མ་བྲིས་ན་ཡང་བསམ་བྱུང་། གཅིག་བྱས་ན་བསྟན་འཛིན་ཉིན་བྱེད་ཟེར་མཁན་འདི་བྲག་ཕུག་ཁ་བྱང་འཁོར་ཞིག་ཡིན་སྲིད་པ་རེད།
ནམ་ཡིན་ཡང་ང་ང་ང་ང་། ངའི་ངའི་ངའི། ང་ལ་དགོས་ང་ལ་དགོས་ང་ལ་དགོས། འདི་འདྲ་བྱས་བསྡད་ན་གང་ཡང་འཇོན་གྱི་མ་རེད། ལོངས་སྤྱོད་ཧ་ཅང་སྤེལ་འདོད་ན༎ཅུང་ཙམ་སྦྱིན་པ་མན་ངག་ཡིན༎ས་སྐྱ་ལེགས་བཤད་ཀྱི་ཚིག་འདི་ཇི་བཞིན་མི་འདྲན་ཡང་དོན་དུ་འདི་འདྲ་ཞིག་གསུངས་ཡོད་པ་དེ་ལ་བསམ་གཞིག་རེ་གྱིས།
འཇིག་རྟེན་ཁེ་བསྲང་དང་ཁེ་ཕན་མི་བསམ་མཁན་གཅིག་ཀྱང་ཡོད་པ་མ་རེད། འཛམ་གླིང་ཐོག་ཆེས་རིན་ཐང་ཆེ་བའི་རྡོ་རྗེ་ཕ་ལམ་སྟེ་Daimondཟེར་བའི་མི་ཕྱུག་པོ་ཚོས་མ་གཏོགས་ལོངས་སྤྱོད་བྱེད་མི་ཐུབ་པ་དེ་ཡོང་ས་གཙོ་བོ་ཆེས་དབུལ་ཕོངས་ཀྱིས་མནར་བའི་ཨ་ཧྥེ་རི་ཀའི་རྒྱལ་ཁབ་ཁག་རེད་།དེར་ཇི་ལྟར་འགྲེལ་བཤད་རྒྱག་གམ། མཚམས་རང་གིས་གང་ཡང་མི་ནུས་པར་གཞན་སྐྱོན་རྐྱང་རྐྱང་བརྗོད་པ་ལས་། རང་ནུས་པ་བཏོན་ཤར་བ་སོགས་ལ་བོད་ཀྱི་མིང་ཐོབ་བྱེད་དུ་མ་བཅུག་པར་སོ་སོའི་ངོས་ནས་ཟ་ཁང་གཉེར་ན་རེད་ཚོང་ལས་གནང་ན་རེད་བྱེད་འོས་པ་མ་ཡིན་ནམ། ཁྱེད་ཀྱང་རང་དབང་ལུང་པ་ན་ཡོད་པས་ཕྱིར། ནམ་རྒྱུན་ཁ་རྒྱག་པ་ཁོ་ནའི་ཁྲོད་གཞན་སྐྱོན་རྐྱང་རྐྱང་ལབ་བསྡད་པ་དེ་ཚོར་དགའ་པོ་མེད།
བསྟན་འཛིན་ཉིན་བྱེད་ཀྱིས་བཤད་སྟངས་འདིར་གནས་ལུགས་དང་རྒྱུ་མཚན་གཉིས་ཀ་ཆེར་མ་མཐོང་། ཁ་སྔོན་ཞིག་ལ་རྩོམ་ཡིག་གང་འཚམ་སྤེལ་སོང་བ་དེ་ཚོ་ནི་ལེགས་པར་མཐོང་སོང་། བསམ་བློའི་ཕུགས་གཏོད་ས་དེ་གོང་ས་མཆོག་ལ་དམའ་འབེབས་པ་ཞིག་ལ་ཤ་ཐང་དུ་འབད་སྟངས་འདིར་ཕངས་པོ་བྱུང་། མ་གཞི་ངས་ཁོང་རང་ངོ་ཡག་པོ་ཤེས་ཀྱི་ཡོད་དེ། འདི་འདྲ་ཁུངས་མི་འཁྱོལ་བ་བྱས་ནས་ཕེབས་སྟངས་འདིས། ཡིད་ཐང་རྦད་དེ་ཆད་བཅུག་སོང་། གྲོགས་པོ། ཕོག་ཐུག་སོང་ཡོད་ན།་དགོངས་དག སླད་ན་འདི་འདྲའི་རིགས་མི་སྤེལ་བའི་ཡིད་ཆེས་ཆེན་པོ་ཡོད་ཞུའོ།།
སྔོན་མར་ཨ་རི་ཕྱུག་པོ་ཞིག་ཡིན་སྲིད། ཡིན་ན་ཡང་དེ་རིང་ཨ་རི་ཕྱུག་པོ་ཞིག་རྩ་ནས་མིན་པར་རྒྱལ་ཁབ་སྐྱོ་བོ་སྐྱོ་ནག་ཅིག་རེད། ལོ་ནས་ལོ་བསྟུད་ནས་དམག་འཁྲུག་བརྒྱབ་ཅིང་ཚོང་གི་མ་རྩ་བརྡིབས་པས། དེང་སྐབས་ཨ་རི་ལ་དཔལ་འབྱོར་གྱི་མུ་གེ་ཆེན་པོ་ཞིག་བྱུང་འདུག མི་སྟོང་ཕྲག་ཁྲི་ཕྲག་ལམ་ཁ་ན་ཉལ་བསྡད་ཡོད་ལ། མི་ས་ཡ་དུ་མར་ལས་ཀ་མེད་པར་གཞུང་གི་སྐྱོབ་གསོ་ལེན་བཞིན་ཡོད། མི་སྟོང་ཕྲག་མང་པོར་ཉལ་སའི་ཁང་པ་མེད་པར་རས་གུར་ཕུབ་ནས་ཉལ་བསྡད་ཡོད། རྣ་བར་མི་འགྲོ་ན་ངས་འདྲ་པར་དང་བཅས་ངོ་སྤྲོད་བྱེད་ཆོག
་ཨོ་ད་ཡིན་ན་ མགོ་ལ་ཅི་ཞིག་བྱས་སོང་ངམ་ཞེས་དྲིས་པར རྐུབ་ལ་ལུག་གིས་བརྡུང་སོང་ཞེས་ལན་བརྒྱབ་འདུག
ཁྱོད་ཀྱི་བཤད་བཞིན་པ་དག་དང་རྒྱལ་པ་རིན་པོ་ཆེའི་ཨམ་ཁུག་བར་འབྲེལ་བ་ཆེར་མ་མཐོང་།
༧་གོང་ས་མཆོག་གིས་ཨམ་ཁུག་ལ་ཁྱེད་ཀྱི་འཛིན་སྐྱོང་བྱེད་རྒྱུ་གང་ཞིག་ནས་དྲན་སོང་།
ངོ་མ་བཤད་ན་ ཁྱེད་ལ་ལས་དཀའ་མེད་ཐག་ཆོད་འདུག
དངུལ་ཟེར་བའི་དོན་དུ་མི་འདི་ཚོས་ཕའི་མགོ་ཡིན་ན་ཡང་གཅད་ས་རེད།
འབྲུག་དང་ཤར་པ་སོགས་ལ་རྒྱལ་བ་རིན་པོ་ཆེའི་སྐུ་པར་བཤམ་མི་བཤམ་དང་། གཡག་དང་དགོན་པ་སོགས་ཀྱི་འདྲ་པར་སྦྱར་བ་དེ་བོད་ཀྱི་རེད་ཟེར་བ་དེ་མི་རིགས་ཆེན་པོའི་རིང་ལུགས་ཀྱི་སྐད་ཆ་རེད། ལོ་རྒྱུས་ཀྱི་ཐོག་ནས་ཁོང་ཚོ་བོད་ཡིན་པ་བདེན་ན་ཡང་། ད་ཆ་དེ་ལྟར་ལབ་མི་ཐུབ། རྫོང་ཁ་དེ་བོད་ཡིག་དང་ནོར་འགྲོ་བ་ལྟ་བུའམ་རྣམ་པ་འགྱུར་བའི་བོད་ཡིག་ཡིན་ན་ཡང་། ང་ཚོས་དེ་ཡང་བོད་ཡིག་ཡིན་ཞེས་ལབ་མི་ཐུབ། དེ་ལྟར་ན་རྒྱ་ཡིག་ཤེས་མཁན་ཞིག་གིས་འཇར་པན་གྱི་ཡི་གེར་བལྟས་ན་བརྒྱ་ཆ་བདུན་ཅུ་ངོས་ཟིན་ན་ཡང་། འཇར་ཡིག་རྒྱ་ཡིག་ཏུ་མི་འགྱུར། བལ་ཡིག་དང་རྒྱ་གར་གྱི་ཡི་གེའི་རྩ་བའི་ཁྱད་ཆོས་དང་ཐ་སྙད་ཅི་བས་མང་པ་ཞིག་ལ་བོད་ཡིག་དང་འབྲུག་ཡིག་ལྟ་བུའི་འབྲེལ་བ་ཡོད་ན་ཡང་། ད་ཆ་དེ་ལྟར་ལབ་ཏུ་མེད། ཐེ་ཝན་གྱི་སྐད་དེ་རྒྱ་སྐད་ཟུར་ཆག་པའི་ཚད་དེ་བོད་འབྲུག་གི་སྐད་དང་ཤིན་ཏུ་འདྲ་བ་ཡིན་ན་ཡང་། ད་ཆ་ཐེ་སྐད་རྒྱ་སྐད་རེད་ཅེས་ལབ་མཁན་མེད། ཐ་དད་ནས་གཅིག་ཏུ་དང་གཅིག་ནས་ཐ་དད་དུ་འགྱུར་བའི་སྐབས་ཀྱི་མི་རིགས་དང་སྐད་ཡིག་སོགས་ཀྱི་ཆོས་ཉིད་མང་པོ་ཞིག་རྟོགས་ན་གཞི་ནས་ང་ཚོས་དོན་མེད་པའི་ང་རྒྱལ་ཆུང་དུ་འགྲོ་སྲིད། ང་ཚོས་ཁྲ་བྱེའུ་ཐུབ་དང་བྱེའུ་འབུ་ཐུབ་ཀྱི་ལྟ་བ་མེད་པ་བྱེད་ཐུབ།
ཉིན་བྱེད་གདོན་གྱིས་སྨྱོས་པ་ཡིན་ནམ་ཆང་གིས་བཟི་བ་ཡིན་མི་ཤེས་ཏེ་འདི་འདྲའི་སྐད་ཆ་ཆོ་མེད་ཤོད་ཀྱིན་འདུག ནེ་ཕ་ལིའི་སློབ་མས་མཆོད་རྟེན་བྱ་རུང་ཁ་ཤོར་ཁྱབ་བསྒྲགས་ཤོག་བུའི་སྟེང་ལོས་དུ་ལོས་བཀོད། དེ་ཁོ་རང་ཚོའི་རེད། རླུང་རྟ་དར་ལྕོག་ཀྱང་དེ་བཞིན་རེད། འདི་བོད་པའི་དམིགས་བསལ་གྱི་ཅང་མ་རེད། ནེ་པ་ལིའི་མིས་བོད་ཀྱི་ཟ་མ་བཙོང་མི་ཆོག་དོན་ག་རེ་རེད། བོད་པ་ཟས་ཁང་གཉེར་མཁན་ཚོས་ཀྱང་ཟ་མ་འདྲ་མིན་བཟོས་ནས་འཚོང་གིན་ཡོད་རེད། དྲང་པོར་བཤད་ན་བོད་ཀྱི་སྒྱུ་རྩལ་ལག་ཤེས་ཡག་ཤོས་མང་པོའི་ཁུངས་ནེ་པ་ལི་ལ་ཐུག་ཡོད་པ་གསལ་པོ་རེད། ལྷ་སའི་ཇོ་བོ་ཟེར་བའི་རྩ་བ་ཆེན་པོ་དེ་ཡང་ཞིབ་ཏུ་བལྟས་ན་བལ་པོའི་ལི་སྐུ་ཞིག་ལས་ལྷག་པ་གང་ཡང་མ་རེད།
བོད་ནང་གི་གཏེར་ཁ་སྔོགས་འདོན་བྱེད་མཁན་དེ་དང་རྒྱལ་བ་རིན་པོ་ཆེའི་ཞལ་འདེབས་ལེན་མཁན་གྱི་ཕྱི་རྒྱལ་བ་དེ་ཚོ་མི་གཅིག་མ་རེད། ཁ་ཁ་སོ་སོ་རེད། ནུབ་ཕྱོགས་པ་ཟེར་ནས་ཡོད་ཚད་ཚང་མ་དཀར་པོའི་ཕྱོགས་སུ་དེད་ན་འགྲིགས་གི་མ་རེད་ལ་ནག་པོའི་ཕྱོགས་སུ་དེད་ན་ཡང་འགྲིགས་གི་མ་རེད། བོད་ནང་གི་གཏེར་ཁ་སྔོགས་མཁན་དེ་ཚོས་རྒྱལ་བ་རིན་པོ་ཆེ་ལ་གསོལ་རས་ཞུ་མདོག་མ་རེད། འཕྱར་བ་ནག་པོ་འགེབས་རྐྱབ་བྱས་ན་འགྲིག་གི་མ་རེད།
སྟོབས་ཆེན་རྒྱལ་ཁབ་ཡིན་ན་ཡང་ཞལ་འདེབས་རྒྱག་མི་རུང་བ་ཅི་ཡོད། ཡུལ་ལུང་དེ་ཚོར་ཡང་མི་སྐྱོ་བོ་མང་པོ་རེད། ཁྱིམ་མེད་མཁན་ག་ཚོད་མང་པོ་འདུག འཚོ་བ་ལ་དཀའ་ངལ་འཕྲད་མཁན་ག་ཚོད་མང་པོ་འདུག སྟོབས་ཆེན་རྒྱལ་ཁབ་ཀྱི་མི་ཚང་མ་སྟོབས་ཆེན་མ་རེད།
བོད་པའི་ཆོས་དང་རིག་གཞུང་ཟེར་ན་ག་རེ་རེད། སངས་རྒྱས་ཆོས་ལུགས་ཟེར་བཞིན་ཡོད་དམ། འདི་ནེ་པ་ལའི་སྟོན་པ་ཤཱཀྱ་ཐུབ་པའི་ཆོས་ལུགས་རེད། ནམ་མཁའི་གར་ཁྱབ་ཀྱི་སེམས་ཅན་ཚང་མའི་ཐུན་མོང་རེད། བོད་པས་བདག་ཏུ་འཛིན་ཆོག་ཆོག་ཅིག་མ་རེད། བདེན་པ་རེད། མི་སུ་ཡིན་ཡང་དངུལ་བཟོ་དུས་བཟོ་གི་རེད། སྤྲད་དུས་སྤྲད་ཀྱི་རེད། འདི་དངུལ་ཀྱི་བྱེད་ལས་རེད། མི་ཞིག་གིས་དངུལ་བཟོ་གིན་འདུག ཟེར་ནས་ཁྱོད་ཚིག་པ་ཟ་དགོས་དོན་མི་འདུག ཞལ་འདེབས་སྤྲད་པ་འདི་ཆོས་ཕྱོགས་ཀྱི་གནད་དོན་ཅང་མ་རེད། འཛམ་གླིང་གི་སྤྱི་ཚོགས་ཚང་མ་གཅིག་ལ་གཅིག་བརྟེན་རེད། ཞལ་འདེབས་རེ་གནང་རྒྱུ་ཡོད་ན་ལོས་གནང་།
རྒྱལ་བ་རིན་པོ་ཆེ་ལ་ཇུས་གཏོགས་བྱ་ས་བརྒྱ་དང་སྟོང་གི་ནང་ནས་བསྟན་འཛིན་ཉིན་བྱེད་ཀྱིས་ཇུས་གཏོགས་བྱ་སྟངས་འདི་ལས་སྡུག་ཅིག་མཐོང་མ་སོང་།
གྲོགས་པོ་བསྟན་འཛིན་ཉིན་བྱེད་ལགས། ཁྱེད་ཀྱི་རྩོམ་རིག་གོ་བདེ་བོ་རྐྱང་རྐྱང་འབྲི་གིན་འདུག་པས་དགའ་ཡོད། མུ་མཐུད་དུ་དུས་བབ་མདུན་ངོས་སུ་ཆབ་སྲིད་སྐོར་གྱི་རྩོམ་ཡིག་རེ་སྤེལ་བར་འཚལ། ཁྱེད་ནི་ཆབ་སྲིད་ཕྱོགས་ལ་ཅུང་ཙམ་གོ་བ་རྙེད་མཁན་ཞིག་དང་། ངྷ་སའི་ལས་ཁུངས་དག་ལ་རྒྱུས་ཡོད་ནི་ཞིག་རེད་འདུག
ངོ་མ་ཐལ་དྲག་འདུག ངས་སྐབས་རེར་༸གོང་ས་མཆོག་མིར་བཟུང་ནས་མི་བུའི་སྐྱོན་ཡོན་གྱི་རིན་ཐང་ལྟར་ཚད་གཞི་འཇལ་བ་དེ་འཇུག་པོ་ཞིག་ཏུ་མཐོང་གིན་ཡོད་ན་ཡང་། སྐབས་རེར་བཤད་སྟངས་ཁ་ཤས་སེམས་ཀྱི་གཏིང་ནས་མཇུ་ཐུབ་ཀྱི་མི་འདུག དེ་ནི་ཕལ་ཆེར་ང་རང་བློ་དོག་དྲགས་པ་ཡིན་སྲིད།
གང་ལྟར་གོང་གི་རྩོམ་ཡིག་སྔ་ཕྱིར་༸གོང་ས་མཆོག་གི་ཞལ་འདེབས་གནང་བར་སྐྱོན་བརྗོད་དང་། དེ་ལས་ཀྱང་༼དེ་དག་ཤེས་པའི་ཐོག་ནས་ང་ཚོས་ད་དུང་སྟོབས་ཆེན་རྒྱལ་ཁབ་ཨ་རི་ལྟ་བུར་ཞལ་འདེབས་སོགས་རྒྱག་གི་ཡོད་ན་ནི་དངོས་གནས་ཧང་སངས་དགོས་པ་ཞིག་རེད། ༽ཅེས་པའི་ངར་ཤུགས་ཅན་གྱི་སྐད་ཆ་འདི་ཐོས་མ་ཐག་ངའི་སེམས་ལ་ཚ་ཤད་ཅིག་རྒྱུག་པ་ལྟ་བུའི་སྣང་བ་ཤར། མ་མཐའ་ཡང་ཕྲུ་གུ་ཞིག་གིས་ཚམ་ཚོམ་མེད་པར་རང་གི་ཨ་མར་བསྡིགས་དམོད་བྱེད་ཀྱིན་ཡོད་པ་ལྟ་བུའི་སྣང་བ་ཤར། ངས་ང་ཚོའི་ཕ་ཡབ་འདིའི་སེ་ཡོར་རེ་བའི་དབུ་ལོ་དང་། གཉེར་མས་ཁེངས་པའི་དགྲེས་ཉམས་ཀྱང་གསལ་ཇེ་གསལ་ལྟར་ཚོར། གསར་འགྱུར་སོགས་ལ་དོ་སྣང་ཁྱུག་ཙམ་བྱས་པ་ཡིན་ན་བཙན་བྱོལ་བོད་གཞུང་གི་ལོ་རེའི་འགྲོ་སོང་གི་སྤྱིའི་རྒྱ་ཆ་ཇི་ཙམ་ཞིག་༸སྐུ་མདུན་གྱི་ཡིག་ཚང་ནས་ཡོང་གིན་འདུག དེ་ཙམ་མ་རེད། མདོར་ན་ང་ཚོ་བོད་ཕྱི་ལོགས་ན་ཡོད་པ་ཚང་མ་ཚད་ངེས་ཅན་གྱི་ཐོག་ནས་༸གོང་ས་མཆོག་གི་གྲིབ་མའི་འོག་ཏུ་ངལ་གསོས་ནས་བསྡད་ཡོད། ད་དུང་སེམས་ཁ་མ་གང་བར་སྐུ་མདུན་གྱི་སྐུ་སྒེར་གྱིས་གཞན་ལ་ཞལ་འདེབས་གནང་སྟངས་ཙམ་ལ་ཡང་དེ་ཙམ་དུ་ཚུལ་མིན་གྱི་དཔྱད་བརྗོད་བྱེད་པ་ནི་ངོ་མ་ཚུལ་དང་མི་མཐུན་པ་ཞིག་རེད། དགོངས་དག་ཚིག་རྣོ་དྲག་པ་ཡོད་ན་དགོངས་འགལ་མེད་པ། ཁྱེད་ཀྱིས་མུ་མཐུད་འཁྲེགས་འཛིན་མི་གནང་རྒྱུའི་རེ་བ་ཡོད། འདི་ནི་སྐུ་ཉིད་ལ་ཕན་ཐོགས་ཡོད་པ་ཞིག་གཏན་ནས་མ་རེད།
༧གོང་ས་མཆོག་གིས་ཚོགས་པ་ཁག་དང་མི་སྒེར་ལ་ཞལ་འདེབས་གནང་བ་ཐེངས་དང་པོ་མ་རེད། གྲངས་མེད་པ་ཞིག་ཡོད་རེད། དེ་ཡིན་དུས་དེར་ཁྱེད་ལ་འགྱོད་སེམས་དགོས་དོན་ཡོད་མ་རེད། གཞན་། ཨ་རི་ཕྱུག་པོ་ཡིན་པའི་རྒྱུ་མཚན་གྱིས་ཕར་ཞལ་འདེབས་སྤྲད་ན་ནོར་འདུག་ལབ་ན་ཏགཏག་ཅིག་བསྡད་མེད། ཕྱོགས་གཞན་ཞིག་ནས་བཤད་ན། གོང་ས་མཆོག་གི་ཞལ་འདེབས་གནང་བ་དེར་ཡང་དགོས་པ་རྒྱུ་མཚན་མང་དག་ཅིག་ཡོད་ཀྱི་རེད་མ་གཏོཊ་ཁོང་གིས་སྤྱན་གཉིས་བཙུམས་ནས་གནང་ཡོད་ཀྱི་མ་རེད། དེ་གཅིག་རེད། དེ་མིན་ནེའུ་ཡོག་ཤར་བའི་ཟ་ཁང་ཞིག་ཏུ་བོད་ཀྱི་མི་རིགས་དང་རིག་གཞུང་གི་མཚོན་དོན་དུ་གྱུར་བའི་ཅ་དངོས་མང་དག་ཅིག་བཤམས་ཡོད་པ་དེ་ཡག་པོ་ཞིག་རེད་མ་གཏོགས་དེར་མ་དགའ་བའི་རྣམ་འགྱུར་སྟོནདགོས་དོན་མེད། རིག་གཞུང་གི་ཁྱབ་ཁོངས་ཇི་ལྟར་ཆེ་ན་བོད་ཀྱི་རིག་གཞུང་སྲུང་སྐྱོབ་ལའང་ཕན་ཐོགས་ཆེན་པོ་ཡོད། ཤར་བ་དང་རྟ་མང་། འབྲུག་པ། ལ་དྭགས་པ། ཁུ་ནུ་བ། འབྲས་ལྗོངས་པ། མོན་པ་སོགས་བོད་རང་རིག་གཞུང་གི་ངོ་བོ་གཅིག་ཏུ་འདྲེས་ཡོད་སྟབས་རིག་གཞུང་གི་ཆ་ནས་ཁྱོད་དང་ང་ཞེས་ཧ་ཅང་དགར་རྒྱུ་མང་དྲགས་ན་མི་རིགས་བར་གྱི་དམ་ཚིག་ལ་གནོད་ཀྱི་ཡོད། ལྷག་པར་ལོ་རྒྱུས་ཀྱི་ཆ་ནས་གོང་གི་མི་རིགས་དེ་དག་གི་འབྱུང་ཁུངས་བོད་ཡིན་པས་ན་དེ་ལུགས་ཀྱི་དགོངས་པ་བཞེས་དགོས་རྒྱུ་ལས་ཅོལ་ཆུང་གི་བརྟུལ་ཞུགས་ནམ་ཡང་འཛིན་མི་ཉན། ཐུགས་རྗེ་ཆེ།
གོ་སྐབས་དང་ཁེ་ཕན་ནི་ཕས་བུའི་སྟེང་ནས་ལེན་སྲིད་ལ་བུས་ཀྱང་ཕའི་སྟེང་ནས་ལེན་སྲིད། འཇིག་རྟེན་གྱི་རྣ་བ་ཡོད་ཚད་ཁེ་ཕན་གྱི་ཆེད་དུ་གདངས་ནས་ཡོད་ལ། འཇིག་རྟེན་གྱི་མིག་རིལ་ཡོད་ཚད་གོ་སྐབས་ཀྱི་ཆེད་དུ་བགྲད་ནས་ཡོད།
ཨ་རིས་བོད་པའི་གོ་སྐབས་དང་ཁེ་ཕན་ལེན་གྱིན་ཡོད་ལ། བོད་པས་ཀྱང་ཨ་རིའི་གོ་སྐབས་དང་ཁེ་ཕན་ལེན་གྱིན་ཡོད། སུ་ལ་གོ་སྐབས་མང་བ་རག་ན་དེ་ཁོ་རང་གིས་འཇོན་པ་རེད་ལ། ཁོ་རང་གི་ལས་བསོད་རེད།
བསྟན་འཛིན་ཉིན་བྱེད་ཁྱེད་རང་གིས་དཔྱད་ནས་བཤད་ཀྱིན་པར་དགའ་བསུ་ཡོད། འོན་ཀྱང་དགོས་ས་ལ་མ་ཕོག མི་དགོས་སར་ཕོག་གི་འདུག ད་དུང་དཔྱད་པ་བྱོས།
ངས་བསམ་ན་ཌའི་བིཌ་སོན་ཁོ་རང་སྤྱིར་བཏང་གི་ཚན་རིག་པ་ཞིག་ཡིན་པ་ཙམ་མ་ཟད་ཝ་རེ་ལའི་རྗེས་ནས་བཤད་ན་༸གོང་ས་མཆོག་དང་ཐུགས་ཉེ་ཤོས་ཀྱི་ཚན་རིག་པ་ཞིག་རེད། ཁོང་གཉིས་ཀྱི་དབར་རིག་གཞུང་གཉིས་མཉམ་འབྲེལ་གྱི་དཔྱད་ཞིབ་བྱེད་པའི་བརྒྱུད་རིམ་ཁྲོད་ཤེས་ཡོན་བརྗེ་ལེན་བྱེད་པའི་ཕྱོགས་ཆའི་འབྲེལ་བ་ཙམ་མིན་པར་ནང་བསམ་བློའི་བློ་ཉེ་དང་མཛའ་མཐུན་གནས་བབ་ཀྱི་སྟེང་ནས་ཀྱང་ཐུགས་སྣང་ཧ་ཅང་གཤིན་པོ་ཡོད་པ་ཞིག་ཏུ་མཇལ་གྱིན་ཡོད། དེར་བརྟེན་༸གོང་ས་མཆོག་ནས་རང་གི་མཛའ་གྲོགས་ཀྱི་རླབས་ཆེན་ལས་དོན་ལ་རྒྱབ་སྐྱོར་མཚོན་བྱེད་དུ་ལྷག་བསམ་རྣམ་དག་གི་དངུལ་སྒོར་ཞལ་འདེབས་སུ་གནང་བར་ང་ཚོས་འགྲིག་མིན་དབྱེ་ཞིབ་དགོས་དོན་ཞིག་ཀྱང་མེད།
མ་ཟད་ལུས་སེམས་གཉིས་ཀྱི་འབྲེལ་བའི་དབར་དཔྱད་ཞིབ་བྱེད་པའི་ཚོགས་པ་དེ་ཌེ་བིཌ་སོན་ཁོང་སྒེར་གྱི་ཀུན་སློང་ཙམ་ལས་བསྒྲུབས་པ་མིན་པར་༸གོང་ས་སྐྱབས་མགོན་ཆེན་པོའི་ལམ་སྟོན་དང་བཀའ་བཀོད་ཡོད་པ་དེ་མངོན་གསལ་དོད་པོ་རེད། དེའི་ཆ་ནས་ཀྱང་ཁོང་གིས་འགན་འཁུར་ཡོད་པའི་ཐོག་ནས་ཞལ་འདེབས་འབུལ་རུང་བ་ཞིག་རེད།
མ་ཟད་༸གོང་ས་མཆོག་ནས་འཇིག་རྟེན་འདིའི་ཐོག་གི་ཆོས་ལུགས་ལ་དད་ཞེན་ཡོད་མེད་ཀྱི་སྐྱེ་འགྲོ་སྤྱིའི་་བདེ་སྡུག་འདོར་ལེན་གྱི་ཐབས་ལམ་ཞིག་ལ་དགོངས་པ་ནན་ཏན་གྱིས་བཞེད་ཀྱིན་ཡོད་ཅིང་། ཚོགས་པ་འདིའི་ཞིབ་འཇུག་གི་དམིགས་ཡུལ་ནི་ཁོང་གི་དགོངས་གཞི་འདི་བསྒྲུབ་པའི་ཕྱོགས་སུ་གཏད་ཡོད་པ་རེད།
ད་དུང་ཁོང་གཉིས་ཀྱི་དབར་བླ་སློབ་ཀྱི་འབྲེལ་བ་ཞིག་ཡོད་སྙམ་ཀྱི་རྟགས་མཚན་ཡང་དུ་མ་ཡོད་མོད། འདི་ཙམ་གྱིས་ཆོག་པར་བྱས་སོ།།
མ་གཞི་༸གོང་ས་མཆོག་གི་སྐུ་སྒེར་གྱི་རྒྱུ་དངོས་རིགས་གང་དུ་ཕུལ་མིན་ཐད་ང་ཚོས་གླེང་སློང་མ་བྱས་ན་འཚམ་ཤོས་རེད། ང་ཚོའི་ཆེད་དུ་གཏོང་དགོས་པ་ཡོད་ཚད་བཏང་ཟིན་ཅིང་། ད་དུང་ཡང་གཏོང་བཞིན་ཡོད་ལ། མ་འོང་པར་ཁོང་སྦ་ཁུག་གཏོང་པ་མ་ཆགས་ཕྱིན་ང་ཚོའི་ཆེད་དུ་ནམ་ཡང་གཏོང་གི་རེད།
སྙིང་ཉེ་བའི་དྲ་གྲོགས་ཚོ། བསྟན་འཛིན་ཉིན་བྱེད་ཟེར་བའི་རྒྱ་ཁོགས་ཤུགས་ཀྱི་གདོན་འདྲེ་འདིར་ཁ་ཡ་བྱེད་མི་ཉན། ཁོ་པའི་རྩོམ་འདིས་ཁོ་པ་མི་གང་འདྲ་ཞིག་ཡིན་པ་དང་ལས་འགན་གང་དག་ཡོད་པ་སོགས་ཁ་གསལ་གཏིང་གསལ་བཟོས་མི་འདུག ད་བར་༸རྒྱལ་བ་རིན་པོ་ཆེའི་ཐུགས་བརྗེ་བཀའ་དྲིན་གྱིས་གསོས་པ་མ་ཤེས་པར་ཁོང་ལ་ཁ་གཏད་དུ་ལངས་ནུས་མཁན་བོད་པ་མ་གཏོགས་སུ་ཡོད། ང་མ་ཡིད་སྐྱོ་དགོས་པ་རང་རེད། ད་ཡིན་ན་བོད་པ་ཚར་ལ་ཉེ།