དེ་རིང་ཕྱི་དྲོའི་ཆུ་ཚོད་ ༦ དང་ཕྱེད་ཀའི་ཐོག་ངྷ་སའི་ན་གཞོན་དང་བླངས་རུ་ཁག་གི་གོ་སྒྲིག་འོག བཞུགས་སྒར་བོད་གཞུང་ཟློས་གར་ཚོགས་ཁང་དུ་ ༼ སྐབས་བཅོ་ལྔ་བའི་སྤྱི་འཐུས་འོས་གཞི་ངོ་སྤྲོད ༽ ཅེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་ཞུས་ཡོད་ཅིང་། བགྲོ་གླེང་དེའི་སྟེང་ན་གཞོན་དང་བླངས་རུ་ཁག་གིས་བཏོན་པའི་ཆོལ་ཁ་རིས་མེད་ཀྱི་སྤྱི་འཐུས་འོས་མི་ཁག་ཅིག་གདན་འདྲེན་ཞུས་ཏེ་གཏམ་བཤད་གནང་ཡོད་ཅིང་། དེ་དག་ཁྲོད་སྤྱི་འཐུས་ལས་ཐོག་པ་ ༥ དང་གསར་ཞུགས་པ་ ༦ བཅས་ཡོད། སྐབས་དེར་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་དང་བླངས་རུ་ཁག་གི་ལས་དོན་བྱེད་ཕྱོགས་དང་བགྲོ་གླེང་ངོ་སྤྲོད་གནང་རྗེས། གཏམ་བཤད་པ་དག་གིས་དུས་ཡུན་སྐར་མ་དྲུག་རེར་འདས་པའི་ཉམས་མྱོང་དང་། མ་འོངས་པའི་ལས་འཆར་ཐོག་གསུང་བཤད་གནང་ཡོད། ཐེངས་འདིའི་བགྲོ་གླེང་ཐོག་མང་ཚོགས་ཧ་ཅང་མང་པོ་འདུ་འཛོམས་བྱུང་ཡོད་ཅིང་། གཏམ་བཤད་པ་རྣམས་དང་དྲི་བ་དྲིས་ལན་ཡང་ཡུན་རིང་བྱས་ཡོད།
དེའི་རྗེས་ནོར་གླིང་མཐོ་སློབ་ཀྱི་འགན་འཛིན་སྒྲོལ་དཀར་སྐྱབས་ལགས་ཀྱིས་གཏམ་བཤད་གནང་དོན། སྐབས་བཅུ་བཞི་བའི་བཀའ་ཤག་དང་། སྐབས་བཅོ་ལྔ་བའི་སྤྱི་འཐུས་གཉིས་ཀྱི་ལས་འགན་གལ་ཆེ་ཤོས་དེ་གང་རེད་ཟེར་ན། ད་ཆར་བཙན་བྱོལ་སྤྱི་ཚོགས་ཀྱི་སྒྲོམ་གཞི་འདི་འཐོར་བཞིན་ཡོད་སྟབས། འདི་མ་འཐོར་བ་ཞིག་བཟོ་རྒྱུ་གལ་ཆེན་པོ་རེད། ཐོག་མ་བོད་ནས་འབྱོར་བའི་རིགས་ལ་གཞུང་གིས་ས་ཆ་དང་། ཁང་པ་སོགས་ཀྱི་མཐུན་འགྱུར་ཞུས་ཡོད་ཀྱང་། ད་ཆར་དེ་འདྲ་ཡོད་པ་མ་རེད། ང་རང་གི་བསམ་པར་བོད་ནས་གསར་དུ་ཕེབས་མཁན་ཚོ་ལྷོ་ཕྱོགས་གཞིས་ཆགས་ཁག་ཏུ་གཏོང་བ་དང་། དེ་བཞིན་༧གོང་ས་མཆོག་གི་བཞུགས་གནས་ཕོ་བྲང་ཞིག་ཀྱང་གསར་རྒྱག་བྱས་པ་ཡིན་ན། བོད་མི་ཚོ་གནས་པ་མ་ཟད། ཡུལ་སྐོར་སྤྲོ་འཆམ་པ་ཡོང་བ་དང་། ཁྲོམ་རྭ་སོགས་ཚོང་ལས་ཀྱི་ལྟེ་གནས་ཀྱང་རང་བཞིན་གྱིས་ཆགས་འགྲོ་བ་རེད། ཅེས་གསུངས་སོང་།
དབུས་གཙང་སྤྱི་འཐུས་ལས་ཐོག་པ་ཀརྨ་ཡེ་ཤེས་ལགས་ཀྱིས་གཏམ་བཤད་གནང་དོན། ང་ལ་མཚོན་ན་རྒྱ་གར་ནང་སྐྱེས་བ་ཞིག་ཡིན་སྟབས། བོད་ནང་མིག་གིས་མཐོང་ཡོད་པ་མ་རེད། འོན་ཀྱང་སོ་སོས་ཆུང་དུས་ནས་བོད་ཟེར་བ་དེ་སེམས་ལ་དམ་པོར་བཟུང་ཡོད། སོ་སོ་བོད་པ་ཡིན་པ་དང་བོད་དོན་ལ་ལས་ཀ་བྱ་དགོས་པ་སེམས་ལ་ཉར་ཡོད། རྒྱུ་མཚན་འདིའི་དབང་གིས་འཛིན་གྲྭ་བརྒྱད་པ་ནས་གཞོན་ནུ་ལྷན་ཚོགས་ནང་ཞུགས་པ་ཡིན། ང་ཚོ་འདིར་ཡོང་དོན་རྒྱ་གར་ནང་གཞིས་ཆགས་སུ་ཡོང་བ་མ་ཡིན་པར། བོད་པའི་རང་དབང་འཐབ་རྩོད་དུ་ཡོང་བ་ཞིག་ཆགས་ཡོད། བོད་མིའི་རང་དབང་འཐབ་རྩོད་ཐད་གྲོས་ཚོགས་འདི་ཧ་ཅང་གལ་ཆེན་པོ་ཆགས་ཡོད་ལ། ང་གྲོས་ཚོགས་ནང་བསྡད་པའི་རིང་ཆོལ་ཁ་ཆོས་ལུགས་ཀྱི་ཕྱོགས་འཐེན་སྤངས་པ་ཡིན་ལ། མ་འོངས་པར་ཡང་ཐོག་མའི་དམ་བཅའ་ལྟར་ལས་ཀ་བྱ་རྒྱུའི་སྤོབས་པ་ཡོད། ཅེས་གསུངས་སོང་།
མདོ་སྟོད་སྤྱི་འཐུས་འོས་མི་ངག་དབང་འོད་འབར་ལགས་ཀྱིས་གཏམ་བཤད་གནང་དོན། ང་རང་གིས་འདས་པའི་ལོ་དྲུག་རིང་དགུ་བཅུ་གསུམ་གྱི་ཚོགས་གཙོའི་ལས་ཀ་བྱས་ཏེ། གང་ལ་གང་འཚམ་གྱི་གྲུབ་འབྲས་ཡག་པོ་ཐོབ་ཡོད་པའི་བསམ་ཚུལ་འཛིན་གྱི་ཡོད། གལ་སྲིད་ང་སྤྱི་འཐུས་ནང་སླེབས་པ་ཡིན་ན། དམིགས་ཡུལ་གཉིས་ཀྱི་ཐོག་ལ་ལས་ཀ་བྱ་ཐུབ་གི་རེད་བསམ་ཡོད། དང་པོ། བོད་ནང་དང་རྒྱ་ནག་ནང་ལ་འབྲེལ་བ་གང་འཚམ་ཡོད་སྟབས། མ་འོངས་པར་བོད་ནང་གི་དངོས་ཡོད་གནས་ཚུལ་མཁོ་སྒྲུབ་དང་། བོད་ཕྱི་ནང་བར་གྱི་འབྲེལ་ལམ་ཐོག་གང་འཚམ་བྱ་བ་བསྒྲུབ་ཐུབ་གི་རེད་བསམ་ཡོད། གཉིས་པ། ང་རང་སྔོན་མ་དགེ་རྒན་ལོ་མང་བྱས་མྱོང་སྟབས་བཙན་བྱོལ་བོད་མིའི་ཤེས་ཡོན་ཐོག་ནུས་པ་ཞིག་འདོན་ཐུབ་གི་རེད་བསམ་ཡོད། སྔར་ལྷ་སར་ཡོད་སྐབས་ནས་རྡོག་རྩ་གཅིག་སྒྲིལ་ཐོག་དམ་བཅའ་བརྟན་པོ་ཡོད་ལ་མ་འོངས་པར་ཡང་དེ་ལྟར་ཡིན། ཞེས་གསུངས་སོང་།
དེའི་རྗེས་མདོ་སྟོད་སྤྱི་འཐུས་ལས་ཐོག་པ་འབའ་བ་སྐལ་བཟང་རྒྱལ་མཚན་ལགས་ཀྱིས་གཏམ་བཤད་གནང་དོན། ང་རང་ ༡༩༩༩ ལོར་རྒྱ་གར་དུ་ཡོང་སྟེ་བདེ་སྲུང་བོད་གནས་ཉམས་ཞིབ་ནང་ལོ་ ༦ རིང་ལས་ཀ་བྱས་པ་ཡིན། ང་རྒྱ་གར་ལ་སླེབས་མ་ཐག་ལས་ཀ་རག་པ་དེས་རྒྱ་ནག་ལ་བརྡ་ལན་གསལ་བོ་ཞིག་བསྟན་ཡོད། ༢༠༠༦ ལོ་ནས་སྤྱི་འཐུས་ནང་སླེབས་པ་རེད། སྔོན་མ་ང་རང་གིས་རྒྱ་ནག་ནང་ལས་ཀ་བྱས་པ་དང་། བཙན་བྱོལ་ལ་འབྱོར་མ་ཐག་བོད་གཞུང་གི་ལས་ཀ་བྱས་པ། དེ་བཞིན་སྤྱི་འཐུས་ནང་ལོ་ལྔའི་རིང་ལས་ཀ་བྱས་པ་བཅས་ཀྱི་ཉམས་མྱོང་ཐོག རྒྱ་ནག་གི་སྲིད་ཇུས་ལ་བལྟས་ཏེ་བཙན་བྱོལ་བོད་གཞུང་གི་སྲིད་བྱུས་འཛིན་སྟངས་ཐོག གང་ལ་གང་འཚམ་ཞབས་ཞུ་བསྒྲུབ་ཐུབ་པའི་གདེང་ཚོད་ཅིག་ཡོང་གི་འདུག རྒྱ་ནག་གཞུང་དང་གསར་ལམ་ཁག་ཏུ་བོད་ཀྱི་གནས་སྟངས་ཐོག་འགྲེལ་བཤད་རྒྱག་སྟངས་སོགས་ལ་བོད་མི་མང་སྤྱི་འཐུས་ཤིག་གི་མིང་ཐོག་ནས་ལས་ཀ་བྱེད་པའི་སྡིངས་ཆ་ཞིག་རག་པ་རེད་ལ། མ་འོངས་པར་ཡང་དབུ་མའི་ལམ་དང་ལོ་རྒྱུས་ཐོག་བོད་རང་བཙན་ཡིན་པ་རྒྱ་ནག་ལ་འགྲེལ་བཤད་རྒྱག་ཆེད། ང་རང་གིས་བོད་རྒྱ་སྨྱུག་ཚོགས་ཟེར་བའི་སྨྱུ་གུའི་ཚོགས་པ་ཞིག་འཛུགས་འཆར་ཡོད། ཅེས་གསུངས་སོང་།
མདོ་སྨད་སྤྱི་འཐུས་འོས་མི་ཚེ་རིང་རྡོ་རྗེ་ལགས་ཀྱིས་གཏམ་བཤད་གནང་དོན། ང་རང་ཆབ་སྲིད་ཀྱི་དཀའ་ངལ་འོག་ ༢༠༠༥ ལོར་རྒྱ་གར་ལ་ཡོང་བ་ཡིན། སྤྱིར་ང་རང་འདིར་ལངས་རྒྱུའི་སྤོབས་པ་མི་འདུག གང་ཡིན་ཟེར་ན་བོད་མི་མང་སྤྱི་འཐུས་ཟེར་བ་དེ་ཧ་ཅང་གལ་ཆེན་པོ་ཞིག་རེད། ང་རང་བཙན་བྱོལ་དུ་ཡོང་དགོས་དོན་ཡང་རྩ་དོན་ཆེད་ཡིན་ལ། མ་འོངས་པར་ཡང་རྩ་དོན་ཐོག་དཀའ་ལས་རྒྱག་རྒྱུའི་ཆོད་སེམས་ཡོད། དེ་བཞིན་ང་རང་བཙན་བྱོལ་བོད་མིའི་གཞིས་ཆགས་ཁག་མང་པོར་སོང་བ་ཡིན། གཞིས་ཆགས་ཁ་ཤས་ཧ་ཅང་སྐྱོ་བོ་རེད་ལ། བོད་ནས་གསར་དུ་ཕེབས་མཁན་ཚོར་ཡང་ས་ཞིང་དང་ཁང་པ་ཡོད་པ་མ་རེད། གལ་སྲིད་ང་སྤྱི་འཐུས་ནང་སླེབས་པ་ཡིན་ན། སྤྱི་ཚོགས་ནང་གི་དཀའ་ངལ་འདི་རིགས་གཞུང་ལ་འཁྱོལ་ཐུབ་པ་བྱ་རྒྱུ་ཡིན། ཞེས་བརྗོད་བྱུང་།
མདོ་སྨད་སྤྱི་འཐུས་ལས་ཐོག་པ་ཚེ་རིང་གཡུ་སྒྲོན་ལགས་ཀྱིས་གཏམ་བཤད་གནང་དོན། ལོ་ངོ་བཞིའི་རིང་སྤྱི་འཐུས་ནང་ལས་ཀ་བྱས་པའི་ཉམས་མྱོང་ལ་གཞིགས་ན། སྤྱི་འཐུས་གང་ཟག་གཅིག་གཉིས་ཅི་ཙམ་ཡག་པོ་ཡོད་ཀྱང་གྲོས་ཚོགས་ནང་ནུས་པ་འདོན་ཐུབ་ཀྱི་མེད་པ་ཤེས་ཡོད། དེར་བརྟེན། ངས་མང་པོ་ཞིག་བྱ་རྒྱུ་ཡིན་ཟེར་ནས་ཁས་ལེན་རྒྱུ་ཁག་པོ་རེད། འོན་ཀྱང་ང་ལ་འབོད་སྐུལ་ཞིག་ཞུ་རྒྱུ་ཡོད། ང་ཚོ་འདི་ལྟར་འཛོམ་དགོས་པ་དེ་བཙན་བྱོལ་སྤྱི་ཚོགས་ཡར་རྒྱས་ཚགས་ཚུད་ཡོང་ཐབས་དང་། བོད་པའི་བདེན་དོན་འཐབ་རྩོད་ལ་ནུས་པ་འདོན་ཆེད་རེད། མ་འོངས་པར་སྤྱི་ཚོགས་ཀྱིས་འཐུས་མི་སུ་འདྲ་ཞིག་བསྐོས་ཀྱང་། བསྐོས་ཚར་རྗེས་སྣང་མེད་དུ་འཇོག་རྒྱུ་མ་ཡིན་པར་དུས་རྒྱུན་ཞི་དག་བྱས་ཏེ། བཟང་པོར་ངོས་འཛིན་དང་ངན་པར་ཐེར་འདོན་བྱ་རྒྱུ་གལ་ཆེན་པོ་རེད། ཅེས་བརྗོད་བྱུང་།
མདོ་སྟོད་སྤྱི་འཐུས་འོས་མི་ལི་ཐང་འཇམ་དབྱངས་བཟོད་པ་ལགས་ཀྱི་གཏམ་བཤད་གནང་དོན། ཚོགས་པ་སྒྲིག་འཛུགས་དང་། རང་འགུལ་དང་བླངས་པ་བརྒྱད་དགུ་ཞིག་གིས་ང་སྤྱི་འཐུས་འོས་མིའི་ནང་བཏོན་འདུག ཁོང་ཚོས་ང་ལ་སྤྱི་འཐུས་འོས་མིར་ལངས་འདོད་ཡོད་མེད་འདྲི་སྐབས། ངས་ལངས་རྒྱུ་ཡིན་ཞེས་ལབ་ཡོད། གལ་སྲིད་གྲོས་ཚོགས་ནང་སླེབས་པ་ཡིན་ན། མ་འོངས་པར་འགྲིག་མིན་གྱི་གནས་ཚུལ་ཅི་ཞིག་བྱུང་ཡང་། མང་ཚོགས་ཀྱི་མགོ་ལ་གཡུག་རྒྱུ་མ་ཡིན་པར་སོ་སོའི་འགན་ལེན་ཁག་འཁུར་བྱ་རྒྱུ་ཡིན། གྲོས་ཚོགས་ནང་ལས་ཀ་བྱེད་སྐབས་ཕྱོགས་སུ་མ་ལྷུང་བ་དང་། གཞན་གྱི་ཟེར་རྗེས་མི་འབྲང་རྒྱུ་གཉིས་ང་རང་གི་དམ་བཅའ་ཡིན། ཞེས་གསུངས་སོང་།
དབུས་གཙང་སྤྱི་འཐུས་ལས་ཐོག་པ་ཟླ་བ་ཕུན་སྐྱིད་ལགས་ཀྱི་གཏམ་བཤད་གནང་དོན། ང་རང་ལ་མཚོན་ན་གྲོས་ཚོགས་འཐུས་མི་སྐབས་གཉིས་བྱས་ཚར་བ་ཡིན། ལས་ཡུན་དེའི་རིང་ཉིན་གཅིག་ཀྱང་གྲོས་ཚོགས་ཀྱི་ཚོགས་འདུར་དགོངས་པ་ཞུས་མྱོང་མེད། འོན་ཀྱང་གྲོས་ཚོགས་ལ་བཅར་ཏེ་གྲུབ་འབྲས་འདི་ཡིན་ཟེར་ནས་སྟོན་རྒྱུ་ཡང་མེད། གང་ཡིན་ཟེར་ན་ང་ཚོའི་གནས་བབ་དེ་གཞན་དབང་འོག་ཡོད་སྟབས། གྲོས་ཚོགས་འཐུས་མིས་ཕྱོགས་འགལ་ཚོགས་པའི་ལས་འགན་དང་། གཞུང་འཛིན་ཚོགས་པའི་ལས་འགན་གཉིས་ཀ་འཁུར་དགོས་སྟབས། སྔོན་ཆད་འདི་བྱས་ཡོད་ཟེར་ནས་སྟོན་རྒྱུ་མེད་ལ། མ་འོངས་པར་འདི་བྱ་རྒྱུ་ཡིན་ཟེར་ནས་ཁས་ལེན་ཡང་མེད། ང་ལ་ཡོད་པ་དེ་གང་ཡིན་ཟེར་ན། འདས་པའི་སྐབས་གཉིས་ཀྱི་ལས་ཡུན་རིང་གྲོས་ཚོགས་ཀྱི་ལས་དོན་གང་འདྲ་ཞིག་ཡིན་རུང་། གནད་དོན་གཞིར་བཞག་ཐོག་སྐད་ཆ་བཤད་པ་ལས་ཆོལ་ཁ་ཆོས་ལུགས་གཞིར་བཞག་ཐོག་འཐེན་འཁྱེར་བྱས་པ་སྣེ་གཅིག་ཀྱང་མེད་བཅས་སྤོབས་པ་ཆེན་པོས་བཤད་རྒྱུ་ཡིན། ཞེས་བརྗོད་བྱུང་།
དབུས་གཙང་སྤྱི་འཐུས་འོས་མི་ཟླ་སྒྲོན་ཤར་གླིང་ལགས་ཀྱིས་གཏམ་བཤད་གནང་དོན། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་༧གོང་ས་མཆོག་གིས་ང་ཚོར་དམངས་གཙོ་གསོལ་རས་གནང་སྟེ། གྲོས་ཚོགས་ཐོག་མར་དབུ་བརྙེས་པ་རེད། དེ་ནི་ཧ་ཅང་ཡང་དག་པ་ཞིག་དང་དོན་སྙིང་ལྡན་པ་ཞིག་རེད། དེ་བཞིན། ༡༩༩༡ ཟླ་ ༦ ཚེས་ ༡༤ ཉིན་བཙན་བྱོལ་བོད་མིའི་བཅའ་ཁྲིམས་གཏན་འབེབས་བྱས་པ་རེད། བཙན་བྱོལ་བོད་མིའི་དམངས་གཙོ་འདི་ཡང་དག་པ་ཞིག་རེད་དམ་ཟེར་ན། ཡང་དག་པ་རེད། འོན་ཀྱང་དམངས་གཙོ་ཚད་ལྡན་ཞིག་རེད་དམ་ཟེར་ན། ད་དུང་ཚད་ལྡན་རྩ་བ་ནས་མ་རེད། དམངས་གཙོ་ལ་རང་དབང་དང་མཉམ་དུ་འགན་འཁྲི་ཞིག་ཡོད་ཀྱང་། འདས་པའི་ལོ་ངོ་ལྔ་བཅུའི་རིང་ང་ཚོས་རང་དབང་ལོངས་སུ་སྤྱད་དེ། འགན་འཁྲི་དང་ལེན་བྱས་མི་འདུག མ་འོངས་པར་དམངས་གཙོ་ཚད་ལྡན་པ་ཞིག་མི་འདྲ་ཞིག་གིས་བཟོ་ཐུབ་གི་རེད་དམ་ཟེར་ན། ད་ལྟའི་ན་གཞོན་ཚོས་བཟོ་ཐུབ་གི་རེད་ཟེར་ནས་གདེང་ཚོད་ཆེན་པོས་བཤད་ཐུབ་ཀྱི་ཡོད་ལ། རྒྱུ་མཚན་འདིའི་འོག་ནས་ང་ཡང་སྤྱི་འཐུས་འོས་མིའི་ནང་ལངས་པ་ཡིན། ཞེས་གསུངས་སོང་།
མདོ་སྟོད་སྤྱི་འཐུས་ལས་ཐོག་པ་གསེར་རྟ་ཚུལ་ཁྲིམས་ལགས་ཀྱིས་གཏམ་བཤད་གནང་དོན། སྔར་ངེད་ཚང་ལ་ནང་མི་ ༡༦ ཙམ་ཡོད་མཁན་ཞིག་ཡིན་ཡང་། བཞི་མ་གཏོགས་གཞན་ཚང་མ་རྒྱ་དམར་གྱི་བཙན་འཛུལ་འོག་བསད་པ་དང་ཤི་བའི་གནས་ཚུལ་བྱུང་འདུག གཉིས་པ་ང་ལ་དྲིན་ཆེན་ཕ་མའི་ངོས་ནས་ཁ་ཆེམས་ཤིག་བཞག་ཡོད། དེར་བརྟེན། ངའི་སེམས་གཏིང་དུ་རྒྱ་དམར་གཞུང་ལ་ཤ་ཁོན་ཡོད་ལ་ཁྲག་ཁོན་ཡང་ཡོད། ངའི་བསམ་བློའི་རྨང་གཞི་འདི་ལ་དུས་ནམ་ཡང་འགྱུར་བ་མེད། ང་བཙན་བྱོལ་ལ་ཐོག་མར་ཡོང་སྐབས་ནས་སྐྱིད་པོ་ཞིག་ཡོད་རྒྱུ་རེད་སྙམ་སྟེ་ཡོང་བ་མིན་ལ། གྲོས་ཚོགས་ནང་ལས་ཀ་བྱས་པའི་རིང་ལ་ཡང་གཞན་གྱི་ཁ་རྗེས་སུ་རྒྱུག་མཁན་ཞིག་མིན། གལ་སྲིད་སྐབས་བཅོ་ལྔ་བའི་སྤྱི་འཐུས་ནང་མི་དམངས་ཀྱིས་གོ་སྐབས་སྤྲད་པ་ཡིན་ན། སོ་སོས་གང་ཐུབ་ཀྱིས་བསམ་བློ་བཏང་སྟེ་ལས་ཀ་བྱ་རྒྱུའི་འཆར་གཞི་ཡོད། ཅེས་གསུངས་སོང་།
མདོ་སྨད་སྤྱི་འཐུས་འོས་མི་བསོད་ནམས་རྒྱལ་མཚན་ལགས་ཀྱིས་གཏམ་བཤད་གནང་དོན། ཉེ་སྔོན་ཕྱོགས་འདྲ་མིན་ནས་ཁ་པར་ཡོང་སྟེ་སྤྱི་འཐུས་ནང་ལངས་འདོད་ཡོད་མེད་དྲིས་སོང་། ང་རང་གིས་ལངས་རྒྱུ་ཡིན་ཞེས་ལབ་པ་ཡིན། གང་ཡིན་ཟེར་ན་ངས་ཁ་གཏོད་ས་རྒྱ་ནག་ཡིན། བཙན་བྱོལ་བོད་མིའི་གྲོས་ཚོགས་ནང་ལངས་རྒྱུའི་ལམ་ཁ་དང་ཐོབ་ཐང་ཡོད་པ་འདིས་རྒྱ་ནག་ལ་རྣམ་འགྱུར་ཞིག་སྟོན་བསམ་པ་ཡིན། གལ་སྲིད་ང་གྲོས་ཚོགས་ནང་སླེབས་པ་ཡིན་ན། ཆོལ་ཁ་དང་ཆོས་ལུགས་ཀྱི་འཐེན་འཁྱེར་དེ་འདས་པའི་ལོ་རྒྱུས་ཁྲོད་ཀྱི་བོད་ཕམ་ཉེས་སུ་གཏོང་མཁན་གཙོ་བོ་ཞིག་ལ་ངོས་འཛིན་བྱེད་ཀྱི་ཡོད། འདས་པའི་ལོ་རྒྱུས་ནང་དང་ད་ལྟའི་གནས་བབ་གཉིས་བསྡུར་ཏེ། དེབ་ཀྱི་ནང་བཀོད་ཡོད་པ་དང་། སྤྱི་ཚོགས་ཀྱི་གནས་སྟངས་དངོས་གཉིས་བསྡུར་ཏེ་བསམ་འཆར་ཁ་ཤས་འབུལ་ཐུབ་གི་རེད་བསམ་ཡོད། ཅེས་གསུངས་སོང་།
གསར་འགོད་པ། དོན་འགྲུབ་བཀྲ་ཤིས།
འོན་ཀྱང་ཁྲིམས་ལ་མི་བརྩི་མཁན་ཞིག་ཁྲིམས་བཟོ་ལྷན་ཚོགས་ནང་སྡོད་ཀྱི་ཡིན་ཟེར་ན་གད་མོ་ཤོར་ཡ་རང་རེད། མ་གཞི་ནས་ཁྲིམས་ལ་མ་བརྩིས་ན་གདམ་བྱ་འདེམས་བྱེད་ཀྱི་ཐོབ་ཐང་མེད་པ་བཟོ་ཡི་མ་རེད་དམ། སྔོན་མ་དུས་བབ་དང་བྱ་དུར་ཁ་མཆུ་ཐུག་སྐབས། ཁྲིམས་ཁང་གིས་དགེ་འདུན་རབ་གསལ་ལ། གལ་སྲིད་ང་ཚོའི་བཅད་ཁྲ་ལ་མ་ཉན་ན། ཡུལ་དུས་ཀྱིས་དབང་གིས་འཛིན་བཟུང་དང་བཙོན་འཇུག་སོགས་བྱེད་ཐབས་མེད་ཀྱང༌། དམངས་གཙོའི་ཁེ་དབང་གདམ་བྱ་འདེམས་བྱེད་ཀྱི་ཐོབ་ཐང་མེད་པ་ཆགས་ཀྱི་རེད་ཅེས་བཤད་པ་མ་རེད་དམ། ཁྲིམས་ཁང་གི་བཅད་ཁྲ་ལ་མི་བརྩི་མཁན་ཞིག་ཡིན་ན་རྒྱལ་རབས་ཇི་ལྟར་མཁས་ཀྱང༌རུང་། ཕྱོགས་གཞེན་ག་ཚོད་མེད་ཀྱང་རུང་འོས་ཕར་བླུགས་པ་རང་ཉིད་འོས་གཞི་ནང་ཚུར་སྡོད་པ་སོགས་ཆོག་གི་མ་རེད་སྙམ།
རང་བཙན་ལག་དེབ་ནང་ཕ་ཡུལ་བརྗེ་མོ་བརྒྱབ་པར་སྐྱོན་རང་མི་འདུག དོན་དུ་བོད་སྤྱི་པའི་ལས་ཀ་ཡག་པོ་ལས་ཡོད་ན་འགྲིག་པ་རེད། སྐྱེས་ས་མལ་དྲོ་ཡིན་པ་དང་ཕ་མ་གང་རུང་ཁམས་དང་ཨ་མདོ་ཡིན་ན། ཆོལ་ཁོངས་གང་འགྲོ་རང་དབང་རེད། སྐྱེས་ས་རྒྱ་གར་ཡིན་ཡང་ཕ་ཡུལ་བོད་ག་རེ་ཡིན་ན་གཅིག་ཡིན་དགོས་པ་རེད། དེ་ལ་སྐྱོན་རང་མི་འདུག
སྤྱི་མཐུས་བརྗོད་གཞི་ལས་དྲངས་ཏེ་<མཁྲིས་ནད་ཅན་ལ་མར་ཁུར་སྟེར་བ>ཟེར་རྒྱུ་ཞིག་གླེང་འདོད་ཡོད།
ང་ཚོས་ཆོས་རྒྱུད་སྤྱི་མཐུས་ལང་འདོད་མེད་པ་ཞིག་དང་། ཆོས་རྒྱུད་སྤྱི་མཐུས་མི་དགོས་ཟེར་ནས་དགག་བྱ་གནང་མཁན་ཞིག་ཆོས་ལུགས་ཀྱི་སྤྱི་མཐུས་ལ་བསྐོ་བཞག་བྱེད་ན་མཁྲིས་ནད་ཅན་ལ་མར་ཁུར་སྟེར་བ་དང་ཁྱད་ཅི་ཡོད།
ངས་དེ་རིང་གསལ་བསྒྲགས་ཤིག་གི་ནང་དུ་ས་སྐྱའི་ཆོས་སྒར་དང་། ངོར་མ་དགོན། རྫོང་དཀར་ཆོས་ལྡན། ས་སྐྱའི་མཐོ་སློབ་བཅས་དགོན་སྡེ་ཁག་བཞི་ནས།
པད་མ་འབྱུང་གནས་དང།
པད་མ་ནོར་བུ་གཉིས་ལ་དམ་ཕྲུག་ཆེ་ཐག་ཆད་རེ་རྒྱག་ཏེ་དཔལ་ལྡན་ས་སྐྱའི་སྤྱི་མཐུས་ལ་བསྐོ་བཞག་བྱ་རྒྱའི་གཏད་ཁེལ་གནང་འདུག
དགོན་པ་སོ་སོའི་དམ་ཕྲུག་དེས་དགོན་པ་དེའི་ཁྱབ་ཁོངས་སུ་ཡོད་པའི་གྲྭ་མང་གི་བསམ་བློའི་ཚབ་མཚོན་ཐུབ་ན་དགོན་སྡེ་ཆེ་ཁག་བཞི་ནས་མཐུས་མི་བདམས་ཟིན་པས་གཞན་གྱིས་རྒྱར་སྐྱོར་བྱེད་མི་ལ་མ་ལྟོས་པ་མང་མོས་ཐོག་ནས་བསྐོས་བཞག་བྱེད་པའང་མཚོན་ཐུབ་པས་འོས་ཤོག་བླུག་པའི་ངལ་བ་ཅི་ཞིག་དགོས།
གལ་ཏེ་ས་སྐྱའི་དགོན་སྡེ་ཁག་བཞིའི་ཡོད་པའི་གྲྭ་མང་རྣམས་མོས་མཐུན་མེད་བཞིན་དུ་དམ་ཕྲུག་དེ་བེད་སྤྱད་བྱས་པ་ཡིན་ན། ལས་སྣེ་རང་གི་དམ་ཕྲུག་བེད་སྤྱད་ལོག་པ་བྱས་པ་དང་།
དགོས་སོ་སོའི་ཞེན་ཁོག་གི་བསམ་བློ་གསལ་པོ་མངོན་པ་ལས་དོན་སྙིང་ཅི་ཞིག་ཡོད།
མ་ཟད་མང་གཙོ་ཡང་དག་པའི་ལམ་ལུགས་དང་ཡང་འགལ་འདུག་ལ་དེ་སྔོན་འདི་འདྲ་སུ་གང་གིས་བྱས་མྱོང་མེད་པ་ཞིག་རེད། པད་མ་འབྱུང་ནས་ནི་ཆོས་ལུགས་ཀྱི་སྤྱི་མཐུས་མི་དགོས་ཟེར་མཁན་གྱི་གཏེར་བོ་ཡིན་པ་ཚང་མས་མཁྱེན་གསལ་རེད།
འདི་ངས་དགོན་སྡེ་ཁག་བཞི་ལ་སྐྱོན་བརྗོད་བྱེད་ཀྱི་མ་ཡིན་ཞིང་། འོན་ཀྱང་ཕྱོགས་རིས་ནད་ཀྱིས་ཟིན་པའི་ལས་སྣེ་འགའ་རེས་ཅི་ཡང་མི་ཤེས་པའི་རྒྱུག་ཁྱི་ཁ་ཤས་དབང་བསྒྱུར་བྱས་ཏེ་དགོན་པ་སྤྱིའི་མིང་ཁྱེར་བ་ལ་ང་མི་དགའ་འི།
རྒན་བསོད་ནམས་རྒྱལ་མཚན་འདི་སྔོན་མ་ང་ཚོའི་རྒན་རེད། ཁོང་ལ་རྒྱལ་རབས་ལོ་རྒྱུས་སོིགས་ཡག་པོ་བཤད་རྒྱུ་ཡོད་རེད། རྗེས་སུ་ཡོངས་གླིང་ཟླ་བ་ཚེ་རིང་གི་རྒྱུགས་ཁྱི་གྲས་ཆགས་པ་ནས་ང་ཧ་ལེ་སོང་། དེར་བརྟེན་ཁོ་སྤྱི་འཐུས་ཐོབ་པ་ཡིན་ཚེ་ཡོངས་གླིང་ཟླ་བའི་ངན་རོགས་་གཅིག་མང་དུ་སོང་ནས་བོད་གཞུང་གི་མང་གཙོ་ཡར་རྒྱས་གཏོང་རྒྱུ་ཕར་བཞག མང་གཙོའི་ཀ་བ་གཅིག་སྟེ་ཆེས་མཐོའི་ཁྲིམས་ཞིབ་ཁང་རྩིས་མེད་གཏོང་རྒྱུ་ད་རེད།
བསོད་ནམས་རྒྱལ་མཚན་ལྟ་བུའི་མི་བུ་སྒེར་སེམས་པ་ཞིག་གི་ཆོལ་ཁ་ཕྱོགས་རིས་ཞེས་བཤད་ན་ད་བཟོད་བོད་མི་རྣམས་བཙན་བྱོལ་དུ་སྡོད་དགོས་རྒྱུ་མ་རེད།
མདོ་སྨད་སྤྱི་འཐུས་འོས་མི་བསོད་ནམས་རྒྱལ་མཚན་ལགས་ནི་དངོས་གནས་མི་དྲང་པོ་ཞིག་ཡིན་ལ་བསམ་ཤེས་མཁས་པ་དང་། བོད་ཀྱི་ལོ་རྒྱུས་དང་ཆབ་སྲིད་སོགས་གང་ཅིའི་ཐོག་མཁས་པ་ཡིན་པས། ཁོང་ནི་དངོས་གནས་བཙལ་ཀྱང་རེག་དཀའ་བའི་འཇོན་ལྡན་ཞིན་ཡིན
འདིའི་ནང་གི་མི་ཁ་ཤས་ངོ་ཤེས་ཀྱི་འདུག ཡིན་ན་ཡང་ངེས་བར་དུ་འོས་ཤོག་ཐོབ་དགོས་ས་ཞིག་ཡོད་པ་དེ་སྒྲོལ་དཀར་སྐྱབས་ལགས་ཡིན། གལ་སྲིད་ཁྱོད་ཀྱིས་སྒྲོལ་དཀར་སྐྱབས་ལགས་ཀྱི་བཙོན་སྐྱོད་ཟིན་ཐོ་བཀླགས་ཡོད་ན་དེ་འདྲར་བསམ་ངེས་ཡིན། མདོ་སྨད་མི་མང་གི་འཐུས་ཚབ་བྱེད་འོས་པའི་སྤྱི་འཐུས་སྒྲོལ་དཀར་སྐྱབས་ལགས་དང་བསོད་ནམས་རྒྱལ་མཚན་གཉིས་རེད། བསྟན་འཛིན་བརྩོན་འགྲུས་དང་ངག་དབང་འོད་འབར་གཉིས་ནི་སྤྱི་འཐུས་བྱེད་པ་ལས་དྭངས་བླངས་ལས་འགུལ་སྤེལ་མཁན་བྱས་ན་ཡག་ག་འདུག ཁོ་རང་གཉིས་ཀྱི་གཏམ་གཤད་མང་པོ་གོ་མྱོང་ཡོད། ཁོ་རང་གཉིས་མི་མང་གི་སྣེ་ཁྲིད་བྱེད་ཐུབ་མཁན་རེད་དེ་བསམ་བློའི་སྣེ་ཁྲིད་ཐུབ་མཁན་རེད་བསམ་མ་སོང་།
ངག་དབང་འོད་འབར་ཟེར་བ་དེ་སྔོན་མ་མལ་གྲོ་གུང་དཀར་ནས་ཡིན་ཟེར་གྱི་ཡོང་རེད། ལོ་ཤས་སྔོན་ནས་བཟུང་རྒྱ་རི་སྒྲོལ་མས་ཁྱོད་རང་མདོ་སྟོད་ནང་ཤོག་དང་སྤྱི་འཐུས་ ཐོབ་པ་ལ་རོགས་པ་བྱ་རྒྱུ་ཡིན་ཞེས་བཤད་ཡོད་རེད། དེ་རྗེས་ཁོའི་རང་དབང་ལག་དེབ་ནང་གི་མལ་གྲོ་གུང་དཀར་དེ་སྒ་པ་ལ་བསྒྱུར་བ་མ་ཟད། ཕུ་པ་དཔོན་ཅན་གྱི་འོས་གཞི་ནང་ལའང་བཀྲམས་ཡོད་རེད། དབུས་གཙང་ནང་ད་བར་གསར་འབྱོར་ལ་འོས་ཐོབ་རྒྱུའི་ལམ་ཁ་མེད་ཙང་གོ་སྐབས་བཟུང་བ་ རེད། ཚང་མས་གཟབ་གཟབ་གནང་དགོས།
རྨོག་རི་བསྟན་པའི་ཨུ་ཚུགས་ལ་སུས་ཀྱང་དོ་ཟླ་མེད་པས་ཁོ་སྤྱི་འཐུས་ལ་སླེབས་པའི་ཉིན་མོ་ནས་སྤྱི་འཐུས་ཡོངས་དང་བཀའ་བློན་ཚོ། ཐ་ན་༧ གོང་ས་མཆོག་ནས་ཀྱང་ཁོའི་དགོངས་ཚུལ་ལ་བསྟུན་ཅི་ཐུབ་བྱེད་རྒྱུ་གལ་ཆེན་པོ་རེད། ད་ལྟར་མ་བྱས་ཚེ་གྲོས་ཚོགས་འདི་དམག་ཆེན་གསུམ་པའི་གཡུལ་ས་ཞིག་ཆགས་རྒྱུ་ཡིན་པ་ངས་དཀོན་མཆོག་དཔང་དུ་བཙུགས་ནས་མནའ་བསྐྱལ་ཐུབ།
སྤྱི་འཐུས་ལས་ཐོག་པ་དེ་ཚོས་བཏང་གི་ཡིན། འཇུག་གི་ཡིན་ཟེར་ནས་ལོ་སྔ་འདས་སོང་བ་རེད། ག་རེ་བཏང་ཡོད་དང་ག་རེ་འཇུག་ཡོད་བཤད་དགོས་པ་ལས་བཏང་གི་ཡིན། འཇུག་གི་ཡིན་ཟེར་ཡག་གི་དུས་ཚོད་རྫོགས་་ཚར་རེད། མ་འཇོན་ན་བཞག་ན་ཡག་གི་རེད།
བོད་རྒྱ་སྨྱུག་ཚོགས་ཟེར་བའི་སྨྱུ་གུའི་ཚོགས་པ་ཞིག་འཛུགས་འཆར་ཡོད། ཟེར་བ་དང་། ཤ་འཁོན་ཡོད། རུས་འཁོན་ཡོད་ཟེར་བ་ཚང་མ་སྟོང་ལབ་རེད།
ནོར་གླིང་སྒྲོལ་དཀར་སྐྱབས་དང་མི་ལོ་བཞི་ཙམ་ལ་འགྲོགས་ཤིང་འདྲིས་པའི་རྒན་བསོད་ནམས་རྒྱལ་མཚན་གཉིས་ངས་མདོ་སྨད་སྤྱི་འཐུས་ཀྱི་འོས་མིར་འོས་ཤོག་ལྡུག་གི་ཡིན།
གཞན་རིང་རྡོ་རྗེ་ལགས་ལ་ཆ་རྒྱུས་མེད་པས་རང་ལ་ཆ་མེད་རྒྱུས་མེད་ཀྱི་མི་ཞིག་འོས་ལྡུག་པ་ནི་དོན་དང་ལྡན་ཞིག་མིན་པར་སྙམ། དེ་བས་ཚེ་རིང་རྡོ་རྗེ་ལགས་ལ་དགོངས་དག་ཞུ།
ད་ཐེངས་འོས་བསྡུ་འདིའི་ཐོག་བཙན་བྱོལ་བོད་མི་ཚོས་དམིགས་བསལ་གྱིས་དོ་སྣང་གནང་པ་དང་བཀའ་བློན་དང་སྤྱི་འཐུས་སྡོད་འདོད་ཡོད་མཁན་དང་མི་དམངས་དང་ཚོགས་པ་ཁག་གིས་འདེམས་ཐོན་བྱུང་པ་དེ་དག་ཀྱང་སྔོན་དང་མི་འདྲ་པ་ཤེས་འཇོན་དང་ཉམས་མྱོང་ཡོད་མཁན་འབའ་ཞིག་ཡིན་ལགས་ན། དངོས་གནས་སྤྲོ་སེམས་སྐྱེས། ཚང་མ་ལ་བཀྲིས་བདེ་ལེགས་ཞུ
༄། །ད་ང་ཚོ་དངོས་གནས་དམངས་གཙོ་ཡང་དག་པའི་ལམ་ལ་འགྲོ་ངོ་མ་རེད། ས྄ྨྲ་བར྄ྗོད་ཀྱི་རང་དབང་བེད་དཔྱོད་ཀྱི་གང་བྱུང་མང་བྱུང་ལབ་ཀྱིན་འདུག ཧ་ཧ་ཧ་ བལ྄ྟས་མོ་ཆེན་པོ་འདུག །
སྤྱིར་བཏང་ཚང་མས་བོད་སྤྱི་བའི་ལས་དོན་སྒྲུབ་དགོས་་བསམ་ཡོད་པར་ཡིད་ཆེས་བྱེད་ཀྱི་ཡོད་པས་ཚང་མ་ལ་བཀྲཤིས་་བདེ་ལེགས་ཞུ། ལྷག་པར་ངོ་ཤེས་སྒྲོལ་དཀར་སྐྱབས་དང་བསོད་ནམས་རྒྱལ་མཚན་གཉིས་ལ་རྟེན་འབྲེལ་དང་འབྲེལ་མཐའ་མའི་རྒྱལ་ཁ་ཐོབ་པའི་སྨོན་འདུན་ཞུ།
མི་འདི་ཚོ་སྤྱི་འཐུས་ཀྱི་འོས་མིར་ལངས་པ་ལ་འཚམས་འདྲི་དང་བཀྲ་ཤིས་བདེ་ལེགས་ཡོད།
ཕལ་ཆེར་བའི་མིང་གོ་མྱོང་ཙམ་ལས་ངོ་ཤེས་མཁན་ཀརྨ་ཡེ་ཤེས་དང་སྐལ་བཟང་རྒྱལ་མཚན་གཉིས་རེད། ཁོང་གཉིས་ཡག་ཐག་ཆོད་ཅིག་ཡིན་པ་ངས་ཀྱང་ཤེས་ཡོད་ཁྱེད་ཅག་གིས་ཀྱང་ཤེས་འདུག འོན་ཀྱང་རྩོད་རྙོག་ཅན་གསེར་རྟ་ཞིག་སླེབས་འདུག དེ་ཚོ་མར་གཡུགས་ན་ལེགས་ཀི། དེའི་རྗེའི་མདོ་སྨད་བསོད་ནམས་རྒྱལ་མཚན་ཟེར་བ་འདི་སྤྱི་འཐུས་ཀྱི་འོས་མིར་ལངས་ཀྱི་ཡིན་གསུངས་འདུག གོ་ཚོད་ལྟར་ན་ཁོང་ཕྱི་རྒྱལ་དུ་ཡོང་རྒྱུ་གཏན་ཁེལ་འདུག་ཅེས་ཟེར། དེ་ཡིན་ན་དང་པོ་དགོངས་པ་ཞུས་ན་ཡག་གི་བསམ་བྱུང་། དེའི་ཐད་དུ་བདེན་མིན་ཁོང་ལ་འདྲི་རོགས། གཞན་དེའི་ནང་གི་མང་ཆེ་བ་གོ་མྱོང་ལས་མི་ཤེས་ཀི། ཡག་པོ་ཡིན་རྒྱུ་རེད།
ངོ་མ་བཤད་དཀའ་ཡ། མི་ཁས་ཀྱི་བརྗོད་བཞིན་པ་ནི་བསྟན་འཛིན་བརྩོན་གྲུས་སོགས་ན་གཞོན་རུ་ཁག་གིས་གཞོན་ནུའི་ལས་ཁུར་བ་གང་མང་སྤྱི་འཐུས་སུ་འཇུག་རྒྱུའི་ཐབས་ཇུས་བྱེད་པ་ནི་ངོ་མ་གཞུང་དབུ་མའི་ལམ་མགོ་སྟེང་སློག་སྟེ་རང་བཙན་གཙང་མར་བསྐྱོད་ཐབས་ཀྱི་ཇུས་ངན་བཤམས་བཞིན་པ་རེད་ཟེར་སྨྲོ་ངན་འབོད། ཡང་འགའན་རེས་དེ་འདྲ་མ་རེད་ཁོང་རྣམས་ནི་ཕྱོགས་ལྷུང་བྲལ་བའི་བོད་དོན་འཐབ་རྩོད་པ་ངོ་མ་རེད་ཟེར་བསྟོད་བསྔགས་བྱེད་བཞིན་པས་ཡང་སྙིང་དོན་ངོ་མ་དང་རྩ་དོན་ག་རེ་ལ་བསམ་བཞིན་པ་མིའི་རི་མོ་ནང་ལ་ཡོད་པས་བརྗོད་དཀའ་བར་འདུག།
ད་རེས་གོང་གི་མི་འདི་དག་གི་ཁྲོད་ན་ང་ལ་ཡིད་ཆེས་འཕེར་འོས་པའི་སྤྱི་འཐུས་ཤིག་མེད། གང་ལྟར་ང་ཚོའི་སྤྱི་ཚོགས་འདི་ད་དངོས་གནས་བཤད་ཤེས་ཀྱི་མི་འདུག ཀརྨ་ཆོས་འཕེལ་ལྟ་བུའི་དེ་འདྲའི་མི་རྣམ་དཔྱོད་དང་ལངས་ཕྱོགས་ཡོད་པ་དེ་ཚོ་གཡུག ཁ་ནང་དུ་སོ་མེད་པའི་པ་སངས་ཚེ་དབང་ལྟ་བུ་ཡར་བསྐོས། རྨོག་རུ་བསྟན་པ་ལྟ་བུའི་གྲྭ་བ་དེ་ཚོ་ཡར་བཞག ཀླུ་མཁར་བྱམས་ལྟ་བུའི་མི་རང་ཚུགས་ཅན་དེ་ཚོ་མར་བཞག ཨོ་རྒྱན་སྟོབས་རྒྱལ་ལྟ་བུའི་མི་ཐབས་ཇུས་ཅན་དེ་ཚོ་ལྷག གངས་ལྷ་མོ་ལྟ་བུའི་མི་ཚོན་ཁྲ་ཅན་དེ་ཚོ་ཡར་ཁྲིད། ད་ནི་ང་རང་བཙན་བྱོལ་སྤྱི་ཚོགས་འདིར་ཁ་མིན་དོན་གྱི་སུན་སོང་།
རྒན་བསོད་ནམས་རྒྱལ་མཚན་དང༌། ངག་དབང་འོད་འབར་གཉིས་པོ་མི་སྤུས་བཟང་པོ་རེད། ཕྱོགས་རེས་འཐེན་ཁྱེར་མེད་མཁན་ཞིག་ལ་ངོས་འཛིན་བྱེད་བཞིན་ཡོད། མདོ་སྟོད་སྨད་གཉིས་ཀྱིས་ཁོང་གཉིས་སྤྱི་འཐུས་ལ་འོས་མ་བླུགས་ན་ཞབས་འདྲེན་རེད། ཆོལ་ཁོངས་མི་མང་དེ་ཚོ་ཕྱོགས་རེས་ཅན་ཡིན་པའི་རྟགས་རེད།
རྣམ་པ་ཚོར་ཐུགས་རྗེ་ཆེ་ཞེས་ཞུ་རྒྱུ་ཡིན། འོན་ཀྱང་དབུས་གཙང་གི་ཁོངས་སུ་སྤྱི་འཐུས་ལངས་མཁན་རྣམས་ནས་དབུས་གཙང་ལ་ཞེན་ཁོག་དགོས་པ་གལ་ཆེན་པོ་རེད། དབུས་གཙང་ལ་ཞེན་ཁོག་མེད་ན་སྤྱི་འཐུས་ཀྱི་འོས་གཞིར་ནང་སྟོན་གྱི་མིན་ཞེས་ཁྱབ་བསྒྲགས་དེ་དབུས་གཙང་སྤྱི་ཁྱབ་རྒྱུན་ལས་ཁང་ནས་བྱས་པ་རེད། ཡིན་ནའང་རྣམ་པ་ཚོ་ཚང་མའི་ངོས་ནས་ཆོལ་ཁ་ལ་ཞེན་ཁོག་དང་ཆོས་ལུགས་ལ་འཐེན་འཁྱེར་བྱེད་ཀྱི་མིན་གསུངས་འདུག་པས་འོས་འཐོབ་ཁ་པོ་མ་རེད་པས།་
བཀྲ་ཤིས་བདེ་ལེགས་ཡོད། ཁྱེད་རྣམས་པ་སེམས་ཤུགས་ཡོད་པ་ཚང་མ་མཁྱེན་གསལ་རེད།
སྤྱི་འཐུས་ལ་ཕེབས་འདོད་ཡོད་པའི་མི་དེ་ཚོར་སྐད་ཆ་ཞིག་བཤད་རྒྱུ་ཡོད།གང་ཡིན་ཟེར་ན་རང་ཉིད་ཀྱི་ལུས་སེམས་རང་ཉིད་ལ་མི་དབང་བའི་རིགས་ཡོད་ཚེ།མཐའ་མཇག་ཏུ་ངོ་རྒོལ་བྱེད་རྒྱུ་ཡིན་ལ།དེ་མིན་ཕྱི་གསལ་ནང་གསལ་དང་དྲང་བོ་དྲང་བཞག་གིས་མི་མང་ཀྱི་བསམ་ཚུལ་གྲོས་ཚོགས་ལ་ཞུ་ཐུབ་ན་རྒྱབ་སྐྱོར་བྱ་ཡིན།
འདས་པའི་དུས་ཡུན་འགའ་ཞིག་ནས་བོད་ཀྱི་དྲའི་གོང་གསལ་གསར་འགྱུར་ལྟ་བུའི་ནང་ འདུག་འདོད་ ཞེས་པའི་ཚིག་ཞིག་བེད་སྤྱོད་གཏོང་བཞིན་འདུག། དཔེར་ན་ ང་བོད་མི་མང་སྤྱི་འཐུས་ལ་འདུག་འདོད་ཡོད་ཟེར། ཞེས་བཀོད་པའི་ནང་ འདུག་འདོད་ཟེར་བའི་ཚིག་དེ་བོད་ཀྱི་ཡུལ་ལུང་གང་གི་སྐད་རེད་དམ་ཞེས་བཀུར་འོས་རྩོམ་པ་པོར་བཀའ་དྲིས་ཞུ་རྒྱུ་ཡིན། དངོས་གནས་བྱས་ན་ ང་བོད་མི་མང་སྤྱི་འཐུས་ལ་ལངས་འདོད་ཡོད་ཟེར་ན་འགྲིག་གི་མེད་དམ།
དགེན་བསོད་ནམས་ལགས་ཀྱིས་གསུངས་པར་ཤིན་ཏུ་བདེན། ཆོལ་ཁ་ཆོལ་ལུགས་ཀྱིས་འཐེན་འཁྱེར་ནི་བོད་ཕམ་ཉེས་སུ་གཏོང་མཁན་དང་རྒྱ་དམར་རྒྱལ་བའི་ལག་ཆ་གཙོ་བོ་དེ་རེད། རྡོག་རྩ་གཅིག་ལ་སྒྲིལ་དགོས་པ་ནི་གནད་འགག་དང་ཛ་དྲག་ཆེ་ཤོས་དེ་རེད།
ཁོ་ཚོ་ལངས་བ་ཙམ་གྱིས་རང་གི་འོས་ཤོག་རྩ་ཆེན་པོ་དེ་འཕེན་ཐུབ་པའི་ངེས་བ་མེད་མོད། རང་འགུལ་གྱི་སྒོ་ནས་མི་མང་གི་མདུན་དུ་བུད་དེ་དམ་བཅའ་དང་འཆར་གཞི་གསལ་འདོན་གྱིས་ཡར་སྤྱི་འཐུས་སུ་ལངས་པ་ཙམ་གྱིས་ཡི་རངས་དང་རྒྱབ་སྐྱོར་ཞུ་རྒྱུ་ཡིན། བཀའ་ཁྲི་ལས་ཀྱང་སྤྱི་འཐུས་སུ་ལངས་རྒྱུ་གལ་ཆེ། འདི་ནི་ད་ནས་བཟུང་མི་མང་གིས་ངོ་མི་ཤེས་པའི་སྤྱི་འཐུས་རྣམས་མཇུག་སྒྲིལ་བ་དང་། མི་མང་གི་མདུན་ལ་བུད་དེ་རང་སེམས་ཀྱི་སྐད་ཆ་རྣལ་མ་དག་བཤད་འདོད་མེད་པར་ཡ་ལེ་ཡངས་འགྲོ་བྱེད་མཁན་གྱི་སྤྱི་འཐུས་སྐབས་འཚོལ་བ་དག་ཀྱང་མཇུག་སྒྲིལ་ལ་ཉེ་བའི་ཡར་རྒྱས་འཐུས་ཚང་གི་རྣམ་པ་ཞིག་ཀྱང་རེད་བསམ། ད་ནས་བཟུང་འུ་ཚོ་མང་ཚོགས་ཀྱིས་ཀྱང་། རྗེས་ཕྱོགས་ཁྱོད་ཀྱིས་ཁས་ལེན་དམ་བཅའ་འདྲི་བྱས་སོང་། འདི་དག་སྒྲུབ་མ་སོང་ཞེས་མཛུབ་མོ་འཛུགས་ས་ཞིག་རྙེད་སོང་བ་རེད། སྤྱི་འཐུས་ 44 པོ་ཚང་མ་མི་མང་གི་མདུན་ལ་བུད་དེ་གདོང་སྟོན་ཐུབ་མཁན་རྐྱང་རྐྱང་ཡོང་ཐུབ་པའི་སྨོན་འདུན་ཡོད།
སྤྱི་འཐུས་ལས་ཐོག་ལྔ་དང་གསར་པ་དྲུག་ཚང་མར་འཚམས་འདྲི་བཀྲ་ཤིས་བདེ་ལེགས་ཡོད། ཁྱེད་ཅག་གིས་གཏམ་བཤད་གནང་སྤོ་བ་དང་གདེང་ཚོད་ཧ་ཅང་ཆེན་པོ་འདུག་ཡག་པོ་རེད། ཡིན་ནའང་། བོད་ཀྱི་རྩ་དོན་དེ་དང་པོ་རྒྱ་ནག་གཞུང་ལ་འབྲེལ་བ་བྱས་ནས་བོད་རྒྱ་གཉིས་དཀའ་རྙོག་སེལ་དགོས་ཀྱང་གྲོས་ཚོགས་ནང་དེ་རིང་ཁྱེད་ཚོས་མི་དམངས་ལ་གཏམ་བཤད་བྱས་པ་ལྟར་དོན་དག་སྒྲུབ་རྒྱུར་ཁག་པོ་ཡིན། འདས་པའི་གྲོས་ཚོགས་ཀྱི་ཉམས་མྱོང་དང་ད་ལྟའི་བཙན་བྱོལ་སྤྱི་ཚོགས་ཀྱི་ཆབ་སྲིད་ཀྱི་གོ་རྟོགས་ལ་ལྟས་ནས་བཤད་པ་ཡིན།
ཟླ་སྒྲོན་འདྲ་པོ་བོད་མི་དམངས་ཀྱི་སྤྱི་འཐུས་འོས་ན་བོད་མི་ཆེས་མང་པོ་ཡོད་རེད། གཟིགས་དང་སྐད་ཆ་བཤད་སྟངས་ཁོ་རང་མི་འདུག་ཧ། ལྷག་པར་མོ་བུད་མེད་ཀྱི་ཐོབ་ཐང་རྩོད་མཁན་ཞིག་ཡིན་ཟེར་གྱི་ཡོད། ཕྱི་རྒྱལ་བ་དེ་ཚོར་ལ་ག་དུས་ཡིན་བོད་པའི་བུད་མེད་ལ་ཐོབ་ཐང་མེད་སྐོར་རྐྱང་རྐྱང་བཤད་ཀྱི་ཡོད་པའི་ངོ་ཚ་དགོས་པ་ཞིག་མ་རེད་དམ། དབྱིན་ཡིག་འཕྲུན་བུ་ཤེས་ཀྱི་ཙམ་གྱི་སྤོབ་པ་འདི་འདྲ་གང་འདྲེ་ས་སླེབས་པ་ཡིན་ནམ། མོ་རང་ད་ལྟ་ན་ཚོད་མ་ཟིན་པའི་བྱེས་པ་ལོ་བརྒྱད་ལྟ་བུ་ཞིག་རེད་འདུག སྤྱི་ཚོགས་ཀྱི་གོ་རྟོགས་མེད་པ་དང༌། མི་རིགས་ཀྱི་ལ་རྒྱ་མེད་པ། བོད་མི་རིགས་ཀྱི་རིག་གནས་རིན་ཐང་བསྤྲད་མི་ཤེས་མཁན་ཞིག་དང༌། ད་དུང་མོ་རང་ལ་ལང་ཕྱོགས་གང་ཡང་མི་འདུག དཔེར་ན་ཚགས་པར་ནང་རྒྱ་རི་སྒྲོལ་མ་ལ་བཀའ་བློན་ཁྲི་པ་རྒྱབ་སྐྱོར་ཡོད་ཟེར་ཡོད་པ་རེད། ཡང་ཚོགས་འདུ་དེ་འདྲ་སྐབས་སུ་བཀྲས་ཐོང་དང་བློ་བཟང་སེང་གེ་གཉིས་ལ་རྒྱབ་སྐྱོར་གྱི་རྣམ་པ་སྟོན་གྱི་འདུག ཁྱེད་རང་ད་དུང་མུད་མཐུད་ལོ་བཅུ་ལྷག་སློབ་བྱས་ཉམས་མྱོང་གསོག་ན་བཟང།
སྤྱི་འཐུས་ལས་ཐོག་ལྔ་དང་གསར་པ་དྲུག་ཚང་མར་འཚམས་འདྲི་བཀྲ་ཤིས་བདེ་ལེགས་ཡོད། ཁྱེད་ཅག་གིས་གཏམ་བཤད་གནང་སྤོ་བ་དང་གདེང་ཚོད་ཧ་ཅང་ཆེན་པོ་འདུག་ཡག་པོ་རེད། ཡིན་ནའང་། བོད་ཀྱི་རྩ་དོན་དེ་དང་པོ་རྒྱ་ནག་གཞུང་ལ་འབྲེལ་བ་བྱས་ནས་བོད་རྒྱ་གཉིས་དཀའ་རྙོག་སེལ་དགོས་ཀྱང་གྲོས་ཚོགས་ནང་དེ་རིང་ཁྱེད་ཚོས་མི་དམངས་ལ་གཏམ་བཤད་བྱས་པ་ལྟར་དོན་དག་སྒྲུབ་རྒྱུར་ཁག་པོ་ཡིན། འདས་པའི་གྲོས་ཚོགས་ཀྱི་ཉམས་མྱོང་དང་ད་ལྟའི་བཙན་བྱོལ་སྤྱི་ཚོགས་ཀྱི་ཆབ་སྲིད་ཀྱི་གོ་རྟོགས་ལ་ལྟས་ནས་བཤད་པ་ཡིན།
ངའི་བསམ་པར་བཀའ་བློན་ཁྲི་པའི་འོས་མིང་ཐོག་ལ་བགྲོ་གླེང་དང་དོ་སྣང་ཆེན་པོ་བྱེད་པ་རྗེས་སུ་ཡིད་རངས་ཞུ་འོས་པ་ཞིག་རེད་ཀྱང།་ད་རེས་ཀྱི་སྐབས་༡༥སྤྱི་འཐུས་ཆོལ་ཀ་ཆོས་ལུགས་ཞན་ཁོག་མེད་མཁན་ལྷག་བསམ་རྣམ་དག་དང།་ཤེས་འཇོན་ལྡན་པ་འདེམས་དགོས་པའི་དུས་ལ་བབ་ཡོད་པ་ངོས་འཛིན་བྱེད་ཀྱི་ཡོད།
དེ་ནི་བར་ལམ་སྤྱི་འཐུས་ཁག་ཅིག་བྱེད་བབ་ནས་གཉིད་ལས་བསད་པ་ལྟ་བུ་བྱུང་སོང་བས།་དེ་རིང་རྡ་སའི་གཞོན་ནུ་དང་དང་བླངས་བ་ཚོས་སྤྱི་འཐུས་འོས་མིའི་བགྲོ་གླེང་གོ་སྒྲིན་གནང་བ་སྙྀང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་ཆབས་ཅིག
ཐེངས་འདིའི་བགྲོ་གླེང་ཐོག་ཕེབས་པའི་སྥྱི་འཐུས་རྙིང་པ་དང་གསར་པའི་འོས་མིང་གནང་ནས།་ང་རང་གིས་བསམ་ན་འོས་ཤོས་ནི།་ཀརྨ་ཡེ་ཤིས་དང།་་འོས་མི་གསར་པའི་ཁོངས་ནས་ཟླ་སྒྲོན་ལགས་དང།་སྐུ་ཞབས་ངག་དབང་འོད་འབར།་བསྟན་འཛིན་བརྩོན་འགྲུས་བཅས་རེད་བསམ་པ་དང།་རྒྱུ་མཚན་ནི།་ཁོང་ཚོ་ནི་ཆོལ་ཁ་ཆོས་ལུགས་ཐེར་འཁྱེར་གྱི་བསམ་བློ་མེད་པ་ཞེ་ཅིག་ཡིན་པ་ཡིད་ཆེས་བྱེད་ཀྱི་ཡོད།
འཇོན་གྱི་ཡོད། བྱེད་ཀྱི་ཡིན་གསུང་མཁན་དེ་ཚོ་ཡག་པོ་རེད། བྱེད་ཡ་ཡོད་མ་རེད། ཁག་པོ་རེད། མི་གཅིག་གཉིས་ཀྱིས་གང་ཡང་གནང་ཐུབ་ཀྱི་མ་རེད་གསུང་མཁན་དེ་ཚོ་ལ་སྙིང་སྟོབས་དེ་ཙམ་ཨི་ཡོད་ན་སྙམ། མི་རེ་གཉིས་ཀྱིས་གང་ཡང་བྱེད་ཐུབ་ཀྱི་རེད། འཇིག་རྟེན་འདིར་ག་དུས་ཡིན་ན་ཡང་མི་རེ་གཉིས་ཤིག་གིས་ཁ་ལོ་བསྒྱུར་འགྲོ་ཡི་རེད།