རྒྱ་ནག་གྲོག་ཁྱེར་ཁག་གི་མཐོང་ཐོས། ཁག་དང་པོ།
སྔོན་གླེང་།
བག་ཆགས་ཤིག་གམ། ཡང་ན་དགའ་ཕྱོགས་མི་མཐུན་པ་ཞིག་གི་དབང་གིས་རྒྱ་ནག་གི་གྲོང་ཁྱེར་ཁག་ལ་འཁྱམ་ཉུལ་དུ་འགྲོ་རྒྱུ་ནི་ང་ལ་མཚོན་ན་དགའ་སྣང་ཧ་ཅང་ཆེ་བའི་ལས་ཀ་ཞིག་ཡིན། རྒྱུ་མཚན་གང་ཡིན་མི་ཤེས་མོད། ང་རང་ཆུང་ངུའི་དུས་ནས་རང་ཉིད་ནར་སོན་ཏེ་རང་མགོ་ཐོན་པ་ཞིག་བྱུང་ན། བརྙན་འཕྲིན་དང་གློག་བརྙན་དག་ལས་མཐོང་ཐུབ་པའི་གྲོང་ཁྱེར་འདི་ཚོར་ལྟ་སྐོར་དུ་ཅིས་ཀྱང་འགྲོ་དགོས་ཨང་སྙམ་པའི་བསམ་ཚུལ་ཞིག་དུས་ཡུན་རིང་བོར་ཡོང་མྱོང་ལ། རབ་བྱུང་ན་གྲོང་ཁྱེར་དེ་དག་ལ་རང་ཉིད་ཁེར་རྐྱང་གིས་འཁྱམ་ཉུལ་བྱེད་ཐབས་ཤིག་བྱུང་ན་སྙམ་པའི་ཚོར་པ་ཞིག་གིས་གཏོང་ཐབས་མ་བྱུང་།
སྤྱིར་ཡིན་ན་བྱིས་དུས་ཀྱི་བསམ་ཚུལ་མང་པོ་ཞིག་རང་ཉིད་ནར་སོན་རྗེས་རྒྱུ་མཚན་དང་གནས་ལུགས་གང་ཡང་མེད་པའི་རྨི་ལམ་དུ་ལྟ་བུར་བཟུང་སྟེ་བསམ་ཚུལ་དེ་རིགས་རང་བཞིན་གྱིས་འགྱུར་འགྲོ་གི་འདུག་མོད། རྒྱ་ནག་གི་གྲོང་ཁྱེར་ཁག་ལ་ལྟ་སྐོར་དུ་འགྲོ་འདོད་པའི་བསམ་ཚུལ་དེ་ནི་ད་ལྟའང་ལྷམ་མེར་ལྷང་ངེར་གནས་འདུག་པས། བསམ་ཚུལ་འདི་ནི་སུས་ཀྱང་མི་ཁོགས་པའི་ཕུགས་འདུན་རྣོ་ངར་ལྡན་པ་ཞིག་ཏུ་གྱུར། དེ་ལ་ཡང་བསམ་བློ་གཞན་ཞིག་བཏང་ན། འདི་ནི་ངའི་བྱིས་དུས་ཀྱི་རྩེད་ར་དང་རྩེད་ཆས་སོགས་རྒྱ་ནག་གིས་བཟུང་ཞིང་རྒྱ་ནག་གིས་སྐྱོང་བར་སྐད་པའི་ལོ་ཚིགས་འདི་དང་འབྲེལ་བ་ཡོད་ཅིང་། ནར་སོན་པའི་རྒྱུད་རིམ་རེ་རེ་ཡང་རྒྱ་ནག་ལ་འགྲོག་འདྲིས་དང་མཉམ་བཤིབ་མང་པོ་བྱས་པའི་ཤུགས་རྐྱེན་གྱིས་ཡིན་སྲིད་། ལྷག་ཏུ་རྒྱ་ནག་གིས་གནའ་ནས་ད་བར་འབད་འབད་དུང་དུང་གིས་ཁོ་ཚོའི་ཀྲུང་ཧ་མི་མང་སྤྱི་མཐུན་རྒྱལ་ཁབ་གྱི་འཕེལ་རྒྱས་དང་གཟི་བརྗིད་དག་བརྙན་འཕྲིན་དང་གསར་ལམ་ཁག་ལས་ངོམ་སོ་ཆེན་པོས་བརྒྱུད་གཏོང་བྱས་པའི་འབྲས་བུའང་ཡིན་སྲིད།
གང་ལྟར་ལོ་ངོ་མང་པོ་ཞིག་ལ་བྱིས་དུས་ཀྱི་རྨི་ལམ་དེ་ཉིད་མངོན་གྱུར་བྱེད་མ་ཐུབ་ཀྱང་། དུས་ཡུན་གང་འཚམ་ཞིག་གི་རྗེས་སུ་རྒྱ་ནག་གི་ལན་ཀྲུའི་གྲོང་ཁྱེར་ནང་སློབ་གྲྭར་ཞུགས་པའི་གོ་སྐབས་བྱུང་ཞིང་། སློབ་གླིང་དེར་ཞུགས་རྗེས། སློབ་གླིང་འདི་ཉིད་ཆགས་སའི་གྲོང་ཁྱེར་འདི་ལ་འཁྱམ་ཉུལ་ཐེངས་མང་བྱས་ཤིང་། མཚམས་ལན་རེར་རང་ཉིད་གཅིག་པུ་གྲོང་ཁྱེར་གྱི་ཕྱོགས་མཚམས་ཀུན་ཏུ་སོང་སྟེ་རང་ཉིད་མ་འོངས་པར་གྲོང་ཁྱེར་གཞན་དག་ལ་ཅི་ལྟར་བསྐྱོད་དགོས་པའི་ཉམས་མྱོང་སྦྱོང་བརྡར་བྱས་པ་ཡིན། སྤྱིར་ཡིན་ན་ལན་གྲུའུ་གྲོང་ཁྱེར་འདི་ནི་ངའི་ཕ་ཡུལ་དང་སྤྱི་ལེ་ཉིས་བརྒྱ་ལྷག་གི་བར་ཐག་ལས་མེད་མོད། ཡུལ་མི་མང་པོ་ཞིག་གིས་སྐད་བརྡ་མི་འཕྲོད་པ་དང་། གྲོང་ཁྱེར་གྱི་འགྲོ་ལུགས་མི་ཤེས་པ། གྲོང་ཁྱེར་རྒྱ་ཆེ་བས་ཚོང་ར་སོགས་ལ་འཁྱམ་ཉུལ་བྱས་དུས་ལམ་ནོར་ཐེབས་པའི་དཀའ་ངལ་ཡོད་པ་བཅས་ཀྱིས། ཡུལ་མི་མང་པོ་ཞིག་གྲོང་ཁྱེར་འདི་ལ་འགྲོ་བའི་གོམས་གཤིས་དེ་ཙམ་མེད་པ་བཞིན། ང་ཡང་མཐོ་སློབ་འདིར་མ་ཞུགས་པའི་ཡར་སྔོན་དུ་གྲོང་ཁྱེར་འདི་ལ་ཐེངས་གཅིག་མ་གཏོགས་ཡོང་མྱོང་མེད་ལ། ཐེངས་གཅིག་པུ་དེ་ཡང་ངའི་ཨ་ཞང་ལ་ན་ཚ་ཞིག་གི་དབང་གིས་གཤགས་བཅོས་བྱེད་དགོས་པར་ནད་གཡོག་གི་ཚུལ་དུ་ཡོང་བ་ཡིན་པས། གྲོང་ཁྱེར་གྱི་ལྟེ་བ་དང་ཚོང་ར་ཆེ་ཁུལ་དག་ལ་སེམས་ཞིབ་མོས་འཁྱམ་ཉུལ་བྱེད་རྒྱུ་མ་བྱུང་། དེར་བརྟེན་ཁོ་བོས་ཐེངས་འདིར་གྲོང་ཁྱེར་འདིར་ཡོང་སྟེ་འཁྱམ་ཉུལ་བྱེད་པ་ལ་ཐོག་དང་བོར་དཀའ་ངལ་ཨེན་ཙམ་ཕྲད་མྱོང་མོད། ཟླ་བ་ཁ་ཤས་སོང་རྗེས་གྲོང་ཁྱེར་འདི་ལ་ས་ལོབ་ཆུ་ལོབ་ཀྱིས་གོམས་གཤིས་ཅུང་ཙམ་བྱུང་བས། གྲོང་ཁྱེར་འདིར་འཚོ་བཞིན་པའི་རྒྱ་རྒྱ་མོ་ཚོའི་འགྲོ་འདུག་སྤྱོད་གསུམ་ལ་རྒྱུས་ལོན་ཏོག་ཙམ་བྱེད་པའི་གོ་སྐབས་བྱུང་། ཉིན་དེ་ནས་བཟུང་ངས་རྒྱ་ནག་གི་གྲོང་ཁྱེར་གཞན་དག་ལ་འཁྱམ་ཉུལ་བྱེད་པའི་སྟ་གོན་བྱས་པ་ཡིན་ལ། འཁྱམ་ཉུལ་ཁྲོད་ཀྱི་མཐོང་ཐོས་དག་ཟིན་ཐོར་འགོད་པའི་འགོ་ཡང་བརྩམས་པ་ཡིན།
བཤད་རྒྱུན་ལྟར་ན་ལན་ཀྲུའུ་གྲོང་ཁྱེར་འདི་ནི་བོད་བཙན་པོའི་སྐབས་སུ་བོད་ཀྱི་ས་ཁུལ་ཡིན་ཟེར་གྱི་འདུག་ཅིང་། བོད་མིང་ལ་འཇོལ་མོའི་མཁར་ཟེར་བ་དང་། དེ་ཡང་ཡུལ་འདིར་བྱེའུ་འཇོལ་མོ་ཤིན་ཏུ་མང་པས་དེ་ལྟར་མིང་ཐོགས་ཚུལ་བཤད་རྒྱུ་འདུག ཡང་ཁ་ཤས་ཀྱིས་༧རྒྱལ་དབང་སྐུ་འཕྲེང་དུ་མ་ས་འདིར་ལན་དྲུག་ལ་ཕེབས་ཤིང་། རེབ་ཐེངས་དྲུག་ལ་ཕེབས་པ་མི་བརྗེད་པའི་ཕྱིར་དུ་མི་རྣམས་ཀྱིས་ས་འདིའི་མིང་ལ་ལན་དྲུག་ཟེར་ཞིང་། མིང་དེ་ཟུར་ཆགས་ནས་རྒྱ་ནག་སྐད་དུ་ལན་ཀྲུའུ་ཞེས་བཏགས་པ་ཡིན་ཚུལ་ཡང་བཤད་རྒྱུ་འདུག འོན་ཀྱང་ཨ་ལག་དོར་ཞི་མཆོག་གིས་གསུངས་པ་ལྟར་ན། བོད་ཀྱི་ལོ་རྒྱུས་ཐོག་ས་ཁུལ་འདི་ཉིད་བོད་བཙན་པོ་རྣམས་ཀྱིས་དབང་བསྒྱུར་བའི་ཡུལ་གྲུ་ཞིག་ཡིན་པ་དང་། ལོ་རྒྱུས་ནང་ས་འདིའི་མིང་ལ་ཆུ་མིག་ལྔ་ལྡན་ཟེར་བ་དང་། ཆུ་མིག་ལྔ་ནི་དེང་དུས་རྒྱ་སྐད་དུ་བོའི་ཆན་ཧྲན(Wu qian shan)ཟེར་བ་དེ་ཡིན་པ་དང་། དེ་ནི་དེང་སྐབས་གྲོང་ཁྱེར་འདིར་ང་ཚོའི་མཐོང་ཐོས་སུ་གྱུར་བའི་ཡུལ་སྐོར་སྤྲོ་འཆམ་བྱེད་ས་འདི་ཡིན་པས། ས་ཁུལ་བྱེ་བྲག་པ་འདིའི་མིང་ཡུལ་གྲུ་སྤྱིའི་མིང་དུ་ཐོགས་ཚུལ་གསལ་བོ་ཡིན་ཚུལ་བཅས་གསུང་རྒྱུ་འདུག
ཡང་བཤད་ཚུལ་གཞན་ཞིག་ཡོད་པ་ནི། རྒྱ་བོད་གཉིས་ཀྱི་ས་མཚམས་སུ་བཞེངས་པའི་མཆོད་རྟེན་དཀར་པོ་ཟེར་བ་དེ་ས་འདིར་ཡོད་པ་དང་། དེ་ཡང་དེང་དུས་ས་འདིར་ཐོ་ཧི་དགོན་པ་ (Tao He si) ཟེར་བ་དེ་ཡིན་པ་མ་ཟད། སྔོན་ཆད་ས་དེར་མཆོད་རྟེན་དཀར་པོ་ཆེན་པོ་ཞིག་ཡོད་པ་ཡུལ་མི་རྒན་པ་མང་པོ་ཞིག་གིས་མཐོང་ཡོད་ཚུལ་བཤད་རྒྱུ་འདུག་ཅིང་། ད་ལྟ་མཆོད་རྟེན་དེ་ནི་ས་འོག་ཏུ་སྦས་ཡོད་ཚུལ་ཀྱང་བཤད་རྒྱུ་འདུག འོན་ཀྱང་དེང་སྐབས་ཀྱི་ལོ་རྒྱུས་རྣམས་སུ་རྒྱ་བོད་གཉིས་ཀྱི་ས་མཚམས་སུ་བཞེངས་པའི་མཆོད་རྟེན་དཀར་པོ་ནི་ཀ་ཆུའི་ས་མཚམས་སུ་ཡོད་པའི་ཧི་ཀྲུན་ (he zheng) ཟེར་བ་དེར་ཡོད་པ་དང་། དེ་ནི་ད་ལྟ་ཧོར་གཙང་ཤིང་སྒོ་ཟེར་བའི་ས་ཆ་དེར་རྒྱ་བོད་གཉིས་ཀྱི་ས་མཚམས་བཀར་བར་གྲགས་པའི་གྱང་རྙིང་ཆེན་པོ་ཞིག་ལུང་མདོེར་འཕྲེད་དུ་བཅད་པ་ཞིག་ཡོད་པ་དེར་བཞེངས་ཡོད་ཚུལ་གསལ་འདུག་པ་དང་། ལྷག་ཏུ་དེང་སང་ཧོར་གཙང་ཤིང་སྒོ་ཞེས་པའི་གྱང་རྙིང་ཡོད་ས་དེར་སྒོ་ཆེན་གསར་བ་བཟོས་ཏེ་ཀན་ལྷོ་དང་ཀ་ཆུ་གཉིས་ཀྱི་ས་མཚམས་དགར་བྱེད་དུ་གྲུབ་ཡོད་པ་དེ་ཡིན་འདུག་ཚུལ་བཀོད་འདུག་པ་མ་ཟད། གྱང་རྙིང་ཡོད་ས་དེ་ནི་གནའ་བོའི་མཆོད་རྟེན་དཀར་པོ་ཞེས་པའི་མཆོད་རྟེན་དེ་བཞེངས་ཡོད་ས་ཡིན་འདུག་ཀྱང་། དེང་སང་ས་ཤུལ་གསལ་བོ་ཤེས་ཐུབ་ཀྱི་མི་འདུག་པའི་ཚུལ་ཀྱང་གོ་རྒྱུ་འདུག
གང་ལྟར་ད་ལྟའི་གནས་སྐབས་སུ་ལན་ཀྲུའི་གྲོང་ཁྱེར་ནི་རྒྱ་ནག་གི་ནུབ་རྒྱུད་དུ་ཆགས་པའི་གྲོང་ཁྱེར་ཆེ་ཁག་ཅིག་ཡིན་པ་དང་། གྲོང་ཁྱེར་ནང་ཁུལ་གྱི་རྒྱ་ཁྱོན་ལ་སྨི་གྲུ་བཞི་མ་ས་ཡ་བཅུ་ཙམ་དང་། མི་འབོར་ས་ཡ་བཞི་ལྷག་འཚོ་སྡོད་བྱེད་ཀྱིན་འདུག་ཅིང་། སློབ་ཆེན་ཁག་མི་འདྲ་བ་ ༢༧ དང་སློབ་འབྲིང་ ༣༤ ། སློབ་ཆུང་ ༧༨ ། ད་དུང་དམག་དོན་ཆེད་སྦྱོང་སློབ་གྲྭ་ཁག་ ༧ བཅས་ཡོད་འདུག་པ་དང་། བསྡོམས་པས་སློབ་གྲྭ་ཁག་མི་འདྲ་བ་ ༡༤༦ ཡོད་འདུག ད་དུང་དེར་སྒེར་གཉེར་སློབ་གྲྭ་ཁག་མང་པོ་ཡོད་ཚུལ་གོ་རྒྱུ་འདུག (མི་འབོར་དང་ས་)སློབ་གྲྭ་འདི་དག་ཁྲོད་ཚན་རིག་ཆེད་སྦྱོང་བྱེད་སའི་སློབ་གྲྭ་དང་། རི་མོ་སོགས་ལག་ཤེས་སློབ་གྲྭ། གླུ་དབྱངས་དང་ཟློས་གར་ཆེད་སྦྱོང་སློབ་གྲྭ། འཛམ་གླིང་གི་སྐད་ཡིག་འདྲ་མིན་གྱི་ཆེད་སྦྱོང་བྱེད་སའི་སློབ་གྲྭ་སོགས་མང་པོ་ཡོད། འདི་དག་ལས་ཅུང་སྐད་གྲགས་ཆེ་ཞིང་འབུར་དུ་དོད་པའི་སློབ་གྲྭ་ནི་ལན་ཀྲུའི་སློབ་ཆེན་ཡིན་ཞིང་། སློབ་གྲྭ་དེར་སློབ་མ་ཁྲི་གཅིག་ལྷག་གིས་རྒྱུན་ལྡན་གྱིས་སློབ་སྦྱོང་བྱེད་ཀྱི་ཡོད་ཚུལ་འདུག་ཅིང་། འདིར་ཡོང་མཁན་གྱི་སློབ་མ་ནི་རྒྱ་ནག་གི་ས་ཁུལ་གང་ས་ནས་ཡོང་གི་ཡོད་ཚོད་འདུག
ནུབ་བྱང་མི་རིགས་སློབ་གླིང་ལ་མཚོན་ན་ས་འདིར་སློབ་གྲྭ་ཆེ་ཁག་མང་པོ་ཡོད་པ་ལས་མི་རིགས་སློབ་གྲྭ་གཅིག་པུ་དེ་ཡིན་ཞིང་། སློབ་གྲྭ་འདིར་མི་རིགས་མི་འདྲ་བ་ ༣༧ ནས་ཕེབས་པའི་སློབ་མ་གྲངས་ཆིག་ཁྲི་ལྷག་གིས་རྒྱུན་ལྡན་གྱིས་སློབ་ཁྲིད་བྱེད་གྱིན་ཡོད། དེ་དག་ལས་བོད་རིགས་སློབ་མ་ཉིས་སྟོང་ལྷག་དང་། བོད་ཡིག་སྡེ་ཁག་དུ་ཡོད་པའི་བོད་རིགས་སློབ་མ་ཆིག་སྟོང་ལྷག་ལས་མེད། གྲངས་འབོར་འདི་ལས་བརྩིས་བརྒྱབ་ན་སློབ་ཆེན་འདིར་བོད་རིག་སློབ་མས་བརྒྱ་ཆ་ ༢༠% ཟིན་པ་དང་། བོད་ཡིག་དང་བོད་སྐད་ཤེས་མཁན་གྱི་སློབ་མས་བརྒྱ་ཆ་ ༡༠% ལས་ཟིན་གྱི་མེད། འདི་དག་ལས་དངོས་ཁམས་དང་ཚན་རིག་ཆེད་སྦྱོང་གི་སྒང་ལ་འགྲོ་མཁན་ཤིན་ཏུ་ཉུང་ཤིང་། རེ་གཉིས་ཡོད་པའང་རྒྱ་ཡིག་ལས་བོད་སྐད་དང་བོད་ཡིག་མི་ཤེས་པའི་བོད་རིགས་སློབ་མའི་གྲས་ཡིན། དེ་མིན་མང་ཆེ་ཤོས་གཞུང་ལུགས་སྡེ་ཁག་ཟེར་བའི་སྡེ་ཚན་དུ་ཞུགས་མཁན་ཡིན་པ་དང་། ཉུང་ཤས་ཤིག་ནི་ཕྱིའི་སྐད་ཡིག་སྡེ་ཚན་དུ་ཡོད། བོད་སྐད་དང་བོད་ཡིག་གཅིག་པུའི་སྒང་ལ་འགྲོ་མཁན་ནི་བོད་ཡིག་སྡེ་ཁག་ལས་གང་ཡང་མེད།
སློབ་གྲྭ་འདིའི་བོད་རིགས་སློབ་མ་མང་ཆེ་ཤོས་ཤིག་ལ་མཚོན་ན་སློབ་སྦྱོང་ལ་ཤུགས་དེ་ཙམ་མི་རྒྱག་པ་དང་། སློབ་ཆེན་དུ་རྒྱུགས་འཕྲོད་པ་ན་ཡུལ་མིའི་རེ་བ་དང་རང་ཉིད་ཀྱི་མདུན་ལམ་སོགས་ཐག་གིས་ཆོད་ཚར་བའི་ལྟ་ཚུལ་འཛིན་གྱི་ཡོད་པ་དང་། སློབ་ཆེན་གྱི་སྐབས་འདི་ནི་སོ་སོའི་མ་འོངས་པའི་ཁྱིམ་ཚང་གི་གོ་སྒྲིག་ལ་བསམ་བློ་གཏོང་སའི་གནད་འགག་ཅིག་ཏུ་བརྩི་བཞིན་ཡོད། རྒྱུ་མཚན་སློབ་ཆེན་ནས་མཐར་ཕྱིན་རྗེས་ཡུལ་མིའི་རེ་བ་ལྟར་འཚོ་གནས་ཐག་གིས་གཅོད་པའི་ལས་ཀ་ཞིག་རག་སྲིད་ཀྱང་། ཡུལ་གནས་གང་ཞིག་ཏུ་བྱ་བ་ལས་དགོས་མིན་ཐད་སུས་ཀྱང་ཁ་མཚོན་གཅོད་དཀའ་བ་དང་། ནང་མིར་རྒྱུ་འབྱོར་དང་ངོ་སོ་ཡོད་མཁན་ཞིག་མིན་ཚེ་གྲོང་ཁྱེར་དང་རྫོང་ཁག་བཅས་སུ་བྱ་བ་རག་ཁག་པ་མ་ཟད། ནང་མིའི་མཐུན་རྐྱེན་མ་བཟང་ན་ཞང་དང་གྲོང་རྡལ་སོགས་ནས་ཀྱང་བྱ་བ་མི་རག་པར་གྲོང་གསེབ་དང་རི་གྲོང་སོགས་སུ་ལས་བགོས་བྱེད་སྲིད་པས། རྗེས་ཕྱོགས་རང་ཉིད་ཀྱི་བཟའ་ཚང་འཚོལ་བའི་ཕྱོགས་ལ་དཀའ་ངལ་མི་ཉུང་བ་ཞིག་འཕྲད་རྒྱུ་ཡིན་པའི་བསམ་ཚུལ་འཛིན་ཀྱི་འདུག
དེ་བས་སློབ་མ་ཕོ་མོ་ཁ་ཤས་ཀྱིས་ད་ལྟའི་གནས་སྐབས་ནི་ཡུལ་དུས་གང་ལ་བསམ་ཀྱང་དགའ་རོགས་འཚོལ་དགོས་པའི་དུས་ཡིན་པ་དང་། གལ་སྲིད་སློབ་ཆེན་ནས་དགའ་རོགས་ཤིག་ལ་རྗེས་ཕྱོགས་བཟའ་ཚང་གི་མོས་འདུན་འཇོག་ཐུབ་པ་ཡིན་ན། རྗེས་སུ་བཟའ་མི་གཉིས་ཆ་རྒྱལ་ཁབ་གྱི་ལས་ཀ་ཡོད་པའི་ལས་བྱེད་པར་འགྱུར་རྒྱུ་ཡིན་པ་དང་། དེ་ལྟར་གྱུར་བས་མ་འོངས་པའི་འཚོ་བའི་ཐད་དཀའ་ངལ་མི་འཕྲད་པ་མ་ཟད། བཟའ་ཚང་གཉིས་ཀྱི་བསམ་བློ་དང་ལྟ་བའི་ཆ་ནས་ཀྱང་རྒྱུས་ལོན་གསར་བ་བྱེད་མི་དགོས་པར་མཐོ་སློབ་འདི་ནས་རང་བཞིན་གྱིས་འདྲིས་གཤིབ་ཆེ་ཙམ་འབྱུང་གི་ཡོད་པ་སོགས་ལ་བསམ་ནས། སློབ་ཆེན་དུ་སླེབས་རྗེས་སློབ་མ་མང་པོ་ཞིག་དགའ་རོགས་འཚོལ་རྒྱུ་དང་། སྤྱི་ཚོགས་ཀྱི་འཚོ་བའི་ཉམས་མྱོང་གཞན་བཅས་ལ་བསམ་བློ་གཏོང་གིན་འདུག་པའི་དབང་གིས། སློབ་ཁྲིད་གཅིག་པུར་སེམས་པ་རྣལ་དུ་ཕབ་ཐུབ་པའི་དཀའ་ངལ་ཅུང་ཆེ་ཙམ་འདུག སློབ་མ་སེམས་ཤུགས་ཅན་རེ་གཉིས་ལས་མུ་མཐུད་སློབ་སྦྱོང་བྱེད་པའི་དམིགས་ཡུལ་ཡོད་མཁན་ཅུང་ཉུང་།
འོན་ཀྱང་ལྟོས་འཇོག་གིས་བཤད་ན། ནུབ་བྱང་མི་རིགས་སློབ་གླིང་འདི་ནི་བོད་ཁམས་ཀྱི་མི་རིགས་སློབ་གྲྭ་ཆེན་མོ་དག་ལས་ཅུང་འབུར་དུ་དོད་པའི་སློབ་གྲྭ་ཞིག་ཡིན་པར་ཆ་འཇོག་བྱེད་ཀྱི་འདུག་སྟེ། དེ་ནི་བོད་ཀྱི་སྐད་ཡིག་དང་རྩོམ་རིག་བཅས་ཀྱི་མཐོ་རླབས་ཤུགས་ཆེར་འཕྱུར་ས་ཞིག་ཡིན་པར་ཆ་འཇོག་བྱེད་ཀྱི་ཡོད་པ་དང་། ལྷག་ཏུ་སློབ་གླིང་འདི་ནས་མི་རིགས་རིག་གནས་འཕེལ་རྒྱས་ལ་ཕྱག་རྗེས་རླབས་ཆེན་འཇོག་མཁན་ཀྱི་མཁས་དབང་མང་པོ་བྱོན་མྱོང་བར་མ་ཟད། ད་ལྟ་བོད་ཁམས་ཡོངས་སུ་མི་རིགས་སློབ་ཆེན་དུ་མ་ཡོད་པའི་ཁྲོད་ནས་སློབ་ཆེན་འདིའི་སློབ་མ་རྣམས་ནི་བོད་ཀྱི་སློབ་ཆེན་སློབ་མའི་སེམས་ཤུགས་དང་སྙིང་སྟོབས། གོ་རྟོགས་བཅས་ཀྱི་མཐོ་རླབས་ཆེས་ཆེར་འཕྱུར་བའི་སློབ་ཆེན་པ་མང་པོ་འབྱུང་གིན་པ་བཅས་ལ་གཞི་བཞག་ན། སློབ་གླིང་འདི་ནི་མི་རིགས་རང་ངོས་ནས་བཤད་ན་ཅུང་གཙིགས་ཆེན་བྱེད་སའི་སློབ་གླིང་ཞིག་ཡིན་འདུག་ལ། ཡིན་ཀྱང་འོས།
སྤྱིར་རྒྱ་ནག་ཏུ་ཁྱོན་སྡོམ་མི་རིགས་སློབ་གླིང་ ༡ ༥ཡོད། དེ་དག་ལས་ཀྲུང་དབྱང་དང་རྒྱ་ནག་གི་ལྷོ་ཕྱོགས། ལྷོ་ནུབ། ནུབ་བྱང་། བྱང་ཕྱོགས་མི་རིགས་སློབ་ཆེན། ཏ་ལེན་མི་རིགས་སློབ་གླིང་བཅས་ལ་རྒྱལ་ཁབ་ཀྱི་མི་རིགས་ལས་དོན་ཨུ་ཡོན་ལྷན་ཁང་གིས་ཐད་ཀར་དོ་དམ་བྱེད་པ་དང་། ཡུན་ནན། ཀོང་ཞི། ནང་སོག མཚོ་སྔོན་མི་རིགས་སློབ་ཆེན་དང་ཧུའུ་པེ། ཀུའེ་ཀྲུའུ། བོད་ལྗོངས། སི་ཁྲོན། ཧུའུ་ཧོ་ཧའོ་ཐེ་མི་རིགས་སློབ་གླིང་བཅས་ལ་ས་ཁུལ་སོ་སོས་དོ་དམ་བྱེད་ཀྱི་ཡོད། རྒྱ་ནག་གིས་ངོས་འཛིན་ཁྲོད་མི་རིགས་སློབ་གྲྭ་ནི་རང་རྒྱལ་གྱི་མཐོ་རིམ་སློབ་གསོའི་གྲུབ་ཆ་ཞིག་ཡིན་པའི་ཆ་ནས་མི་རིགས་སློབ་གླིང་གིས་མི་རིགས་སོ་སོའི་སློབ་མ་མང་པོ་བསྡུས་པ་དང་། རང་རྒྱལ་གྱི་མི་རིགས་ས་ཁུལ་སོ་སོའི་སྤྱི་ཚོགས་མཐུན་སྒྲིལ་དང་གུང་ཁྲན་ཏང་གི་ལྟ་བ་ཁྱབ་སྤེལ། དཔལ་འབྱོར་འཕེལ་རྒྱས་བཅས་ཀྱི་ཐད་ལ་ཤེས་ལྡན་མི་སྣ་མང་པོ་མངགས་གཏོང་བྱ་དགོས་པའི་འཆར་གཞི་འཐེན་གྱི་ཡོད་པ་རེད།
མི་རིགས་སློབ་གླིང་ཞེས་པའི་དོན་ནི། ད་ལྟའི་རྒྱ་ནག་མངའ་ཁོངས་སུ་མི་རིགས་མི་འདྲ་བ་ང་ལྔ་ཡོད་པ་དང་། དེ་དག་གི་སོ་སོའི་ཐུན་མིན་གྱི་རིག་གཞུང་དང་སྐད་ཡིག་སོགས་སློབ་སྦྱོང་བྱེད་སའི་མཐོ་རིམ་སློབ་ཆེན་ཞིག་ཡིན་ཟེར་གྱི་ཡོད། འོན་ཀྱང་མི་རིགས་དེ་དག་ལས་བོད་དང་ཡུ་གུར། སོག་པོ་བཅས་མི་རིགས་ཁ་ཤས་ཞིག་ལ་མ་གཏོགས་རང་ཉིད་ཀྱི་སྐད་ཡིག་སློབ་སྦྱོང་བྱ་བར་འཐུས་སྒོ་ཚང་པའི་རིག་གཞུང་སོགས་ཅི་ཡང་མེད་ལ། ཏོག་ཙམ་ཡོད་པ་རྣམས་ཀྱང་ཉམས་ཞན་ནུས་མེད་དུ་གྱུར་ཏེ་སློབ་ཆེན་སློབ་མ་སུས་ཀྱང་རྒྱ་ཡིག་དང་རྒྱ་སྐད་མ་གཏོགས་ཅི་ཡང་ཤེས་ཀྱི་མི་འདུག་པའི་ཚོད་དུ་སླེབས་ཡོད། དེ་བས་མི་རིགས་སློབ་ཆེན་གྱི་སློབ་གྲྭ་ཁག་ནི་མི་རིགས་མི་འདྲ་བ་མང་པོ་འདུས་སྡོད་བྱས་ཏེ། གོམས་སྲོལ་དང་འདུ་ཤེས་སྐད་རིགས་བཅས་མི་འདྲ་བའི་མི་རིགས་ཁག་བར་འབྲེལ་ལམ་འཛུགས་ས་དང་། མི་རིགས་ཆེན་པོའི་འདུ་ཤེས་གཙིགས་འཛིན་གྱིས་རྒྱའི་རིག་གནས་དང་ལོ་རྒྱུས། སྐད་ཡིག་བཅས་ཆེད་སྤྱོང་བྱེད་ས་གཙོ་བོ་ཞིག་ཏུ་འགྱུར་གྱིན་པ་ལས། མི་རིགས་སློབ་ཆེན་གྱི་ཐོག་མའི་དམིགས་ཡུལ་གྱི་སྟེང་དུ་འགྲོ་ཡི་མེད་པ་ནི་ཁ་ཤིན་ཏུ་གསལ།
རྒྱ་ནག་གི་ཞིན་ཧ་གསར་ཁང་གིས་བསྒྲགས་པའི་གནས་ཚུལ་ཞིག་གི་ནང་། མི་རིགས་མཐོ་རིམ་སློབ་གསོ་ནི་རང་རྒྱལ་གྱི་མཐོ་རིམ་སློབ་གསོའི་བྱ་གཞག་གི་གྲུབ་ཆ་གལ་ཆེན་ཞིག་ཡིན་ལ། ཏང་དང་རྒྱལ་ཁབ་ཀྱི་མི་རིགས་ལས་དོན་གྱི་ནང་དོན་གཙོ་བོ་ཡང་ཡིན། རྒྱལ་ཁབ་བཙུགས་ནས་ལོ་ངོ་དྲུག་ཅུའི་རིང་དུ། རང་རྒྱལ་གྱི་མི་རིགས་སློབ་གླིང་དག་གིས་རྒྱལ་ཁབ་ཀྱི་ཆེད་དུ་མི་རིགས་སོ་སོའི་ཤེས་ལྡན་མི་སྣ་ཁྲི་ ༩༠ ལྷག་སྐྱེད་སྲིང་བྱས་པས། རང་རྒྱལ་གྱི་མི་རིགས་མཐུན་སྒྲིལ་གྱི་བྱ་གཞག་ཡར་རྒྱས་གོང་འཕེལ་དང་མི་རིགས་ས་ཁུལ་བཅོས་སྒྱུར། འཕེལ་རྒྱས། སྲ་བརྟན་སོགས་ཀྱི་ཐད་ལ་བྱས་རྗེས་མི་དམན་པ་བཞག་ཡོད། ཅེས་གསལ། འདི་དག་ལས་ང་ཚོས་ཤེས་ཐུབ་པ་ནི། མི་རིགས་སློབ་གྲྭ་ཁག་ནི་ཏང་དང་རྒྱལ་ཁབ་ཀྱི་མི་རིགས་ལས་དོན་ལ་རམ་འདེགས་ཞུ་མཁན་དང་། མི་རིགས་མཐུན་སྒྲིལ་དང་གོང་བུ་གཅིག་གྱུར་བཅས་ཀྱི་ཐོག་ནས་གུང་ཁྲན་ཏང་གི་ཐོག་མའི་དམིགས་ཡུལ་ལ་བྱས་རྗེས་འཇོག་པའི་མི་སྣ་གསོ་སྐྱོང་བྱེད་ས་ཞིག་ཏུ་སྒྲུབ་ཀྱིན་ཡོད་པ་གསལ་བོ་རེད་འདུག
ལན་ཀྲུའུ་གྲོང་ཁྱེར་ཀྱི་མི་འབོར་ལས་བརྒྱ་ཆའི་དགུ་བཅུ་ནི་རྒྱ་ནག་རང་ཡིན་པ་དང་། དེ་ལས་མི་རིགས་གཞན་པ་རྣམས་ནི་ཁ་ཆེ་དང་སོག་པོ། བོད། ཆང་མི་རིགས། ས་ལར་སོགས་མི་རིགས་ཁང་མང་པོ་འདུག དེ་ལས་བོད་ནི་ཧ་ཅང་ཉུང་ལ། ཉུས་ཤས་ཡོད་པ་དེ་དག་ཀྱང་ལས་བྱེད་དང་ཚོང་པ་ཁ་ཤས་ལས་གཞན། ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་རྐྱང་རེད།
དགུན་གནང་གི་གུང་གསེང་གཏོང་སྐབས། སློབ་གྲོགས་ཚོས་བྲེལ་བྲེལ་འཚབ་འཚུབ་ཀྱིས་ཕ་ཡུལ་ལ་ལོག་རྒྱུར་གྲ་སྒྲིག་བྱེད་ཀྱིན་འདུག་པ་དང་། བོད་པའི་སློབ་མ་མང་ཤོས་ཤིག་ལ་མཚོན་ན་སློབ་མཇུག་གི་རྒྱུགས་ཆེན་གྲུབ་མཚམས་ཕྱིར་ཕ་ཡུལ་དུ་ལོག་འགྲོ་བ་ནི་རྒྱུན་ལྡན་ལྟ་བུ་ཡིན། འོན་ཀྱང་རྒྱ་ནག་ནག་གི་ཞིང་ཆེན་གཞན་དག་ནས་ཡོང་བའི་རྒྱ་རིགས་སློབ་མ་ཁ་ཤས་དང་། ལྷག་ཏུ་སི་ཁྲོན་ཕྱོགས་ནས་ཡོང་བའི་སློབ་མ་མང་ཆེ་ཤོས་ནི་དགུན་གནང་གི་གུང་གསེང་བེད་སྤྱད་དེ་ལས་ཀ་གཞན་དག་འཚོལ་དུ་འགྲོ་གི་འདུག་པ་དང་། འཚོལ་ཐབས་གང་ཞིག་གཉེར་བ་ལ་ཉམས་མྱོང་གསོག་པར་འགྲོ་བའི་གོམས་གཤིས་ཡག་པོ་ཞིག་འདུག ཕྱོགས་གཞན་ཞིག་ནས་བལྟས་ན་ཁོ་ཚོར་བོད་ཀྱི་སློབ་མ་ལྟར་ཕ་ཡུལ་དུ་བྱམས་སྐྱོང་བྱེད་མཁན་གྱི་ཕ་མ་དང་རེ་ལྟོས་གནང་མཁན་གྱི་ནང་མི་མེད་པས་ཀྱང་ཡིན་སྲིད་དེ། རྒྱ་རིགས་ལ་མཚོན་ན་དང་། ལྷག་ཏུ་སི་ཁྲོན་ཕྱོགས་ཀྱི་རྒྱ་རིགས་ལ་མཚོན་ན། གཉེན་ཉེ་དང་ཤ་ཉེ་བར་གྱི་བརྕེ་བ་དེ་ཙམ་མེད་ལ། ཕ་བུའི་བར་དུའང་བོད་ལྟར་བརྩེ་འདང་ཟབ་མོ་མེད།
གང་ལྟར་དེ་རིང་ནི་བདག་གིས་སི་ཁྲོན་གྱི་སློབ་མ་འདི་ཚོར་མིག་དཔེར་བལྟས་ཤིང་རྒྱ་ནག་གི་གོམས་གཤིས་འདི་དག་ལ་རྒྱུས་ལོན་བྱ་ཆེད། སློབ་གྲྭའི་གུང་གསེང་བཏང་མ་ཐག་ལམ་སང་མེ་འཁོར་ས་ཚིགས་སུ་སོང་སྟེ་ཞི་ཨན་གྲོང་ཁྱེར་དུ་འགྲོ་བའི་མེ་འཁོར་འཛིན་བྱང་ཉོས། ང་ལ་མཚོན་ན་ལན་ཀྲུའུ་གྲོང་ཁྱེར་འདི་ནས་ཡུན་རིང་བསྡད་ཀྱང་མེ་འཁོར་ས་ཚིགས་འདི་ལ་ཡོང་བ་ཐེངས་དང་པོ་ཡིན། ངས་འཛིན་བྱང་ཉོ་བཞིན་པའི་སྐབས་ཏག་ཏག་ལ་སི་ཁྲོན་གྱི་སློབ་མ་ཞིག་གིས་ཀྱང་འཛིན་བྱང་ཉོ་བཞིན་འདུག་ལ། ཁོ་ཡང་ཞི་ཨན་དུ་འགྲོ་རྒྱུ་ཡིན་ཟེར་བས་ངེད་གཉིས་མཉམ་དུ་འགྲོ་རྒྱུ་བྱས། ཁོས་བཤད་ན་སང་ཉིན་ཞོགས་པའི་ཆུ་ཚོད་བརྒྱད་ཀྱི་སྟེང་གི་མེ་འཁོར་ནི་གཙང་སྦྲ་དང་ཞབས་ཞུའི་རྣམ་འགྱུར་སོགས་ཡག་པོ་ཡོད་ཚུལ་བཤད་པས། ངས་ཉོས་ཚར་བའི་འཛིན་བྱང་ཡང་བརྗེ་བོ་བརྒྱབ་སྟེ་སང་ཉིན་ཞོགས་པའི་ཆུ་ཚོད་བརྒྱད་པ་བར་དུ་བསྒུག་རྒྱུ་བྱས།
སྤྱི་ལོ་ ༢༠༠༥ ཟླ་ ༡༢ ཚེས་ ༢༦ ཉིན་གྱི་ཞོགས་པ་ནི་ང་ལ་མཚོན་ན་ཆེས་ཁྱད་པར་བའི་ཞོགས་པ་ཞིག་ཡིན་ཏེ། རྒྱུ་མཚན་དེ་རིང་ནི་ངའི་མི་ཚེའི་ནང་རང་ཉིད་གཅིག་པུ་རྒྱ་ནག་གི་གྲོང་ཁྱེར་གཞན་ཞིག་ལ་ཤར་བསྐྱོད་བྱེད་ཀྱིན་པའི་ཞོགས་པ་དང་པོ་ཡིན་པས་སོ། །ཞོགས་པ་འདིར་མེ་འཁོར་ནང་ནས་ཕ་ཡུལ་གྱི་གྲོགས་པོ་ཞིག་ལ་ཁ་པར་བཏང་སྟེ། ང་རང་ལོ་སར་ལ་ཕ་ཡུལ་དུ་ཡོང་གི་མེད་ཚུལ་དང་། སྤྱི་ཚོགས་ཀྱི་ཉམས་་མྱོང་འདྲ་མིན་གསོག་ཆེད་རྒྱ་ཁོག་གི་གྲོང་ཁྱེར་ཁ་ཤས་ལ་བསྐོར་འཁྱམ་རེ་བྱེད་ཨེ་ཐུབ་ལྟ་རྒྱུ་ཡིན་ཚུལ་སོགས་བཤད་པ་དང་། གལ་སྲིད་ང་ལ་ལམ་བར་ནས་སྒོར་མོ་ཚར་ཏེ་་དཀའ་ངལ་འདྲ་བྱུང་ན་དེ་དུས་ཁྱོད་ཀྱིས་ངའི་དངུལ་བྱང་སྟེང་ལ་དངུལ་ཅུང་ཙམ་འཇོག་རོགས་ཟེར་ནས་བཤད་པ་དང་། ཞོར་ནས་ངའི་ཕ་མ་ཚོར་ཡང་ང་རང་རྒྱ་ཁོག་ཏུ་སོང་ཚར་བ་དང་ལོ་སར་ལ་ཡོང་མི་ཐུབ་པའི་སྐོར་སོགས་བཤད་རོགས་ཞུ་ཟེར་ནས་གསལ་བོ་བཤད་པ་ཡིན། ངའི་མདུན་དུ་ཡོད་པའི་སི་ཁྲོན་གྱིས་སློབ་མ་འདིས་ང་ལ། ཁྱོད་ཀྱིས་སུ་ཞིག་ལ་ཁ་པར་གཏོང་གི་ཡོད་ཟེར། ངས་གནས་ཚུལ་ཇི་བཞིན་བཤད་པར་ཁོ་ཧང་སང་མདོག་གིས། ཁྱོད་ཚོ་བོད་པ་འདི་ཚོ་གྲོགས་པོ་དང་ཕ་མ་ལ་བརྩེ་འདང་དེ་འདྲ་ཆེ་དོན་གང་ཡིན་ནམ་ཟེར། ངས་དེ་ནི་མ་གཞི་མི་ཟེར་བ་འདིའི་རྩ་བའི་གཤིས་ཀ་ལ་རག་ལུས་ཡོད་ཚུལ་བཤད་པ་ཡིན། ཁོས་ཀྱང་དེ་ལྟར་ཡིན་སྣང་གིས་ང་ལ་བདེན་སྣང་སྟེར་གྱིན་འདུག ཁོ་ཚོའི་ཕ་ཡུལ་ལ་མཚོན་ན་གྲོགས་པོ་ཚོས་དེ་བཞིན་བློ་ཐག་ཉེ་བོ་བྱེད་མི་སྲིད་པ་དང་། མཐའ་ན་ཕ་མ་རེ་ཟུང་གིས་རང་གིས་བུ་ཕྲུག་སློབ་གྲར་སྐྱེལ་བའི་འགན་ཡང་མི་འཁུར་ཚུལ་ནས་བརྩམས་ཏེ། ཁོ་ཚོའི་ཕ་ཡུལ་གྱི་མི་རྣམས་ཀྱི་སྐྱོན་ལུང་བ་གང་བཤད་བྱུང་། སྐད་ཆ་འདིར་ཉན་སྐབས་ངའི་ཕ་ཡུལ་ལ་མཚོན་ནའང་དེ་བཞིན་གྱི་སྐྱོན་དང་ནོར་འཁྲུལ་མང་པོ་བྱུང་དང་འབྱུང་གིན་པ་མིག་ལམ་དུ་འཆར་རྒྱུ་འདུག་ནའང་། སློབ་གྲོགས་འདིའི་སྔུན་ནས་དེ་སྐོར་ཅི་ཡང་གླེང་སློང་བྱས་མེད། དེ་ནི་ང་ལ་མཚོན་ན་རང་ཚུགས་དང་ལ་རྒྱ་སྲུང་སླད་གྱི་ཆེད་གཅིག་པུ་ལས་རྒྱུ་མཚན་གཞན་གང་ཡང་མེད།
མུ་འགོད།
མཆན། ང་ནི་ཆུང་ངུའི་དུས་ནས་ཉིན་ཐོ་འབྲི་རྒྱུར་ཤིན་ཏུ་དགའ་ལ་ཉིན་ཐོ་འབྲི་བའི་གོ་རིམ་ཁྲོད་ནས་རང་གི་ང་རྒྱལ་དུ་བརྩི་ཆོག་པའི་ངེས་ཤེས་ཀྱང་མང་པོ་ཐོབ་མྱོང་། དེ་རིང་གི་རྩོམ་ཡིག་འདི་ཡང་རང་ཉིད་བོད་དུ་ཡོད་སྐབས་སློབ་གྲྭའི་གུང་གསེང་གི་དུས་ཚོད་བེད་སྤྱད་དེ་རྒྱ་ནག་གི་གྲོང་ཁྱེར་ཁག་ཏུ་འཁྱམ་ཉུལ་བྱེད་སྐབས་ཀྱི་ཟིན་ཐོ་ཁ་ཤས་ཡིན། ཉིན་ཐོ་འདི་དག་གི་ཁྲོད་ནས་ངས་ཅི་ཞིག་ཚོེར་འདོད་ཀྱི་མིག་ཟུང་མདུན་དུ་གཏད་དེ་རྣ་བས་གོ་བ་དང་མིག་གིས་མཐོང་མྱོང་བའི་ལམ་བར་གྱི་སྐད་ཆ་དག་ཕྱོགས་བསྒྲིགས་བྱས་ཡོད་ཅིང་། དེ་རིང་ཟིན་བྲིས་འདི་མ་སྤེལ་གོང་བཟོ་བཅོས་དང་འཕྲི་སྣོན་ཅུང་ཙམ་བྱེད་དགོས་བྱུང་། འདི་ནས་གསལ་བཤད་བྱེད་དགོས་པ་ཞིག་ནི། རྩོམ་ཡིག་འདི་ནི་སྐབས་དེའི་ཚོར་བ་གཙོ་བོར་བཟུང་ནས་བྲིས་པ་ཡིན་སྟབས་ནང་དོན་ལ་ལོ་རྒྱུས་ཀྱི་ཆ་འཇོག་ཅི་ཡང་བྱེད་ཀྱིན་མེད།
བོད་ཀྱི་དུས་བབ་ཟིན་བྲིས་པ་ཕུན་ཚོགས་ལགས་ཀྱི་ཟིན་བྲིས་ལས་བཤུས་འགོད་བྱས།
ཉེ་སྔོན་ངས་བོད་ཀྱི་དུས་བབ་ཟིན་བྲིས་པ་ཚོར་མོལ་བ་ཞེས་པའི་རྩོམ་ཡིག་ཏུ། བོད་ཀྱི་དུས་བབ་ཟིན་བྲིས་ལས་ལེགས་རྩོམ་རྙེད་ཁག་སྐོར་བྲིས་ཡོད། དེ་རིང་ངས་བརྗོད་བདེ་བ་དང་གོ་སླ་བ། ཞིབ་ཚགས་པ། རྣམ་པ་གསར་བ་བཅས་ཀྱི་ཁྱད་ཆོས་ལྡན་པའི་གོང་གི་ལེགས་རྩོམ་འདི་རྙེད་བྱུང་།
ང་ལྟ་བུ་ཅང་མི་ཤེས་མཁན་ཞིག་གི་སྣང་ངོར་གོང་གི་རྩོམ་ཡིག་འདི་ལེགས་པོར་མཐོང་བ་ལས་ཤེས་ལྡན་དཔྱོད་མཁྱེན་པ་ཡོངས་ལ་དེ་ལྟར་ཡིན་མི་སྲིད་ཀྱང་། ངས་དེང་སྐབས་གོང་གི་རྩོམ་ཡིག་གི་འབྲི་ཐབས་འདིའི་རིགས་ལ་དགའ་སྣང་བྱེད་ཀྱིན་ཡོད། དཔེར་ན། བུད་མེད་རྩོམ་པ་མོ་འཇམ་དབྱངས་སྐྱིད་ཀྱིས་བརྩམས་པའི་མནར་གཅོད་ཀྱི་གོ་རིམ་ཞིག་ཅེས་པ་ལྟ་བུ་རེད། མི་ལོ་བཅུ་ཉི་ཤུ་རེར་བཙོན་ནས་བཞུགས་པའི་བཙོན་མ་རྣམས་དང་བསྡུར་ན་ཁོ་མོ་ཉིན་ཉི་ཤུ་ལས་བཞུགས་དགོས་བྱུང་མེད་ཀྱང་། ཁོ་མོའི་ཐུན་མིན་གྱི་འབྲི་ཐབས་དང་ཞིབ་ཚགས་པ། གོ་སླ་བ། མཐོ་རྒྱག་དམའ་ལྷུང་ཉུང་བ་བཅས་ཀྱིས་ཉིན་ཉི་ཤུའི་མནར་གཅོད་ཀྱི་གོ་རིམ་ཞིག་ཅེས་པ་བཀླག་རྗེས་ཁྱེད་ཀྱིས་སེམས་ལ་མ་མཐར་ཡང་ད་ལྟའི་གཞིས་ཀྱི་རྒྱལ་གཅེས་དཔའ་བོ་དཔའ་མོ་རྣམས་ཀྱིས་མྱངས་དང་མྱོང་བཞིན་པའི་དཀའ་སྡུག་གི་གནས་སྟངས་ཤིག་གསལ་གྱི་ལེར་མངོན་ཡོང་། དེ་སྔོན་ངས་བཙོན་སྐྱོད་ཟིན་ཐོ་མང་བོ་ཀློག་མྱོང་བའི་ཁྲོད་ནས་མནར་གཅོད་མྱོང་བའི་དུས་ཡུན་ཤོང་གཞས་མ་འཇམ་དབྱངས་སྐྱིད་ལགས་ཡིན་ཡང་། སེམས་ངོར་གསལ་གྱི་ལེར་བཏང་བའི་ཟིན་ཐོ་ནི་ཁོང་མོའི་མནར་གཅོད་ཀྱི་གོ་རིམ་ཞིག་ཅེས་པ་ཁོ་ན་ཡིན།
གང་ལྟར་ཡང་། ངས་དེ་ལྟར་རྒྱང་བསྐོར་ནས་ཅིག་བཤད་ཨེ་ཐུབ་ལ་འབད་དོན་ད་ལྟའི་ང་ཚོའི་སྙུག་ཐོགས་པ་རྣམས་ཀྱིས་རང་གིས་ཅི་ཞིག་འབྲི་གི་ཡོད་ནའང་། དེ་ནི་མཐོ་རྒྱག་དམའ་ལྷུང་ཉུང་བ་དང་དོན་ལ་གནས་པ། འབྲི་ཐབས་གསར་བ་དང་གོ་སླ་བ། ཞིབ་ཚགས་པ། ལོ་རྒྱུས་ཀྱི་དོན་སྙིང་ལྡན་པ་བཅས་ཡིན་ཚེ་དེས་འབྲི་བ་བོ་རང་ཉིད་ལ་ཕན་གི་རེད་ལ། ཀློག་པ་བོ་གང་དེའི་དུས་ཚོད་ཀྱང་འཕྲོ་བརླག་ཏུ་མི་འགྲོ་བ་སོགས་རྒྱུ་མཚན་དུ་མར་མཐོང་བས་གཞུག་ཕྱོགས་འདིའ་ཕྱོགས་ཐུགས་སྣང་གནང་རེ་བཅས་སོ། །