གླེང་རྙོག་ཁྲོད་ཀྱི་རྩེད་འགྲན།

ཕྱི་ལོ་ ༢༠༡༠ ལོའི་རྒྱལ་སྤྱིའི་རྩེད་འགྲན་ Commonwealth Games ཞེས་པ་དེ་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལི་ནའེ་རུ་རྩེད་ཐང་ཆེན་མོར་མགོ་འཛུགས་བྱས་ཡོད་ཅིང་། རྩེད་འགྲན་དེའི་སྟེང་རྒྱལ་ཁབ་ ༧༡ ཙམ་གྱི་རྩེད་འགྲན་པ་དང་། ལྟད་མོ་བ་དྲུག་ཁྲི་ ༦༠༠༠༠ ལྷག་མཉམ་ཞུགས་བྱས་ཡོད་འདུག དབྱིན་ཇིའི་རྒྱལ་སྲས་ཅཱལ་སི་ Charles ལགས་ཀྱིས་རྩེད་འགྲན་དབལ་འབར་དེ་སྤྱི་ལེ་ ༡༧༠༠༠༠ ཙམ་ལ་སྐོར་སྐྱོད་ཀྱིས་ལྡི་ལིར་འབྱོར་མཚམས་རྩེད་འགྲན་ཐེངས་ ༡༩ བ་དངོས་སུ་མགོ་འཛུགས་བྱས་པ་ཁྱབ་བསྒྲགས་བྱས་ཤིང་། ཉིན་དང་པོའི་ཆུ་ཚོད་གཉིས་དང་ཕྱེད་ཀའི་རིང་གི་དབུ་འབྱེད་མཛད་སྒོའི་ཐོག རྒྱ་གར་གྱི་སློབ་ཕྲུག་གཙོས་འཁྲབ་སྟོན་པ་ ༧༠༠༠ ལྷག་གིས་རྒྱ་གར་རང་གི་ཁྱད་ཆོས་ལྡན་པའི་གནའ་དེང་གི་གཞས་དང་ཞབས་བྲོ། རོ་དབྱངས་སོགས་ཀྱིས་འཁྲབ་སྟོན་བྱས་ཡོད།

རྩེད་འགྲན་འདི་ཨེ་ཤ་ཡའི་ནང་ཚོགས་པ་ཐེངས་མ་གཉིས་པ་དང་། རྒྱ་གར་ལ་ཐེངས་དང་པོ་ཆགས་ཡོད། དེ་སྔོན་ནས་ཐེངས་འདིའི་རྩེད་འགྲན་ར་བའི་འཛུགས་སྐྲུན་འགྲུབ་མེད་པ་དང་། རྩེད་མོ་བ་རྣམས་ལ་སྡོད་གནས་ཀྱི་མཐུན་རྐྱེན་ཞན་པ། ཁོར་ཡུག་གཙང་སྦྲ་མེད་པ། ས་གནས་བདེ་འཇགས་ལ་ཁག་ཐེག་མེད་པ་བཅས་ཀྱི་རྙོག་གླེང་འོག རྩེད་འགྲན་པ་ཁག་ཅིག་ཕྱིར་འཐེན་བྱས་ཡོད་ཅིང་། རྒྱ་གར་གྱི་རྩེད་རིགས་ཚོགས་ཆུང་གི་ལས་བྱེད་ཅིག་ལ་འགོ་ནད་ཅིག་ཕོག་ཡོད་པ་དང་། གཞན་ཞིག་ལ་དུག་སྦྲང་གིས་རྐྱེན་པས་རུས་ནད་བྱུང་སྟེ་སྨན་ཁང་དུ་འགྲོ་དགོས་བྱུང་བ་སོགས་ཀྱིས་སྐུ་མགྲོན་མང་པོ་ཞིག་ལ་དོགས་འཚབ་བསླངས་ཡོད་འདུག

ཐེངས་འདིའི་རྩེད་འགྲན་གྱི་གོ་སྐབས་དང་བསྟུན་ཏེ། འཇིགས་སྐུལ་བ་ཚོས་གཏོར་རྒོལ་བྱ་སྲིད་པའི་ཉེན་ཁ་ཡོད་སྟབས། རྒྱ་གར་གཞུང་ཕྱོགས་ནས་རྩེད་འགྲན་གླིང་ག་གཙོས་པའི་ལྡི་ལི་གྲོང་ཁྱེར་གྱི་ས་ཚིགས་ཁག་ཏུ་དྲག་ཆས་ཉེན་རྟོག་པ་དང་དམག་མི་ ༡༠༠,༠༠༠ ཙམ་འགྲེམས་འཇོག་བྱས་ཤིང་། དམག་མིའི་ཐད་འཕུར་གནམ་གྲུ་དང་ MiG འཐབ་འཛིང་གནམ་གྲུ་སོགས་མཁའ་དབྱིངས་གང་སར་ལྡིང་སྐོར་གྱིས་སོ་བ་བྱེད་བཞིན་ཡོད་འདུག དེ་བཞིན། རཱ་ཇི་སི་ཐན་ནས་ཆེད་དུ་ཉེན་སྲུང་སྤྲ་རིགས་དང་། ཁྱི་སོགས་ཁྲུད་ཡོང་སྟེ་ཐེངས་འདིའི་རྩེད་འགྲན་གྱི་བདེ་འཇགས་ལ་སྲུང་སྐྱོབ་ནན་མོ་བྱས་ཡོད། ཐེངས་འདིའི་རྩེད་འགྲན་གོ་སྒྲིག་ཐད་ལྐོག་ཟ་རུལ་སུངས་ཀྱི་གླེང་རྙོག་ཤུགས་ཆེན་བྱུང་ཡོད་སྟབས། ལྡི་ལི་གྲོང་ཁྱེར་སྤྱི་ཁྱབ་བློན་ཆེན་ལྕམ་ཤཱེ་ལེ་ཡ Shelia Dikshit ལགས་ཀྱིས། རྩེད་འགྲན་ཡོངས་སུ་མཇུག་བསྒྲིལ་རྗེས་གནད་དོན་དེའི་ཐད་ཞིབ་བཤེར་གཙང་མ་བྱ་རྒྱུ་ཡིན་སྐོར་ཡང་བརྗོད་འདུག

གསར་འགོད་པ། བནྡེ་སྐྱབས།