༸གོང་ས་མཆོག་གིས་དེ་རིང་ནས་བཟུང་ཉིན་གྲངས་བཞིའི་རིང་། ཐེ་ཝན་གྱི་དད་ལྡན་པ་ཚོར་སློབ་དཔོན་ཀླུ་སྒྲུབ་ཀྱི་དབུ་མ་རྩ་བ་ཤེས་རབ་དང་ཇོ་བོ་རྗེས་མཛད་པའི་བྱང་ཆུབ་ལམ་སྒྲོན། རྗེ་རིན་པོ་ཆེས་མཛད་པའི་རྟེན་འབྲེལ་བསྟོད་པ་དང་ལམ་རིམ་བསྡུས་དོན་བཅས་ཀྱི་བཀའ་ཆོས་དབུ་འཛུགས་གནང་ཡོད།
དུས་ཡུན་རིང་པོའི་གོང་ནས་ཐེ་ཝན་དང་ཧོང་ཀོང། རྒྱ་ནག་སྐམ་ས་ཆེན་མོ་བཅས་ཀྱི་ཆོས་ཞུ་བ་ཁག་ཅིག་གིས་ཇི་ལྟར་གསོལ་འདེབས་གནང་བ་ལྟར། དེ་རིང་ཞོགས་པར་༸གོང་ས་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ་གསུང་ཆོས་དབུ་འཛུགས་གནང་ཡོད་ཅིང་། གསུང་ཆོས་ཀྱི་ཐོག་མར་དབུ་མ་རྩ་བ་ཤེས་རབ་དང་རྟེན་འབྲེལ་བསྟོད་པ་ནང་ཆོས་ངོ་སྤྲོད་ཀྱི་ཚུལ་དུ་གསུང་རྒྱུ་དང་། བྱང་ཆུབ་ལམ་སྒྲོན་དང་ལམ་རིམ་བསྡུས་དོན་ནང་ཆོས་ཉམས་ལེན་བྱེད་ཕྱོགས་ཀྱི་ཚུལ་དུ་གསུང་རྒྱུ་ཡིན་འདུག
ཐེངས་འདིའི་གསུང་ཆོས་སྟེང་ཐེ་ཝན་དང་རྒྱ་ནག་སྐམ་ས་ཆེན་མོ། ཧོང་ཀོང་བཅས་ནས་ཕེབས་པའི་དད་ལྡན་ཆོས་ཞུ་པ་ ༡༣༠༠ ལྷག་དང་། དབྱིན་ཇི་དང་ཉི་ཧོང་། ཨི་ཊ་ལི། ཝེ་ཏི་ནམ། ཀོ་རི་ཡ། ཨ་རི་བཅས་ཀྱི་དད་ལྡན་ཆོས་ཞུ་པ་ ༡༥༠༠ ཙམ། དེ་བཞིན་འབྲུག་དང་བཞུགས་སྒར་སེར་སྐྱ་མི་མང་བཅས་མི་གྲངས་ལྔ་སྟོང་ལ་ཉེ་བ་འཛོམས་ཡོད་ཅིང་། དབྱིན་སྐད་དང་ཝེ་ཐི་ནམ། རྒྱ་སྐད། ཀོ་རི་ཡ། ཉི་ཧོང་བཅས་སྐད་རིགས་བཞི་ཡི་ཐོག་སྐད་བསྒྱུར་གྱིས་ཐད་ཀར་རྒྱང་བསྲིང་བྱེད་བཞིན་ཡོད་འདུག་ལ། ༸གོང་ས་མཆོག་སྐུ་སྒེར་དྲ་རྒྱའི་སྟེང་དུའང་ཐད་ཀར་མི་མང་ལ་གཟིགས་འབུལ་གྱིས་ཆ་རྐྱེན་བསྐྲུན་ཡོད་པ་རེད།
སྐབས་དེར་ཁོང་གིས་སེམས་ཁམས་ཀྱི་ཉོན་མོངས་དུག་གསུམ་དེ་ཕྱི་རོལ་དུ་ཡོད་པ་ཞིག་མ་ཡིན་པར། ང་ཚོ་མིའི་གཤིས་རྒྱུད་ཀྱི་ནང་དུ་ཡོད་བསྡད་པ་ཞིག་ཡིན་ཞིང་། དེ་ཡང་གཙོ་བོ་གཏི་མུག་ལས་བྱུང་བ་ཞིག་ཡིན་སྟབས། དེ་སེལ་
བར་མིའི་ཤེས་རབ་ཀྱི་སྣང་བའི་ཐོག་ནས་མཐའ་ཡས་པའི་སེམས་ཅན་གྱི་སྡུག་བསྔལ་སེལ་བའི་བྱང་ཆུབ་སེམས་ཀྱི་བློ་བསྐྱེད་དགོས་པ་དང་། བློ་རིམ་གྱིས་སྦྱངས་ཏེ་འབྲས་བུ་ལྡན་པ་ཞིག་ཡོང་དགོས་པའི་ཐད་ལ་འབད་པ་བྱ་དགོས་ཚུལ་སོགས་མིའི་ཤེས་རབ་ལ་བརྟེན་ཏེ། ངེས་པ་དང་ཡིད་ཆེས་རྙེད་པ་དང་ཕྱི་མ་མངོན་འདོད་དང་ཐམས་ཅད་མཁྱེན་པའི་གོ་འཕང་གི་འདོད་པ་སོགས་ཉོན་མོངས་དང་བྲལ་དགོས་པའི་སྐོར་སོགས་དབུ་མ་རྩ་བ་ཤེས་རབ་དང་རྟེན་འབྲེལ་བསྟོད་པའི་སྐོར་གྱི་བཀའ་ཆོས་བསྩལ་ཡོད།
སང་ཉིན་ནས་བཟུང་༸གོང་ས་མཆོག་གིས་ཉིན་གྲངས་གསུམ་རིང་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན་དང་རྗེ་རིན་པོ་ཆེས་མཛད་པའི་ལམ་རིམ་བསྡུས་དོན་བཅས་ཀྱི་བཀའ་ཆོས་གནང་རྒྱུ་ཡིན་ཞིང་། ཐེངས་འདིའི་གསུང་ཆོས་དེ་ཞོགས་པའི་ཆུ་ཚོད་ ༩ དང་ཕྱེད་ཀ་ནས་ཆུ་ཚོད་ ༡༡ དང་ཕྱེད་ཀའི་བར་དང་། ཕྱི་དྲོའི་ཆུ་ཚོད་ ༡ པོ་ནས་ ༣ བར་སྩོལ་འཆར་ཡོད་པ་རེད།
གསར་འགོད་པ། དོན་གོ
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
འཛམ་གླིང་ཞི་བདེའི་འོད་སྣང་ཁྱབ་གྱུར་ཅིག སྐུ་ཚེ་ཡུན་རིང་བརྟན་པར་ཤོག གངས་ཅན་ལྗོངས་ཀྱི་བདེན་མཐའ་མྱུར་དུ་སེལ་བར་ཤོག
རླབས་ཆེན་གྱི་དགོངས་གཞི་ཟབ་མོ་དེ་ནི་མྱུར་འགྲུབ་ཡོང་བའི་སྨོན་འདུན་གྲངས་མེད་ཞུ་དང་ཆབས་གཅིག་ཏུ་ཁོང་གི་སྐུ་ཚེ་ཡུན་ཏུ་བརྟན་ཅིང་བོད་ལྗོངས་རང་དབང་གཙང་མའི་བདེན་མཐའ་མྱུར་དུ་གསལ་པར་སྨོན་ཤུགས་དྲག་ཞུ་ཞུ།