ཕ་ཡུལ་དུ་བསྐྱོད་པའི་མཐོང་ཐོས་བརྗོད་པ།

ཕ་ཡུལ་ཁམས་མི་ཉག་ནས་ཡིན་པའི་སློབ་བུ་བསོད་ནམས་སྟོབས་ལྡན་ལགས། རྒྱ་གར་ནང་གི་མི་ལོ་ ༡༤ རྗེས་ཏེ་ད་ལོའི་ཕྱི་ཟླ་ ༦ པར་བོད་ནང་སྐོར་སྐྱོད་བྱས་ཏེ། ཉེ་ཆར་ཕྱིར་བཞུགས་སྒར་དུ་འབྱོར་ཡོད་ཅིང་། ཁོང་ཆུང་དུས་ས་གནས་སློབ་གྲྭར་ལོ་ ༧ ཙམ་ཕྱིན་ཡོད་ཅིང་།  ༡༩༩༧ ལོར་རྒྱ་གར་དུ་འབྱོར་ཏེ་སྦིར་སློབ་གྲྭར་ཞུགས། ནོར་གླིང་མཐོ་སློབ་ནས་ལེགས་བྱང་མཐོ་རམས་པ་ཐོན་རྗེས་ཕྱིར་ཕ་ཡུལ་བོད་དུ་ཕྱིན་ཏེ། ཟླ་སྔོན་མར་ཕྱིར་བཞུགས་སྒར་དུ་འབྱོར་མ་ཐག་འདི་གའི་གསར་འགོད་པ་དཔལ་ལྡན་དང་ཐུག་འཕྲད་བྱས་ཏེ། ཁོང་གི་བོད་སྐྱོད་ཟིན་ཐོ་དང་ལྷན་དུ་གླེང་མོལ་བྱས་ཤིང་། ཁོའི་འགྲུལ་བཞུད་གོ་རིམ་ཁྲོད་ཀྱི་མཐོང་ཐོས་མྱོང་གསུམ་ཟིན་བྲིས་སུ་བཏབས། 

བསོད་ནམས་སྟོབས་ལྡན་ལགས་ཀྱིས་ཐོག་མར་ཕ་ཡུལ་དུ་ལོག་རྒྱུར་སྟ་གོན་བྱས་པའི་བརྒྱུད་རིམ་ནས་མགོ་འཛུགས་བྱས་བྱུང་། “ཟླ་ཤས་གོང་ནས་ཐོ་འགོད་བྱས་ཡོད་པ་ལྟར། ད་ལོའི་ཕྱི་ཟླ་ ༦ པའི་ཚེས་ ༢༨ ཉིན་ང་ལ་ལྡི་ལི་རྒྱ་ནག་གཞུང་ཚབ་ནས་བོད་ནང་འགྲོ་སྐྱོད་ཆོག་པའི་ཡུལ་སྐོར་སྤྲོ་འཆམ་གྱི་ལག་ཁྱེར་རག་སོང་། འདི་ནི་རིན་ཐང་དང་གཟི་བརྗིད་ཀྱི་སྐྱོད་སྟངས་ཤིག་མིན་རུང་། ཏག་ཏག་མི་ལོ་ ༡༤ རིང་མིའི་ལུང་པར་འཁྱམས་པའི་རྗེས་ལ་སླར་ཡང་ཕ་ཡུལ་དུ་བསྐྱོད་རྒྱུའི་གོ་སྐབས་ཐོག་མར་རག་པ་རེད། སེམས་པ་དངོས་གནས་དགའ་སྐྱོ་གཉིས་ལྡན་ཞིག་བྱུང་། ཕྱི་ཟླ་ ༧ པའི་ཚེས་ ༡༤ ཉིན་བལ་བོད་ས་མཚམས་འགྲམ་ལ་སླེབས་སྐབས། དམག་མི་དང་འཐབ་ཕྱོགས་གཅིག་གྱུར་ལས་ཁུངས་སོགས་ཀྱིས་ཞི་དྲག་གཉིས་ཐོག་ནས་འདྲི་བརྩད་ཡང་ཡང་བྱས་སོང་། ཉིན་དང་པོར་འགྲམ་གྱི་ཁང་ཆུང་ཞིག་ཏུ་ཆུ་ཚོད་ ༩ ཙམ་རིང་བཟང་བཙོན་ལྟ་བུར་བཀག་ཅིང་། ཕྱི་ཉིན་ང་ཚོར་ཡིག་ཆ་གཞན་ཞིག་སྤྲད་དེ་འགྲོ་སྐྱོད་ཆོག་པའི་བཀའ་འཁྲོལ་ཐོབ་སོང་།”

ཁོང་གིས་བོད་ནང་སྐོར་སྐྱོད་ཀྱི་གོ་རིམ་དེ་འཆར་ཡན་གྱི་ཚུལ་དུ་བརྗོད་དོན། “རླངས་འཁོར་གྱི་སྒེའུ་ཁུང་ནས་ཧོབ་ཀྱིས་བལྟས་ན་ཕྱི་རོལ་གྱི་ཡུལ་ལྗོངས་གསལ་པོ་མཐོང་དཀའ་ཡང་།  ལམ་འགྲམ་དག་གི་བཟོ་བཀོད་ལེགས་པའི་འཛུགས་སྐྲུན་དང་གཙང་སྦྲ། ལ་བ་སྤུས་དག་གྱོན་པའི་མང་ཚོགས་མཐོང་སྐབས། ད་ནི་བོད་ཡུལ་ཡར་རྒྱས་སུ་སོང་འདུག་སྙམ་པའི་ཚོར་བ་ཞིག་སྟེར་གྱི་འདུག སེམས་ཚོར་འདི་དང་མཉམ་དུ། ངའི་ཕ་ཡུལ་མི་ཉག་གང་འདྲ་ཡོད་དམ། མདོ་སྟོད་སྨད་ཀྱི་ས་ཁུལ་གཞན་དག་ཡར་རྒྱས་ཡོད་དམ། ཁྲ་རིག་རིག་གི་མཐོང་སྣང་འདི་དག་ང་ལྟ་བུའི་ཡུལ་སྐོར་སྤྲོ་འཆམ་པ་དག་གི་མིག་གི་ལོངས་སྤྱོད་ཙམ་ཡིན་ནམ། ས་གནས་མང་ཚོགས་ཀྱི་འཚོ་བའི་ལོངས་སྤྱོད་དངོས་ཡིན། ངའི་སེམས་ལ་འདི་འདྲ་རྐྱང་རྐྱང་འཁོར་ཏེ། བོད་ཀྱི་རྒྱལ་ས་ལྷ་སར་ཇི་ལྟར་འབྱོར་བའང་ཡང་མ་ཚོར” ཟེར།

བསོད་ནམས་སྟོབས་ལྡན་ལགས་བོད་ཀྱི་རྒྱལ་ས་ལྷ་སར་འབྱོར་བའི་མཐོང་སྣང་འདི་ལྟར་རེད། “ ངའི་སེམས་ངོགས་སུ་ཡུན་རིང་ཉར་བའི་ལྷ་སའི་ཁྲོམ་གཞུང་དང་། པོ་ཏ་ལའི་ཐང་ཆེན། གཙུག་ལག་ཁང་མདུན་ཐང་སོགས་ཤུལ་ཙམ་ཡང་མི་འདུག དྲག་ཆས་སྤྲས་པའི་དམག་དཔུང་དང་། ཞ་མདའ་རུ་གྱོན་པའི་ཉེན་རྟོག་པ། སྒྲིག་ཆས་འདྲ་མིན་གྱོན་པའི་ཉེན་སྲུང་ཞིབ་བཤེར་པ་རྐྱང་རྐྱང་གིས་གང་འདུག ང་ཞེད་ཐག་ཆོད་པ་མིན་ན། ང་གང་ལ་སོང་ན་ཁོང་ཚོ་དེར་ཡོང་གི་འདུག་ལ། ཁོང་ཚོ་ཚང་མས་ང་ལ་ལྟ་རྟོག་བྱེད་ཀྱི་འདུག བོད་པ་རྣམས་འདུ་འཛོམས་དང་མཚན་མོར་ཕྱི་རོལ་དུ་འགྲོ་རྒྱུར་ཞེད་ཀྱི་འདུག་ལ། ཚང་མས་ཕན་ཚུན་ལ་དོགས་སྣང་དང་ཡིད་གཟབ་ཀྱིས་འགྲོ་བཞིན་ཡོད་པའི་རྣམ་པ་འདུག ཅུང་དགའ་འོས་པ་ཞིག་ནི། ལྷ་སའི་བོད་པ་ཞིག་གི་བཤད་ན་སྔོན་ཆད་ཀྱི་ལྷ་སའི་བོད་མིའི་མཐུན་ལམ་ནི་དེ་ཙམ་ཡག་རྒྱུ་མེད་ཀྱང་། ༢༠༠༨ ལོའི་དོན་རྐྱེན་རྗེས་སུ་མཐུན་ལམ་རྦད་དེ་ཡག་ཏུ་ཕྱིན་སོང་། དེང་སྐབས་དོན་རྐྱེན་ཞིག་བྱུང་ནའང་ཐོག་མར་ང་ཚོ་རེད་དམ། ཁོང་ཚོ་རེད་ཅེས་བའི་བཤད་སྲོལ་གསར་པ་ཞིག་དར་འདུག” ཅེས་བརྗོད་བྱུང་།

བསོད་ནམས་ཀྱིས་ལོ་ངོ་བཅུ་བཞི་ལ་བསགས་པའི་མིག་ཆུ་ཕ་ཡུལ་གྱི་ཕྱོགས་སུ་བཞུར། “འདི་ལྟར་ང་རང་ལྷ་ས་ནས་མེ་འཁོར་བརྒྱུད་ཟི་ལིང་དང་། ཟི་ལིང་ནས་ཁྲིན་ཏུའུ་རུ་འབྱོར་སོང་། དེ་ནས་ང་རང་གི་སྔོན་བསུ་བར་ཡོང་བའི་གཅེན་པོ་དང་ལྷན་དུ་ཕྱི་ཟླ་ ༨ པའི་ཚེས་མགོར་ཕ་ཡུལ་དུ་འབྱོར། ང་རང་སྡེ་འདབས་སུ་འབྱོར་སྐབས་ངའི་ནང་མི་དང་གཉེན་ཉེ་མང་པོ་ཞིག་གིས་ཁ་བཏགས་བཟུང་སྟེ་སྔ་ས་ནས་ང་ལ་སྒུག་འདུག་པ་མཐོང་མ་ཐག ངའི་མིག་ཟུང་ནས་མཆི་མ་ཤར་ཤར་དུ་བཞུར་བྱུང་། མི་ལོ་ ༡༤ ཡི་དུས་ཚོད་ནི་ཤིན་ཏུ་རིང་པོ་ཞིག་ཡིན་རུང་། ངའི་ཉེ་འབྲེལ་ཚོའི་བརྩེ་བ་དེ་ཇི་འདྲའི་འགྱུར་མེད་ཅིག་རེད་ཨང་སྙམ་སྟེ་སེམས་འགུལ་ཐེབས་བྱུང་། ཕ་ཡུལ་ནས་ཉིན་ཤས་བསྡད་རྗེས་ཁམས་བྲག་མགོ་དང་། རྟའུ།  བར་སྨད། དཀར་མཛེས་དང་དེ་ནས་མི་ཉག་རོང་ཕྱོགས་ཀྱི་ས་ཆ་འགར་ཕྱིན་པ་ཡིན། བྲག་མགོ་རྫོང་ཐོག་ཏུ་སླེབས་སྐབས། རྒྱ་གྲོང་ཞིག་ཏུ་སླེབས་པ་དང་འདྲ་བར་རྒྱ་མི་འབོར་ཆེན་མཐོང་རྒྱུ་ཡོད་པར་མ་ཟད། ཁང་པའི་འཛུགས་བསྐྲུན་དང་འཚོ་བ་རོལ་སྟངས་སོགས་ལ་ཡང་རྒྱ་མིས་ཤུགས་རྐྱེན་ཆེན་པོ་འདུག དེར་མ་ཟད་བྲག་མགོ་རྫོང་ཐོག་ཏུ་སྡོད་མཁན་བོད་པ་ཚོས་ཀྱང་རྒྱ་སྐད་སྤྱི་སྐད་ལྟ་བུར་སྤྱོད་ཀྱིན་ཡོད་པའི་སྣང་ཚུལ་དེས་རེ་ཞིག་སེམས་པ་སྐྱོ་ལྷང་ངེར་བ་ཞིག་བྱུང་། བྲག་མགོ་ནས་རྟའུ་ཕྱོགས་སུ་བསྐྱོད་པའི་ལམ་ཁའི་གཡས་གཡོན་དག་ཏུ་ཐོག་རྩེག་གཉིས་ཅན་གྱི་ཁང་པ་གསར་པ་མང་པོ་བརྒྱབ་འདུག་པ་མཐོང་བྱུང་། རྗེས་སུ་དེ་ནི་རྒྱ་གཞུང་གིས་ཆེད་དུ་འབྲོག་པ་རྣམས་གྲོང་འཁྱེར་ཅན་དུ་བསྒྱུར་ཆེད་གསར་བཟོ་བྱས་པ་ཤེས་སོང་ལ། ངའི་གྲོགས་པོ་ཞིག་གིས་བཤད་ན། རྒྱ་གཞུང་གིས་སྡོད་ཁང་རེར་རྒྱ་སྒོར་ཁྲི་ ༡ རེའི་འགྲོ་སོང་བཏང་ཡོད་སྟབས། འབྲོག་པ་རྣམས་གཞིས་སྤོ་མ་བྱས་ན་མི་འགྲིག་པའི་བཀའ་རྒྱ་བཏང་ཡོད་པ་རེད” ཟེར།

གཅེས་སུ་འོས་པའི་ཕ་ཡུལ་གྱིས་ཁོང་ལ་བཞག་པའི་མངར་ལ་སྐྱུར་བའི་ཚོར་འདུ་བརྗོད་དོན། “ཕྱི་ཟླ་ ༨ པའི་ཚེས་ ༡༤ ཉིན་ང་རང་རྟའུ་ལ་སླེབས་སྐབས། ས་གནས་བོད་རིགས་རྒན་པོ་ཞིག་དང་གླེང་མོལ་བྱུང་། ཁོང་གིས་སྔོན་ཆད་ང་ཚོའི་རྩྭ་ཐང་ཡོངས་ཕྱུགས་རིགས་ཀྱིས་ཁེབས་ནས་ཡོད་ལ། མི་ཚང་མར་དཀའ་སྡུག་དང་སུན་བཙེར་བྱེད་མཁན་མེད་པར་དགའ་སྤྲོས་ཁེངས་ཡོད། དེང་སྐབས་འབྲོག་པ་ཡིན་ཡང་ནོར་ལུག་ཡོད་པ་མ་རེད་ཟེར། དཀར་མཛེས་ལ་སླེབས་དུས་ག་ས་གང་དུ་དམག་སྒར་དང་དྲག་ཆས་སྤྲས་པའི་དམག་མི་ཕོན་ཆེན་འགྲེམས་འཇོག་བྱས་འདུག བོད་ནང་གི་ས་གནས་གནད་འགག་ཅན་དག་དང་། ས་གནས་མང་ཚོགས་ཚོར་མི་རིགས་ཀྱི་ལ་ཞེན་ཆེ་ས་དག་ལ་རྒྱ་གཞུང་གིས་དམ་དྲག་བྱེད་ཀྱི་ཡོད་པ་སྔར་ནས་ཐོས་མྱོང་ཡོད་ཀྱང་། ངའི་ཕ་ཡུལ་ལ་མཚོན་ན། བོད་དོན་གྱི་གོ་རྟོགས་ཞན་པ་འམ། ཡང་ན་ས་མཚམས་ནས་ནུས་ཤུགས་འདོན་མ་ཐུབ་པ་ཡིན། གང་ལྟར་ཡང་དམག་སྒར་དང་དམག་མིའི་འཇིགས་སྣང་མི་འདུག་ལ། ཕར་བལྟས་ཚོད་ཀྱིས་ཡུལ་མི་རྣམས་དཔལ་འབྱོར་འཚོལ་སྒྲུབ་ཀྱི་ལས་ལ་མགོ་འཁོར་བསྡད་ཡོད་པའི་མཐོང་སྣང་ཞིག་བྱུང་སོང་། སྔོན་བོད་དུ་ཡོད་སྐབས། ཕ་ཡུལ་གྱི་སྡོད་ཁང་དག་ལ་བོད་མི་རིགས་ཀྱི་ཁྱད་ཆོས་ལྡན་ཞིང་། མི་མང་ཚོས་ཀྱང་རྒྱུན་དུ་བོད་ཆས་གྱོན་ཏེ་བོད་སྐད་དག་གཙང་བཤད་ཀྱི་ཡོད། འདས་པའི་ལོ་ ༡༤ ནང་རིང་ངའི་ཕ་ཡུལ་ཡོངས་སུ་འགྱུར་འདུག ད་ཆར་སྐད་ཆ་བཤད་སྟངས་དང་གོན་པ་གྱོན་སྟངས། ཁང་པ་རྒྱག་སྟངས་ཚུན་རྒྱ་མི་ལ་འགྱུར་ཚར་འདུག” ཅེས་སྐྱོ་ཉམས་དང་བཅས་བརྗོད་བྱུང་།

“ང་འགྲོ་སའི་ས་ཁུལ་མང་ཆེ་བར་ཕྱིའི་འཛུགས་སྐྲུན་དང་ཁོར་ཡུག་གཙང་སྦྲ་ནི་སྤྲོ་སྣང་ལྡན་པ་ཞིག་ཡིན་ནའང་། མང་ཚོགས་ལ་བར་ཐག་ཉེ་བོས་སྐད་ཆ་འདྲི་སྐབས། འཛུགས་སྐྲུན་དེ་དག་གིས་མང་ཚོགས་ལ་ཁེ་ཕན་གང་ཡང་རག་གི་མེད་པ་མ་ཟད། དེང་སྐབས་རྒྱ་རིགས་ཁེ་ལས་པ་མང་པོ་ཡོང་ནས་མ་རྩ་བཙུགས་ཏེ་ས་ཆ་ཉོ་བ་དང་། ཚོང་གི་ལྟེ་གནས་འཛུགས་པ་སོགས་ཀྱིས་ས་གནས་མང་ཚོགས་ལ་དཀའ་ངལ་བཟོ་བཞིན་ཡོད་པ་ཤེས་སོང་། ངའི་ཕ་ཡུལ་མི་ཉག་ཀྱང་དེའི་གྲས་ཀྱི་གཅིག་རེད། ད་ཆར་མི་ཉག་ཁུལ་གྱི་གྲོང་སྡེ་ ༡༣ ཙམ་དཀའ་ངལ་འདིའི་ནང་དུ་ལྷུང་འདུག སྡེ་བ་འགའི་ས་ཐོག་ཏུ་ཆུ་མཛོད་གསར་རྒྱག་གི་རྐྱེན་གྱིས་མང་ཚོགས་ས་གནས་གཞན་དུ་གཞི་སྤོར་བྱ་དགོས་བྱུང་འདུག་ལ། མི་ཉག་གི་བོད་རིགས་ལས་བྱེད་དང་དགོན་པའི་མཁན་པོ། སྡེ་བ་ཁག་གི་སྡེ་དཔོན་རྣམས་ཀྱིས་ཐེངས་དུ་མར་གོང་རིམ་ལ་ཞུ་གཏུག་བྱས་ཀྱང་གྲུབ་འབྲས་མེད་པར་ལྷག་འདུག ཆུ་མཛོད་རྒྱག་སའི་ས་ཁུལ་འགའ་ཞིག་རྩྭ་ས་དང་ཞིང་ཁར་འཁེལ་འདུག་ལ། འགའ་ཞིག་དབྱར་རྩྭ་དགུན་འབུ་དང་ཤ་མོ། གཏེར་ཁ་འདྲ་མིན་ཡོད་པའི་ས་ཆ་རྩ་ཆེན་དག་ལ་འཁེལ་འདུག”  ཟེར།  

མཇུག་མཐར་བསོད་ནམས་སྟོབས་ལྡན་ལགས་ཀྱིས་ཕྱིར་རྒྱ་གར་དུ་ལོག་པའི་སེམས་ཚོར་གླེང་དོན། “ལོ་མང་པོའི་རྗེས་སུ་ང་རང་བོད་དུ་འགྲོ་ཐུབ་པ་དེས་ངའི་སེམས་ཀྱི་སྡུག་བསྔལ་རེ་ཞིག་སེལ་ཐུབ་ཡོད་ཀྱང་། ང་ལ་ནམ་ཡང་བོད་དུ་གཏན་སྡོད་བྱ་རྒྱུའི་བསམ་བློ་མ་འཁོར། ཞིབ་ཏུ་བསམ་ན། དེ་ནི་ང་ལ་བོད་ནང་ནས་འོས་འཚམ་ཀྱི་ལས་ཀ་ཞིག་མི་རེག་པའི་རྐྱེན་གྱིས་ཡིན་རྒྱུ་རེད། ཕྱིར་ལོག་རྒྱུའི་སེམས་ཐག་བཅད་རྗེས་ང་རང་རྫོང་རིམ་པ་དང་། ཞིང་ཆེན་རིམ་པ། ལྷ་ས་བཅས་ཀྱི་ཕྱི་མི་ལས་ཁུངས་སུ་བཅར་སྐབས། ཁོང་ཚོས་འཇམ་པོས་ཚུལ་གྱིས་མཐའ་མའི་ཐེམ་ཐོ་བརྒྱབ་སོང་། ཕྱི་ཟླ་ ༩ པའི་ཚེས་ ༡༦ ཉིན་ཕྱིར་བལ་བོད་ས་མཚམས་འགྲམ་ལ་སླེབས་སྐབས། གཞི་ནས་ཞེད་སྣང་དང་དོགས་སྣང་། སྐྱོ་སྣང་སོགས་ག་ལེར་ཞི་སོང་ལ། བལ་ཡུལ་ནི་རང་གི་རྒྱལ་ཁབ་ཡིན་པའི་ཚོར་སྣང་ཞིག་དང་། བཞུགས་སྒར་ངྷ་རམ་ས་ལ་ནི་རང་གི་ཁྱིམ་གཞིས་ཡིན་པའི་འདུ་ཤེས་ཤིག འདི་གའི་སློབ་གྲོགས་དང་ངོ་ཤེས་ཚོ་ནི་རང་གི་ནང་མི་ཉེན་ཉེ་ཡིན་པའི་མཛའ་སེམས་ཤིག་ངང་གིས་འཁོར་ཡོང་གི་འདུག གཅིག་བྱས་ན་འདི་ནི་ངའི་མི་ཚེ་སྨད་ཀྱི་ལས་དབང་ཡིན་སྲིད་ལ། ཧི་མ་ལ་ཡའི་ཚུར་རྒྱབ་ཀྱི་བོད་མི་ཡོངས་ཀྱི་ལས་འཕྲོ་ཡིན་ཡང་སྲིད” ཅེས་དགའ་བ་དང་སྐྱོ་བའི་ཚོར་འདུ་འདྲེས་མ་ཞིག་དང་བསྡོངས་ཏེ་བརྗོད་བྱུང་།