རྣམ་དཔྱོད་ཀྱི་རྩལ་འདོན་པར་རང་དབང་དགོས་པ་རེད།

སྤྱི་ཚོགས་ཡར་རྒྱས་གཏོང་བར་གང་ཟག་སྒེར་གྱི་གསར་གཏོད་བྱེད་པའི་རྣམ་དཔྱོད་ཀྱི་རྩལ་དེ་གལ་ཆེན་པོ་རེད། ཡིན་ནའང་། དེ་བེད་སྤྱོད་གཏོང་བར་རང་དབང་དགོས་པ་རེད། རྒྱ་ནག་ལ་མཚོན་ན་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་ཅིག་ཡིན་སྟབས། མ་འོངས་པར་ཆབ་སྲིད་ཀྱི་ལངས་ཕྱོགས་ཕན་ནུས་ལྡན་པ་ཞིག་འཛིན་རྒྱུ་གལ་ཆེན་པོ་རེད་ཅེས་༸གོང་ས་མཆོག་གིས་གསུངས་ཡོད།

༧གོང་ས་མཆོག་གིས་འདས་པའི་ཉིན་གྲངས་གསུམ་རིང་གི་མཛད་འཕྲིན་ཡོངས་སུ་གྲུབ་རྗེས། ཕྱི་ཚེས་ ༡༤ ཉིན་ཁ་ལེ་ཧྤོ་ནི་ཡའི་མངའ་སྡེའི་ཕལ་ལོ་ཨལ་ཌོ་ Palo Alto གྲོང་ཚོ་རུ་ཡོད་པའི་ཁེལ་སི་ཁྲལ་ནོ་ Castano School སློབ་གྲྭར་ཆིབས་བསྒྱུར་བསྐྱངས་ཡོད་ལ། ཉིན་དེའི་མཛད་འཕྲིན་གྱི་ཐོག་མར་ཁོང་གིས་དེར་སློབ་གྲྭའི་དགེ་སློབ་ ༣༠༠ ཙམ་ལ་ཏཱ་ལའི་བླ་མའི་སྐུ་ཕྲེང་རིམ་བྱོན་གྱི་ལོ་རྒྱུས་དང་། དེང་རབས་བོད་ཀྱི་རྒྱལ་རབས་ངོ་སྤྲོད། དེ་བཞིན་ཁོང་ཉིད་ཀྱིས་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་ལས་དགུང་ལོ་གཉིས་ཀྱི་ཆུང་བའི་དུས་སྐབས་ནས་བོད་མིའི་ཆོས་སྲིད་གཉིས་ཀྱི་འགན་བཞེས་བ་དང་། ༢༠༠༡ ལོར་བཀའ་བློན་ཁྲི་པ་མང་ཚོགས་ཀྱིས་འོས་འདེམས་བྱས་པ་ནས་བཟུང་། ཁོང་ཉིད་ཕྱེད་བགྲེས་ཡོལ་བྱས་ཡོད་སྐོར་སོགས་གསུངས། སྐབས་དེར་སློབ་མ་རྣམས་ཀྱི་དྲི་བའི་ལན་དུ་ཁོང་གིས། དུས་རབས་ ༢༠ དེ་འཛུགས་སྐྲུན་ཡར་རྒྱས་ཀྱི་དུས་རབས་ཤིག་ཡིན་ལ། ཡར་རྒྱས་དེ་ཡང་ཕྱི་དངོས་པོའི་ཡར་རྒྱས་ཙམ་ཡིན། ད་ཆ་ང་ཚོའི་བྱམས་བརྩེ་དང་བརྩེ་སེམས་སོགས་ནང་བསམ་བློ་ཡར་རྒྱས་སུ་གཏོང་དགོས་སྟབས། ཀླད་པ་ཡར་རྒྱས་གཏོང་རྒྱུའི་ཤེས་ཡོན་ཁོ་ནའི་འདང་གི་མེད། ཞི་བདེ་ཟེར་བ་དེ་ནང་བསམ་བློའི་གཏིང་ནས་ཡོང་དགོས་པ་དང་། ནང་བསམ་བློའི་ཞི་བདེ་ཡོད་པ་ཡིན་ན་སྤྱི་ཚོགས་ནང་འགྱུར་བ་གཏོང་ཐུབ་ཀྱི་ཡོད། ངོས་རང་དུས་རབས་ ༢༠ པའི་མི་ཞིག་ཡིན་ཡང་། ཁྱེད་རང་ཚོ་དུས་རབས་ ༢༡ པའི་མི་རབས་གསར་བ་ཆགས་ཡོད་པ་སྟབས། མ་འོངས་པར་སྤྱི་ཚོགས་བཟང་པོ་ཞིག་བསྐྲུན་རྒྱུའི་གོ་སྐབས་དང་འགན་དབང་ཡོད་ཅེས་བཀའ་སློབ་གནང་ཡོད།   

ཡང་དེར་ཡོད་སློབ་མ་ཞིག་གིས་ཆོས་ལུགས་དང་མི་རིགས་དབྱེ་འབྱེད་སྐོར་དང་། འཛམ་གླིང་ནང་ཞི་བདེ་ཡོང་སྲིད་མིན་བཅས་ལ་དྲི་བ་བཏོན་པར།  ༸གོང་ས་མཆོག་གིས། ཁོང་ཉིད་ཀྱི་བྱིས་པའི་གནས་སྐབས་དང་འཚར་ལོངས་བྱུང་རྗེས་ཀྱི་དུས་སྐབས་བཅས་སུ་རང་ཉིད་ངོས་འཛིན་དང་བསམ་བློ་ཡར་རྒྱས་ཇི་འདྲ་སོང་མིན་དང་། བྱིས་པའི་དུས་སྐབས་སུ་གཞི་རྩའི་འགྲོ་བ་མི་ཡིན་པའི་ངོས་འཛིན་ཙམ་ལས་ཆོས་ལུགས་གང་ཡིན་གྱི་ངོས་འཛིན་མཛད་མི་ཐུབ་ཚུལ། ནར་སོན་སྐབས་རང་ཉིད་ནང་པ་ཞིག་ཡིན་པ་དང་ཏཱ་ལའི་བླ་མ་ཡིན་བསམ་པའི་ངོས་འཛིན་གྱི་ཀུན་སློང་རྒྱུད་ལ་འཁྲུངས་ཚུལ་སོགས་གསུང་བ་མ་ཟད། ཆོས་ལུགས་དང་མི་རིགས་སོགས་རིམ་པ་གཉིས་པའི་ངོ་བོ་ངོས་འཛིན་གྱི་བསམ་བློ་དེར་ཞེན་ཆགས་ཆེ་དྲགས་པར་བརྟེན། སྤྱི་ཚོགས་ནང་དཀའ་ངལ་ཡོང་གི་ཡོད་པ་དང་ང་ཚོས་མཚམས་རེར་རིམ་པ་གཉིས་པའི་ངོ་བོའི་ཆེད་དུ་གཞི་རྩའི་འགྲོ་བ་མི་ཞིག་ཡིན་པའི་རིམ་པ་དང་པོ་དེ་ལྷོད་ཡངས་བྱེད་ཀྱིན་ཡོད། ཅེས་དང་། གཞི་རྩའི་འགྲོ་བ་མིའི་རང་བཞིན་དེ་ཞི་འཇམ་ཞིག་ཡིན་པར་ངོས་འཛིན་བྱེད་ཀྱི་ཡོད་སྟབས། ཆོས་ཁས་ལེན་མིན་ལ་མ་ལྟོས་པར་བྱམས་བརྩེ་གལ་ཆེན་པོ་ཡིན་པ་དེ་དངོས་ཡོད་ཡིན་སྐོར་གསུངས་སོང་ཞིང་། ཁོང་ཉིད་ཀྱི་ཐུགས་ལ་བྱམས་བརྩེ་ལྡན་པའི་འཛམ་གླིང་ཞིག་ཡོང་སྲིད་པར་ཡིད་ཆེས་གནང་གི་ཡོད་སྐོར་གསུངས་སོང་།  

ཕྱི་ཚེས་  ༡༤ ཉིན་༸གོང་ས་མཆོག་གིས་སི་ཊན་ཧྤོ་ཌི་དང་ཁ་ལེ་ཧྥོ་ནི་ཡ། བྷར་ཀ་ལེ། སེན་ཧྤུ་རན་སི་ཁོ་མངའ་སྡེ་གཙུག་ལག་སློབ་གྲྭ་བཅས་སློབ་ཆེན་གསུམ་དང་། སེན་ཧྤུ་རན་སི་ཁོ་སྒྱུ་རྩལ་བསྟི་གནས་ཁང་བཅས་སུ་ཡོད་པའི་རྒྱ་རིགས་སློབ་ཕྲུག་ ༡༣༠ ཙམ། དེ་བཞིན་རྒྱ་རིགས་གཙུག་ལག་སློབ་དཔོན་དང་མཁས་དབང་བཅསལ་་མཇལ་འཕྲད་གནང་ཞིང་། རྒྱ་ནག་མི་དམངས་སྤྱི་མཐུན་རྒྱལ་ཁབ་དང་བོད་ཀྱི་གནད་དོན་སྐོར་ལ་བཀའ་སློབ་གནང་ཡོད། སྐབས་དེར་༸གོང་ས་མཆོག་གིས། སྤྱི་ཚོགས་ཡར་རྒྱས་གཏོང་བར་གང་ཟག་སྒེར་གྱི་གསར་གཏོད་བྱེད་པའི་རྣམ་དཔྱོད་ཀྱི་རྩལ་དེ་གལ་ཆེན་པོ་རེད་ལ། དེ་བེད་སྤྱོད་གཏོང་བར་རང་དབང་དགོས་པ་རེད། རྒྱ་ནག་ལ་མཚོན་ན་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་ཅིག་ཡིན་སྟབས། ཆབ་སྲིད་ཀྱི་ལངས་ཕྱོགས་ཕན་ནུས་ལྡན་པ་ཞིག་འཛིན་རྒྱུ་གལ་ཆེན་པོ་རེད། རྒྱ་ནག་མི་མང་དུང་ཕྱུར་ ༡༣ ལྷག་ཡོད་པ་རྣམས་ལའང་དངོས་ཡོད་གནས་ཚུལ་ཇི་འདྲ་ཡིན་མིན་ཤེས་རྒྱུའི་ཐོབ་ཐང་ཡོད་ཅེས་གསུངས།

ཡང་ཁོང་གིས། ངོས་ནས་བོད་རང་བཙན་རྩོད་ཀྱིན་མེད་པ་ཚང་མས་ཤེས་གསལ་རེད། གནས་སྟངས་དེ་ལ་བརྟེན་ནས་བོད་པ་མི་ཉུང་བ་ཞིག་གིས་ངའི་ལངས་ཕྱོགས་དེར་སྐྱོན་བརྗོད་ཀྱང་བྱེད་ཀྱི་ཡོད་པ་རེད། རྒྱ་ནག་གཞུང་གིས་ཀྱང་ང་ལ་ཁ་བྲལ་བ་ཡིན་པའི་བསྙོན་འཛུགས་བྱེད་བཞིན་ཡོད། བོད་ཀྱི་དཀའ་ངལ་དེ་མིས་བཟོས་པའི་དཀའ་ངལ་ཞིག་ཡིན་སྟབས། དཀའ་ངལ་སེལ་ཐུབ་ངེས་ཤིག་ཡིན་པ་དངོས་ཡོད་གནས་ཚུལ་རེད་ཅེས་གསུང་བ་དང་འབྲེལ། ཁོང་ཉིད་ནས་ ༡༩༨༠ ནང་ཧུའུ་ཡོ་པང་གི་སྐབས་སུ་བོད་ཀྱི་གནད་དོན་ལ་ཡར་རྒྱས་ཀྱི་རེ་བ་ཆེན་པོ་བྱུང་ཚུལ། ༢༠༠༢ ལོར་རྒྱ་ནག་དཔོན་རིགས་ཚོ་དང་ལྷན་དུ་འབྲེལ་བ་སླར་གསོ་བྱུང་སྟེ་བོད་རྒྱ་གྲོས་མོལ་བྱས་ཡོད་ཀྱང་། ད་བར་གྲུབ་འབྲས་དང་ཡར་རྒྱས་གང་ཡང་བྱུང་མེད་པའི་སྐོར་གསུངས་འདུག་ལ། དེ་བཞིན་ཁོང་གིས། ཁོང་ཉིད་ནང་པ་ཞིག་ཡིན་པའི་ཆ་ནས་རྒྱ་རིགས་ནང་པ་ཚོར་དུས་རྟག་ཏུ་གུས་བཀུར་ཞུ་བཞིན་ཡོད། དེ་ཡང་གཙོ་བོ་རྒྱ་རིགས་ནང་པ་ཚོ་སྟོན་པའི་རྗེས་འབྲང་གི་བསླབ་པ་རྒན་པ་ཡིན་སྟབས། ནང་ཆོས་ཐོག་གཞོན་པ་ཚོར་སྡུག་པོ་བཏང་མེད་ཅེས་གསུངས་ཡོད་པ་རེད།

ཉིན་དེར་དྲུག་བཞིའི་དོན་རྐྱེན་ཁྲོད་རྐང་པ་རྨས་སྐྱོན་ཕོག་ཡོད་པའི་རྒྱ་རིགས་ཝང་ཀྲང་གིས་ཉེ་ཆར་ནོ་སྦེལ་ཞི་བདེའི་གཟེངས་རྟགས་ཐོབ་པའི་ལིག་ཞོ་པོ་ལ་མ་འོངས་པར་གང་དུ་མཇལ་ཐུབ་མིན་གྱི་དྲི་བའི་ལན་དུ། ༸གོང་ས་མཆོག་གིས་གལ་སྲིད་དེ་འདྲའི་གོ་སྐབས་བྱུང་བ་ཡིན་ན། ཁོང་ཉིད་པེ་ཅིན་དུའང་ཡོང་སྲིད་པ་རེད་ཅེས་བཀའ་ལན་གནང་ཡོད་པར་མ་ཟད། དེར་ཡོད་རྒྱ་རིགས་སློབ་ཕྲུག་ཚོར་དུས་རབས་འདིའི་ནང་འགན་ཁུར་མང་ཙམ་ལེན་དགོས་པ་དང་། རྒྱ་རིགས་གཙུག་ལག་སློབ་དཔོན་བགྲེས་པ་ཚོར་སློབ་ཕྲུག་དང་སྤྱི་ཚོགས། དེ་བཞིན་འཛམ་གླིང་ཁྱོན་ཡོངས་བཅས་སུ་འགན་འཁུར་དགོས་པའི་མཛུབ་སྟོན་ཡང་གནང་ཡོད་པ་རེད།

གསར་འགོད་པ། དོན་གོ