ང་རང་བོད་མི་ཞིག་ཡིན་དུས། བོད་དོན་ཟེར་ན་རེད། བོད་མི་རིགས་ཀྱི་འཆི་གསོན་ཟེར་ན་རེད། སྐད་ཡིག་གི་རང་དབང་ཟེར་ན་རེད། མི་རིགས་ཤིག་གི་བླ་སྲོག་ཟེར་ན་འགྲིག དེ་ཉིད་མེད་པར་བཟོ་འདོད་ཀྱི་སྲིད་གཞུང་ངན་པ་དེ་ཡི་ཁ་གཏད་དུ་བླངས་བཞིན་པའི་ལང་ཚོའི་འདབས་ལག་རྒྱས་བཞིན་པའི་གཞོན་ནུ་ཕོ་མོ་དེ་དག་ཆེད་དུ་སེམས་ཁྲལ་ཆེ་ཆེར་སོང་།
སྤྱིར་ན་འགྲོ་བ་མི་ཟེར་བ་འདི་ལ་བཤད་ཤེས་པ་དང་། ཉན་ཤེས་པ་གཉིས་ཀྱི་ཁྱད་ཆོས་ཡོད་པ་ཡིན་དུས། ཉན་ཤེས་མཁན་གྱི་སྲིད་གཞུང་ཞིག་ལ། བཤད་འཕོད་མཁན་གྱི་མི་མང་ཞིག་གིས་རང་གི་སྐྱིད་སྡུག་གང་ཡིན་ཡང་ཞུས་ཀྱང་ཆོག་ལ། ཞུ་བའི་ཐོབ་ཐང་དང་བདག་དབང་ཡང་མི་རིགས་གཞན་དག་དང་འདྲ་མཚུངས་ཀྱི་ཡོད་པ་རེད། འོན་ཀྱང་། ད་སྐབས་བོད་ཡུལ་མདོ་སྨད་ཀྱི་ཡུལ་གྲུ་ཆེས་མི་ཉུང་བ་ཞིག་ན། བཤད་འཕོད་པའི་སྙིང་སྟོབས། མི་རིགས་འདྲ་མཉམ་གྱི་བདག་དབང་སྐད་ཡིག་གི་རང་དབང་སློང་བཞིན་པའི་སློབ་མ་དེ་དག་གི་ཁ་གཏད་སའི་སྲིད་གཞུང་དེ་ནི། མི་མང་གིས་བསམ་སྐུལ་ཉན་ཤེས་མཁན་གྱི་སྲིད་གཞུང་དེ་ཆགས་མེད་པ་ཡིན་དུས། ང་ལ་སེམས་ཁྲལ་ཆེ་ཆེར་སོང་།
སེམས་ཁྲལ་དེ་ཡང་སློབ་ཕྲུག་རེ་རེ། བོད་ཁུལ་ནས་འཚར་བའི་བོད་མི་ཡིན་ལ། བོད་མི་རིགས་ཀྱི་མ་འོངས་འཆི་གསོན་གྱི་ལག་རྟེན་ལྟ་བུ་ཡིན་དུས། སྲིད་གཞུང་ངན་པ་དེ་ཡིས་ལག་རྟེན་དེ་དག་ལ་གས་ཁ་རེ་གཏོང་བར་སེམས་ཁྲལ་འདུག་ལ། དེ་དག་གི་བླ་སྲོག་ལ་ནུས་པ་མེད་པ་ནས། བེད་སྤྱོད་མེད་པར་གཏོང་མི་ཡོང་ངམ་བསམ་ནས་སེམས་ཁྲལ་འདུག ཁོང་ཚོས་སྲིད་གཞུང་དེར་ཞུས་པ་ནི། སྐད་ཆ་ཞིག་ཡིན་ལ། བདེན་པ་ཞིག་ཀྱང་ཡིན་མོད། འོན་ཀྱང་། སྲིད་གཞུང་དེས་ཕྱིར་ལན་ཞིག་སྤྲོད་པ་དེ་ནི་སྐད་ཆ་ཞིག་ཡིན་མིན་དེ་ལ་སེམས་ཁྲལ་འདུག་ལ། བདེན་པ་ཞིག་ཆགས་མིན་ལ་དེ་བས་ཀྱང་སེམས་ཁྲལ་འདུག
མཐར་ཐུག་ན། ཁོང་ཚོས་རང་དབང་གི་འབོད་སྒྲ་དེ་ཡིས། ཁོང་ཚོ་དང་འདྲ་བའི་བོད་ཁུལ་གྱི་སློབ་མ་ཡོངས་ཀྱི་བོད་ཀྱི་སྐད་ཡིག་གི་བདག་དབང་ཉམས་ནས། ནམ་ཞིག་རང་ཉིད་བོད་པ་ཡིན་ཟེར་དུས། ང་བོད་པ་ཡིན་ཟེར་ནས་རྒྱའི་སྐད་ནས་བཤད་དེ་འོང་མི་ཡོང་ངམ་སྙམ་ན་ལྷག་དུ་སེམས་ཁྲལ་འདུག ད་ལྟ་མཆེད་བཞིན་པ་དེ་ནི་མི་ལྕེ་ཞིག་ཡིན་སྲིད་ཀྱང་། རྗེས་སུ་ང་ཚོས་མཐོང་སྲིད་པ་དེ་ནི་གང་ཞིག་ལ་འགྱུར་འགྲོ་བསམ་ན། ང་ཉི་མ་འདི་ཚོ་སེམས་ཁྲལ་ཆེ་ཆེར་སོང་། རང་ཉིད་བོད་མི་ཡིན་པས་བོད་ཀྱི་སོན་རྩ་དེ་དག་གི་ཆེད་དུ་བསམ་བློ་བཏང་། གང་ལྟར། ང་ཚོ་ཕྱི་བསྡོད་པ་དག་གིས་སྐད་ཆ་བཤད་ཤེས་ན་ཡག་གི ལས་འགུལ་སྤེལ་ཤེས་ན་བཟང་གི གདུང་སེམས་མཉམ་བསྐྱེད་བྱེད་སྟངས་ནོར་མི་ཉན་གི
ང་ཚོས་བོད་ནང་གི་ད་ལྟའི་སློབ་ཕྲུག་དེ་དག་གིས་སྐད་འབོད་ཀྱི་དབྱངས་རྟ་དེ་ཡིས། སླར་ཡང་བཙན་བྱོལ་དུ་གྲགས་འགུལ་ཞིག་སློང་བ་བདེན་ན་ཡང་། གྲགས་འགུལ་དེ་ཡིས་ཁོང་ཚོའི་ལས་དབང་ལ་འགྱུར་བ་བཟང་ངན་གང་ཞིག་འགྲོ་མིན་དེ་ཡི་ཐད་དུ་དངོས་ནས་སེམས་ཁྲལ་འདུག
གཟའ་མཇུག་དུ་བོད་པའི་སོ་ནམ་སློབ་ཕྲུག་ཚོར་ལྟ་རུ་སོང་བ་ཡིན། དེ་ནས་རིག་རྒྱུ་མེད་སོང་བ་རེད། འདི་ཁུལ་དུ་ཡོད་པའི་བོད་པའི་ཕོ་གསར་མོ་གསར་བདུན་མཉམ་དུ་སོང་བ་ཡིན། ལོ་རྟག་པར་ཐེངས་གསུམ་རེ་ཁོང་ཚོར་ལྟ་རུ་འགྲོ་ཡི་ཡོད།
གནམ་ལྕགས་ལགས། ཕེབས་པ་དགའ་ཡོད། རྗེས་སུ་ཡང་ཡང་ཡོང་གི་བསྡོད། ཨ་ཁུ་ཚང་གི་སྐོར་ངའི་གདོང་དེབ་ནས་ཉིད་ཀྱི་གློག་འཕྲིན་དེ་ལས་གོ་བ་དེ་ཡི་མཚན་མོར་ཁོང་ལ་ཁ་པར་ཞིག་བཏང་བ་ཡིན།
ཉི་ཟླའི་མགྲོན་བདག་ལགས། འུ་ཅག་གིས་ཉལ་ས་དྲོ་ས་ཞིག་ནས་དངོས་ནས་ཁོང་ཚོའི་སྐྱིད་སྡུག་ལ་བསམ་བློ་རེ་བཏང་དུས། དངོས་ནས་སྐྱིད་པོ་ཞིག་མི་འདུག་ཡ། ཁོང་ཚོས་རྩོད་ཀྱིན་པ་དེ་ནི་ང་ཚོ་ཁ་བ་གངས་ཅན་པ་ཚང་གི་འཆི་གསོན་གྱི་ལས་དབང་ཡིན་དུས། དངོས་ནས་ཉན་བཞིན་ཉན་བཞིན་སེམས་པ་ན་ཡི་འདུག
ལས་རླུང་ལགས། ང་ཚོ་གང་དུ་ཡོད་ཀྱང་། སེམས་སྡུག་གཅིག་པ་ལོས་ཡིན། བོད་དུ་སྐྱེ་བའི་བོད་མིའི་སྐྱིད་སྡུག་ལ་བསམ་བློ་འཁོར་བ་དང་སེམས་ཁྲལ་ལོས་ཡོད།
དངོས་གནས་རེད། ང་ལའང་ཁྱེད་དང་མཚུངས་པར་སེམས་ཁྲལ་ཆེ།
དྲ་གྲོགས་བོད་ཤ་ཁྲག་རུས་གསུམ་ལགས་ཁྱེད་ཀྱིས་སེམས་ཁྲལ་དེ་བོད་མི་རྩམ་ཟན་ཚང་མའི་སེམས་ཁྲལ་རེད།བདེན་པ་རེད།རང་ཉིད་སེམས་གཏིང་ནས་མི་རིགས་གཉོམ་པོ་འདི་ལ་ཤ་ཞེན་དང་དུངས་སེམས་དཀར་པོ་ཡོད་པ་ངས་ཤེས་ཡོད།
དེས་ཆ་ནས་ང་རྟག་པར་ཁྱེད་ཀྱི་ཟིན་བྲིས་ནང་དུ་ཡོང་གི་ཡོད།
མུ་མཐུད་དུ་ཤུགས་རྒྱོབ་དང་བོད་ཕྲུག་ལེགས་རེ་བ་ཆེ།
ཨ་རོགས། ཉིན་འགར་ཡོང་ཁོམ་མ་བྱུང་ཐལ། དེ་རིང་ཡོང་ནས་སྐོར་བ་ཞིག་བརྒྱབ་པ་དེ་ཡིན། བདེ་མོ་དང་སྔར་བཞིན་ཡིན་པ་ཤེས་ནས་སེམས་བདེ་སོང་། ད་ཐ་ཧར་ཚང་ལ་འགྲོ་གི་ཡིན།
བསམ་ཚུལ་བཀླགས་པ་ཡིན། ཉིན་ཁ་ཤས་མཐོང་རྒྱུ་མེད་ནོ་ཅི་ཡིན།
རེད་ཡ། དྲ་གྲོགས་ལགས་གནས་སྟངས་འདིར་བསམ་བློ་རེ་གཏོང་ཐེངས་རེར་གཉིད་ཡང་ཁུག་ཐུབ་ཀྱིན་མི་འདུག་ལ། ལུས་སེམས་གཉིས་ཀའང་ན་ཟུག་གིས་སྦྲིད་འདུག