དེ་རིང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དབུ་བརྙེས་པའི་དུས་སྟོན་དང་བསྟུན་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གི་བོད་ཐོག་བཟུང་བའི་སྲིད་ཇུས་སོགས་ལ་ངོ་རྒོལ་གྱི་རྒོལ་མཆོངས་ལས་འགུལ་ཞིག་སྤེལ།
དེ་རིང་ཕྱི་ཟླ་ ༡༠ ཚེས་ ༡ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དབུ་བརྙེས་པའི་དུས་སྟོན་དང་བསྟུན་ནས། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་ཐང་དུ་རྒོལ་མཆོངས་ཀྱི་ངོ་རྒོལ་སྐད་འབོད་ཀྱི་ལས་འགུལ་ཞིག་སྤེལ་སོང་ལ། རྒོལ་མཆོངས་ལས་འགུལ་དེའི་ཁྲོད་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་ ༣༠ ལྷག་གིས་མཉམ་ཞུགས་གནང་འདུག
གནད་དོན་དེ་དང་འབྲེལ་ནས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསྟན་འཛིན་བློ་བཟང་ལགས་ཀྱིས་འདི་གའི་གསར་འགོད་པར། དེ་རིང་རྒྱ་ནག་དམར་ཤོག་ཚོགས་པ་བཙུགས་ནས་མི་ལོ་ ༧༧ འཁོར་གྱི་ཡོད་པས། དེ་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ལྷོ་སོག་གཙོས་རྒྱ་ནག་གི་བཙན་གནོན་འོག་ཡོད་པའི་རྒྱལ་ཁབ་རྣམས་ལ་གདུང་སེམས་མཉམ་སྐྱེད་དང་། ད་ལྟའི་རྒྱ་ནག་དམར་གཞུང་ལ་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད་ལ། རྒྱ་ནག་གཞུང་གིས་དུས་ནས་དུས་སུ་བོད་དེ་རྒྱ་ནག་གི་ཆ་ཤས་ཡིན་ལུགས་བསྒྲགས་པ་ལའང་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད། དེ་བཞིན་ད་ལྟའི་རྒྱ་ནག་གི་ས་ཆའི་བརྒྱ་ཆ་དྲུག་ཅུ་ལྷག་ནི་རྒྱ་ནག་གི་བཙན་འཛུལ་བྱས་པའི་རྒྱལ་ཁབ་ཁག་ཡིན་སྟབས། དེ་རིང་གི་ཉིན་མོ་འདི་དང་བསྟུན་རྒྱ་ནག་ལ་མཐའ་གཅིག་ཏུ་ངོ་རྒོལ་ཡོད། བོད་དེ་གནའ་སྔ་མོ་ནས་རང་བཙན་རྒྱལ་ཁབ་རེད་ལ། ད་ལྟའང་ང་ཚོས་རང་བཙན་རྩོད་ཀྱིན་ཡོད་པའི་ཁར། མ་འོངས་པར་བོད་ལའང་རང་བཙན་མ་ཐོབ་པར་བོད་ཀྱི་རང་དབང་རང་བཙན་སླད་དགྲ་བོ་རྒྱ་ནག་ལ་མུ་མཐུད་ངོ་རྒོལ་བྱ་རྒྱུ་ཡིན། ཞེས་བརྗོད་བྱུང་།
ཡང་ཁོང་གིས། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱིས་ད་ལྟའི་ཆར་རྒྱ་ནག་གིས་བོད་ནང་ལག་བསྟར་བྱེད་མུས་ཡིན་པའི་(མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་)ཁྲིམས་འཆར་དེ། བོད་ཀྱི་རིག་གཞུང་དང་ཆོས། ངོ་བོ་སོགས་རྩ་མེད་གཏང་རྒྱུའི་སྲིད་ཇུས་ལ་ངོ་རྒོལ་དང་། དེ་ལྟ་བུའི་སྲིད་ཇུས་ལག་བསྟར་བྱེད་སྐབས་ད་ལྟ་རྒྱ་ནག་གི་བཙན་གནོན་འོག་ཡོད་པའི་རྒྱལ་ཁབ་ཚང་མར་ལག་བསྟར་བྱེད་ཀྱིན་ཡོད་སྟབས། རྒྱ་ནག་གི་བཙན་གནོན་འོག་ཡོད་པའི་མི་རིགས་རྣམས་ཀྱིས་རྡོག་རྩ་གཅིག་སྒྲིལ་གྱིས་ངོ་རྒོལ་བྱ་དགོས་པའི་དུས་ཚོད་ལ་སླེབས་ཡོད་པའི་མུར། མུ་མཐུད་དུ་རྒྱ་ནག་ལ་ངོ་རྒོལ་བྱ་དགོས་པའི་དུས་ཤིག་ཡིན་པའི་བརྡ་ལན་ཞིག་གཏོང་གིན་ཡོད། ཅེས་དང་། རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་འཛམ་གླིང་གི་ཞི་བདེ་དང་བདེ་འཇགས་ལ་ཉེན་ཁ་ཆེན་པོ་བཟོ་མུས་ཡིན་པའང་མངོན་གསལ་དོད་པོ་རེད་ལ། ལྷག་པར་ལྷོ་ཨེ་ཤ་ཡའི་རྒྱལ་ཁབ་མང་དག་ཅིག་གི་བདེ་འཇགས་ཀྱི་ཆ་ནས་ཉེན་ཁ་ཆེན་པོ་བཟོ་མུས་ཡིན་པས། རྒྱ་ནག་དམར་ཤོག་རྒྱལ་ཁབ་མགོ་བཙུགས་པའི་ཉིན་མོར་མཐའ་གཅིག་ཏུ་ངོ་རྒོལ་ཡོད། ཅེས་བརྗོད་བྱུང་།
དེ་བཞིན་རང་བཙན་གོམ་བགྲོད་གནང་མཁན་ཚེ་རིང་མཐར་ཕྱིན་ལགས་ཀྱིས། ཕྱི་ཟླ་ ༨ ཚེས་ ༢༠ ཉིན་དྷ་རམ་ས་ལ་ནས་རྒྱ་གར་གྱི་རྒྱལ་ས་ལྡི་ལི་བར་བོད་རང་བཙན་གོམ་བགྲོད་ཀྱི་ལས་འགུལ་སྤེལ་མགོ་བཙུགས་ཏེ། དེ་རིང་ཕྱི་ཟླ་ ༡༠ ཚེས་ ༡ ཉིན་རང་བཙན་གོམ་བགྲོད་ལས་འགུལ་མཇུག་བསྒྲིལ་ཡོད་ཅིང་། ཁོང་གིས་འདི་གའི་གསར་འགོད་པར་ཁ་པར་བརྒྱུད། དེ་རིང་ང་རང་བཞུགས་སྒར་དྷ་ས་ནས་རང་བཙན་གོམ་བགྲོད་ལ་ཡོང་ནས་ཉིན་གྲངས་བཞི་བཅུ་པ་དེ་རེད་ལ། རྒྱ་ནག་མི་མང་སྤྱི་མཐུན་རྒྱལ་ཁབ་ཟེར་བ་བཙུགས་ནས་མི་ལོ་ ༧༧ འཁོར་བ་དང་བསྟུན། རྒྱ་གར་རྒྱལ་ས་ལྡི་ལིའི་མཐོ་སློབ་ཀྱི་སློབ་མ་ཆེས་མང་བའི་ས་ཚིགས་ཁུལ་དུ་གྲོམ་བགྲོད་ཀྱིས། རྒྱ་ནག་གཞུང་གིས་བོད་ཀྱི་རིག་གནས་དང་བོད་རྩ་མེད་བཟོ་མུས་ཡིན་པའི་སྐོར་གྱི་འབོད་སྒྲ་བསྒྲགས་ཏེ། ད་ཐེངས་ཀྱི་རང་གོམ་བགྲོད་དེ་བོད་མིའི་གཞིས་སྒར་བསམ་ཡས་གླིང་ནས་མཇུག་སྡོམ་ཞུ་ཡི་ཡོད། ཅེས་བརྗོད་བྱུང་།
ཡང་ཁོང་གིས། ད་ལན་གྱི་རང་བཙན་གོམ་གྲོད་སྐབས། རྒྱ་གར་གྱི་གནད་ཡོད་མི་སྣ་དང་། སློབ་མ། མི་མང་ཕལ་བ་བཅས་ལ་འབོད་ཚིག་སོགས་བགོ་འགྲེམས་ཀྱིས་བོད་ནང་གི་གནས་སྟངས་ཐད་གོ་རྟོགས་སྤེལ་བ་དང་། བོད་རང་བཙན་སླད་རྒྱ་གར་བ་ཚོས་རྒྱབ་སྐྱོར་གནང་དགོས་པ། དེ་བཞིན་བོད་རང་བཙན་ནི་རྒྱ་གར་གྱི་བདེ་འཇགས་ཡིན་པས། བོད་རང་བཙན་སླར་གསོ་དང་བོད་ཀྱི་རང་བྱུང་ཁོར་ཡུག་ནི་རྒྱ་གར་དང་ཧི་མ་ལ་ཡའི་རྒྱལ་ཁབ་ཁག་གི་བདེ་འཇགས་ལ་འབྲེལ་བ་ཡོད་པས། རྒྱ་གར་གཞུང་མང་གཉིས་ཀྱིས་བོད་ཀྱི་རང་བྱུང་ཁོར་ཡུག་ལ་དོ་སྣང་བྱ་དགོས་པའི་རེ་སྐུལ་ཞུས་ཡོད་སྐོར་སོགས་བརྗོད་བྱུང་།
ལོ་ལྟར་རྒྱ་ནག་གཞུང་གིས་རྒྱལ་སྟོན་དུས་ཆེན་ཉིན་བོད་ནང་གི་བོད་མི་རྣམས་ལ་འདོད་པ་ཡོད་མེད་ལ་མ་བལྟོས་པར། བཙན་གྱིས་སྲུང་གཙི་བྱེད་དུ་འཇུག་གི་ཡོད་པའི་མུར། གཞུང་འབྲེལ་མིན་པའི་འདུ་འཛོམས་མ་གཏོགས། བོད་མི་རྣམས་ཀྱི་འགྲོ་འདུག་མྱུལ་ཞིབ་སོགས་བྱེད་ཀྱིན་ཡོད་ཀྱང་། འཛམ་གླིང་ས་གནས་གང་སར་ཡོད་པའི་བོད་མི་རྣམས་ཀྱིས་རྣམ་པ་འདྲ་མིན་གྱི་ཐོག་ནས་ངོ་རྒོལ་གྱི་ལས་འགུལ་སྤེལ་གྱིན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
