དབྱིན་ཇིའི་གསང་བའི་ལས་ཁུངས་ཀྱིས་རྒྱ་ནག་གིས་དབྱིན་ཇིའི་སློབ་གསོ་སྡེ་ཁག་སྤྱད་ནས་དབྱིན་ཇིའི་རྒྱལ་ཁབ་བདེ་འཇགས་ལ་ཉེན་ཁ་བཟོ་བཞིན་ཡོད་པའི་ཉེན་བརྡ་བཏང་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། དབྱིན་ཇིའི་གསང་བའི་ལས་ཁུངས་ (MI5) ཀྱིས། རྒྱ་ནག་གི་སྤྱི་ཁྱབ་ཚན་རིག་ཞིབ་འཇུག་ལྟེ་གནས་ཁང་ (CGTRI) གིས་དབྱིན་ཇིའི་རིག་ནུས་དང་དྲ་རྒྱའི་བདེ་འཇགས། གསང་བའི་འབྲེལ་ལམ་མ་ལག སྦས་གསང་རིག་པ་སོགས་ཀྱི་ཁྱབ་ཁོངས་སུ་ལས་ཀ་བྱེད་བཞིན་པའི་སློབ་གཉེར་བ་ཚོར་གསང་ཉུལ་བྱས་ཏེ། རྒྱ་ནག་དབུས་གསང་བའི་ལས་ཁུངས་ལ་གནས་ཚུལ་མཁོ་སྤྲོད་བྱེད་བཞིན་ཡོད་པའི་གནད་དོན་ཐེར་འདོན་བྱས་འདུག
དབྱིན་ཇིའི་གསང་བའི་ལས་ཁུངས་ཀྱིས། དབྱིན་ཇིའི་གཙུག་ལག་སློབ་གཉེར་ཁང་ཁག་དང་དེའི་སློབ་གཉེར་བ་རྣམས་ཀྱིས་རྒྱ་ནག་གི་ཚན་རིག་ཞིབ་འཇུག་ལྟེ་གནས་ཁང་དེ་དང་མཉམ་ལས་མཚམས་འཇོག་དགོས་པའི་བཀའ་བཏང་ཡོད་ཅིང་། ཞིབ་འཇུག་ལྟེ་གནས་ཁང་དེ་ནི་རྒྱ་ནག་གི་གསང་བའི་ལས་ཁུངས་དང་འབྲེལ་ལམ་ཧ་ཅང་དམ་པོ་ཡོད་པའི་ཚོགས་པ་ཞིག་ཡིན་སྐོར་བརྗོད་འདུག་པ་མ་ཟད། ཚོགས་པ་དེའི་དམིགས་ཡུལ་གཙོ་བོ་ནི་རྒྱ་ནག་གི་རྒྱལ་ཁབ་བདེ་འཇགས་ལྷན་ཁང་ (MSS) གི་གསང་ཉུལ་གྱི་ནུས་པ་གོང་འཕེལ་གཏོང་ཆེད་སློབ་གཉེར་བའི་ཞིབ་འཇུག་ལ་མ་དངུལ་གཏོང་རྒྱུ་དེ་ཡིན་པས། དབྱིན་ཇིའི་རྒྱལ་ཁབ་བདེ་འཇགས་ལ་ཉེན་ཁ་བཟོ་བཞིན་ཡོད་སྐོར་བརྗོད་འདུག
ལོན་ཊོན་དུ་ཡོད་པའི་རྒྱ་ནག་གཞུང་ཚབ་ཁང་གིས་ཉེན་བརྡ་དེ་ནི་རྫུན་བཟོ་བྱས་པ་ཞིག་ཡིན་པ་དང་། གནོད་འཚེ་གཏོང་འདོད་པའི་སྒྲོ་འདོགས་ཤིག་རེད་ཅེས་ལན་འདེབས་བྱས་འདུག་ཁར། དེ་སྔ་ནས་རྒྱ་ནག་གཞུང་གིས་སྐྱོན་བརྗོད་དེའི་རིགས་ལ་ངོས་ལེན་རྩ་བ་ནས་བྱེད་ཀྱི་མེད་པ་རེད།
དབྱིན་ཇིའི་གསང་བའི་ལས་ཁུངས་ཀྱིས། རྒྱ་ནག་གི་སྤྱི་ཁྱབ་ཚན་རིག་ཞིབ་འཇུག་ལྟེ་གནས་ཁང་གིས་དབྱིན་ཇིར་གནས་སྡོད་བྱེད་བཞིན་པའི་སློབ་གཉེར་བ་ ༡༠༠ ལྷག་ཙམ་ལ་དམིགས་འབེན་བཟུང་ཡོད་པ་དང་། ཁོང་ཚོ་ནི་རིག་ནུས་དང་དྲ་རྒྱའི་བདེ་འཇགས། གསང་བའི་འབྲེལ་ལམ་མ་ལག སྦས་གསང་རིག་པ་སོགས་ཀྱི་ཁྱབ་ཁོངས་སུ་ལས་ཀ་བྱེད་མཁན་ཤ་སྟག་རེད། ཅེས་བརྗོད་འདུག
དབྱིན་ཇིའི་སློབ་གཉེར་བ་དང་གཙུག་ལག་སློབ་གཉེར་ཁང་མང་པོ་ཞིག་གིས་དེ་སྔ་ཤེས་རྟོགས་མེད་པའི་ཐོག་ནས་རྒྱ་ནག་གི་ཞིབ་འཇུག་ཚོགས་པ་དེར་མཉམ་ལས་བྱས་ཡོད་ཀྱང་། ད་ལྟ་ནས་དབྱིན་ཇིའི་སློབ་གཉེར་ཁང་ཁག་གིས་རྒྱ་ནག་གི་ཚོགས་པ་དེ་ནས་མ་དངུལ་ལེན་པའམ་ཡང་ན་མཉམ་ལས་བྱས་ཚེ། དབྱིན་ཇིའི་རྒྱལ་ཁབ་བདེ་འཇགས་ཀྱི་ཁྲིམས་ (National Security Act) འོག་ནས་ཁྲིམས་ཆད་ཕོག་ཉེན་ཡོད་འདུག་ལ། རྒྱལ་ཁབ་བདེ་འཇགས་ཀྱི་ཁྲིམས་དེ་ནི་ཕྱི་ལོ་ ༢༠༢༣ ལོར་གཏན་འབེབས་བྱས་པ་ཞིག་ཡིན་ཞིང་། དེས་དབྱིན་ཇིའི་གཞུང་ལ་ཕྱི་རྒྱལ་གྱི་གསང་ཉུལ་དང་དགྲ་འཛིན་གྱི་བྱེད་སྒོ་ཁག་ལ་ཚོད་འཛིན་དང་ལག་བསྟར་བྱེད་པའི་དབང་ཚད་སྤྲད་ཡོད་འདུག
དབྱིན་ཇིའི་བདེ་སྲུང་བློན་ཆེན་ཌན་ཇར་ཝི་སི་ (Dan Jarvis) ཡིས། ཉེན་བརྡ་འདིས་རྒྱ་ནག་གིས་ང་ཚོའི་ཆེད་མཁས་མི་སྣའི་ཤེས་བྱ་དང་ཞིབ་འཇུག་ལ་གསང་ཉུལ་བྱེད་བཞིན་པ་དང་། ང་ཚོ་དང་མཐུན་གྲོགས་རྒྱལ་ཁབ་ཁག་གི་བདེ་འཇགས་ལ་གནོད་སྐྱོན་གཏོང་ཐབས་བྱེད་བཞིན་པ་ཐེར་འདོན་བྱས་ཡོད། རྒྱལ་སྤྱིའི་མཉམ་ལས་ནི་ང་ཚོའི་གཙུག་ལག་སློབ་གཉེར་ཁང་དང་ཞིབ་འཇུག་ལྟེ་གནས་ཁང་ཁག་མུ་མཐུད་ནས་དར་རྒྱས་ཡོང་བར་གལ་ཆེན་པོ་ཡིན་ནའང་། ང་ཚོས་ང་ཚོར་འཕྲད་བཞིན་པའི་ཉེན་ཁ་ཁག་ལ་སྲུང་སྐྱོབ་བྱེད་ཆེད་ནུས་ལྡན་གྱི་བྱ་སྤྱོད་སྤེལ་རྒྱུ་ཡིན། ཞེས་བརྗོད་འདུག་པ་དང་། ཁོང་གིས་དབྱིན་ཇིའི་གཙུག་ལག་སློབ་གཉེར་ཁང་ཡོངས་ཀྱི་མགོ་ཁྲིད་ཚོར་ཡི་གེ་བསྐུར་ནས། རྒྱ་ནག་གི་ཚོགས་པ་དེ་དང་འབྲེལ་ལམ་ཡོངས་མཚམས་འཇོག་ཁག་ཐེག་བྱེད་དགོས་པའི་བཀའ་ཁྱབ་བཏང་ཡོད་པ་རེད།
ཉེ་བའི་ལོ་ཤས་རིང་དབྱིན་ཇི་དང་རྒྱ་ནག་གི་འབྲེལ་ལམ་རྙོག་འཛིང་ཆེ་རུ་ཕྱིན་ཡོད། དབྱིན་ཇིའི་གཞུང་གིས་རྒྱ་ནག་དང་ལྷན་དུ་ཚོང་དོན་འབྲེལ་ལམ་ཡར་རྒྱས་གཏོང་ཆེད་དབྱིན་ཇིའི་རྒྱལ་ས་ལོན་ཌོན་དུ་ཡོ་རོབ་ནང་གི་རྒྱ་ནག་གི་གཞུང་ཚབ་ཁང་ཆེ་ཤོས་དེ་རྒྱག་རྒྱུའི་འཆར་གཞི་ལ་ཆོག་མཆན་སྤྲད་ཡོད་ཀྱང་། རྒྱ་ནག་གི་གསང་ཉུལ་བྱེད་སྒོ་ཁག་གིས་དབྱིན་ཇིའི་དམངས་གཙོའི་ལམ་ལུགས་ལ་གཏོར་རྒོལ་གཏོང་ཐབས་བྱེད་བཞིན་པར་ཉེན་བརྡ་ཡང་ཡང་བཏང་ཡོད་པ་རེད། འདས་ལོར་དབྱིན་ཇིའི་གསང་བའི་ལས་ཁུངས་ཀྱི་སྤྱི་ཁྱབ་འགན་འཛིན་ཁན་མེག་ཁོལ་ལོམ་ (Ken McCallum) ལགས་ཀྱིས། རྒྱ་ནག་གི་གསང་ཉུལ་བ་ཚོས་དབྱིན་ཇིའི་ཆེད་ལས་པ་ཚོར་མགོ་སྐོར་གཏོང་ཆེད་ལས་ཀའི་གསལ་བསྒྲགས་རྫུན་མ་བཟོས་ནས་ཁོང་ཚོའི་གནས་ཚུལ་རྐུ་ཐབས་བྱེད་བཞིན་ཡོད་པའི་སྐྱོན་བརྗོད་བྱས་འདུག
དམིགས་བསལ་འདས་ལོའི་ཕྱི་ཟླ་ ༦ པའི་ནང་ཨ་རི་དང་དབྱིན་ཇི། ཁེ་ན་ཌ། ཨོ་སི་ཊོ་ལི་ཡ། ནིའུ་ཛི་ལན་ཌ་བཅས་ཀྱི་གསང་བའི་ལས་ཁུངས་ཀྱིས་རྒྱ་ནག་གི་གསང་ཉུལ་བ་ཚོས་དྲ་རྒྱའི་ལས་ཀའི་སྟེགས་བུ་བརྒྱུད་ནས། རྒྱལ་ཁབ་དེ་དག་གི་གསང་བའི་གནས་ཚུལ་ལ་རྒྱུས་མངའ་ཆེ་བའི་མི་སྣ་བསྡུ་རུབ་བྱེད་བཞིན་ཡོད་པའི་ཉེན་བརྡ་བཏང་ཡོད།
གསར་འགོད་པ། སྐལ་བཟང་སྦྱིན་པ།
