བོད་པ་ཚོར་ཆོས་ཕྱོགས་ནས་སྐྱབས་གནས་དཀོན་མཆོག་གསུམ་དང་། སྲིད་ཕྱོགས་ནས་སྐྱབས་གནས་དཀོན་མཆོག་གཅིག་ཡོད། སངས་རྒྱས་དང་ཆོས། དགེ་འདུན་གསུམ་ནི་ཆོས་ཕྱོགས་ཀྱི་དཀོན་མཆོག་གསུམ་དང་། ཁྱོད་ཚོ་བོད་དོན་རྒྱབ་སྐྱོར་ཚོགས་པ་ཁག་ནི་བོད་པའི་སྲིད་ཕྱོགས་ཀྱི་དཀོན་མཆོག་གཅིག་པུ་དེ་ཡིན། འདི་སྐུ་མདུན་གྱི་གསུང་ཚིག་ཇི་བཞིན་མིན་ནའང། ཁོང་གིས་དུས་རྒྱུན་ནས་བོད་དོན་རྒྱབ་སྐྱོར་ཚོགས་པ་ཁག་དང་བོད་ལ་སེམས་ཁུར་ཆེ་བའི་མགོ་སེར་ཚོར་མཇལ་འཕྲད་གནང་སྐབས་གསུང་མོལ་འདི་འདྲ་ཞིག་ཡང་སེར་གནང་གི་ཡོད་ལ། གསུང་མོལ་གནང་སྐབས་ཕྱག་གཉིས་ཐལ་མོ་སྦྱོར་བཞིན་པའང་ད་ལྟ་ད་དུང་ངའི་དྲན་ངོགས་ན་གསལ་བོར་འདུག
བོད་པའི་དཀའ་སྡུག་གི་ལོ་ཟླའི་ནང་། ང་ཚོའི་དཀོན་མཆོག་བཞི་བ་འདིས་བོད་མི་རིགས་འདི་བར་དོའི་འཕྲང་ལམ་ནས་ཐར་ལམ་དུ་བསྐྱལ་ཅིང་། ཐར་ལམ་ནས་གསོན་ལམ། གསོན་ལམ་ནས་མཐོ་སར་བསྐྱལ་ཏེ་དེང་སྐབས་ང་ཚོ་འཛམ་གླིང་གི་གཅེས་ཕྲུག་ནང་བཞིན་ཆགས་ཡོད། ང་ཚོའི་དཀོན་མཆོག་བཞི་བ་འདིས་བོད་མི་རིགས་དང་མཉམ་དུ་བོད་ཀྱི་གནད་དོན་ཡང་མི་སྒེར་གྱི་སེམས་ཁུར་ནས་ཁྱིམ་ཚང་གི་བདེ་དོན། དེ་ནས་གྲོང་གསེབ་དང་། གྲོང་ཁྱེར། རྒྱལ་ཁབ། རྒྱལ་སྤྱི། ད་ལྟ་ལྟོས་འཇོག་གི་སྒོ་ནས་འཛམ་གླིང་རང་བཞིན་གྱི་གནད་དོན་དུ་བསྒྱུར་ཡོད་ལ། ད་དུང་ང་ཚོའི་དཀོན་མཆོག་འདིས། བོད་ཀྱི་གནད་དོན་འདི་བཞིན་མི་སྒེར་ནས་ཚོགས་པ་དང་། དེ་ནས་གཞུང་འཛིན་ཚོགས་པ། ས་གནས་གྲོས་ཚོགས། རྒྱལ་ཁབ་ཀྱི་གྲོས་ཚོགས། སྲིད་འཛིན་ལས་ཁུངས། རྒྱལ་སྤྱིའི་ཚོགས་སྡེ། མཐར་གཏུགས་མཉམ་འབྲེལ་རྒྱལ་ཚོགས་ཀྱི་མདུན་ཅོག་སྟེང་བར་དུ་བསྐྱལ་མྱོང་ཡོད། ང་ཚོའི་དཀོན་མཆོག་འདི་མནའ་འབྲེལ་མཐུན་ཚོགས་དང་རྒྱལ་ཁབ་ཀྱི་གྲོས་ཚོགས། ས་གནས་སྲིད་གཞུང་དང་རྒྱལ་སྤྱིའི་རོགས་ཚོགས། ས་ཁུལ་དང་མི་ཚང་། དེ་བཞིན་མི་སྒེར་གྱི་ངོ་བོར་སྤྲུལ་ཡོད་པ་བཞིན། འདིའི་བྱིན་རླབས་ཡང་བཙན་བྱོལ་བོད་མིའི་བཀའ་ཤག་ནས་གྲོས་ཚོགས། དེ་ནས་ལས་ཁུངས་མ་ལག གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ། སློབ་གྲྭ་དང་གཞིས་ཆགས། ཁྱིམ་ཚང་དང་མི་སྒེར་སོགས་ཀྱི་ཤེས་ཡོན་དང་སློབ་གསོ། འཕྲོད་བསྟེན་དང་འཚོ་གནས་སོགས་ཀྱི་བར་ཁྱབ་མྱོང་ཡོད་པ་མ་ཟད། ད་དུང་མུ་མཐུད་ནས་བྱིན་རླབས་ཀྱི་གྲུ་ཆར་དེ་འབད་མེད་དུ་འབེབ་བཞིན་ཡོད། བོད་ནང་དོན་རྐྱེན་རེ་བྱུང་སྐབས་དང། བོད་པར་དཀའ་ངལ་རེ་འཕྲད་སྐབས་ཀྱང་། བོད་ལ་བྱིན་རླབས་ཀྱི་མཐུ་སྟོབས་མྱུར་ཤོས་ཡང་ང་ཚོའི་དཀོན་མཆོག་བཞི་བ་འདི་ཡིན།
དུས་རབས་ཀྱིས་ཡིན་ནམ། དུས་ཚོད་ཀྱིས་ཡིན། ཡང་ན་ངེས་ཤེས་དང་རྟོགས་སད་ཀྱིས་ཡིན། དེ་མིན་ན་འགྲན་རྩོད་དང་རང་རློམ་གྱིས་ཡིན། གཅིག་བྱས་ན་ཕན་མེད་ཀྱིས་ཡིན་སྲིད། གང་ལྟར་འདས་པའི་ལོ་ཤས་རིང་ནི་བོད་པ་དང་བོད་པའི་དཀོན་མཆོག་བཞི་བའི་བར་དད་པ་དམ་ཚིག་མི་གཙང་བའི་དུས་སྐབས་ཤིག་ཏུ་འཁེལ་ཞིང་། དེ་ལ་བརྟེན་ནས་དཀོན་མཆོག་གིས་དཀོན་མཆོག་གི་ས་ནས་འཁང་ར་ཞིག་འདོན་གྱིན་ཡོད་ལ། དད་ལྡན་པ་ཚོས་དད་ལྡན་པའི་ས་ནས་སྡུག་ཡུས་རེ་འདོན་བཞིན་ཡོད། དཀོན་མཆོག་གི་འཁང་ར་ལ་གཏིང་མཐའ་ཟབ་ཅིང་། དད་ལྡན་བོད་མིའི་སྡུག་ཡུལ་ལ་རྣམ་གྲངས་མང་། འོན་ཀྱང་འཁང་ར་དང་སྡུག་ཡུས་དེ་དག་མདོར་དྲིལ་ཐུབ་ན་ལས་སླ་བོ་ཞིག་སྟེ། དཀོན་མཆོག་གི་དཀའ་ངལ་ནི་མཉམ་རུབ་ཡིན་ཞིང་། དད་ལྡན་བོད་མིའི་དཀའ་ངལ་ནི་ཆབ་སྲིད་ཀྱི་ལྟ་བ་དང་ལངས་ཕྱོགས་ཆགས་ཡོད།
དཀོན་མཆོག་དང་ང་ཚོའི་བར་གྱི་དད་པ་དམ་ཚིག་ལ་གས་ཆག་ཤོར་བ་དུས་རབས་ཀྱིས་ཡིན་ནམ། དུས་ཚོད་ཀྱིས་ཡིན། ངེས་ཤེས་ཀྱིས་ཡིན་ནམ། རྟོག་སད་ཀྱིས་ཡིན། ཡང་ན། འགྲན་རྩོད་དང་རང་རློམ། དེ་མིན་ན་ཕན་མེད་དམ་མཁོ་མེད་ཀྱིས་ཡིན། ཡང་སྙིང་དཀོན་མཆོག་གི་མཉམ་རུབ་དེ་གང་ལ་ངོས་འཛིན་བྱ་དགོས། བོད་མི་ཚོས་ཆབ་སྲིད་ཀྱི་ལྟ་བ་དང་ལངས་ཕྱོགས་ཟེར་བ་དེའི་ཤུགས་བསྟན་གང་ཡིན་ནམ།
ཉི་མ་འདི་ཚོར། ངའི་གཟབ་ཉན་ལ་ཚ་འཁྲུལ་བྱུང་མེད་ན། དཀོན་མཆོག་གིས་མཉམ་རུབ་ཡོང་གི་མི་འདུག་ཟེར་བ་དང་། བོད་མི་ཚོས་ཆབ་སྲིད་ཀྱི་ལྟ་བ་དང་ལངས་ཕྱོགས་ཡག་པོ་མི་འདུག་ཟེར་བ་འདི་གཉིས་མཐར་གཏུགས་ན་དོན་གྱི་འབབ་ས་གཅིག་རང་གཅིག་རེད། མཉམ་རུབ་ག་རེ་བྱས་ནས་མ་ཡོང་བ་ཡིན། ཆབ་སྲིད་ལ་ལྟ་བ་དང་ལངས་ཕྱོགས་ཡག་མིན་གྱི་སྐད་ཆ་འདི་གང་ནས་བྱུང་བ་ཡིན། ངའི་བསམ་པར། བཀའ་ཁྲི་ཟམ་གདོང་རིན་པོ་ཆེས་དབུ་ཁྲིད་པའི་བཀའ་ཤག་སྐབས་དང་པོ་དང་། ད་ལྟ་མཇུག་སྒྲིལ་ལ་ཉེ་བའི་ཁོང་གི་བཀའ་ཤག་སྐབས་གཉིས་པ་ནི་དཀའ་ངལ་འདིའི་འབྱུང་རྩ་ཆགས་ཡོད་སྙམ།
ཕྱི་ལོ་ཉིས་སྟོང་གཉིས་ནས་བཟུང་། ཟམ་གདོང་རིན་པོ་ཆེས་དབུ་ཁྲིད་པའི་བཀའ་ཤག་སྐབས་དང་པོས་བོད་པ་ཚོས་རང་བཙན་རྩོད་གི་མེད་པ་དངོས་སུ་བསྒྲགས་ཤིང་། དེར་མཐུད་ནས་ཞི་མོལ་ལ་ཁོར་ཡུག་བསྐྲུན་སླད་ལས་འགུལ་འདི་དང་དེ་མ་སྤེལ་ཞེས་འབོད་སྐུལ་ཀྱང་རབས་དང་རིམ་པར་ཞུས། ཁོར་ཡུག་ལ་བསྟུན་ཐལ་ཆེ་བའི་དབང་གིས་དེ་སྔ་བཙན་བྱོལ་ནང་རྒྱུགས་ཆེ་བའི་མིང་ཚིག་གང་མང་ཞིག་ཀྱང་གཏམ་བཤད་དང་གསུང་འཕྲིན་ལས་ཡལ་མགོ་ཚུགས། གསར་དུ་བཙུགས་པའི་བོད་དོན་རྒྱབ་སྐྱོར་ཚོགས་པ་འགའ་ཤས་ལས། དེ་སྔའི་ཚོགས་པ་རྙིང་བ་རྣམས་གྱི་ལྟ་བ་དང་ལངས་ཕྱོགས་ནི་རང་བཙན་ཡིན་ལ། འདས་པའི་བྱུང་རབས་ནས་ད་ལྟ་ལ་ཐུག་གི་བར་དུ་དེ་དག་གི་ལས་འགུལ་གཙོ་བོ་ཡང་རང་བཙན་གྱི་སྒང་སྤེལ་ཡོད། རྒྱལ་སྤྱིའི་སྟེང་ཁྱབ་པའི་འབོད་ཚིག་སྟེ། བོད་རང་བཙན་དང་། རྒྱ་མི་བོད་ནས་ཕྱིར་རྒྱུགས་ཤིག་ཅེས་པའི་རྒྱབ་ལྗོངས་ཀྱང་དེ་ནས་བྱུང་བ་ཡིན། དུས་ཐུང་ཞིག་གི་ནང་བཀའ་ཤག་གིས་ཆེས་ཛ་དྲག་གི་སྲིད་བྱུས་ཤིག་གཏན་ལ་ཕབ་ནས་ཕྱག་བསྟར་གནང་སྐབས། བོད་དོན་རྒྱབ་སྐྱོར་ཚོགས་པ་གང་མང་ཞིག་ལ་བསམ་ཚུལ་བྱུང་ཞིང་། གང་མང་ཞིག་ལ་བློ་ཕམ། འགའ་ཤས་ནི་ལས་འགུལ་ལས་ཕྱིར་འཐེན། འགའ་ཤས་བོད་དོན་རྒྱབ་སྐྱོར་ཚོགས་པ་ནས་རང་འགུལ་གྱིས་ཕྱིར་འབུད་ཀྱང་བྱས་ཡོད། འཆར་ཅན་དུ་འཚོགས་བཞིན་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དང་། རྒྱལ་ཁབ་ནང་ཁུལ་དང་ས་གནས་ཁག་གི་ཚོགས་ཆེན་ཀྱང་རིམ་བཞིན་ཚོགས་མཚམས་ཆད། དུས་ཚོད་དེའི་རིང་། བཀའ་ཤག་གིས་མུ་མཐུད་ནས་སྲིད་བྱུས་གསར་པ་དེ་རྒྱུན་འཁྱོངས་གནང་། མུ་མཐུད་ནས་བོད་དོན་རྒྱབ་སྐྱོར་ཚོགས་པ་ཁག་གི་བསམ་ཚུལ་དང། བློ་ཕམ་སོགས་སྣང་མེད་དུ་བཞག དུས་ཚོད་དེའི་ནང་། བོད་པ་དང་བོད་པའི་དཀོན་མཆོག་བཞི་བའི་བར་ལས་འགུལ་མཉམ་རུབ་ཅིག་ཁྱོན་ནས་མ་ཡོང་།
བཀའ་ཤག་གིས་ཞི་མོལ་ལ་ཁོར་ཡུག་བསྐྲུན་པའི་ཞོར་དུ་ལམ་དབུ་མའི་ཆེ་བ་བརྗོད་མགོ་ཚུགས། ཚང་མས་མཁྱེན་གསལ་ལྟར་འདིའི་གྲུབ་འབྲས་མི་གླེང་། དེ་སྔ་བསྟན་དགྲ་རྒྱ་དམར་ཞེས་པ་རྩ་དོན་ལ་བཞག་པའི་བོད་པའི་ཚོགས་སྐྱིད་གང་མང་ཞིག་ཀྱང་རིམ་བཞིན་རང་བཙན་ནས་རང་སྐྱོང་ངམ་ལམ་དབུ་མར་ཞུགས་མགོ་ཚུགས། ཤུལ་དུ་རང་བཙན་རྩོད་མཁན་གྱི་ཚོགས་པ་གཅིག་གཉིས་ཤིག་དང་མི་སྒེར་རེ་ཟུང་ལས་མ་ལྷག འདིའང་གྲུབ་འབྲས་ཀྱི་ཁོངས་སུ་བཞག་ཆོག འོན་ཀྱང་གྲུབ་འབྲས་དེའི་རྒྱབ་ལོགས་ནས་ཤུགས་རྐྱེན་དང་བག་ཆགས་ངན་པ་ཞིག་སྟེ། ད་ལྟའི་ཆར་བོད་པ་ཚོས་ཆབ་སྲིད་ཀྱི་ལྟ་བ་དང་ལངས་ཕྱོགས་ལ་ཡག་ཉེས་ཀྱི་ས་མཚམས་ཤིག་བགར་བཞིན་པ་འདི་ཡིན་ལ། བོད་དོན་རྒྱབ་སྐྱོར་ཚོགས་པ་ཡིན་མིན་ཡང་ལམ་དབུ་མར་རྒྱབ་སྐྱོར་ཡོད་མེད་ཀྱི་སྟེང་ནས་ཕྱེས་བཞིན་པ་འདི་ཡིན།
ཞི་མོལ་ཐེངས་དགུ་གནང་ཡང་རེ་རེ་བཞིན་ཕམ་ཉེས་བྱུང་ཞིང་། ཉིས་སྟོང་བརྒྱད་ལོའི་བོད་ནང་གི་ཞི་རྒོལ་ཆེན་མོ་དང་། པེ་ཅིན་ཨོ་ལིམ་པིག་དཔལ་འབར་ཕྱི་རྒྱལ་ཡུལ་གྲུ་ཁག་ནང་བསྐོར་བསྐྱོད་སྐབས་ཀྱི་ངོ་རྒོལ་དེ་དག་གིས་བཀའ་ཤག་ལ་བསྐྱར་དུ་བསམ་གཞིགས་ཤིག་བྱིན། ངོ་རྒོལ་མཚམས་འཇོག་གི་འབོད་སྐུལ་དག་ཕྱིར་འཐེན་བྱས་ནས་ཡང་བསྐྱར་མཉམ་རུབ་ལ་ཐུགས་རེ་གནང་མགོ་ཚུགས། བརྒྱུད་ལམ་དང་འབྲེལ་ལམ་ཡོད་ཚད་སྤྱད་ནས་ང་ཚོའི་དཀོན་མཆོག་བཞི་བ་ལ་ཡང་བསྐྱར་བོད་འདི་ཐུགས་ཀྱི་དཀྱིལ་འཁོར་ནས་མ་འདོར་རོགས་ཟེར། ཚོགས་འདུ་བསྐངས་ནས་ལས་འགུལ་ལ་མཉམ་རུབ་གནང་རོགས་ཟེར། དཀོན་མཆོག་གིས་མཉམ་རུབ་ཡོང་གི་མི་འདུག་ཟེར་ཞིང་། བོད་པ་ཚོས་མཉམ་རུབ་བྱེད་པར་དཀོན་མཆོག་གི་ཆབ་སྲིད་ཀྱི་ལྟ་བ་དང་ལངས་ཕྱོགས་ཡག་པོ་མི་འདུག་ཟེར། འདི་དཀོན་མཆོག་དང་ང་ཚོའི་བར་གྱི་དད་པ་དམ་ཚིག་ལ་གས་ཆག་ཤོར་སྟངས་དེ་ཡིན། འདི་ལ་དུས་རབས་དང་དུས་ཚོད་ཀྱི་རྒྱབ་ལྗོངས་ཡོད་ལ། བོད་པ་ཚོསརང་གི་མངོན་འདོད་ལ་རྟོགས་སད་དང་ངེས་ཤེས་གསར་པ་ཞིག་རྙེད་པའི་གདེང་ཚོད་ཀྱི་ཆའང་འདྲེས། ད་དུང་འགྲན་རྩོད་དང་རང་རློམ། མཚམས་ལ་ལར་དཀོན་མཆོག་དེ་ཕན་མེད་དམ་མཁོ་མེད་ལྟ་བུའི་འདུ་ཤེས་སྐྱེས་མྱོང་བའི་ཆ་ཡང་འདྲེས་ཡོད།
འདི་ལྟར་ཟམ་གདོང་རིན་པོ་ཆེའི་བཀའ་ཤག་སྐབས་གཉིས་ཀ་ང་ཚོའི་དཀོན་མཆོག་དང་བཤད་ཚེགས་གཏམ་ཚེགས་ཀྱི་བརྒྱུད་རིམ་ནང་མཇུག་སྒྲིལ་ལ་ཉེ་ཞིང་། ད་ལྟ་བོད་མི་ཚོས་ཚ་ཚ་འུར་འུར་དུ་གླེང་ཞིང་འདེམས་བཞིན་པའི་བཀའ་ཁྲི་གསར་པ་དེས་དཀོན་མཆོག་དང་དད་ལྡན་པའི་མཆོད་ཡོན་གྱི་འབྲེལ་བ་དེ་འདི་ལྟར་མུ་མཐུད་ནས་དུས་རབས་དང་དུས་ཚོད། ངེས་ཤེས་དང་རྟོགས་སད། འགྲན་རྩོད་དང་རང་རློམ། ཡང་ན་ཕན་མེད་དམ་མཁོ་མེད་ཀྱིས་བསྐྱེལ་རྒྱུ་ཡིན་ནམ། ཡང་ན་འདི་ལ་གསར་དུ་རྒྱུན་བསྲིངས་དང་གཏན་འཇགས་རང་བཞིན་གྱི་འབྲེལ་ལམ་ཞིག་འཛུགས་རྒྱུ་ཡིན། གང་ལྟར་ཀྱང་ད་ལྟའི་བཀའ་ཤག་གིས་མཉམ་རུབ་ཡོང་ཐབས་ལ་སྨན་པའི་དོན་ཚན་དྲུག་ཅན་གྱི་ལམ་སྟོན་ཡིག་ཆ་ཞིག་བཀྲམས་ཀྱང་། དེས་ནི་མཚན་རིང་སྒྲུང་གིས་མི་འཁྱོལ་བ་ཁོ་ཐག་ཆོད་ཡོད།
ཟླ་ཚེ་སོགས་རྒྱུས་ཡོད་ཚོས་ཤེས་ནས་བཤད་པ་འདིའི་སྤྱི་ཚོགས་ལ་ཕན་པའི་རེ་བ་ཡོད།
“ལམ་འདི་མིན་པའི་རྩལ་ག་རེ་འདོན་རྒྱུ་ཡོད་ན་ཡང་བཏོན་མི་ཆོག་པ་སུས་ཀྱང་འགོག་མཁན་མེད།”ཞེས་དང་”རང་བཙན་གཙང་མ་རྩོད་མཁན་རྣམས་ནས་སྔར་ནས་ད་བར་རྩོད་ཀྱིན་པའི་་གྲུབ་འབྲས་ལ་ལྟོས་དང་།”ཞེས་དང་”ང་ཚོའི་གནས་སྟངས་ལའང་བསམ་བློ་ངེས་པར་གཏོང་དགོས།”ཞེས་དང་”ཁ་བདེ་པོ་ཤོད་ས་འདུག་གམ།”ཞེས་དང་”དེ་རྩིས་བསམ་བློ་ཡག་པོ་གཏོང་རྒྱ་རྒྱུ་གལ་ཆེའོ། དགོངས་པ་མ་འཚོམས་རོགས།”ཞེས་སོགས་ཀྱི་བཤད་སྟངས་འདི་ཚོ་བལྟོས་དང་། གཞན་ཡང་སྔར་ནས་ད་བར་གྱི་དབུ་མ་རང་བཙན་གྱི་ནང་མོལ་འདི་གཅིག་གིས་གཅིག་གི་སྐད་ཆ་ནམ་ཡང་གོ་ས་མ་རེད་སྙམ་པ་འདི་ངའི་བློ་བསྐྱེད་ཆེ་ཤོས་དེ་ཡིན།
ཟླ་བ་ཚེ་རིང་ལགས་ནས་སྒྲུང་རིང་པོ་ཞིག་བྲིས་འདུག སྐུ་ལས་ཀྱང་གང་འཚམས་བསྐྱོན་བཞག ནང་དོན་མདོར་བསྒྲིལ་ན་དབུ་མའི་ལམ་ལ་དགག་པ་དང་སྐྱོན་བརྗོད་རེད། པགས་མདག་ཀ་བཟའ་བར་ལྟག་ཁུང་འགྲིམས་པའི་དཔེ་བཞིན་རེད། ལམ་འདི་མིན་པའི་རྩལ་ག་རེ་འདོན་རྒྱུ་ཡོད་ན་ཡང་བཏོན་མི་ཆོག་པ་སུས་ཀྱང་འགོག་མཁན་མེད། རང་བཙན་གཙང་མ་རྩོད་མཁན་རྣམས་ནས་སྔར་ནས་ད་བར་རྩོད་ཀྱིན་པའི་་གྲུབ་འབྲས་ལ་ལྟོས་དང་། རང་བཙན་ལ་རྒྱབ་སྐྱོར་བྱེད་མཁན་རྒྱལ་ཁབ་སུས་ཕྱིར་འཐེན་བྱས་འདུག ངས་བལྟས་ན་དབུ་མའི་ལམ་འདི་གནས་དུས་དང་བསྟུན་པའི་ཐབས་ལམ་གལ་ཆེན་ཞིག་རེད་སྙམ། ང་ཚོའི་གནས་སྟངས་ལའང་བསམ་བློ་ངེས་པར་གཏོང་དགོས། རང་ལ་དབང་བའི་ས་སྦར་བ་གང་ཡང་མེད། འོས་སྒབ་ཡང་བཙན་འཕྲོག་བྱེད་དུས་ཁ་བདེ་པོ་ཤོད་ས་འདུག་གམ། བསམ་བློ་ཡག་པོ་བཏང་ནས་བོད་སྤྱི་ལ་ཕན་པ་འདྲ་ཤོད་རྒྱུ་ཡོད་ཡག་པོ་རེད། དེ་མིན་ཁྱེད་རང་གིས་བརྗོད་པའི་དཔེ་ལྟར་ཚིག་སྐམ་པོས་སྒྲུང་གིས་ནམ་རིང་ག་ལ་འཁྱོལ། དེ་རྩིས་བསམ་བློ་ཡག་པོ་གཏོང་རྒྱ་རྒྱུ་གལ་ཆེའོ། དགོངས་པ་མ་འཚོམས་རོགས།
ཨ་འཇམ་གྱིས་གནད་ལ་སྨིན་པ་ཞིག་བྲིས་འདུག ཚང་མས་དོ་སྣང་གནང་དགོས་པ་ཞིག་ཏུ་མཐོང་། ཡག་པོ་རེད། ཡིན་ནའང་ཤ་ཞེན་ཅན་དང་རིགས་ཞེན་ཅན། མིག་རྒྱང་ཅན་དག་གིས་འུ་ཅག་གི་ཆོས་སྲིད་གང་ཐད་ལ་འདི་འདྲའི་ངུ་སྐད་རེ་ཤོར་ཡང་། གངས་སྐྱིད་ཀྱི་དབང་འཛིན་པ་དང་ལས་ཀྱི་སྣེ་མོ་བ་ཚོར་རི་སྤྱང་གི་རྣ་ལམ་དུ་ཆོས་བཤད་ཁོ་ན་ལས་མ་འདས་ཕྱིར་ཅེས་ཕན། གང་ལྟར་རྩོམ་པ་པོའི་དཔྱད་སྟོབས་དང་ལྷག་བསམ་ལ་རྗེས་སུ་ཡི་རང་ཞུ།
རིན་ཐང་ཧ་ཅང་ཆེ།
འོན་ཀྱང་འགའ་ཞིག་གིས་གསུངས་བ་བཞིན་འདིའི་དོན་གོ་མཁན་རྣམས་ནི་འདི་ལ་མོས་པ་ཡོད་མཁན་རྣམས་ཡིན་པ་དང་། དེ་དག་ལ་འདི་འདྲ་ཞིག་མ་བྲིས་ཀྱང་ཆོག འབྲི་དགོས་ས་དག་གིས་འདིའི་དོན་མི་གོ འདི་ནི་ཆོས་ཉིད་ཅིག་ཡིན།
དེས་ན་འདིའི་དམིགས་ས་ནི་སྔོ་མིན་སེར་མིན་གྱི་ལྗང་ཁུའི་ནང་དུ་ཡིན་དགོས་པའི་དེར་གནས་པའི་ཀློག་མཁན་རེ་བྱུང་ན་དགེ་མཚན་ཆེ།
དབུ་མའི་ལམ་འདི་བྱུང་ནས་ཕྱི་ནང་གཉིས་ཀའི་ཆིག་སྒྲིལ་སྟོར་འདུག ཨོ་་་མ་རེད། ངས་ཐལ་སོང་།
མཚན་རིང་སྒྲུང་གིས་འཁྱོལ་ཐབས་མེད་ན། ད་ནི་ཅི་ཞིག་བྱེད་དགོས་སམ།
འདས་ཟིན་པའི་ཉམས་མྱོང་བསླབ་བྱར་བླངས་ཏེ། འབྱུང་འགྱུར་གྱི་བཀའ་བློན་ཁྲི་པས་གཙོས་པའི་གཞུང་འཛིན་མི་སྣ་ཚོས། དཀོན་མཆོག་བཞི་པར་དད་པ་དང་དམ་ཚིག་མ་ལོག་པ་ཞིག་གནང་གལ་ཆེ་ལ། ལྷག་པར་དཀོན་མཆོག་བཞི་པའི་ནང་དུའང་བྱིན་རླབས་ཀྱི་མཚན་ཁ་ཆེ་ཆུང་དང་། འགྲོ་བར་བྱམས་དང་བརྩེ་བས་སྐྱོང་སྟངས་མི་འདྲ་བ་ཡོད་པ་དེ་རིགས་ཀྱང་ངེས་པར་ཞིབ་འཇུག་གནང་སྟེ། དཀོན་མཆོག་བཞི་པ་དེར་སྐྱབས་སུ་འགྲོ་དང་མི་འགྲོ་བའི་ཐོག་ཏུའང་བསམ་གཞིགས་དགོས་གལ་ཆེ། །
བདག་ཉིད་བདག་གི་མགོན་ཡིན་ཞིང་། །
བདག་ཉིད་བདག་གི་དགྲ་ཡང་ཡིན། །
ལེགས་དང་ཉེས་པ་བྱས་པ་ལ། །
བདག་ཉིད་བདག་གི་དཔང་པོ་ཡིན། །
བློར་ཟུངས། དོན་སོམས། གོམ་པ་སྤོས། ལག་ལེན་བྱོས། །
རྩོམ་ཡིག་འདི་འདྲ་ཞིག་མཐོང་ཐེངས་དང་པོ་ཡིན་ལ། རིན་ཐང་ནི་གསེར་ཕྱེ་གྲེ་ལ་འཇལ་ཡང་བླུ་མི་ཐུབ་པའི་ཚད་དུ་འདུག་པས། དྲ་མཁན་ལྷན་རྒྱས་ནས་འུར་རྒྱག་རྒྱུ་སྤང་ནས་བསམ་པ་གནད་ལ་འཁེལ་དུ་བཅུག་སྟེ། གླེང་གཞི་འདིར་འཁོད་པའི་གནད་དོན་འདི་བཞིན་ཡོ་བསྲང་ཇི་ལྟར་གནང་འོས་པར་བསམ་ཚུལ་འཇོག་རྒྱུ་ཤིན་ཏུ་གལ་ཆེན་དུ་འདོད།
ཡག་པོ་བྲིས་འདུག བོད་དོན་རྒྱབ་སྐྱོར་བ་ཚོ་དང་འབྲེལ་ལམ་དམ་ཟབ་བྱེད་ཀྱི་ནི་ཁ་ཚ་དགོས་གཏུགས་ཤིག་ཏུ་མཐོང་སོང་། ཁོང་ཚོ་དང་འགལ་བ་བཟོས་ན་གཅིག་ནས་བོད་སྤྱི་བའི་དོན་ལ་གྱོང་རེག་རྒྱུ་དང་། གཉིས་ནས་དྲིན་ལན་ལོག་འཇལ་ཀྱང་ཆགས་མི་ཡོང་ངམ་སྙམ།