གསལ་ལྷང་ལྷང་གི་བསྒྲཊ་གཏམ། པདྨ་བསམ་གྲུབ།

པདྨ་བསམ་གྲུབ།   ཤེས་རབ་དགའ་ཚལ་གླིང༌།

སྤྱི་ལོ་༢༠༡༠ཟླ༡༠ཚེས་༡༩ཉིན། ང་རང་རྒྱུན་ལྡན་ལྟར་ཚོར་དྲག་གིས་མ་ཟིན་པའི་སྣང་བ་ཐན་ཐུན་དེའི་ཀློང་དུ།  སོས་དལ་བག་ཕེབས་ཀྱི་སློབ་ཁྲིད་ཅིག་བྱས་རྗེས། ཡིན་ཤག་ཤག་གི་ངང་ནས་རང་ཤག་དུ་ལོག དེར་དྲ་རྒྱའི་ཁ་ཕྱེས་པ་ན། བོད་མདོ་སྨད་ཀྱི་ཡུལ་ཁག་ཅིག་ཏུ་སློབ་ཕྲུག་ཚོས་མི་རིགས་སྐད་ཡིག་སྐྱོབ་པའི་འབོད་སྐད་བསྒྲགས་ཡོད་པ་རྟོགས། སྐབས་དེར་བདག་གི་དྲན་ངོར་འཆར་བ་སྟེ། ཕྱི་རྐྱེན་ནང་རྐྱེན་གང་མང་གིས་མི་རིགས་གསོན་གནས་ཀྱི་ཚེ་སྲོག་གཡང་ལ་དེད་ཅིང༌། བོད་མི་རིགས་ཀྱི་སྲོག་རྩར་གྱུར་བའི་སྐད་ཡིག་གི་རྩ་ལམ་ཁད་ཀྱིས་བསྒགས་དུས་འདིར། ཤི་ལ་ཁད་ཀྱི་མེ་རོ་དེ་སླར་ཡང་མདོ་ཁམས་སྨད་ནས་གསོས་བྱུང་སྙམ། 

དེ་ཡང་གནའ་བོའི་བོད་ཀྱི་ལོ་རྒྱུས་ཡིག་ལམ་དུ། སྔ་མོ་སྔ་མོ་བོད་ཡུལ་དབུས་ཀྱི་ཕྱོགས་ན། དགོངས་པའི་དཀྱེལ་ཡངས་བ་རྒྱལ་པོ་སྲོང་བཙན་གྱིས། ལ་རྒྱའི་དཔངས་མཐོ་བ་བློན་པོ་ཐོན་མི་སོགས་ལ་གསེར་དངུལ་ནོར་གྱི་རྫོངས་བ་དཔག་དུ་མེད་པ་བཏང་ལ། དུས་དེ་ནས་བཟུང་སྟེ། དུས་ཀྱི་བྱུང་བའི་འགྲོས་དང་བསྟུན་ནས། ཐུ་བྷོད་བོད་ཀྱི་དཔའ་རྟུལ་རིམ་བྱོན་གྱིས་“ལམ་བགྲོད་པར་དཀའ་བའི་རྒྱ་གར་སོགས་སུ། ལུས་ཚ་གྲང་ཆེ་ཡང་དཀའ་བ་སྤྱད་”དེ་ཡི་གེ་གསར་གཏོད་དང་རིག་གནས་ནང་འདྲེན་མཛད་པས། ད་གཟོད་ཁོང་ཅག་གིས་བོད་ཡུལ་འདི་ཤར་རྒྱ་ནག་དང་ལྷོ་རྒྱ་གར། ནུབ་གཟིག་ཡན་དང་བྱང་ཁྲོམ་དང་བཅས་པའི་དབུས་ནས། གོ་ལའི་ཏོག་ཏུ་འགྱིང་བར་བྱས་སྐད།

ཐེངས་འདིར་བྱིས་པ་བསམ་མེད་དུ་འདོད་པའི་སློབ་ཕྲུག་ཚོས། རང་རློམ་ཆེ་བའི་རྒན་རབས་པ་ཚོར་འདི་ལྟར། ཚ་ཐག་ཆོད་པའི་འགྲམ་ལྕག་ཅིག་བགྲད་པ་ན། བོད་སྐད་ཡིག་ཁ་ལ་ཁྱེར་བའི་ང་རང༌། གླ་ཕོགས་འདི་ཟ་རྒྱུར་ངོ་ཚ་ཞིག་སྐྱེས་བྱུང༌། འོན་ཀྱང་ཡུལ་དུས་ཐམས་ཅད་ཀྱི་རྒན་རབས་པ་ཚོ་དེ་ལྟ་མ་ཡིན་ཏེ། སྤྱི་ལོ་ཞེ་དགུའི་ཚུན་དུ་བོད་དུ་རྒྱ་ཡིས་བཙན་འཛུལ་བྱས་ཤིང༌། དུས་དེར་བོད་སྐད་ཡིག་ཀྱང་རྙིང་བཞི་ལས་འགུལ་གྱི་སྨྱོ་ཧམ་དུ་ཚུད་དེ། ཕལ་ཆེར་རྩ་སྟོང་དུ་སོང་མོད། རོ་ཡི་རི་བོའི་འོག་དང༌། ཁྲག་གི་མཚོ་མོའི་འཇིངས་ནས་ལྷག་ལུས་སུ་སོང་བའི་རྒན་པོ་མགོ་སེ་འགའ་ཡིས་བོད་ཀྱི་སྐད་ཡིག་འདི་ཤི་ཐོག་ནས་བསྐྱར་དུ་གསོན་པར་བྱས་ལ། ཁོང་ཚོའི་རྗེས་རབས་པ་ཚོས་ཀྱང་སྐད་ཡིག་འདིའི་ལུས་སེམས་ལ་སྔར་བཞིན་ཤད་བསྐྱེད་པ་མ་ཟད། དེ་ལ་སྐབས་འཚོལ་སྣ་ཚོགས་ཀྱིས་དུས་ཀྱི་ཟས་བཅུད་གསར་པའང་བླུད་དེ། རེ་ཞིག་ལ་བོད་ཡུལ་དུ་ཕ་སྐད་གཙང་མའི་མཁའ་དབུགས་འབྱིན་རྔུབ་བྱེད་པའི་སྐལ་བཟང་བསྐྲུན་མོད།

བཙན་འཛུལ་བས་མི་རིགས་སྐད་ཡིག་ལ་བརྟེན་ཞིང༌། སྐད་ཡིག་མི་རིགས་སུ་འཐིམ་པའི་ཆོས་ཉིད་དེ་སྨག་མེད་དུ་གཏོང་ཆེད། དངོས་ཤུགས་བརྒྱུད་གསུམ་ནས་གླགས་འཚོལ་ནའང༌། ན་གཞོན་ཚོ་མ་ཤི་ན། མི་རིགས་འདི་འཆི་མི་སྲིད། ད་ལྟ་ཕ་ཡུལ་དུ་རྒྱ་སྐད་ཀྱི་བཙན་འཛུལ་ཧ་ཅང་རྒོད་པས། མི་རིགས་དང་སྐད་ཡིག་ལ་ཞེན་པ་དཀར་བའི་རྒྱུད་བཟང་གི་བུ་ཕྲུག་ཚོས། ད་ནི་རང་གི་ན་ཚོད་ལས་བརྒལ་བའི་འགན་ཁུར་ཕྲག་ཏུ་བླངས་ཐལ། ཁོང་ཚོས་“མི་རིགས་འདྲ་མཉམ། སྐད་ཡིག་རང་དབང༌།”ཞེས་པའི་གད་རྒྱངས་གཉོམ་པོས་གནམ་ས་འགེངས་བར་བྱས་ཏེ། དུས་རབས་ཉེར་གཅིག་པའི་བོད་ཁ་བ་ཅན་གྱི་བདག་པོ་རུ་གཟི་བརྗིད་ཀྱིས་ལངས་བྱུང༌། དེ་ནི་སྙིང་རྗེ་རྗེའི་བོད་རིགས་སློབ་ཕྲུག་ཚོའི་སེམས་ལ་བཅིངས་བའི་“བོད་ཡིག་འཇིགས་མི་སྲིད། བོད་སྐད་ཉམས་མི་སྲིད”པའི་བརྟན་ཅག་ཅག་གི་རྡོ་རྗེའི་དམ་བཅའ་རེད་ལ། དེ་ནི་བོད་ཀྱི་མ་འོངས་སོན་རྩ་ཚོས་དུས་རབས་དང་ལོ་རྒྱུས་ལ་སྤྲིངས་བའི་གསལ་ལྷང་ལྷང་གི་བསྒྲགས་གཏམ་ཞིག་ཀྱང་ངོ༌།།