བྷི་བྷི་སིས་གནས་ཚུལ་སྤེལ་བ་ལྟར་ན། དབྱིན་ཡུལ་སྲིད་བློན་ཌ་ཝེ་ཌེ་ཁ་མེ་རོན་ David Cameron ལགས་ཀྱི་སྣེ་ཁྲིད་འོག་གནད་ཡོད་མི་སྣ་ ༤༣ ལས་གྲུབ་པའི་སྐུ་ཚབ་ཚོགས་ཆུང་ཞིག་ཟླ་འདིའི་ཕྱི་ཚེས་ ༩ ཉིན་རྒྱ་ནག་ལ་ཉིན་གཉིས་རིང་གི་སྐོར་སྐྱོད་བྱས་ཡོད་པ་དང་། སྐབས་དེར་ཧུའུ་ཅིན་ཐོ་དང་ཝུན་ཅ་པོ་གཙོས་རྒྱ་ནག་གི་དཔོན་རིགས་ཁག་ཅིག་དང་ཐུག་འཕྲད་བྱས་ཡོད་ཅིང་། ཐེངས་འདིའི་ཁོང་གི་རྒྱལ་དོན་གཟིགས་སྐོར་ནི་རྒྱལ་ཁབ་གཉིས་བར་གྱི་ཚོང་འབྲེལ་སྐོར་ཡིན་རུང་། ཁོང་གིས་སྤོབས་པ་ཆེན་པོས་རྒྱ་ནག་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། དམངས་གཙོའི་ཁེ་ཕན་སོགས་ཀྱི་ཐད་ལ་གླེང་སློང་ཤུགས་ཆེན་བྱས་ཡོད་སྐོར་བཀོད་འདུག
སྲིད་བློན་ཌ་ཝེ་ཌེ་ཁ་མེ་རོན་ཀྱིས་པེ་ཅིན་སློབ་གྲྭ་ཆེན་མོ་རུ་གཏམ་བཤད་ཅིག་གནང་སྐབས། གལ་སྲིད་དེ་དགོང་དྲོ་རང་ང་འདིར་ཡོང་མེད་ཚེ། ཕལ་ཆེར་ངས་གྲོས་ཚོགས་འཐུས་མི་ཚོའི་དྲི་བར་ལན་ག་འདྲ་འདེབས་དགོས་མིན་ཐད་གྲ་སྒྲིག་བྱེད་བསྡད་ཡོད་ཀྱི་རེད། གྲོས་ཚོགས་ནང་གྲོས་ཚོགས་འཐུས་མི་དང་ཁ་གཏད་ཚོགས་པ་སོགས་ཀྱིས་ང་ལ་གཞུང་གི་སྲིད་ཇུས་དང་འབྲེལ་བའི་གནད་དོན་གང་འདྲ་ཞིག་གི་སྟེང་རང་དབང་ཐོག་དྲི་བ་བཏང་ཆོག་གི་རེད། ཕྱོགས་མཚུངས་གསར་ལམ་ཁག་དང་ཁྲིམས་ཁང་སོགས་ཀྱི་གནོན་ཤུགས་ཀྱང་ཡོད་ཡོད་པ་རེད། དེ་ཚོས་དབང་ཤེད་དང་མཚམས་རེར་སུན་སྣང་ཀྱང་སྟེར་སྲིད་མོད། དོན་དངོས་ཐོག་ཁོང་ཚོས་ང་ཚོའི་སྲིད་གཞུང་ཇེ་ལེགས་དང་རྒྱལ་ཁབ་ཇེ་བརྟན་དུ་གཏོང་གི་ཡོད་པར་ཚང་མས་ཡིད་ཆེས་བྱེད་ཀྱིན་ཡོད། ཅེས་དང་།
ཁོང་གིས་རྒྱ་ནག་ནང་གསར་འགྱུར་རྒྱུད་ལམ་ཁག་ལ་གཞུང་གིས་སྟངས་འཛིན་དང་དྲ་ཐོག་སྐྱོན་བརྗོད་རིགས་ལ་དམ་དྲག་བྱེད་ཀྱིན་ཡོད་པར་ཟུར་ཟའི་ཚུལ་དུ། ང་ཚོར་རང་དབང་ལྡན་པའི་གསར་ལམ་དང་སྨྲ་བརྗོད་རང་དབང་ཡོད་པ་རེད་ལ། གཞུང་དང་མང་ཚོགས་བར་ལྟ་ཚུལ་འདྲ་མིན་ཡོང་གི་ཡོད་པ་དེ་མཚམས་རེར་དཀའ་ངལ་འདྲ་བོ་ཞིག་མཐོང་གི་རེད་མོད། སོ་སོའི་སྤྱི་ཚོགས་ཕྱོགས་ཡོངས་ནས་འཕེལ་རྒྱས་ཡོང་བའི་གནད་དོན་རིགས་ལ་དབྱིན་ཇིའི་མང་ཚོགས་གོ་རྟོགས་ཡོད། མང་ཚོགས་ལ་གོ་རྟོགས་ཡག་པོ་ཡོད་པ་ལ་བརྟེན་ནས་གནད་དོན་གང་གི་ཐད་ལའང་བསམ་འཆར་འདོན་རྒྱུའི་བློ་སྤོབས་ཡོང་གི་ཡོད་པ་དེས། གཞུང་གི་སྲིད་ཇུས་གཏན་འབེབ་བྱ་རྒྱུར་ཕན་ཐོགས་ཆེན་པོ་ཡོད་པ་རེད། ཅེས་དང་།
ཁོང་གིས་མུ་མཐུད་རྒྱ་ནག་གི་ཆབ་སྲིད་བཅོས་སྒྱུར་དང་སྨྲ་བརྗོད་རང་དབང་སྐོར་ནས་སྐུལ་འདེད་བྱས་དོན། ཉེ་བའི་ལོ་འགའི་རིང་རྒྱ་ནག་གི་དཔལ་འབྱོར་སྒོ་འབྱེད་རྒྱ་ཇེ་ཆེར་སོང་བ་དེས་རྒྱ་ནག་དང་རྒྱལ་སྤྱིའི་དཔལ་འབྱོར་ཐད་ཁེ་ཕན་ཆེན་པོ་བྱུང་ཡོད། ངའི་རེ་བར་དུས་ཚོད་ངེས་ཅན་ཞིག་གི་ནང་དཔལ་འབྱོར་སྒོ་འབྱེད་ཆེན་མོ་འདིས་རྒྱ་ནག་གི་ཆབ་སྲིད་སྒོ་འབྱེད་ལ་སྣེ་འཁྲིད་རྒྱུ་དེ་ཡིན། ང་རང་གིས་དཔལ་འབྱོར་དང་ཆབ་སྲིད་ཀྱི་འཕེལ་རྒྱས་ཟུང་འབྲེལ་ཐོག་འགྲོ་རྒྱུ་དེ་རྒྱལ་ཁབ་སྲ་བརྟན་དང་འཕེལ་རྒྱས་ཐད་ཀྱི་ཁག་ཐེག་ཅིག་ཡིན་པར་ཡིད་ཆེས་བྱེད་ཀྱི་ཡོད། ཅེས་བརྗོད་འདུག
ཕྱི་ཚེས་ ༩ ཉིན་ཁོང་སྲིད་བློན་ཝུན་ཅ་པོ་དང་ཐུག་འཕྲད་སྐབས། ཉལ་ཐའི་མེ་ཏོག་ཅིག་བྲང་ཁར་བཏགས་ཏེ་ཚོགས་འདུར་ཞུགས་ཡོད་འདུག སྤྱིར་ཉལ་ཐའི་མེ་ཏོག་དེ་དམག་འཁྲུག་མེད་པའི་མཚོན་དོན་ཞིག་ཡིན་རུང་། ཐེངས་འདིར་དབྱིན་ཇིའི་སྲིད་བློན་གྱིས་བཏགས་ཡོད་པ་དེ་ཆེད་དུ་དུས་རབས་ ༡༩ བའི་ནང་གི་ཉལ་ཐའི་དམག་འཁྲུག་སྐབས་དབྱིན་ཇིས་རྒྱ་ནག་ཕམ་པར་བརྒྱབ་ཏེ། བཙན་ཤུགས་འོག་ཉལ་ཐའི་ཚོང་རྒྱག་བཅུག་པ་དེ་དྲན་གསོ་བྱས་ཏེ་རྒྱ་ནག་ལ་བརྙས་བཀོལ་བ་ཞིག་ཡིན་འདུག་ལ། དབྱིན་ཇིའི་དཔོན་རིགས་ཚོས་རྒྱ་ནག་གི་ཕྱོགས་ནས་ཉལ་ཐའི་མེ་ཏོག་དེ་ལེན་དགོས་པའི་རེ་བ་འདོན་སྲིད་པར་ཚོད་དཔག་བྱས་ཡོད་ཀྱང་། རྒྱ་ནག་གིས་དེ་ལ་དོ་སྣང་གང་ཡང་བྱུང་ཡོད་མི་འདུག
གསར་འགོད་པ། བནྡེ་སྐྱབས།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དབྱིན་ཇིའི་སྲིད་བློན་མཆོག་གིས་གནད་དུ་འཁེལ་བའི་གཏམ་བཤད་ཅིག་གནང་སོང་། ད་དུང་དཔོན་རིགས་གཞན་དག་གིས་ཀྱང་རྒྱ་ནག་གི་འགྲོ་བ་མིའི་ཐོབ་ཐང་དང་དམངས་གཙོ་ཡར་རྒྱས་སྐོར་ལ་གནད་དུ་ཁེལ་བའི་གཏམ་བཤད་རེ་བྱེད་རྒྱུའི་སྤོབས་པ་དང་གནོན་ཤུགས་རེ་སྤྲོད་ཐུབ་པའི་བློ་ཁོག་སླེབས་ཐུབ་ན་ཅི་མ་རུང་བསམ་ཡོད།