བཙལ་ཡང་མ་རྙེད་པའི་བརྩེ་དུང་། བརྒྱད།

ཕྱི་རོལ་ནི་དངོས་ནས་ཁ་ཁུ་སིམ་པོ་ཡིན་པ་དེ་ཡིས་ཀྱང་། ངེད་གཉིས་ལ་ཁ་རོག་གེར་བསྡོད་ཅིག་ཟེར་བ་དང་མཚུངས་ན་ཡང་། བདེ་སྐྱིད་འཚོས། ང་ལ་ཁྱེད་རང་གི་མུ་མཐུད་དུ་ཉན་རྒྱུ་ཡིན་ནམ།

སྐད་ཆ་དེས་ང་རང་སྨན་ཁང་གི་སྒོ་འགྲམ་ནས་ཁོ་རང་གི་ཁྱོ་ག་དེ་ཡི་འགྲམ་དུ་སླེབས་རེག་བར་གྱི་སྣང་ཚུལ་དག་མིག་ལམ་དུ་གློག་བརྙན་བཞིན་ཤར་དུ་བཅུགས། ངས་ཁྱེད་རང་གི་སེམས་པ་སྐྱིད་པོ་མེད་ན། རེ་ཞིག་རིང་མ་གསུངས་ཀྱང་འགྲིག་གི རྗེས་ནས་ག་ལེར་སེམས་པ་ལྷོད་དུ་འབབ་ན་ང་ལ་གསུང་ན་འགྲིག་གི་རེད། ངས་ཀྱང་ཁྱེད་ཀྱི་སྐྱོ་གདུང་གི་མི་ཚེའི་ལོ་རྒྱུས་དེ་གང་ཐུབ་ཅི་ཐུབ་ཀྱིས་ཡིག་ཐོག་དུ་ཕབ་ནས། ང་ཚོའི་རྗེས་རབས་པ་དག་ལ་དྲན་རྟེན་དུ་འཇོག་འདོད་ཡོད།

བདེ་སྐྱིད་འཚོས། ལྷིང་འཇག་གི་མཚན་མོ་དེར། སླར་ཡང་མི་དམངས་སྨན་ཁང་ནང་གི་ཁོ་རང་གི་ཁྱོ་གའི་སྐོར་ནས་མུ་མཐུད་དུ། ང་རང་ཁོའི་འགྲམ་དུ་སླེབས་དུས། ཁོ་རང་དྲན་པ་འཐོར་འདུག དབུགས་ལེན་བཞིན་པ་མ་གཏོགས་རོ་ཞིག་དང་ཁྱད་པར་ཅུང་མི་འདུག ང་རང་དེ་ཡི་འགྲམ་དུ་བཙོག་ནས་ངུས་ཀྱང་། ཁོ་བོའི་ག་ལ་་རྟོགས། གཉེར་རྟོགས་པ་དེ་ཡིས་ང་ལ་བདེ་སྐྱིད་འཚོ། ད་མ་ངུ་། ཁོ་རང་གི་སྐད་ཆ་བཤད་མི་ཐུབ་པ་མ་གཏོགས། སྐད་ཆ་ཚང་མ་གོ་ནི་རེད།

ངས་ཉལ་ཁྲི་འགྲམ་དེར་རྐུབ་སྟེགས་ཤིག་ཡོད་པ་དེ་ཡི་སྟེང་ལ་བསྡད་ནས། གཉེར་རྟོགས་པ་དེར་ཁྱེད་རང་བཀའ་དྲིན་ཆེ་ལགས། ནམ་རྒྱུན་དུ་ཆང་ཁང་ནང་ནས་དོན་དག་དེ་འདྲ་བྱུང་གི་ཡོད་རབས་མེད་ལ། དོ་ནུབ་དོན་དག་དེ་འདྲ་བྱུང་འདོད་གང་ཡིན་ན། ཉིད་ནས་ཤེས་སོང་ངམ་ཞེས་དྲིས་དུས། ཁོ་རང་གིས་མཚན་མོ་དེར་ང་ལ་གང་ཡང་གསུངས་མ་སོང་། ཕྱིར་ཉིན་ཆང་ཁང་ནང་དུ་འགན་འཛིན་བསྟན་རྡོར་ཟེར་བའི་ཕོོ་གསར་ཞིག་ཡོད། ཁོ་རང་སླེབས་ནས་ང་རང་ལ་དོན་དག་ཚང་མ་གསལ་བོ་བཤད་། གཞི་ནས་དོན་དག་དེ་ཡི་སྣ་འདྲེན་ང་རང་ཆགས་ཡོད་པ་ཤེས་ཀྱང་། ངས་སྐད་ཆ་དེ་དག་སུ་ལ་གསལ་བཤད་བྱེད།

ངའི་ཁྱོ་ག་ཚེ་རིང་དོན་འགྲུབ་ཀྱིས་ངེད་གཉིས་མཉམ་དུ་བསྡད་པ་ནས་ཨ་རག་གཏན་ནས་འཐུང་གི་མེད། དོན་དག་དངོས་ནས་དེ། ཁོ་རང་གི་ཆང་ཁང་གི་སྐུ་མགྲོན་རྙིང་ཤོས་དང་། ཁོ་རང་གི་གྲོགས་པོ་རྡོར་བསྟན་གྱིས་ཁོ་རང་ལ་ངོ་འཚང་དྲིས་འདུག ཆང་འཐུང་རོགས་ཤིག་ཀྱང་མི་ཉན། རྒན་མོ་ནང་དུ་བཅུགས་ནས་མི་གཞན་དང་དགའ་རོགས་བསྒྲིགས་བཅུགས། ཁྱེད་རང་གིས་འདི་ནས་དཀའ་ལས་བརྒྱབས། ཆང་དེ་ལ་ཁག་བཞག་ནས་གླུ་བླངས་ཟེར་བ་ལྟར། ངའི་ཁྱོ་གའི་རྡོར་བསྟན་གྱིས་སྐད་ཆ་དེ་ཡི་ལན་འདེབས་ཆེད་དུ། ཁོ་དང་མཉམ་དུ་གཏམ་ངན་དེ་ལ་ཁག་བཞག་ནས་ཆང་འཐུང་འདུག ཁོ་གཉིས་ཀྱིས་ཆང་འཐུང་ནས་ལྷོད་ལྷོད་ཡོད་དུས། ཆང་ཁང་ནང་དུ་ཕོ་གསར་ཁ་ཤས་ཀྱིས་འཁྲིག་པ་བརྒྱབས་འདུག

ཚེ་རིང་དོན་འགྲུབ་ཀྱིས་རྡོར་བསྟན་བཞག་ནས་གོམ་ཁ་འཁྱོར་བཞིན། འཁྲིག་འཛིང་བྱེད་ཀྱིན་པའི་བར་དེར་སླེབས་དུས། ར་བཟི་ཞིག་གིས་གྲི་རིང་ཞིག་འཁུར་ནས་རྒྱུགས་ཡོང་གི་ཡོད་པ་དང་འཕྲད་ནས། མི་དེས་སྔོན་ལ་འགྲོ་བཞིན་པའི་ར་བཟི་དེ་ལ་མ་འཕོག་པར། ངའི་ཁྱོ་ག་ཚེ་རིང་དོན་འགྲུབ་འཁྱར་འཁྱོར་ཡོང་བཞིན་པ་དེ་ལ་བརྒྱབས་འདུག ནམ་རྒྱུན་དུ་ཁོ་རང་གཟུགས་པོ་མྱུར་མོ་ཞིག་ཡོད་ཀྱང་། དེ་ནུབ་ཆང་གི་བཟི་བའི་སྒང་ལ་རིགས་པ་ཡང་མི་གསལ་་བའི་སྒང་ཡིན་སྟབས། རྐྱེན་ངན་པ་དང་འཕྲད་ན་གཡོལ་ཐབས་མེད་ཟེར་བ་ཅིས་མི་བདེན།

གྲི་རིང་གཡུགས་ཐེངས་ཤིག་གིས་ངའི་ཁྱོ་ག་ཚེ་རིང་དོན་འགྲུབ་ཀླད་ལྟག་ལ་འཁེལ་ནས་དེ་རུ་འགྱེལ་འདུག འགན་འཛིན་བསྟན་རྡོར་གྭིས་དེ་མཐོང་མ་ཐག གཉེན་་རྟོགས་པ་འབོད་དུ་ཕྱིན་འདུག དེ་རུ་་སོང་བར་ཁྲག་མང་བོ་ཞིག་བཞུར་དུ་བཅུགས་མེད་རྒྱུ་ན། དེ་དུས་གང་ཙམ་ཕན་ཡོད་ས་རེད། གཉེན་རྟོགས་པ་དང་བསྟན་རྡོར་ཆང་ཁང་དུ་སླེབས་དུས་རྡོར་བསྟན་གྱིས་ངའི་ཁྱོ་ག་ཚེ་རིང་དོན་འགྲུབ་སྐྱོར་ནས་ངའི་གྲོགས་པོ་དགའ་བོ་ཟེར་ནས་ཀུ་འདེབས་ཀྱིན་ཡོད་ཀི་ཟེར།

དོན་དག་ཚང་མ་ཤེས་ན་ཡང་། ད་ནི་ཡོད་ཚད་འཕྱི་དྲགས་པ་ལའང་སྙམ་ནས་སེམས་པ་སྐྱོ་བཞིན། སྨན་པས་གང་གསུངས་པ་དེ་ལ་ན་པ་ཡིན། སྨན་པས་བཤད་ན་ཁོ་རང་གི་ཀླད་པའི་ནང་དུ་སྐྱོན་ཞུགས་འདུག གཅིག་བྱས་ན་སྐད་ཆ་བཤད་མི་ཐུབ་པའི་སྒང་ལ། ཉལ་སའི་ནང་དུ་ཡུན་རིང་ལས་ས་རེད། ཡག་ཤོས་ཡིན་ན་ཁོ་རང་གི་འགྲམ་ནས་མ་ངུ་། སྐད་ཆ་མ་བཤད། ཁོ་རང་ཁ་ཁུ་སིམ་པོར་ཞོག་དང་། ཕྱིར་དྲན་པ་རྙེད་ཀྱང་སྲིད།

རྫོང་མཁར་ནས་སྡེ་བའི་ནང་དུ་འགྲོ་མཁན་ཞིག་ལ་སྐད་བཏང་བ་ཡིན། ངའི་ཕ་མ་གཉིས་ང་རང་ལ་གང་མགྱོགས་མགྱོགས་ཤིག་བལྟ་བསྐོར་བྱེད་དུ་ཡོང་རོགས། ང་ལ་དོན་དག་འཚབ་ཆེན་ཞིག་བྱུང་འདུག་གསུངས་རོགས་ཞེས་སྐད་སྐུར་ནས་ངའི་ཕ་མ་གཉིས་མ་འབྱོར་གོང་དེར། ཚེ་རིང་དོན་འགྲུབ་ཀྱི་ཕ་མ་གཉིས་ཀ་སྔོན་དུ་སླེབས་སོང་། ཁོའི་ཨ་མས་ཁོ་རང་མཐོང་བ་དང་དྲན་པ་འཐོར་སོང་། བུ་གཅིག་པོ། གཅེས་ཕྲུག་ཟེར་བའི་ཚིག་བརྡབ་བརྡུབ་ཅིག་མ་གཏོགས་ཚིག་གཞན་གང་ཡང་གསུངས་མ་སོང་།