པ་སངས་(སེ་ར)
ལོ་འདིའི་སྤྱི་ཟླ་ ༡༡ པའི་ཚེས་ ༡༢ ཉིན་དབུས་སྤྱི་ཁྱབ་འོས་བསྡུ་ལྷན་ཁང་ནས་མི་མང་གིས་ཐད་ཀར་འོས་བསྡུ་བྱས་པའི་བཀའ་སྤྱིའི་སྔོན་འགྲོའི་འོས་མི་ཁག་དང་གྲངས་འབོར་གྱི་གྲུབ་འབྲས་ཁག་གསལ་བསྒྲགས་བྱས་སོང་། ཐེངས་འདིའི་འོས་བསྡུའི་བརྒྱུད་རིམ་ནང་། སྤྱི་ཡོངས་ནས་བལྟས་ན་དེ་སྔ་ལས་ཚགས་ཚུད་དང་གྲུབ་འབྲས་ཡག་ཏུ་ཕྱིན་ཡོད་ཀྱང་། སྟབས་མ་ལེགས་པ་ཞིག་ལ། ཆོལ་ཁ་སོ་སོའི་སྤྱི་འཐུས་ཀྱི་འོས་མིའི་ནང་དུ། རང་ཡུལ་བརྗེད་ཅིང་རང་སྐྱོན་མི་མཐོང་བའི་མི་དང་། རང་གཤིས་བརླག་ཅིང་རང་གི་སྐད་ཡིག་ཀ་མད་སུམ་ཅུ་ཀློག་མི་ཤེས་མཁན་ཡང་ཡང་བསླེབས་འདུག་ལ། ཁ་རྡོག་རྩ་ཆིག་སྒྲིལ་དང་ཁོག་ཆོལ་ཁ་ཕྱོགས་རིས་ཅན་གྱི་མི་དང་། ཁ་ཆོལ་ཁའི་བདེ་སྡུག་དང་ལག་ལེན་ཆོལ་ཁ་གཏོར་བཤིག་བཏང་བའི་མི་ཡང་དེ་བས་མང་པ་ཞིག་བསླེབས་འདུག །
དེ་དག་སྤྱི་འཐུས་ཀྱི་འོས་མིར་ཇི་ལྟར་བསླེབས་པ་དེ། རྒྱུ་ཤུགས་དང་དབང་ཤུགས། ཡང་ན། འོས་བླུགས་པའི་ཐོབ་ཁུངས་སོ་སོའི་མི་མང་ལ་དམངས་གཙོའི་གོ་རྟོགས་ཞན་དྲགས་པ་ཡིན་ནམ། ཕྱོགས་འཐེན་སྒེར་གཅོད་ཀྱི་ར་བཟི་ཐེབས་པ་ཡིན། གང་ལྟར་མདོར་བསྒྲིལ་ན། དེ་ནི་རྒྱབ་ལ་ཆོལ་ཁའི་ཕྱོགས་རིས་ལྗིད་ཏིག་གེ་བའི་འབོག་སྒྲིལ་ཁུར་ཏེ་དབུགས་ཧལ་ནས་འགྲོ་ཐུབ་ལ་མི་ཐུབ་ལའི་མི་མང་རྣམས། མི་ཤུགས་དང་རྒྱུ་ཤུགས། དབང་ཤུགས། ཡང་ན་གོང་ལ་སྐྱབས་རྟེན་ཕུལ་བ་དང་། འོག་ལ་རྔན་པ་སྤྲད་པར་དགའ་བའི་མི་ག་གེ་མོ་དག་གིས་རྒྱབ་ནས་དེད་དེ། ཆེས་རིན་ཐང་བྲལ་བའི་དུས་ཡུན་ལོ་ལྔ་དེ་ཡང་བསྐྱར་ཆུད་ཟོས་སུ་གཏོང་འདོད་པ་དེ་རེད།
སྤྱིར་ཡུལ་ལ་བདེ་སྐྱིད་བྱུང་ན། རྒྱལ་པོ་ཨ་ནེས་བྱས་ཀྱང་ཆོག་མོད། ལམ་འདི་ནི་རྩེད་མོ་རྩེ་ས་ཞིག་མ་རེད་ལ། མི་རྒྱུ་དབང་གསུམ་གྱི་ཤུགས་ཚད་ས་ཡང་མ་རེད། ཆེ་ཚུགས་དང་སྦམ་མདོག་སྟོན་ས་མ་རེད་ལ། ཁ་བདེ་པོ་དང་མགོ་བདེ་བོ་བྱེད་ས་དེ་བས་ཀྱང་མ་རེད། འདི་ནི་མི་མང་གི་སྐུ་ཚབ་མཚོན་ཐུབ་པར་བྱ་ས་དང་། མི་མང་གི་དངོས་ཤུགས་བརྒྱུད་གསུམ་གྱི་རེ་འདོད་གླེང་སའི་སྟེགས་བུ། རང་གི་སྤྱོད་ཡོན་འཇོན་གསུམ་རྩལ་དུ་བཏོན་ཏེ་བོད་སྤྱི་བའི་དོན་དུ་ལས་ཀ་བྱེད་ས་དང་། བོད་པའི་བདེན་མཐའ་སེལ་བའི་ཐབས་ལམ་བསྐྲུན་ས་ཞིག་ཆགས་ཡིན། ཁེ་ཕན་ཆུང་ཆུང་ཙམ་གྱི་དོན་དུ་སོ་སོ་དམག་མིའི་ལག་གི་མེ་མདའ་བཞིན་ཁ་གང་ལ་སྟོན་སྟོན་ཞིག་ཏུ་གྱུར་ན་མི་འགྲིགས། འགན་འདི་ནི་མཐོ་མགོ་པ་དང་། དམའ་མི་དམངས་བྱིངས་ཀྱི་ཡན་ཆད་ཚང་མར་གཅིག་མཚུངས་ཀྱིས་འཁྲི་བ་ཞིག་ཡིན།
ང་ཚོས་དབུགས་རིང་ནར་ནར་གྱིས་མི་སྡོད་པར་བསླེབ་ལ་ཉེ་བའི་དངོས་གཞིའི་འོས་བསྡུའི་སྐབས། གཞན་གྱི་བཀོལ་བྱུས་དང་ལུང་ཚན་ཕྱོགས་འཐེན། དགའ་ཁ་འཁྱེར་ཕྱོགས་དང་བློ་གཉིས་ཐེ་ཚོམ་མི་བྱེད་པར། བློ་རྩེ་གཅིག་གིས་ཆོལ་ཁ་སོ་སོའི་སྔོན་འགྲོའི་གསལ་བསྒྲགས་སྤྱི་འཐུས་ཀྱི་འོས་མི་ལྔ་བཅུའི་ནང་ནས། ཡང་ན། ཉེར་ལྔའི་ནང་ནས་གོང་དུ་སྐྱོན་ཡོད་པ་དག་རྩལ་དུ་བཏོན་ནས་ཐེར་འདོན་ངེས་པར་དུ་བྱ་དགོས། དེ་ནི་མང་ཚོགས་ཚོས་རང་རང་གི་འཐུས་མི་འོས་འདེམས་ཀྱི་འགན་དབང་ཡིན། གལ་སྲིད་དེ་ལྟར་མ་བྱས་ན་འདས་ཟིན་པའི་སྐྱུག་བྲོ་བའི་ཟློས་གར་དེ་ལྟ་བུ། སྤྱི་འཐུས་ལྷན་ཁང་གི་གར་སྟེགས་སྟེང་ནས་སླར་ཡང་དགྲ་དགའ་གཉེན་སྡུག་གི་འཁྲབ་སྟོན་ཞིག་འབྱུང་མི་སྲིད་པའི་ངེས་པ་མེད། ད་ནི་དངོས་གཞིའི་འོས་བསྡུ་སྐབས་སུ་ང་ཚོས་ཟ་ཨེ་བློ་སྣ་དང་གྱོན་ཨེ་བློ་ལུས་ལ་བལྟ་ཆོག ཛ་དྲག་གི་དུས་ཚོད་ཐུང་ཐུང་ནང་མང་ཚོགས་མི་རེ་ངོ་རེ་ནས་དམངས་གཙོའི་ཁེ་དབང་ལོངས་སུ་སྤྱད་པ་དང་དུས་མཉམ། དམངས་གཙོའི་འགན་དབང་ཕྲག་ཏུ་བླངས་ཏེ། ཡར་རྒྱབ་སྐྱོར་དགོས་སར་རྒྱབ་རོགས་བྱ་རྒྱུ་དང་། མར་ཐེར་འདོན་དགོས་སར་ཟུར་འདོན་གནང་རྒྱུ་གལ་ཆེའོ།།
པ་སངས་ལེགས
མི་ཁྱེད་རིང་ལྟ་བུས་སྤྱི་ཚོགས་ལ་རྙོགས་སྒྲ་བཟོས་པ་རེད་ དཀའ་ཤགས་དང་སྤྱི་ཐུས་ཆ་ཚངས་ཁྱེད་རིང་གིས་གང་གདམ་པ་དེ་ཡོང་གི་རེད་པེ?
ངས་བལྟས་ན། རྟ་སུ་ཡིན་མི་ཤེས་ཀྱང་། བོང་བུ་གཅིག་ནི་ཀིརྟི་སྒྲོལ་དཀར་ལྷ་མོ་ཞེས་རོང་ཆེན་བསྟན་པའི་སྒྲོན་མེ་ཀིརྟི་རིན་པོ་ཆེའི་མཚན་ཟུར་ཞིག་དྲངས་ནས་ད་བར་སྤྱི་ཚོགས་ནང་མགོ་སྐོར་གཏོང་མཁན་སྐབས་བཅུ་གཅིག་པ་ནས་སྤྱི་འཐུས་བྱས་ཏེ་སྡོད་མཁན་གྲོས་ཚོགས་ནང་སྔོན་ནས་བཤད་པ་རྗེས་སུ་བརྗེད་འདུག་མཁན་ཞིག་འདུག་པ་དེ་ཡིན་པ་ཆ་བཞག་ན་འགྲིག་སྙམ། ཡང་གཞན་པ་ཞིག་མི་རྒྱུའི་གནོན་ཤུགས་ལ་བརྟེན་ནས་སྐབས་བཅུ་གཉིས་པ་ནས་བཟུང་རྙིང་མའི་སྤྱི་འཐུས་ཀྱི་མིང་ཁུར་མཁན་ད་དུང་ཡང་འཐོབ་ངེས་ཅན་རྒྱ་རི་བུ་ཕྲུག་ཅེས་ཚིག་བདུན་གསོལ་འདེབས་ཀྱང་སྐྱོར་མི་ཤེས་ཤིང་། བཅའ་ཁྲིམས་དང་སྒྲིག་གཞི་ཀློག་མི་ཤེས་མཁན་དེ་ཡང་ཡིན་ཆོག་པར་སྙམ།
འཐེར་འདོན་གནང་རོགས་གནང་། ཞེས་ཁྱོད་ལ་རེ་བ་ཞུ་རྒྱུ་ཡིན། རྩོམ་ཡིག་འདི་རིགས་ལ་བསམ་ཚུལ་གསལ་པོ་དང་ཐབས་ལམ་གསལ་པོ་དགོས་པ་གཙོ་གནད་དུ་བཟུང་དགོས་པ་འདོད།
རྟ་སུ་ཡིན་དང་བོང་བུ་སུ་ཡིན་གསལ་ཁ་མེད་པས་ཕན་ཐོགས་ཅང་བྱུང་མ་སོང་།
རེད་རེད་བདེན་པ་རེད་བོད་ཀྱི་བསྟན་པ་མགོ་འཁྲིད་ཚོས་སྣུབ་ན་འབངས་མི་དམངས་ལ་ཁག་ཅི་ཡོད་།
དཔེར་ན་སྤྱི་མཐུས་ཚོགས་ཞོན་ལ་ཆ་བཞག་ན་གངས་བསྐྱིད་ནང་མི་མང་འདུན་དུ་ཁ་མཁས་པོ་དང་ཡ་རབས་ཚ་མདོག་བྱེད་བཞིན་ཡོད་།
དེ་བཞིན་ཁོང་མ་གཏོགས་དབྱིན་སྐད་ཤེས་ཀྱི་མེད་པ་འདྲཔོ་བྱེད་བཞིན་ཡོད་ལ་ཁོང་གི་སུབ་སུབ་ཏུ་འཐེན་པའི་ཐཱ་མག་འདི་བོད་ཀྱི་བུད་མེད་སྤྱི་འཐུས་ཀྱི་མིག་དཔེ་བཟང་ཤོས་དེ་མ་ཡིན་ནམ།་དེ་སྔོན་ཅཱ་དྷི་གཱར་ཁྱེད་རང་གི་མིའི་འདུན་དུ་ནད་པ་ལ་ཇི་ལྟར་བྱས་ཡོད་མི་དམངས་འགྲོ་ཚར་རྗེས་གང་བྱས་ཡོད་ཁྱེད་རང་རང་གི་ཤེས་ཀྱི་རེད་
རྩོམ་ཡིག་འདི་ཚོར་བ་སྐྱེན་པོ་ཞིག་དང་། སེམས་འཁུར་ཆེན་པོ་ཞིག་གི་འོག་ནས་བྲིས་འདུག་མོད། འོན་ཀྱང་། དེ་ཙམ་གནད་དུ་འཁེལ་བ་ཞིག་མ་རེད། གལ་སྲིད་སྐུ་ཉིད་ལ་དེ་འདྲའི་སེམས་འཚབ་ཅིག་ཡོད་ན། ཐད་ཀར་མི་ལ་མཛུབ་མོ་བཙུགས་ཏེ། སྐྱོན་ལ་ཐེར་འདོན་བྱ་དགོས་པ་རེད།
པ་སངས་ལགས
བཤད་པ་བདེན་དུ་ཆོག་ཀྱང་།མིན་ནག་མདའ་འཕེན་རང་རེད།
དེ་ལས་ཁ་གསལ་གཏིང་གསལ་ཞིག་བཤད་ན་མ་གཏོགས་མདུན་དངོས་ཀྱི་ས་མིག་ལ་བཀོད་རིན་མི་འདུག
བཤད་རྒྱུ་ཡོད་ན་མདའ་འདེན་ཕུགས་འདེད་བྱས་ནས་གསུངས་རོགས
དེ་མེད་ན་ད་བཟོད་རང་ཉིད་ལ་དག་ཐེར་བྱོས
ཐེར་འདོན་བྱེད་རོགས། ཐོག་མར་སྐུ་ཉིད་ཀྱིས་ཁྱོད་རང་གིས་ཤེས་ཤིང་། འདོད་པ་མེད་མཁན་གྱི་འོས་མི་དེ་དག་གི་སྐྱོན་ཐེར་འདོན་བྱེད་རོགས། དེའི་སྟེང་དུ་ང་ཚོས་བསམ་ཚུལ་སྤུངས་ཆོག
འོས་དྲང་པོ་མ་བྱུང་ན་བཤད་རྒྱུ་ཡོད་པ་རེད། མང་ཚོགས་ཀྱིས་འོས་བླུག་ནས་བསླེབས་པའི་མི་དེ་ཚོ་ཡོང་ཆོག་གི་མ་རེད་མདོག་མདོག་བཤད་ན། ད་ནི་གུང་ཁྲན་ཏང་གི་བྱེད་སྟངས་ལྟར་དམིགས་འཛུགས་བྱ་རྒྱུ་ལས་ཡོད་པ་མ་རེད། སྐབས་འདིར་མང་ཚོགས་ཀྱི་འོས་ཤོག་ལ་བརྩི་བཀུར་བྱ་དགོས་པ་རེད་འདོད། སུ་འདེམ་ན་འདོད་ན་རང་དབང་རེད། སུ་ལ་ཐོབ་ན་དེ་ལ་ཐོབ་པ་རེད།