ནང་ཆོས་དང་ཚན་རིག་བར་སེམས་དང་སྲོག་གི་བགྲོ་གླེང་།

༧གོང་ས་མཆོག་གིས་ལྡི་ལི་ཁུལ་དུ་མཛད་འཕྲིན་སྐྱོང་གི་ཡོད་པ་ལྟར། ལྡི་ལིའི་ཏཱ་ལའི་བླ་མ་ཀུན་ཕན་བདེ་རྩ་ཚོགས་པ་དང་ཝར་ན་མཐོ་སློབ། བྷེང་ལོར་ནང་བརྟན་གཞི་བྱས་པའི་རྒྱལ་ཡོངས་ཆེས་མཐོའི་ཤེས་ཡོན་བསྟི་གནས་ཁང་བཅས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༢༠ ནས་ ༢༣ བར་གྱི་ཉིན་བཞིའི་རིང་། ལྡི་ལིའི་ India Habitat Centre ཞེས་པའི་ཚོགས་ཁང་དུ་༼ སེམས་དང་སྲོག༽ ཅེས་པའི་ནང་ཆོས་དང་ཚན་རིག་བར་གྱི་བགྲོ་གླེང་ཚོགས་འདུ་ཐེངས་ ༢༢ པ་དེ་ཚོགས་ཡོད་ཅིང་།  ཐེངས་འདིའི་མཛད་སྒོའི་སྟེང་༧གོང་ས་མཆོག་དང་རྒྱ་གར་གྱི་སྲིད་འཛིན་ཟུར་བ་ཨེ་པི་ཇེ་ཨབྷ་དྷུལ་ཀ་ལཱམ་ (Dr. APJ Abdul Kalam) མཆོག ཇར་མན་གྱི་ཀླད་པའི་ཚན་རིག་པ་གཙུག་ལག་སློབ་དཔོན་ཝོལ་ཕི་སིང་གྷར་ (Prof.Wolf Singer) སོགས་ཞུགས་ཡོད་འདུག  

ཚོགས་ཐོག་ཏུ་༧གོང་ས་མཆོག་གིས་ནང་ཆོས་ཀྱི་ལྟ་གྲུབ་ལས་བསྟན་པའི་འགྲོ་བ་མིའི་ལུས་སེམས་ཀྱི་འབྲེལ་བ་དང་དེའི་བདེ་སྡུག་སྐོར་གསུངས་དོན། བོད་ཀྱི་ནང་པའི་ཆོས་ལུགས་སུ་མིིའི་ལུས་དང་སེམས་ཀྱི་འབྲེལ་བའི་སྐོར་ལ་འགྲེལ་བཤད་ཞིབ་ཚགས་བརྒྱབ་ཡོད་པ་དང་། མིའི་སེམས་སུ་དོན་དམ་གྱི་བདེ་སྐྱིད་ཅིག་བསྐྲུན་དགོས་ན་སྔོན་ལ་ཉོན་མོངས་སྤང་དགོས་ཀྱི་ཡོད།  ཉོན་མོངས་སྤང་དགོས་ན་ལམ་གྱི་རིམ་པ་མང་པོར་སྒོམ་སྒྲུབ་བྱེད་དགོས་ཚུལ་གསལ་པོར་བསྟན་ཡོད་ཅེས་གསུངས་འདུག སྐབས་དེར་རྒྱ་གར་མཁས་དབང་ཨེ་ཡུན་གྷིར་ལགས་ཀྱིས་ཀྱང་རྣལ་འབྱོར་བའི་གྲུབ་མཐའི་ལུགས་སུ་མིིའི་ལུས་སེམས་ཀྱི་འབྲེལ་བའི་ཐོག་ལུས་སྦྱོང་ལ་བརྟེན་ནས་སྒོམ་ཉམས་ལེན་བྱ་ཐབས་དང་། རྣལ་འབྱོར་བའི་ལྟ་གྲུབ་ནང་མིའི་ནང་སེམས་ཀྱི་རྣམ་གཞག་ཇི་ལྟར་འཇོག་དགོས་ཚུལ་སོགས་འགྲེལ་བཤད་བརྒྱབ་ཡོད་པ་རེད། 

ཉིན་བཞིའི་རིང་གི་བགྲོ་གླེང་ཚོགས་འདུ་དེའི་ཐོག་ནུབ་ཕྱོགས་དང་རྒྱ་གར་གྱི་ཚན་རིག་པ་དང་། གནའ་བོའི་རྒྱ་གར་གྱི་ལྟ་གྲུབ་སྨྲ་བ། རྣལ་འབྱོར་བ། ཕྱི་རོལ་བའི་ལྟ་གྲུབ་སྨྲ་བ། རིག་བྱེད་སྨྲ་བ། སྒོམ་ཉམས་ལེན་པ་སོགས་མཉམ་ཞུགས་བྱས་ཡོད་ཅིང་། ཚོགས་འདུར་ཕེབས་མཁན་ཝ་ཎཱ་མཐོ་སློབ་ཀྱི་ངེས་སྟོན་པ་དགེ་བཤེས་ངག་དབང་བསམ་གཏན་ལགས་ཀྱིས་བརྗོད་ན། སེམས་དང་སྲོག་གི་ཚོཊ་འདུའི་ཉིན་དང་པོར་མཁས་དབང་ཨེ་ཡུན་གྷིར་མཆོག་གིས་རྣལ་འབྱོར་བའི་ལྟ་གྲུབ་དང་ཉམས་ལེན་གྱི་རིམ་པའི་ནང་ལུས་སེམས་ཀྱི་འབྲེལ་བ་དང་ལུས་སྦྱོང་། སྒོམ་ཉམས་ལེན་བྱེད་སྟངས་དང་སེམས་ཀྱི་རྣམ་བཞག་སྐོར་གསུངས་ཡོད་ཚུལ་དང་། ༧གོང་ས་མཆོག་གིས་བོད་ཀྱི་ནང་ཆོས་དང་། ལྷག་པར་དུ་ནང་པའི་སྔགས་ལུགས་སུ་གསུངས་པའི་ལུས་སེམས་བར་གྱི་འབྲེལ་བ། དེ་བཞིན་མིའི་སེམས་སུ་བདེ་སྐྱིད་བསྐྲུན་རྒྱུར་ཉོན་མོངས་སྤང་ཐབས་དང་ཉོན་མོངས་སྤང་རྒྱུར་ཡང་ལམ་གྱི་རིམ་པ་བགྲོད་དགོས་ཚུལ་བཅས་གསུངས་བྱུང་ཅེས་ངོ་སྤྲོད་གནང་ཡོད། 

ཁ་སང་ཕྱི་ཚེས་ ༢༢ ཉིན་ལྡི་ལིའི་ཇཱ་མི་ཡ་ཁ་ཆེའི་གཙུག་ལག་སློབ་ཆེན་གྱི་གསལ་བསྒྲགས་ནང་། འདི་ལོའི་གཙུག་ལག་སློབ་ཆེན་དེའི་འབུམ་རམས་པའི་མཁས་དབང་གི་ཕྱག་འཁྱེར་དེ་༧གོང་ས་མཆོག་ལ་འབུལ་རྒྱུའི་ཐག་གཅོད་བྱས་པའི་སྐོར་དབུས་གཞུང་ལ་སྙན་གསེང་ཞུས་སྐབས། དབུས་གཞུང་ནས་དེང་སྐབས་རྒྱ་ནག་དང་ཆབ་སྲིད་ཀྱི་ཚོར་བ་རྣོ་རུ་འགྲོ་བའི་དུས་སྐབས་ཤིག་ཏུ་འཁེལ་ཡོད་སྟབས་ལས་གཞི་དེ་གནས་སྐབས་རིང་ཕྱིར་འགྱངས་དགོས་ཚུལ་བརྗོད་པ་སོགས་ཀྱི་འགོག་རྐྱེན་བྱུང་ཡོད་ཀྱང་མཐར་ཆོག་མཆན་རག་སྟེ།  དེ་རིང་ཕྱི་ཚེས་ ༢༣ ཉིན་མཁས་དབང་གི་ཕྱག་འཁྱེར་དེ་༧གོང་ས་མཆོག་ལ་དངོས་སུ་འབུལ་བཞེས་ཀྱི་མཛད་སྒོ་བསྡུ་རྒྱུ་གཏན་འཁེལ་ཡོད་པ་མ་ཟད། ཕྱག་འཁྱེར་འབུལ་བཞེས་ཀྱི་མཛད་སྒོའི་སྐུ་མགྲོན་གཙོ་བོར་རྒྱ་གར་དབུས་གཞུང་གི་མིའི་ནུས་ཤུགས་ལས་ཁུངས་ཀྱི་བློན་ཆེན་ཀ་བྷིལ་ལ་སི་སྦལ་མཆོག་ཕེབས་རྒྱུ་ཡིན་འདུག

གསར་འགོད་པ། དཔལ་ལྡན།