ད་ལྟ་བཙན་བྱོལ་བོད་མིའི་གྲངས་འབོར་ ༡༢༧༩༣༥ རེད།

བཙན་བྱོལ་བོད་གཞུང་གི་ ༢༠༠༩ ལོའི་མི་འབོར་ཞིབ་བཤེར་ལྟར་ན། ད་ཆར་བཙན་བྱོལ་ནང་ཁྱོན་བོད་མི་ ༡༢༧༩༣༥ ཡོད་པ་ལས་ཕོ་  ༧༠༥༥༦ དང་། མོ་ ༥༧༣༧༩ བཅས་ཡིན་འདུག་ལ། ཕྱི་ལོ་ ༡༩༩༨ ལོའི་མི་འབོར་ཞིབ་བཤེར་དང་བསྡུར་ན་མི་ ༡༦༩༡༥ ཙམ་འཕར་ཡོད།

ཟླ་འདིའི་ཟླ་མགོར་བོད་གཞུང་འཆར་འགོད་ལྷན་ཁང་གིས་ལོ་སྔོན་མར་བཙན་བྱོལ་བོད་མིའི་མི་འབོར་ཞིབ་བཤེར་ཐེངས་གཉིས་པ་གནང་བའི་སྙན་ཐོ་བཏོན་པའི་ནང་། དེང་སྐབས་བཙན་བྱོལ་ཁྱོན་ཡོངས་སུ་བོད་མི་གྲངས་ ༡༢༧༩༣༥ ཙམ་ཡོད་འདུག་ཅིང་། དེ་དག་གི་ཁྲོད་ཕོ་  ༧༠༥༥༦ དང་མོ་ ༥༧༣༧༩ བཅས་ཡིན་ཞིང་། རྒྱ་གར་དུ་བོད་མི་ ༩༤༢༠༣ ཡོད་པ་དང་། བལ་ཡུལ་དུ་བོད་མི་ ༡༣༥༡༤། འབྲུག་ཡུལ་དུ་བོད་མི་ ༡༢༩༨། དེ་བཞིན་ཕྱི་རྒྱལ་ཁག་ཏུ་བོད་མི་ ༡༨༩༢༠ བཅས་ཡོད་འདུག ༡༩༩༨ ལོའི་བཙན་བྱོལ་བོད་གཞུང་གི་མི་འབོར་ཞིབ་བཤེར་ཐེངས་དང་པོའི་སྐབས། བཙན་བྱོལ་ཁྱོན་ཡོངས་སུ་བོད་མི་གྲངས་ ༡༡༡༠༢༠ ཙམ་ཡིན་ཞིང་། སྔ་ཕྱི་གཉིས་བསྡུར་ན་ཐེངས་འདིར་མི་གྲངས་  ༡༦༩༡༥ ཙམ་ཡར་འཕར་ཡོད་འདུག བཙན་བྱོལ་བོད་མིའི་གྲངས་འབོར་གྱིས་འཛམ་གླིང་སྟེང་གི་བོད་རིགས་ཀྱི་བརྒྱ་ཆ་ ༣ ཙམ་ཟིན་ཡོད།

བཙན་བྱོལ་བོད་མིའི་ཚོགས་སྡེ་ཁག་དང་སློབ་གྲྭ་ཁག དགོན་སྡེ་སོགས་གཙོས་བོད་མིའི་སྤྱི་ཚོགས་ནང་གཏན་སྡོད་བྱེད་མཁན་བོད་རིགས་མ་ཡིན་པ་གྲངས་ ༡༥༤༦༡ ཙམ་ཡོད་འདུག་ལ། ཐེངས་སྔོན་མའི་མི་འབོར་ཞིབ་བཤེར་དང་བསྡུར་ན། བོད་མིའི་གཞིས་ཆགས་ཁག་ཏུ་གཏན་སྡོད་བྱས་ཡོད་པའི་ཕྱི་མིའི་གྲངས་འབོར་ལྡབ་ ༢༤ མང་དུ་ཕྱིན་ཡོད་ཅིང་།  ༡༩༩༨ ལོ་ནས་ ༢༠༠༩ བར་བཙན་བྱོལ་བོད་མིའི་གྲངས་འབོར་ ༡༦༩༡༥ འཕར་ཡོད་པ་དེ་བལ་ཡུལ་དང་འབྲུག་གཉིས་ཀྱི་གཞིས་ཆགས་བོད་མིའི་གྲངས་ཚད་ཕྱོགས་གཅིག་ཏུ་བསྡོམས་པའི་གྲངས་འབོར་ལས་བརྒལ་ཡོད།

འདས་པའི་མི་ལོ་སུམ་ཅུའི་རིང་གི་བཙན་བྱོལ་བོད་མིའི་ལོ་རེའི་འཕེལ་ཚད་རགས་རྩིས་བྱས་ན་བརྒྱ་ཆ་ ༢་༨  མར་ཆག་ཡོད་པ་དང་། ༢༠༠༩ ལོའི་མི་འབོར་ཞིབ་བཤེར་ལྟར་ན་ལོ་རེའི་མི་འབོར་འཕེལ་རྒྱས་ཀྱི་བརྒྱ་ཆ་ ༡་༩༦ ལས་མེད། ལོ་རབས་དགུ་བཅུ་བ་ནས་མི་འབོར་འཕེལ་ཚད་མར་ཆག་བཞིན་ཡོད་པའི་ཁ་ཕྱོགས་དེས་མུ་མཐུད་འབྱུང་འགྱུར་གྱི་ལོ་རེའི་མི་འབོར་ཟགས་ཚད་ཇེ་མགྱོགས་སུ་འགྲོ་རྒྱུ་ཡིན་པ་མཚོན་ཡོད། འདས་པའི་མི་ལོ་བཅུ་ཕྲག་འགའི་ནང་བཙན་བྱོལ་བོད་མིའི་སྐྱེ་འཕེལ་གྱི་གྲངས་ཚད་དང་འདས་གྲོངས་སུ་ཕྱིན་པའི་གྲངས་ཚད་གཉིས་ཀ་མར་ཆག་ཡོད་ཐོག སྐྱེ་འཕེལ་གྱི་གྲངས་ཚད་མར་ཆག་པ་དེ་འདས་གྲོངས་སུ་ཕྱིན་པའི་གྲངས་ཚད་ལས་བརྒལ་ཡོད་འདུག་པ་སོགས་བཀོད་འདུག

ཕྱི་ཚེས་ ༤ ཉིན་འདི་གའི་གསར་འགོད་པས་བོད་གཞུང་འཆར་འགོད་ལྷན་ཁང་གི་འགན་འཛིན་དཀོན་མཆོག་བརྩོན་འགྲུས་ལགས་སུ་དེའི་སྐོར་བཀའ་འདྲི་ཞུས་པར་ཁོང་གིས་གསུངས་དོན། ༢༠༠༩ ལོའི་མི་འབོར་ཞིབ་བཤེར་གྱི་འགེངས་ཤོག་ནང་ཡོངས་ཁྱབ་ཐོག་དྲི་བ་ ༦༤ ཙམ་ལ་གནས་ཚུལ་ཕྱོགས་བསྡུ་བྱས་ཏེ། མི་ཚང་གཅིག་གི་མི་འབོར་དང་ཕོ་མོ། ལོ་གྲངས། དཔལ་འབྱོར། ཤེས་རིག ཆབ་སྲིད། སྡོད་གནས་དང་འཚོ་བའི་གནས་སྟངས་བཅས་ཆ་ཚང་འདུས་ཡོད་པའི་མི་འབོར་ཞིབ་བཤེར་ཚད་མཐོ་ཤོས་ཤིག་རེད།

ད་ལྟའི་ཆར་ཚོད་དཔག་བྱས་པ་ལྟར་ན། བཙན་བྱོལ་ནང་བོད་མི་འབུམ་གཅིག་དང་ལྔ་ཁྲི་ལྷག་ཅིག་དགོས་པ་རེད་ཅེས་ཚང་མས་བཤད་ཀྱི་ཡོད་ལ། འཕར་ཚད་བརྒྱ་ཆ་གཉིས་བྱས་ན་དེ་ལྟ་བུ་ཞིག་ཏུ་བསླེབ་དགོས་ཀྱང་། ང་ཚོའི་འཕར་ཚད་ཧ་ཅང་དམའ་བོ་རེད། དེ་ནི་ཕྱི་སྡོད་བོད་མི་མང་དུ་ཕྱིན་པ་དང་བཙན་བྱོལ་བོད་མི་ཉུང་དུ་ཕྱིན་སྟབས་རེད། དཔེར་ན། ལོ་སྔོན་མའི་བཙན་བྱོལ་བོད་མིའི་མི་འབོར་ཞིབ་བཤེར་ནང་། ཕྱིའི་རྒྱལ་ཁབ་ཁག་གི་མི་སེར་དང་རྒྱ་གར་གྱི་མི་སེར་བཟོས་ཟིན་པའི་བོད་མི་མང་བོ་ཞིག་མཉམ་ཞུགས་བྱས་མེད། གལ་སྲིད་ཁོང་ཚོ་མི་འབོར་ཞིབ་བཤེར་ནང་འཛུལ་ན་འགོག་རྐྱེན་མེད་པ་དང་རྒྱ་གར་གཞུང་ཕྱོགས་ནས་དཀའ་ངལ་འཕྲད་ཀྱི་མེད་པ་ང་ཚོས་ཤེས་ཀྱི་ཡོད་མོད། དོགས་ཟོན་བྱས་ཏེ་མ་འཛུལ་བ་ཆགས་ཡོད། དེའི་རིགས་བོད་མི་ཡིན་ནའང་། མི་འབོར་ཞིབ་བཤེར་གྱི་གྲངས་ཐོའི་ནང་ཚུད་མེད། ཅེས་གསུངས།

ཡང་ཁོང་ལ་མི་འབོར་ཞིབ་བཤེར་འདི་བརྒྱུད་འདས་པའི་ལོ་བཅུའི་རིང་གི་བོད་མིའི་ཤེས་ཡོན་གནས་ཚུལ་གང་དུ་བསླེབས་ཡོད་མེད་སྐོར་དྲིས་པར་ཁོང་གིས་གསུངས་དོན། མི་འབོར་ཞིབ་བཤེར་འདི་བརྒྱུད་འདས་པའི་མི་ལོ་ལྔ་བཅུའི་རིང་གི་བཙན་བྱོལ་བོད་མིའི་ཤེས་ཡོན་གནས་སྟངས་ཀྱང་གསལ་བོ་བྱུང་ཡོད། ཤེས་ཡོན་གནས་ཚུལ་ནང་ཚད་འཛིན་སའི་གྲངས་ཀ་ཆེ་བ་ཁག་ཅིག་ཡོད་པ་ལས། དཔེར་ན། ཡིག་རྨོངས་སེལ་བ་ལྟ་བུ་རེད། ༡༩༥༩ ལོར་ང་ཚོ་འདིར་འབྱོར་སྐབས་ཡིག་རྨོངས་ཀྱི་ཚད་གཞི་མཐོ་བོ་རེད། དེ་བཞིན། ལོ་རབས་བརྒྱད་ཅུའི་ནང་བརྒྱ་ཆ་ ༦༠ ཡས་མས་དང་། ༡༩༩༨ ལོའི་ཞིབ་བཤེར་སྐབས་བརྒྱ་ཆ་ ༧༠ ཟིན་ཡོད། སྔར་ལོ་བརྒྱ་ཆ་ ༨༤ ཙམ་ཟིན་ཡོད་སྟབས། ལོ་བཅུའི་ནང་དུ་བརྒྱ་ཆ་བཅུ་ལྷག་འཕར་ཡོད། ད་ལྟ་བཙན་བྱོལ་བོད་མིའི་ཡིག་རྨོངས་བརྒྱ་ཆ་ ༢༠ མ་ཟིན་ཙམ་ལས་མེད་ལ། དེ་དག་ཁྲོད་ཕོ་ལས་མོ་མང་བ་ཡོད་ཀྱང་། སློབ་གྲྭ་དང་མཐུན་རྐྱེན་གང་ལེགས་བསྐྲུན་ཡོད་སྟབས། ༢༠༢༠ ལོ་ཡས་མས་ལ་བརྒྱ་ཆ་བརྒྱའི་ཡིག་རྨོངས་སེལ་རྒྱུའི་ཆ་རྐྱེན་ཚང་འདུག

དཔལ་འབྱོར་གནས་སྟངས་ལ་ཆ་བཞག་ན་ཡང་ ༡༩༩༨ ལོ་དང་བསྡུར་ན། ད་ལྟའི་གནས་སྟངས་ཧ་ཅང་ཡག་ཏུ་ཕྱིན་འདུག བོད་མི་བརྒྱ་ཆ་ལྔ་བཅུ་ལྷག་ལ་དངུལ་ཁང་གི་དངུལ་དེབ་ཡོད་པ་དང་། ཕལ་ཆེ་བར་ནང་དུ་འཁྲུད་ཁང་གསང་སྤྱོད་ཡོད་པ། བརྒྱ་ཆ་བརྒྱ་ལ་གློག་གི་མཐུན་རྐྱེན་ཡོད་པ་ལྟ་བུ་ཆགས་ཡོད་ཟེར།  

ཡང་ཁོང་ལ་འདས་པའི་ལོ་བཅུའི་རིང་གི་ཕྲུ་གུ་སྐྱེ་ཚད་ཀྱི་འཕར་ཆག་སྐོར་བཀའ་འདྲི་ཞུས་པར། ཁོང་གིས་གསུངས་དོན། ཕྲུ་གུ་སྐྱེས་པའི་འཕར་ཚད་ལ་ཐོལ་གྱིས་བལྟས་ན་སེམས་ཁྲལ་ལངས་ཡོང་ནའང་། ཡང་ཕྱོགས་གཞན་ནས་བལྟས་ན་འཕར་ཚད་དེ་ནི་དུས་ཀྱི་འཕོ་འགྱུར་ཞིག་རེད། འཛམ་གླིང་སྤྱི་ཡོངས་ཀྱི་འགྲོ་སྟངས་ལྟར་བྱས་ན། མི་འབོར་གྱི་འཕར་ཚད་མཐོ་བ་ནས་དམའ་བར་འགྲོ་བཞིན་འདུག རྒྱ་གར་ལྟ་བུ་ཡིན་ནའང་ཕྲུ་གུ་དྲུག་ནས་གསུམ་ལ་མར་ཟགས་ཡོད། ཡིན་ནའང་། ང་ཚོའི་ཕྲུ་གུ་སྐྱེ་བའི་འཕར་ཚད་མར་ཟགས་པ་ཧ་ཅང་གི་མྱུར་པོ་རེད། རྒྱལ་ཁབ་ཅིག་གི་ལོ་ ༥༠ ནང་གི་ཟགས་ཚད་དེ་ང་ཚོར་ལོ་ ༣༠ ཆགས་འདུག དཔེར་ན། ༡༩༨༧ ནས་ ༨༩ བར་ཕྲུ་གུ་སྐྱེ་ཚད་ ༤་༩ ཡིན་ཡང་།  ༡༩༩༨ ལོར་ ༡་༢༢ དང་། ཐེངས་འདིར་ ༡་༡༨ ཙམ་རེད། དེར་བརྟེན། ཕྲུ་གུ་སྐྱེས་ཚད་ཧ་ཅང་གི་ཉུང་ཉུང་རེད་ལ། སྐྱེ་ཚད་ཉུང་ཉུང་ཡིན་སྟབས་མི་འབོར་འཕར་ཚད་ཀྱང་དེ་མཚུངས་ཀྱིས་ཇེ་ཉུང་ནས་ཇེ་ཉུང་དུ་འགྲོ་བཞིན་འདུག  

གང་ལྟར་ཕྲུ་གུ་སྐྱེ་ཚད་དེར་ཅུང་ཙམ་བློ་ཕམ་སྐྱེ་གཞི་ཞིག་ཡོད་ལ། བཀའ་བློན་ཁྲི་པ་མཆོག་གིས་ཀྱང་བོད་གཞུང་མང་རྒྱལ་ཡོངས་ཚོགས་ཆེན་སྐབས། ལོ་ཉི་ཤུ་ཕྱིན་ན་བོད་མིའི་མི་འབོར་ཕྱེད་ཀ་མར་ཆག་ངེས་རེད་ཅེས་གསུངས་ཡོད། དེ་ནི་མི་རིགས་ཤིག་གི་སྐྱེས་འཕེལ་གྱི་ཚད་གཞི་བརྒྱ་ཆ་གཅིག་གི་འོག་གནས་ཡོད་ཚེ། མི་རིགས་དེའི་འཕར་ཚད་མར་ཆག་གི་ཡོད་པས་རེད། ཅེས་གསུངས་བྱུང་།

༢༠༠༩ ལོའི་བཙན་བྱོལ་བོད་མིའི་མི་འབོར་ཞིབ་བཤེར་གྱི་སྙན་ཐོའི་ནང་བཀོད་པ་ལྟར་ན། ཐེངས་འདིའི་མི་འབོར་ཞིབ་བཤེར་གྱི་དམིགས་འདུན་ནི། རྒྱ་བལ་འབྲུག་གསུམ་ནང་གི་གཞིས་ཆགས་ཁག་གི་སྤྱི་ཚོགས་ཡར་རྒྱས་དང་སྲ་བརྟན་བཟོ་རྒྱུའི་ལས་གཞི་ཁག་གི་ཆེད་མི་འབོར་གཞིར་བཟུང་གིས་སྤྱི་ཚོགས་དང་། དཔལ་འབྱོར། ཤེས་ཡོན། འཕྲོད་བསྟེན་སོགས་ཀྱི་གནས་ཚུལ་ཞིབ་ཕྲ་དགོས་གལ་ཆེ་བར་བརྟེན་ནས་ཐག་གཅོད་བྱུང་བ་ཞིག་ཡིན་སྐོར་བཀོད་འདུག

གསར་འགོད་པ། ཨ་རིག་འགྱུར་མེད་དང་བནྡེ་སྐྱབས།