ལུས་ལ་རབ་ཏུ་བྱུང་བའི་རྟགས་དང་ཆ་ལུགས་བཅངས་ཕྱིན་ཆད་ལ། ལུས་ངག་ཡིད་གསུམ་གྱི་སྤྱོད་ལམ་དག་ཀྱང་དེ་དང་མཐུན་པར་དང་བ་འདྲེན་པ་ཞིག་དགོས། རབ་ཏུ་བྱུང་བའི་རྟགས་དང་ཆ་ལུགས་བཅངས་ཀྱང་སྤྱོད་ལམ་ཐ་མལ་པ་ལྟ་བུར་ལུས་ན། བསྟན་པའི་ཞབས་འདེགས་སུ་མ་ཕྱིན་པར་བསྟན་པར་ཞབས་འདྲེན་བྱས་པ་རེད། ཅེས་༧གོང་ས་མཆོག་གིས་གསུངས་ཡོད།
ཁ་སང་ཕྱི་ཚེས་ ༧ ཉིན་གྱི་སྔ་དྲོར་བཞུགས་སྒར་ངྷ་རམ་ས་ལའི་ཉེ་འགྲམ་གྱི་སྔ་འགྱུར་བཙུན་དགོན་ཤུག་གསེབ་ཨོ་རྒྱན་རྫོང་གི་རྟེན་དང་བརྟེན་པ་གསར་བཞེངས་ལེགས་འགྲུབ་ཀྱི་དབུ་འབྱེད་མཛད་སྒོ་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་༸གོང་ས་མཆོག་ཆིབས་བསྒྱུར་བསྐྱངས་ཡོད་ལ། དེ་བཞིན། ཁྲིམས་ཞིབ་པ་རྣམ་པ་དང་སྤྱི་འཐུས་ཚོགས་གཞོན། ལྷན་ཁང་ཁག་གི་བཀའ་བློན་སྤྱི་འཐུས་རྣམ་པ། གཞན། བླ་སྤྲུལ་དང་བཀའ་ཟུར་ཁག་ཅིག་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ། ཕྱི་རྒྱལ་རོགས་ཚོགས་བཅས་འདུ་འཛོམས་བྱུང་ཡོད། མཛད་སྒོའི་ཐོག་མར་༸གོང་ས་མཆོག་གིས་དགོན་པའི་འདུ་ཁང་དབུ་འབྱེད་དང་སྣང་གསལ་མར་མེ་ཞལ་ཕྱེ། རྟེན་དང་བརྟེན་པར་རབ་གནས་གནང་ཡོད། དེའི་རྗེས་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་ལགས་ཀྱིས་ལས་འཆར་ངོ་སྤྲོད་དང་འབྲེལ། ༡༩༩༠ ལོར་ཐོག་མར་བཙུན་མའི་ལས་འཆར་གྱི་ལྟ་རྟོག་འོག་ཚུད་རྗེས་སྡོད་གནས་སོགས་ཀྱིས་གནས་སྟངས་ཡག་པོ་མེད་པར་མཐུན་རྐྱེན་མང་ཆེ་བ་སློབ་སྦྱོང་དང་དགེ་རྒན་གྱི་ཕྱོགས་ལ་བཏང་སྟེ་ད་ལྟའི་ཆར་བཙུན་མ་རྣམས་ཀྱིས་སློབ་སྦྱོང་གི་གནས་ཚད་གང་འཚམ་ཡག་པོ་བྱུང་ཡོད་ཚུལ་དང་། འདས་པའི་ལོ་ལྔའི་རིང་དགོན་པ་གསར་བཞེངས་ལེགས་པར་གྲུབ་སྟེ་ད་ལྟའི་ཆར་བཙུན་མ་ ༡༠༨ ལ་ཚོགས་ཁང་དང་འདུ་ཁང་། དཔེ་མཛོད། སྨན་ཁང་། སྡོད་ཤག ཡིག་ཚང་། སྐུ་མགྲོན་སྣེ་ལེན་བྱེད་ས་བཅས་ཀྱི་འཛུགས་སྐྲུན་ཐད་ཧིན་སྒོར་ས་ཡ་ ༧༢ ཙམ་བཏང་ཡོད་པར་མ་ཟད། དགོན་པའི་ས་ཆ་ཡང་མངའ་སྡེ་གཞུང་ནས་ཁྲིམས་མཐུན་ཐོག་ཉོས་ཏེ། ས་ཆའི་ཆེ་ཆུང་ལ་ཨེ་ཀར་ ༣༣ དང་མལ་ལེ་ ༡༣ ཡོད། ཅེས་སྙན་སྒྲོན་གནང་བྱུང་།
མཛད་སྒོའི་མཐའ་མར་༸གོང་ས་མཆོག་གིས་བཙན་མ་ཚོར་བླང་དོར་བཀའ་སློབ་བསྩལ་དོན། ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་དགོས་ན་བཤད་སྒྲུབ་གཉིས་ཀྱི་ཐོག་ནས་སྤེལ་དགོས་པ་རེད། དེ་སྔའི་བོད་ནང་དགོན་ཁག་ཚོར་མཚོན་ནའང་། དགོན་པ་རིགས་གཅིག་གིས་ཆོ་ག་ཕྱག་ལེན་ལས་སློབ་གཉེར་དེ་ཙམ་མེད་པ་དེ་འདྲ་ཡོང་གི་ཡོད་ལ། རིགས་གཅིག་གིས་རིས་སུ་མ་ཆད་པའི་ཆོས་སྒར་ཁག་གི་བཤད་གྲྭ་དང་སྒྲུབ་གྲྭའི་ཐོག་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་ཐུབ་མཁན་དེ་འདྲ་ཡོང་གི་ཡོད་སྟབས། ད་ཆ་ང་ཚོ་བཙན་བྱོལ་བ་ཆགས་པའི་སྐབས་སུ་དགོན་པ་རང་རང་གིས་དེ་སྔ་བོད་ཀྱི་འགྲོ་སྟངས་གང་འདྲ་ཡིན་མིན་ལ་མ་ལྟོས་པར། ངོས་རང་གིས་ནམ་རྒྱུན་བོད་པ་ཙམ་མིན་པར་ཧི་མཱ་ལའི་རི་རྒྱུད་ཀྱི་མི་རིགས་ཡིན་ནའང་འདྲ། རྒྱ་མི་དང་ཉི་ཧོང་། ཀོ་རི་ཡ། ཝི་ཐི་ནམ་བཅས་ཀྱི་ཆོས་གྲོགས་ཚོར་དུས་རབས་ཉེར་གཅིག་པའི་ཆོས་པ་ཞིག་བྱ་དགོས་པ་རེད། ཅེས་བཤད་བསྡད་ཡོད། ང་ཚོས་དེང་དུས་ཀྱི་ཤེས་ཡོན་ཡོད་པའི་ཐོག་ནས་འཛམ་གླིང་གི་གནས་ཚུལ་ཚང་མ་ཤེས་མཁན། སངས་རྒྱས་ཀྱི་བསྟན་པའི་གཞི་རྩའི་རྣམ་གཞག་གང་ཡིན་ཤེས་པའི་ཐོག་ལུང་རྟོགས་ཀྱི་བསྟན་པ་བཤད་སྒྲུབ་གཉིས་ཀྱི་ཐོག་ནས་འཛིན་སྐྱོང་སྤེལ་གསུམ་བྱེད་ཐུབ་མཁན་ཞིག་བྱུང་ཚེ། དུས་རབས་ཉེར་གཅིག་པའི་སངས་རྒྱས་པའི་ཆོས་པ་ཞིག་ཆགས་ཀྱི་ཡོད། ང་ཚོ་རྒྱ་གར་དུ་བསླེབས་པའི་རྗེས་སུ་དེ་སྔ་བོད་དུ་དམིགས་བསལ་གྱིས་གཞུང་ཆེན་ལྟ་རྒྱུའི་སྲོལ་མེད་མཁན་ཚོས་ཀྱང་དཔེ་ཆ་ལྟ་དགོས་ཞེས་འབོད་སྐུལ་བྱེད་ཀྱི་ཡོད། ཅེས་དང་།
ཡང་ཁོང་གིས། ལོ་བརྒྱ་ཕྲག་ཁ་ཤས་རིང་བོད་དུ་བཙུན་དགོན་མང་པོ་ཡོད་ཀྱང་། གཞུང་ཆེན་སློབ་རྒྱུའི་སྲོལ་རྒྱ་ཆེན་པོ་མེད་པ་ལྟ་བུ་རེད། ཕྱོགས་གཅིག་ནས་ཕོ་མོ་འདྲ་མཉམ་རེད། ལྷག་པར་དུ་སངས་རྒྱས་བཅོམ་ལྡན་འདས་ཀྱི་ཆོས་བརྒྱུད་ནང་། ཆོས་ལུགས་གཞན་དང་ཕྲན་བུ་མི་འདྲ་བ་ཞིག་གི་བསྟན་པ་འཛིན་མཁན་རབ་བྱུང་གི་སྡེ་དང་། རབ་བྱུང་གི་སྡེའི་ནང་ནས་གཙོ་བོ་དེ་དགེ་སློང་གི་བསླབ་པ་འཐོན་མཁན་དེ་ཆགས་ཡོད། བཅོམ་ལྡན་འདས་ཀྱིས་དགེ་སློང་ཕ་དང་དགེ་སློང་མ་ཞེས་འདྲ་མཉམ་གསུངས་ཡོད། བོད་གངས་ཅན་གྱི་ལྗོངས་ལ་དེ་སྔ་དགེ་སློང་མའི་སྡོམ་རྒྱུན་གཞི་ཐམས་ཅད་ཡོད་པར་སྨྲ་བའི་སྡེ་པའི་ཆོ་ག་དང་མཐུན་པ་ཞིག་ཕལ་ཆེར་བྱུང་མེད། འཁོར་རྣམ་བཞི་ཚང་བའི་གནས་དེ་ཡུལ་དབུས་སུ་རྩི་བཞིན་ཡོད་སྟབས། དགེ་སློང་མ་མེད་དུས་འཁོར་རྣམ་བཞིའི་གཙོ་བོ་གཅིག་མ་ཚང་བ་རེད། ང་ཚོ་འཁོར་རྣམ་བཞི་འདུས་པའི་ཡུལ་དབུས་སུ་འགྱུར་བ་བ་ཞིག་བྱེད་པ་ལ་དགེ་སློང་མ་དགོས་ཀྱི་ཡོད། དགེ་སློང་མ་སྒྲུབ་པར་རྒྱལ་བ་རིན་པོ་ཆེའི་མཚན་བེད་སྤྱོད་བྱས་ཏེ་ཐག་གཅོད་བྱ་ཐབས་མེད། མི་གཅིག་གིས་ཐག་གཅོད་བྱེད་ཐབས་མེད། ཡིན་ནའང་། བཙུན་མའི་ནང་ནས་དགེ་བཤེས་མ་ཐོན་པ་བཟོ་རྒྱུ་དེ་ང་ཚོས་ཐག་གཅོད་ཐུབ་པ་ཞིག་རེད། ཅེས་གསུངས་བྱུང་ལ།
མཐར་ཁོང་གིས་ལུས་ལ་རབ་བྱུང་གི་རྟགས་ཙམ་འཛིན་པ་ལས་བསྟན་པའི་ཞབས་འདྲེན་དུ་མ་སོང་བ་ཞིག་གནང་གལ་ཆེ་སྐོར་གསུངས་དོན། གཙུག་ལག་ཁང་བཞེངས་རྒྱུ་དེ་སློབ་གཉེར་བའི་སྡོད་ས་ཡིན་པ་མ་གཏོགས་སངས་རྒྱས་ཀྱི་བསྟན་པ་རྒྱས་པའི་སྐད་ཆ་མ་རེད། སངས་རྒྱས་ཀྱི་བསྟན་པ་ཞེས་པ་དེ་ནང་ལ་མཛུབ་མོ་འཛུགས་རྒྱུ་རེད་མ་གཏོགས་ཕྱི་ལ་མཛུབ་མོ་འཛུགས་ས་ཞིག་མེད། ནང་ལ་མཛུབ་མོ་འཛུགས་རྒྱུ་དེ་ཡང་ཀླད་པའི་ཆ་ནས་ལུང་གི་ཡོན་ཏན་དང་བསམ་བློའི་ཐོག་ནས་སྒྲུབ་པ་ཉམས་ལེན་བྱས་ཏེ། ལུང་རྟོགས་ཀྱི་ཡོན་ཏན་ཐོག་ནས་བསྟན་པ་འཛིན་སྐྱོང་སྤེལ་གསུམ་གྱི་བྱ་བ་བསྒྲུབ་དགོས་པ་ཞིག་ཡིན་ལ། ལུས་ལ་རབ་ཏུ་བྱུང་བའི་རྟགས་དང་ཆ་ལུགས་བཅངས་བའི་ཕྱིན་ཆད་ལ། ལུས་ངག་ཡིད་གསུམ་གྱི་སྤྱོད་ལམ་དག་ཀྱང་དེ་དང་མཐུན་པར་དང་བ་འདྲེན་པ་ཞིག་དགོས་པ་རེད། ལུས་ལ་རབ་ཏུ་བྱུང་བའི་རྟགས་དང་ཆ་ལུགས་བཅངས་ཀྱང་སྤྱོད་ལམ་དེ་ཐ་མལ་པ་ལྟ་བུར་ལུས་ན། བསྟན་པའི་ཞབས་འདེགས་སུ་མ་ཕྱིན་པར་བསྟན་པར་ཞབས་འདྲེན་བྱས་པ་རེད། ཅེས་གསུངས་བྱུང་།
བཞུགས་སྒར་ཉེ་འགྲམ་དུ་ཡོད་པའི་བཙུན་མའི་འདུས་སྡེ་ཆེན་མོ་ཤུག་གསེབ་ཨོ་རྒྱན་རྫོང་ནི། ཕྱི་ལོ་ ༡༩༩༡ ལོར་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་དང་པོའི་ཚོགས་མི་རྣམས་ཀྱིས་མཐུན་འགྱུར་རོགས་རམ་དང་བཙུན་མའི་ལས་འཆར་གྱི་སྔ་ཕྱིར་བར་གསུམ་གྱི་འབད་བརྩོན་ལ་བརྟེན་ནས་སླར་གསོ་བྱས་པ་ཞིག་ཡིན་ཞིང་། ༢༠༠༤ ལོ་ནས་འདུ་ཁང་དང་དཔེ་མཛོད། ཡིག་ཚང་། སྨན་ཁང་ལེགས་འགྲུབ་བྱུང་ཡོད་པར་མ་ཟད། སློབ་སྦྱོང་གི་མཐུན་རྐྱེན་གྱི་ཕྱོགས་ནས་འཛིན་རིམ་དང་པོ་ནས་བཞི་བའི་བར་དབུ་མ་དང་ལྔ་པ་དྲུག་པའི་བར་ཕར་ཕྱིན། བདུན་པ་ནས་དགུ་བའི་བར་རྒྱུད་སྡེ་གོང་འོག་གི་རྒྱུགས་སྤྲོད་སོགས་ཡོད་འདུག་ལ། དེ་དག་ཐོན་རྗེས་མཐའ་བྲལ་སྨྲ་བའི་དབང་ཕྱུགས་དང་ཕར་ཕྱིན་རབ་འབྱམས་པ། ངེས་གསང་ལེགས་བཤད་མཛོད་འཆང་སོགས་ཀྱི་ཕྱག་འཁྱེར་འབུལ་གྱིན་ཡོད་པ་རེད། བཙུན་དགོན་གསར་འཛུགས་གནང་བ་ནས་ད་ལྟའི་བར་འཛིན་གྲྭ་བཞི་བ་ཐོན་པའི་སློབ་མ་ ༣༠ དང་དྲུག་པ་ ༢༠ ། དགུ་བ་ ༨ དང་པོ་ནས་དགུ་བའི་བར་གྱི་སློབ་ཐོན་པ་ ༣༡ བཅས་བྱུང་ཡོད་ཅིང་། ད་ལྟའི་ཆར་བཙུན་དགོན་འདིར་བཙུན་མ་ ༡༠༨ ལྷག་ཡོད་འདུག
གསར་འགོད་པ། དོན་གོ
བཀྲིས་བདེ་ལེགས་ཡོད་།ཡིན་ན་ཡང་དགོན་པས་བསྟན་པ་སྐྱོང་ཐུབ་ཀྱི་མ་རེད་།།
ཡག་པོ་རེད་ཡིན་ན་ཡང་དགོན་པས་ནང་བསྟན་རྒྱུན་འཛིན་བྱེད་ཐུབ་ཀྱི་མ་རེད་།་བཀྲིས་བདེ་ལེགས་ཡོད་།།
བཀྲ་ཤིས་བདེ་ལེགས་ཡོད། བཙུན་མ་རྣམ་པའི་སྡོམ་པ་དེ་ཡག་སྲུང་ཐུབ་པའི་སྨོན་འདུན་དང་བསྦྲགས། གྲ་པ་ཚོས་ག་དུས་ཡིན་ན་ཡང་བཙུན་མ་ཚོར་ཁ་པར་མ་གཏོངས་རོགས་། ཞེས་འབོད་སྐུལ་ཞུ་བཞིན་ཡོད།
ཤུག་གསེབ་བཙུན་དགོན་ཨོ་རྒྱན་རྫོང་ལེཊ་འགྲུབ་མཛད་སྒོར་བཀྲ་ཤིས་བདེ་ལེགས་དང་། ཁྱེད་ཚང་གི་གཙུག་ལག་ཁང་དེ་ཡང་དོན་དམ་གྱི་དགེ་འདུན་པ་སྡོད་གནས་ཤིག་གི་ངོ་བོར་བཞེང་འདུག་པས་དེ་ཡང་དགའ་འོས་པ་ཞིག་རེད།
ཁྱེད་དུས་བབ་ཚང་གི་གསར་འགྱུར་སྤེལ་ཚད་མགྱོགས་པ་དང་མང་དུ་འགྲོ་བཞིན་པར་ཀློག་པ་པོ་མང་བོའི་ཚབ་བྱས་ཏེ་ཐུགས་རྗེ་ཆེ་ཞུ་འདོད་བྱུང་།