དྲི་བ་རང་ལ་བཏོན་ཏེ་ངོ་རྒོལ་རང་ལ་བྱ་དགོས་པ་རེད།

ཉེ་ཆར་བོད་ནང་གི་སློབ་གྲྭ་མང་པོ་ཞིག་ཏུ་གཅིག་རྗེས་གཉིས་མཐུད་དུ་རྒྱ་གཞུང་ལ་ངོ་རྒོལ་སྐད་འབོད་བྱས་མ་ཐག འདི་ག་དུས་བབ་ལས་ཁུངས་ཀྱིས་བཙན་བྱོལ་ནང་གི་སློབ་གྲྭ་ཁག་ཅིག་གི་སློབ་ཕྲུག་ཚོར་བསམ་ཚུལ་བསྡུ་བཞིན་ཡོད་པ་ལྟར། ཐེངས་འདིར་ནོར་གླིང་དང་ཤེས་རབ་དགའ་ཚལ་སློབ་གླིང་གི་སློབ་མ་སྐོར་ཞིག་ལ་བཅར་འདྲི་ཞུས་ཡོད།

ནོར་གླིང་མཐོ་སློབ་ཀྱི་སློབ་མ་ཀླུ་མོ་མཚོ། 

དྲི་བ། སྐུ་ཉིད་ཀྱིས་བཙན་བྱོལ་བོད་མིའི་སྤྱི་ཚོགས་ནང་བོད་ཡིག་ལ་གོ་གནས་ག་འདྲ་ཞིག་ཡོད་པར་གཟིགས་ཀྱི་ཡོད་དམ།

ལན། བཙན་བྱོལ་གྱི་སློབ་གྲྭ་ཁག་ལ་མཚོན་ན་བོད་ཡིག་ལས་གཞན་པའི་སློབ་ཚན་མང་ཆེ་བ་དབྱིན་ཡིག་ཐོག་འགྲོ་བཞིན་ཡོད་སྟབས། སློབ་མ་མང་ཆེ་བའི་བསམ་བློ་དང་འདུ་ཤེས་འཛིན་སྟངས། བོད་རང་གི་སྐད་ཡིག་ལ་བཅིངས་པའི་བརྩེ་བ་སོགས་བོད་ནང་དང་བསྡུར་ན་ཧ་ཅང་སྐྱོ་བོ་རེད། དེ་བཞིན། བཙན་བྱོལ་གྱི་མང་ཚོགས་དཀྱུས་མ་ཙམ་མ་ཟད། ཤེས་ལྡན་པ་ཕལ་ཆེ་བ་ཡང་འཚོ་ཐབས་ཀྱི་དོན་ལ་གཞོལ་ཆེ་བ་དང་། དགོས་མཁོ་དང་ཁེ་ཕན་ཞིག་གི་ཆེད་དུ་བོད་ཡིག་ལ་འབྲེལ་འདྲིས་ཏོག་ཙམ་རེ་བྱེད་པ་མ་གཏོགས་སོ་སོའི་འཚོ་བ་འགྲིག་ཙམ་བྱུང་མ་ཐག བོད་ཡིག་དང་ཁ་གྱེས་འགྲོ་བའི་སྣང་ཚུལ་ཞིག་ཡོང་གི་འདུག འདི་དང་འདི་ལྟ་བུའི་རྒྱུ་རྐྱེན་མང་པོ་ཞིག་གི་དབང་གིས་བོད་ཕྱི་ནང་གཉིས་བར་ཁྱད་པར་ཆེན་པོ་ཤོར་ཡོད།

དྲི་བ། ནོར་གླིང་མཐོ་སློབ་ཀྱི་དགེ་རྒན་ཚོའི་གནས་ཚད་དང་སློབ་དེབ་བསྒྲིགས་ཕྱོགས། སློབ་ཚན་ཁྲིད་ཐབས་སོགས་ལ་ལྟ་ཚུལ་གང་འདྲ་ཡོད་དམ།

ལན། སྔོན་མ་ངས་མཐོ་སློབ་འདི་ནོར་གླིང་གི་སྡེ་ཚན་བྱེ་བྲག་པ་ཞིག་ཡིན་སྟབས། དགེ་རྒན་སོགས་སློབ་སྦྱོང་གི་མཐུན་རྐྱེན་དེ་ཙམ་ཡག་པོ་ཡོད་ན་བསམ་པའི་དོགས་པ་སྐྱེས་མྱོང་ཡང་། སློབ་གྲྭ་འདིར་དངོས་སུ་འཛུལ་ཞུགས་བྱས་སྐབས། དགེ་རྒན་དང་དཔེ་མཛོད་སོགས་ཕྱོགས་ཡོངས་ནས་ཡག་པོ་ཞེ་དྲག་འདུག་བསམ་སོང་། སོ་སོའི་ངོས་ནས་སྡུག་རུས་བྱ་ཐུབ་པ་ཡིན་ན། ཐོག་མར་དམིགས་ཡུལ་གང་འདྲ་ཞིག་ཡོད་ཀྱང་། དེ་འགྲུབ་ཐུབ་པར་ཐེ་ཚོམ་བྱ་དགོས་པ་མི་འདུག་དྲན་གྱི་འདུག འོན་ཀྱང་། མཐོ་སློབ་འདིར་ཁོར་ཡུག་རང་རྐྱ་བ་ཞིག་མེད་པ་དེ་ཅུང་ཡག་པོ་མི་འདུག  

དྲི་བ། ཁྱེད་རང་བོད་ཡིག་ཆེད་སྦྱོང་གི་མཐོ་རིམ་སློབ་མ་ཞིག་གི་ངོས་ཐད་ནས་རྒྱ་གར་མཐོ་སློབ་ཁག་འགྲིམ་བཞིན་པའི་བོད་པའི་སློབ་ཕྲུག་ཚོར་ལྟ་ལྟངས་ག་འདྲ་ཡོད་དམ།

ལན། སྤྱིར་རྒྱ་གར་མཐོ་སློབ་ནས་མཐར་ཕྱིན་པའི་སློབ་མ་ཚོས་ཤེས་ཡོན་སྣ་མང་ཞིག་སྦྱངས་ཡོད་པའི་ཆ་ནས་རྒྱལ་སྤྱིིའི་འགྲོ་སྟངས་དང་མཐུན་པའི་གནས་སྟངས་གང་མང་ཞིག་ཤེས་ཀྱིན་འདུག་མོད། ཁོང་ཚོའི་སྟེང་གི་སྐྱོན་ཆེ་ཤོས་དེ་གང་རེད་ཟེར་ན། བོད་རང་གི་སྐད་ཡིག་གི་རྨང་གཞི་བརྟན་པོ་མེད་པའི་ཁར། མི་རིགས་ཀྱི་འདུ་ཤེས་ཞན་པ་དང་བོད་པའི་ཉག་ཕྲ་བའི་གནས་བབ་ལ་འགན་འཁྲིའི་བསམ་བློ་མེད་པ་སོགས་རེད། ཞན་ཆ་འདི་དག་གི་དབང་གིས་སློབ་མཐར་ཕྱིན་མཁན་ཚོར་སྒེར་གྱི་འཚོ་བའི་འདུ་ཤེས་ལས་སྤྱི་བའི་བསམ་བློ་མི་འདུག

ནོར་གླིང་མཐོ་སློབ་ཀྱི་སློབ་མ་གཉན་པོ།

དྲི་བ།  དབྱིན་ཡིག་གཙོ་བོ་དང་བོད་ཡིག་ཕལ་བར་འཇོག་པའི་བཙན་བྱོལ་གྱི་སློབ་གསོའི་འགྲོ་སྟངས་འདིར་ལྟ་ཚུལ་གང་འདྲ་ཡོད་དམ།

ལན། ཁྱེད་ཀྱི་དྲི་བ་འདི་དང་འབྲེལ་བའི་ཐོག་ལ་ངས་སྔོན་མ་ནས་བསམ་བློ་མང་པོ་བཏང་མྱོང་ཡོད། ང་རང་བཙན་བྱོལ་ལ་ཐོག་མ་འབྱོར་དུས་ནས་བློ་ཕམ་གྱི་གནས་ཚུལ་མང་པོ་མཐོང་སོང་། འོན་ཀྱང་ཕ་རོལ་བོའི་ངོས་ནས་བཙན་བྱོལ་བ་ཡིན་ཟེར་བ་དང་། མིའི་ལུང་པར་གནས་སྡོད་ཟེར་བ་སོགས་ཀྱི་འགྲེལ་བཤད་སྟབས་བདེ་བོ་རེ་རྒྱག་གི་འདུག རྡོག་རྡོག་བཤད་ན། རང་གི་སྐད་ཡིག་ལ་དུང་ཞེན་མེད་པ་དང་སྐད་ཡིག་གིས་མི་རིགས་སྲུང་སྐྱོབ་ལ་ནུས་པ་ཅི་ཙམ་འཐོན་གྱི་ཡོད་པ་ངོས་མ་ཟིན་པ་རེད། གནས་སྟངས་འདི་རིགས་ཐོག་མར་ང་ཚོ་བཙན་བྱོལ་དུ་འབྱོར་སྐབས། ལས་ཀ་མང་པོ་ཞིག་བོད་ཡིག་ཐོག་བྱ་རྒྱུའི་གཞི་རྟེན་འཛུགས་མ་ཐུབ་པ་དང་། སློབ་གྲྭ་ཁག་ཏུ་མ་ཟད་གཞུང་གི་ལས་དོན་རིགས་ཀྱང་དབྱིན་བེད་སྤྱོད་བྱས་པའི་དབང་གིས་མཇུག་འབྲས་འདི་ལྷག་པ་རེད། གནས་སྟངས་འདིས་མི་རིགས་ཀྱི་འདུ་ཤེས་འཛིན་སྟངས་དང་། སྐད་ཡིག་དང་རིག་གཞུང་སྲུང་སྐྱོབ། མི་རབས་རྗེས་མ་གསོ་སྐྱོང་སོགས་ཕྱོགས་ཡོངས་ལ་ཤུགས་རྐྱེན་ངན་པ་བཞག་ཡོད།

དྲི་བ། བཙན་བྱོལ་ནང་བོད་ཡིག་གི་ཁོར་ཡུག་སྐྱོ་བོ་ཆགས་དགོས་པའི་རྒྱུ་མཚན་གང་ལ་ངོས་འཛིན་བྱེད་ཀྱི་ཡོད་དམ།

ལན། ངས་གོང་དུ་བཤད་པ་ལྟར། ངས་བསམ་ན་རྒྱུ་རྐྱེན་གཙོ་བོ། བཙན་བྱོལ་དུ་ཐོག་མར་འབྱོར་མཁན་ཚོར་བོད་ཡིག་གི་རྨང་གཞི་ཞན་པའི་ཁར་ལས་ཀ་དང་སློབ་སྦྱོང་སོགས་ཀྱི་བརྒྱུད་རིམ་མང་ཆེ་བ་ཡང་གཞན་སྐད་ཐོག་ཕྱིན་འདུག་པ་མ་ཟད། དེ་དག་གི་བུ་ཕྲུག་མང་ཆེ་བ་ཡང་གཞན་སྐད་ཀྱི་སྟེང་ནས་འཚར་ལོངས་བྱུང་སྟེ། བོད་ཡིག་དང་ཁ་ཐག་རིང་ཞིང་གཞན་སྐད་དང་འབྲེལ་འདྲིས་ཟབ་པའི་ཁོར་ཡུག་རྒྱ་ཆེན་པོ་ཞིག་བཟོས་ཡོད་སྟབས། ཕྱིས་སུ་བོད་ནས་བསླེབས་མཁན་མང་པོ་ཞིག་གིས་བོད་ཡིག་དང་བོད་སྐད་གལ་ཆེན་ཡིན་ཚུལ་ག་ཚོད་བཤད་ཀྱང་། དངོས་ཡོད་ལག་ལེན་གྱི་ཐོག་ནས་གཞན་སྐད་ཐོག་མི་འགྲོ་རང་འགྲོ་ཆགས་བསྡད་ཡོད། བོད་ནང་ལ་མཚོན་ན། རྒྱ་སྐད་རྒྱ་ཡིག་གི་ཁོར་ཡུག་ཆེ་བ་དང་ཁེ་ཕན་མང་བ་རང་ཚང་མས་གསལ་བོར་མཁྱེན་གྱི་ཡོད། འོན་ཀྱང་། བོད་རང་གི་སྐད་དང་ཡི་གེར་བཅིངས་པའི་བརྩེ་དུང་ཟབ་མོ་ཞིག་གི་དབང་གིས་ད་བར་རྒྱུན་འཛིན་དར་སྤེལ་བཏང་ཡོད།

དྲི་བ། བཙན་བྱོལ་བོད་པའི་མཐོ་རིམ་སློབ་མ་ཞིག་ལ་མཚོན་ན། ད་ལྟའི་བོད་ཡིག་གི་འུ་ཐུག་པའི་གནས་བབ་འདི་ལ་འགན་འཁྲི་ག་ཚོད་ཆིག་འཁྱེར་དགོས་པར་དགོངས་ཀྱི་ཡོད་དམ།  

ལན། སྤྱིར་མཐོ་རིམ་སློབ་མ་ཙམ་མ་ཡིན་པར་བོད་པ་ཞིག་ཡིན་ཕྱིན་སྐད་ཡིག་སྲུང་སྐྱོབ་ཀྱི་འགན་འཁྲི་ཡོད་པ་རེད། དེ་ཡང་གཙོ་བོ་སྤྱི་ཚོགས་དང་མི་རིགས་ཀྱི་ངོས་དང་རང་ཉིད་ཀྱི་ངོས་ནས་ཇི་ལྟར་ཉམས་རྒུད་དུ་འགྲོ་མིན་དང་། དུས་རབས་དང་མཐུན་པའི་སྐད་ཡིག་གི་སྤྱོད་སྒོ་ཆེ་རུ་ཇི་ལྟར་གཏོང་དགོས་མིན་སོགས་ལ་གཞིགས་ཏེ། རིག་གཞུང་ནང་འདྲེན་བྱ་རྒྱུ་དང་བྱེད་སྒོ་འདྲ་མིན་ཐོག་བོད་ཡིག་བེད་སྤྱོད་གཏོང་རྒྱུ། མི་རིགས་གཞན་པ་ཚོ་བོད་ཡིག་བོད་སྐད་སྟེང་དོ་སྣང་ཡོང་བ་བཟོ་རྒྱུ་སོགས་ལ་འབད་བརྩོན་གནང་དགོས་པ་རེད་དྲན་ཡོད།

དྲི་བ། ཉེ་ཆར་རྒྱ་ནག་གིས་བོད་ཡིག་ཕལ་བར་འཇོག་པའི་སྲིད་ཇུས་དེ་ལ། བོད་ཕྱི་ཕྱོགས་ནས་དུས་ཀྱི་དགོས་མཁོའི་རྒྱབ་རོགས་ག་རེ་མཐོང་གི་འདུག་གམ།   

ལན། ང་ཚོས་བོད་ནང་གི་བོད་མི་ཚོར་རྒྱབ་རོགས་བྱ་འཆར་ཡོད་ན། ང་ཚོས་ངོ་རྒོལ་གྱི་རྣམ་པ་མ་ཡིན་པར་ཁྲིམས་མཐུན་དང་། བདེན་པ་ར་སྤྲད་ཀྱི་ཐོག་ནས་བོད་སྐད་ཡིག་དེ་རྒྱལ་སྤྱིའི་རིག་དངོས་དང་སྐད་ཡིག་སྲུང་སྐྱོབ་ཀྱི་སྡེ་ཚན་ནང་འཇོག་ཐུབ་པར་འབད་བརྩོན་བྱ་དགོས་པ་རེད། གཞན་བོད་ཕྱི་ཕྱོགས་ནས་རྒྱབ་རོགས་གནང་རྒྱུ་ཟེར་བ་དེ་ཅུང་ཁག་ཙམ་རེད། གང་ཡིན་ཞེ་ན། ང་ཚོ་རང་དབང་ལུང་པར་ཡོད་བཞིན་དུ་རང་སྐད་ཕལ་བར་བཞག་སྟེ། གཞན་སྐད་ལ་ཤི་འཐམ་བྱེད་ཀྱི་ཡོད་པའི་བྱ་སྤྱོད་འདིའི་དབང་གིས། མཚམས་ལ་རེར་དྲི་བ་གང་མང་ཞིག་རང་ལ་བཏོན་དགོས་པ་དང་། ཞི་དྲག་གི་ངོ་རྒོལ་རང་ལ་བྱ་དགོས་པའི་གནས་སྟངས་ཀྱང་རེ་འགའ་མཐོང་གི་འདུག       

དྲི་བ། སྤྱིར་བོད་པའི་མཐོ་རིམ་སློབ་མ་ཞིག་གི་འགན་འཁྲི་གཙོ་བོ་གང་ཡིན་པ་དང་། བསམ་བློའི་ཁྱེར་སོ་གང་འདྲ་ཞིག་ཡོད་དགོས་པར་འདོད་ཀྱི་ཡོད་དམ།

ལན། མི་ཞིག་ལ་མཚོན་ན་བསམ་བློ་གལ་ཆེན་པོ་རེད། དེ་ཡང་གཙོ་བོ་སློབ་གྲྭའི་སློབ་མའི་ངོས་ནས་བཟུང་སྟེ་བསམ་བློ་འཛུགས་སྐྲུན་གྱི་རྨང་གཞི་འདིང་གི་ཡོད་ལ། ཚད་གཞི་མཐོན་པོར་བསླེབ་རྒྱུའི་གོ་སྐབས་དེ་མཐོ་རིམ་སློབ་གྲྭ་ཆགས་ཡོད། སློབ་ཆེན་པ་ཞིག་ལ་མཚོན་ན། གཙོ་བོ་མི་རིགས་ཀྱི་ལ་ཞེན་དང་སྤྱི་ཚོགས་ལ་འགན་འཁུར་གྱི་འདུ་ཤེས་ཡོད་པའི་ཐོག་ནས། དྲང་བདེན་ལ་ཕྱོགས་པའི་སྤོབས་པ་དང་སྙིང་སྟོབས། ཚུགས་ཐུབ་ཀྱི་བསམ་བློ་དང་གཞན་དྲིང་མི་འཇོག་པའི་ཤེས་ཡོན་ཞིག་ཡོད་དགོས་པ་དེ་གཙོ་བོ་རེད་བསམ་གྱི་ཡོད།

ཤེས་རབ་དགའ་ཚལ་སློབ་གླིང་གི་སློབ་མ་བདེ་སྐྱིད་སྒྲོལ་མ།

དྲི་བ།  བོད་ཕྱི་ནང་གཉིས་ཀྱི་བུད་མེད་ལ་ཁྱད་པར་གང་འདྲ་ཞིག་མཐོང་བྱུང་ངམ། 

ལན། སྤྱིར་ང་ལ་ཆ་རྒྱུས་དེ་ཙམ་མེད་ཀྱང་། གཞིས་བྱེས་གཉིས་ཀྱི་བུད་མེད་ཚོའི་བར་གྱོན་གོས་དང་སྤྱོད་པ་སོགས་ཕྱོགས་མང་པོ་ཞིག་ལ་ཁྱད་པར་འདུག བཙན་བྱོལ་ནང་གི་བུད་མེད་ཚོར་མཚོན་ན་རྩ་བའི་ཆ་ནས་ཤེས་ཡོན་གང་འཚམ་ཡོད་པ་རྐྱང་རྐྱང་རེད། དེ་བཞིན་ཕྱི་ཚུལ་གྱི་སྤྱོད་ལམ་ཡང་འདྲ་ཆགས་པོ་འདྲ་ཞིག་འདུག་མོད། བྱེད་སྟངས་སྤྱོད་སྟངས་ཁ་ཤས་བོད་རང་གི་ལུགས་སྲོལ་དང་མ་འདྲ་བ་ཞིག་ཏུ་མཐོང་སོང་། དེ་བཞིན། ཕ་མ་ལ་བརྩེ་བ་མེད་པ་དང་རྒན་གཞོན་ལ་ཁྱད་པར་མེད་པའི་བྱ་སྤྱོད་ཤུགས་ཆེན་པོ་རེད། བོད་ནང་ལ་མཚོན་ན་བུད་མེད་ནང་ཤེས་ཡོན་ཅན་མང་པོ་མེད་ཀྱང་། ཆེ་བཀུར་ཆུང་བྱམས་དང་ཡ་རབས་སྤྱོད་བཟང་གི་རྒྱུན་སྲོལ་ཡག་པོ་ཞིག་ཡོད་པ་རེད།

དྲི་བ། ཁྱེད་ཀྱིས་བསམ་ན་བུད་མེད་སྐྱབས་བཅོལ་བ་ཞིག་ལ་འཕྲད་ཀྱིན་པའི་དཀའ་ངལ་ཆེ་ཤོས་གང་རེད་དམ།   

ལན། ང་ཚོའི་སློབ་གྲྭར་མཚོན་ན། བུ་མོ་མང་ཆེ་བར་སློབ་སྦྱོང་དང་འཕྲོད་བསྟེན་ཐོག་དཀའ་ངལ་ཏོག་ཙམ་འཕྲད་ཀྱི་འདུག དེ་བཞིན། སྔོན་མ་སློབ་གྲྭ་འདི་ནས་ཐོན་པའི་བུ་མོ་མང་པོ་ཞིག་ལ་ཕྱི་ལོགས་ན་གཉེན་ཉེ་སོགས་གཅིག་ཀྱང་མེད་པའི་དཀའ་ངལ་འོག་བཙུན་མ་བྱ་དགོས་བྱུང་མཁན་མི་ཉུང་བ་ཞིག་ཡོད་ས་རེད། དེ་བཞིན། རྒྱ་གར་དང་བོད་པའི་ཟ་ཁང་དང་ཚོང་ཁང་། མགྲོན་ཁང་སོགས་སུ་ལས་ཀ་བྱེད་བཞིན་པ་ཡང་མང་པོ་ཞིག་འདུག ཁོང་ཚོས་སྐད་མ་ཤེས་པ་དང་འགྲོ་སྟངས་མ་ཤེས་པ་སོགས་ཀྱི་དབང་གིས་གཞན་གྱི་བརྙས་བཅོས་འཁུར་དགོས་པ་ཡང་མང་པོ་ཡོང་གི་ཡོད་པ་ཐོས་སོང་། དེ་ལས་མང་བ་ཞིག་ལས་མེད་དུ་ལྷག་བསྡད་ཡོད་པ་རེད། བུད་མེད་ཅིག་ལ་མཚོན་ན། མིའི་ལུང་པར་འཁྱམས་ཏེ་སྐྱབས་བཅོལ་བྱི་འཚོ་བ་རོལ་རྒྱུར་ཧ་ཅང་དཀའ་ཁག་ཆེན་པོ་འདུག ཕྱོགས་མང་པོ་ཞིག་ནས་སྟབས་བདེ་བོ་མི་འདུག

དྲི་བ། ཁྱེད་ཀྱིས་བོད་དབྱིན་གཉིས་ལས་གང་ཞིག་གལ་ཆེན་དུ་མཐོང་གི་ཡོད་དམ།

ལན།  བོད་ཡིག་གལ་ཆེན་དུ་མཐོང་གི་ཡོད། བོད་ཡིག་དེ་ང་ཚོ་རང་གི་ཕ་མེས་ཀྱི་སྐད་ཡིག་རེད། ང་ལ་མཚོན་ན། དེ་སྔ་བོད་ནང་ནས་བོད་ཀྱི་རྒྱལ་རབས་ལོ་རྒྱུས་དང་བོད་ཀྱི་གནས་སྟངས་མང་པོ་ཞིག་ཤེས་ཀྱི་མེད། འདིར་ཡོང་རྗེས་བོད་ཡིག་གི་ལམ་ནས་གནས་ཚུལ་གང་འཚམ་ཤེས་སོང་། ད་ལྟའི་ཆར་ཡང་བོད་ཡིག་གཙོ་བོར་བཟུང་སྟེ་སློབ་སྦྱོང་བྱེད་ཀྱི་ཡོད། སློབ་གྲྭ་འདི་ནས་ཐོན་རྗེས་ས་རཱ་མཐོ་སློབ་ཏུ་ཞུགས་ཏེ། མུ་མཐུད་བོད་ཡིག་ཐོག་ཤུགས་རྒྱག་དགོས་བསམ་ཡོད།

དྲི་བ། ཁྱེད་རང་གིས་བོད་ཡིག་གི་དགོས་པ་རྒྱུ་མཚན་གཙོ་བོ་ག་ལ་གཟིགས་ཀྱི་ཡོད་དམ།

ལན། ང་རང་བལ་ཡུལ་སྣེ་ལེན་ཁང་ནས་ཆོལ་ཁ་གསུམ་གྱི་མི་མང་པོ་ཞིག་ངོ་ཤེས་སོང་། སྐབས་དེ་དག་ཏུ་ང་ཚོ་ཚང་མར་ལུང་སྐད་མི་འདྲ་བ་རེ་ཡོད་པ་དང་། ཕན་ཚུན་གྱི་སྐད་གོ་བརྡ་མི་འཕྲོད་པ། ལུང་པ་སོ་སོར་ཆ་ལུགས་གོམ་སྲོལ་ཡང་མ་འདྲ་བ་རེ་ཡོད་པ་རེད། དེའི་དབང་གིས་བོད་རིགས་གཅིག་པ་ཡིན་ཡང་དུམ་བུ་མང་པོ་ཆགས་ཡོད། སྐད་ཡིག་གཅིག་འགྱུར་འདིའི་འོག་ཏུ་ང་ཚོ་བོད་ཆོལ་ཁ་གསུམ་གཅིག་སྒྲིལ་བཟོ་བཞིན་ཡོད། དེར་བརྟེན། ང་རང་གིས་བོད་ཡིག་ཟེར་བ་དེ་བོད་རིགས་ཡོངས་ཀྱི་འབྲེལ་ཐག་ལྟ་བུ་ཞིག་ཏུ་མཐོང་གི་ཡོད།

དྲི་བ། ཤེས་རབ་དགའ་ཚལ་སློབ་གླིང་གི་སློབ་མ་བརྩོན་འགྲུས།

དྲི་བ། ཁྱེད་རང་ཕ་ཡུལ་ནས་སློབ་གྲྭར་འགྲོ་མྱོང་ཡོད་མེད་དང་རྒྱ་གར་ལ་སྐྱབས་བཅོལ་དུ་ཡོང་དགོས་པའི་རྒྱུ་མཚན་གང་ཡིན་ནམ།

ལན། ང་རང་ཕ་ཡུལ་ནས་སློབ་གྲྭར་དམའ་འབྲིང་དང་པོའི་བར་སོང་རྗེས་བླ་བྲང་དགོན་པར་ཕྱིན་སྟེ་སློབ་གཉེར་གང་བྱས་པ་ཡིན། སྐྱབས་བཅོལ་དུ་ཡོང་དོན་གཙོ་བོ། ང་ཚོ་མི་ཁ་ཤས་ཀྱིས་སྣེ་ཁྲིད་དེ་ ༢༠༠༨ ལོར་རྒྱ་གཞུང་ལ་ངོ་རྒོལ་བྱས་སྟབས། རྒྱ་གཞུང་གིས་སུན་གཙེར་དང་འཇིགས་སྣང་ཡང་ཡང་བྱས་ཏེ། དུས་ཚོད་གང་འཚམ་རིང་ཁྱིམ་ནས་འདུག་མ་ཐུབ་པར་ས་གནས་གཞན་དང་རི་སྒང་སོགས་ནས་བསྡད་པ་ཡིན། འོན་ཀྱང་ཉི་མ་གཅིག་གཉིས་དང་ཟླ་བ་རེ་ཟུང་མིན་སྟབས། མཐར་ཕྱོགས་མང་པོ་ཞིག་ནས་སྡོད་མ་ཐུབ་པར་རྒྱ་གར་ལ་ཡོང་དགོས་བྱུང་སོང་།     

དྲི་བ། སློབ་གྲྭ་འདིར་འབྱོར་རྗེས་ཁྱེད་ལ་ཚོར་སྣང་གང་འདྲ་བྱུང་སོང་ངམ།  

ལན། ང་ཚོ་སྤྱི་ཚོགས་གཞན་དང་རྒྱལ་ཁབ་གཞན་དུ་ཡོད་པའི་དབང་གིས་དཀའ་ངལ་མང་པོ་ཞིག་ཡོད་སྲིད་ཀྱང་། བལ་ཡུལ་སྣེ་ལེན་ཁང་དུ་འབྱོར་མ་ཐག་ཕྱི་ཕྱོགས་སུ་ཡོད་པའི་བོད་པ་ཚོས་བོད་སྐད་བོད་ཡིག་ལ་བརྩི་བཀུར་མེད་པའི་ཚོར་སྣང་ཞིག་བྱུང་སོང་། ལྷག་པར་དུ་སློབ་གྲྭ་འདིར་སློབ་མ་མང་པོ་ཞིག་གིས་དབྱིན་ཡིག་ཁོ་ནར་ཤུགས་རྒྱག་གི་འདུག མི་ཁ་ཤས་ཀྱིས་བོད་ཡིག་སྦྱངས་ནས་རྒྱུ་མཚན་མི་འདུག བོད་ཡིག་ལ་ལམ་ཁ་ཡོད་པ་མ་རེད་ཟེར་མཁན་ཡང་འདུག འདི་རིགས་ཐོས་སྐབས་བློ་ཕམ་ཡོང་གི་འདུག སྤྱིར་བོད་ནས་སློབ་སྦྱོང་གི་གོ་སྐབས་རག་མེད་མཁན་ཚོར་མཚོན་ན། སློབ་གྲྭ་འདི་ཧ་ཅང་དགོས་མཁོ་ཆེན་པོ་རེད་དྲན་ཡོད།   

 དྲི་བ། ཤེས་རབ་དགའ་ཚལ་སློབ་གླིང་དུ་སློབ་ཕྲུག་ཚོར་དཀའ་ངལ་འདྲ་འདུག་གམ།

ལན། སློབ་གྲྭ་འདི་ཐོག་མར་བོད་གཞིས་བྱེས་བར་འབྲེལ་མཐུད་ཀྱི་ཟམ་པ་ལྟ་བུའི་དགོས་མཁོའི་འོག་བཙུགས་པ་ཞིག་ཡིན་ཚོད་རེད། ཡིན་ནའང་། ད་ལྟའི་ཆར་སློབ་མ་མང་ཆེ་བར་ཕྱིར་བོད་ནང་ལོག་རྒྱུའི་དམིགས་ཡུལ་མེད་སྟབས། བཙན་བྱོལ་སྤྱི་ཚོགས་ནང་ལས་ཀ་མི་རག་པ་དང་སློབ་གྲྭ་གཞན་ལྟར་འདྲ་མཉམ་གྱི་ཐོབ་ཐང་མེད་པ་སོགས་ཀྱི་དབང་གིས་སློབ་མ་མང་པོ་ཞིག་གི་སེམས་སུ་དཀའ་ངལ་འཕྲད་ཀྱི་འདུག་ལ། དེ་བཞིན། དགེ་རྒན་མང་ཆེ་བ་བཙན་བྱོལ་ནང་འཚར་ལོངས་བྱུང་མཁན་ཡིན་སྟབས། བོད་རང་གི་སྐད་དང་ཐ་སྙད་ཀྱིས་མ་འདང་བར་དགེ་སློབ་ཕན་ཚུན་བར་གོ་བརྡ་མ་འཕྲོད་པའི་གནས་སྟངས་ཀྱང་ཡོང་གི་འདུག དེ་མིན་དཔེ་མཛོད་དང་མཐུན་རྐྱེན་གཞན་པའི་ཐོག་ནས་བཙན་བྱོལ་བ་ཞིག་གི་ངོས་ནས་ཡག་པོ་ཞེ་དྲག་འདུག་བསམ་གྱི་ཡོད།

གསར་འགོད་པ། དོན་གོ