ཟླ་འདིའི་ཕྱི་ཚེས་ ༧ ཉིན་དགོང་མོར་རྒྱ་གར་གྱི་ཨེན་ཊི་ཊེ་ཝེ་ NDTV བརྙན་འཕྲིན་ཁང་དང་ཊོ་ཧ་ཌོར་ཚོང་འབྲེལ་ཚོགས་པ་གཉིས་ཀྱི་གོ་སྒྲིག་འོག ལྡི་ལིར་ཡོད་པའི་ཊ་ཇི་ཕ་ལེ་སི་ཞེས་པའི་གསོལ་མགྲོན་ཁང་གི་ཚོགས་ཁང་དུ་རྒྱ་གར་རྒྱལ་ཡོངས་ཀྱི་ greeting india national environmant award ཞེས་པའི་གཟེངས་རྟགས་འབུལ་བཞེས་ཀྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་རྒྱ་གར་གྱི་སྲིད་འཛིན་ལྩམ་ཤི་རེ་མ་ཏེ་པེ་ཏེ་པ་རྡལ་ Shrimati PratBha Patel མཆོག་གཙོས། གནད་ཡོད་མི་སྣ་ཆེད་ཕེབས་ཀྱིས་རྒྱལ་ཡོངས་ཁོར་ཡུག་སྲུང་སྐྱོབ་ཀྱི་གཟེངས་རྟགས་ green hero ཞེས་པའི་གཟེངས་རྟགས་དེ་འབྲུག་པ་བཀའ་རྒྱུད་ཀྱི་བླ་ཆེན་འབྲུག་ཆེན་རིན་པོ་ཆེ་མཆོག་ལ་ཕུལ་ཡོད་པ་རེད། ཉེ་ཆར་འབྲུག་ཆེན་རིན་པོ་ཆེ་མཆོག་གིས་སྣེ་ཁྲིད་དེ། དགེ་འདུན་པ་དང་སེར་སྐྱ་ ༤༠༠ ལྷག་དང་མཉམ་དུ་གནས་གཟིགས་དང་ཁོར་ཡུག་སྲུང་སྐྱོབ་ཆེད་སྒང་ཏོག་དང་རྡོ་རྗེ་གླིང་སོགས་ས་ཁུལ་ཁག་ཅིག་ནང་ཕེབས་ཟིན་པའི་དབང་གིས་གཟེངས་རྟགས་འབུལ་བཞེས་ཀྱི་མཛད་སྒོའི་སྟེང་དངོས་སུ་ཕེབས་ཐུབ་མེད་ཀྱང་། ཐེངས་འདིའི་གཟེངས་རྟགས་དེ་འབྲུག་ཐུགས་གཤིས་རིན་པོ་ཆེ་མཆོག་ཆེད་ཕེབས་ཀྱིས་གཟེངས་རྟགས་འབུལ་བཞེས་གནང་ཡོད་པ་རེད།
གསར་འགོད་པ། དོན་གོ
