རང་གི་སྣ་ཐག་རང་མགོར་དཀྲིས། – རྣམ་རྒྱལ་འཕྲིན་ལས།

ལྷོ་ཕྱོགས་འབྲས་སྤུངས་བློ་གླིང་། ཉང་པོ་སྐྱོར་དཔོན་དགེ་བཤེས་རྣམ་རྒྱལ་འཕྲིན་ལས།

དེང་སྐབས་རང་རེའི་སྤྱི་ཚོགས་ནང་སྐབས་གསུམ་པའི་བཀའ་བློན་ཁྲི་པ་དང་། སྐབས་བཅོ་ལྔ་པའི་བོད་མི་དམངས་སྤྱི་འཐུས་ཀྱི་སྔོན་འགྲོའི་འོས་བསྡུ་ཟིན་ཏེ་དངོས་གཞིའི་འོས་བསྡུ་སླེབས་ལ་ཉེ། བཀའ་བློན་ཁྲི་པ་ནི་སྔར་དང་མི་འདྲ་བར་ཡར་རྒྱས་ཀྱི་རྣམ་པས་འགྲོ་གླེང་རིམ་པ་མང་པོ་གནང་ཐུབ་ཡོད་སྟབས། མི་དམངས་ཀྱི་འདོད་དོན་ལེགས་གྲུབ་ཡོང་རྒྱུར་ཐེ་ཚོམ་མེད། དེ་ཡང་རང་གི་སྣ་ཐག་དེ་སྒྱུ་མ་མཁན་གཞན་གྱི་ལག་པར་སྤྲད་ནས་འོས་བླུགས་པ་ཡིན་ན། རང་དང་སྤྱི་གཉིས་ཀ་ལ་ཧ་ལས་པའི་གྱོང་གུན་ཆགས་ཀྱི་རེད། དེས་ན་བོད་མི་ཤེས་ཡོན་དང་སྤྱི་སེམས་གཉིས་ཀ་ཡོད་པ། བོད་གཞུང་གི་རྩ་དོན་ཁས་ལེན་ཅིང་རྒྱལ་བ་ཡིན་བཞིན་ནོར་བུས་ཅི་གསུང་བཀའ་བཞིན་སྒྲུབ་མཁན་ཞིག་ལ་རང་གི་ཐག་བཅད་ནས་འོས་ཤོག་བླུགས་ཏེ། ང་རང་ཚོ་བོད་འབངས་ཀྱི་གདུལ་བྱའི་ངོས་ནས་མ་འཕྱུག་པ་ཞིག་ངེས་པར་དུ་བྱ་དགོས།

རྒྱལ་བ་རིན་པོ་ཆེ་སྐུ་རབས་རིམ་བྱོན་དང་ལྷག་པར་དུ་རྒྱལ་བ་སྐུ་ཕྲེང་བཅུ་བཞི་པ་ཆེན་པོ་འདི་ཡིས་དགུང་ལོ་ ༡༦ ནས་བོད་ཀྱི་གནས་ཚུལ་ཤིན་ཏུ་གཉན་འཕྲང་ཅན་དང་ཕྱི་ནང་སུ་གང་གི་ལག་པ་འཆང་མཁན་མེད་པའི་དུས་དེར་སྐུ་ངལ་གང་འདྲ་ཞིག་སྐྱོན་ཡོད་མེད། ངོས་ཀྱི་ཡུལ་དང་ངོས་ཀྱི་མི་དམངས་ཞེས་པའི་མཛད་རྣམ་ལ་གཟིགས་དང་གསལ་པོ་མཁྱེན་གྱི་རེད། དེ་ལྟ་བུའི་བཀའ་དྲིན་བསམ་ཤེས་དང་ལས་འབྲས་དཔང་པོར་བཞག་ནས་བཀའ་བཞིན་སྒྲུབ་པའི་མཆོད་པས་མཉེས་པར་བྱེད་རྒྱུ་དེ་ང་རང་ཚོར་ལེགས་ཚོགས་ཐམས་ཅད་འབྱུང་བའི་སྲོག་རྩ་ལྟ་བུ་ཤིན་ཏུ་གལ་ཆེན་ཞིག་ཡིན་པ་དེ་ཚང་མས་མཁྱེན་དགོས། ད་ལྟའི་སྐབས་སུ་ཡང་རང་ཡུལ་མི་རིགས་རིག་གཞུང་དང་བཅས་པ་ཆག་འཇིག་གི་འགག་རྩ་འདི་ལྟ་བུའི་དུས་ལ་ཡང་གང་དགའ་ཅི་ལེགས་ཀྱི་དགོངས་བཞེས་མཐའ་ཡས་པ་ཞིག་གནང་བའི་སྙིང་པོར་གཉིས་སྨན་དབུ་མའི་ལམ་ཞིག་གི་ཐོག་ནས་གདམ་བྱ་རང་སྲིད་རང་སྐྱོང་གི་ཐོབ་ཐང་མིང་དོན་མཚུངས་པ་ཞིག་ལས་ལྷག་མེད་པ་དེ། དུས་ཡུན་རིང་པོའི་གོང་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་གསལ་པོར་གཟིགས་ཡོད་རེད།

འོ་ན་ ༡༩༧༤  ལོའི་བར་༸གོང་ས་མཆོག་ནས་རང་བཙན་ཁོ་ན་མ་གཏོགས་གཞན་མ་གསུང་པ་གང་ཡིན་ནམ་ཞེ་ན་། དེ་ནི་གདུལ་བྱའི་དབང་གི་རེད། ༡༩༧༤ ལོར་སྐབས་སུ་བབ་མཚམས་གཉིས་སྨན་དབུ་མའི་ལམ་གྱི་དགོངས་འཆར་ལམ་སྟོན་མཛད་པ་རེད། དེ་ཡང་༸གོང་ས་མཆོག་ནས་བཀའ་རལ་གྲི་གནམ་གཡུག་ལྟ་བུ་མ་ཡིན་པར་རང་དབང་མང་གཙོའི་ལམ་ལུགས་དང་མཐུན་པར་བོད་མི་མང་ཀྱི་སྐུ་ཚབ་མཚོན་ནུས་པའི་བགྲོ་གླེང་ཚོགས་ཆེན་སྔ་ཕྱི་རིམ་པ་གསུམ་དང་། བོད་མི་མང་སྤྱི་འཐུས་ལྷན་ཚོགས་བཅས་ནས་མང་མོས་ཀྱི་རྒྱབ་སྐྱོར་ཆ་ཚང་ཐོབ་ནས་དབུ་མའི་ལམ་དེ་བོད་གཞུང་གི་ལྟ་གྲུབ་བམ་རྩ་བའི་སྲིད་བྱུས་སུ་གྱུར་པ་རེད། དེར་བརྟེན། བོད་སྤྱི་དོན་ཐོག་ཧ་ལས་པའི་གྲུབ་འབྲས་ཐོན་དང་འཐོན་བཞིན་པ་ནི། དཔེར་ན་འཛམ་གླིང་ནང་ལྷོ་བྱང་ཨ་རི་དང་། ཡུ་རོབ། ཨེ་ཤེ་ཡ་སོགས་ཡུལ་གྲུ་མང་པོ་ནས་གཞུང་དང་གྲོས་ཚོགས་དེ་མིན་གྱི་ཚོགས་པ་མེ་སྒེར་བཅས་ནས་རྒྱབ་སྐྱོར་གང་འདྲ་འཐོབ་བཞིན་འདུག་པ་ཚང་མས་མཐོང་ཆོས་སུ་ཡོད་པ་དང་། དེ་བཞིན་རྒྱལ་ཁབ་སོ་སོའི་སྲིད་བཛིན་དང་སྲིད་བློན་སོགས་གནད་ཡོད་མི་སྣ་མང་པོས་རྒྱ་མིའི་གནོན་ཤུགས་དང་སོ་སོའི་ཚོང་གི་ཁེ་ཕན་སོགས་བློས་བཏང་སྟེ། ༸གོང་ས་མཆོག་དང་མཇལ་འཕྲད་ཞུ་བཞིན་པ་དང་། དེ་བཞིན་ནོ་བྷེལ་འཛམ་གླིང་ཞི་བདེ་གཟེངས་རྟགས་དང་། ཨ་རིའི་གསེར་གྱི་གཟེངས་རྟགས་སོགས་འཛམ་གླིང་ནང་གི་གཟེངས་རྟགས་གྲངས་ཀྱི་མི་ལང་པ་འབུལ་དང་འབུལ་བཞིན་པ་འདི་དག་དབུ་མའི་ལམ་གྱི་གྲུབ་འབྲས་ལས་གཞན་གང་ཡིན།

འཛམ་གླིང་ནང་ཡུལ་གྲུ་གང་ས་ནས་རྒྱ་རིགས་སློབ་དཔོན་དང་མཁས་དབང་རྩོམ་པ་པོ་སོགས་སྟོང་ཕྲག་ལྷག་ནས་རྒྱ་ཡིག་ཐོག་བོད་ཀྱི་བདེན་དོན་ཆེད་རྒྱབ་སྐྱོར་གྱི་རྩོམ་ཡིག་བྲིས་པ་མཐོང་རྒྱུ་ཡོད་པ་དང་།  དེ་ལས་ཧ་ལས་པ་རྒྱ་ནག་སྐམ་ས་ཆེན་པོ་ནས་ཀྱང་མཁས་དབང་དང་རྩོམ་པ་པོ་སོགས་མི་གྲངས་ ༣༠༠ ཙམ་ནས་རང་གི་ལས་གནས་དང་སྲོག་གི་ཉེན་ཁ་སོགས་གང་ལ་མ་ལྟོས་པར་བོད་ཀྱི་བདེན་དོན་ཆེད་ཡི་གེ་བྲིས་ནས་རྒྱབ་སྐྱོར་བྱེད་པ་དང་། དེའི་ནང་ནས་ ༢༠༠༨ ཀྱི་རྩ་འཛིན་ཡིག་ཆ་ཞེས་པ་འབྲི་མཁན་མཁས་དབང་ལིག་ཞོ་པོ་ཁོང་ལྟའང་བཙོན་ཁང་ནང་དམར་པོའི་སྡུག་སྦྱོང་མྱོང་བཞིན་གནས་ཡོད། གཉིས་སྨན་དབུ་མའི་ལམ་གྱི་གྲུབ་འབྲས་ཆེ་ཤོས་ནི་ང་ཚོ་བོད་མི་ཡོངས་ཀྱི་མངོན་འདོད་གང་ཡོད་པ་དེ་ཡིག་ཐོག་ཏུ་བྲིས་ཏེ། རྒྱ་གཞུང་ལ་སྤྲད་ཐུབ་པ་དེ་ནི་གྲུབ་འབྲས་ཆེན་པོ་ཡིན་པར་ངོས་འཛིན་བྱེད་བཞིན་ཡོད། འོ་ན་ཡིག་ཆ་དེ་སྤྲད་ནས་གྲུབ་འབྲས་གང་ཡང་ཐོན་མ་སོང་ཞེས་ན། བོད་དང་རྒྱ་ནག་དམར་གཞུང་བར་གྱི་རྩོད་པ་དེ་རྒྱལ་ཁབ་གཉིས་བར་གྱི་འཐབ་རྩོད་དེ་གཞི་རྒྱ་ཆུང་ཆུང་ཞིག་དང་ལས་སླ་བོར་སེལ་ཐུབ་པ་ཞིག་མིན།

ཐག་རིང་ས་ནས་ཨི་སི་རལ་དང་པི་ལི་སི་ཐན་ལྟ་བུ་དང་། ཐག་ཉེས་ས་ནས་རྒྱ་གར་དང་པ་ཀི་སི་ཐན་ལྟ་བུ། ཡང་ན་རྒྱ་གར་དང་རྒྱ་ནག་ལྟ་བུའི་བར་རྙོག་རྙོག་ལྷག་སྟེ་མི་ལོ་མང་པོ་ཕྱིན་ཡོད་ལ་གྲོས་མོལ་སྔ་ཕྱི་ཐེངས་མང་བྱས་ཡོད་ཀྱང་། གྲུབ་འབྲས་འདི་ཐོན་ཡོད་ཟེར་ན་བགྲང་ཆོག་ཆོག་ཅིག་སུ་ལ་ཡང་མེད། ང་ཚོ་ལ་བདེན་པ་གཅིག་པུ་དེའི་ཐོག་རྒྱ་ནག་ལ་ལོ་རེ་ནས་ལོ་རེར་ཆབ་སྲིད་ཀྱི་འགྱུར་བ་ཆེན་པོ་འགྲོ་བཞིན་པ་ལྟར། ཉིན་ཞིག་བདེན་པ་ལ་དགའ་བའི་རྒྱ་ནག་མི་དམངས་ཀྱིས་གཉིས་སྨན་དབུ་མའི་ལམ་ལ་རྒྱབ་སྐྱོར་གྱིས་ང་ཚོར་རྒྱལ་ཁ་ཐོབ་རྒྱུར་ཐེ་ཚོམ་མེད། གང་ཞེ་ན། ད་ལྟའི་གནས་སྐབས་སུ་རྒྱ་ནག་སྲིད་དབང་གཅིག་བསྡུས་ལམ་ལུགས་བཙན་པོ་འདི་འདྲ་ཞིག་གི་འོག་ནས་གཉིས་སྨན་དབུ་མའི་ལམ་ལ་རྒྱབ་སྐྱོར་བྱེད་མཁན་ཅི་ཙམ་ཡོད་མེད་འདིས་ང་ཚོས་སྤོབས་པ་ཆེན་པོས་ཚོད་དཔག་བྱས་ཆོག

༸གོང་ས་མཆོག་གིས་ལམ་སྟོན་དགོངས་འཆར་དེ་དག་དང་པོ་ཉིད་ནས་རྣམ་པ་ཐམས་ཅད་མཁྱེན་པའི་ཨེ་ཤེས་ཀྱི་གཟིགས་པའི་རྒྱུ་མཚན་ཅུང་ཟད་བྲིས་ན་ ༡༩༦༠ ལོར་བཀའ་རྩོམ་མཛད་པའི་བདེན་གསོལ་སྨོན་ཚིག་ལས། ༼ ཡོངས་རྫོགས་བོད་ལྗོངས་རང་དབང་གཙང་མའི་དཔལ།༽ ཞེས་པ་དང་། དེའི་རྗེས་ ༡༩༦༢ ལ་བཀའ་རྩོམ་གནས་ཆུང་འཕྲིན་བཀུལ་ལས། ༼ ཆོས་སྲིད་རང་དབང་དགའ་སྟོན་སྒྲུུབས་ཤིག་ཀྱེ། ༽ གསུངས་པ། ༡༩༧༣ ལོར་བཀའ་རྩོམ་མཛད་པའི་བོད་སྐྱོང་ལྷ་སྲུང་འཕྲིན་བསྐུལ་ལས། ༼ ཆོས་སྲིད་རང་དབང་གཙང་མའི་སྣང་བའི་དཔལ། ༽ ཞེས་གསུངས་པ། ༢༠༠༥ ལོར་བཀའ་རྩོམ་སྨོན་ཚིག་བདེན་པའི་རྔ་སྒྲ་ལས། ༼ ཆོས་སྲིད་རང་དབང་བདེ་སྐྱིད་གསར་པ་ཡི། ༽ ཞེས་གསུང་པ་ཚང་མར་རྗེ་ས་སྐྱ་ས་པན་གྱིས། དངོས་མིང་བརྗོད་ན་སྡེབ་སྦྱོར་ཉམས། ཞེས་གསུངས་པ་ལྟར་རང་དབང་དང་རང་བཙན་གང་གསུངས་ཀྱང་། སྡེབ་སྦྱོར་ཉམས་པའི་སྐྱོན་གཏན་ནས་མེད་ཀྱང་རང་དབང་གི་ཐུགས་སྨོན་ཁོ་ན་མཛད་པ་ལས་རང་བཙན་གསུངས་པ་ཚིག་གཅིག་ཀྱང་མེད་པ་དེས་གསལ་པོ་མཁྱེན་ངེས་རེད།

ཡང་མི་འགའ་ཤས་ནས་དབུ་མའི་ལམ་དེ་གཞིས་ལུས་བོད་རྒྱ་ཆེའི་མི་མང་གི་མངོན་འདོད་དང་འགལ་གྱི་འདུག་ཟེར་ན། གཞིས་ལུས་རྒྱ་ཆེའི་མི་དམངས་མང་ཆེ་བ་དམར་པོའི་བཙན་དབང་འོག་རང་བཙན་དང་དབུ་མའི་ལམ་གྱི་གནས་ཚུལ་གསལ་པོ་གང་ཡང་ཤེས་ཐུབ་ཀྱི་མེད། ནམ་ཞིག་གོ་སྐབས་དང་བསྟུན་ནས་དབུ་མའི་ལམ་གྱི་གོ་དོན་ལེགས་རྟོགས་མཚམས་དབུ་མའི་ལམ་ཁོ་ན་དང་། ༸གོང་ས་མཆོག་གི་ལམ་སྟོན་ལ་ཤར་སྐྱོད་བྱ་རྒྱུར་ཐེ་ཚོམ་ཡོད་མི་སྲིད། རང་རིགས་སྤུན་ཟླ་རྣམས་ལ་འབོད་བསྐུལ་ཞུ་རྒྱུ་ཞིག་ལ། སྐབས་གསུམ་པའི་བཀའ་བློན་ཁྲི་པ་དང་བོད་མི་མང་སྤྱི་འཐུས་ཀྱི་འོས་ཤོག་ཐོག་རང་དོན་རང་གཅེས་ཀྱི་དམ་དོན་གནང་རོགས་ཞུ་རྒྱུ་དང་། ཆེས་འགག་རྩའི་དུས་འདིར་འོས་ཤོག་གི་ཐོབ་ཐང་ཡོད་པའི་བོད་རྒྱལ་ཁབ་ཆེན་པོའི་སྤྱི་འབངས་ཤིག་ཡིན་ན། རང་གི་སྣ་ཐག་རང་མགོ་ལ་དཀྲིས་ཏེ་རང་ཉིད་ཀྱི་ཐོབ་སྐལ་འོས་ཤོག་གཅིག་པུ་དེ། ན་གཞོན་ཤེས་ཡོན་དང་སྤྱི་དོན་ལྷག་བསམ་ཅན། བོད་གཞུང་གི་ལྟ་གྲུབ་དབུ་མའི་ལམ་གྱི་ལྟ་བ་ཁས་ལེན་ཅིང་༸གོང་ས་ཡིད་བཞིན་ནོར་བུའི་བཀའ་གསུང་ཅི་སྒྲུབ་ཞུ་མཁན་ཞིག་ལ་བླུག་རྒྱུ་མཁྱེན།