ཕྱི་ཚེས་ ༢༠ ཉིན། རྒྱལ་སྤྱིའི་ཉེ་ཡངས་ཚོགས་པས་རྒྱ་ནག་གིས་ཡུ་གུར་མི་རིགས་ཀྱི་བདེན་དོན་འཐབ་རྩོད་པ་ལྕམ་རཱ་བྷེ་ཡ་ལགས་ཀྱི་བུ་ཨ་བྷུ་ཌོ་རིག་ཡེའུ་མོའུ་ལགས་ཀློད་གྲོལ་གཏོང་དགོས་པའི་འབོད་སྐུལ་ཞུས་འདུག
ཤིན་ཅིང་ཡུ་གུར་མི་རིགས་ཀྱི་རང་དབང་འཐབ་རྩོད་པ་དང་། འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་ལྕམ་རཱེ་བྷེ་ཡ་ཁ་ཌར་ལགས་ཀྱི་བུ་ཨ་བྷུ་ཌོ་རིག་ཡེའུ་མོའུ་ལགས་ལ། ཕྱི་ལོ་ ༢༠༠༧ ལོར་རྒྱ་ནག་གཞུང་གིས་རྒྱལ་ཁབ་ཁ་བྲལ་གྱི་ཉེས་མིང་བཏགས་ཏེ། ལོ་ ༩ ཡི་ཁྲིམས་ཐག་བཅད་དེ་ད་ལྟ་ཤིན་ཅིང་ཝོ་རོའུ་མོའུ་ཆི་བཙོན་ཁང་དུ་བཅུག་ཡོད་པ་དང་། བདུན་ཕྲག་སྔོན་མའི་ནང་ཁོང་གི་གཉེན་ཉེ་ཞིག་བཙོན་ཁང་དུ་ཁོ་ལ་ཐུག་འཕྲད་བྱེད་དུ་སྐྱོད་སྐབས། ཨ་བྷུ་ཌོ་རིག་ཡེའུ་མོའུ་ལགས་ཀྱིས་གཉེན་ཉེ་དེ་ལ། འདས་པའི་ལོ་མང་རིང་བཙོན་ཁང་དུ་རྒྱ་ནག་གི་ཉེན་རྟོག་པ་དང་དམག་མི་ཚོས་ཁོང་ལ་གཅར་རྡུང་མནར་བཅོད་ཚོད་མེད་བཏང་བར་བརྟེན། ད་ཆར་གཟུགས་པའི་གནས་སྟངས་ཉིན་རེ་བཞིན་ཇེ་སྡུག་དུ་འགྲོ་བཞིན་ཡོད་སྐོར་བརྗོད་ཡོད་འདུག
རྒྱལ་སྤྱིའི་ཉེས་ཡངས་ཚོགས་པས་གསར་ལམ་ཁག་ཏུ་བརྗོད་པ་ལྟར་ན། ཟླ་གཅིག་གི་སྔོན་ནས་བཟུང་ཨ་བྷུ་ཌོ་རིག་ཡེའུ་མོའུ་ལགས་བཙོན་ཁང་གཞན་ཞིག་ཏུ་ཁེར་རྐྱང་གིས་བཙོན་འཇུག་བྱས་ཡོད་པ་དང་། དེ་ནི་རྒྱ་གཞུང་གིས་བཙན་གྱིས་ཉེས་འགེལ་བྱས་པའི་ནག་ཉེས་རྣམས་ཁོ་རང་གིས་ཁས་ལེན་མ་བྱས་པ་དང་། ཆ་རྐྱེན་བཏོན་པའི་ཡིག་ཆ་ཁག་ལ་མིང་རྟགས་མ་བཀོད་བ་བཅས་ལ་བརྟེན་ཏེ། ཁོ་ལ་ཉེན་རྟོག་པས་མི་སྤྱོད་ལས་འདས་པའི་གཅར་རྡུང་བཏང་སྟེ། ད་ཆར་གཟུགས་པོར་རྨས་སྐྱོན་ཚབས་ཆེན་ཕོག་ཡོད་སྐོར་བརྗོད་འདུག
རྒྱལ་སྤྱིའི་ཉེས་ཚོགས་པའི་འགན་འཛིན་གཞོན་པ་ཁ་ཐི་རེན་བྷ་བྷིར (Catherine Baber) ལགས་ཀྱིས། ཨ་བྷུ་ཌོ་རིག་ཡེའུ་མོའུ་ལགས་ལ་ཉེན་རྟོག་པས་ཚུལ་མིན་མནར་གཅོད་བཏང་བའི་གནས་ཚུལ་ལ་རྒྱ་ནག་གཞུང་གིས་རྟོག་ཞིབ་བྱས་ཏེ། ཁོང་ལ་སྨན་བཅོས་ཀྱི་མཐུན་རྐྱེན་བསྐྲུན་དགོས་པའི་འབོད་སྐུལ་བྱས་ཡོད་པ་རེད།
ཨ་བྷུ་ཌོ་རིག་ཡེའུ་མོའུ་ལགས་ནི་ལྕམ་རཱེ་བྷེ་ཡ་ལགས་སུ་བུ་ཕྲུག་ ༡༡ ཡོད་པའི་ནང་གི་གཅིག་ཡིན་པ་དང་། ད་དུང་ཁོང་མོའི་བུ་ཨ་ལེ་མོའུ་ལ་ཡང་རྒྱལ་ཁབ་ཀྱི་གསང་བ་ཕྱིར་སྒྲོག་བྱེད་མཁན་གྱི་ཉེས་མིང་འོག་ད་ལྟ་རྒྱ་ནག་གི་བཙོན་འོག་ཏུ་ལྷག་ཡོད་འདུག
གསར་འགོད་པ། ཚེ་རིང་རྒྱལ།
ཡུ་གུར་མི་རིགས་ཀྱི་རུས་ཁོག་ལྕགས་ལས་གྲུབ་ཟེར་བ་བཞིན། ཁོང་ཚོར་རང་དབང་འཐབ་རྩོད་ཀྱི་སྙིང་སྟོབས་ཆེན་པོ་ཡོད་རེད། བོད་པ་ནང་བཞིན་འུར་ལངས་ཆོག་ཆོག་དང་། འུར་འཇགས་སློ་བོ་དེ་འདྲ་ཡོད་པ་མ་རེད། ཡུ་གུར་བའི་མི་ཞིག་ལ་སུན་གཙེར་དང་ཕོག་ཐུག་བཏང་བ་ཡིན་ན་གཞིས་བདག་བཙན་པོ་ཞིག་གི་ཐུགས་དཀྲུགས་པ་དང་གཅིག་མཚུངས་ཡིན་ཟེར་སྲོལ་ཡོད་པ་རེད། སྔར་ལོ་ནས་བཟུང་ཡུ་གུར་མི་རིགས་ཡར་ལངས་མགོ་བརྩམས་ཟིན་པ་རེད། ཁོང་ཚོའི་མི་རིགས་ཀྱི་དཔའ་རྒོལ་སྔ་རྗེས་སུ་འཐོན་གི་རེད།