ཐའེ་ཝན་ནང་བོད་དོན་གོམ་བགྲོད།

སྐུའི་གཅེན་པོ་སྟག་འཚེར་རིན་པོ་ཆེ་མཆོག་གི་སྲས་འཇིགས་མེད་ནོར་བུ་ལགས་ཀྱི་འདས་པའི་མི་ལོ་དུ་མའི་རིང་ནས་ཨ་རིའི་མངའ་སྡེ་དང་། ས་ཁུལ་མང་པོའི་ནང་བོད་དོན་གོམ་བགྲོད་ཀྱི་ལས་འགུལ་རབས་དང་རིམ་པ་སྤེལ་ཡོད་པ་ལྟར། ཕྱི་ཚེས་ ༡༠ ཉིན་ཏེ་འདི་ལོའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་དེ་ཁོང་དང་བོད་མི་གསུམ་གྱིས་ཐའེ་ཝན་གྱི་རྒྱལ་ས་ཐའེ་པེ་ནས་ལྷོ་ཕྱོགས་ཀྱི་གྲོང་ཁྱེར་ཀོའོ་ཞོན་པར་ཉིན་གྲངས་ ༡༣ རིང་བོད་དོན་གོམ་བགྲོད་ཀྱི་ལས་འགུལ་ཞིག་སྤེལ་ཏེ། ཟླ་འདིའི་ཕྱི་ཚེས་ ༢༢ ཉིན་ལས་འགུལ་མཇུག་སྒྲིལ་ཡོད་འདུག

གོམ་བགྲོད་དེའི་དམིགས་ཡུལ་གཙོ་བོ་ནི། ཐའེ་ཝན་མི་མང་ལ་བོད་དོན་དྲིལ་བསྒྲགས་དང་བོད་དོན་ལ་སྔར་ལས་ལྷག་པའི་དོ་སྣང་ཡོང་ཆེད་ཡིན་འདུག་ལ། ཐེངས་འདིའི་གོམ་བགྲོད་ཀྱི་ལས་འགུལ་དང་འབྲེལ་སྲས་འཇིགས་མེད་ནོར་བུ་ལགས་ཀྱིས་ཐའེ་ཝན་གྱི་གསར་ལམ་ཁག་ཏུ། ང་ཚོའི་གོམ་བགྲོད་ཀྱི་ལས་འགུལ་ནང་ཞུགས་མཁན་སུ་ཞིག་ཡིན་ཡང་། ང་རང་གི་ངོས་ནས་དགའ་བསུ་ཞུ་བཞིན་ཡོད། གང་ཡིན་ཞེ་ན། བོད་ཀྱི་གནད་དོན་དེ་བོད་མི་གཅིག་པུའུ་གནད་དོན་ཞིག་མིན་པར་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནད་དོན་ཞིག་ཆགས་ཡོད་ཅིང་། འདས་པའི་མི་ལོ་ ༥༠ ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་སྟེ།བཙན་གནོན་འོག་བོད་མི་ས་ཡ་ ༢ ལྷག་རྐྱེན་ལམ་དུ་ཕྱིན་ཡོད་ལ། ད་དུང་ཡང་བོད་ནང་གི་བོད་མི་མང་པོ་ཚོར་རང་དབང་མེད་པའི་གནས་སྟངས་དེ་རྒྱལ་སྤྱིའི་སྤྱི་ཚོགས་དང་ཐའེ་ཝན་མི་མང་གིས་ཤེས་རྟོགས་ཐུབ་པར་བྱ་དགོས། ཞེས་བརྗོད་ཡོད་འདུག

ཐེངས་འདིའི་གོམ་བགྲོད་ཐད་ཐའེ་ཝན་བོད་ཀྱི་གཞོན་ནུ་ལྷན་ཚོགས་གཙོས་གཞུང་འབྲེལ་མིན་པའི་ཚོགས་པ་ཁག དེ་བཞིན་ཐའེ་ཝན་བོད་དོན་རྒྱབ་སྐྱོར་བ་སོགས་ཀྱིས་རོགས་རམ་གནང་ཡོད་པར་མ་ཟད། ཐའེ་ཝན་གྱི་བརྒྱུད་ལམ་འདྲ་མིན་དང་མི་མང་གི་ངོས་ནས་དོ་སྣང་ཤུགས་ཆེན་བྱས་ཡོད་སྐོར་ཐའེ་ཝན་གྱི་བརྒྱུད་ལམ་གནས་ཚུལ་སྤེལ་ཡོད་འདུག