“ང་ཚོའི་འཛམ་གླིང” ཟེར་ནས་ཀུན་ཁྱབ་སློབ་གསོ་སྤྲོད་དགོས།

རྒྱལ་ཁབ་ཁག་གི་སྲོལ་རྒྱུན་སློབ་སྦྱོང་སྤྲོད་སྟངས་དེ་དུས་ཚོད་ཡོལ་ཟིན་པ་རེད། ད་ཆ་སློབ་ཕྲུག་ཚོར་ང་ཚོའི་འཛམ་གླིང་ཞེས་ཀུན་ཁྱབ་སློབ་གསོའི་ཐོག་སློབ་སྦྱོང་སྤྲོད་རྒྱུ་གལ་ཆེན་རེད། ངོས་རང་ཚུད་པའི་མི་མང་པོ་ཞིག་གིས་ཚན་རིག་གིས་རྙེད་པའི་གྲུབ་དོན་ལ་ཡིད་ཆེས་བརྟན་པོ་བྱེད་ཀྱི་ཡོད། ཅེས་༧གོང་ས་མཆོག་གིས་གསུངས།

༧གོང་ས་མཆོག་གིས་འབྲས་ལྗོངས་སུ་མཛད་འཕྲིན་རྒྱ་ཆེར་སྐྱོང་བཞིན་ཡོད་པ་ལྟར། ཕྱི་ཚེས་ ༢༡ ཉིན་གྱི་ཞོགས་པའི་ཆུ་ཚོད་ ༩ ཐོག་༧གོང་ས་མཆོག་གིས་སྒང་ཏོག་དཔལ་འབྱོར་རྣམ་རྒྱལ་རྩེད་ཐང་དུ་ཆོས་ཞུ་བ་ཁྲི་ ༢ ཙམ་ལ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཀའ་ཁྲིད་གནང་ཡོད་འདུག་ལ། སྐབས་དེར་མངའ་སྡེ་གཞུང་མང་གཉིས་ནས་༧གོང་ས་མཆོག་བརྟན་བཞུགས་ཤིག་ཀྱང་ཕུལ་ཡོད་འདུག ཐོག་མར་༧གོང་ས་མཆོག་གིས་མང་ཚོགས་ལ་ནང་ཆོས་ངོ་སྤྲོད་བྱས་དོན། སངས་རྒྱས་པའི་ཆོས་ལ་སློབ་སློང་བྱ་དགོས་རྒྱུ་ལས་དད་པ་གཅིག་པུའི་འགྲིག་གི་མེད། བཅོམ་ལྡན་འདས་ཀྱིས་ཐར་པ་འཐོབ་དང་མ་འཐོབ་རང་ཉིད་ལ་རག་ལས་ཞེས་གསུངས་ཡོད། ཆོས་ལ་སློབ་སྦྱོང་མ་བྱས་པར་སྐྱབས་སུ་མཆི་ཞེས་བརྗོད་བསྡད་ན་འགྲིག་ཐབས་མེད། སྐྱབས་འགྲོ་ནི་ཆོས་ལུགས་གཞན་ལའང་ཡོད། སངས་རྒྱས་པའི་ཆོས་ནང་རྒྱུ་མཚན་ལ་བརྟག་དཔྱད་བྱས་ཏེ་ཆོས་ལ་དད་པ་འཐོབ་རྒྱུ་ལས་རྨོངས་པའི་ཐོག་སྐྱབས་སུ་མཆི་ཞེས་བརྗོད་ན་མི་འགྲིག་ཅེས་དང་། མིའི་སྤྱི་ཚོགས་ནང་བྱམས་བརྩེ་དགོས་པ་ལས་དངུལ་གཅིག་པུས་བདེ་སྐྱིད་སྤྲོད་ཐུབ་ཀྱི་མེད། ཁྱིམ་ཚང་སྤྱི་ཚོགས། རྒྱལ་ཁབ་གང་ཡིན་རུང་བྱམས་བརྩེ་ཡོད་ན་བདེ་སྐྱིད་རང་བཞིན་གྱིས་ཡོང་གི་རེད། ཆོས་ལ་དད་པ་ཡོད་མིན་ལ་མ་ལྟོས་པར་བྱམས་བརྩེ་དགོས་རྒྱུ་ཧ་ཅང་གལ་ཆེན་ཡིན་ཞེས་གསུངས།

ཉིན་དེར་༧གོང་ས་མཆོག་གིས་རྒྱ་བོད་ཤེས་རིག་ཉམས་ཞིབ་དཔེ་མཛོད་ཁང་དུ་སློབ་ཕྲུག་ཚོར་བཀའ་གནང་དོན། ལོ་རྒྱུས་སྨྲ་བ་ཚོས་བརྗོད་ན་དུས་རབས་༢༠ ནང་མི་ས་ཡ་ ༢༠༠ ཙམ་དམར་གསོད་བཏང་ཡོད། དམག་འཁྲུག་གིས་དཀའ་ངལ་སེལ་ཐུབ་ན་འགྲིག་གི་ཡོད་ཀྱང་དེ་ལྟར་བྱུང་མེད། དུས་རབས་ ༢༡ མགོ་སྟོད་ཀྱི་དཀའ་ངལ་ཁག་ཅིག་དུས་རབས་ ༢༠ པའི་རྐྱེན་བྱས་ནས་ཡོང་བ་ཞིག་རེད། དཔེར་ན། ཨི་རག་དང་ཨབ་གྷན། འཇིགས་སྐུལ་རིང་ལུགས་པའི་རྙོག་ཁྲ་སོགས་ནི་འདས་པའི་དུས་ཀྱི་ནོར་འཁྲུལ་གྱི་སྲིད་བྱུས་ལས་བྱུང་བའི་རྟགས་མཚན་རེད། ང་ཚོས་ཐབས་ཤེས་དང་འཆར་སྣང་། རྣམ་དཔྱོད་གསར་པ་ཞིག་ལག་བསྟར་བྱ་རྒྱུའི་བསམ་བློ་གཏོང་དགོས་ཀྱི་འདུག་ལ། མ་འོངས་པའི་འཛམ་གླིང་ཅི་འདྲ་ཞིག་ཆགས་མིན་གཞོན་སྐྱེས་ཚོའི་ལག་ཏུ་ཡོད། ཅེས་གསུངས།  

ཕྱི་ཚེས་ ༢༢ ཉིན་༧གོང་ས་མཆོག་གིས་འབྲས་ལྗོངས་སེར་སྐྱ་མང་ཚོགས་ལ་བཀའ་ཕེབས་དོན། ངོས་ཀྱི་གོ་ཐོས་ལ་འབྲས་ལྗོངས་སུ་མི་འདས་གྲོངས་ཕྱིན་ཚེ་ཤི་བོའི་རྗེས་འཇུག་ཡིན་ཞེས་དགོན་པ་ཁག་ལ་འགྲོ་སོང་ཆེན་པོ་གཏོང་དགོས་ཀྱི་ཡོད་ཚོད་འདུག དེ་ལྟར་བྱ་ཐུབ་ན་ཡག་པོ་ཡོད་ཀྱང་མ་ཐུབ་ནའང་ཁྲལ་ལྟ་བུ་བྱ་དགོས་དོན་མེད། ཆ་རྐྱེན་མེད་མཁན་ཚོར་བསྙེན་བཀུར་ཞུ་རྒྱུའི་དངུལ་མེད་པར་དཀའ་ངལ་འཕྲད་ཀྱིན་ཡོད་འདུག་ཟེར། རང་ཉིད་གསོན་པའི་སྐབས་བྱང་ཆུབ་སེམས་ལ་བསམ་བློ་གཏོང་ཐུབ་ན་ཞབས་བརྟན་ཚང་མ་དེའི་འགྲིག་པ་རེད། ངོས་ཀྱང་འཆི་ཁར་བྱང་ཆུབ་སེམས་ཀྱི་ཉམས་ལེན་མ་བརྗེད་པ་ཞིག་བྱ་དགོས་དྲན་བསྡད་ཡོད། ཅེས་གསུངས།

ཟླ་འདིའི་ཕྱི་ཚེས་ ༢༢ ཉིན་༧གོང་ས་མཆོག་འབྲས་ལྗོངས་སུ་འཚོགས་བཞིན་པའི་སེམས་དང་སྲོག་གི་བགྲོ་གླེང་མཇུག་སྡོམ་མཛད་སྒོའི་ཐོག་ཕེབས་ཏེ། སེམས་ཀྱི་རྣམ་གཞག་དང་ཚན་རིག་གི་འབྲེལ་ལམ་ཞེས་པའི་བརྗོད་གཞིའི་ཐོག་བཀའ་གནང་དོན། ལས་གཞི་གང་ཡིན་རུང་དེར་སྐྱོན་བརྗོད་བྱ་རྒྱུ་ལས་སླ་པོ་རེད། སེམས་ཁུར་ཡོད་མཁན་ཚོས་དེང་དུས་ཤེས་ཡོན་ལམ་ལུགས་ནང་མི་འདང་པའི་ཆ་ཡོད་པ་ཤེས་ཀྱི་ཡོད། ཡིན་ནའང་། དེར་འགྱུར་བ་ཇི་ལྟར་གཏོང་དགོས་མིན་ཐོག་དཀའ་ངལ་འཕྲད་ཀྱི་ཡོད། ངོས་ལ་རིག་པ་འདོན་རྒྱུ་གང་ཡང་མེད་ལ། ཤེས་ཡོན་མེད་ལ་ཉམས་མྱོང་ཡང་མེད། ངོས་ལ་དད་པ་བྱེད་མཁན་ཚོས་མཚམས་རེར་ངོས་ལ་ཐམས་ཅད་མཁྱེན་པ་ཞེས་བརྗོད་ཀྱི་ཡོད་ཀྱང་། ངོས་ཀྱིས་དེར་ངོས་ལན་བྱས་མྱོང་མེད་ལ་དོན་དངོས་ཐོག་གང་ཡང་ཤེས་ཀྱི་མེད། ངོས་ཀྱིས་སེམས་ཁུར་ཡོད་མཁན་ཚོར་ཐེངས་མང་ཐུག་སྟེ་དེང་དུས་ཤེས་ཡོན་ལམ་ལུགས་ནང་མི་འདང་པའི་ཆ་གང་ཡོད་པ་རྣམས་ཉམས་ཞིབ་བྱ་དགོས་ཞེས་བརྗོད་རྒྱུ་བྱུང་། ཞེས་གསུངས་འདུག  

ཁོང་གིས་མུ་མཐུད་དུ་གསུངས་དོན། རྒྱལ་ཁབ་ཁག་གི་སྲོལ་རྒྱུན་སློབ་སྦྱོང་སྤྲོད་སྟངས་དེ་དུས་ཚོད་ཡོལ་ཟིན་པ་རེད། ད་ཆ་སློབ་ཕྲུག་ཚོར་ང་ཚོའི་འཛམ་གླིང་ཞེས་ཀུན་ཁྱབ་སློབ་གསོའི་ཐོག་སློབ་སྦྱོང་སྤྲོད་རྒྱུ་གལ་ཆེན་རེད། ངོས་རང་ཚུད་པའི་མི་མང་པོ་ཞིག་གིས་ཚན་རིག་གིས་རྙེད་པའི་གྲུབ་དོན་ལ་ཡིད་ཆེས་བརྟན་པོ་བྱེད་ཀྱི་ཡོད། ཚན་རིག་གིས་དངོས་ཡོད་གནས་ཚུལ་འཚོལ་བསྒྲུབ་བྱ་རྒྱུ་ལས་ཡག་ཉེས་འབྱེད་ཀྱི་མེད། ནང་པའི་ཚན་རིག་ཏུའང་བཟང་ངན་རྣམ་བཞག་གང་ཡང་མི་འབྱེད་པར། དངོས་ཡོད་གནས་ཚུལ་འཚོལ་གྱི་ཡོད་པ་ཚན་རིག་གི་ལངས་ཕྱོགས་ཤིག་རེད། ལངས་ཕྱོགས་དེ་རྨང་གཞིར་བཞག་སྟེ། ཆོས་རྣམས་ཀྱི་བཟང་ངན་དང་ཁེ་གྱོང་གི་རྣམ་གཞག་གཏན་ལ་འབེབས་སྐབས་བཟང་སྤྱོད་ཀྱི་སྐད་ཆ་སླེབས་ཀྱི་ཡོད། བཟང་སྤྱོད་ནི་གཞི་རྩའི་འགྲོ་བ་མི་རིགས་ལ་གལ་ཆེན་པོ་ཡིན་ལ། དེ་ནི་ཚན་རིག་གི་ལངས་ཕྱོགས་ལྟར་དངོས་ཡོད་གནས་སྟངས་ཐོག་འགྲོ་བཞིན་ཡོད། མིའི་ལུས་ཕུང་གྲུབ་སྟངས་ལ་བལྟས་ཀྱང་བཟང་སྤྱོད་གལ་ཆེན་པོ་ཡིན། ཡིན་ནའང་། ང་ཚོས་བཟང་སྐོར་བཤད་སྐབས་ཆོས་ལུགས་སྐོར་ནམ་ཡང་བཤད་རྒྱུ་མེད། ཆོས་ལུགས་དང་འབྲེལ་ནས་བཤད་ན་རྙོག་དྲ་ཆེ་རུ་འགྲོ་གི་རེད། ཅེས་གསུངས།  

༧གོང་ས་མཆོག་གིས་འབྲས་ལྗོངས་མངའ་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་མངའ་སྡེ་བློན་ཆེན་སོགས་གནད་དོན་མི་སྣ་ཁག་གིས་ཕེབས་སྐྱེལ་འོག ཕྱི་ཚེས་ ༢༣ ཉིན་གྱི་སྔ་དྲོའི་ཆུ་ཚོད་ ༨།༤༥ ཐོག་ཐད་འཕུར་གནམ་གྲུ་བརྒྱུད་ས་ལུ་སྒར་དུ་ཞབས་སོར་འཁོད་ཡོད་འདུག་ལ། ས་གནས་དེའི་སེར་སྐྱ་མང་ཚོགས་ཀྱི་ཕེབས་བསུའི་འོག་རྟ་མང་དགོན་དུ་ཆིབས་བསྒྱུར་དང་། དེའི་རྗེས་སྲད་རྒྱུད་མ་དགོན་དུ་ཕེབས་ཏེ། བོད་རིགས་མང་ཚོགས་དང་རྟ་མང་། ས་གནས་ཡུལ་མི། དེ་བཞིན་འབྲུག་དང་འབྲས་ལྗོངས་སོགས་ནས་བཅར་བའི་དད་ལྡན་མང་པོར། རྒྱལ་སྲས་ཐོག་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་བཀའ་ཆོས་གནང་ཡོད་པ་མ་ཟད། སྤྱན་རས་གཟིགས་ཀྱི་བཀའ་དབང་ཡང་གནང་རྒྱུུ་ཡིན་འདུག

གསར་འགོད་པ། དཔལ་ལྡན།