བོད་སོག་བརྙན་འཕྲིན།

ཕྱི་ཚེས་ ༢༦ ཉིན་བོད་ནང་གི་གསར་ལམ་དུ་གནས་ཚུལ་སྤེལ་བ་ལྟར་ན། མཚོ་སྔོན་ཞིང་ཆེན་མཚོ་ནུབ་ཁུལ་རྒྱང་སྒྲོག་ཁང་གིས་འདས་པའི་ཟླ་ངོ་དགུ་ལྷག་གི་རིང་འཆར་འགོད་དང་ཚོད་ལྟ་བྱས་པ་བརྒྱུད་དེ། ད་ཆར་དངོས་སུ་ལེགས་འགྲུབ་བྱུང་ཡོད་པ་དང་། འཆར་ལོའི་ཕྱི་ཟླ་ ༡ པོའི་ཚེས་ ༡ ཉིན་ནས་བཟུང་མཚོ་ནུབ་རྒྱང་སྒྲོག་བརྙན་འཕྲིན་ལྟེ་གནས་ནས་མཚོ་ནུབ་བརྙན་འཕྲིན་ཁང་གི་བོད་སྐད་དང་སོག་སྐད་བརྙན་འཕྲིན་གྱི་ལེ་ཚན་དངོས་སུ་ཤར་གཏོང་བྱ་འཆར་ཡོད་འདུག གཟའ་འཁོར་རེའི་གཟའ་ཟླ་བ་དང་ལྷག་པ། པ་སངས་བཅས་ལ་སོག་སྐད་བརྙན་འཕྲིན་གྱི་ལེ་ཚན་གཏོང་རྒྱུ་དང༌། གཟའ་མིག་དམར་དང་ཕུར་བུ། སྤེན་པ་བཅས་སུ་བོད་སྐད་གཏོང་རྒྱུ་ཡིན་འདུག བོད་སྐད་ལེ་ཚན་ནང་ ༼ མཚོ་ནུབ་གསར་འགྱུར ༽ དང་། ༼ ཚྭ་འདམ་གླུ་གར ༽ ༼ ཞིང་ཕྱུགས་སྐར་ཁུང་ ༽ སོགས་གོ་སྒྲིག་བྱས་ཡོད་འདུག   

མཚོ་ནུབ་སོག་བོད་རང་སྐྱོང་ཁུལ་ནི། མཚོ་སྔོན་ཞིང་ཆེན་གྱི་སོག་རིགས་དང་བོད་རིགས་འདུས་སྡོད་ཀྱི་ས་ཁུལ་ཆེ་ཤོས་ཤིག་ཡིན་ཞིང་། མཚོ་སྔོན་ཞིང་ཆེན་གྱི་བྱང་ཕྱོགས་སུ་གནས་ཡོད་ལ། ཁུལ་དེར་ད་ལྟའི་རྒྱ་ནག་གི་བགོ་སྟངས་ལྟར་ན། སོག་རིགས་དང་བོད་རིགས་གཙོས། ཧེ་རིགས། ཧོར་རིགས། ཟ་ལར་རིགས་བཅས་མི་རིགས་ ༢༩ ལྷག་ཡོད་པར་མ་ཟད། ཁུལ་དེའི་ཁོང་གཏོགས་སུ་གཏེར་ལེན་ཁ་དང་ན་གོར་མོ། རྫོང་གསུམ་བཅས་ཡོད་པ་དང་།  ༡༩༦༣ ལོ་ཁུལ་འདིར་མཚོ་ནུབ་སོག་བོད་ཧ་སག་རིགས་རང་སྐྱོང་ཁུལ་བཅས་བཏགས་ཤིང་། ཕྱིས་སུ་ཁུལ་འདིའི་སོག་རིགས་མི་འབོར་ཁྲི་ ༢།༤༧ དང་བོད་རིགས་མི་འབོར་ཁྲི་ ༤།༡༡ ཙམ་ཟིན་ཡོད་སྟབས། ད་ལྟའི་མཚོ་ནུབ་སོག་བོད་རིགས་རང་སྐྱོང་ཁུལ་ཞེས་མིང་སྒྱུར་བྱས་ཡོད་འདུག ད་ལྟའི་ཆར་ཁུལ་དེར་མི་གྲངས་ཁྲི་ ༣༦།༩༡  དང་། ས་བབ་ཀྱི་མཐོ་ཚད་རྨི་ ༣༠༠༠ ཡས་མས་ཡིན་སྟབས།  མང་ཆེ་བའི་ཕྱུགས་ཟོག་ལ་བརྟེན་ནས་འཚོ་བ་རོལ་གྱིན་ཡོད་པ་རེད།

གསར་འགོད་པ། དོན་གོ