གྲྭ་བ་ཞིག་གིས་སོ་སོར་གྲི་བཙུགས་ཏེ་རང་ཤི་བརྒྱབ་སོང་།

ས་བྱི་ཞི་རྒོལ་ཆེན་མོའི་སྐབས་ལྷ་སའི་ངོ་རྒོལ་ནང་ཞུགས་མྱོང་མཁན། ཁམས་སོག་རྫོང་ལྕམ་མདའ་ཞང་ནས་ཡིན་པའི་གྲྭ་ཐུབ་བསྟན་ནོར་བུ་ལགས་རྒྱའི་བཙོན་ཁང་ནས་བཙོན་གྲོལ་ཐོབ་སྟེ་རྒྱ་གར་ནང་སྐྱབས་བཅོལ་དུ་འབྱོར་ཡོད་ཅིང་། ཉེ་ལམ་འདི་གའི་གསར་འགོད་པས་ཁོང་ལ་ཐུག་འཕྲད་བྱས་ཏེ་ཞི་རྒོལ་ཆེན་མོའི་སྔ་ཕྱིའི་གནས་ཚུལ་སྐོར་ལ་རྒྱུས་ལོན་བྱས་ཡོད།

གྲྭ་ཐུབ་བསྟན་ནོར་བུ་ལགས་ཀྱིས་ཐོག་མར་ཁོས་འབྲས་སྤུངས་དགོན་པར་སློབ་གཉེར་དུ་ཡོང་བའི་སྐོར་ངོ་སྤྲོད་གནང་དོན། ༢༠༠༦ ལོར་ང་རང་ལྷ་ས་འབྲས་སྤུངས་དགོན་པར་སློབ་གཉེར་དུ་ཡོང་བ་ཡིན། འོན་ཀྱང་ཟུར་ཞུགས་ཐོག་སྡོད་པ་ལས་ཚོགས་སུ་ཚུད་ཀྱི་ཡོད་པ་མ་རེད། འབྲས་སྤུངས་ཀྱི་གྲྭ་བ་མང་དག་ཅིག་ང་དང་གཅིག་མཚུངས་རེད། ཆོས་ར་མ་གཏོགས་ཚོགས་སུ་འགྲོ་ཆོག་གི་མ་རེད། དགོན་པ་དེར་དང་ཐོག་གྲྭ་བ་ ༡༠༠༠ ཙམ་འདུག་ལ། དེ་དག་མང་ཆེ་བ་ཁམས་དང་ཨ་མདོ་ནས་ཕེབས་པ་རེད་འདུག དེ་སྔོན་དགོན་པར་དམ་དྲག་དེ་ཙམ་མེད་ཀྱང་། རིམ་བཞིན་རང་སྐྱོང་ལྗོངས་དང་རྫོང་གི་ཡིག་ཆ་མེད་ན་ཟུར་ཞུགས་གྲྭ་བ་དགོན་པར་ཉར་ཆོག་གི་མེད་ཅེས་བཙན་བཀའ་བཏང་སོང་། ཞེས་བརྗོད་བྱུང་།

ཞི་རྒོལ་སྐབས་ཀྱི་འབྲས་སྤུངས་དགོན་པའི་སྣང་ཚུལ་བརྗོད་དོན། ༢༠༠༨ ལོའི་ཕྱི་ཟླ་ ༣ པའི་ཚེས་ ༡༠ ནས་ ༡༢ བར་ཉིན་གསུམ་རིང་ང་ཚོས་ངོ་རྒོལ་བྱས་པ་ཡིན། ཕྱི་ཚེས་ ༡༤ ཉིན་ལྷ་ས་གྲོང་ཁྱེར་དུ་མང་ཚོགས་ཀྱིས་ངོ་རྒོལ་བྱས་སོང་། སྐབས་དེར་དམག་མིས་གསོད་དགོས་པ་བསད། རྡུང་དགོས་པ་བརྡུང་། འཛིན་དགོས་པ་རྣམས་བཟུང་རྗེས། པར་རིས་ནང་ཐོན་པའི་སེ་འབྲས་དགའ་གསུམ་གྱི་ལས་འགུལ་སྣེ་ཁྲིད་པ་དང་ཇུས་འདོན་པ་སོགས་རེ་རེ་བཞིན་བཟུང་བ་རེད། སེ་རའི་གྲྭ་བ་རྣམས་ལྷ་སའི་གུ་རུ་ཟམ་པ་ཕྱོགས་ཀྱི་བཙོན་ཁང་དུ་བཅུག་པ་དང་། འབྲས་སྤུངས་གྲྭ་བ་ཚོ་ལྷ་སའི་ལྷོ་ནུབ་ཕྱོགས་ཀྱི་སྙེ་ཐང་སྒྲོལ་མ་ལྷ་ཁང་གི་འཁྲིས་སུ་ཡོད་པའི་དམག་སྒར་ཞིག་ཏུ་བཅུག་སོང་། ང་ཚོ་དེར་འཇུག་དོན་ནི་ལྷ་སའི་བཙོན་ཁང་ཁག་ཏུ་བཙོན་པས་ཁེངས་ཡོད་པས་རེད། སྐབས་དེར་ལྷ་སར་མདོ་དབུས་ཁམས་གསུམ་ཀྱི་བོད་མི་མང་པོ་ཞིག་ཀྱང་བཙོན་འཇུག་བྱས་ཡོད། ཞིང་ཆེན་སོ་སོའི་གྲྭ་བ་རྣམས་སོ་སོར་བཙོན་བཅུག་བྱས་ཏེ། ཟླ་གཅིག་གི་རྗེས་སོ་སོའི་ཕ་ཡུལ་གྱི་བཙོན་ཁང་ཁག་ཏུ་རྩིས་སྤྲད་སོང་། ང་ཚོ་ལྷ་སའི་ཚལ་གུང་ཐང་དུ་ཡོད་པའི་བཙོན་ཁང་ཞིག་ཏུ་བཅུག་ཏེ། ཟླ་བ་ ༨ ཙམ་རིང་བཀག་ཉར་བྱས་སོང་། དེའི་རྗེས་ཆབ་མདོར་ཁྲིད་དེ་ཁུལ་དེའི་བཙོན་ཁང་ཞིག་ཏུ་ཟླ་ ༡ རིང་བསྡད་པ་ཡིན། བཙོན་གྲོལ་ཐོབ་རྗེས་ཀྱང་བདུན་ཕྲག་རེར་ས་གནས་ལས་ཁུངས་སུ་ངོ་བཅར་གྱིས་ཐོ་འགོད་བྱ་དགོས་ཤིང་། ང་ཚོ་མི་འདྲ་མིན་ལ་ཐུག་མི་ཆོག་པ་དང་ཐག་རིང་དུ་འགྲོ་མི་ཆོག་པ། ས་གནས་དགོན་པར་ཡང་འགྲོ་མི་ཆོག་པ་མ་ཟད། གྲྭ་ཆས་ཀྱང་གྱོན་ཆོག་གི་མེད་ཟེར།

འབྲས་སྤུངས་དགོན་པ་དམག་མིས་བཙན་བཟུང་བྱས་པའི་ཐད་ལ་ཁོང་གིས་མུ་མཐུད་དོན། ཕྱི་ཚེས་ ༡༣ གྱི་དགོང་མོར་རྒྱ་དམག་སྟོང་ཕྲག་དུ་མ་འབྲས་སྤུངས་སུ་ཡོང་སྟེ། དགོན་པའི་མཐའ་བསྐོར་ཏེ་ཟླ་གཅིག་རིང་དམ་དྲག་ཤུགས་ཆེན་བྱས་པ་རེད། དམ་དྲག་བྱས་པའི་དབང་གིས་གྲྭ་བ་ཞིག་འུ་ཐུག་སྟེ་སོ་སོར་གྲིས་བཙུགས་ཏེ་རང་ཤི་བརྒྱབ་ཡོད། གྲྭ་བ་ཚོས་ངོ་རྒོལ་རིམ་པར་བྱས་ཀྱང་རྒྱ་དམག་གིས་དགོན་པའི་མཐའ་བསྐོར་ཏེ་གྲྭ་བ་གཅིག་ཀྱང་ཕྱིར་ཐོན་བཅུག་མེད་སྟབས། གྲྭ་མང་ལ་ཟ་མ་དང་འཐུང་ཆུའི་དཀའ་ངལ་འཕྲད་པ་རེད། དེ་ལྟར་ཟླ་བ་གཅིག་ཙམ་ཕྱིན་པའི་མཚན་མོ་ཞིག་ལ་གྲྭ་བ་ཚོ་གཉིད་ཁུག་པའི་སྐབས་དང་བསྟུན་ཏེ། རྒྱ་དམག་གིས་དུས་གཅིག་ཏུ་དགོན་པའི་གྲྭ་ཤག་རེ་རེར་འཇབ་རྒོལ་བྱས་ཏེ། ང་ཚོ་ངོ་རྒོལ་བྱེད་མཁན་རྣམས་འཛིན་བཟུང་བྱས་ཤིང་། མགོ་ལ་མེ་མདའ་བཙུགས་ཏེ་གྲྭ་བ་རྫུན་མ་ཞེས་འཇིགས་སྣང་སྐུལ་ཞོར་མེ་མདའི་རྒྱབ་ཤིང་གིས་ཚོད་མེད་དུ་མགོ་དང་སྒལ་བར་བཞུས་པ་དང་རྐང་པས་རྡོག་རྫུས་བཏང་བ་སོགས་བྱས་བྱུང་། ཞེས་བརྗོད།

ད་ལྟའི་འབྲས་སྤུངས་དགོན་པའི་གནས་སྟངས་ཐད་ཁོང་གིས་བརྗོད་དོན། གོ་ཐོས་ལྟར་ན། ཞི་རྒོལ་རྗེས་འབྲས་སྤུངས་སུ་གྲྭ་བ་ ༡༠༠ ཙམ་ཡང་ལོང་གི་མེད་པ་དང་། ཆོས་ར་འགྲོ་མཁན་གྲྭ་བ་ ༢༠ ལྷག་ལས་མི་འདུག་ཟེར། ང་ཚོ་དགོན་པར་འགྲོ་མི་ཆོག་པ་དང་གལ་ཏེ་ཕྱིན་ན་ནང་མི་ཚོར་དཀའ་ངལ་ཆེན་པོ་འཕྲད་ཀྱི་ཡོད། སློབ་གྲྭ་འགྲོ་བསམ་ཡང་རྫོང་དང་ཞིང་ཆེན་གྱི་ཆོག་མཆན་མེད་ན་ལམ་ཁ་མེད། འབྲས་སྤུངས་འདབས་ཀྱི་ལྷ་མོ་འཁྲབ་ས་ཞིག་ཡོད་པ་དེ་དམག་སྒར་དུ་བསྒྱུར་འདུག་པ་མ་ཟད། སྨན་ཁང་དེ་ཚོའང་དམག་མིའི་སྡོད་གནས་བཟོས་ཚར་འདུག  ༢༠༠༩ ལོའི་ ༣།༡༤ གྱི་ཉིན་བཙན་ཚུགས་ཀྱིས་ང་ཚོར་ནག་ཉེས་ངོས་ལེན་དང་རྒྱལ་གཅེས་ཆོས་ཀྱི་སློབ་གསོ་སྤེལ་ཏེ་སུན་གཙེར་ཡང་ཡང་བཟོས་བྱུང་། དཀའ་ངལ་དེ་དག་ལ་གཡོལ་ཆེད་འདི་ལོའི་ལོ་མགོར་ང་རང་གིས་ནང་མིར་གྲོས་བྱས་ཏེ། རི་ཁྲོད་ལ་སྒོམ་རྒྱག་ཏུ་འགྲོ་རྒྱུ་ཡིན་ལབ་སྟེ་ལྷ་སར་ཡོང་བ་ཡིན། ལྷ་ས་ནས་ལམ་ཁྲིད་པ་ཞིག་ལ་རྒྱ་སྒོར་ ༡༥༠༠༠ ཙམ་སྤྲད་དེ་འགྲམ་བརྒྱུད་བལ་ཡུལ་དུ་ཡོང་བ་ཡིན། བརྗོད་བྱུང་།

ཆབ་སྲིད་བཙོན་པའི་གནས་སྟངས་སྐོར་ལ་ཁོང་གིས།  བལ་ཡུལ་སྣེ་ལེན་ཁང་དུ་འབྱོར་མཚམས་ཆབ་སྲིད་བཙོན་པ་ཡིན་ཟེར་མཁན་མང་པོ་ཞིག་འབྱོར་འདུག ཁོང་ཚོར་ཟུར་ནས་ཁང་པ་དང་མཐུན་རྐྱེན་གཞན་ལས་ལྷག་ཅིག་སྤྲོད་བཞིན་འདུག་ལ་ཁོང་ཚོར་རོགས་རམ་བྱེད་མཁན་མང་པོ་འདུག དེའི་ནང་དཀར་མཛེས་ཕྱོགས་ནས་མང་པོ་ཡོད་པ་མ་ཟད། ནང་མི་ཆ་ཚང་འབྱོར་བསྡད་མཁན་ཡང་འདུག ང་ལ་ངོ་ཤེས་སོགས་གང་ཡང་མེད་དུས་བཙོན་ཁང་ཡིག་ཆ་དང་གཟུགས་པོའི་རྨ་ཁ་སོགས་བསྟན་ཀྱང་ཁ་ཡ་བྱེད་མཁན་དེ་ཙམ་མི་འདུག ཡིན་ནའང་། ངའི་སེམས་སུ་ང་རང་རྒྱ་གར་ལ་ལྟོ་གོས་ཆེད་ཡོང་བ་ཞིག་མིན་སྟབས། སློབ་སྦྱོང་ཡག་པོ་ཞིག་ཐོབ་ན་འགྲིག་སོང་བ་རེད་བསམ་བྱུང་། ཅེས་བརྗོད།

གསར་འགོད་པས་ཁོང་ལ་གནས་ཚུལ་དེ་དག་བོད་གཞུང་ལ་སྙན་གསེང་ཞུས་ཡོད་མེད་དྲིས་པར། བདེ་སྲུང་ལས་ཁུངས་ལ་ང་རང་འཛིན་བཟུང་ཡིག་ཆའི་ངོ་བཤུས་ཤིག་ཕུལ་ཡོད། ཟླ་གསུམ་པའི་ཚེས་ ༡༤ ཉིན་གྱི་ལྷ་སའི་ངོ་རྒོལ་སྐབས་ང་རང་འབྲས་སྤུངས་དགོན་པའི་གྲྭ་བ་རྣམས་དང་མཉམ་དུ་ཡོད་པ། རྒྱ་གཞུང་གི་བརྙན་འཕྲིན་ནང་ཐེངས་ཁ་ཤས་ལ་བསྟན་ཡོད་པ་སོགས་བཤད་ཡོད། འོན་ཀྱང་ང་རང་ཆབ་སྲིད་བཙོན་པ་ཡིན། ང་ལ་ཐོབ་ཐང་དགོས་ཞེས་གང་ཡང་བཤད་མེད། དེར་ཨུ་ཚུགས་རྒྱག་འདོད་ཀྱང་མི་འདུག ཅེས་བརྗོད།

ཕ་ཡུལ་དུ་ཡོད་པའི་ཆབ་སྲིད་བཙོན་པའི་གནས་སྟངས་སྐོར་དྲིས་པར། ཕ་ཡུལ་དུ་ང་དང་མཉམ་དུ་བཙོན་ཁང་དུ་བསྡད་མྱོང་མཁན་གྲྭ་བ་ ༥ ཡོད་ཅིང་། ཁོང་ཚོ་ད་ལྟ་དགོན་པར་འགྲོ་ཆོག་གི་མེད་དུས། ཁ་ཤས་ཆབ་མདོ་སློབ་གྲྭར་འགྲོ་བཞིོན་ཡོད་པ་དང་། ཁ་ཤས་ལྷ་སར་དུང་དཀར་སློབ་གྲྭ་སོགས་སུ་འགྲོ་བཞིན་འདུག ང་ཚོ་ཚང་མར་མ་འོངས་པར་ཆབ་སྲིད་ཀྱི་ཐོག་ནས་བོད་མི་རིགས་ལ་ཕན་པ་བསྒྲུབ་རྒྱུའི་དམ་བཅའ་ཡོད། ཅེས་དང་། མཐར་ཁོང་ལ་མ་འོངས་པར་དམིགས་ཡུལ་ཅི་ཡོད་དྲིས་པར། ང་རང་ཆུང་དུས་ནས་ཨ་མ་ལགས་གྲོངས་པ་རེད། ༢༠༠༧ ལོར་པ་ལགས་ཀྱང་འདས་གྲོངས་སུ་ཕྱིན་སོང་། ལྷག་ལུས་གཅེན་མོ་རྣམས་མནའ་མར་ཕྱིན་ཡོད་སྟབས་ད་ཆར་ང་ལ་བོད་དུ་སེམས་པ་ཆགས་ས་གང་ཡང་མེད་ཅེས་བརྗོད་བྱུང་།

གསར་འགོད་པ། དཔལ་ལྡན།