ཟླ་འདིའི་ཕྱི་ཚེས་ ༡༧ ཉིན་མཚོ་སྔོན་གནའ་མཁར་ཟི་ལིང་དུ། མཚོ་སྔོན་བརྙན་འཕྲིན་ཁང་གི་གོ་སྒྲིག་བྱས་པའི་ཕྱི་ལོ་ ༢༠༡༡ ལོའི་ལོ་སར་སྤྲོ་ཚོགས་ཆེན་མོ་ཚོགས་ཡོད་ཅིང་། དགོང་ཚོགས་མཛད་སྒོའི་སྟེང་རྒྱ་ནག་རྒྱལ་ཡོངས་སྲིད་གྲོས་ཤེས་ཡོན་དང་རྩོམ་རིག་ལོ་རྒྱུས་ལྷན་ཁང་གི་མགོ་གཙོ་གཞོན་པ་སངས་རྒྱས་སྐྱབས་དང་། མཚོ་སྔོན་ཞིང་ཆེན་དྲིལ་བསྒྲགས་ཚན་པའི་མགོ་གཙོ་ཅི་ཏེ་མཱ་ཅཱ། ཞིང་ཆེན་གྱི་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་མགོ་གཙོ་གཞོན་པ་དབང་མོ་སོགས་སོགས་ཕེབས་ཡོད་འདུག
ཐེངས་འདིའི་དགོང་ཚོགས་ཐོག་དབུས་གཙང་གཞས་མ་པ་སངས་དང་། བདེ་ཆེན་དབང་མོ། སམ་བྷོ་ཊ་ཚན་སྡེབ། མཐོ་སྒང་བུ་མོ་སྤུན་གསུམ། མདོ་བ་ཚེ་སྐྱིད། འཇམ་དབྱངས་སྒྲོལ་མ། རྡོ་རྗེ་ཕུན་ཚོགས། དེ་བཞིན་བོད་རིགས་སྒྱུ་རྩལ་པ་གྲགས་ཅན་སྨན་བླ་སྐྱབས་སོགས་མདོ་དབུས་ཁམས་གསུམ་གྱི་འཁྲབ་སྟོན་པ་དང་སྒྱུ་རྩལ་པ་མང་པོ་ཞིག་ཆེད་དུ་གདན་དྲངས་ཏེ། གཞས་དང་ཞབས་བྲོ། ཁ་ཤགས། ཆང་གཞས། ཨ་རྩེད་སོགས་ཀྱི་རྩེད་རིགས་སྣ་ཁ་ ༢༧ ཙམ་འཁྲབ་སྟོན་བྱས་ཡོད་པ་རེད།
ད་ལོར་ཡང་མདོ་དབུས་ཁམས་གསུམ་གྱི་སྐད་ཐོག་ལེ་ཚན་གཙོ་སྐྱོང་བྱས་ཡོད་པ་མ་ཟད། ལེ་ཚན་ཁག་གི་བརྗོད་བྱ་རྣམས་བོད་རྒྱ་དབྱིན་གསུམ་ཐོག་མང་ཚོགས་ལ་ངོ་སྤྲོད་བྱས་ཡོད་ཅིང་། སྐབས་དེར་ད་དུང་སྐྱེ་རྒུའི་ས་འགུལ་དང་འབྲུག་ཆུའི་འདམ་རུད་གོད་ཆག་སོགས་ཀྱི་བརྗོད་དོན་སྤེལ་ཏེ། མི་རྣམས་ལ་རང་བྱུང་ཁམས་དང་མིའི་འབྲེལ་བར་བསམ་བློ་ཇི་ལྟར་གཏོང་དགོས་པའི་གོ་བསྐོན་བློ་འགུག་བྱས་ཏེ་སེམས་འགུལ་ཐེབས་སུ་བཅུག་ཡོད་འདུག
གཞན་ཡང་། ཟླ་འདིའི་ཕྱི་ཚེས་ ༢༥ ཉིན་མཚོ་སྔོན་བརྙན་འཕྲིན་ཁང་དང་ཁྲི་ཀ་རྫོང་སྲིད་གཞུང་གཉིས་ཀྱི་གོ་སྒྲིག་འོག ཁྲི་ཀ་རྫོང་སྲིན་པོ་གླིང་གར་༼ ༢༠༡༡ ལོའི་དམངས་ཁྲོད་ལོ་གསར་དགོང་ཚོགས ༽ ཞེས་པ་བསྡུས་ཡོད་ཅིང་། སྤྲོ་ཚོགས་དེའི་སྟེང་གཞས་པ་བསམ་ཁོ་དང་། སྒྲོལ་མ་སྐྱབས། སྒྲོལ་མ་མཚོ་སོགས་ཀྱིས་འཁྲབ་སྟོན་བྱས་ཡོད་འདུག
ཟླ་འདིའི་ཕྱི་ཚེས་ ༡༧ ཉིན་གནའ་མཁར་ཟི་ལིང་ནས་བསྡུས་པའི་༼ ༢༠༡༡ལོའི་མཚོ་སྔོན་ལོ་སར་སྤྲོ་ཚོཊ་ཆེན་མོ ༽
ཟླ་འདིའི་ཕྱི་ཚེས་ ༢༥ ཉིན་མཚོ་སྔོན་ཁྲི་ཀ་ནས་བསྡུས་པའི་༼ ༢༠༡༡ལོའི་དམངས་ཁྲོད་ལོ་གསར་སྤྲོ་ཚོགས ༽
གསར་འགོད་པ། དཔལ་ལྡན།
ལོ་སར་སྤྲོ་ཚོགས་ཟབ་རྒྱས་བྱས་ན་ཧ་ཅིང་ཡག་པོ་རེད། བོད་ལ་དངོས་གནས་བཤད་དུས་སྟོན་གཅིག་ཡོད་པ་དེ་ལོ་སར་སྤྲོ་ཚོགས་རེད། ལོ་རེ་རེ་བཞིན་དུ་སྡུག་བསྔལ་ཁོགས་བཟུང་བྱས་ནས་ལོ་སར་སྤྲོ་ཚོགས་མེད་པར་བྱས་ན་སྲོལ་ངན་རྒྱུད་འབྱམས་ལ་སོང་ནས་མཐར་བོད་ལ་ལོ་སར་སྤྲོ་ཚོགས་མེད་པར་འགྱུར་སྲིད།
ཡུལ་ཤུལ་གྱི་ས་ཡོམ་གོད་ཆག་ལ་མགོ་ལོག་གིས་ཚེ་འདས་སྨོན་ལམ་དང་ཤུལ་མི་ལ་རོགས་རམ་བྱས་པ་དེས་དུང་སེམས་མཚན་པ་རེད་མ་གཏོགས་གཞན་མྱ་ངན་བྱས་པ་ལ་འབྲས་བུ་ཅི་ཡོད།
ས་ཡོམ་ཀོད་ཆགས་འོག་མི་དེ་འདྲའི་མང་པོ་ཞིག་ཤི་བས་ལོ་སར་དགོང་ཚོགས་ཤིག་ནི་ཨེ་དགོས་སམ།
མགོ་ལོག་ལ་ལོ་སར་དགོང་ཚོགས་མེད།
ཉེ་སྔོན་ངེད་མགོ་ལོག་མི་རིགས་གླུ་གར་ཚོགས་པས་ད་ལོའི་བོད་ཀྱི་ལོ་སར་དགོང་ཚོགས་ཅི་ལྟར་བསྒྲུབ་པའི་ཐད་ཀྱི་ཚོགས་འདུ་བསྡུས་སོང་། འཚོགས་ཐོག་ཏུ་འགོ་བའི་བདག་ལ་ཁ་ཤགས་གྲ་དག་ཅིག་དགོས་ལུགས་གསུང་བྱུང་། ངས་ལག་པ་ཡར་བཀྱགས་ནས་རང་གི་འདོད་ཚུལ་འདི་ལྟར་བཤད་པ་ཡིན།
“ད་ལོ་ནི་རང་རེའི་ཤ་རུས་ཁྲག་རྒྱུན་གཅིག་པའི་བོད་རིགས་སྤུན་ཟླ་སྟོང་ཚོ་ནས་ཁྲི་ཚོ་བརྒྱུད་དེ་ཡུལ་ཤུལ་ས་འགུལ་ཁྲོད་དུ་རྐྱེན་ལམ་དུ་ཤོར་སོང་། འུ་ཅག་ཤུལ་ལྷག་བོད་མི་རྣམས་ཀྱིས་མྱ་ངན་ཞུ་བའི་དགོང་ཚོགས་ཤིག་མ་བསྡུས་ན། ལོ་སར་དགོང་ཚོགས་འཚོགས་རྒྱུའི་ཡི་ག་གཏན་ནས་མེད། མི་སྐྱིད་ཐོག་བདེ་ཐོག་ན་ཡོད་དུས་ང་ཚོ་བོད་རིགས་སྤུན་ཟླ་ཕུ་ནུ་ཡིན། ང་ཚོ་གངས་ཅན་པའི་དཔུང་རྡང་མཉམ་གཤིབ་དགོས། ངེད་ཚང་གི་ལ་རྒྱ་ཞེས་ཀི་འབོད་བྱེད་པ་མ་ཡིན་ནམ། འདི་ཙམ་ང་ཚོས་ཁ་མཐུན་གྲོས་འགྲིག་མ་བྱུང་ན་ཤི་གསོན་ཀུན་ཁྲེལ་མི་ཡོང་ངམ།
ཟི་ལིང་ནས་ལོ་སར་དགོང་ཚོགས་འཚོགས་ན་འཚོགས་ཏུ་ཆུག ཀན་སུའུ་ནས་བསྒྲུབ་ན་བསྒྲུབ་ཏུ་ཆུག ཡུལ་ཤུལ་རང་གི་མི་རྣམས་ཀྱང་གླུ་བྲོ་ལ་རོལ་འདུག་ཟེར་བ་རེ་ཟུང་ཐོས་མོད། ཡིན་ན་ཡང་ང་ཚོས་གཞན་གྱི་བཟང་བསླབ་དགོས་པ་ལས་ངན་བསླབ་དགོས་པའི་ངེས་པ་ག་ལ་ཡོད། ང་རང་ཉིད་ཀྱང་ད་ལོ་དགོང་ཚོགས་ཆེ་ཆུང་མང་པོར་བོས་ཐལ། འོན་ཀྱང་ལོ་སར་དགོང་ཚོགས་གཅིག་ལ་ཡང་ཞུགས་མེད། འདི་ནི་ཁྲིམས་འགལ་མིན་ལ་ལུགས་འགལ་ཡང་མིན། བོད་ཀྱི་གོམ་གཤིས་ལ་ཉེ་འབྲེལ་གཅིག་ཚེ་ལས་འདས་སོང་ན་ལོ་དེའི་ལོ་སར་སྲོལ་མེད་ན་ད་ལོ་ང་ཚོས་མགོ་ཐོག་ཏུ་དེ་ལས་བརྒྱ་འགྱུར་གྱིས་ཆེ་བ་ཞིག་བྱུང་བ་མ་ཡིན་ནམ། རང་རེའི་ཚོགས་པའི་འགོ་བ་དང་ལས་གྲོགས་རྣམ་པ། ང་མི་ཆུང་ཡང་གཏམ་ལ་བརྩི་འཇོག ཤ་ངན་ཡང་མིག་གི་ཞིབ་བལྟ་ཞིག་བྱེད་རོགས” ཞེས་ཞུས་པར་ལས་གྲོགས་ཡོངས་ཀྱིས་ཤིན་ཏུ་ཡིད་འཐད་པའི་སྒོ་ནས་འུར་གྱི་ལེར་སོང་རྗེས་ངའི་བསམ་ཐོག་ལ་རྟ་རྒྱུགས་སོང་།
ད་དུང་བཤད་རྒྱུ་ཞིག་ཡོད་པ་ནི། ད་ལོ་མི་སྒེར་ངོས་ནས་བསྒྲུབ་ཀྱིན་པའི་ལོ་སར་དགོང་ཚོགས་དེ་དག་ནི་ངའི་སྒེར་ངོས་ཀྱི་ལྟ་བ་ཡིན་ན། མི་རིགས་ཀྱི་ཆེད་དུ་མིན་ལ་སྒྱུ་རྩལ་གྱི་ཆེད་དུའང་མིན་པ་དང་། ལོ་སར་གྱི་ལེགས་སྐྱེས་དེ་བས་ཀྱང་མ་ཡིན་པར་ཁྲེལ་མེད་ཚོའི་སྒོར་གྱི་ཆེད་དུ་ཡིན་པ་ཀུན་གྱིས་ཤེས་པར་བྱོས་ཤིག
གསལ་བཤད། ༼ གོང་གི་རྩོམ་ཡིག་ཐུང་ངུ་དེ་ནི། མགོ་ལོག་གི་སྒྱུ་རྩལ་པ་འཇམ་དབྱངས་བློ་གྲོས་ལགས་ཀྱིས་ཟླ་འདིའི་ཕྱི་ཚེས་ ༢༢ ཉིན་སྤེལ་བའི་ཟིན་བྲིས་ལས་འདྲེན་བཀོད་བྱས་པ་ཡིན། ༽