དེ་རིང་བཞུགས་སྒར་ངྷ་རམ་ས་ལར་བོད་རིག་པའི་ཆེད་མཁས་པ་ཁག་ཅིག་གིས་བོད་དང་སོག་པོ་མན་ཇུ་གསུམ་གྱི་འབྲེལ་བའི་སྐོར་ལ་གཏམ་བཤད་དང་བགྲོ་གླེང་གནང་ཡོད།
དེ་རིང་ཉིན་རྒྱབ་ཆུ་ཚོད་ ༢ པའི་སྟེང་གངས་སྐྱིད་སྤྱི་ཐབ་ཐོག་ཁང་དུ་༼ བོད་སོག་བར་གྱི་ཆིངས་ཡིག་དང་། བོད་དང་མན་ཇུའི་འབྲེལ་བའི་སྐོར ༽ ཞེས་པའི་བརྗོད་གཞིའི་ཐོག་ཉིན་གཉིས་རིང་གི་མཁས་གཏམ་བཤད་བགྲོ་གླེང་ཞིག་དབུ་འཛུགས་གནང་ཡོད་ལ། བགྲོ་གླེང་དེའི་ཐོག་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་གཙོ་ཚེ་རིང་ཤཱཀྱ་ལགས་དང་། ཨ་རིའི་ཨིན་ཌི་ཡ་ནཱ་གཙུག་ལག་སློབ་གྲྭ་ཆེན་མོའི་ཞིབ་འཇུག་སློབ་དཔོན་ཨེ་ལོ་ཊི་སི་ཕི་ལིན་ Elliot sperling སོགས་ཆེད་མཁས་མི་སྣ་ ༧ ཙམ་གྱིས་ཉེ་རབས་བོད་ཀྱི་ལོ་རྒྱུས་དང་འབྲེལ་བའི་སྐོར་ལ་གཏམ་བཤད་གནང་རྒྱུ་ཡིན་པ་དང་། ཚོགས་ཞུགས་གནང་མཁན་བོད་གཞུང་གི་ལྷན་ཁང་ཁག་གི་བཀའ་བློན་རྣམ་པ་དང་སྤྱི་འཐུས་རྒྱུན་ལས་རྣམ་པ། སྡེ་ཚན་ཁག་གི་འགན་འཛིན་དང་ཉམས་ཞིབ་པ། གཞན་ཡང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་སོགས་མི་ ༡༠༠ ལྷག་ཚོགས་ཞུགས་གནང་འདུག
བགྲོ་གླེང་དབུ་འཛུགས་ཀྱི་ཐོག་མར་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་ཚོགས་འདུའི་དམིགས་ཡུལ་སྐོར་ངོ་སྤྲོད་གནང་དོན། དེ་རིང་གི་བརྗོད་གཞི་ནི་བོད་སོག་དང་བོད་དང་མན་ཇུའི་འབྲེལ་བའི་སྐོར་ལ་གཏམ་བཤད་གནང་རྒྱུུ་དེ་རེད། ཉེ་ཆར་མཁས་དབང་ཁོང་རྣམས་སོག་ཡུལ་དུ་ཕེབས་ཏེ་བོད་སོག་གི་འབྲེལ་བའི་སྐོར་གྱི་བགྲོ་གླེང་གནང་ཡོད་ལ། ཁ་སྔོན་བཀྲ་ཤིས་ཚེ་རིང་ལགས་ཀྱིས་ཟླ་བ་འདིའི་ཟླ་མཇུག་ཏུ་མཁས་དབང་རྣམས་བཞུགས་སྒར་དུ་ཕེབས་ཀྱི་ཡོད་སྟབས། བགྲོ་གླེང་དེར་ཉན་ཐུབ་ན་ཕན་ཐོགས་ཡོང་ས་རེད་ཅེས་གསུངས་པ་ལྟར། ཕྱི་དྲིལ་གྱིས་ཀྱང་ལས་དོན་དེ་གལ་ཆེན་ཞིག་ཏུ་མཐོང་སྟེ། བཀའ་ཤག་ལ་སྙན་སེང་ཞུས་པ་བཞིན་བཀའ་འཁྲོལ་ཐོབ་སྟེ། དེ་རིང་གཞུང་ཞབས་རྣམ་པར་མཁས་པའི་གཏམ་བཤད་ཀྱི་ཚོགས་འདུ་འདི་གོ་སྒྲིག་ཞུ་རྒྱུ་བྱུང་བ་རེད། ཚང་མས་མཁྱེན་གསལ་ལྟར། བརྗོད་གཞི་འདི་གཉིས་ནི་ང་ཚོར་ཐོག་མ་ནས་འབྲེལ་བ་ཡོད་པ་ཞིག་ཡིན་སྟབས། ལོ་རྒྱུས་ཀྱི་ཐོག་ནས་གསལ་པོ་ག་རེ་ཡོད་པ་དེ་ཚང་མས་མཁྱེན་དགོས་ཀྱི་ཡོད་ལ། དེར་ཚང་མར་ཤེས་འདོད་དང་ཉན་འདོད་ཀྱང་ཡོད་པ་རེད། ཅེས་གསུངས་སོང་།
སང་ཉིན་མཇུག་སྡོམ་མཛད་སྒོའི་སྟེང་བཀའ་ཁྲི་ཟམ་གདོང་རིན་པོ་མཆོག་ཆེད་ཕེབས་ཀྱིས་འདས་པའི་བོད་སོག་མན་ཇུ་གསུམ་གྱི་ལོ་རྒྱུས་སྐོར་ལ་གསུང་བཤད་གནང་རྒྱུ་ཡིན་འདུག་ཅིང་། བགྲོ་གླེང་འདི་ནི་ཕྱི་ཟླ་ ༡༠ པའི་ནང་སོག་ཡུལ་དུ་བོད་ཀྱི་ལོ་རྒྱུས་སྐོར་གྱི་ཚོགས་འདུ་ཞིག་ཚོགས་རྗེས་སླར་ཡང་བཞུགས་སྒར་དུ་སྐོང་ཚོགས་བྱས་པ་ཞིག་ཡིན་འདུག
ཐེངས་འདིའི་ཉིན་གཉིས་རིང་གི་མཁས་པའི་གཏམ་བཤད་ཀྱི་བརྗོད་གཞི་ཁག་ནི། རྒྱལ་སྤྱིའི་བོད་རིག་པ་ཞིབ་འཇུག་ཚོགས་པའི་ཚོགས་གཙོ་ཚེ་རིང་ཤཱཀྱ་ལགས་ཀྱིས་༼དུས་རབས་ཉི་ཤུ་བའི་མགོ་སྟོད་ནས་བོད་སོག་གི་རྒྱལ་ཁབ་འཛུགས་བསྐྲུན་ལ་དོ་སྣང་དང་ཞིབ་འཇུག༽ ཞེས་པ་དང་། ཨ་རིའི་ཨིན་ཌི་ཡ་ནཱ་གཙུག་ལག་སློབ་གྲྭ་ཆེན་མོའི་ཞིབ་འཇུག་སློབ་དཔོན་ཨེ་ལོ་ཊི་སི་ཕི་ལིན་ལགས་ཀྱིས་༼༡༩༡༣ ལོའི་བོད་སོག་ཆིངས་ཡིག་ནི་རྒྱལ་སྤྱིའི་རང་བཞིན་ལ་ཁ་ཕྱོགས་ཡོད།༽ ཞེས་པ། ཨ་མྱེས་རྨ་ཆེན་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་༼༡༩༡༣ ལོའི་ཟླ་ ༡ པོའི་བོད་སོག་གི་ཆིངས་ཡིག༽ ཝར་ན་མཐོ་སློབ་ཀྱི་རྒྱལ་རབས་སློབ་དཔོན་བྱམས་པ་བསམ་གཏན་ལགས་ཀྱིས་༼༡༩༡༣ ལོའི་བོད་སོག་གི་ཆིངས་ཡིག་ནི་ཁྲིམས་མཐུན་ཞིག་ཡིན།༽ སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་ཀྱིས་༼ བོད་སོག་གཉིས་ཀྱི་འབྲེལ་ལམ་དང་བོད་སོག་ཆིངས་ཡིག་གི་སྔ་རྗེས།༽ བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་༼ བོད་སོག་ཆིངས་ཡིག་མ་བཞག་གོང་གི་བོད་དང་མན་ཇུ་བར་གྱི་འབྲེལ་བར་དཔྱད་པ། ༽བོད་གཞུང་ཤེས་རིག་ལས་ཁུངས་ཀྱི་ཉམས་ཞིབ་པ་ཆུང་ཚེ་རིང་ལགས་ཀྱིས་༼ ཕག་རིའི་གསང་མོལ། བོད་སོག་ཆིངས་ཡིག་གི་གལ་གནད་དང་རྒྱབ་ལྗོངས། ༽ བཅས་ཀྱི་ཐོག་གཏམ་བཤད་གནང་འཆར་ཡོད་འདུག
གསར་འགོད་པ། དཔལ་ལྡན།
༸གོང་ས་སྐྱབས་མགོན་ཆེན་པོར་གུས་ཕྱག་སྔོན་དུ་བཏང་སྟེ། ལོ་སར་གྱི་འཚམས་འདྲི་དང་བསྦྲགས། དེ་གར་བགྲོ་གླེང་པ་དང་གོ་སྒྲིག་པ། ལྷན་ཞུགས་པ་དང་གསར་འགྱུར་བརྒྱུད་ལམ་འདིར་དངོས་སུ་གསན་གཟིགས་གནང་བཞིན་པ་དང་། ལྷག་པར་དུ་བོད་ནང་གི་རྒྱལ་གཅེས་དཔའ་བོ་རྒན་གཞོན་བར་གསུམ་བཅས་ཚང་མར་བརྒྱུད་རིམ་འདི་ནས་རྒྱལ་སྤྱིའི་ལོ་སར་གྱི་འཚམས་འདྲི་བཀྲ་ཤིས་བདེ་ལེགས་ཞུ།
བོད་དང་སོག་པོ་མན་འཇུ་སོགས་འདས་པའི་ལོ་རྒྱུས་རྣམས་ག་ཚོད་གླེང་སློང་བྱས་ཀྱང་རྒྱ་གཞུང་ལ་ཕན་གནོད་གང་ཡང་བྱིན་མི་སྲིད།
དེ་དོན་ང་ཚོས་ད་ནས་བཤད་ནས་བསྡད་པ་དང༌། ཉན་ནས་འདུག་རྒྱུ་ཙམ་མིན་པར་ཚོར་ཤུགས་ཆེ་བའི་གཡོ་འགུལ་ཅིག་རྒྱག་དགོས།
ང་ཚོས་ད་དབར་མི་ལོ་ཧྲིལ་པོ་༦༠ ལྷག་ལ་བཤད་རྐྱང་དང་ཉན་རྐྱང་བྱས་ནས་དུས་ཚོད་སྐྱེལ་ཡོད་པ་ཐེངས་གཅིག་དྲན་གསོ་གཏོང་རོགས། སང་ཕྱི་ལོ་གསར་པ་འགོ་བཙུགས་ཀྱི་ཡོད་སྟབས་ལས་འགུལ་གསར་པ་དང་འཆར་གཞི་གསར་པ། ལངས་ཕྱོགས་གསར་པ། ལྟ་གྲུབ་གསར་པ། རིག་པ་གསར་པ། བསམ་བློ་གསར་པ་སོགས་གསར་པ་རྐྱང་རྐྱང་གི་ལས་དོན་བསྒྲུབ་ཐབས་བྱོས། རྙིང་བཤད་དང༌། གསར་བཤད་སོགས་གོང་ནས་བཤད་པ་དང༌། འོག་ནས་ཉན་རྐྱང་ཁོ་ན་མ་བྱེད་པར་ལས་ཀ་གསར་པ་ཞིག་བསྣམས་ཏེ་རྒྱ་གཞུང་སྐྲག་དགོས་པ་དང༌། བོད་དགའ་དགོས་པའི་གཡོ་འགུལ་ཆེ་བའི་ལས་དོན་བརྩམ་ཐབས་བྱོས།
གསར་འགོད་པ་ཨ་རིག་ལགས་གཙོས་བོད་ཀྱི་དུས་བབ་ལགས་སུ། ཧ་ཅང་ཡག་པོ་འདུག མཁས་པའི་བགྲོ་གླེང་གནང་བའི་དཔྱད་ཞིབ་ཀྱི་སྙན་ཐོ་འདི་དག་རིན་ཐང་ཆེས་པས། བོད་ཀྱི་དུས་བབ་གསར་ཁང་ནས་ཡིག་ཆ་འདི་དག་དྲ་རྒྱར་མྱུར་དགོད་ཐུབ་ན། འབྲེལ་ཡོད་སློབ་གཉེར་བ་མང་དག་ལ་ཐུགས་མཁོ་མཆིས་པས་ཅིས་ཀྱང་ཕྱག་བསྟར་གནང་རོགས་གནང་། ཐུགས་རྗེ་ཆེ།
རྣམ་པ་ཚོས་མཁྱེན་གསལ་ལྟར། རྒྱ་ནག་གཞུང་གི་ནུབ་བརྒྱུད་ཐོན་འབྱེད་ཆེན་མོ་ཞེས་པ་དེས་ཐད་ཀར་དུ་ Ethnocide ཞེས་པ་ཞིག་ལག་ལེན་ལ་བསྟར་གིན་འདུག
འཛམ་གླིང་དམག་འཁྲུག་གཉིས་པའི་རྗེས་ཏེ། ༡༩༤༨ ལོར་མཉམ་འབྲེལ་རྒྱལ་ཚོགས་ཀྱིས་ Convention on Genocide 1948 ཞེས་པ་ཞིག་བཞག་པ་མ་རེད་དམ། ལོ་ ༦༠ རྗེས་ལ་ཏཱ་ལའི་བླ་མ་མཆོག་གིས་ཡོངས་ཁྱབ་ཀྱིས་ Genocide ཞེས་པ་དེ་མདོ་དབུས་མཐོ་སྒང་ལ་རྒྱ་ནག་གཞུང་གིས་མུ་མཐུད་ནས་ལག་བསྟར་བྱེད་ཀྱིན་འདུག་ཅེས་ཡོངས་བསྒྲགས་གནང་བ་མ་རེད་དམ།
ད་ཐེངས་རྣམ་པ་ཚོས་ Genocide དང་ Ethnocide གཉིས་ཀ་གླེང་དགོས་པ་འདྲ་ཞིག་འདུག ད་ཕན་༧གོང་ས་མཆོག་གིས་སྔ་མ་དེ་མ་གཏོགས་ཕྱི་མ་དེ་གླེང་གི་མི་འདུག ངས་ཁ་སང་དེ་རིང་ཕྱི་མ་དེ་མངོན་གསལ་གྱིས་མཐོང་གི་འདུག
བོད་སོག་གནད་དོན་དེ་ནི་ལོ་རྒྱུས་ཀྱི་གནད་དོན་ཞིག་ཡིན་ལ། མ་འོངས་པའི་ཚེ་སྲོག་གི་གནད་དོན་ཞིག་ལ་གཏན་དུ་འབྲེལ་མེད་པའི་ཁ་ཚོན་སུ་ཞིག་གིས་གཅོད་ཐུབ།
བོད་སོག་མེན་ཇུ་གསུམ་ཙམ་མ་ཟད། ཀོ་རི་ཡ་ཇ་པེན་ཀམ་བོ་ཏྲི་ཡ་ལ་སོགས་ཆོས་རིག་གཅིག་འགྱུར་ལྟ་གྲུབ་ཀྱི་གོམ་གང་མདུན་སྤོས་བྱ་དགོས་པའི་དུས་ཚོད་ཅིག་སླེབས་མེད་དམ་སྙམ།
གསར་འགོད་པ་ལགས། ཁྱེད་ཀྱིས་བྲིས་གནང་བའི་གསར་འགྱུར་ནང་། (བགྲོ་གླེང་དེའི་ཐོག་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་གཙོ་ཚེ་རིང་ཤཱཀྱ་ལགས་དང་།) ཞེས་བཀོད་འདུག་པས་ཚེ་རིང་ཤཱཀྱ་ལགས་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་རྒྱུན་ལས་ཡིན་ནའང་ཚོགས་གཙོ་མ་རེད།
ཞིབ་ཕྲ་ཁྱེད་རྣམ་ཚང་གི་གསར་འགྱུར་འདི་རང་ལ་གཟིགས།
https://tibettimes.net/wordpress/news.php?cat=6&&id=3237
ཕྱི་ཚེས་ ༢༠ ཉིན་རྒྱལ་སྤྱིའི་བོད་རིག་པའི་ཚོགས་པ་འདིའི་ཚོགས་གཙོ་དང་རྒྱུན་ལས་རྣམས་འོས་འདེམ་བྱས་པ་དང་། དེ་བཞིན་དུ་ཐེངས་རྗེས་མར་རྒྱལ་སྤྱིའི་བོད་རིག་པའི་ཚོགས་ཆེན་ཐེངས་ ༡༣ པ་དེ་འཚོགས་ཡུལ་བཅས་ལ་གོ་བསྡུར་བྱས་ཡོད། རྒྱལ་སྤྱིའི་བོད་རིག་པའི་ཚོགས་པ་འདིའི་ཚོགས་གཙོ་ནི་ཨོ་ཁུ་སི་ཧྥོར་ཌི་ནས་ཡིན་པའི་ཌོག་ཊར་ ཆར་ལི་སི་ རམ་བྷར་ལགས་རང་འཇགས་བདམས་ཡོད། རྒྱུན་ལས་བཅུ་གསུམ་ཡོད་པའི་གྲས་སུ་དགེ་རྒན་ཆེན་མོ་ཚེ་རིང་ཤཱཀྱ་ལགས་དང་བློ་བཟང་ཤསྟྲི། དགེ་རྒན་ཆེན་མོ་ཚེ་རིང་ཐར་བཅས་ཀྱང་ཚུད་ཡོད་པ་རེད།
ད་རེ་གྱི་ལྷན་འཛོམས་བྱུང་བའི་མཁས་དབང་དག་གིས་གནད་འགག་ཆེ་བའི་བོད་སོག་གི་བྱུང་རབས་ལོ་རྒྱུས་ཐད་བགྲོ་གླེང་བྱུང་བར་དངོས་གནས་དགའ་བོ་བྱུང་།
མ་འོངས་པར་འདི་ལྟ་བའི་བགྲོ་གླེང་ཡང་ཡང་གནང་བར་འཚལ།
དེ་རིང་བཀའ་བློན་རྣམས་འོག་ཡར་ཁ་བསྐོར་འདུག་ད།